ସମସ୍ତ ସମ୍ମାନନୀୟ ଅତିଥିଗଣ, ମୋର ମନ୍ତ୍ରୀମଣ୍ଡଳର ସହଯୋଗୀଗଣ, ଉଦ୍ୟୋଗ ଜଗତର ନେତୃବୃନ୍ଦ, ଆନ୍ତର୍ଜାତୀୟ ପ୍ରତିନିଧିଗଣ, ଏବଂ ମୋର ସାଥିମାନେ, ନମସ୍କାର!

ଆଜି ଏବଂ ଆଗାମୀ ଦୁଇ ଦିନ ମଧ୍ୟରେ, ଆମେ ଭାରତର ଉଦୀୟମାନ କ୍ଷେତ୍ର ଇସ୍ପାତ କ୍ଷେତ୍ରର ସାମର୍ଥ୍ୟ ଏବଂ ଦକ୍ଷତା ବିଷୟରେ ବ୍ୟାପକ ଆଲୋଚନା କରିବୁ। ଏହା ଏପରି ଏକ କ୍ଷେତ୍ର, ଯାହା ଭାରତର ପ୍ରଗତିର ମେରୁଦଣ୍ଡ, 'ଯାହା ବିକଶିତ ଭାରତ’ ପାଇଁ ଏକ ସୁଦୃଢ଼ ମୂଳଦୁଆ, ଏବଂ ଦେଶରେ ପରିବର୍ତ୍ତନର ଏକ ନୂତନ ଅଧ୍ୟାୟ ସୃଷ୍ଟି କରୁଛି। ଇଣ୍ଡିଆ ଷ୍ଟିଲ୍ 2025 କୁ ମୁଁ ଆପଣ ସମସ୍ତଙ୍କୁ ହାର୍ଦ୍ଦିକ ଅଭିନନ୍ଦନ ଜଣାଉଛି। ମୋର ବିଶ୍ୱାସ ଅଛି ଯେ ଏହି କାର୍ଯ୍ୟକ୍ରମରେ ନୂତନ ଚିନ୍ତାଧାରା ବାଣ୍ଟିବା, ନୂତନ ଭାଗିଦାରୀ ସୃଷ୍ଟି କରିବା ଏବଂ ନବସୃଜନକୁ ପ୍ରୋତ୍ସାହିତ କରିବା ପାଇଁ ଏକ ନୂତନ ଲଞ୍ଚ ପ୍ୟାଡ୍ ଭାବରେ କାର୍ଯ୍ୟ କରିବ। ଏହା ଇସ୍ପାତ କ୍ଷେତ୍ରରେ ଏକ ନୂତନ ଅଧ୍ୟାୟର ମୂଳଦୁଆ ପକାଇବ।

ସାଥିମାନେ,

ବିଶ୍ୱର ଆଧୁନିକ ଅର୍ଥନୀତିରେ ଇସ୍ପାତ ଏକ କଙ୍କଳ ଭଳି ଭୂମିକା ଗ୍ରହଣ କରିଛି। ଆକାଶଚୁମ୍ବୀ କୋଠା ହେଉ କିମ୍ବା ଜାହାଜ ଚଳାଚଳ, ରାଜପଥ ହେଉ କିମ୍ବା ହାଇ ସ୍ପିଡ୍ ରେଳ, ସ୍ମାର୍ଟ ସିଟି ହେଉ କିମ୍ବା ଶିଳ୍ପ କରିଡର ହେଉ, ପ୍ରତ୍ୟେକ ସଫଳତା କାହାଣୀ ପଛରେ ଷ୍ଟିଲ୍ ର ଶକ୍ତି ରହିଛି। ଆଜି ଭାରତ 5 ଟ୍ରିଲିଅନ୍ ଡଲାର ଅର୍ଥନୀତି ହେବାର ଲକ୍ଷ୍ୟ ପୂରଣ କରିବାକୁ ପ୍ରୟାସ କରୁଛି। ଏହି ଲକ୍ଷ୍ୟ ହାସଲରେ ଇସ୍ପାତ କ୍ଷେତ୍ର ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଆମେ ଗର୍ବିତ ଯେ ଭାରତ ଏବେ ବିଶ୍ୱର ଦ୍ୱିତୀୟ ବୃହତ୍ତମ ଇସ୍ପାତ ଉତ୍ପାଦନକାରୀ ହୋଇପାରିଛି। ଜାତୀୟ ଇସ୍ପାତ ନୀତି ଅନୁଯାୟୀ ଆମେ 2030 ସୁଦ୍ଧା 300 ନିୟୁତ ଟନ୍ ଇସ୍ପାତ ଉତ୍ପାଦନ କରିବାକୁ ଲକ୍ଷ୍ୟ ରଖିଛୁ। ବର୍ତ୍ତମାନ ଆମର ମୁଣ୍ଡପିଛା ଇସ୍ପାତ ବ୍ୟବହାର ପ୍ରାୟ 98 କିଲୋଗ୍ରାମ ଅଛି ଏବଂ 2030 ସୁଦ୍ଧା ଏହା 160 କିଲୋଗ୍ରାମକୁ ବୃଦ୍ଧି ପାଇବ ବୋଲି ଆଶା କରାଯାଉଛି। ଏହି ବଢୁଥିବା ଇସ୍ପାତ ବ୍ୟବହାର ଦେଶର ଭିତ୍ତିଭୂମି ଏବଂ ଅର୍ଥନୀତି ପାଇଁ ଏକ ସ୍ୱର୍ଣ୍ଣ ମାନକ ଭାବରେ କାର୍ଯ୍ୟ କରୁଛି । ଏହା ମଧ୍ୟ ଦେଶର ଦିଗ ଏବଂ ସରକାରଙ୍କ ଦକ୍ଷତା ଏବଂ ଫଳପ୍ରଦତା ପାଇଁ ମଧ୍ୟ ଏକ ମାନଦଣ୍ଡ ଅଟେ।

ସାଥିମାନେ,

ଆଜି, ଆମର ଇସ୍ପାତ ଶିଳ୍ପ ଏହାର ଭବିଷ୍ୟତାକୁ ନେଇ ନୂତନ ଆତ୍ମବିଶ୍ୱାସରେ ପରିପୂର୍ଣ୍ଣ । କାରଣ ଦେଶରେ ବର୍ତ୍ତମାନ ପିଏମ ଗତି ଶକ୍ତି ନ୍ୟାସନାଲ ମାଷ୍ଟର ପ୍ଲାନ୍ ଆକାରରେ ଏକ ଦୃଢ ମୂଳଦୁଆ ରହିଛି। ପିଏମ ଗତି ଶକ୍ତି ମାଧ୍ୟମରେ ବିଭିନ୍ନ ୟୁଟିଲିଟି ସର୍ଭିସ ଏବଂ ଲଜିଷ୍ଟିକ୍ସ ମୋଡାଲକୁ ସମନ୍ୱିତ କରାଯାଉଛି। ଦେଶର ଖଣି ଅଞ୍ଚଳ ଏବଂ ଇସ୍ପାତ ଉଦ୍ୟୋଗ ମଧ୍ୟରେ ମଲ୍ଟି-ମଡେଲ ସଂଯୋଗ ବୃଦ୍ଧି ପାଇଁ ମ୍ୟାପିଂ ଚାଲିଛି। ଦେଶର ପୂର୍ବାଞ୍ଚଳରେ, ଯେଉଁଠାରେ ଅଧିକାଂଶ ଇସ୍ପାତ କ୍ଷେତ୍ର କେନ୍ଦ୍ରୀଭୂତ ହୋଇଛି, ଗୁରୁତ୍ୱପୂର୍ଣ୍ଣ ଭିତ୍ତିଭୂମିର ନବୀକରଣ ପାଇଁ ନୂତନ ପ୍ରକଳ୍ପ ଆରମ୍ଭ କରାଯାଉଛି। ଆମେ 130 କୋଟି ଡଲାରର ଜାତୀୟ ଭିତ୍ତିଭୂମି ପାଇପଲାଇନକୁ ମଧ୍ୟ ଆଗକୁ ବଢ଼ାଉଛୁ। ଆମ ସହରଗୁଡ଼ିକୁ ସ୍ମାର୍ଟ ସିଟିରେ ପରିଣତ କରିବା ପାଇଁ ବ୍ୟାପକ ସ୍ତରରେ କାର୍ଯ୍ୟ କରାଯାଉଛି। ସଡ଼କ, ରେଳ, ବିମାନବନ୍ଦର, ବନ୍ଦର ଓ ପାଇପଲାଇନରେ ବିକାଶର ଅଭୂତପୂର୍ବ ପ୍ରଗତି ଇସ୍ପାତ କ୍ଷେତ୍ର ପାଇଁ ନୂଆ ସୁଯୋଗ ସୃଷ୍ଟି କରୁଛି। ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ସାରା ଦେଶରେ ଲକ୍ଷ ଲକ୍ଷ ଘର ନିର୍ମାଣ କରାଯାଉଛି। ସେହିଭଳି ଜଳଜୀବନ ମିଶନ ଦେଶର ଗ୍ରାମାଞ୍ଚଳରେ ବ୍ୟାପକ ଭିତ୍ତିଭୂମି ସୃଷ୍ଟି କରୁଛି। ଅନେକ ସମୟରେ ଆମ ଦେଶରେ ଏଭଳି ଯୋଜନାକୁ କେବଳ କଲ୍ୟାଣ ଦୃଷ୍ଟିକୋଣରୁ ଦେଖାଯାଏ। କିନ୍ତୁ ଗରିବଙ୍କୁ ସଶକ୍ତ କରିବା ଉଦ୍ଦେଶ୍ୟରେ ଏହି କଲ୍ୟାଣକାରୀ ଯୋଜନାଗୁଡ଼ିକ ଇସ୍ପାତ ଶିଳ୍ପକୁ ମଧ୍ୟ ସୁଦୃଢ଼ କରୁଛନ୍ତି। ସରକାରୀ ପ୍ରକଳ୍ପରେ କେବଳ 'ମେଡ୍ ଇନ୍ ଇଣ୍ଡିଆ' ଇସ୍ପାତ ବ୍ୟବହାର କରାଯିବ ବୋଲି ଆମେ ନିଷ୍ପତ୍ତି ନେଇଛୁ। ଏହି ପ୍ରୟାସର ଫଳସ୍ୱରୂପ, ଭବନ ନିର୍ମାଣ ଏବଂ ଭିତ୍ତିଭୂମିରେ ଇସ୍ପାତ ବ୍ୟବହାରର ଏକ ଗୁରୁତ୍ୱପୂର୍ଣ୍ଣ ଅଂଶ ବର୍ତ୍ତମାନ ସରକାରଙ୍କ ନେତୃତ୍ୱାଧୀନ ପଦକ୍ଷେପରୁ ଆସିଥାଏ।

ସାଥିମାନେ,

ଅନେକ କ୍ଷେତ୍ରର ଅଭିବୃଦ୍ଧିରେ ଇସ୍ପାତ ଏକ ପ୍ରାଥମିକ ଉପାଦାନ। ସେଥିପାଇଁ ଇସ୍ପାତ ଶିଳ୍ପ ପାଇଁ ସରକାରଙ୍କ ନୀତି ମଧ୍ୟ ଅନ୍ୟ କେତେକ ଭାରତୀୟ ଶିଳ୍ପକୁ ବିଶ୍ୱସ୍ତରରେ ପ୍ରତିଯୋଗିତାମୂଳକ କରିବାରେ ପ୍ରମୁଖ ଭୂମିକା ଗ୍ରହଣ କରିଥାଏ। ଆମର ଉତ୍ପାଦନ କ୍ଷେତ୍ର, ନିର୍ମାଣ, ଯନ୍ତ୍ରପାତି ଏବଂ ଅଟୋମୋବାଇଲ୍ କ୍ଷେତ୍ର, ଏଗୁଡ଼ିକ ସବୁ ଭାରତୀୟ ଇସ୍ପାତ ଶିଳ୍ପରୁ ଶକ୍ତି ହାସଲ କରୁଛନ୍ତି। ଚଳିତ ବର୍ଷର ବଜେଟରେ ଆମ ସରକାର 'ମେକ୍ ଇନ୍ ଇଣ୍ଡିଆ' କୁ ତ୍ୱରାନ୍ୱିତ କରିବା ପାଇଁ ଜାତୀୟ ଉତ୍ପାଦନ ମିଶନ ଘୋଷଣା କରିଥିଲେ। ଏହି ମିଶନ କ୍ଷୁଦ୍ର, ମଧ୍ୟମ ଏବଂ ବୃହତ ଶିଳ୍ପ ପାଇଁ ସମାନ ଭାବରେ ପରିକଳ୍ପନା କରାଯାଇଛି। ଜାତୀୟ ଉତ୍ପାଦନ ମିଶନ ଆମର ଇସ୍ପାତ ଶିଳ୍ପ ପାଇଁ ମଧ୍ୟ ନୂତନ ସୁଯୋଗ ସୃଷ୍ଟି କରିବ।

ସାଥିମାନେ,

ଦୀର୍ଘ ଦିନ ଧରି ଭାରତ ହାଇ ଗ୍ରେଡ୍ ଷ୍ଟିଲ୍ ପାଇଁ ଆମଦାନୀ ଉପରେ ନିର୍ଭରଶୀଳ ଥିଲା। ବିଶେଷ କରି ପ୍ରତିରକ୍ଷା ଏବଂ ରଣନୈତିକ କ୍ଷେତ୍ର ପାଇଁ ଏହି ପରିସ୍ଥିତିକୁ ପରିବର୍ତ୍ତନ କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା। ଭାରତର ପ୍ରଥମ ସ୍ୱଦେଶୀ ବିମାନବାହୀ ଜାହାଜ ନିର୍ମାଣରେ ବ୍ୟବହୃତ ଇସ୍ପାତ ଭାରତରେ ନିର୍ମିତ ହୋଇଥିବାରୁ ଆମେ ଗର୍ବିତ। ଚନ୍ଦ୍ରଯାନ ମିଶନର ଐତିହାସିକ ସଫଳତାରେ ଭାରତୀୟ ଷ୍ଟିଲ୍ ର ଶକ୍ତି ମଧ୍ୟ ସହାୟକ ହୋଇଛି। ଆଜି ଆମ ପାଖରେ ଉଭୟ ସାମର୍ଥ୍ୟ ଓ ଆତ୍ମବିଶ୍ୱାସ ଭାରି ରହିଛି-ଏବଂ ଏହା ଆକସ୍ମିକ ଭାବେ ଘଟିନାହିଁ। ପିଏଲଆଇ (ପ୍ରଡକ୍ସନ୍ ଲିଙ୍କେଡ୍ ଇନସେଣ୍ଟିଭ୍) ଯୋଜନା ଅଧୀନରେ ହାଇ ଗ୍ରେଡ୍ ଷ୍ଟିଲ୍ ଉତ୍ପାଦନ ବୃଦ୍ଧି ପାଇଁ ହଜାର ହଜାର କୋଟି ଟଙ୍କା ବିନିଯୋଗ କରାଯାଉଛି। ଏବଂ ଏହା କେବଳ ଆରମ୍ଭ । ଆମକୁ ଆହୁରି ଅନେକ ବାଟ ଯିବାକୁ ଅଛି। ସାରା ଦେଶରେ ଅନେକ ମେଗା ପ୍ରକଳ୍ପ ଆରମ୍ଭ ହେଉଛି ଏବଂ ହାଇ ଗ୍ରେଡ୍ ଷ୍ଟିଲ୍ ର ଚାହିଦା ଆହୁରି ବୃଦ୍ଧି ପାଇବ। ଚଳିତ ବର୍ଷର ବଜେଟରେ ଆମେ ଜାହାଜ ନିର୍ମାଣକୁ ଆମର ଭିତ୍ତିଭୂମି ଫୋକସର ଏକ ଅଂଶ ଭାବରେ ଅନ୍ତର୍ଭୁକ୍ତ କରିଛୁ। ଅନ୍ୟ ଦେଶ ଭାରତରେ ନିର୍ମିତ ଜାହାଜ କିଣିବେ ବୋଲି ଲକ୍ଷ୍ୟ ରଖି ଭାରତରେ ଆଧୁନିକ ଓ ବଡ଼ ଜାହାଜ ନିର୍ମାଣ କରିବାକୁ ଆମେ ଲକ୍ଷ୍ୟ ରଖିଛୁ। ସେହିଭଳି ଦେଶରେ ପାଇପଲାଇନ-ଗ୍ରେଡ୍ ଷ୍ଟିଲ୍ ଏବଂ କ୍ଷୟ-ପ୍ରତିରୋଧୀ ମିଶ୍ର ଧାତୁର ଚାହିଦା ମଧ୍ୟ ବୃଦ୍ଧି ପାଉଛି।

ଆଜି ଦେଶର ରେଳ ଭିତ୍ତିଭୂମି ଅଭୂତପୂର୍ବ ଗତିରେ ବିସ୍ତାର ହେଉଛି। ଏହି ସମସ୍ତ ଆବଶ୍ୟକତା ପାଇଁ ଆମର ଲକ୍ଷ୍ୟ 'ଶୂନ ଆମଦାନୀ' ଏବଂ 'ଶୁଦ୍ଧ ରପ୍ତାନି' ହେବା ଉଚିତ୍! ବର୍ତମାନ ଆମେ 25 ନିୟୁତ ଟନ୍ ଇସ୍ପାତ ରପ୍ତାନି ଲକ୍ଷ୍ୟ ରଖିଛୁ। ଆମେ 2047 ସୁଦ୍ଧା ଆମର ଉତ୍ପାଦନ କ୍ଷମତାକୁ 500 ନିୟୁତ ଟନକୁ ବୃଦ୍ଧି କରିବା ଦିଗରେ ମଧ୍ୟ କାର୍ଯ୍ୟ କରୁଛୁ। କିନ୍ତୁ ଏହା ହେବା ପାଇଁ ଆମର ଇସ୍ପାତ କ୍ଷେତ୍ର ନୂତନ ପ୍ରକ୍ରିୟା, ନୂତନ ଗ୍ରେଡ୍ ଏବଂ ନୂତନ ସ୍କେଲ ପାଇଁ ପ୍ରସ୍ତୁତ ହେବା ଆବଶ୍ୟକ। ଆମକୁ ଭବିଷ୍ୟତ-ଭିତ୍ତିକ ମାନସିକତା ସହିତ ବିସ୍ତାର ଏବଂ ନବୀକରଣ କରିବାକୁ ପଡିବ। ଆମକୁ ବର୍ତ୍ତମାନ ଭବିଷ୍ୟତ ପାଇଁ ପ୍ରସ୍ତୁତ ହେବାକୁ ପଡିବ। ଇସ୍ପାତ ଶିଳ୍ପର ଅଭିବୃଦ୍ଧି ସମ୍ଭାବନା ଏବଂ ନିଯୁକ୍ତି ସୃଷ୍ଟି ପାଇଁ ଆମର ଅସୀମ ସୁଯୋଗ ରହିଛି। ମୁଁ ଉଭୟ ସରକାରୀ ଏବଂ ବେସରକାରୀ କ୍ଷେତ୍ରକୁ ନୂତନ ଚିନ୍ତାଧାରାର ବିକାଶ, ପୋଷଣ ଏବଂ ଅଂଶୀଦାର କରିବାକୁ ଆହ୍ୱାନ କରୁଛି। ଆମକୁ ଉତ୍ପାଦନ, ଅନୁସନ୍ଧାନ ଓ ବିକାଶ ଏବଂ ପ୍ରଯୁକ୍ତିବିଦ୍ୟା ଉନ୍ନତିକରଣରେ ଏକାଠି କରି ଆଗକୁ ବଢ଼ିବାକୁ ପଡିବ ଏବଂ ଆମ ଦେଶର ଯୁବକମାନଙ୍କ ପାଇଁ ଅଧିକରୁ ଅଧିକ ନିଯୁକ୍ତି ସୁଯୋଗ ସୃଷ୍ଟି କରିବାକୁ ପଡିବ।

ସାଥିମାନେ,

ଇସ୍ପାତ ଶିଳ୍ପର ଅଭିବୃଦ୍ଧି ଯାତ୍ରାରେ ମଧ୍ୟ କେତେକ ଆହ୍ୱାନ ରହିଛି ଏବଂ ଆଗକୁ ବଢିବା ପାଇଁ ଏହାର ମୁକାବିଲା କରିବା ଜରୁରୀ। କଞ୍ଚାମାଲ ସୁରକ୍ଷା ଏକ ପ୍ରମୁଖ ଚିନ୍ତାର ବିଷୟ ହୋଇ ରହିଛି। ଆମେ ଏବେ ବି ନିକେଲ୍, କୋକିଂ କୋଇଲା ଏବଂ ମାଙ୍ଗାନିଜ୍ ଆମଦାନୀ ଉପରେ ନିର୍ଭରଶୀଳ। ତେଣୁ, ଆମକୁ ବିଶ୍ୱସ୍ତରୀୟ ଭାଗିଦାରୀକୁ ସୁଦୃଢ଼ କରିବା, ଯୋଗାଣ ଶୃଙ୍ଖଳକୁ ସୁରକ୍ଷିତ କରିବା ଏବଂ ପ୍ରଯୁକ୍ତିବିଦ୍ୟା ଉନ୍ନତି ଉପରେ ଧ୍ୟାନ ଦେବା ଆବଶ୍ୟକ। ଆମକୁ ଶକ୍ତି-ଦକ୍ଷ, କମ୍- ନିର୍ଗମନ ଏବଂ ଡିଜିଟାଲ୍ ଉନ୍ନତ ଜ୍ଞାନକୌଶଳ ଆଡକୁ ଦ୍ରୁତ ଗତିରେ ଯିବାକୁ ପଡିବ। ଏଆଇ, ଅଟୋମେସନ୍, ରିସାଇକ୍ଲିଂ ଏବଂ ଉପ-ଉତ୍ପାଦ ବ୍ୟବହାର ଦ୍ୱାରା ଇସ୍ପାତ ଶିଳ୍ପର ଭବିଷ୍ୟତ ଗଠନ ହେବ। ସେଥିପାଇଁ ଆମକୁ ଏହି କ୍ଷେତ୍ରରେ ନବସୃଜନ ଦିଗରେ ଆମର ପ୍ରୟାସକୁ ତୀବ୍ର କରିବାକୁ ପଡିବ। ଯଦି ଆମର ବିଶ୍ୱସ୍ତରୀୟ ଅଂଶୀଦାର ଏବଂ ଭାରତୀୟ କମ୍ପାନୀମାନେ ଏହି ଦିଗରେ ମିଳିତ ଭାବରେ କାର୍ଯ୍ୟ କରନ୍ତି, ତେବେ ଆମେ ଏହି ଆହ୍ୱାନଗୁଡ଼ିକୁ ଶୀଘ୍ର ଦୂର କରିବାକୁ ସକ୍ଷମ ହେବୁ।

ସାଥିମାନେ,

ଆପଣ ସମସ୍ତେ ଜାଣନ୍ତି ଯେ, କୋଇଲା ଆମଦାନୀ, ବିଶେଷକରି କୋକିଂ କୋଇଲା ଉଭୟ ମୂଲ୍ୟ ଏବଂ ଅର୍ଥନୀତି ଉପରେ ପ୍ରଭାବ ପକାଇଥାଏ। ଆମକୁ ଏହାର ବିକଳ୍ପ ଖୋଜିବାକୁ ପଡିବ। ଆଜି ଡିଆରଆଇ (ଡାଇରେକ୍ଟ ରିଡ୍ୟୁସଡ୍ ଆଇରନ୍) ରୁଟ୍ ଏବଂ ଅନ୍ୟାନ୍ୟ ଆଧୁନିକ ପଦ୍ଧତି ଭଳି ଜ୍ଞାନକୌଶଳ ଉପଲବ୍ଧ ଏବଂ ଆମେ ଏହାକୁ ଆହୁରି ପ୍ରୋତ୍ସାହିତ କରିବା ପାଇଁ କାର୍ଯ୍ୟ କରୁଛୁ। ଆମେ କୋଇଲା ଗ୍ୟାସିଫିକେସନ୍ ମଧ୍ୟ ବ୍ୟବହାର କରିପାରିବା, ଯାହା ଆମକୁ ଦେଶର କୋଇଲା ସମ୍ବଳର ଉତ୍ତମ ବ୍ୟବହାର କରିବାକୁ ଏବଂ ଆମଦାନୀ ଉପରେ ନିର୍ଭରଶୀଳତା ହ୍ରାସ କରିବାକୁ ଅନୁମତି ଦିଏ। ମୁଁ ଇସ୍ପାତ ଶିଳ୍ପର ସମସ୍ତ ଉଦ୍ୟୋଗୀଙ୍କୁ ଏହି ପ୍ରୟାସର ଏକ ଅଂଶ ହେବାକୁ ଏବଂ ଏହି ଦିଗରେ ଆବଶ୍ୟକ ପଦକ୍ଷେପ ନେବାକୁ ଅନୁରୋଧ କରୁଛି।

ସାଥିମାନେ,

ଅନ୍ୟ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ହେଉଛି ଅବ୍ୟବହୃତ ଗ୍ରୀନ୍ ଫିଲ୍ଡ ଖଣି। ଗତ 10 ବର୍ଷ ମଧ୍ୟରେ ଦେଶରେ ଅନେକ ଖଣି ସଂସ୍କାର କରାଯାଇଛି, ଯାହା ଦ୍ୱାରା ଲୁହା ଆକରିକ ଅଧିକ ସହଜରେ ଉପଲବ୍ଧ ହୋଇଛି। ବର୍ତ୍ତମାନ, ଏହି ଆବଣ୍ଟିତ ଖଣି ଏବଂ ଆମର ଜାତୀୟ ସମ୍ବଳର ଉପଯୁକ୍ତ ଏବଂ ସମୟାନୁବର୍ତ୍ତୀ ବ୍ୟବହାର କରିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଏଥିରେ କୌଣସି ପ୍ରକାରର ବିଳମ୍ବ କେବଳ ଦେଶକୁ କ୍ଷତି ପହଞ୍ଚାଇବ ନାହିଁ ବରଂ ଶିଳ୍ପ ପାଇଁ ମଧ୍ୟ କ୍ଷତି ହେବ। ସେଥିପାଇଁ ମୁଁ ଅନୁରୋଧ କରୁଛି ଯେ ଗ୍ରୀନ ଫିଲ୍ଡ ଖନନକୁ ତ୍ୱରାନ୍ୱିତ କରାଯାଉ।

ସାଥିମାନେ,

ଆଜି ଭାରତ କେବଳ ଘରୋଇ ଅଭିବୃଦ୍ଧି ଉପରେ ଧ୍ୟାନ ଦେଉନାହିଁ, ବରଂ ବିଶ୍ୱର ନେତୃତ୍ୱ ନେବା ପାଇଁ ମଧ୍ୟ ପ୍ରସ୍ତୁତି କରୁଛି। ବିଶ୍ୱ ଆଜି ଆମକୁ ଉଚ୍ଚମାନର ଷ୍ଟିଲ୍ ର ଏକ ବିଶ୍ୱସ୍ତ ଯୋଗାଣକାରୀ ଭାବରେ ଦେଖୁଛି। ଯେପରି ମୁଁ ପୂର୍ବରୁ ଉଲ୍ଲେଖ କରିଛି, ଆମକୁ ଇସ୍ପାତରେ ବିଶ୍ୱସ୍ତରୀୟ ମାନକ ବଜାୟ ରଖିବାକୁ ପଡିବ ଏବଂ ନିଜକୁ କ୍ରମାଗତ ଭାବରେ ଉନ୍ନତ କରିବାକୁ ପଡିବ। ଲଜିଷ୍ଟିକ୍ସରେ ଉନ୍ନତି, ମଲ୍ଟି-ମଡେଲ ପରିବହନ ନେଟୱାର୍କର ବିକାଶ ଏବଂ ମୂଲ୍ୟ ଦକ୍ଷତା ସୁନିଶ୍ଚିତ କରିବା ଭାରତକୁ ଏକ ବିଶ୍ୱ ଇସ୍ପାତ କେନ୍ଦ୍ରରେ ପରିଣତ କରିବାରେ ସାହାଯ୍ୟ କରିବ।

ସାଥିମାନେ,

ଇଣ୍ଡିଆ ଷ୍ଟିଲ୍ ମଞ୍ଚର ଏହା  ଆମ ପାଇଁ ଆମର ସାମର୍ଥ୍ୟକୁ ବିସ୍ତାର କରିବା ଏବଂ ଆମର ଚିନ୍ତାଧାରାକୁ ଜୀବନ୍ତ କରିବା ପାଇଁ ଏକ ସୁଯୋଗ। ଏହି ଉପଲକ୍ଷେ ମୁଁ ଆପଣ ସମସ୍ତଙ୍କୁ ମୋର ଶୁଭେଚ୍ଛା ଜଣାଉଛି। ଚାଲନ୍ତୁ ଆମେ ଏକାଠି ହୋଇ ଏକ ନମନୀୟ, ବୈପ୍ଳବିକ ଏବଂ ଇସ୍ପାତ-ଶକ୍ତିଶାଳୀ ଭାରତ ଗଠନ କରିବା।

ଧନ୍ୟବାଦ।

******

NS/SLP