صدر جمہوریہ ہند محترمہ دروپدی مرمو نے آج (23 جون 2025) کو نئی دہلی میں انسٹی ٹیوٹ آف کاسٹ اکاؤنٹنٹس آف انڈیا (آئی سی ایم اے آئی) کے قومی طلبہ کنووکیشن میں شرکت کی۔

اس موقع پر خطاب کرتے ہوئے صدر جمہوریہ  ہندنے کہا کہ ہماری پوری تاریخ میں اکاؤنٹنٹس کو معاشرے میں بہت عزت و احترام حاصل رہا ہے۔ اس کی وجہ یہ ہے کہ اکاؤنٹنگ اور جوابدہی کا آپس میں گہرا تعلق ہے۔ چونکہ ہم جوابدہی کو اہمیت دیتے ہیں، اس لیے ہم اکاؤنٹنگ کو بھی اہم مقام دیتے ہیں۔

صدر جمہوریہ ہند نے کہا کہ موجودہ  دور میں یہ شاندار وراثت آئی سی ایم اے آئی  اور دیگر اداروں کے ذریعے آگے بڑھائی جا رہی ہے۔ آئی سی ایم اے آئی کا قیام1944 میں ملک میں کاسٹ اور مینجمنٹ اکاؤنٹنٹس کے پیشے کو منظم کرنے اور فروغ دینے کے مقصد سے عمل میں آیا تھا۔ اس طرح یہ ادارہ آزادی کے بعد بھارت کی اقتصادی ترقی کی داستان کا نہ صرف گواہ ہے بلکہ ایک فعال شراکت دار بھی رہا ہے۔ آئی سی ایم اے آئی نے یہ کردار خاموشی سے لیکن مؤثر طریقے سے نبھایا ہےاور ماہرین معاشیات و صنعت اس کے کردار کی بھرپور قدر کرتے ہیں۔

صدر جمہوریہ نے کہا کہ آئی سی ایم اے آئی نے ہمیشہ پالیسی سازوں، مرکزی و ریاستی حکومتوں اور دیگر اداروں کو لاگت مؤثر حکمت عملی، نظام اور رہنما اصول وضع کرنے میں قیمتی معاونت فراہم کی ہے۔ وقت کے ساتھ ساتھ کاسٹ مینجمنٹ اکاؤنٹنٹس (سی ایم اے) نے صرف فیکٹریوں میں لاگت اکاؤنٹنگ تک محدود نہ رہ کر بورڈ رومز میں مینجمنٹ اکاؤنٹنگ میں بھی اپنا کردار بڑھایا ہے۔

انہوں نے کہا کہ دنیا اس وقت ماحولیاتی تبدیلی کے بحران کا سامنا کر رہی ہے۔ پائیداری  اب صرف ایک نعرہ نہیں رہا بلکہ ایک حقیقی ضرورت بن چکی ہے۔ وہ دن گئے جب کمپنیاں صرف منافع کی بنیاد پر کام کرتی تھیں۔ آج انہیں ماحولیاتی اخراجات کا بھی خیال رکھنا ہوتا ہے اور یہی وہ موقع ہے جہاں  سی ایم ایز اپنی مہارت سے کرۂ ارض کے مستقبل پر مثبت اثر ڈال سکتے ہیں۔

صدر جمہوریہ ہند نے طلبہ کو نصیحت کی کہ وہ یہ یاد رکھیں کہ ان کی ذمہ داریاں صرف مالیاتی اکاؤنٹنگ تک محدود نہیں۔ بطور کاسٹ اکاؤنٹنٹس، وہ بھارت کو 2047 تک ایک ترقی یافتہ ملک بنانے میں اہم کردار ادا کر سکتے ہیں۔ انہوں نے یقین ظاہر کیا کہ آئی سی ایم اے آئی  کی طرف سے فراہم کیا جانے والا تعلیم نہ صرف انہیں کامیاب پیشہ ور بنائے گا بلکہ ملک کے معمار بھی۔

صدر جمہوریہ ہند کی تقریر دیکھنے کے لیے یہاں کلک کریں

*****

) ش ح –ع ح-اش ق )

U.No. 2041