ലെഫ്റ്റനന്റ് ഗവർണർ ശ്രീ മനോജ് സിൻഹ ജി, ജമ്മു കശ്മീർ മുഖ്യമന്ത്രി ശ്രീ ഒമർ അബ്ദുള്ള ജി, എന്റെ മന്ത്രിസഭാ സഹപ്രവർത്തകർ ശ്രീ നിതിൻ ഗഡ്കരി ജി, ശ്രീ ജിതേന്ദ്ര സിംഗ് ജി, അജയ് തംത ജി, ഉപമുഖ്യമന്ത്രി സുരേന്ദർ കുമാർ ചൗധരി ജി, പ്രതിപക്ഷ നേതാവ് സുനിൽ ശർമ്മ ജി, എല്ലാ എംപിമാർ, എംഎൽഎമാർ, ജമ്മു കശ്മീരിലെ എന്റെ പ്രിയപ്പെട്ട സഹോദരീ സഹോദരന്മാരെ.

ആദ്യമേ തന്നെ, രാജ്യത്തിന്റെയും ജമ്മു കശ്മീരിന്റെയും പുരോഗതിക്കായി ഏറ്റവും പ്രയാസകരമായ സാഹചര്യങ്ങളിൽ, ജീവൻ പോലും പണയപ്പെടുത്തി പ്രവർത്തിച്ച തൊഴിലാളികൾക്ക് ഞാൻ നന്ദി പറയുന്നു. ഞങ്ങളുടെ ഏഴ് തൊഴിലാളി സുഹൃത്തുക്കൾക്ക് ജീവൻ നഷ്ടപ്പെട്ടു, പക്ഷേ ഇത് ഞങ്ങളുടെ ദൃഢനിശ്ചയത്തിൽ നിന്ന് ഞങ്ങളെ പിന്തിരിപ്പിച്ചില്ല, എന്റെ തൊഴിലാളി സുഹൃത്തുക്കൾ പതറിയില്ല. ഒരു തൊഴിലാളിയും വീട്ടിലേക്ക് മടങ്ങിയില്ല, എല്ലാ വെല്ലുവിളികളെയും അതിജീവിച്ച് ഈ ജോലി പൂർത്തിയാക്കിയവരാണ് ഈ  തൊഴിലാളി സഹോദരന്മാർ. ഇന്ന്, ആദ്യം, നമുക്ക് നഷ്ടമായ നമ്മുടെ ഏഴ് തൊഴിലാളികൾക്കും ഞാൻ ആദരാഞ്ജലി അർപ്പിക്കുന്നു.

സുഹൃത്തുക്കളേ,

ഈ കാലാവസ്ഥ, മഞ്ഞ്, ഈ മനോഹരമായ മഞ്ഞുമൂടിയ പർവതങ്ങൾ, ഇവയെല്ലാം ഹൃദയത്തെ വളരെയധികം സന്തോഷിപ്പിക്കുന്നു. രണ്ട് ദിവസം മുമ്പ്, നമ്മുടെ മുഖ്യമന്ത്രി ഈ സ്ഥലത്തിന്റെ ചില ചിത്രങ്ങൾ സമൂഹമാധ്യമത്തിൽ പങ്കുവെച്ചു. ഈ ചിത്രങ്ങൾ കണ്ട ശേഷം, നിങ്ങൾക്കൊപ്പം ഇവിടെ വരാനുള്ള എന്റെ ആകാംക്ഷ കൂടുതൽ വർദ്ധിച്ചിരുന്നു. മുഖ്യമന്ത്രി ഇപ്പോൾ പറഞ്ഞതുപോലെ, ഞാൻ നിങ്ങളോടെല്ലാം വളരെക്കാലമായി ബന്ധപ്പെട്ടിരിക്കുന്നു, ഞാൻ ഇവിടെ വരുമ്പോൾ, വർഷങ്ങൾക്ക് മുൻപ്, ഭാരതീയ ജനതാ പാർട്ടി സംഘടനയുടെ പ്രവർത്തകനായി  പ്രവർത്തിച്ചിരുന്നപ്പോൾ ഞാൻ ഇവിടെ പതിവായി വരുമായിരുന്നു. സോനാമാർഗ്, ഗുൽമാർഗ്, ഗന്ദർബാൽ, ബാരാമുള്ള എന്നിങ്ങനെ മണിക്കൂറുകളോളം, കിലോമീറ്ററുകൾ കാൽനടയായി ഞങ്ങൾ സഞ്ചരിച്ചിരുന്നു.  ഈ പ്രദേശത്ത് എല്ലായിടത്തും ഞാൻ  ധാരാളം സമയം ചെലവഴിച്ചിട്ടുണ്ട്. അന്നും മഞ്ഞുവീഴ്ച വളരെ ശക്തമായിരുന്നു, പക്ഷേ ജമ്മു കശ്മീരിലെ ജനങ്ങളുടെ പെരുമാറ്റത്തിലെ ഊഷ്മളത കാരണം ഞങ്ങൾക്ക് തണുപ്പ് അനുഭവപ്പെട്ടില്ല.

സുഹൃത്തുക്കളേ,

ഇന്ന് വളരെ പ്രത്യേകതയുള്ള ഒരു ദിവസമാണ്. ഇന്ന് രാജ്യത്തിന്റെ എല്ലാ കോണുകളിലും ഉത്സവാന്തരീക്ഷമുണ്ട്. പ്രയാഗ്‌രാജിൽ ഇന്ന് മുതൽ മഹാ കുംഭമേള ആരംഭിക്കുന്നു, കോടിക്കണക്കിന് ആളുകൾ പുണ്യസ്നാനത്തിനായി അവിടെ പോകുന്നു. ഇന്ന്, പഞ്ചാബ് ഉൾപ്പെടെയുള്ള മുഴുവൻ ഉത്തരേന്ത്യയും ലോഹ്രിയുടെ ആവേശത്താൽ നിറഞ്ഞിരിക്കുന്നു, ഉത്തരായനം, മകരസംക്രാന്തി, പൊങ്കൽ തുടങ്ങി നിരവധി ഉത്സവങ്ങളുടെ സമയമാണിത്. രാജ്യത്തും ലോകത്തും ഈ ഉത്സവങ്ങൾ ആഘോഷിക്കുന്ന എല്ലാ ആളുകൾക്കും ഞാൻ ആശംസകൾ നേരുന്നു. വർഷത്തിലെ ഈ സമയം താഴ്‌വരയിലെ ചില്ലയ് കലാം ആണ്. 40 ദിവസത്തെ ഈ കാലാവസ്ഥയെ നിങ്ങൾ ധൈര്യത്തോടെ നേരിടുന്നു. അതിന് മറ്റൊരു വശമുണ്ട്, സോനാമാർഗ് പോലുള്ള വിനോദസഞ്ചാര കേന്ദ്രങ്ങൾക്ക് ഈ കാലാവസ്ഥ പുതിയ അവസരങ്ങൾ നൽകുന്നു. രാജ്യമെമ്പാടുമുള്ള വിനോദസഞ്ചാരികൾ ഇവിടെയെത്തുന്നു. കശ്മീർ താഴ്‌വരകളിൽ വന്ന് അവർ നിങ്ങളുടെ ആതിഥ്യം പരമാവധി ആസ്വദിക്കുന്നു.

സുഹൃത്തുക്കളേ,

ഇന്ന് ഞാൻ നിങ്ങളുടെ ഇടയിൽ ഒരു വലിയ സമ്മാനവുമായി വന്നിരിക്കുന്നു. കുറച്ച് ദിവസങ്ങൾക്ക് മുമ്പ്, മുഖ്യമന്ത്രി പറഞ്ഞതുപോലെ, 15 ദിവസം മുമ്പ്, ജമ്മുവിൽ നിങ്ങളുടെ സ്വന്തം റെയിൽവേ ഡിവിഷന്റെ തറക്കല്ലിടാൻ എനിക്ക് അവസരം ലഭിച്ചു. ഇത് നിങ്ങളുടെ വളരെ പഴയ ആവശ്യമാണ്. ഇന്ന് സോനാമാർഗ് തുരങ്കം  രാജ്യത്തിന് സമർപ്പിക്കാൻ എനിക്ക് അവസരം ലഭിച്ചു. ഇതിനർത്ഥം ജമ്മു കശ്മീരിലെ ലഡാഖിന്റെ മറ്റൊരു പഴയ ആവശ്യം ഇന്ന് നിറവേറ്റപ്പെട്ടു എന്നാണ്. ഇതാണ് മോദി എന്ന് നിങ്ങൾക്ക് ഉറപ്പിക്കാം, അദ്ദേഹം ഒരു വാഗ്ദാനം നൽകിയാൽ, അദ്ദേഹം അത് പാലിക്കും. എല്ലാ ജോലികൾക്കും ഒരു സമയമുണ്ട്, ശരിയായ സമയത്ത് ശരിയായ ജോലി ചെയ്യും.

സുഹൃത്തുക്കളേ,

സോനാമാർഗ് തുരങ്കത്തെക്കുറിച്ച് ഞാൻ സംസാരിക്കുമ്പോൾ, അത് കാർഗിലിലെയും ലേയിലെയും ജനങ്ങളുടെയും, ഒപ്പം സോനാമാർഗിലെയും നമ്മുടെ ജനങ്ങളുടെയും ജീവിതം സുഗമമാക്കും. മഞ്ഞുവീഴ്ചയിൽ ഹിമപാതമോ മഴക്കാലത്ത് മണ്ണിടിച്ചിലോ മൂലം റോഡുകൾ തടസ്സപ്പെടുന്നതിന്റെ പ്രശ്നം ഇപ്പോൾ കുറയും. റോഡുകൾ അടഞ്ഞുപോകുമ്പോൾ, ഇവിടെ നിന്ന് വലിയ ആശുപത്രിയിലേക്ക് പോകുന്നത് ബുദ്ധിമുട്ടായിരിക്കും. ഇതുമൂലം, ഇവിടെ അവശ്യവസ്തുക്കൾ എത്തിക്കുന്നതിൽ ബുദ്ധിമുട്ടുകൾ ഉണ്ടായിരുന്നു, ഇപ്പോൾ സോനാമാർഗ് തുരങ്കത്തിന്റെ നിർമ്മാണത്തോടെ, ഈ പ്രശ്നങ്ങൾ വളരെയധികം കുറയും.

സുഹൃത്തുക്കളേ,

കേന്ദ്രത്തിൽ ഞങ്ങളുടെ ​ഗവൺമെന്റ് രൂപീകരിച്ചതിനുശേഷം മാത്രമാണ് 2015 ൽ സോനാമാർഗ് തുരങ്കത്തിന്റെ യഥാർത്ഥ നിർമ്മാണം ആരംഭിച്ചത്, മുഖ്യമന്ത്രിയും ആ കാലഘട്ടത്തെ വളരെ നല്ല വാക്കുകളിൽ വിവരിച്ചു. ഈ തുരങ്കത്തിന്റെ പണി ഞങ്ങളുടെ ഗവൺമെന്റിന്റെ കാലത്ത് പൂർത്തിയായതിൽ ഞാൻ സന്തുഷ്ടനാണ്. എനിക്ക് എപ്പോഴും ഒരു മന്ത്രമുണ്ട്, നമ്മൾ എന്ത് ആരംഭിച്ചാലും അത് ഉദ്ഘാടനം ചെയ്യും. അത് എപ്പോൾ സംഭവിക്കും, ആർക്കറിയാം എന്ന യുഗം പോയി, അത് സംഭവിക്കുന്നു, അത് പ്രവർത്തിക്കുന്നു.

സുഹൃത്തുക്കളേ,

ഈ ശൈത്യകാലത്ത് സോനാമാർഗിന്റെ കണക്റ്റിവിറ്റി ഉറപ്പാക്കാൻ ഈ തുരങ്കം സഹായിക്കും, ഇത് സോനാമാർഗ് ഉൾപ്പെടെയുള്ള ഈ മുഴുവൻ പ്രദേശത്തെയും ടൂറിസത്തിന് പുതിയ ചിറകുകൾ നൽകും. വരും ദിവസങ്ങളിൽ, ജമ്മു-കശ്മീരിൽ റോഡ്, റെയിൽ കണക്റ്റിവിറ്റിയുടെ നിരവധി പദ്ധതികൾ പൂർത്തിയാകാൻ പോകുന്നു. സമീപത്ത് മറ്റൊരു വലിയ കണക്റ്റിവിറ്റി പ്രോജക്റ്റിന്റെ പണിയും നടക്കുന്നുണ്ട്. ഇപ്പോൾ കശ്മീർ താഴ്‌വരയും റെയിൽ വഴി ബന്ധിപ്പിക്കാൻ പോകുന്നു. ഇതുമായി ബന്ധപ്പെട്ട് ഇവിടെ വലിയ സന്തോഷത്തിന്റെ അന്തരീക്ഷം നിലനിൽക്കുന്നതായി ഞാൻ കാണുന്നു. നിർമ്മിക്കപ്പെടുന്ന ഈ പുതിയ റോഡുകൾ, കശ്മീരിലേക്ക് വന്നുതുടങ്ങിയ ട്രെയിനുകൾ, കോളേജുകൾ നിർമ്മിക്കപ്പെടുന്നു, ഇത് പുതിയ ജമ്മു-കശ്മീർ ആണ്. ഈ തുരങ്കത്തിനും വികസനത്തിന്റെ ഈ പുതിയ ഘട്ടത്തിനും ഞാൻ നിങ്ങളെ എല്ലാവരെയും എന്റെ ഹൃദയത്തിന്റെ അടിത്തട്ടിൽ നിന്ന് അഭിനന്ദിക്കുന്നു.

സുഹൃത്തുക്കളേ,

ഇന്ന്, ഇന്ത്യ പുരോഗതിയുടെ പുതിയ ഉയരങ്ങളിലേക്ക് നീങ്ങുകയാണ്. 2047 ഓടെ ഇന്ത്യയെ ഒരു വികസിത രാഷ്ട്രമാക്കി മാറ്റുന്നതിൽ രാജ്യത്തെ ഓരോ പൗരനും ഏർപ്പെട്ടിരിക്കുന്നു. നമ്മുടെ രാജ്യത്തിന്റെ ഒരു ഭാഗവും ഒരു കുടുംബവും പുരോഗതിയിലും വികസനത്തിലും പിന്നോട്ട് പോകാത്തപ്പോൾ മാത്രമേ ഇത് സംഭവിക്കൂ. ഇതിനായി, എല്ലാവർക്കുമൊപ്പം എല്ലാവരുടെയും വികസനം എന്ന ഊർജത്തോടെ നമ്മുടെ ​ഗവൺമെന്റ് രാവും പകലും പൂർണ്ണ സമർപ്പണത്തോടെ പ്രവർത്തിക്കുന്നു. കഴിഞ്ഞ 10 വർഷത്തിനുള്ളിൽ, ജമ്മു കശ്മീർ ഉൾപ്പെടെ രാജ്യത്തെ 4 കോടിയിലധികം ദരിദ്രർക്ക് കോൺക്രീറ്റ് വീടുകൾ ലഭിച്ചു. വരും കാലങ്ങളിൽ, ദരിദ്രർക്ക് മൂന്ന് കോടി പുതിയ വീടുകൾ കൂടി നൽകാൻ പോകുന്നു. ഇന്ന്, ഇന്ത്യയിൽ കോടിക്കണക്കിന് ആളുകൾക്ക് സൗജന്യ ചികിത്സ ലഭിക്കുന്നു. ജമ്മു കശ്മീർ ജനതയ്ക്കും ഇതിൽ നിന്ന് വളരെയധികം പ്രയോജനം ലഭിച്ചു. യുവാക്കളുടെ വിദ്യാഭ്യാസത്തിനായി രാജ്യത്തുടനീളം പുതിയ ഐഐടികൾ, പുതിയ ഐഐഎമ്മുകൾ, പുതിയ എയിംസ്, പുതിയ മെഡിക്കൽ കോളേജുകൾ, നഴ്സിംഗ് കോളേജുകൾ, പോളിടെക്നിക്കൽ കോളേജുകൾ എന്നിവ തുടർച്ചയായി നിർമ്മിക്കപ്പെടുന്നു. ജമ്മു കശ്മീർ സംസ്ഥാനത്തും കഴിഞ്ഞ 10 വർഷത്തിനുള്ളിൽ നിരവധി വിദ്യാഭ്യാസ സ്ഥാപനങ്ങൾ നിർമ്മിക്കപ്പെട്ടു. ഇത് എന്റെ പുത്രന്മാർക്കും പുത്രിമാർക്കും, ഇവിടുത്തെ നമ്മുടെ യുവാക്കൾക്കും വളരെയധികം പ്രയോജനം ചെയ്തു.

സുഹൃത്തുക്കളേ,

ഇന്ന്, ജമ്മു കശ്മീർ മുതൽ അരുണാചൽ പ്രദേശ് വരെ, എത്ര മികച്ച റോഡുകൾ, തുരങ്കങ്ങൾ, പാലങ്ങൾ എന്നിവ നിർമ്മിക്കപ്പെടുന്നുണ്ടെന്ന് നിങ്ങൾ കാണുന്നു. നമ്മുടെ ജമ്മു കശ്മീർ ഇപ്പോൾ തുരങ്കങ്ങളുടെയും, ഉയർന്ന പാലങ്ങളുടെയും, റോപ്പ്‌വേകളുടെയും കേന്ദ്രമായി മാറുകയാണ്. ലോകത്തിലെ ഏറ്റവും ഉയരം കൂടിയ തുരങ്കങ്ങൾ ഇവിടെ നിർമ്മിക്കപ്പെടുന്നു. ലോകത്തിലെ ഏറ്റവും ഉയരം കൂടിയ റെയിൽ-റോഡ് പാലങ്ങൾ, കേബിൾ പാലങ്ങൾ ഇവിടെ നിർമ്മിക്കപ്പെടുന്നു. ലോകത്തിലെ ഏറ്റവും ഉയരം കൂടിയ റെയിൽ ലൈനുകൾ ഇവിടെ നിർമ്മിക്കപ്പെടുന്നു. നമ്മുടെ ചെനാബ് പാലത്തിന്റെ എഞ്ചിനീയറിംഗ് ലോകമെമ്പാടുമുള്ള ആളുകളെ അത്ഭുതപ്പെടുത്തി. കഴിഞ്ഞ ആഴ്ചയാണ് ഈ പാലത്തിൽ ഒരു പാസഞ്ചർ ട്രെയിനിന്റെ പരീക്ഷണം പൂർത്തിയായത്. കശ്മീരിന്റെ റെയിൽവേ കണക്റ്റിവിറ്റി വർദ്ധിപ്പിക്കുന്ന കേബിൾ പാലം, സോജില, ചെനാനി നഷ്‌രി, സോനാമാർഗ് തുരങ്കങ്ങൾ, ഉധംപൂർ-ശ്രീനഗർ-ബാരാമുള്ള എന്നിവയുടെ റെയിൽ ലിങ്ക് പദ്ധതി, ശങ്കരാചാര്യ ക്ഷേത്രം, ശിവ് ഖോരി, ബാൽതാൽ-അമർനാഥ് ക്ഷേത്ര റോപ്പ്‌വേ പദ്ധതി, കത്രയിൽ നിന്ന് ഡൽഹിയിലേക്കുള്ള എക്സ്പ്രസ് വേ, ഇന്ന് ജമ്മു കശ്മീരിലെ റോഡ് കണക്റ്റിവിറ്റിയുമായി ബന്ധപ്പെട്ട 42,000 കോടിയിലധികം രൂപയുടെ പദ്ധതികളുടെ പണി പുരോഗമിക്കുന്നു. നാല് ദേശീയ പാത പദ്ധതികൾ, രണ്ട് റിംഗ് റോഡുകൾ എന്നിവയുടെ പണി അതിവേഗം പുരോഗമിക്കുന്നു. സോനാമാർഗ് പോലുള്ള 14 ലധികം തുരങ്കങ്ങളുടെ പണി ഇവിടെ നടക്കുന്നുണ്ട്. ഈ പദ്ധതികളെല്ലാം ജമ്മു കശ്മീരിനെ രാജ്യത്തെ ഏറ്റവും ബന്ധിപ്പിച്ച സംസ്ഥാനങ്ങളിലൊന്നാക്കി മാറ്റും.

സുഹൃത്തുക്കളേ,

വികസിത ഇന്ത്യയുടെ യാത്രയിൽ, നമ്മുടെ ടൂറിസം മേഖല വലിയ സംഭാവന നൽകിയിട്ടുണ്ട്. മെച്ചപ്പെട്ട കണക്റ്റിവിറ്റി കാരണം, ജമ്മു കശ്മീരിലെ ഇപ്പോഴും സ്പർശിക്കപ്പെടാത്ത പ്രദേശങ്ങളിലേക്ക് വിനോദസഞ്ചാരികൾക്ക് എത്തിച്ചേരാൻ കഴിയും. ടൂറിസം മേഖലയിൽ കഴിഞ്ഞ പത്ത് വർഷത്തിനിടെ ജമ്മു കശ്മീരിൽ സൃഷ്ടിക്കപ്പെട്ട സമാധാനത്തിന്റെയും പുരോഗതിയുടെയും അന്തരീക്ഷത്തിന്റെ നേട്ടങ്ങൾ നമ്മൾ ഇതിനകം കാണുന്നുണ്ട്. 2024 ൽ 2 കോടിയിലധികം വിനോദസഞ്ചാരികൾ ജമ്മു കശ്മീരിലെത്തി. സോനാമാർഗിലും 10 വർഷത്തിനുള്ളിൽ വിനോദസഞ്ചാരികളുടെ എണ്ണം 6 മടങ്ങ് വർദ്ധിച്ചു. നിങ്ങൾ എല്ലാവരും ഇതിൽ നിന്ന് പ്രയോജനം നേടി, പൊതുജനങ്ങൾ, ഹോട്ടലുടമകൾ, ഹോംസ്റ്റേ ഉടമകൾ, ധാബ ഉടമകൾ, തുണിക്കട ഉടമകൾ, ടാക്സി ഡ്രൈവർമാർ, എല്ലാവർക്കും ഇതിന്റെ പ്രയോജനം ലഭിച്ചു.

സുഹൃത്തുക്കളേ,

21-ാം നൂറ്റാണ്ടിലെ ജമ്മു കശ്മീർ വികസനത്തിന്റെ പുതിയൊരു കഥ രചിക്കുകയാണ്. മുൻകാല ദുഷ്‌കരമായ ദിനങ്ങളെ ഉപേക്ഷിച്ച്, നമ്മുടെ കശ്മീർ ഇപ്പോൾ ഭൂമിയിലെ ഒരു പറുദീസ എന്ന സ്വത്വം വീണ്ടെടുക്കുകയാണ്. ഇന്ന് ആളുകൾ രാത്രിയിൽ ഐസ്ക്രീം കഴിക്കാൻ ലാൽ ചൗക്കിൽ പോകുന്നു, രാത്രിയിൽ പോലും അവിടെ ധാരാളം പ്രവർത്തനങ്ങൾ നടക്കുന്നുണ്ട്. കശ്മീരിൽ നിന്നുള്ള എന്റെ കലാകാരന്മാർ പോളോ വ്യൂ മാർക്കറ്റിനെ ഒരു പുതിയ ആവാസ കേന്ദ്രമാക്കി മാറ്റിയിരിക്കുന്നു. ഇവിടുത്തെ സംഗീതജ്ഞരും കലാകാരന്മാരും ഗായകരും എങ്ങനെ അവിടെ പ്രകടനം തുടരുന്നു എന്ന് ഞാൻ സമൂഹമാധ്യമത്തിൽ കാണുന്നു. ഇന്ന് ശ്രീനഗറിൽ, ആളുകൾ കുട്ടികളുമായി സിനിമ കാണാനും സുഖമായി ഷോപ്പുചെയ്യാനും സിനിമാ ഹാളുകളിൽ പോകുന്നു. സാഹചര്യം മാറ്റുന്ന ഇത്രയധികം കാര്യങ്ങൾ ഒരു​ ​ഗവൺമെന്റിനും ഒറ്റയ്ക്ക് ചെയ്യാൻ കഴിയില്ല. ജമ്മു കശ്മീരിലെ സ്ഥിതി മാറ്റിയതിന്റെ വലിയൊരു ബഹുമതി ഇവിടുത്തെ ജനങ്ങൾക്കാണ്, നിങ്ങൾക്കെല്ലാവർക്കും. നിങ്ങൾ ജനാധിപത്യം ശക്തിപ്പെടുത്തി, നിങ്ങൾ ഭാവി ശക്തിപ്പെടുത്തി.

സുഹൃത്തുക്കളേ,

ജമ്മു കശ്മീരിലെ യുവാക്കൾക്ക് ശോഭനമായ ഒരു ഭാവി എനിക്ക് വ്യക്തമായി കാണാൻ കഴിയും. കായികരംഗത്ത് സൃഷ്ടിക്കപ്പെടുന്ന അവസരങ്ങൾ നോക്കൂ. കുറച്ച് മാസങ്ങൾക്ക് മുമ്പ്, ശ്രീനഗറിൽ ആദ്യമായി ഒരു അന്താരാഷ്ട്ര മാരത്തൺ നടന്നു. ആ ചിത്രങ്ങൾ കണ്ടവരെല്ലാം സന്തോഷത്താൽ നിറഞ്ഞിരുന്നു, മുഖ്യമന്ത്രിയും ആ മാരത്തണിൽ പങ്കെടുത്തിരുന്നു, അതിന്റെ വീഡിയോ വൈറലായി, ഡൽഹിയിൽ വെച്ച് മുഖ്യമന്ത്രിയെ കണ്ടപ്പോൾ ഞാൻ അദ്ദേഹത്തെ പ്രത്യേകം അഭിനന്ദിച്ചു. കൂടിക്കാഴ്ചയിൽ, അദ്ദേഹത്തിന്റെ ആവേശവും എനിക്ക് കാണാൻ കഴിഞ്ഞു, അദ്ദേഹം മാരത്തണിനെക്കുറിച്ച് വളരെ വിശദമായി എന്നോട് പറയുകയായിരുന്നു.

സുഹൃത്തുക്കളേ,

തീർച്ചയായും, ഇത് ജമ്മു-കശ്മീരിന്റെ ഒരു പുതിയ യുഗമാണ്. അടുത്തിടെ, നാൽപ്പത് വർഷങ്ങൾക്ക് ശേഷം, കശ്മീരിൽ ഒരു അന്താരാഷ്ട്ര ക്രിക്കറ്റ് ലീഗ് നടന്നു. അതിനുമുമ്പ്, ദാൽ തടാകത്തിന് ചുറ്റും കാർ റേസിംഗിന്റെ മനോഹരമായ കാഴ്ചകളും നമ്മൾ കണ്ടിട്ടുണ്ട്. നമ്മുടെ ഗുൽമാർഗ് ഒരു തരത്തിൽ ഇന്ത്യയുടെ ശൈത്യകാല ഗെയിംസ് തലസ്ഥാനമായി മാറുകയാണ്. ഗുൽമാർഗിൽ നാല് ഖേലോ ഇന്ത്യ വിന്റർ ഗെയിംസുകൾ നടന്നു. അഞ്ചാമത് ഖേലോ ഇന്ത്യ വിന്റർ ഗെയിംസും അടുത്ത മാസം ആരംഭിക്കാൻ പോകുന്നു. കഴിഞ്ഞ രണ്ട് വർഷത്തിനിടെ, രാജ്യമെമ്പാടുമുള്ള 2500 കായികതാരങ്ങൾ വിവിധ കായിക ടൂർണമെന്റുകൾക്കായി ജമ്മു-കശ്മീരിൽ എത്തിയിട്ടുണ്ട്. ജമ്മു-കശ്മീരിൽ തൊണ്ണൂറിലധികം ഖേലോ ഇന്ത്യ കേന്ദ്രങ്ങൾ നിർമ്മിച്ചിട്ടുണ്ട്. നമ്മുടെ നാട്ടിൽ നിന്ന് നാലായിരത്തി അഞ്ഞൂറ് യുവാക്കൾ പരിശീലനം നേടുന്നു.

സുഹൃത്തുക്കളേ,

ഇന്ന്, ജമ്മു-കശ്മീരിലെ യുവാക്കൾക്ക് എല്ലായിടത്തും പുതിയ അവസരങ്ങൾ സൃഷ്ടിക്കപ്പെടുന്നു. ജമ്മുവിലും അവന്തിപോറയിലും എയിംസിന്റെ പ്രവർത്തനങ്ങൾ അതിവേഗം പുരോഗമിക്കുന്നു. ഇതിനർത്ഥം ഇപ്പോൾ രാജ്യത്തിന്റെ മറ്റ് ഭാഗങ്ങളിലേക്ക് ചികിത്സയ്ക്കായി പോകേണ്ടതിന്റെ ആവശ്യകത കുറയുമെന്നാണ്. ഐഐടി-ഐഐഎമ്മിന്റെയും ജമ്മുവിലെ സെൻട്രൽ യൂണിവേഴ്സിറ്റിയുടെയും മികച്ച കാമ്പസുകളിൽ പഠനങ്ങൾ നടക്കുന്നു. ഞങ്ങളുടെ വിശ്വകർമ സുഹൃത്തുക്കൾ ജമ്മു-കശ്മീരിലെ പ്രവർത്തന വൈദഗ്ധ്യവും കരകൗശലവും മുന്നോട്ട് കൊണ്ടുപോകുന്നു, പി എം വിശ്വകർമയിൽ നിന്നും ജമ്മു-കാശ്മീർ ​ഗവൺമെന്റിന്റെ മറ്റ് പദ്ധതികളിൽ നിന്നും അവർക്ക് സഹായം ലഭിക്കുന്നു. പുതിയ വ്യവസായങ്ങൾ ഇവിടെ കൊണ്ടുവരാൻ ഞങ്ങൾ നിരന്തരം ശ്രമിക്കുന്നു. വിവിധ വ്യവസായങ്ങളിൽ നിന്നുള്ള ആളുകൾ ഏകദേശം 13,000 കോടി രൂപ ഇവിടെ നിക്ഷേപിക്കാൻ പോകുന്നു. ഇത് ഇവിടെ ആയിരക്കണക്കിന് യുവാക്കൾക്ക് തൊഴിൽ നൽകും. ജമ്മു-കശ്മീർ ബാങ്കും ഇപ്പോൾ വളരെ മികച്ച രീതിയിൽ പ്രവർത്തിക്കാൻ തുടങ്ങിയിട്ടുണ്ട്. കഴിഞ്ഞ 4 വർഷത്തിനുള്ളിൽ, ജമ്മു-കശ്മീർ ബാങ്കിന്റെ ബിസിനസ്സ് 1 ലക്ഷം 60,000 കോടിയിൽ നിന്ന് 2 ലക്ഷം 30,000 കോടിയായി വർദ്ധിച്ചു. ഇതിനർത്ഥം ഈ ബാങ്കിന്റെ ബിസിനസ്സ് വളരുകയാണ്, വായ്പ നൽകാനുള്ള ശേഷിയും വർദ്ധിച്ചുകൊണ്ടിരിക്കുകയാണ്. ഇവിടെയുള്ള എല്ലാവരും, യുവാക്കൾ, കർഷകർ-തോട്ടക്കാർ, കടയുടമകൾ-ബിസിനസുകാർ, ഇതിൽ നിന്ന് പ്രയോജനം നേടുന്നു.

സുഹൃത്തുക്കളേ,

ജമ്മു കശ്മീരിന്റെ ഭൂതകാലം ഇപ്പോൾ വികസനത്തിന്റെ വർത്തമാനകാലമായി മാറിയിരിക്കുന്നു. പുരോഗതിയുടെ മുത്തുകൾ കൊണ്ട് അതിന്റെ കൊടുമുടി പതിഞ്ഞാൽ മാത്രമേ വികസിത ഇന്ത്യയെക്കുറിച്ചുള്ള സ്വപ്നം പൂർത്തീകരിക്കപ്പെടുകയുള്ളൂ. കശ്മീർ രാജ്യത്തിന്റെ കിരീടമാണ്, ഇന്ത്യയുടെ കിരീടമാണ്. അതുകൊണ്ടാണ് ഈ കിരീടം കൂടുതൽ മനോഹരമാകാൻ ഞാൻ ആഗ്രഹിക്കുന്നത്, ഈ കിരീടം കൂടുതൽ സമ്പന്നമാകാൻ. ഈ പ്രവൃത്തിയിൽ എനിക്ക് യുവാക്കളുടെയും മുതിർന്നവരുടെയും പുത്രന്മാരുടെയും പുത്രിമാരുടെയും നിരന്തരമായ പിന്തുണ ലഭിക്കുന്നുണ്ടെന്ന് കാണുന്നതിൽ സന്തോഷമുണ്ട്. ജമ്മു കശ്മീരിന്റെ പുരോഗതിക്കായി, ഇന്ത്യയുടെ പുരോഗതിക്കായി നിങ്ങളുടെ സ്വപ്നങ്ങൾ യാഥാർത്ഥ്യമാക്കാൻ നിങ്ങൾ വളരെ കഠിനാധ്വാനം ചെയ്യുന്നു. ഞാൻ വീണ്ടും നിങ്ങൾക്ക് ഉറപ്പ് നൽകുന്നു, മോദി പടിപടിയായി നിങ്ങളോടൊപ്പം നടക്കും. നിങ്ങളുടെ സ്വപ്നങ്ങൾക്ക് തടസ്സമാകുന്ന എല്ലാ തടസ്സങ്ങളും അദ്ദേഹം നീക്കം ചെയ്യും.

സുഹൃത്തുക്കളേ,

ഇന്നത്തെ വികസന പദ്ധതികൾക്കായി ജമ്മു കശ്മീരിലെ ഓരോ കുടുംബത്തിനും ഞാൻ എന്റെ ആശംസകൾ നേരുന്നു. നമ്മുടെ സഹപ്രവർത്തകരായ നിതിൻ ജി, മനോജ് സിൻഹ ജി, മുഖ്യമന്ത്രി എന്നിവർ പുരോഗതിയുടെ വേഗത, വികസനത്തിന്റെ വേഗത, ആരംഭിക്കാൻ പോകുന്ന പുതിയ പദ്ധതികൾ എന്നിവയെക്കുറിച്ച് വിശദമായി വിവരിച്ചിട്ടുണ്ട്. അതിനാൽ, ഞാൻ അത് ആവർത്തിക്കുന്നില്ല. ഇപ്പോൾ ഈ ദൂരം ഇല്ലാതായി, ഇനി നമ്മൾ ഒരുമിച്ച് സ്വപ്നങ്ങൾ നെഞ്ചേറ്റണം, ദൃഢനിശ്ചയങ്ങൾ എടുക്കണം, വിജയം കൈവരിക്കണം എന്ന് മാത്രമേ ഞാൻ നിങ്ങളോട് പറയൂ. നിങ്ങൾക്കെല്ലാവർക്കും എന്റെ ആശംസകൾ.

വളരെ നന്ദി.

ഡിസ്ക്ലൈമർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലാണ് നടത്തിയത്.

**