প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা ৱেস্ত বেঙ্গলগী অলিপুরদ্বারদা লুপা করোর ১০১০ হেনবগী সিতী গ্যাস দিস্ত্রিব্যুসন প্রোজেক্তকী উরেপ উয়ুং তমখ্রে
ঙসি ভারতনা চাওখৎপা লৈবা অমা ওইনবগী লম্বীদা খোঙ থাংজিলক্লিবা অসিদা, বেঙ্গলনা শরুক য়ারক্কনি হায়না থাজৈ অমদি মথৌসু তাই: প্রধান মন্ত্রী
অনিংবা অসিগা লোয়ননা, কেন্দ্র লৈঙাক্না মফমসিগী ইনফ্রাস্ত্রকচর, ইনোভেসন অমদি ইনভেস্তমেন্তকী লমদা লেপ্পা লৈতনা অনৌবা ইনোৎ হাপ্তুনা লাক্লি: প্রধান মন্ত্রী
বেঙ্গল চাওখৎপনা ভারতকী তুংলমচৎকী য়ুম্ফম থোনগদৌরিবনি: প্রধান মন্ত্রী
সিতী গ্যাস দিস্ত্রিব্যুসন প্রোজেক্ত অসি পাইপলাইন প্রোজেক্ত অমখক্তা নত্তে, মসি লৈঙাক্কী স্কীমশিং য়ুমথোঙ য়ুমথোঙদা য়ৌহনবগী খুদম অমনি: প্রধান মন্ত্রী
ঐখোয়না অহোঙবা, তরু তরুবা অমদি লায়না ফংবা ইনর্জী লৈবা ভারত অমগী মায়কৈদা চঙশিল্লি: প্রধান মন্ত্রী
Posted On:
29 MAY 2025 2:02PM by PIB Imphal
ভারত্তা সিতী গ্যাস দিস্ত্রিব্যুসন (CGD) নেতৱর্ক পাকথোক চাউথোকহন্নবগী মশক থোকপা খোঙথাং অমা ওইনা, প্রধান মন্ত্রী শ্রী নরেন্দ্র মোদীনা ঙসি ৱেস্ত বেঙ্গলগী অলিপুরদ্বারদা CGD প্রোজেক্তকী উরেপ উয়ুং তমখ্রে। তিল্লিবা মীয়ামগী মফমদা ৱা ঙাংলদুনা, মহাক্না পুৱারী ওইরবা লমদম অলিপুরদ্বারদগী ৱেস্ত বেঙ্গলগী মীয়ামগী মফমদা য়াইফ পাউজেল পীখি। মহাক্না লমদম অদুগী ইনাক খুল্লবা নাৎকী লনগী মরমদা ঙাংলদুনা, লমদম অসি মহাক্কী ঙমখৈখক্ত নত্তনা মফমসিগী মরা চেৎনা তাখ্রবা চৎনবী অমদি মরীশিংনসু মশক তাক্লি হায়খি। প্রধান মন্ত্রীনা অলিপুরদ্বারনা ভুতানগা ঙমখৈ থংননা লৈ, অদুগা নাকল অমদনা অসাম, জলপাইগুরীগী মহৌশাগী ফজবা লৈ অমদি কুচ বিহারগী চাউথোকচনিংঙাই ওইরবা মতৌনা লমদম অসিগী শরুক ওইদুনা লৈ হায়খি। বেঙ্গলগী পারী পুরীগী লন অমদি অমত্তা ওইবা মতৌগী মতাঙদা পল্লদুনা মহাক্না নুংঙাই য়াইফরবা লমদম অসিদা লাকপা ফংবা মহাক্কী লাইবক ফবনি হায়খি।
“ভারতনা চাওখৎপা লৈবাক অমা ওইনবগী লমবীদা চঙশিল্লকপদা, বেঙ্গলনা শরুক য়ারক্কনি হায়না থাজৈ অমদি মথৌসু তাই,” হায়না শ্রী মোদীনা ফোঙদোক্লদুনা লমদম অসিগী ইনফ্রাস্ত্রকচর, ইনোভেসন, অমদি ইনভেস্তমেন্ত খোঙজেল য়াংখৎহন্নবা কেন্দ্র লৈঙাক্না লেপ্পা লৈতনা হোৎনরি হায়খি। “বেঙ্গলগী চাওখৎপনা ভারতকী তুংলমচৎকী য়ুম্ফম থোনগদৌরিবনি,” হায়রদুনা শ্রী মোদীনা ঙসি অসিনা খোঙচৎ অদুগী পরিংদা অচেৎপ পন্দোল অমা হাপচিল্লে হায়খি। য়ুমথোঙ লাখ ২.৫ হেনবদা তরু তরুবা, শাফবা, অমদি অতাবা মমলগী পাইপ গ্যাস ফংহনগদবা সিতী গ্যাস দিস্ত্রিব্যুসন পাইপলাইন অলিপুরদ্বার অমদি কুচ বিহারদা হৌদোক্লে হায়না মহাক্না লাউথোকখি। থৌশিল অসিনা LPG সিলীন্দর লৈবগী খুদোংচাদবা অদু কোকহন্দুনা ইমুং কয়াদা সিক্যুর ওইবা গ্যাস সপ্লাই ফংহল্লগনি হায়না শ্রী মোদীনা হায়খি। মসিগী মথক্তা, CNG স্তেসনশিং পাকথোক চাউথোকহনবনা গ্রীন ফ্যুল ফংহনবা হেনগৎহন্দুনা শেল য়াম্না চংদবা, মতম মাঙদবা, অমদি অকোয়বগী ফীভমদা কান্নবা পীগনি। মহাক্না অনৌবা খোঙহৌ অসিগীদমক অলিপুরদ্বার অমদি কুচ বিহারগী মীয়ামদা য়াইফ পাউজেল পীখি। “সিতী গ্যাস দিস্ত্রিব্যুসন প্রোজেক্ত অসি পাইপলাইন প্রোজেক্ত অমখক্তা নত্তে, মসি লৈঙাক্কী স্কীমশিং য়ুমথোঙ য়ুমথোঙদা য়ৌহনবগী খুদম অমনি,” হায়না মহাক্না ফোঙদোকখি।
ইনর্জী সেক্তরদা ভারতনা শিংথানিংঙাই ওইনা মায় পাক্লবশিং শিংথারদুনা, অমদি লৈবাক অসিনা খোঙলৈ থুনা গ্যাসতা য়ুম্ফম ওইবা শেন্মিৎলোন অমগী মায়কৈদা চঙশিল্লি হায়রদুনা, প্রধান মন্ত্রীনা ২০১৪দা সিতী গ্যাস সর্ভিস শুপ্নতগী দিস্ত্রিক্ত ৬৬৬ তা ফংলম্মি, অদুগা ঙসিদি সিতী গ্যাস দিস্ত্রিব্যুসন নেতৱর্ক অসি লৈবাক শিনবা থুংনা দিস্ত্রিক্ত ৫৫০ হেনবদা য়ৌবা ঙম্লে হায়খি। নেতৱর্ক অসি হৌজিক্তি খুঙ্গং অমদি অপীকপা ময়োল্লমশিংদসু য়ৌদুনা, য়ুমথোঙ মিলিয়নন কয়াদা পাইপকী গ্যাস ফংহল্লে হায়না প্রধান মন্ত্রীনা শিংথাখি। CNG পাক শন্না শীজিন্নরকপনা পব্লিক ত্রান্সপোর্ত্তা অওনবা পুরক্তুনা পোলুসন থোকপগী চাং শাথিনা হন্থহল্লে। হোংলক্লিবা অসিনা মীয়ামগী হকশেল ফগৎহনবতা নত্তনা শেলগী পোৎলুমসু হন্থহল্লে হায়না মহাক্না ফোঙদোকখি।
প্রধান মন্ত্রী উজ্জ্বল য়োজনানা ভারতনা গ্যাসতা য়ুম্ফম ওইবা শেন্মিৎলোনগী মায়কৈদা চঙশিল্লিবা খোঙজল য়াংখৎহল্লে হায়রদুনা, শ্রী মোদীনা, ২০১৬ দা হৌদোকখিবা স্কীম অসিনা লায়রবা নুপী মিলিয়ন কয়াবু মৈখু চুরবা চাকশঙদগী পুথোরক্তুনা মখোয়গী পুন্সি মহিং ফগৎহল্লে, হকশেল ফগৎহল্লে, অমদি য়ুমগী চাক থোংফমগী ফীভমসু ফগৎহল্লে হায়খি। ২০১৪ দা লৈবাক অসিদা LPG কন্নেক্সন করোর ১৪ য়ৌদনা লৈরম্মি, অদুগা ঙসিদি করোর ৩১ হেন্দুনা য়ুনিভর্সেল গ্যাস এক্সেসকী মঙলান মঙফাওনহল্লে। লৈঙাক অসিনা লৈবাক পুম্বগী গ্যাস দিস্ত্রিব্যুসন নেতৱর্ক মপাঙ্গল কনখৎহন্দুনা, লৈবাকসিগী কাচিন কোয়া থুংনা য়ৌবা ঙমহল্লে হায়খি। LPG দিস্ত্রিব্যুতর মশিংসু শরুক অনি হেনগৎলে হায়রদুনা, শ্রী মোদীনা ২০১৪গী মমাঙদা LPG দিস্ত্রিব্যুতর মশিং ১৪,০০০ য়ৌরমদে, অদুগা ঙসিদি ২৫,০০০ হেন্না লৈরে হায়খি। হৌজিক্তি খুঙ্গংগী লমদা ফাওবা গ্যাস সিলিন্দর লায়না ফংদুনা লৈবাক থুংনা তরু তরুবা চাকথোং গ্যাস মপুং ফানা ফংহল্লে।
প্রধান মন্ত্রীনা উর্জা গঙ্গা প্রোজেক্তকী মরুওইবা ৱাফমশিং থম্লদুনা মসিবু গ্যাসতা য়ুম্ফম ওইবা শেন্মিৎলোন অমগী মায়কৈদা থাংজিনবা য়াওলগী খোঙথাং অমনি হায়খি। থৌশিল অসিগী মখাদা, গ্যাস পাইপলাইনশিং ভারতকী নোংপোকথংবা স্তেতশিংদা শম্নহন্নবা পাকথোক চাউথোকহন্দুনা, ৱেস্ত বেঙ্গল অমদি অতৈ মফমশিংদা গ্যাস ফংহনবগী চাং হেনগৎহল্লি। কেন্দ্র লৈঙাক্না হোৎনরিবশিং অসিনা ইনর্জী ফংবগী চাং পাকথোক চাউথোকহনবতা নত্তনা ময়োল্লম অমদি খুঙ্গংগী লমশিংদা অনৌবা থবক পীবগী খুদোংচাবশিংসু শেমগৎলি হায়না প্রধান মন্ত্রীনা হায়খি। পাইপলাইন শেমগৎপদগী হৌরগা গ্যাস সপ্লাই তৌবা ফাওবদা, থাক কয়াদা থবক পীবগী চাং হেনগৎহন্দুনা গ্যাসতা য়ুম্ফম ওইবা ইন্দস্ত্রীশিংদা তাংবা ইন্দস্ত্রিএল ইকোসিস্তেমগী মপাঙ্গলসু কনখৎহল্লে। “ভারতনা অহোঙবা, তরু তরুবা অমদি লায়না ফংবা ইনর্জী লৈবা ভারত অমগী মায়কৈদা হৌজিক্তি চঙশিল্লক্লি,” হায়না প্রধান মন্ত্রীনা হায়খি।
ৱেস্ত বেঙ্গল অসি ভারতকী নাৎ, ৱাখল লৌশিং, অমদি সাইন্তিফিক এদভান্সমেন্তকী মরুওইবা মফম অমা ওইদুনা লাক্লি হায়রদুনা, শ্রী মোদীনা চাওখৎপা ভারত অমগী মঙলান অসি বেঙ্গল চাওখত্তনা ওইথোকপা ঙম্লোই হায়খি। ৱাফম অসি পুক্নিংদা থম্লগা, কেন্দ্র লৈঙাক্না হৌখিবা দেকেদ অসিদা লুপা করোর লিশিং কয়াগী ওইগদবা চাওখৎ থৌরাংগী প্রোজেক্তশিং হৌদোকখ্রে হায়খি। পুর্ব এক্সপ্রেসৱে, দুর্গাপুর এক্সপ্রেসৱে, শ্রামা প্রসাদ মুখর্জী পোর্ত মোদর্নাইজ তৌবা, কোলকতা মেত্রো পাকথোক চাউথোকহনবা, নিউ জলপাইগুরী স্তেসন্দা অওনবা পুরকপা, অমদি দুৱার লম্বীদা অনৌবা ত্রেনশিং হৌদোকপা য়াওনা বেঙ্গলগী চাওখৎ খোঙজেলদা মীৎয়েঙ থম্বা মরুওইবা ইনফ্রাস্ত্রকচর প্রোজেক্তশিংগী মরমদা মহাক্না পনখি। “নৌনা হৌদোক্লিবা প্রোজেক্ত অসি অচম্বা পাইপলাইন অমা নত্তে, চাওখৎ খোঙথাংগী লম্বী অমনি,” হায়রদুনা, শ্রী মোদীনা মীয়ামগী পুন্সি লায়থোকহন্নবা অমদিই বেঙ্গলগী তরং তরংবা তুংলমচৎ অমা লৈহন্নবা লৈঙাক্না লেপ্লি হায়খি। ৱেস্ত বেঙ্গলনা চাওখৎপগী লম্বীদা লেপ্তনা চঙশিনখিগনি হায়রদুনা, স্তেত অসিগী মীয়ামগী মফমদা য়াইফ পাউজেল পীখি হায়রদুনা মহাক্কী ৱারোল লোইশিনখি।
কেন্দ্র মন্ত্রী দোক্তর সুকান্ত মজুমদার, ৱেস্ত বেঙ্গল এসেমব্লীগী ওপোজিসন লুচিংবা, শ্রী সুবেন্ধু অধিকারি, অলিপুরদ্বারগী মেম্বর ওফ পার্লিয়ামেন্ত, শ্রী মনোজ তিগ্গাসু থৌরমদুদা অতৈ মীথুংশিংগা লোয়ননা শরুক য়াখি।
বেকগ্রাউন্দ
লুপা করোর ১০১০ হেনবগী সিতী গ্যাস দিস্ত্রিব্যুসন (CGD) প্রোজেক্ত অসিনা য়ুমথোঙ লাখ ২.৫ হেনবা, কম্মর্সিএল এসস্তাব্লিসমেন্ত অমদি ইন্দস্ত্রী ১০০ হেনবদা পাইপ নেচরেল গ্যাস (PNG) ফংহন্নবা, লোয়ননা লৈঙাক্না থম্লিবা মিনিমম ৱর্ক প্রোগ্রাম (MWP) গী পরিংদা CNG স্তেসন ১৯ লোম লিংখত্তুনা ভেহিকুলর ত্রাফিক্তা কমপ্রেস নেচরেল গ্যাস (CNG) ফংহন্নবা পান্দম থম্লি। মসিনা লমদম অসিদা খুদোংচাবা, থাজনিংঙাই ওইবা, মহৌশাগা চুনবা, অমদি শেল চঙদবা থাউ সপ্লাই লৈহনগনি অমদি থবক পীবগী খুদোংচাবশিং শেমগৎকনি।
***
(Release ID: 2132366)
Read this release in:
English
,
Urdu
,
Marathi
,
Hindi
,
Bengali
,
Assamese
,
Bengali-TR
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam