علاقائی رابطوں اور بنیادی ڈھانچے کی ترقی کے لیے ایک اہم سنگ میل کے طور پر، وزیر اعظم جناب نریندر مودی نے آج ورچوئل طور پر مدھیہ پردیش میں نئے ترقی یافتہ ستنا ہوائی اڈے اور اپ گریڈ شدہ دتیا ہوائی اڈے کا افتتاح کیا۔ بندیل کھنڈ اور بگھیل کھنڈ خطوں کے لیے ایک تبدیلی کی علامت اس تاریخی موقع کو دونوں ہوائی اڈوں پر ورچوئل طور سے منایا گیا، جو حکومت ہند کے اڑان (اُڑے دیش کا عام شہری) اسکیم کے تحت ہوائی سفر کے فوائد کو ملک کے کونے کونے تک پہنچانے کے عزم کی علامت ہے۔

دتیا ہوائی اڈے پر منعقدہ تقریب میں شہری ہوابازی کے مرکزی وزیر جناب رام موہن نائیڈو کی موجودگی دیکھی گئی، جبکہ ستنا ہوائی اڈے پر ہونے والی تقریب میں شہری ہوا بازی کے وزیر مملکت جناب مرلی دھر موہول نے شرکت کی۔ دونوں وزرا نے علاقائی رابطوں کو بڑھانے، رسائی کو بہتر بنانے اور مقامی معیشتوں کو متحرک کرنے کی شہری ہوابازی کی وزارت کی غیر متزلزل توجہ کو اجاگر کیا۔

افتتاحی تقریبات میں مدھیہ پردیش کے گورنر جناب منگو بھائی سی پٹیل، وزیر اعلیٰ ڈاکٹر موہن یادو، نائب وزرائے اعلیٰ جناب راجندر شکلا اور جناب جگدیش دیوڑا، ایم او سی اے کے سکریٹری جناب سمیر کمار سنہا اور اے اے آئی کے چیئرمین جناب وپن کمار کے علاوہ دیگر اعلیٰ شخصیات اور عوامی نمائندوں کی نمایاں موجودگی بھی دیکھی گئی۔

ستنا ہوائی اڈہ: علاقائی مرکز کو با اختیار بنانا

ائیرپورٹ اتھارٹی آف انڈیا کے ذریعے 36.96 کروڑ روپے کی لاگت سے تیار کردہ ستنا ہوائی اڈہ شمال مشرقی مدھیہ پردیش میں ایک بڑے علاقائی مرکز کے طور پر کام کرنے کے لیے تیار ہے۔ اپنی ثقافتی اور صنعتی اہمیت کے لیے مشہور، ستنا کا نیا ہوائی اڈہ اب مذہبی اور صنعتی مراکز جیسے چترکوٹ اور میہار کو بغیر کسی رکاوٹ کے رابطہ فراہم کرے گا۔

ٹرمینل کی عمارت، جو 768 مربع میٹر پر پھیلی ہوئی ہے، 50 پیک آور مسافروں اور سالانہ 2.5 لاکھ مسافروں کو سنبھالنے کے لیے لیس ہے۔ مسافروں کی جدید سہولیات، دوبارہ تیار شدہ رن وے، ڈورنیئر-228 طیاروں کے لیے ایپرن کی سہولیات اور اے ٹی سی ٹاور اور فائر اسٹیشن سمیت خصوصی انفراسٹرکچر کے ساتھ، ہوائی اڈہ علاقائی نقل و حرکت کو تبدیل کرنے کے لیے تیار ہے۔ پائیدار خصوصیات جیسے کہ 100 فیصد ایل ای ڈی لائٹنگ، سولر اسٹریٹ لائٹ جیسی سہولیات اس کی ترقی میں اپنائے گئے ماحول کے بارے میں شعوری انداز کو مزید اجاگر کرتا ہے۔

دتیا ہوائی اڈہ: ثقافتی عظمت کا گیٹ وے

60.63 کروڑ روپے کی لاگت سے تعمیر کردہ اپ گریڈ شدہ دتیا ہوائی اڈہ، تاریخی قصبہ دتیا کو قومی ہوا بازی کے نقشے سے جوڑے گا جو اپنی روحانی اہمیت اور تعمیراتی ورثے کے لیے جانا جاتا ہے۔ ہوائی اڈے میں 768 مربع میٹر کی ایک ٹرمینل عمارت ہے جس میں 150 پیک آور مسافروں اور 2.5 لاکھ کی سالانہ آمدورفت کی گنجائش ہے۔ اے ٹی آر-72 طیاروں کی آپریشنل تیاری اور اے-320 طیاروں کو ایڈجسٹ کرنے کے مستقبل کے منصوبوں کے ساتھ، دتیا ہوائی اڈہ مشہور پیتامبر پیٹھ اور دتیا محل کی زیارت کرنے والے زائرین اور سیاحوں کے لیے ایک اہم گیٹ وے ہے۔ ہوائی اڈے کے بنیادی ڈھانچے میں ایک نئے سرے سے تیار کردہ رن وے، ایپرن بے، اے ٹی سی ٹاور اور فائر اسٹیشن کے ساتھ ساتھ بارش کے پانی کی ذخیرہ اندوزی اور توانائی مؤثر روشنی کے نظام جیسے پائیداری کے اقدامات شامل ہیں۔

ستنا اور دتیا ہوائی اڈوں کے چالو ہونے سے کافی اقتصادی اور سماجی فوائد حاصل ہونے کی امید ہے جس سے بہتر کنیکٹیویٹی ملے گی، بالواسطہ اور بالواسطہ روزگار پیدا ہوں گے اور مہمان نوازی، خوردہ فروشی، تعلیم اور صحت کی دیکھ بھال جیسے متعلقہ شعبوں کی ترقی کو بڑھاوا ملے گا۔ یہ منصوبے ہندوستان میں ہوا بازی کے منظر نامے کو تبدیل کرنے اور ترقی کو آخری سرے تک پہنچانے کے لیے حکومت کی غیر متزلزل لگن کا جیتا جاگتا ثبوت ہیں۔

***********

ش ح۔ ف ش ع

U: 1326