U Myntri kam pohïing jong ka sorkar pdeng uba dei ruh u Myntri ka tnad ïatreilang, u Amit Shah mynta ka sngi u la plie paidbah bad buh ïa u maw nongrim na ka bynta ki kam pynroi bapher bapher kiba shongdor T. 708 klur ha nongbah jong ka Gujarat, Gandhinagar, bad u la ai jingkren halor ka prokram sam jingmyntoi jong ka tnad Postal. Ha ka jingai jingkren jong u ha kane ka sngi, u Amit Shah u la ong ba naduh ba u la long Myntri Rangbahduh ka ri, u Narendra Modi u la kyntiew ia ka ri ha ki lynti jong ka Gujarat, bad mynta ka India ka iaid shaphrang sha ka jingkiew ha man la ki bynta.

U Amit Shah u la ong ba u Myntri Rangbahduh ka Ri u Narendra Modi ym tang ba u la kyntiew ia ka ri ha man ki bynta hynrei u la trei ruh ban pynlong ia ka kaba shngain. U la ong ba shuwa ba u Narendra Modi un long Myntri Rangbah ha u snem 2014, ki kam thombor ki lehnoh ki jia ha ka ri la jan man ka sngi, ki lehnoh ki ju wan na Pakistan bad pyniap ia ki shipai bad ki briew jong ngi bad ki ju pynbthei bomb, hynrei ym shym la ai kano kano ka jubab.

U Myntri kam pohiing jong ka sorkar pdeng u la ong ba lai tylli ki jingthombor ki lehnoh ki la jia naduh ba u Narendra Modi u la long Myntri Rangbahduh. U la ong ba ka jinghiar thma kaba nyngkong ka dei ha Uri, kaba ar ha Pulwama bad kaba lai ka dei kaba dang shen ha Pahalgam da ki lehnoh ba la kyrshan da ka Pakistan. U la ong ba u Myntri Rangbahduh ka ri Narendra Modi u la jubab ia man la ka jingshah thombor da ka bor ba tyngeh ba mynta ka pyrthei baroh kawei ka peit lyngngoh bad ka Pakistan ka mad ia kane da ka jingsheptieng.

U Amit Shah u la ong ba haba ka la don ka jingthombor ki lehnoh ha Uri, ka India ka la ai ia jubab kaba tyngeh da kaba pynlong ia ka surgical strike, bad kum ka jubab ia ka jinghiar thma ha Pulwama la ai ka jingmaham da kaba pynlong ia ka jinghiar thma na suin. U la ong ba ka Pakistan bad ki lehnoh haduh mynta kim shym la pynbeit ia ki lad ki lynti bad ki la hiar thma ia ka Pahalgam, hynrei ha kane ka kynti la pynpra ia ki jaka sah jong ki lehnoh hapoh ka Operation Sindoor. U la ong ba ki riewshemphang na kylleng ka pyrthei ki la lyngngoh haba ki bishar bniah ia ka Operation Sindoor.

U Myntri kam pohing jong ka sorkar pdeng u la ong ba ka India ka la siew kylliang ia ka jingthombor ki lehnoh ha Pahalgam da kaba pynpra ia ki jaka sah jong ka Jaish-e-Mohammed bad ka Lashkar-e-Taiba. U la ong ba ki lehnoh jong ka Pakistan ki la kylli ia ki nongshong shnong jong ngi, ki nongjngohkai pyrthei, ki briew ki bym don tiar ialeh shaphang ka niam jong ki bad nangta ki pyniap bein ia ki hakhmat kiba haiing hasem bad ki khun ki kti jong ki. U la ong ba ka India ka la jubab ia ka jingthombor ha Pahalgam katkum ka kolshor jong ka. U Shah u la ong ba ka India ka la pynbthei ia ka ktem jong ka Jaish-e-Mohammed bad ka Lashkar-e-Taiba bad ki shipai ba shlur jong ka India ki la pynpra ia 9 tylli kum kine ki jaka rieh ha kaba la pynkhreh bad hikai ia ki lehnoh. U la ong ba ki shipai jong ngi ki la jubab ia ki lehnoh da kaba leit 100 km hapoh u pud u sam jong ka Pakistan bad ha kiba bun ki jaka ha PoK.

U Amit Shah u la ong ba ka jingsawa jong ki jingbthei bomb jong ngi ka la phah ia ka khubor kaba shai sha ki nongsaindur jong kiba bun ki jingjia kam lehnoh ha ka pyrthei bad ki lehnoh kiba rieh ha ki jaka sah ba lada don kano kano ka jait jingleh bymman ia ki briew jong ka India bad kano kano ka jingjia kam lehnoh ka jia, te yn sa jubab tyngeh da ar shah. U la ong ba ngi la hiar thma tang ia ki ktem jong ki lehnoh, hynrei ki shipai jong ka Pakistan ki la nud ban hiar thma ia ki briew ba lui lui jong ngi naduh Kutch haduh Kashmir bad khappud sepngi jong ka ri India ha ka 8 tarik Jymmang. U la ong, ka rukom iada suin jong ngi, kaba la pynjanai bha ha ka por jong u Myntri Rangbah duh ka ri u Modi, kam shym la ailad wat tang uwei ruh u namding ne drone ban hap ha ka khyndew ka India. U la ong ba hadien ba ka India ka la pynduh pyndam noh ia palat 100 ngut ki lehnoh ba shyrkhei, ka Pakistan kam shym la lah ban pynjot ia ka India ha kano kano ka rukom. U la ong ba ki shipai Pakistan ki dang pyrkhat, nangta ha ka 9 tarik Jymmang, ki shipai ba shlur jong ka India ki la pynduh pyndam noh ia ka jinglah jong ki Air Force jong ki ban hiar thma ia kiba bun ki jaka buh liengsuin jong ka Pakistan ha 15 tylli ki jaka. U Myntri Kam Pohiing u la ong ba mynta ka pyrthei baroh kawei ka peit lyngngoh ia ka bor jong ki kynhun shipai jong ka ri.

U Myntri kam pohiing jong ka sorkar pdeng bad u Myntri ka tnad iatreilang u la ong ba ha ka sien kaba nyngkong hadien ba la ioh ia ka jinglaitluid, ka India ka la leit 100 km shapoh ka Pakistan bad ka la pynjot ia ki jaka sah jong ki lehnoh jong ka Pakistan. U la ong ba kito kiba ju pyntieng ia ngi ha ka kyrteng jong u nuclear, ki shipai suin, ki shipai duriaw bad ki shipai ryngkew jong ngi ki la ai ia ka jubab kaba biang ia ki. U la ong ba mynta ka sngi ka pyrthei baroh kawei ka iaroh ia ka jinglong thikna jong ka bor ki kynhun shipai jong ngi, ka jinglah ban tehlakam jong ki bad ka mon sain pyrthei kaba khlain jong u Myntri Rangbahduh Modi. U la ong ba mynta ka sngi ka ri baroh kawei ka ai khublei ia ki shipai jong ki lai tylli ki kynhun shipai jong ka India.

U Amit Shah u la ong ba ka jingshlur jong ki shipai jong ngi ka la pynlong ia ka ri baroh kawei ban sngew sarong. U la ong ba ka long ka kam kaba sngew sarong ia ngi baroh ba u nongialam jong ngi u Narendra Modi u khun jong ka Gujarat bad ka Bharat Mata u la trei ban pynlong ia ka Bharat Mata kaba sngew sarong bad pynskhem ia ka ri. U la ong ba katba dang iakren ia ki kam shipai ha ka pyrthei, yn iakren ruh ia ka Operation Sindoor. U Shah u la ong ba ïa kane ka ‘OperationSindoor’ la ai kyrteng da u Myntri Rangbahduh Narendra Modi hi kum ka jingburom ïa ki longkmie bad ki para kynthei jong ngi. U la ong ba ka jingburom ia ka sindoor ka dei ka dustur jong ki nong India bad ia ka khubor jong kane la pynsngew sha ka pyrthei baroh kawei da kaba ai kyrteng ia kane kum ka Operation Sindoor. U la ong ba u Myntri Rangbahduh Modi u la pyndep ia ka jingkular kaba u la kular ha Bihar ba ngin sa siew kylliang ia ka jingthombor jong ki lehnoh ha Pahalgam.

******