সম্প্ৰতি ন'ৰৱে ভ্ৰমণত থকা কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰী সৰ্বানন্দ সোণোৱালে আজি অস্লোত জাপানৰ আন্তঃৰাষ্ট্ৰীয় পৰিক্ৰমা উপ-মন্ত্ৰী টেৰাডা যোছিমিচিৰ সৈতে দ্বিপাক্ষিক বৈঠকত মিলিত হয়। ভাৰত আৰু জাপান - দুয়োখন দেশৰ মাজত সামুদ্ৰিক সম্পৰ্ক অধিক সুদৃঢ় কৰাৰ লক্ষ্যৰে এই বৈঠকত জাপানী শ্বিপয়াৰ্ডৰ বিনিয়োগ, বন্দৰ ডিজিটেলাইজেচন আৰু সেউজ বন্দৰ পদক্ষেপৰ ক্ষেত্ৰত সহযোগিতা, অনুসন্ধান আৰু বিকাশ, মানৱ সম্পদৰ দক্ষতা বৃদ্ধি, জাপানত ভাৰতীয় নাবিকৰ নিয়োগ আদিকে ধৰি একাধিক বিষয়ৰ সন্দৰ্ভত আলোচনা কৰা হয়। দুয়োজন মন্ত্ৰীয়ে আন্দামান-নিকোবৰ দ্বীপপুঞ্জ আৰু লক্ষদ্বীপপুঞ্জক স্মাৰ্ট দ্বীপলৈ ৰূপান্তৰিত কৰিবলৈ বহনক্ষম প্ৰযুক্তি, দুৰ্যোগ প্ৰতিৰোধী আন্তঃগাঁথনি, আৰু বৰ্ধিত সংযোগৰ বিষয়েও আলোচনা কৰে।

কেন্দ্ৰীয় মন্ত্ৰী সৰ্বানন্দ সোণোৱালে কয়, "এই ক্ষেত্ৰত জাপানৰ বিশেষজ্ঞতা অতিশয় মূল্যৱান। আমি আন্দামান আৰু নিকোবৰ আৰু লক্ষ্যদ্বীপত যৌথ কামৰ সম্ভাৱনাৰ পৰিসৰ উপলব্ধি কৰিছোঁ, বিশেষকৈ নবীকৰণযোগ্য শক্তি, স্মাৰ্ট মবিলিটি ব্যৱস্থা আৰু ডিজিটেল আন্তঃগাঁথনিৰ ক্ষেত্ৰত সুৰক্ষা আদি। এই পদক্ষেপসমূহে পৰিৱেশ সংৰক্ষণ আৰু সামুদ্ৰিক সুৰক্ষা তথা সমৃদ্ধি বৃদ্ধিৰ প্ৰতি আমাৰ পাৰস্পৰিক দায়বদ্ধতাক অধিক আগুৱাই নিব।”

বৈঠকত অন্ধ্ৰ প্ৰদেশৰ ইমাবাৰী জাহাজ নিৰ্মাণৰ দৰে গ্ৰীণফিল্ড বিনিয়োগকে ধৰি ভাৰত আৰু জাপানী জাহাজ নিৰ্মাণ কাৰখানাৰ সন্দৰ্ভত অংশীদাৰিত্ব বৃদ্ধিৰ বিষয়েও আলোচনা কৰা হয়। বন্দৰ আৰু সামুদ্ৰিক ঔদ্যোগিক ক্লাষ্টাৰসমূহক স্বচ্ছ শক্তিৰ কেন্দ্ৰ হিচাপে উন্নয়নৰ সুযোগসমূহো পাৰস্পৰিকভাৱে ত্বৰান্বিত কৰা হ'ব। ইমাবাৰী শ্বিপবিল্ডিং, জেএমইউচি, কানাগাৱা ডকয়াৰ্ড আৰু মিটছুবিচি হেভি ইণ্ডাষ্ট্ৰীজৰ দৰে আগশাৰীৰ জাপানী জাহাজ নিৰ্মাণ কোম্পানীসমূহৰ সৈতে পাৰস্পৰিকভাৱে কাম কৰাৰ সন্দৰ্ভত ভাৰতৰ আগ্ৰহ প্ৰকাশ কৰে সোণোৱালে। “আমি জাপানৰ তিনি বৃহৎ সামুদ্ৰিক কোম্পানী—এন ৱাই কে লাইন, এম অ' এল আৰু কে লাইনক ভাৰতৰ ক্ৰমবৰ্ধমান সামুদ্ৰিক খণ্ডত যৌথ উদ্যোগ আৰু বিনিয়োগৰ সুযোগ অন্বেষণ কৰিবলৈ আমন্ত্ৰণ জনাইছোঁ। আমাৰ শক্তিশালী দ্বিপাক্ষিক সম্পৰ্কৰ ফলত ভাৰতৰ ক্ৰমবৰ্ধমান সামুদ্ৰিক উদ্যোগে জাপানীসকলৰ বাবে অনন্য সুযোগ ত্বৰান্বিত কৰিছে আৰু জাহাজ নিৰ্মাণৰ ক্ষেত্ৰত ভাৰতত বিনিয়োগ কৰাৰ পথ প্ৰশস্ত কৰিছে।”, সোণোৱালে কয়।

এই উপলক্ষে কেন্দ্ৰীয় মন্ত্ৰী সৰ্বানন্দ সোণোৱালে কয়, "ভাৰত আৰু জাপানৰ মাজৰ সম্পৰ্কৰ এক দীঘলীয়া ইতিহাস আছে। কোৱাড (Quad) পৰিকাঠামো আৰু ভাৰত-জাপান-অষ্ট্ৰেলিয়া ছাপ্লাই চেইন ৰেজিলিয়েন্স ইনিচিয়েটিভ (এছ চি আৰ আই)ৰ অধীনত আমাৰ পাৰস্পৰিক সহযোগিতাই সামুদ্ৰিক সুৰক্ষা আৰু অৰ্থনৈতিক বৃদ্ধি শক্তিশালী কৰাৰ বাবে আমাৰ দ্বিপাক্ষিক দায়বদ্ধতাক প্ৰতিফলিত কৰিছে। আন্তঃৰাষ্ট্ৰীয় সৌৰ ঐক্য (আই এছ এ), ক’লিচন ফৰ ডিজাষ্টাৰ ৰেজিলিয়েণ্ট ইনফ্ৰাষ্ট্ৰাকচাৰ (চি ডি আৰ আই) আৰু লিডাৰশ্বিপ গ্ৰুপ ফৰ ইণ্ডাষ্ট্ৰী ট্ৰেঞ্জিচন (লিডআই টি)ৰ দৰে গুৰুত্বপূৰ্ণ পদক্ষেপসমূহত জাপানৰ নেতৃত্বৰ ভাৰতে শলাগ লৈছে। ‘মেৰিটাইম ইণ্ডিয়া ভিজন ২০৩০’ আৰু ‘মেৰিটাইম অমৃত কাল ভিজন ২০৪৭’ক ক্ষিপ্ৰতাৰে সাকাৰ ৰূপ দিয়াৰ ক্ষেত্ৰত ভাৰতে এই ৰূপান্তৰমুখী পদক্ষেপসমূহত জাপানৰ সহযোগিতা বিচাৰিছে।”

বিশেষকৈ বহনক্ষম সামুদ্ৰিক প্ৰযুক্তি আৰু পৰৱৰ্তী প্ৰজন্মৰ জাহাজৰ ডিজাইনৰ ক্ষেত্ৰত সামুদ্ৰিক খণ্ডত সহযোগিতা অধিক শক্তিশালী কৰাৰ বাবে দুয়োপক্ষই সন্মত হয়। সোণোৱালে কোচিন শ্বিপয়াৰ্ড লিমিটেড (চিএছএল), ভাৰতীয় বিশ্ববিদ্যালয়সমূহ আৰু ৰাজহুৱা সংস্থাসমূহৰ সৈতে সহযোগিতাৰ আশাব্যঞ্জক পথ প্ৰশস্ত কৰাৰ লক্ষ্যৰে এক বুজাবুজি চুক্তিৰ বাবে ভাৰতৰ আগ্ৰহ প্ৰকাশ কৰে।

ভাৰতৰ মানৱ মূলধনৰ উন্নীতকৰণ আৰু নিয়োগৰ সন্দৰ্ভত সৰ্বানন্দ সোণোৱালে কয়, "ভাৰতত বৰ্তমান ১,৫৪,০০০ৰো অধিক প্ৰশিক্ষিত নাবিক আছে, যিয়ে জাপানৰ সামুদ্ৰিক কৰ্মশক্তিক অধিক গতিশীল কৰি তুলিবলৈ সক্ষম। জাপানৰ সামুদ্ৰিক খণ্ডৰ সমৃদ্ধ জ্ঞানেৰে সামৰ্থ্য গঢ়ি তুলিবলৈ আমি প্ৰশিক্ষণ উন্নীতকৰণ আৰু ভাৰতীয় নাবিকক নিয়োগ কৰাৰ ক্ষেত্ৰত বৃহৎ সুযোগ-সম্ভাৱনা দেখিবলৈ পাইছোঁ। আমাৰ দ্বিপাক্ষিক সামুদ্ৰিক সহযোগিতাৰ ফলশ্ৰুতিত ভাৰতীয় অভিযন্তা আৰু শ্ৰমিকসকলক উপযুক্ত প্ৰশিক্ষণ দিয়াৰ পথ প্ৰশস্ত হোৱাৰ সম্ভাৱনা আছে।”

কেন্দ্ৰীয় বন্দৰ, জাহাজ পৰিবহণ আৰু জলপথ মন্ত্ৰালয়ৰ অধীনত গুজৰাটৰ লোথালত ৰাষ্ট্ৰীয় সামুদ্ৰিক ঐতিহ্য সংগ্ৰহালয় (এন এম এইচ চি) নিৰ্মাণ হৈ আছে। ইয়াৰ লক্ষ্য হৈছে ভাৰতৰ চহকী সামুদ্ৰিক ইতিহাস আৰু উত্তৰাধিকাৰ প্ৰদৰ্শন কৰা। ইয়াৰ উপৰিও ই ঐতিহ্য পৰ্যটন, শিক্ষা আৰু সামুদ্ৰিক খণ্ডৰ গৱেষণাৰ বাবে বিশ্বমানৰ প্ৰাণকেন্দ্ৰ হিচাপে কাম কৰিব। এই প্ৰকল্পৰ বাবে জাপানক অংশীদাৰ হিচাপে লোৱাৰ বাবে ভাৰতৰ আগ্ৰহৰ অংশীদাৰ আছিল সৰ্বানন্দ সোণোৱাল। কেন্দ্ৰীয় মন্ত্ৰীগৰাকীয়ে এই সন্দৰ্ভত বুজাবুজি চুক্তি শীঘ্ৰে ত্বৰান্বিত কৰাৰ আশা প্ৰকাশ কৰে। সোণোৱালে চলিত বৰ্ষৰ ২৭ৰ পৰা ৩১ অক্টোবৰৰ ভিতৰত মুম্বাইত অনুষ্ঠিত হ’বলগীয়া ভাৰত সামুদ্ৰিক সপ্তাহ, ২০২৫ত অংশগ্ৰহণৰ বাবে উপ-মন্ত্ৰী টেৰাডা যোছিমিচিক আমন্ত্ৰণ জনায়। উপ-মন্ত্ৰী টেৰাডা যোছিমিচিয়ে কয় যে এই সৌহাৰ্দপূৰ্ণ বৈঠকে ভাৰত-জাপানৰ মাজত সামুদ্ৰিক সহযোগিতা অধিক উন্নীত কৰাৰ পথ প্ৰশস্ত কৰিলে। প্ৰধানমন্ত্ৰী নৰেন্দ্ৰ মোদীৰ বলিষ্ঠ নেতৃত্বত ভাৰতে ২০২৭ চনৰ ভিতৰত জাপানৰ সৈতে পাঁচ ট্ৰিলিয়ন য়েন (₹৩.২ লাখ কোটি) বিনিয়োগৰ লক্ষ্যৰে পাৰস্পৰিক সম্পৰ্ক বৃদ্ধি কৰাৰ লক্ষ্য লৈছে।