എല്ലാ ആദരണീയ അതിഥികളേ, എന്റെ മന്ത്രിസഭാ സഹപ്രവർത്തകരേ, വ്യവസായ നേതാക്കളേ, അന്താരാഷ്ട്ര പ്രതിനിധികളേ, എന്റെ സുഹൃത്തുക്കളേ, നമസ്‌കാരം!

ഇന്നും അടുത്ത രണ്ട് ദിവസങ്ങളിലും, ഭാരതത്തിന്റെ സൂര്യോദയ മേഖലയായ ഉരുക്ക് മേഖലയുടെ കഴിവുകളെയും സാധ്യതകളെയും കുറിച്ച് നാം വിപുലമായ ചർച്ചകളിൽ ഏർപ്പെടും. ഭാരതത്തിന്റെ പുരോഗതിയുടെ നട്ടെല്ലായി വർത്തിക്കുന്ന ഒരു മേഖലയാണിത്, 'വികസിത് ഭാരതി'ന് (വികസിത ഇന്ത്യ) ശക്തമായ അടിത്തറ പാകുന്ന, രാജ്യത്ത് പരിവർത്തനത്തിന്റെ ഒരു പുതിയ അധ്യായം രചിക്കുന്ന ഒന്നാണ് ഇത്. ഇന്ത്യ സ്റ്റീൽ 2025 ലേക്ക് നിങ്ങളെയെല്ലാം ഞാൻ സ്നേഹപൂർവ്വം സ്വാഗതം ചെയ്യുന്നു. പുതിയ ആശയങ്ങൾ പങ്കിടുന്നതിനും, പുതിയ പങ്കാളിത്തങ്ങൾ രൂപപ്പെടുത്തുന്നതിനും, നൂതനാശയത്തെ പ്രോത്സാഹിപ്പിക്കുന്നതിനുമുള്ള ഒരു പുതിയ ലോഞ്ച് പാഡായി ഈ പരിപാടി പ്രവർത്തിക്കുമെന്ന് എനിക്ക് ഉറപ്പുണ്ട്. ഉരുക്ക് മേഖലയിൽ ഒരു പുതിയ അധ്യായത്തിന് ഇത് അടിത്തറയിടും.

സുഹൃത്തുക്കളേ,

ലോകത്തിന്റെ ആധുനിക സമ്പദ്‌വ്യവസ്ഥയിൽ ഉരുക്ക് ഒരു ചട്ടക്കൂട് പോലെ പങ്ക് വഹിച്ചിട്ടുണ്ട്. അത് അംബരചുംബികളായ കെട്ടിടങ്ങളോ ഷിപ്പിംഗോ, ഹൈവേകളോ അതിവേഗ റെയിലോ, സ്മാർട്ട് സിറ്റികളോ വ്യാവസായിക ഇടനാഴികളോ ആകട്ടെ - ഓരോ വിജയഗാഥയുടെയും പിന്നിൽ ഉരുക്കിന്റെ ശക്തിയുണ്ട്. ഇന്ന്, 5 ട്രില്യൺ ഡോളർ സമ്പദ്‌വ്യവസ്ഥയാകുക എന്ന ലക്ഷ്യം കൈവരിക്കാൻ ഭാരതം പരിശ്രമിക്കുന്നു. ഈ ലക്ഷ്യം കൈവരിക്കുന്നതിൽ ഉരുക്ക് മേഖല ഒരു പ്രധാന പങ്ക് വഹിക്കുന്നു. ലോകത്തിലെ രണ്ടാമത്തെ വലിയ ഉരുക്ക് ഉത്പാദക രാജ്യമായി ഭാരതം മാറിയതിൽ നമ്മുക്ക് അഭിമാനമുണ്ട്. ദേശീയ ഉരുക്ക് നയ പ്രകാരം, 2030 ആകുമ്പോഴേക്കും 300 ദശലക്ഷം ടൺ ഉരുക്ക് ഉത്പാദിപ്പിക്കുക എന്നതാണ് ഞങ്ങളുടെ ലക്ഷ്യം. നിലവിൽ, ഞങ്ങളുടെ പ്രതിശീർഷ ഉരുക്ക് ഉപഭോഗം ഏകദേശം 98 കിലോഗ്രാം ആണ്, 2030 ആകുമ്പോഴേക്കും ഇത് 160 കിലോഗ്രാം ആയി ഉയരുമെന്ന് പ്രതീക്ഷിക്കുന്നു. ഈ വളരുന്ന ഉരുക്ക് ഉപഭോഗം രാജ്യത്തിന്റെ അടിസ്ഥാന സൗകര്യങ്ങൾക്കും സമ്പദ്‌വ്യവസ്ഥയ്ക്കും ഒരു സുവർണ്ണ മാനദണ്ഡമായി വർത്തിക്കുന്നു. രാജ്യത്തിന്റെ ദിശയ്ക്കും ഗവണ്മെൻ്റിൻ്റെ കാര്യക്ഷമതയ്ക്കും ഫലപ്രാപ്തിക്കും ഇത് ഒരു മാനദണ്ഡമാണ്.

സുഹൃത്തുക്കളേ,

ഇന്ന്, നമ്മുടെ ഉരുക്ക് വ്യവസായം അതിന്റെ ഭാവിയെക്കുറിച്ച് പുതിയ ആത്മവിശ്വാസത്താൽ നിറഞ്ഞിരിക്കുന്നു - കാരണം പിഎം ഗതി ശക്തി ദേശീയ മാസ്റ്റർ പ്ലാനിന്റെ രൂപത്തിൽ രാജ്യത്തിന് ഇപ്പോൾ ഒരു ഉറച്ച അടിത്തറയുണ്ട്. പിഎം ഗതി ശക്തിയിലൂടെ, വിവിധ യൂട്ടിലിറ്റി സേവനങ്ങളും ലോജിസ്റ്റിക്സ് രീതികളും സംയോജിപ്പിക്കപ്പെടുന്നു. രാജ്യത്തെ ഖനന മേഖലകളും ഉരുക്ക് യൂണിറ്റുകളും തമ്മിലുള്ള ബഹു മാത‍ൃകാ കണക്റ്റിവിറ്റി വർദ്ധിപ്പിക്കുന്നതിനായി മാപ്പിംഗ് നടക്കുന്നു. ഉരുക്ക് മേഖലയുടെ ഭൂരിഭാഗവും കേന്ദ്രീകരിച്ചിരിക്കുന്ന രാജ്യത്തിന്റെ കിഴക്കൻ പ്രദേശങ്ങളിൽ, നിർണായക അടിസ്ഥാന സൗകര്യങ്ങൾ നവീകരിക്കുന്നതിനായി പുതിയ പദ്ധതികൾ ആരംഭിക്കുന്നു. 1.3 ട്രില്യൺ ഡോളറിന്റെ ദേശീയ അടിസ്ഥാന സൗകര്യ പൈപ്പ്‌ലൈനും ഞങ്ങൾ മുന്നോട്ട് കൊണ്ടുപോകുന്നു. നമ്മുടെ നഗരങ്ങളെ സ്മാർട്ട് സിറ്റികളാക്കി മാറ്റുന്നതിനുള്ള പ്രവർത്തനങ്ങൾ വലിയ തോതിൽ നടക്കുന്നു. റോഡുകൾ, റെയിൽവേകൾ, വിമാനത്താവളങ്ങൾ, തുറമുഖങ്ങൾ, പൈപ്പ്‌ലൈനുകൾ എന്നിവയിലെ വികസനത്തിന്റെ അഭൂതപൂർവമായ വേഗത ഉരുക്ക് മേഖലയ്ക്ക് പുതിയ അവസരങ്ങൾ തുറക്കുന്നു. പിഎം ആവാസ് യോജന പ്രകാരം, രാജ്യത്തുടനീളം ദശലക്ഷക്കണക്കിന് വീടുകൾ നിർമ്മിക്കപ്പെടുന്നു. അതുപോലെ, ജൽ ജീവൻ മിഷൻ രാജ്യത്തുടനീളമുള്ള ഗ്രാമങ്ങളിൽ വൻതോതിലുള്ള അടിസ്ഥാന സൗകര്യങ്ങൾ സൃഷ്ടിക്കുന്നു. പലപ്പോഴും, നമ്മുടെ രാജ്യത്ത് ഇത്തരം പദ്ധതികളെ ഒരു ക്ഷേമ കണ്ണുകളോടെ മാത്രമേ വീക്ഷിക്കാറുള്ളൂ. എന്നാൽ ദരിദ്രരെ ശാക്തീകരിക്കാൻ ലക്ഷ്യമിട്ടുള്ള ഈ ക്ഷേമ പദ്ധതികൾ ഉരുക്ക് വ്യവസായത്തെയും ശക്തിപ്പെടുത്തുന്നു. ഗവണ്മെൻ്റ് പദ്ധതികളിൽ 'ഇന്ത്യയിൽ നിർമ്മിച്ച' സ്റ്റീൽ മാത്രമേ ഉപയോഗിക്കാവൂ എന്നും ഞങ്ങൾ തീരുമാനിച്ചു. ഈ ശ്രമങ്ങളുടെ ഫലമായി, നിർമ്മാണത്തിലും അടിസ്ഥാന സൗകര്യങ്ങളിലും സ്റ്റീൽ ഉപഭോഗത്തിന്റെ ഒരു പ്രധാന പങ്ക് ഇപ്പോൾ ഗവണ്മെൻ്റിൻ്റെ നേതൃത്വത്തിലുള്ള സംരംഭങ്ങളിൽ നിന്നാണ്.

സുഹൃത്തുക്കളേ,

പല മേഖലകളുടെയും വളർച്ചയിൽ ഉരുക്ക് ഒരു പ്രധാന ഘടകമാണ്. അതുകൊണ്ടാണ് സ്റ്റീൽ വ്യവസായത്തിനായുള്ള ഗവണ്മെൻ്റിൻ്റെ നയങ്ങൾ മറ്റ് നിരവധി ഇന്ത്യൻ വ്യവസായങ്ങളെ ആഗോളതലത്തിൽ മത്സരാധിഷ്ഠിതമാക്കുന്നതിൽ നിർണായക പങ്ക് വഹിക്കുന്നത്. നമ്മുടെ നിർമ്മാണ മേഖല, നിർമ്മാണം, യന്ത്രങ്ങൾ, ഓട്ടോമോട്ടീവ് മേഖല എന്നിവയെല്ലാം ഇന്ത്യൻ സ്റ്റീൽ വ്യവസായത്തിൽ നിന്നാണ് ശക്തി പ്രാപിക്കുന്നത്. ഈ വർഷത്തെ ബജറ്റിൽ, 'മെയ്ക്ക് ഇൻ ഇന്ത്യ' ത്വരിതപ്പെടുത്തുന്നതിനായി നമ്മുടെ ഗവണ്മെൻ്റ് ദേശീയ നിർമ്മാണ ദൗത്യം പ്രഖ്യാപിച്ചു. ചെറുകിട, ഇടത്തരം, വൻകിട വ്യവസായങ്ങൾക്കായി ഒരുപോലെ രൂപകൽപ്പന ചെയ്തിട്ടുള്ളതാണ് ഈ ദൗത്യം. ദേശീയ നിർമ്മാണ ദൗത്യം നമ്മുടെ സ്റ്റീൽ വ്യവസായത്തിന് പുതിയ അവസരങ്ങൾ തുറക്കും.

സുഹൃത്തുക്കളേ,

വളരെക്കാലമായി, ഉയർന്ന ഗ്രേഡ് സ്റ്റീലിനായി ഭാരതം ഇറക്കുമതിയെ ആശ്രയിച്ചിരുന്നു. ഈ സാഹചര്യം മാറ്റേണ്ടത് നിർണായകമായിരുന്നു, പ്രത്യേകിച്ച് പ്രതിരോധ, തന്ത്രപരമായ മേഖലകൾക്ക്. ഇന്ത്യയുടെ ആദ്യത്തെ തദ്ദേശീയ വിമാനവാഹിനിക്കപ്പൽ നിർമ്മിക്കാൻ ഉപയോഗിച്ച ഉരുക്ക് ഭാരതത്തിൽ നിർമ്മിച്ചതാണെന്നതിൽ ഞങ്ങൾ അഭിമാനിക്കുന്നു. ചന്ദ്രയാൻ ദൗത്യത്തിന്റെ ചരിത്രപരമായ വിജയത്തിനും ഇന്ത്യൻ ഉരുക്കിന്റെ ശക്തി കാരണമായി. ഇന്ന്, നമുക്ക് കഴിവും ആത്മവിശ്വാസവും ഉണ്ട് - ഇത് യാദൃശ്ചികമായി സംഭവിച്ചതല്ല. പി‌എൽ‌ഐ (ഉല്പാദന ബന്ധിത ആനുകൂല്യ) പദ്ധതി പ്രകാരം, ഉയർന്ന ഗ്രേഡ് സ്റ്റീലിന്റെ ഉത്പാദനം വർദ്ധിപ്പിക്കുന്നതിന് ആയിരക്കണക്കിന് കോടി രൂപ നിക്ഷേപിക്കപ്പെടുന്നു. ഇത് ഒരു തുടക്കം മാത്രമാണ് - നമുക്ക് ഒരുപാട് ദൂരം പോകാനുണ്ട്. രാജ്യത്തുടനീളം നിരവധി മെഗാ പദ്ധതികൾ ആരംഭിക്കുന്നു, ഉയർന്ന ഗ്രേഡ് സ്റ്റീലിന്റെ ആവശ്യം ഇനിയും വർദ്ധിക്കാൻ പോകുന്നു. ഈ വർഷത്തെ ബജറ്റിൽ, ഞങ്ങളുടെ അടിസ്ഥാന സൗകര്യ ശ്രദ്ധ കേന്ദ്രീകരിക്കുന്ന മേഖലയായി കപ്പൽ നിർമ്മാണം ഉൾപ്പെടുത്തിയിട്ടുണ്ട്. മറ്റ് രാജ്യങ്ങൾ ഭാരതത്തിൽ നിർമ്മിച്ച കപ്പലുകൾ വാങ്ങുമെന്ന കാഴ്ചപ്പാടോടെ, ഭാരതത്തിൽ ആധുനികവും വലുതുമായ കപ്പലുകൾ നിർമ്മിക്കാൻ ഞങ്ങൾ ലക്ഷ്യമിടുന്നു. അതുപോലെ, പൈപ്പ്‌ലൈൻ-ഗ്രേഡ് സ്റ്റീലിനും തുരുമ്പിനെ പ്രതിരോധിക്കുന്ന ലോഹസങ്കരങ്ങൾക്കുമുള്ള ആവശ്യകതയും രാജ്യത്തിനുള്ളിൽ വർദ്ധിച്ചുവരികയാണ്.

രാജ്യത്തെ റെയിൽ അടിസ്ഥാന സൗകര്യങ്ങൾ അഭൂതപൂർവമായ വേഗതയിൽ വികസിച്ചുകൊണ്ടിരിക്കുകയാണ്. ഈ ആവശ്യങ്ങൾക്കെല്ലാം, നമ്മുടെ ലക്ഷ്യം 'സീറോ ഇറക്കുമതി'യും 'നെറ്റ് കയറ്റുമതി'യും ആയിരിക്കണം! നിലവിൽ, 25 ദശലക്ഷം ടൺ സ്റ്റീൽ കയറ്റുമതിയാണ് ഞങ്ങൾ ലക്ഷ്യമിടുന്നത്. 2047 ആകുമ്പോഴേക്കും ഞങ്ങളുടെ ഉൽപ്പാദന ശേഷി 500 ദശലക്ഷം ടണ്ണായി വികസിപ്പിക്കാനും ഞങ്ങൾ പ്രവർത്തിക്കുന്നു. എന്നാൽ ഇത് സംഭവിക്കണമെങ്കിൽ, ഞങ്ങളുടെ സ്റ്റീൽ മേഖല പുതിയ പ്രക്രിയകൾക്കും, പുതിയ നിലവാരത്തിനും, പുതിയ മാനദണ്ഡങ്ങൾക്കും തയ്യാറായിരിക്കണം. ഭാവിയെ അടിസ്ഥാനമാക്കിയുള്ള ഒരു മനോഭാവത്തോടെ നാം വികസിപ്പിക്കുകയും നവീകരിക്കുകയും വേണം. നമ്മൾ ഇപ്പോൾ ഭാവി സജ്ജമാകണം. സ്റ്റീൽ വ്യവസായത്തിന്റെ വളർച്ചാ സാധ്യത തൊഴിലവസരങ്ങൾ സൃഷ്ടിക്കുന്നതിനുള്ള പരിധിയില്ലാത്ത അവസരങ്ങൾ നൽകുന്നു. പുതിയ ആശയങ്ങൾ വികസിപ്പിക്കാനും പരിപോഷിപ്പിക്കാനും പങ്കിടാനും ഞാൻ പൊതു-സ്വകാര്യ മേഖലകളോട് അഭ്യർത്ഥിക്കുന്നു. ഉല്പാദനം, ഗവേഷണ വികസനം, സാങ്കേതികവിദ്യ നവീകരണം എന്നിവയിൽ നമ്മൾ ഒരുമിച്ച് മുന്നോട്ട് പോകുകയും നമ്മുടെ രാജ്യത്തെ യുവാക്കൾക്ക് കൂടുതൽ കൂടുതൽ തൊഴിലവസരങ്ങൾ സൃഷ്ടിക്കുകയും വേണം.

സുഹൃത്തുക്കളേ,

ഉരുക്ക് വ്യവസായത്തിന്റെ വളർച്ചാ യാത്രയിൽ ചില വെല്ലുവിളികളുണ്ട്, അവ പരിഹരിക്കേണ്ടത് മുന്നോട്ട് പോകുന്നതിന് അത്യാവശ്യമാണ്. അസംസ്കൃത വസ്തുക്കളുടെ സുരക്ഷ ഒരു പ്രധാന ആശങ്കയായി തുടരുന്നു. നിക്കൽ, കോക്കിംഗ് കൽക്കരി, മാംഗനീസ് എന്നിവയ്ക്കായി നമ്മൾ ഇപ്പോഴും ഇറക്കുമതിയെ ആശ്രയിച്ചിരിക്കുന്നു. അതിനാൽ, ആഗോള പങ്കാളിത്തങ്ങൾ ശക്തിപ്പെടുത്തുകയും, വിതരണ ശൃംഖലകൾ സുരക്ഷിതമാക്കുകയും, സാങ്കേതിക നവീകരണങ്ങളിൽ ശ്രദ്ധ കേന്ദ്രീകരിക്കുകയും വേണം. ഊർജ്ജക്ഷമതയുള്ളതും, കുറഞ്ഞ ബഹിർഗമനം ഉള്ളതും, ഡിജിറ്റൽ രീതിയിൽ നൂതനവുമായ സാങ്കേതികവിദ്യകളിലേക്ക് നാം വേഗത്തിൽ നീങ്ങണം. ഉരുക്ക് വ്യവസായത്തിന്റെ ഭാവി എഐ, ഓട്ടോമേഷൻ, പുനരുപയോഗം, ഉപോൽപ്പന്ന ഉപയോഗം എന്നിവയാൽ രൂപപ്പെടും. അതുകൊണ്ടാണ് ഈ മേഖലകളിലെ നൂതനാശയത്തിനുള്ള നമ്മുടെ ശ്രമങ്ങൾ നാം ശക്തമാക്കേണ്ടത്. നമ്മുടെ ആഗോള പങ്കാളികളും ഇന്ത്യൻ കമ്പനികളും ഈ ദിശയിൽ ഒരുമിച്ച് പ്രവർത്തിച്ചാൽ, നമുക്ക് ഈ വെല്ലുവിളികളെ കൂടുതൽ വേഗത്തിൽ മറികടക്കാൻ കഴിയും.

സുഹൃത്തുക്കളേ,

കൽക്കരി ഇറക്കുമതി, പ്രത്യേകിച്ച് കോക്കിംഗ് കൽക്കരി, ചെലവിനെയും സമ്പദ്‌വ്യവസ്ഥയെയും ഒരുപോലെ ബാധിക്കുമെന്ന് നിങ്ങൾക്കെല്ലാവർക്കും അറിയാം. നമ്മൾ ബദലുകൾ തേടണം. ഇന്ന്, ഡിആർഐ (ഡയറക്ട് റെഡ്യൂസ്ഡ് അയൺ) റൂട്ട് പോലുള്ള സാങ്കേതികവിദ്യകളും മറ്റ് ആധുനിക രീതികളും ലഭ്യമാണ്, അവ കൂടുതൽ പ്രോത്സാഹിപ്പിക്കുന്നതിനായി ഞങ്ങൾ പ്രവർത്തിക്കുന്നു. കൽക്കരി ഗ്യാസിഫിക്കേഷനും നമുക്ക് പ്രയോജനപ്പെടുത്താം, ഇത് രാജ്യത്തിന്റെ കൽക്കരി വിഭവങ്ങൾ മികച്ച രീതിയിൽ ഉപയോഗിക്കാനും ഇറക്കുമതിയെ ആശ്രയിക്കുന്നത് കുറയ്ക്കാനും നമ്മെ അനുവദിക്കുന്നു. ഉരുക്ക് വ്യവസായത്തിലെ എല്ലാ പങ്കാളികളും ഈ ശ്രമത്തിന്റെ ഭാഗമാകാനും ഈ ദിശയിൽ ആവശ്യമായ നടപടികൾ സ്വീകരിക്കാനും ഞാൻ അഭ്യർത്ഥിക്കുന്നു.

സുഹൃത്തുക്കളേ,

മറ്റൊരു പ്രധാന പ്രശ്നം ഉപയോഗിക്കാത്ത ഗ്രീൻഫീൽഡ് ഖനികളുടെതാണ്. കഴിഞ്ഞ 10 വർഷത്തിനിടയിൽ, രാജ്യം നിരവധി ഖനന പരിഷ്കാരങ്ങൾ നടപ്പിലാക്കിയിട്ടുണ്ട്, ഇത് ഇരുമ്പയിര് കൂടുതൽ എളുപ്പത്തിൽ ലഭ്യമാക്കിയിട്ടുണ്ട്. ഇപ്പോൾ, അനുവദിച്ച ഈ ഖനികളും നമ്മുടെ ദേശീയ വിഭവങ്ങളും ശരിയായതും സമയബന്ധിതവുമായ രീതിയിൽ ഉപയോഗിക്കേണ്ടത് അത്യന്താപേക്ഷിതമാണ്. ഇതിൽ എന്തെങ്കിലും കാലതാമസം വരുത്തുന്നത് രാജ്യത്തിന് ദോഷം വരുത്തുക മാത്രമല്ല, വ്യവസായത്തിനും നഷ്ടമുണ്ടാക്കും. അതുകൊണ്ടാണ് ഗ്രീൻഫീൽഡ് ഖനനം വേഗത്തിലാക്കണമെന്ന് ഞാൻ അഭ്യർത്ഥിക്കുന്നത്.

സുഹൃത്തുക്കളേ,

ഇന്നത്തെ ഭാരതം ആഭ്യന്തര വളർച്ചയിൽ മാത്രമല്ല, ആഗോള നേതൃത്വം ഏറ്റെടുക്കാൻ തയ്യാറെടുക്കുകയാണ്. ഉയർന്ന നിലവാരമുള്ള ഉരുക്കിന്റെ വിശ്വസനീയ വിതരണക്കാരായാണ് ഇന്ന് ലോകം നമ്മെ കാണുന്നത്. ഞാൻ നേരത്തെ സൂചിപ്പിച്ചതുപോലെ, ഉരുക്കിൽ ലോകോത്തര നിലവാരം പുലർത്തുകയും സ്വയം നിരന്തരം നവീകരിക്കുകയും വേണം. ലോജിസ്റ്റിക്സ് മെച്ചപ്പെടുത്തൽ, ബഹു-മാതൃകാ ഗതാഗത ശൃംഖലകൾ വികസിപ്പിക്കൽ, ചെലവ് കാര്യക്ഷമത ഉറപ്പാക്കൽ എന്നിവയെല്ലാം ഭാരതത്തെ ഒരു ആഗോള ഉരുക്ക് കേന്ദ്രമാക്കി മാറ്റാൻ സഹായിക്കും.

സുഹൃത്തുക്കളേ,

നമ്മുടെ കഴിവുകൾ വികസിപ്പിക്കുന്നതിനും നമ്മുടെ ആശയങ്ങൾ ജീവസുറ്റതാക്കുന്നതിനുമുള്ള ഒരു അവസരമാണ് ഈ ഇന്ത്യ സ്റ്റീൽ പ്ലാറ്റ്‌ഫോം. ഈ അവസരത്തിൽ നിങ്ങൾക്കെല്ലാവർക്കും എന്റെ ആശംസകൾ നേരുന്നു. കരുത്തുറ്റതും, വിപ്ലവകരവും, ഉരുക്ക് ശക്തവുമായ ഒരു ഭാരതം കെട്ടിപ്പടുക്കാൻ നമുക്ക് ഒത്തുചേരാം.

നന്ദി.

ഡിസ്ക്ലയ്മർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. ഹിന്ദിയിലാണ് യഥാർത്ഥ പ്രസംഗം നടത്തിയത്.

***

NK