কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে আজি আহমেদাবাদত গুজৰাট ৰাজ্যিক সমবায় ইউনিয়নৰ উদ্যোগত “উন্নত ভাৰত গঢ়াত সমবায়ৰ ভূমিকা” শীৰ্ষক মহা সন্মিলনত ভাষণ দিয়ে। এই উপলক্ষে গুজৰাটৰ মুখ্যমন্ত্ৰী শ্ৰী ভূপেন্দ্ৰ পেটেলকে ধৰি বহু গণ্যমান্য ব্যক্তি উপস্থিত থাকে।

মহা সন্মিলনত ভাষণ দি কেন্দ্ৰীয় গৃহ আৰু সমবায় মন্ত্ৰী শ্ৰী অমিত শ্বাহে কয় যে ৰাষ্ট্ৰসংঘই ২০২৫ চনক আন্তঃৰাষ্ট্ৰীয় সমবায় বৰ্ষ হিচাপে উদযাপন কৰাৰ সিদ্ধান্ত লৈছে। তেওঁ কয় যে সমবায় শব্দটো সমগ্ৰ বিশ্বতে আজিও সিমানেই প্ৰাসংগিক যিমান ১৯০০ চনত আছিল৷ শ্ৰী অমিত শ্বাহে কয় যে প্ৰধানমন্ত্ৰী শ্ৰী নৰেন্দ্ৰ মোদী জীৰ নেতৃত্বত ভাৰতত ২০২১ৰ পৰা সমবায় আন্দোলনক পুনৰুজ্জীৱিত কৰাৰ এটা বহুত ডাঙৰ প্ৰয়াস আৰম্ভ হয় আৰু সেয়ে সমবায় বৰ্ষৰ আৰম্ভণি ভাৰতত কৰাৰ সিদ্ধান্ত লোৱা হয়।

শ্ৰী অমিত শ্বাহে কয় যে ২০২১ত প্ৰধানমন্ত্ৰী মোদীৰ নেতৃত্বত হোৱা আৰম্ভণিৰ জৰিয়তে সহযোগিতাৰে সমৃদ্ধি আৰু উন্নত ভাৰতত সহযোগিতাৰ ভূমিকাৰ দুটা নীতি দেশৰ সন্মুখত ৰখা হৈছিল। সেই আৰম্ভণিৰ অধীনতে আজি গুজৰাটত এই সমবায় সন্মিলনৰ আয়োজন কৰা হয়। তেওঁ কয় যে সমবায় খণ্ডত হোৱা পৰিৱৰ্তনৰ সুফল যেতিয়ালৈকে নিম্ন পৰ্যায়ৰ প্ৰাথমিক কৃষি ঋণ সমিতি (পিএচিএছ) আৰু কৃষকসকলৰ ওচৰলৈ গৈ নাপায়, তেতিয়ালৈকে সমবায় খণ্ড শক্তিশালী হ’ব নোৱাৰে। শ্ৰী শ্বাহে কয় যে সেইবাবেই এইটো অতি প্ৰয়োজনীয় যে আমি সমবায় প্ৰতিষ্ঠানসমূহক আগবঢ়াব লাগে। আমি সকলো ধৰণৰ সমবায় প্ৰতিষ্ঠানত সজাগতা, প্ৰশিক্ষণ আৰু পাৰদৰ্শিতা অনাৰ চেষ্টা কৰিব লাগিব।

কেন্দ্ৰীয় সমবায় মন্ত্ৰীগৰাকীয়ে কয় যে আন্তঃৰাষ্ট্ৰীয় সমবায় বৰ্ষত ছাইঞ্চ অফ ক'অপাৰেচন আৰু ছাইঞ্চ ইন ক'অপাৰেচনৰ ওপৰত ভাৰত চৰকাৰে গুৰুত্ব আৰোপ কৰিছে। তেওঁ কয় যে স্বাধীনতা আন্দোলনৰ সময়ত দেশত আৰম্ভ হোৱা সমবায় আন্দোলন ক্ৰমান্বয়ে দেশৰ এক বৃহৎ অংশত প্ৰায় শেষ হৈ গৈছিল। তেওঁ কয় যে এয়া আমাৰ সকলোৰে দায়িত্ব যে এই আন্দোলনৰ অধীনত প্ৰতিখন ৰাজ্য আৰু জিলালৈ সমবায়ৰ বিস্তাৰ হওক। লগতে প্রতিখন ৰাজ্যতে প্রাথমিক সমবায় সমিতিৰ অৱস্থা উন্নত হ’ব লাগে, জিলা পর্যায়ৰ প্রতিষ্ঠানসমূহ সুদৃঢ় কৰিব লাগে আৰু ইয়াৰ জৰিয়তে ৰাজ্যিক আৰু ৰাষ্ট্রীয় পর্যায়তো সমবায়ৰ গাঁথনি সুদৃঢ় কৰিব লাগে৷ শ্ৰী শ্বাহে কয় যে বহু বছৰ ধৰি চলি অহা বিশ্বব্যাপী তিনি তৰপীয়া সমবায় কাঠামোৰ কল্পনাত আমি চতুৰ্থ স্তৰৰ সংযোজন কৰিছোঁ। তেওঁ কয় যে সমবায়ৰ গাঁথনিৰ প্ৰতিটো সমবায় কাৰ্যকলাপৰ সৈতে জড়িত ৰাষ্ট্ৰীয় অনুষ্ঠান, ৰাজ্যিক সমবায় প্ৰতিষ্ঠান, জিলা পৰ্যায়ৰ প্ৰতিষ্ঠান আৰু প্ৰতিটো অঞ্চলৰ প্ৰাথমিক সমবায় সমিতিসমূহ শক্তিশালী কৰি দেশজুৰি সমবায়ক বিয়পাই দিয়াটো গুৰুত্বপূৰ্ণ। শ্ৰী শ্বাহে কয় যে ইয়াৰ বাবে আমি আন্তঃৰাষ্ট্ৰীয় সমবায় বৰ্ষ ব্যৱহাৰ কৰা উচিত।

শ্ৰী অমিত শ্বাহে কয় যে এই সমগ্ৰ অভিযান তিনিটা স্তম্ভৰ ওপৰত প্ৰতিষ্ঠিত – সমবায়সমূহক শাসনৰ মূলসুঁতিৰ অংশ হিচাপে গঢ়ি তোলা, সমবায় আন্দোলনলৈ প্ৰযুক্তিৰ জৰিয়তে পাৰদৰ্শিতা আৰু প্ৰামাণ্যতা অনা আৰু অধিক সংখ্যক নাগৰিকক সমবায় আন্দোলনৰ সৈতে সংযোগ কৰাৰ প্ৰক্ৰিয়া ত্বৰান্বিত কৰা। তেওঁ কয় যে এই তিনিওটা স্তম্ভৰ আধাৰত সমবায় বৰ্ষৰ সময়ত কাম কৰাৰ প্ৰয়োজন আছে আৰু ইয়াৰ বাবে বিভিন্ন ধৰণৰ প্ৰায় ৫৭টা পদক্ষেপ এতিয়ালৈকে ভাৰত চৰকাৰৰ সমবায় মন্ত্ৰালয়ে গ্ৰহণ কৰিছে।

কেন্দ্ৰীয় গৃহ আৰু সমবায় মন্ত্ৰীগৰাকীয়ে কয় যে আমি গুজৰাটকে ধৰি সমগ্ৰ দেশতে সমবায়ৰ মাজত সহযোগিতাৰ ব্যৱহাৰ প্ৰাথমিক পৰ্যায়ত কৰিব লাগে, যাতে সকলো সমবায় প্ৰতিষ্ঠানৰ সমগ্ৰ কাম-কাজ কেৱল সমবায় প্ৰতিষ্ঠানৰ সৈতেহে হয়। সকলো প্ৰাথমিক সমবায় সমিতি, দুগ্ধ আদিৰ বেংক একাউণ্ট কেৱল জিলা সমবায় বেংকতহে থাকিব লাগে। তেওঁ কয় যে আমি সকলো সমবায় প্ৰতিষ্ঠানৰ মাজত সহযোগিতা প্ৰসাৰিত কৰিব লাগিব আৰু এই প্ৰচেষ্টাক গতি দিব লাগিব।

শ্ৰী অমিত শ্বাহে কয় যে মোদী চৰকাৰে ত্ৰিভূৱন ক’অপাৰেটিভ ইউনিভাৰ্ছিটি স্থাপন কৰিছে যিয়ে ৰাষ্ট্ৰীয় পৰ্যায়ত কাম কৰিব। তেওঁ কয় যে দেশৰ প্ৰতিখন ৰাজ্যতে সমবায়ৰ সৈতে জড়িত সকলো ক্ষেত্ৰতে সমবায়ৰ ধাৰণাৰে অধ্যয়নৰ ব্যৱস্থা কৰা হৈছে। তেওঁ কয় যে আমি যেতিয়ালৈকে PACS শক্তিশালী নকৰোঁ তেতিয়ালৈকে সমবায়ৰ গাঁথনি শক্তিশালী হ’ব নোৱাৰে, সেইবাবেই মোদী চৰকাৰে ২০২৯ চনৰ ভিতৰত দেশৰ প্ৰতিখন পঞ্চায়ততে PACS প্ৰতিষ্ঠা কৰাৰ সিদ্ধান্ত লৈছে। এই সিদ্ধান্তৰ অধীনত ২ লাখ নতুন PACS আৰু দুগ্ধ কাৰখানা পঞ্জীয়ন কৰা হ’ব। তেওঁ কয় যে চৰকাৰে বিভিন্ন ধৰণৰ প্ৰায় ২২টা কাম-কাজক PACSৰ সৈতে সংযোগ কৰিবলৈ কাম কৰিছে। শ্ৰী শ্বাহে কয় যে চৰকাৰে অতি সোনকালে লিকুইডেচনলৈ যোৱা PACSসমূহৰ নিষ্পত্তিৰ বাবে আৰু নতুন PACSৰ বাবেও নীতি আনিব।

কেন্দ্ৰীয় সমবায় মন্ত্ৰীগৰাকীয়ে কয় যে প্ৰধানমন্ত্ৰী মোদীৰ নেতৃত্বত সমবায় খণ্ডত বহু নতুন আৰম্ভণি হ’বলৈ গৈ আছে। তেওঁ কয় যে আন্তঃৰাষ্ট্ৰীয় সমবায় বৰ্ষত সকলো লোকক সজাগ কৰি, পাৰদৰ্শিতাৰ নতুন মাত্ৰা নিৰ্ধাৰণ কৰি আৰু নিযুক্তি দি আমি সমবায়ৰ গাঁথনি শক্তিশালী কৰিব লাগিব।

**********

RK/VV/PR/PS