অহানবদা, ঙসি ঐহাকপু এয়রপোর্ত্তা ইশানা থেংননবা লাকপগীদমক ঐহাক্না রাস্ত্রপতিবু থাগৎচরি। মহাক্না বিজিনেস লুচিংবশিংগা লোইননা অসিগুম্বা চাউরবা রাউন্দ তেবল অমা শীনখি, মসিগীদমক ঐহাক্না য়াম্না থাগৎচরি। ঐহাক অমসুং ঐখোয়গী পার্তনরশিপকীদমক মহাক্না থম্লিবা পোজিতিব ওইবা ৱাখল্লোনশিংগীদমক ঐহাক্না অদোমবু থমোয় নুংদগী থাগৎচরি।

মরুপশিং,

চহি 23গী মতুংদা, ভারতকী প্রধান মন্ত্রীনা সাইপ্রসতা লাক্লি। অমসুং অহানবা প্রোগ্রাম অসি বিজিনেস রাউন্দ তেবল অমা ওইনা শীনখ্রে। মসি ভারত অমসুং সাইপ্রসকী মরক্তা লৈনরিবা মরী অসিদা ইকোনোমিক ৱার্ল্দদগী লাকপা মীওইশিংগী মরুওইবা অদুগী খুদম অমনি। ঐহাক্না অদোমগী ৱাখল্লোনশিং অদু য়াম্না চেকশিন্না তাখি। ভারত-সাইপ্রসকী ইকোনোমিক রিলেসনশিপকী মায়কৈদা অদোমগী কম্মিতমেন্ত ঐনা ফাওখি। ঐনা অদোমগী ৱাখল্লোনশিংদা ওইথোকপা য়াবশিং অদু খক্তা নত্তনা অদোমগী হোৎনবা কনবা অদুসু উবা ফংলি। ঐখোয়গী মরীশিংদা খুমাং চাউশিনবগী অচৌবা ওইথোকপা লৈ হায়বা অসি ময়েক শেংই।

মরুপশিং,

সাইপ্রস অসি মতম শাংনা ঐখোয়গী থাজবা য়াবা পার্তনর অমা ওইদুনা লাক্লি, মসি অদোম্না পনখি। অমসুং ভারত্তা মফম অসিদগী শেল য়াম্না থাদরক্লি। ভারতকী কম্পনী কয়া অমসু সাইপ্রসতা লাকখ্রে অমসুং সাইপ্রস অসি য়ুরোপকী গেৎৱে অমা ওইনা উরি। ঙসিদি, ম্যুচেল ত্রেদ অসি দোল্লর মিলিয়ন 150 য়ৌখ্রে। অদুবু ঐখোয়গী মরীগী তশেংবা ওইথোকপা য়াবা অসি মসিদগী হেন্না চাউই। অদোমগী মরক্তগী অয়াম্বনা ভারতকা মরী লৈনৈ অমসুং হৌখিবা চহি 11 অসিদা ভারতকী চাউখৎপগী ৱারীসু অদোম্না উখ্রে। হৌখিবা চহি তরা অসিদা ভারত অসি মালেমগী খ্বাইদগী চাউবা ইকোনোমীগী মঙাশুবা মফমদা লৈরক্লি অমসুং য়াম্না নকপা তুংলমচৎতা ঐখোয়না মালেমগী অহুমশুবা ইকোনোমী ওইবগী মায়কৈদা খোঙজেল য়াংনা চংশিল্লি। ঙসিদি ভারতনা মালেমদা য়াম্না থুনা চাউখৎলক্লিবা ইকোনোমী অমা ওইনা মহাক্কী মফম অমা কল্লি।

মরুপশিং,

ঐখোয়না তেক্স রিফোর্মশিং পাংথোক্লে হায়বসি অদোম্না ফজনা খঙই। GSTগা লোইননা ৱান নেসন ৱান তেক্স সিস্তেম অমা হৌদোক্লে, কোর্পোরেত তেক্স অসি রেস্নেলাইজ তৌখ্রে। ঐখোয়না আইন লিশিং কয়া অমা দি-ক্রিমিনেলাইজ তৌখ্রে। ঐখোয়না ইজ ওফ দুইং বিজিনেসকা লোইননা বিজিনেস তৌবদা থাজবা পীবদা চপ মান্নবা মীৎয়েং থম্লি। ঙসিদি, ভারতকী ময়েক শেংবা পোলিসী অমা লৈরে, মসিগা লোইননা স্তেবল পোলিসী অমসু লৈরি। দিকেদ তরুক্কী মতুংদা চপ মান্নবা সরকারবু থংন-থংনন অহুমশুবা ওইনা খল্লকপা অসি থেংনখি। ভারতকী দেমোগ্রাফিক দিবিদেন্দ অমসুং তেলেন্তগী মতাংদা অদোম্না ফজনা খঙই অমসুং মসি অদোমগী ৱারোলদা পনখি। হৌখিবা চহি 10 অসিদা, দিজিতেল রিভোলুসন লাক্লে, ফাইনান্সিএল ইনক্লুজন অসি খুদম অমা ওইরে। ঙসিদি মালেমগী দিজিতেল ত্রাঞ্জেক্সনশিংগী 50%দি য়ুনিফাইদ পেমেন্ত ইন্তরফেস হায়বদি UPIগী খুত্থাংদা পাংথোক্লি। ফ্রান্সকুম্বা লৈবাক কয়ানা মসিগা এসোসিএৎ তৌনরি, সাইপ্রসপু মসিদা য়াওহন্নবা ৱারী শানরি অমসুং ঐহাক্না মসি তরাম্না ওকচরি। ঐখোয়না ভারত্তা ফ্যুচরস্তিক ইনফ্রাস্ত্রকচর শেমগৎপদা চহি খুদিংগী বিল্লিয়ন 100 হেন্না ইনভেস্ত তৌরি। চহি অসিগী বজেৎ অসিদা, ঐখোয়না মেন্যুফেকচরিং মিসন অমা হৌদোক্লে। ভারত অসি ভেক্সিন, জেনেরিক হিদাক-লাংথকশিং অমসুং মেদিকেল দিভাইসশিং পুথোকপদা মালেমগী লুচিংবশিংগী মনুংদা অমনি। ঐখোয়না মেরিতাইম অমসুং পোর্ত দিবেলপমেন্ততা মীৎয়েং থম্লি। ঐখোয়না শিপ বিল্দিং অমসুং শিপ ব্রেকিংদসু অহেনবা মীৎয়েং থম্লি। মসিগীদমক্তা অনৌবা পোলিসী অমা পুথোরক্লি। সিভিল এভিএসন সেক্তরসু য়াম্না থুনা চাউখৎলি। ভারতকী কম্পনীশিংনা এয়রনক্রাফ্ত লিশিং অমদগী হেনবগীদমক অনৌবা ওর্দরশিং পীখ্রে। ইন্নোবেসন অসি ভারতকী ইকোনোমিক পৱারগী মপাঙ্গল লৈবা য়ুম্বী অমা ওইরক্লি। ঐখোয়গী স্তার্ত-অপ লাখ অমা হেনবনা সোলুসনশিং পীরি, মঙলান শাগৎহনবা খক্তমক নত্তে। মসিগী মনুংদা 100না য়ুনিকোর্ন ওইরে। ভারতনা শেন্মিৎলোন অমসুং ইকোলোজীগী বেলেন্সতা থাজৈ অমসুং ঐখোয়না মসিদা থাজবা থম্লি। ক্লিন অমসুং গ্রীন ওইবা তুংলমচৎ অমগী লম্বী শেমগৎলি। ঐখোয়না 2030 ফাওবদা রিন্যুএবল ইনর্জী গীগাৱাৎ 500গী পান্দমদা য়াম্না থুনা চংশিল্লি। ঐখোয়না গ্রীন শিপ্পিং চাউখৎহন্নবা অমসুং 2030 ফাওবদা রেলৱেজ 100% কার্বোন ন্যুত্রেল ওইহন্নবা খোঙজেল য়াংনা হোৎনরি। AI মিসন, ক্বান্তম মিসন, সেমিকন্দক্তর মিসন, ক্রিতিকেল মিনরেল মিসন, ন্যুক্লিয়র পাৱর মিসন অসি ঐখোয়গী গ্রোথ ইঞ্জিনগী অনৌবা ইঞ্জিনশিং ওইরক্লি।  সাইপ্রস স্তোক এক্সচেঞ্জ অমসুং NSEনা ঐহাক্কী ইয়ুম রাজ্য গুজরাত্তা GIFT সিতিদা কোওপরেৎ তৌনব য়ানখিবঅসিদা ঐহাক্না নুংঙাইবা পোকই। সাইপ্রাস অসি তুরিস্তশিংনা য়াম্না পাম্নবা মফম অমনি। ভারত্তসু ঐখোয়না দেস্তিনেসন দিবেলপমেন্ত অমসুং মেনেজমেন্ততা মীৎয়েং থম্লি। ঐখোয়গী তুর ওপরেতরশিংগী মরক্তা হেন্না নকশিন্ননা থবক তৌমিন্নবা হায়বসি তোঙানবা ৱাফম অমা ওইবা য়াই। ম্যুচেল কোওপরেসনগী ওইথোকপা য়াবা লম কয়া অমসু লৈরি।

মরুপশিং,

মমাং থাদা, ভারত অমসুং UKগী মরক্তা অচৌবা FTA অমদা য়ানখি। হৌজিক ঐখোয়না চহি অসিগী অরোইবা ফাওবদা ভারত অমসুং EUগী মরক্তা ফ্রী ত্রেদ এগ্রীমেন্ত অমা লোইশিন্নবা লেপ্লি। মসিগী খন্ন-নৈনবগী থবক অসি খুমাং চাউশিল্লে, মরুপশিং পুম্নমক্না মসিদগী কান্নবা ফংগনি। ভারত সাইপ্রস অমসুং গ্রীস বিজিনেস অমসুং ইনবেস্তমেন্ত কাউন্সিল লিংখৎলকপবু ঐনা তরাম্না ওকচরি। মসি য়াম্না অফবা খোঙথাং অমনি অমসুং ইকোনোমিক কোওপরেসনগী মরুওইবা প্লেৎফোর্ম অমা ওইরকপা য়াই। মরুপশিং, অদোম পুম্নমক্না ফোংদোকখিবা ৱাখল্লোনশিং অমসুং খোঙথাংশিং অদু ঐহাক্কী তীমনা খঙলে। ঐখোয়না এক্সন প্লান অমা শেম্লগনি অমসুং মদুগী মতুং ইন্না থবক পায়খৎকনি। ঐহাক্না অদোমবুসু ভারত লাকনবা কৌজরি। অরোইবদা, মীফম অসিদা মতম কাইথোকপগীদমক ঐনা অমুক্কা হন্না প্রসিদেন্তবু থাগৎচরি। ঐহাক্না সাইপ্রস, কম্মর্স অমসুং ইন্দস্ত্রী অমসুং ইনবেস্তমেন্ত সাইপ্রসকী চেম্বরবুসু মসিগী রাউন্দ তেবল অসি পথাপ নাইনা শীনবগীদমক থাগৎপা ফোংদোকচরি। অদোম পুম্নমকপু হন্না-হন্না থাগৎচরি।

****