কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে আজি ছত্তীশগড়ৰ নিউ ৰায়পুৰত নিৰাপত্তাৰক্ষীসকলৰ সৈতে মত-বিনিময় কৰে। এই মত-বিনিময় কাৰ্য্যসূচীত ছত্তীশগড়ৰ মুখ্যমন্ত্ৰী শ্ৰী বিষ্ণু দেৱ সাই, উপ-মুখ্যমন্ত্ৰী শ্ৰী বিজয় শৰ্মা, কেন্দ্ৰীয় গৃহ সচিব, ইন্টেলিজেন্স ব্যুৰ’ৰ সঞ্চালক, বিএছএফ-ৰ সঞ্চালক প্ৰধানকে প্ৰমুখ্য কৰি আন-আন উচ্চপদস্থ বিষয়াসকলে অংশগ্ৰহণ কৰে।

নিৰাপত্তাৰক্ষীসকলক সম্বোধনেৰে কেন্দ্ৰীয় গৃহমন্ত্ৰীগৰাকীয়ে কেন্দ্ৰীয় সশস্ত্ৰ আৰক্ষী বাহিনী, কোব্ৰা টীম, ছত্তীশগড় আৰক্ষী আৰু জিলা সংৰক্ষিত গাৰ্ড (DRG)-ৰ সাহসিকতা, বীৰত্ব, ত্যাগ আৰু নিষ্ঠাৰ মনোভাৱৰ শলাগ লয়। তেওঁ কয়, “আমাৰ নিৰাপত্তা বাহিনীসমূহৰ সাহসিকতা আৰু অক্লান্ত প্ৰচেষ্টাই নক্সালবাদৰ বিৰুদ্ধে যুঁজখনক সফল কৰি তুলিছে।“

কেন্দ্ৰীয় গৃহমন্ত্ৰীজনে কয় যে নিৰাপত্তা বাহিনীসমূহে মাওবাদীৰ আত্মগোপন স্থানসমূহ অসীম সাহস, ধৈৰ্য্য আৰু দায়বদ্ধতাৰে ধ্বংস কৰা কাৰ্য্যই সমগ্ৰ বিশ্বৰ নিৰাপত্তা বাহিনীকে আচৰিত কৰি তুলিছে। তেওঁ লগতে কয়, “মই জানো যে আমাৰ জোৱানসকলে যিখিনি লাভ কৰিবলৈ আগবাঢ়িছে, সেইখিনি তেওঁলোকে সদায় সম্পন্ন কৰে।“ শ্ৰী শ্বাহে আৰু কয়, "আমাৰ নিৰাপত্তা বাহিনীসমূহৰ ওপৰত থকা আস্থাৰে অনুপ্ৰাণিত হৈ আমি ২০২৬-ৰ ৩১ মাৰ্চৰ পূৰ্বে নক্সালবাদ নিৰ্মূল কৰিম বুলি দোহাৰিব খুজিছোঁ।"

শ্ৰী অমিত শ্বাহে কয় যে দৰিদ্ৰ আৰু জনজাতীয় সমাজৰ বাবে নক্সাল হিংসাই এক ভয়াৱহ বিপৰ্য্যয়ৰ সৃষ্টি কৰিছে, ইয়াৰ পৰিণতিত বিগত ৩৫ বছৰত প্ৰায় ৪০ হাজাৰ লোকৰ মৃত্যু হৈছে, আনহাতে একাধিক লোক অক্ষম হৈ পৰিছে। তেওঁ কয় যে নক্সাল হিংসাই দৰিদ্ৰ জনজাতীয় জনসাধাৰণক খাদ্য, বিদ্যুৎ সংযোগ, শিক্ষা, বাসগৃহ, শৌচাগাৰ, বিশুদ্ধ খোৱাপানীৰ দৰে মৌলিক প্ৰয়োজনীয়তা ৰাজিৰপৰা বঞ্চিত কৰে — এনে পৰিস্থিতিত ঔদ্যোগিক উন্নয়ন সুদূৰ-পৰাহত হৈ পৰে। সমগ্ৰ অঞ্চলসমূহে দশক-দশক ধৰি দাসত্বৰ দৰে পৰিস্থিতিত জীয়াই থাকিবলৈ বাধ্য হৈছিল আৰু এই দুখৰ মূল কাৰণ আছিল নক্সালবাদ। গৃহমন্ত্ৰীগৰাকীয়ে সন্তুষ্টি প্ৰকাশেৰে কয় যে নক্সালবাদ নিৰ্মূল কৰা অঞ্চলসমূহত ছত্তীশগড় চৰকাৰে খাদ্য, স্বাস্থ্যসেৱা, শিক্ষা, গৃহ নিৰ্মাণ, বিশুদ্ধ খোৱাপানীৰ ব্যৱস্থা কৰিছে — ইয়াৰ ফলশ্ৰুতিত জনসাধাৰণ উন্নয়নৰ মূলসুঁতিৰে সংযুক্ত হৈ পৰিছে।

কেন্দ্ৰীয় গৃহমন্ত্ৰীয়ে কয়, “নক্সাল-প্ৰভাৱিত অঞ্চলৰ শিশুৱে বন্দুকৰ সলনি পেঞ্চিল তুলি লোৱা মাত্ৰেকে কেৱল অঞ্চলটোৰ ভৱিষ্যতেই নহয়, বৰঞ্চ সমগ্ৰ ৰাষ্ট্ৰৰ ভৱিষ্যতেই ৰূপান্তৰিত হয়। সেই মুহূৰ্তটো অতি ওচৰ চাপিছে।”

শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ২০২৬-ৰ মাৰ্চত দেশখন নক্সালবাদৰ পৰা মুক্ত হোৱাৰ ক্ষণটো স্বাধীনতাৰ পিছৰ অন্যতম উল্লেখযোগ্য মুহূৰ্ত হৈ উঠিব। তেওঁ কয় যে নক্সালবাদৰ বিৰুদ্ধে জয়ৰ কাহিনী লিখা মাত্ৰেকে আমাৰ নিৰাপত্তাৰক্ষীসকলৰ কঠোৰ পৰিশ্ৰম, ত্যাগ আৰু নিষ্ঠাৰ মনোভাৱ সোণালী আখৰেৰে খোদিত হ’ব।

শ্ৰী অমিত শ্বাহে ছত্তীশগড়ৰ নিউ ৰায়পুৰত ‘লিঅ’ৰ অয়না’ নামৰ গ্ৰন্থখনিও উন্মোচন কৰে। এই গ্ৰন্থখন নক্সাল হিংসাৰ বলি হোৱা লোকসকলৰ জীৱন-আধাৰিত। নক্সালবাদীয়ে কৰা নিৰ্দয় হিংসাৰ বলি হোৱা সেই নিৰীহ আৰু নিৰস্ত্ৰ লোকসকলৰ যন্ত্ৰণা উপলব্ধি কৰিবলৈ গ্ৰন্থখনে সহায় কৰিব। মানৱ অধিকাৰৰ নামত নক্সালবাদীৰ প্ৰতি সহানুভূতি প্ৰকাশ কৰা বোৰৰ চকুও মুকলি কৰিব আৰু নক্সালবাদীক উদঙাই দিয়াৰ ক্ষেত্ৰতো সহায়ক হ’ব।

*****

RK/VV/PR/PS/SB