ನಮಸ್ಕಾರ,

ಭಾರತ ಮಂಟಪವು ಇಂದು ಬೆಳಿಗ್ಗೆಯಿಂದ ರೋಮಾಂಚನಕಾರಿ ವೇದಿಕೆಯಾಗಿದೆ. ಕೆಲವೇ ನಿಮಿಷಗಳ ಹಿಂದೆ, ನಿಮ್ಮ ತಂಡವನ್ನು ಭೇಟಿ ಮಾಡುವ ಅವಕಾಶ ನನಗೆ ಸಿಕ್ಕಿತು. ಈ ಶೃಂಗಸಭೆಯು ವೈವಿಧ್ಯತೆಯಿಂದ ಕೂಡಿದೆ. ಅನೇಕ ಗಣ್ಯರು ಈ ಶೃಂಗಸಭೆಗೆ ಮೆರುಗು ತುಂಬಿದ್ದಾರೆ. ನಿಮ್ಮೆಲ್ಲರ ಅನುಭವ ಶ್ರೀಮಂತವಾಗಿದೆ ಎಂದು ನಾನು ನಂಬಿದ್ದೇನೆ. ಈ ಶೃಂಗಸಭೆಯಲ್ಲಿ ಯುವಕರು ಮತ್ತು ಮಹಿಳೆಯರ ದೊಡ್ಡ ಉಪಸ್ಥಿತಿಯು ಒಂದು ರೀತಿಯಲ್ಲಿ ವಿಶಿಷ್ಟ ಲಕ್ಷಣವಾಗಿದೆ. ವಿಶೇಷವಾಗಿ, ನಮ್ಮ ಡ್ರೋನ್ ದೀದಿಗಳು ಮತ್ತು ಲಖ್ಪತಿ ದೀದಿಗಳು ಹಂಚಿಕೊಂಡ ಅನುಭವಗಳು - ನಾನು ಈಗ ಈ ಎಲ್ಲರನ್ನೂ ಭೇಟಿಯಾದಾಗ, ಅವರು ತಮ್ಮ ಕಥೆಗಳನ್ನು ಹಂಚಿಕೊಳ್ಳುತ್ತಿದ್ದ ಉತ್ಸಾಹವನ್ನು ನಾನು ನೋಡಿದೆ. ಅವರ ಪ್ರತಿಯೊಂದು ಸಂಭಾಷಣೆಯೂ ನೆನಪಾಗುತ್ತಿದೆ.  ಇದು ನಿಜಕ್ಕೂ ಸ್ಫೂರ್ತಿದಾಯಕವಾಗಿದೆ.

ಸ್ನೇಹಿತರೆ,

ಇದು ಬದಲಾಗುತ್ತಿರುವ ಭಾರತದ ಪ್ರತಿಬಿಂಬವಾಗಿದೆ, ಇದು ಪ್ರತಿಯೊಂದು ಕ್ಷೇತ್ರದಲ್ಲೂ ತನ್ನ ಧ್ವನಿಯನ್ನು ಎತ್ತುತ್ತಿದೆ. ಈ ರೂಪಾಂತರವಾಗುತ್ತಿರುವ ಭಾರತದ ದೊಡ್ಡ ಕನಸೆಂದರೆ - 2047ರ ಹೊತ್ತಿಗೆ 'ವಿಕಸಿತ ಭಾರತ'(ಅಭಿವೃದ್ಧಿ ಹೊಂದಿದ ಭಾರತ). ನಮ್ಮ ದೇಶವು ಇದನ್ನು ಸಾಧಿಸುವ ಸಾಮರ್ಥ್ಯ, ಸಂಪನ್ಮೂಲಗಳು ಮತ್ತು ಇಚ್ಛಾಶಕ್ತಿಯನ್ನು ಹೊಂದಿದೆ. ಸ್ವಾಮಿ ವಿವೇಕಾನಂದರು ಹೇಳುತ್ತಿದ್ದರು - "ಎದ್ದೇಳಿ, ಎಚ್ಚರಗೊಳ್ಳಿ ಮತ್ತು ಗುರಿ ತಲುಪುವವರೆಗೆ ನಿಲ್ಲಬೇಡಿ ಎಂದು." ಇಂದು ನಾನು ಪ್ರತಿಯೊಬ್ಬ ಭಾರತೀಯನಲ್ಲೂ ಆ ಚೈತನ್ಯವನ್ನು ಕಾಣಬಲ್ಲೆ. ಅಂತಹ ಚರ್ಚೆಗಳು, ಅಂತಹ ಸಂವಾದಗಳು ಮತ್ತು ವಿಶೇಷವಾಗಿ ಯುವಕರ ಭಾಗವಹಿಸುವಿಕೆ, 'ವಿಕಸಿತ ಭಾರತ'ದ ಗುರಿ ಸಾಧಿಸಲು ನಿರ್ಣಾಯಕ ಪಾತ್ರ ವಹಿಸುತ್ತದೆ. ನೀವು ಅಂತಹ ಅದ್ಭುತ ಶೃಂಗಸಭೆಯನ್ನು ಆಯೋಜಿಸಿದ್ದೀರಿ. ಇದಕ್ಕಾಗಿ, ನನ್ನ ಸ್ನೇಹಿತ ಅತಿದೇಬ್ ಸರ್ಕಾರ್ ಜಿ, ನನ್ನ ಹಳೆಯ ಸಹೋದ್ಯೋಗಿ ರಜನೀಶ್ ಮತ್ತು ಇಡೀ ಎಬಿಪಿ ನೆಟ್‌ವರ್ಕ್ ತಂಡವನ್ನು ಹೃತ್ಪೂರ್ವಕವಾಗಿ ಅಭಿನಂದಿಸುತ್ತೇನೆ.

ಸ್ನೇಹಿತರೆ,

ಇಂದು ಭಾರತಕ್ಕೆ ಐತಿಹಾಸಿಕ ದಿನ. ಸ್ವಲ್ಪ ಸಮಯದ ಹಿಂದೆ, ನಾನು ಇಲ್ಲಿಗೆ ಬರುವ ಮೊದಲು ಯುನೈಟೆಡ್ ಕಿಂಗ್‌ಡಮ್‌ನ ಪ್ರಧಾನ ಮಂತ್ರಿ ಜತೆ ದೂರವಾಣಿಯಲ್ಲಿ  ಮಾತನಾಡಿದೆ. ಭಾರತ-ಯುಕೆ ಮುಕ್ತ ವ್ಯಾಪಾರ ಒಪ್ಪಂದವು ಈಗ ಅಂತಿಮಗೊಂಡಿದೆ ಎಂಬ ವಿಷಯ ಹಂಚಿಕೊಳ್ಳಲು ನನಗೆ ಸಂತೋಷವಾಗಿದೆ. ವಿಶ್ವದ 2 ಪ್ರಮುಖ ಮತ್ತು ಮುಕ್ತ ಮಾರುಕಟ್ಟೆ ಆರ್ಥಿಕತೆಗಳ ನಡುವಿನ ಪರಸ್ಪರ ವ್ಯಾಪಾರ ಮತ್ತು ಆರ್ಥಿಕ ಸಹಕಾರ ಕುರಿತಾದ ಈ ಒಪ್ಪಂದವು ಎರಡೂ ದೇಶಗಳ ಅಭಿವೃದ್ಧಿಗೆ ಹೊಸ ಅಧ್ಯಾಯ ಬರೆಯಲಿದೆ. ಇದು ವಿಶೇಷವಾಗಿ ನಮ್ಮ ಯುವಕರಿಗೆ ಒಳ್ಳೆಯ ಸುದ್ದಿ. ಇದು ಭಾರತದಲ್ಲಿ ಆರ್ಥಿಕ ಚಟುವಟಿಕೆಗೆ ಉತ್ತೇಜನ ನೀಡುತ್ತದೆ, ಭಾರತೀಯ ವ್ಯವಹಾರಗಳು ಮತ್ತು ಎಂಎಸ್ಎಂಇಗಳಿಗೆ ಹೊಸ ಅವಕಾಶಗಳನ್ನು ತೆರೆಯುತ್ತದೆ. ನಿಮಗೆ ತಿಳಿದಿರುವಂತೆ, ನಾವು ಇತ್ತೀಚೆಗೆ ಯುಎಇ, ಆಸ್ಟ್ರೇಲಿಯಾ ಮತ್ತು ಮಾರಿಷಸ್‌ ದೇಶಗಳೊಂದಿಗೆ ವ್ಯಾಪಾರ ಒಪ್ಪಂದಗಳಿಗೆ ಸಹಿ ಹಾಕಿದ್ದೇವೆ. ಭಾರತವು ಸುಧಾರಣೆಗಳನ್ನು ಜಾರಿಗೆ ತರುವುದಲ್ಲದೆ, ಇಡೀ ವಿಶ್ವದೊಂದಿಗೆ ಸಕ್ರಿಯವಾಗಿ ತೊಡಗಿಸಿಕೊಂಡಿದೆ, ವ್ಯಾಪಾರ ಮತ್ತು ವಾಣಿಜ್ಯಕ್ಕಾಗಿ ತನ್ನನ್ನು ರೋಮಾಂಚಕ ಕೇಂದ್ರವಾಗಿ ಪರಿವರ್ತಿಸಿಕೊಳ್ಳುತ್ತಿದೆ ಎಂಬುದನ್ನು ಇದು ತೋರಿಸುತ್ತಿದೆ.

ಸ್ನೇಹಿತರೆ,

ದಿಟ್ಟ ನಿರ್ಧಾರಗಳನ್ನು ತೆಗೆದುಕೊಳ್ಳಲು ಮತ್ತು ನಮ್ಮ ಗುರಿಗಳನ್ನು ಸಾಧಿಸಲು, ರಾಷ್ಟ್ರದ ಹಿತಾಸಕ್ತಿಗಳನ್ನು ಮೊದಲು ಇಡುವುದು, ದೇಶದ ಸಾಮರ್ಥ್ಯಗಳಲ್ಲಿ ನಂಬಿಕೆ ಇಡುವುದು ಅತ್ಯಗತ್ಯ. ದುರದೃಷ್ಟವಶಾತ್, ನಮ್ಮ ದೇಶದಲ್ಲಿ ದಶಕಗಳಿಂದ ವಿರುದ್ಧ ಮನಸ್ಥಿತಿ ಇತ್ತು, ಅದರಿಂದ ರಾಷ್ಟ್ರವು ಬಹಳವಾಗಿ ಬಳಲಿತು. ಒಂದು ಕಾಲದಲ್ಲಿ ನಾಯಕರು ಯಾವುದೇ ಪ್ರಮುಖ ನಿರ್ಧಾರ ಅಥವಾ ಹೆಜ್ಜೆ ಇಡುವ ಮೊದಲು ಹೀಗೆ ಯೋಚಿಸುತ್ತಿದ್ದರು. ಜಗತ್ತು ಏನು ಯೋಚಿಸುತ್ತದೆ? ಅದು ನಮಗೆ ಮತಗಳನ್ನು ನೀಡುತ್ತದೆಯೇ? ಖುರ್ಚಿ ಸುರಕ್ಷಿತವಾಗಿ ಉಳಿಯುತ್ತದೆಯೇ? ಮತ ಬ್ಯಾಂಕ್ ಕೈತಪ್ಪಿ ಹೋಗುತ್ತದೆಯೇ? ಇಂತಹ ವಿವಿಧ ಸ್ವಾರ್ಥಪರ ಹಿತಾಸಕ್ತಿಗಳಿಂದಾಗಿ ಪ್ರಮುಖ ನಿರ್ಧಾರಗಳು ಮತ್ತು ಬೃಹತ್ ಸುಧಾರಣೆಗಳು ಮುಂದೂಡುತ್ತಲೇ ಇದ್ದವು.

ಸ್ನೇಹಿತರೆ,

ಯಾವುದೇ ದೇಶವು ಈ ರೀತಿ ಮುಂದುವರಿಯಲು ಸಾಧ್ಯವಿಲ್ಲ. ಪ್ರತಿಯೊಂದು ನಿರ್ಧಾರಕ್ಕೂ ಏಕೈಕ ಮಾನದಂಡವೆಂದರೆ - ರಾಷ್ಟ್ರ ಮೊದಲು. ಕಳೆದ ದಶಕದಲ್ಲಿ, ಭಾರತವು ಈ ನೀತಿಯೊಂದಿಗೆ ಮುಂದುವರೆದಿದೆ, ಇಂದು ನಾವು ಅದರ ಫಲಿತಾಂಶಗಳನ್ನು ನೋಡುತ್ತಿದ್ದೇವೆ.

ಸ್ನೇಹಿತರೆ,

ಕಳೆದ 10–11 ವರ್ಷಗಳಲ್ಲಿ ನಮ್ಮ ಸರ್ಕಾರವು ಒಂದರ ನಂತರ ಒಂದರಂತೆ ನಿರ್ಧಾರಗಳನ್ನು ತೆಗೆದುಕೊಂಡಿದೆ - ದಶಕಗಳಿಂದ ಸಿಲುಕಿಕೊಂಡಿದ್ದ, ವಿಳಂಬವಾಗಿದ್ದ ಅಥವಾ ಹಳಿತಪ್ಪಿದ್ದ, ರಾಜಕೀಯ ಇಚ್ಛಾಶಕ್ತಿಯ ಕೊರತೆಯಿಂದ ನಿರ್ಧಾರಗಳು ಜಾರಿಗೆ ಬರಲೇ ಇಲ್ಲ. ಉದಾಹರಣೆಗೆ, ಆರ್ಥಿಕತೆಯ ಬೆನ್ನೆಲುಬಾಗಿರುವ ನಮ್ಮ ಬ್ಯಾಂಕಿಂಗ್ ವಲಯವನ್ನು ತೆಗೆದುಕೊಳ್ಳಿ. ಇದಕ್ಕೂ ಮೊದಲು, ಬ್ಯಾಂಕುಗಳ ನಷ್ಟಗಳ ಬಗ್ಗೆ ಚರ್ಚಿಸದೆ ಯಾವುದೇ ಶೃಂಗಸಭೆ ಪೂರ್ಣಗೊಳ್ಳುತ್ತಿರಲಿಲ್ಲ. ನಮ್ಮ ದೇಶದ ಬ್ಯಾಂಕುಗಳು 2014ಕ್ಕಿಂತ ಮೊದಲು ಸಂಪೂರ್ಣ ಕುಸಿತದ ಅಂಚಿನಲ್ಲಿದ್ದವು. ಆದರೆ ಇಂದಿನ ಪರಿಸ್ಥಿತಿ ಏನು? ಇಂದು, ಭಾರತದ ಬ್ಯಾಂಕಿಂಗ್ ವಲಯವು ವಿಶ್ವದ ಅತ್ಯಂತ ಬಲಿಷ್ಠ ವ್ಯವಸ್ಥೆಗಳಲ್ಲಿ ಒಂದಾಗಿದೆ. ನಮ್ಮ ಬ್ಯಾಂಕುಗಳು ದಾಖಲೆಯ ಲಾಭ ಗಳಿಸುತ್ತಿವೆ, ಠೇವಣಿದಾರರು ಲಾಭ ಪಡೆಯುತ್ತಿದ್ದಾರೆ. ನಮ್ಮ ಸರ್ಕಾರವು ಬ್ಯಾಂಕಿಂಗ್ ವಲಯದಲ್ಲಿ ನಿರಂತರವಾಗಿ ಸುಧಾರಣೆಗಳನ್ನು ಕೈಗೊಂಡಿದ್ದರಿಂದ ಇದು ಸಾಧ್ಯವಾಗಿದೆ. ರಾಷ್ಟ್ರೀಯ ಹಿತಾಸಕ್ತಿಯಲ್ಲಿ ಸಣ್ಣ ಬ್ಯಾಂಕುಗಳನ್ನು ವಿಲೀನಗೊಳಿಸಿ, ಅವುಗಳ ಸಾಮರ್ಥ್ಯಗಳನ್ನು ಹೆಚ್ಚಿಸಲಾಗಿದೆ. ಏರ್ ಇಂಡಿಯಾದ ಹಿಂದಿನ ಸ್ಥಿತಿಯನ್ನು ಸಹ ನೀವು ನೆನಪಿಸಿಕೊಳ್ಳಬಹುದು. ಏರ್ ಇಂಡಿಯಾ ಮುಳುಗುತ್ತಿತ್ತು ಮತ್ತು ಪ್ರತಿ ವರ್ಷ ಸಾವಿರಾರು ಕೋಟಿ ರೂಪಾಯಿಗಳು ನಷ್ಟವಾಗುತ್ತಿತ್ತು. ಆದರೂ ಹಿಂದಿನ ಸರ್ಕಾರಗಳು ನಿರ್ಧಾರ ತೆಗೆದುಕೊಳ್ಳಲು ಹೆದರುತ್ತಿದ್ದವು. ನಾವು ಆ ನಿರ್ಧಾರವನ್ನು ತೆಗೆದುಕೊಂಡು ದೇಶವನ್ನು ನಿರಂತರ ನಷ್ಟದಿಂದ ರಕ್ಷಿಸಿದ್ದೇವೆ. ಏಕೆ? ಏಕೆಂದರೆ, ರಾಷ್ಟ್ರದ ಹಿತಾಸಕ್ತಿ ನಮಗೆ ಮೊದಲಾಗಿದೆ.

ಸ್ನೇಹಿತರೆ,

ಒಮ್ಮೆ ಸರ್ಕಾರ ಬಡವರಿಗೆ 1 ರೂಪಾಯಿ ಕಳುಹಿಸಿದಾಗ, ಅದರಲ್ಲಿ 85 ಪೈಸೆ ಮಧ್ಯವರ್ತಿಗಳ ಪಾಲಾಗುತ್ತದೆ ಎಂದು ನಮ್ಮ ದೇಶದ ಮಾಜಿ ಪ್ರಧಾನಿಯೊಬ್ಬರು ಒಪ್ಪಿಕೊಂಡರು. ಸರ್ಕಾರಗಳು ಬದಲಾದವು, ವರ್ಷಗಳು ಕಳೆದವು, ಆದರೆ ಬಡವರಿಗೆ ಬರಬೇಕಾದ ಪೂರ್ಣ ಮೊತ್ತವು ನಿಜವಾಗಿಯೂ ಅವರಿಗೆ ತಲುಪುವಂತೆ ನೋಡಿಕೊಳ್ಳಲು ಯಾವುದೇ ನಿರ್ದಿಷ್ಟ ಕ್ರಮಗಳನ್ನು ತೆಗೆದುಕೊಳ್ಳಲಿಲ್ಲ. ದೆಹಲಿಯಿಂದ 1 ರೂಪಾಯಿ ಕಳುಹಿಸಿದರೆ, ಎಲ್ಲಾ 100 ಪೈಸೆಯೂ ಫಲಾನುಭವಿಗೆ ತಲುಪಬೇಕು ಎಂಬುದು ನಮ್ಮ ಗುರಿಯಾಗಿತ್ತು. ಇದಕ್ಕಾಗಿ, ನಾವು ನೇರ ನಗದು ವರ್ಗಾವಣೆ(ಡಿಬಿಟಿ) ವ್ಯವಸ್ಥೆಯನ್ನು ಜಾರಿಗೆ ತಂದಿದ್ದೇವೆ. ಇದು ಸರ್ಕಾರಿ ಯೋಜನೆಗಳಲ್ಲಿನ ಸೋರಿಕೆಯನ್ನು ನಿಲ್ಲಿಸಿತು, ಸರ್ಕಾರದ ಪ್ರಯೋಜನಗಳು ನೇರವಾಗಿ ಉದ್ದೇಶಿತ ಫಲಾನುಭವಿಗೆ ತಲುಪುವಂತೆ ಖಚಿತಪಡಿಸಿತು. ನಾನು ಹೇಳುತ್ತೇನೆ - ಸರ್ಕಾರಿ ಫೈಲ್‌ಗಳಲ್ಲಿ 10 ಕೋಟಿ ನಕಲಿ ಫಲಾನುಭವಿಗಳಿದ್ದರು. ಹೌದು, 10 ಕೋಟಿ! ಎಂದಿಗೂ ಹುಟ್ಟದ ಜನರೇ ಪೂರ್ಣ ಸರ್ಕಾರಿ ಪ್ರಯೋಜನಗಳನ್ನು ಪಡೆಯುತ್ತಿದ್ದರು. ಈ ವ್ಯವಸ್ಥೆಯನ್ನು ಹಿಂದಿನ ಸರ್ಕಾರಗಳು ರೂಪಿಸಿದ್ದವು. ನಮ್ಮ ಸರ್ಕಾರವು ಈ 10 ಕೋಟಿ ನಕಲಿ ಹೆಸರುಗಳನ್ನು ವ್ಯವಸ್ಥೆಯಿಂದ ತೆಗೆದುಹಾಕಿತು, ಸಂಪೂರ್ಣ ಮೊತ್ತವು ಬಡವರಿಗೆ ನೇರವಾಗಿ ಅವರ ಬ್ಯಾಂಕ್ ಖಾತೆಗಳಿಗೆ ತಲುಪುವಂತೆ ಖಚಿತಪಡಿಸಿತು. ಪರಿಣಾಮವಾಗಿ, 3.5 ಲಕ್ಷ ಕೋಟಿ ರೂಪಾಯಿಗಳಿಗಿಂತ ಹೆಚ್ಚು - ಹೌದು, 3.5 ಲಕ್ಷ ಕೋಟಿ ರೂಪಾಯಿಗಳಿಗಿಂತ ಹೆಚ್ಚಿನ ಹಣ ತಪ್ಪು ಕೈಗಳಿಗೆ ಹೋಗದಂತೆ ಉಳಿಸಲಾಗಿದೆ. ಬೇರೆ ರೀತಿಯಲ್ಲಿ ಹೇಳುವುದಾದರೆ, ನಾವು ನಿಮ್ಮ ಹಣವನ್ನು ಉಳಿಸಿದ್ದೇವೆ. ನಿಮ್ಮ ಹಣ ಉಳಿಸಲಾಗಿದೆ, ಆದರೂ ಮೋದಿಯ ಬಗ್ಗೆ ಟೀಕೆ ಮಾಡಿದರು.

ಸ್ನೇಹಿತರೆ,

ಒಂದು ಶ್ರೇಣಿ, ಒಂದು ಪಿಂಚಣಿ(ಒಆರ್‌ಒಪಿ) ಪ್ರಸ್ತಾವನೆ ತೆಗೆದುಕೊಳ್ಳಿ. ಇದು ಹಲವು ದಶಕಗಳಿಂದ ಬಾಕಿ ಇತ್ತು. ಈ ಹಿಂದೆ, ಇದು ಸರ್ಕಾರದ ಖಜಾನೆಗೆ ಹೊರೆಯಾಗುತ್ತದೆ ಎಂಬ ನೆಪ ನೀಡಿ ಅದನ್ನು ವಜಾಗೊಳಿಸಲಾಗಿತ್ತು. ಆದರೆ ನಮ್ಮ ಸರ್ಕಾರವು ರಾಷ್ಟ್ರವನ್ನು ರಕ್ಷಿಸಲು ತಮ್ಮ ಜೀವನವನ್ನು ಮುಡಿಪಾಗಿಟ್ಟವರ ಹಿತಾಸಕ್ತಿಗಳನ್ನು ಎಲ್ಲಕ್ಕಿಂತ ಹೆಚ್ಚಾಗಿ ಕಾಪಾಡಿದೆ. ಇಂದು, ಲಕ್ಷಾಂತರ ಸೈನಿಕರ ಕುಟುಂಬಗಳು ಒಆರ್‌ಒಪಿ ಪ್ರಯೋಜನ ಪಡೆಯುತ್ತಿವೆ. ಇಲ್ಲಿಯವರೆಗೆ, ನಮ್ಮ ಸರ್ಕಾರವು ಈ ಯೋಜನೆಯಡಿ ಮಾಜಿ ಸೈನಿಕರಿಗೆ 1.25 ಲಕ್ಷ ಕೋಟಿ ರೂಪಾಯಿಗಳಿಗಿಂತ ಹೆಚ್ಚಿನ ಹಣ ವಿತರಿಸಿದೆ.

ಸ್ನೇಹಿತರೆ,

ದಶಕಗಳಿಂದ, ದೇಶದಲ್ಲಿ ಬಡ ಕುಟುಂಬಗಳಿಗೆ ಮೀಸಲಾತಿ ನೀಡುವ ಬಗ್ಗೆ ಮಾತ್ರ ಮಾತನಾಡಲಾಗುತ್ತಿತ್ತು, ಆದರೆ ಯಾವುದೇ ಕ್ರಮ ಕೈಗೊಳ್ಳಲಾಗಿಲ್ಲ. ನಮ್ಮ ಸರ್ಕಾರವು ಅದನ್ನು ಜಾರಿಗೆ ತರುವ ನಿರ್ಧಾರ ತೆಗೆದುಕೊಂಡಿತು. ಲೋಕಸಭೆ ಮತ್ತು ರಾಜ್ಯ ವಿಧಾನಸಭೆಗಳಲ್ಲಿ ಮಹಿಳೆಯರಿಗೆ 33% ಮೀಸಲಾತಿಯ ಬಗ್ಗೆ ವರ್ಷಗಳಲ್ಲಿ ಏನಾಯಿತು ಎಂಬುದನ್ನು ದೇಶದ ಪ್ರತಿಯೊಬ್ಬರೂ ನೋಡಿದ್ದಾರೆ. ಅದನ್ನು ವಿಳಂಬ ಮಾಡುವುದರ ಹಿಂದೆ ಸ್ವಾರ್ಥ ಹಿತಾಸಕ್ತಿಗಳಿವೆ. ಆದರೆ ಇದು ರಾಷ್ಟ್ರದ ಹಿತಾಸಕ್ತಿಗಾಗಿ ಅಗತ್ಯವಾಗಿತ್ತು. ಅದಕ್ಕಾಗಿಯೇ ನಮ್ಮ ಸರ್ಕಾರವು ಲೋಕಸಭೆ ಮತ್ತು ರಾಜ್ಯ ವಿಧಾನಸಭೆಗಳಿಗೆ ಮಹಿಳಾ ಮೀಸಲಾತಿ ಕಾನೂನು ಜಾರಿಗೆ ತಂದಿತು, ಸ್ತ್ರೀಶಕ್ತಿಯನ್ನು ಇನ್ನಷ್ಟು ಸಬಲಗೊಳಿಸಿತು.

ಸ್ನೇಹಿತರೆ,

ಹಿಂದೆ ಇಂತಹ ಅನೇಕ ವಿಷಯಗಳ ಬಗ್ಗೆ ಯಾರೂ ಚರ್ಚಿಸಲು ಸಹ ಸಿದ್ಧರಿರಲಿಲ್ಲ - ಮತ ಬ್ಯಾಂಕ್‌ಗಳನ್ನು ಹಾಳು ಮಾಡುವ ಭಯದಿಂದ. ಉದಾಹರಣೆಗೆ, ತ್ರಿವಳಿ ತಲಾಖ್ ವಿಷಯವನ್ನೇ ತೆಗೆದುಕೊಳ್ಳಿ. ಇದು ಅಸಂಖ್ಯಾತ ಮುಸ್ಲಿಂ ಮಹಿಳೆಯರ ಜೀವನವನ್ನು ನಾಶ ಮಾಡಿತು. ಆದರೆ ಆ ಸಮಯದಲ್ಲಿ ಅಧಿಕಾರದಲ್ಲಿದ್ದವರು ಅಸಡ್ಡೆ ತೋರಿದರು. ನಮ್ಮ ಸರ್ಕಾರವು ಮಹಿಳೆಯರ ಹಿತಾಸಕ್ತಿ ಮತ್ತು ಮುಸ್ಲಿಂ ಕುಟುಂಬಗಳ ಕಲ್ಯಾಣಕ್ಕಾಗಿ ತ್ರಿವಳಿ ತಲಾಖ್ ವಿರುದ್ಧ ಕಾನೂನು ಜಾರಿಗೆ ತಂದಿತು. ಅದೇ ರೀತಿ, ದಶಕಗಳಿಂದ ವಕ್ಫ್ ಕಾಯ್ದೆಯಲ್ಲಿ ಅಗತ್ಯ ಸುಧಾರಣೆಗಳ ಅಗತ್ಯವಿತ್ತು, ಆದರೆ ಈ ಉದಾತ್ತ ಉದ್ದೇಶವನ್ನು ನಿರ್ಲಕ್ಷಿಸಲಾಯಿತು, ಮತ ಬ್ಯಾಂಕ್‌ಗಳನ್ನು ಗಳಿಸುವುದು ಅವರ ಉದ್ದೇಶವಾಗಿತ್ತು. ಈಗ, ಅಂತಿಮವಾಗಿ, ವಕ್ಫ್ ಕಾಯ್ದೆಗೆ ಅಗತ್ಯ ತಿದ್ದುಪಡಿಗಳನ್ನು ಮಾಡಲಾಗಿದೆ - ಮುಸ್ಲಿಂ ತಾಯಂದಿರು, ಸಹೋದರಿಯರು, ಬಡವರು ಮತ್ತು ನಿರ್ಲಕ್ಷಿತ ಪಸ್ಮಾಂಡಾ ಮುಸ್ಲಿಮರಿಗೆ ನಿಜವಾಗಿಯೂ ಪ್ರಯೋಜನವನ್ನು ನೀಡುವ ಸುಧಾರಣೆಗಳು ಇವಾಗಿವೆ.

ಸ್ನೇಹಿತರೆ,

ಇನ್ನೊಂದು ಪ್ರಮುಖ ಉಪಕ್ರಮವಿದೆ, ಅದನ್ನು ಅಷ್ಟೊಂದು ಚರ್ಚೆಗೆ ಒಳಗಾಗುವುದಿಲ್ಲ  - ಅದು ನದಿಗಳ ಜೋಡಣೆ. ಇದೀಗ, ಅತಿದೇಬ್ ಜಿ ನೀರಿನ ಬಗ್ಗೆ ಕೇಳಿದರು. "ದಶಕಗಳಿಂದ ಏನು ಮಾಡಲಾಗಿದೆ?", ನಮ್ಮ ದೇಶದಲ್ಲಿ ನದಿ ನೀರನ್ನು ಉದ್ವಿಗ್ನತೆ ಮತ್ತು ವಿವಾದಗಳ ವಿಷಯವಾಗಿ ಪರಿವರ್ತಿಸಲಾಯಿತು. ಆದರೆ ನಮ್ಮ ಸರ್ಕಾರವು ರಾಜ್ಯ ಸರ್ಕಾರಗಳ ಸಮನ್ವಯದೊಂದಿಗೆ ನದಿಗಳನ್ನು ಜೋಡಿಸಲು ಬೃಹತ್ ಅಭಿಯಾನ ಪ್ರಾರಂಭಿಸಿದೆ. ಕೆನ್-ಬೆಟ್ವಾ ಸಂಪರ್ಕ ಯೋಜನೆ, ಪಾರ್ವತಿ-ಕಾಳಿಸಿಂಧ್-ಚಂಬಲ್ ಸಂಪರ್ಕದಂತಹ ಯೋಜನೆಗಳು ಲಕ್ಷಾಂತರ ರೈತರಿಗೆ ಪ್ರಯೋಜನ ನೀಡುತ್ತವೆ. ಇತ್ತೀಚಿನ ದಿನಗಳಲ್ಲಿ, ಮಾಧ್ಯಮಗಳಲ್ಲಿ ನೀರಿನ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದೆ, ಅದರ ಅರ್ಥವೇನೆಂದು ನೀವೆಲ್ಲರೂ ಬಹಳ ಬೇಗನೆ ಅರ್ಥ ಮಾಡಿಕೊಂಡಿದ್ದೀರಿ. ಮೊದಲು ಭಾರತಕ್ಕೆ ಸರಿಯಾಗಿ ಸೇರಿದ್ದ ನೀರು ಕೂಡ ನಮ್ಮ ಗಡಿಯ ಹೊರಗೆ ಹರಿಯುತ್ತಿತ್ತು. ಈಗ, ಭಾರತದ ನೀರು ಭಾರತದ ಪ್ರಯೋಜನಕ್ಕಾಗಿ ಹರಿಯುತ್ತಿದೆ, ಭಾರತದಲ್ಲಿಯೇ ಉಳಿಯುತ್ತಿದೆ ಮತ್ತು ಭಾರತಕ್ಕೆ ಸೇವೆ ಸಲ್ಲಿಸುತ್ತಿದೆ.

ಸ್ನೇಹಿತರೆ,

ಹಲವು ದಶಕಗಳ ನಂತರ, ಅಂತಿಮವಾಗಿ ಹೊಸ ಸಂಸತ್ತಿನ ಕಟ್ಟಡ ನಿರ್ಮಿಸಲಾಗಿದೆ ಎಂದು ಜನರು ಆಗಾಗ್ಗೆ ಉಲ್ಲೇಖಿಸುತ್ತಾರೆ. ಆದರೆ ದಶಕಗಳ ನಂತರ, ದೆಹಲಿಯಲ್ಲಿ ಡಾ. ಬಾಬಾ ಸಾಹೇಬ್ ಅಂಬೇಡ್ಕರ್ ರಾಷ್ಟ್ರೀಯ ಸ್ಮಾರಕ ನಿರ್ಮಿಸಿದ್ದು ನಮ್ಮ ಸರ್ಕಾರವೇ ಎಂಬುದು ಹೆಚ್ಚಾಗಿ ಚರ್ಚೆಯಾಗುತ್ತಿಲ್ಲ. ಈ ಕಲ್ಪನೆಯನ್ನು ಅಟಲ್ ಜಿ ಅವರ ಸರ್ಕಾರದ ಅವಧಿಯಲ್ಲಿ ಪ್ರಾರಂಭಿಸಲಾಗಿತ್ತು, ಆದರೆ ಯೋಜನೆಯು 1 ದಶಕದಿಂದ ಸ್ಥಗಿತಗೊಂಡಿತ್ತು. ನಮ್ಮ ಸರ್ಕಾರವು ಅದನ್ನು ಪೂರ್ಣಗೊಳಿಸಿದ್ದಲ್ಲದೆ, ಪಂಚತೀರ್ಥ ಉಪಕ್ರಮದ ಭಾಗವಾಗಿ ಭಾರತ ಮತ್ತು ವಿಶ್ವಾದ್ಯಂತ ಬಾಬಾ ಸಾಹೇಬರಿಗೆ ಸಂಬಂಧಿಸಿದ ಪ್ರಮುಖ ತಾಣಗಳನ್ನು ಅಭಿವೃದ್ಧಿಪಡಿಸಿತು.

ಸ್ನೇಹಿತರೆ,

2014ರ ರಾಜಕೀಯ ವ್ಯವಸ್ಥೆಯಲ್ಲಿ ಜನರ ನಂಬಿಕೆ ಬಹುತೇಕ ಕುಸಿದಿದ್ದ ಸಮಯದಲ್ಲಿ ನಮ್ಮ ಸರ್ಕಾರ ರಚನೆಯಾಯಿತು. ಕೆಲವರು ನಮ್ಮ ದೇಶದಲ್ಲಿ ಪ್ರಜಾಪ್ರಭುತ್ವ ಮತ್ತು ಅಭಿವೃದ್ಧಿ ಸಹಬಾಳ್ವೆ ನಡೆಸಬಹುದೇ ಎಂದು ಪ್ರಶ್ನಿಸಲು ಪ್ರಾರಂಭಿಸಿದರು. ಆದರೆ ಇಂದು, ಯಾರಾದರೂ ಭಾರತವನ್ನು ನೋಡಿದಾಗ, ಅವರು ಹೆಮ್ಮೆಯಿಂದ ಹೇಳಬಹುದು: "ಪ್ರಜಾಪ್ರಭುತ್ವವು ಎಲ್ಲವನ್ನೂ ತಲುಪಿಸಬಲ್ಲದು ಎಂದು." ಕಳೆದ ದಶಕದಲ್ಲಿ 25 ಕೋಟಿ ಜನರು ಬಡತನದಿಂದ ಹೊರಬಂದಿದ್ದಾರೆ, ಪ್ರಜಾಪ್ರಭುತ್ವವು ಎಲ್ಲವನ್ನೂ ತಲುಪಿಸಬಲ್ಲದು ಎಂಬ ಸ್ಪಷ್ಟ ಸಂದೇಶವನ್ನು ಜಗತ್ತಿಗೆ ರವಾನಿಸಿದ್ದಾರೆ. ಮುದ್ರಾ ಯೋಜನೆಯಡಿ ಸಾಲ ಪಡೆದ ಲಕ್ಷಾಂತರ ಸಣ್ಣ ಉದ್ಯಮಿಗಳು ಅದನ್ನು ಅನುಭವಿಸುತ್ತಾರೆ - ಪ್ರಜಾಪ್ರಭುತ್ವ ತಲುಪಿಸಬಲ್ಲದು. ನಮ್ಮ ದೇಶದಲ್ಲಿ ಒಂದು ಕಾಲದಲ್ಲಿ "ಹಿಂದುಳಿದ" ಜಿಲ್ಲೆಗಳೆಂದು ಹಣೆಪಟ್ಟಿ ಕಟ್ಟಿಕೊಂಡು ಅವುಗಳ ಹಣೆಬರಹಕ್ಕೆ ಬಿಟ್ಟಿದ್ದ ಡಜನ್ ಗಟ್ಟಲೆ ಜಿಲ್ಲೆಗಳಿದ್ದವು. ಇಂದು ಆ ಜಿಲ್ಲೆಗಳೇ ಮಹತ್ವಾಕಾಂಕ್ಷೆಯ ಜಿಲ್ಲೆಗಳಾಗಿ ರೂಪಾಂತರಗೊಂಡಿವೆ, ಅಭಿವೃದ್ಧಿ ಸೂಚಕಗಳಲ್ಲಿ ಬಲವಾಗಿ ಕಾರ್ಯ ನಿರ್ವಹಿಸುತ್ತಿವೆ - ಪ್ರಜಾಪ್ರಭುತ್ವವು ಎಲ್ಲವನ್ನೂ ನೀಡಬಲ್ಲದು ಎಂಬುದಕ್ಕೆ ಸ್ಪಷ್ಟ ಪುರಾವೆ ಇದಾಗಿದೆ. ಬಹಳ ಕಡಿಮೆ ಜನರಿಗೆ ಇದು ತಿಳಿದಿದೆ, ಆದರೆ ನಮ್ಮ ಬುಡಕಟ್ಟು ಸಮುದಾಯಗಳಲ್ಲಿ, ಅಭಿವೃದ್ಧಿಯ ಪ್ರಯೋಜನಗಳನ್ನು ಎಂದಿಗೂ ನೋಡದ ಅತ್ಯಂತ ಅಂಚಿನಲ್ಲಿರುವ ಉಪ-ಗುಂಪುಗಳು ಸಹ ಇವೆ. ಇಂದು, ಪ್ರಧಾನ ಮಂತ್ರಿ ಜನ್ಮನ್ ಯೋಜನೆಗೆ ಧನ್ಯವಾದಗಳು, ಈ ಸಮುದಾಯಗಳು ಅಂತಿಮವಾಗಿ ಸರ್ಕಾರಿ ಸೇವೆಗಳನ್ನು ಪಡೆಯುತ್ತಿವೆ, ಅವರು ಸಹ ಪ್ರಜಾಪ್ರಭುತ್ವವು ಎಲ್ಲವನ್ನೂ ನೀಡಬಲ್ಲದು ಎಂದು ನಂಬಲು ಪ್ರಾರಂಭಿಸಿದ್ದಾರೆ. ನಿಜವಾದ ಪ್ರಜಾಪ್ರಭುತ್ವ ಎಂದರೆ ರಾಷ್ಟ್ರ ಮತ್ತು ಅದರ ಸಂಪನ್ಮೂಲಗಳ ಅಭಿವೃದ್ಧಿಯು ತಾರತಮ್ಯವಿಲ್ಲದೆ ಕಟ್ಟ ಕಡೆಯ ವ್ಯಕ್ತಿಗೆ ತಲುಪುವುದನ್ನು ಖಚಿತಪಡಿಸಿಕೊಳ್ಳುವುದಾಗಿದೆ, ನಮ್ಮ ಸರ್ಕಾರವು ಅದನ್ನೇ ಮಾಡುತ್ತಿದೆ.

ಸ್ನೇಹಿತರೆ,

ಇಂದು ನಾವು ಹೊಸ ಭಾರತವನ್ನು ನಿರ್ಮಿಸುತ್ತಿದ್ದೇವೆ, ಅಲ್ಲಿ ಅಭಿವೃದ್ಧಿಯು ವೇಗ ಪಡೆದುಕೊಂಡಿದೆ, ನಮ್ಮ ಬೆಳವಣಿಗೆಯನ್ನು ಕೇವಲ ಆಲೋಚನೆ ಮತ್ತು ಸಂಕಲ್ಪದಿಂದ ಮಾತ್ರವಲ್ಲದೆ, ಕರುಣೆಯಿಂದಲೂ ಶ್ರೀಮಂತಗೊಳಿಸಲಾಗುತ್ತದೆ. ನಾವು ಮಾನವ ಅಭಿವೃದ್ಧಿ ಕೇಂದ್ರಿತ ಜಾಗತೀಕರಣದ ಮಾರ್ಗ ಆರಿಸಿಕೊಂಡಿದ್ದೇವೆ, ಅಲ್ಲಿ ಬೆಳವಣಿಗೆಯನ್ನು ಮಾರುಕಟ್ಟೆಗಳಿಂದ ಮಾತ್ರ ವ್ಯಾಖ್ಯಾನಿಸಲಾಗುವುದಿಲ್ಲ. ನಮಗೆ, ಜನರಿಗೆ ಘನತೆಯ ಜೀವನ ನೀಡುವುದು ಮತ್ತು ಅವರ ಕನಸುಗಳನ್ನು ನನಸಾಗಿಸಲು ಸಹಾಯ ಮಾಡುವುದು ಪ್ರಗತಿಯ ನಿಜವಾದ ಅಳತೆಯಾಗಿದೆ. ನಾವು ಸಂಪೂರ್ಣವಾಗಿ ಜಿಡಿಪಿ-ಕೇಂದ್ರಿತ ಕಾರ್ಯವಿಧಾನದಿಂದ ದೂರ ಸರಿಯುತ್ತಿದ್ದು, ಜಿಇಪಿ-ಕೇಂದ್ರಿತ ಪ್ರಗತಿಯತ್ತ ಸಾಗುತ್ತಿದ್ದೇವೆ. ಅಲ್ಲಿ ಜಿಇಪಿ ಎಂದರೆ ಜನರ ಒಟ್ಟು ಸಬಲೀಕರಣ. ಇದರರ್ಥ ಎಲ್ಲರಿಗೂ ಸಬಲೀಕರಣ. ಬಡವನಿಗೆ ಕಾಯಂ ಮನೆ ಸಿಕ್ಕಾಗ, ಅವರು ಸಬಲೀಕರಣಗೊಳ್ಳುತ್ತಾರೆ, ಅವರ ಸ್ವಾಭಿಮಾನ ಹೆಚ್ಚಾಗುತ್ತದೆ. ಬಡವನ ಮನೆಯಲ್ಲಿ ಶೌಚಾಲಯ ನಿರ್ಮಿಸಿದಾಗ, ಅವರು ಬಯಲು ಮಲ ವಿಸರ್ಜನೆಯ ಅವಮಾನ ಮತ್ತು ಸಂಕಟದಿಂದ ಮುಕ್ತರಾಗುತ್ತಾರೆ. ಆಯುಷ್ಮಾನ್ ಭಾರತ್ ಯೋಜನೆಯ ಮೂಲಕ ಅವರು 5 ಲಕ್ಷ ರೂಪಾಯಿ ಮೌಲ್ಯದ ಉಚಿತ ಚಿಕಿತ್ಸೆ ಪಡೆದಾಗ, ಅದು ಅವರ ಜೀವನದಿಂದ ಒಂದು ಪ್ರಮುಖ ಚಿಂತೆಯನ್ನು ತೆಗೆದುಹಾಕುತ್ತದೆ. ಅಂತಹ ಲೆಕ್ಕವಿಲ್ಲದಷ್ಟು ಉದಾಹರಣೆಗಳಿವೆ.  ಇವೆಲ್ಲವೂ ಸಹಾನುಭೂತಿಯ ಅಭಿವೃದ್ಧಿಯ ಹಾದಿಯನ್ನು ಬಲಪಡಿಸುತ್ತದೆ, ಈ ರಾಷ್ಟ್ರದ ಜನರನ್ನು ನಿಜವಾಗಿಯೂ ಸಬಲೀಕರಣಗೊಳಿಸುತ್ತದೆ.

ಸ್ನೇಹಿತರೆ,

ಕೆಲವೇ ದಿನಗಳ ಹಿಂದೆ, ನಾಗರಿಕ ಸೇವಾ ದಿನದಂದು ನಾನು "ನಾಗರಿಕ ದೇವೋ ಭವ" - ನಾಗರಿಕನೇ ದೈವ - ಎಂಬ ಮಂತ್ರದ ಬಗ್ಗೆ ಮಾತನಾಡಿದ್ದೆ. ಇದು ನಮ್ಮ ಸರ್ಕಾರದ ಮೂಲತತ್ವ. ನಾವು ಜನತಾ(ಜನರೇ) ಜನಾರ್ದನ (ದೈವ) ಎಂದು ನೋಡುತ್ತೇವೆ. ಹಿಂದೆ, "ಮಾಯಿ-ಬಾಪ್"(ಆಡಳಿತಗಾರ-ವಿಷಯ) ಸಂಸ್ಕೃತಿಯು ಸರ್ಕಾರದ ಕಾರ್ಯ ನಿರ್ವಹಣೆಯಲ್ಲಿ ಪ್ರಾಬಲ್ಯ ಹೊಂದಿತ್ತು. ಇಂದು ನಮ್ಮ ಸರ್ಕಾರವು ಜನರಿಗೆ ಸೇವೆಯ ಮನೋಭಾವದಿಂದ ಕಾರ್ಯ ನಿರ್ವಹಿಸುತ್ತಿದೆ. ಸರ್ಕಾರವು ಈಗ ನಾಗರಿಕರಿಗೆ ಸೇವೆಗಳನ್ನು ಒದಗಿಸಲು ಸಕ್ರಿಯವಾಗಿ ಸಹಾಯ ಮಾಡುತ್ತಿದೆ. ಇಲ್ಲಿ ಅನೇಕ ಯುವಕರಿದ್ದಾರೆ. ಇತ್ತೀಚಿನ ದಿನಗಳಲ್ಲಿ, ನೀವು ಹೆಚ್ಚಿನ ಫಾರ್ಮ್‌ಗಳನ್ನು ಆನ್‌ಲೈನ್‌ನಲ್ಲಿ ಭರ್ತಿ ಮಾಡುತ್ತೀರಿ. ಆದರೆ ನಿಮ್ಮ ಸ್ವಂತ ದಾಖಲೆಗಳನ್ನು ದೃಢೀಕರಿಸಲು ನೀವು ಸರ್ಕಾರಿ ಕಚೇರಿಗಳ ಸುತ್ತಲೂ ಅಲೆದಾಡಬೇಕಾದ ಕಾಲವಿತ್ತು. ಈಗ ಅದೇ ಕೆಲಸವನ್ನು ಸ್ವಯಂ-ದೃಢೀಕರಣದ ಮೂಲಕ ಮಾಡಬಹುದು.

ಸ್ನೇಹಿತರೆ,

ಹಿರಿಯ ನಾಗರಿಕರಿಗೂ ಇದೇ ರೀತಿಯ ಹಳೆಯ ವ್ಯವಸ್ಥೆಗಳಿದ್ದವು. ಪ್ರತಿ ವರ್ಷ, ಹಿರಿಯ ನಾಗರಿಕರು ತಮ್ಮ ಹಳೆಯ ಕಚೇರಿಗೆ ಖುದ್ದಾಗಿ ಹೋಗಿ ತಾವಿನ್ನೂ ಜೀವಂತವಾಗಿದ್ದೇವೆ ಎಂದು ಸಾಬೀತುಪಡಿಸಬೇಕಾಗಿತ್ತು, ಅಥವಾ ಬ್ಯಾಂಕಿಗೆ ಹೋಗಿ "ನಾನು ಇನ್ನೂ ಬದುಕಿದ್ದೇನೆ, ನನಗೆ ಪಿಂಚಣಿ ಸಿಗಬೇಕು" ಎಂದು ಹೇಳಬೇಕಾಗಿತ್ತು. ಅದಕ್ಕೆ ನಾವು ಪರಿಹಾರ ಕಂಡುಕೊಂಡಿದ್ದೇವೆ. ಈಗ ಹಿರಿಯ ನಾಗರಿಕರು ತಮ್ಮ ಜೀವನ ಪ್ರಮಾಣಪತ್ರವನ್ನು ಎಲ್ಲಿಂದಲಾದರೂ ಡಿಜಿಟಲ್ ರೂಪದಲ್ಲಿ ಸಲ್ಲಿಸಬಹುದು. ವಿದ್ಯುತ್ ಸಂಪರ್ಕಕ್ಕಾಗಿ ಅರ್ಜಿ ಸಲ್ಲಿಸುವುದು, ನೀರಿನ ನಲ್ಲಿ ಅಳವಡಿಸುವುದು, ಬಿಲ್‌ಗಳನ್ನು ಪಾವತಿಸುವುದು, ಗ್ಯಾಸ್ ಸಿಲಿಂಡರ್ ಬುಕ್ ಮಾಡುವುದು ಅಥವಾ ಗ್ಯಾಸ್ ಸಿಲಿಂಡರ್ ವಿತರಣೆ ಪಡೆಯುವುದು... ಹೀಗೆ ಜನರು ಹಿಂದೆ ಅದನ್ನು ಪೂರ್ಣಗೊಳಿಸಲು ಪದೇಪದೆ ಕಚೇರಿಗಳಿಗೆ ಭೇಟಿ ನೀಡಬೇಕಾಗಿತ್ತು, ಅದಕ್ಕಾಗಿ ಕೆಲಸದ ರಜೆ ತೆಗೆದುಕೊಳ್ಳಬೇಕಾಗಿತ್ತು.

ಆದರೆ ಇಂದು, ಆ ವ್ಯವಸ್ಥೆ ಬದಲಾಗಿದೆ. ಅಂತಹ ಅನೇಕ ಕೆಲಸಗಳನ್ನು ಈಗ ಆನ್‌ಲೈನ್‌ನಲ್ಲಿ ಮಾಡಲಾಗುತ್ತಿದೆ. ನಾಗರಿಕರು ಮತ್ತು ಸರ್ಕಾರದ ನಡುವಿನ ಪ್ರತಿಯೊಂದು ಸಂಪರ್ಕವು ಅದು ಪಾಸ್‌ಪೋರ್ಟ್‌ಗೆ ಅರ್ಜಿ ಸಲ್ಲಿಸುವುದಾಗಿರಲಿ, ತೆರಿಗೆ ಮರುಪಾವತಿಗೆ ಮನವಿ ಮಾಡುವುದಾಗಿರಲಿ ಅಥವಾ ಇನ್ನೇನಾದರೂ - ಸರಳ, ವೇಗ ಮತ್ತು ಪರಿಣಾಮಕಾರಿ ಎಂದು ಖಚಿತಪಡಿಸಿಕೊಳ್ಳಲು ನಾವು ನಿರಂತರವಾಗಿ ಕೆಲಸ ಮಾಡುತ್ತಿದ್ದೇವೆ. ಇದು "ನಾಗರಿಕ್ ದೇವೋ ಭವ"ದ ನಿಜವಾದ ಅರ್ಥ. ಈ ಮನೋಭಾವದಿಂದ ನಾವು 2047ರ ವೇಳೆಗೆ 'ವಿಕಸಿತ ಭಾರತ'ಕ್ಕೆ ಬಲವಾದ ಅಡಿಪಾಯ ಹಾಕುತ್ತಿದ್ದೇವೆ.

ಸ್ನೇಹಿತರೆ,

ಇಂದು ಭಾರತವು ತನ್ನ ಸಂಪ್ರದಾಯ ಮತ್ತು ಅದರ ಪ್ರಗತಿ ಎರಡನ್ನೂ ಅಳವಡಿಸಿಕೊಳ್ಳುವ ಮೂಲಕ ಮುಂದುವರಿಯುತ್ತಿದೆ. 'ವಿಕಾಸ'(ಅಭಿವೃದ್ಧಿ) ಮತ್ತು 'ವಿರಾಸತ್'(ಪರಂಪರೆ) - ಇದು ನಮ್ಮ ಮಂತ್ರವಾಗಿದೆ. ಭಾರತದಲ್ಲಿ ಸಂಪ್ರದಾಯ ಮತ್ತು ತಂತ್ರಜ್ಞಾನ ಹೇಗೆ ಒಟ್ಟಿಗೆ ಅಭಿವೃದ್ಧಿ ಹೊಂದಬಹುದು ಎಂಬುದನ್ನು ನಾವು ವೀಕ್ಷಿಸುತ್ತಿದ್ದೇವೆ. ಇಂದು ನಾವು ಡಿಜಿಟಲ್ ವಹಿವಾಟಿನಲ್ಲಿ ವಿಶ್ವದ ಅಗ್ರ ರಾಷ್ಟ್ರಗಳಲ್ಲಿ ಒಂದಾಗಿದ್ದೇವೆ. ಅದೇ ಸಮಯದಲ್ಲಿ, ನಮ್ಮ ಸಂಪ್ರದಾಯದ ಸಂಪತ್ತಾದ ಯೋಗ ಮತ್ತು ಆಯುರ್ವೇದವನ್ನು ನಾವು ಇಡೀ ಜಗತ್ತಿಗೆ ಕೊಂಡೊಯ್ಯುತ್ತಿದ್ದೇವೆ. ಇಂದು ಜಗತ್ತು ಭಾರತದಲ್ಲಿ ಹೂಡಿಕೆ ಮಾಡಲು ಉತ್ಸುಕವಾಗಿದೆ. ಕಳೆದ ದಶಕದಲ್ಲಿ, ಭಾರತವು ದಾಖಲೆಯ ಮಟ್ಟದ ಎಫ್ ಡಿಐ(ವಿದೇಶಿ ನೇರ ಹೂಡಿಕೆ) ಪಡೆದಿದೆ. ಇದರ ಜತೆಗೆ, ಕದ್ದ ಕಲಾಕೃತಿಗಳು ಮತ್ತು ಇತರ ಸಾಂಸ್ಕೃತಿಕ ವಸ್ತುಗಳು ಸಹ ದಾಖಲೆಯ ಸಂಖ್ಯೆಯಲ್ಲಿ ಭಾರತಕ್ಕೆ ಮರಳುತ್ತಿವೆ. ಇಂದು  ಭಾರತವು ವಿಶ್ವದ 2ನೇ ಅತಿದೊಡ್ಡ ಮೊಬೈಲ್ ಫೋನ್ ತಯಾರಕ ರಾಷ್ಟ್ರವಾಗಿದೆ. ಅದೇ ಸಮಯದಲ್ಲಿ, ನಾವು ಉತ್ಕೃಷ್ಟ ಆಹಾರವಾದ ಸಿರಿಧಾನ್ಯ ಉತ್ಪಾದನೆಯಲ್ಲೂ ಮುಂಚೂಣಿಯಲ್ಲಿದ್ದೇವೆ. ಭಾರತವು ಈಗ 100 ಗಿಗಾವ್ಯಾಟ್‌ ಸೌರಶಕ್ತಿ ಉತ್ಪಾದನಾ ಸಾಮರ್ಥ್ಯವನ್ನು ಸಾಧಿಸಿದೆ.

ಸ್ನೇಹಿತರೆ,

ಪ್ರಗತಿಗಾಗಿ, ನಮ್ಮ ಸಂಸ್ಕೃತಿ ಅಥವಾ ನಮ್ಮ ಬೇರುಗಳನ್ನು ತ್ಯಜಿಸುವುದು ಅನಿವಾರ್ಯವಲ್ಲ. ನಮ್ಮ ಬೇರುಗಳೊಂದಿಗಿನ ನಮ್ಮ ಸಂಪರ್ಕವು ಆಳವಾದಷ್ಟೂ, ಆಧುನಿಕತೆಯೊಂದಿಗಿನ ನಮ್ಮ ಬಾಂಧವ್ಯವು ಬಲಗೊಳ್ಳುತ್ತದೆ. ನಾವು ನಮ್ಮ ಸಾವಿರಾರು ವರ್ಷಗಳ ಹಳೆಯ ಪರಂಪರೆಯನ್ನು ಮುಂಬರುವ ಸಾವಿರಾರು ವರ್ಷಗಳವರೆಗೆ ಭಾರತಕ್ಕೆ ಶಕ್ತಿಯ ಮೂಲವಾಗಿ ಪರಿವರ್ತಿಸುತ್ತಿದ್ದೇವೆ.

ಸ್ನೇಹಿತರೆ,

2047ರ ವೇಳೆಗೆ 'ವಿಕಸಿತ ಭಾರತ'ದತ್ತ ಸಾಗುವ ಈ ಪ್ರಯಾಣದ ಪ್ರತಿಯೊಂದು ಹೆಜ್ಜೆಯೂ ತನ್ನದೇ ಆದ ಮಹತ್ವ ಹೊಂದಿದೆ. ಆಗಾಗ್ಗೆ, ಇಂದಿನ ಸರ್ಕಾರದ ನಿರ್ಧಾರದ ಗುಣಕ ಪರಿಣಾಮವು ಎಷ್ಟು ದೂರಗಾಮಿಯಾಗಿದೆ ಎಂಬುದನ್ನು ಜನರು ಅರಿತುಕೊಳ್ಳುವುದಿಲ್ಲ. ಮಾಧ್ಯಮ ಮತ್ತು ವಿಷಯ ಸೃಷ್ಟಿ ಎಂಬ ಒಂದೇ ವಲಯದಿಂದ ನಾನು ನಿಮಗೆ ಒಂದು ಉದಾಹರಣೆ ನೀಡುತ್ತೇನೆ. 10 ವರ್ಷಗಳ ಹಿಂದೆ ನಾನು ಡಿಜಿಟಲ್ ಇಂಡಿಯಾ ಬಗ್ಗೆ ಮಾತನಾಡುತ್ತಿದ್ದೆ, ಆಗ ಅನೇಕ ಜನರು ಬಹಳಷ್ಟು ಅನುಮಾನಗಳನ್ನು ವ್ಯಕ್ತಪಡಿಸಿದರು. ಆದರೆ ಇಂದು ಡಿಜಿಟಲ್ ಇಂಡಿಯಾ ನಮ್ಮ ಜೀವನದ ಅವಿಭಾಜ್ಯ ಅಂಗವಾಗಿದೆ. ಕೈಗೆಟುಕುವ ಡೇಟಾ ಮತ್ತು ಅಗ್ಗದ ಮೇಡ್ ಇನ್ ಇಂಡಿಯಾ ಸ್ಮಾರ್ಟ್‌ಫೋನ್‌ಗಳು ಹೊಸ ಕ್ರಾಂತಿ ಹುಟ್ಟುಹಾಕಿವೆ. ಡಿಜಿಟಲ್ ಇಂಡಿಯಾವು ಜೀವನದ ಸುಲಭತೆಯನ್ನು ಹೇಗೆ ಹೆಚ್ಚಿಸಿದೆ ಎಂಬುದನ್ನು ನಾವೆಲ್ಲರೂ ನೋಡಬಹುದು. ಆದರೆ ಡಿಜಿಟಲ್ ಇಂಡಿಯಾವು ವಿಷಯ ಮತ್ತು ಸೃಜನಶೀಲತೆಯ ಸಂಪೂರ್ಣ ಹೊಸ ಜಗತ್ತನ್ನು ಹೇಗೆ ಸೃಷ್ಟಿಸಿದೆ ಎಂಬುದರ ಬಗ್ಗೆ ಚರ್ಚೆ ನಡೆದಿರುವುದು ಕಡಿಮೆ.

ಇಂದು ಚೆನ್ನಾಗಿ ಅಡುಗೆ ಮಾಡುವ ಹಳ್ಳಿಯ ಮಹಿಳೆಯೊಬ್ಬರು ಮಿಲಿಯನ್ ಚಂದಾದಾರರ ಕ್ಲಬ್‌ನ ಭಾಗವಾಗಿದ್ದಾರೆ. ಬುಡಕಟ್ಟು ಪ್ರದೇಶದ ಯುವಕನೊಬ್ಬ ತನ್ನ ಸಾಂಪ್ರದಾಯಿಕ ಕಲೆಯ ಮೂಲಕ ವಿಶ್ವಾದ್ಯಂತದ ಪ್ರೇಕ್ಷಕರನ್ನು ಸಂಪರ್ಕಿಸುತ್ತಿದ್ದಾನೆ. ಶಾಲಾ ವಿದ್ಯಾರ್ಥಿಯೊಬ್ಬ ಅದ್ಭುತ ರೀತಿಯಲ್ಲಿ ತಂತ್ರಜ್ಞಾನ ವಿವರಿಸುತ್ತಿದ್ದಾನೆ ಮತ್ತು ಪ್ರದರ್ಶಿಸುತ್ತಿದ್ದಾನೆ. ಇತ್ತೀಚೆಗೆ, ಮೊದಲ ವೇವ್ಸ್ ಶೃಂಗಸಭೆ ಮುಂಬೈನಲ್ಲಿ ನಡೆಯಿತು. ಇದು ಮಾಧ್ಯಮ, ಮನರಂಜನೆ ಮತ್ತು ಸೃಜನಶೀಲ ಉದ್ಯಮಗಳಲ್ಲಿ ತೊಡಗಿಸಿಕೊಂಡಿರುವ ವಿಶ್ವಾದ್ಯಂತದ ಜನರನ್ನು ಒಟ್ಟುಗೂಡಿಸಿತು. ನನಗೆ ಅದರ ಭಾಗವಾಗಲು ಅವಕಾಶ ಸಿಕ್ಕಿತು. ಕಳೆದ 3 ವರ್ಷಗಳಲ್ಲಿ ಯೂಟ್ಯೂಬ್ ಒಂದೇ ಭಾರತೀಯ ವಿಷಯ ರಚನೆಕಾರರಿಗೆ 21,000 ಕೋಟಿ ರೂಪಾಯಿ ಪಾವತಿಸಿದೆ ಎಂದು ಯಾರೋ ನನಗೆ ಹೇಳಿದರು – 21 ಸಾವಿರ ಕೋಟಿ ರೂಪಾಯಿ! ಇದರರ್ಥ ಇಂದು, ನಮ್ಮ ಫೋನ್‌ಗಳು ಸಂವಹನದ ಕೇವಲ ಸಾಧನಗಳಲ್ಲ, ಆದರೆ ಸೃಜನಶೀಲತೆ ಮತ್ತು ಆದಾಯದ ಪ್ರಬಲ ಸಾಧನಗಳಾಗಿವೆ.

ಸ್ನೇಹಿತರೆ,

2047ರ ವೇಳೆಗೆ 'ವಿಕಸಿತ ಭಾರತ' ಗುರಿಯ ಜತೆಗೆ, ಅದರೊಂದಿಗೆ ನಿಕಟ ಪಾಲುದಾರಿಕೆ ಹೊಂದಿರುವ ಮತ್ತೊಂದು ಅಭಿಯಾನವಿದೆ - ಅದು ಆತ್ಮನಿರ್ಭರ್ ಭಾರತ್ (ಸ್ವಾವಲಂಬಿ ಭಾರತ) ಅಭಿಯಾನ. ಸ್ವಾವಲಂಬನೆ ಯಾವಾಗಲೂ ನಮ್ಮ ಆರ್ಥಿಕ ಡಿಎನ್‌ಎಯ ಒಂದು ಭಾಗವಾಗಿದೆ. ಆದರೂ, ಭಾರತ ಒಂದು ತಯಾರಕ ದೇಶವಲ್ಲ, ಅದು ಕೇವಲ ಒಂದು ಮಾರುಕಟ್ಟೆ ಎಂದು ನಮಗೆ ಆಗಾಗ್ಗೆ ಹೇಳಲಾಗುತ್ತಿತ್ತು. ಆದರೆ ಈಗ ಆ ಟ್ಯಾಗ್ ಅನ್ನು ತೆಗೆದುಹಾಕಲಾಗುತ್ತಿದೆ. ಇಂದು, ಭಾರತವು ವಿಶ್ವದ ಪ್ರಮುಖ ರಕ್ಷಣಾ ತಯಾರಕ ಮತ್ತು ರಫ್ತುದಾರನಾಗಿ ಹೊರಹೊಮ್ಮುತ್ತಿದೆ. ಭಾರತೀಯ ರಕ್ಷಣಾ ಉತ್ಪನ್ನಗಳನ್ನು 100ಕ್ಕೂ ಹೆಚ್ಚು ದೇಶಗಳಿಗೆ ರಫ್ತು ಮಾಡಲಾಗುತ್ತಿದೆ. ನಮ್ಮ ರಕ್ಷಣಾ ರಫ್ತಿನ ಅಂಕಿಅಂಶಗಳು ಸಹ ಸ್ಥಿರವಾಗಿ ಏರುತ್ತಿವೆ. ನಮ್ಮ ದೇಶದಲ್ಲಿ ಈಗ ಐಎನ್ಎಸ್ ವಿಕ್ರಾಂತ್, ಐಎನ್ಎಸ್ ಸೂರತ್ ಮತ್ತು ಐಎನ್ಎಸ್ ನೀಲಗಿರಿಯಂತಹ ಅನೇಕ ಸ್ಥಳೀಯ ಯುದ್ಧನೌಕೆಗಳಿವೆ - ಇವೆಲ್ಲವೂ ಭಾರತದ ಸ್ವಂತ ಸಾಮರ್ಥ್ಯಗಳಿಂದ ನಿರ್ಮಿಸಲ್ಪಟ್ಟಿವೆ. ಸಾಂಪ್ರದಾಯಿಕವಾಗಿ ನಮ್ಮ ಸಾಮರ್ಥ್ಯವೆಂದು ಪರಿಗಣಿಸದ ಅನೇಕ ಕ್ಷೇತ್ರಗಳಲ್ಲಿ ಭಾರತವು ಈಗ ಪ್ರಭಾವಶಾಲಿಯಾಗಿ ಕಾರ್ಯ ನಿರ್ವಹಿಸುತ್ತಿದೆ. ಉದಾಹರಣೆಗೆ, ಎಲೆಕ್ಟ್ರಾನಿಕ್ಸ್ ವಲಯವನ್ನು ತೆಗೆದುಕೊಳ್ಳಿ. ಇತ್ತೀಚಿನ ವರ್ಷಗಳಲ್ಲಿ ಭಾರತವು ಪ್ರಮುಖ ಎಲೆಕ್ಟ್ರಾನಿಕ್ಸ್ ರಫ್ತುದಾರನಾಗಿ ಹೊರಹೊಮ್ಮಿದೆ. ನಮ್ಮ ಸ್ಥಳೀಯ ಉತ್ಪನ್ನಗಳು ಜಾಗತಿಕವಾಗಿ ಬೆಳೆಯುತ್ತಿವೆ. ಇತ್ತೀಚೆಗೆ, ರಫ್ತು-ಸಂಬಂಧಿತ ದತ್ತಾಂಶ ಬಿಡುಗಡೆ ಮಾಡಲಾಗಿದೆ. ಕಳೆದ ವರ್ಷ ಭಾರತದ ರಫ್ತು ಸುಮಾರು 825 ಶತಕೋಟಿ ಡಾಲರ್ ದಾಖಲೆಯ ಮಟ್ಟವನ್ನು ತಲುಪಿದೆ. ಇದರರ್ಥ ಭಾರತವು ಕೇವಲ 1 ದಶಕದಲ್ಲಿ ತನ್ನ ರಫ್ತುಗಳನ್ನು 2 ಪಟ್ಟು ಹೆಚ್ಚಿಸಿದೆ.  ಇದನ್ನು ಮತ್ತಷ್ಟು ವೇಗಗೊಳಿಸಲು ಮತ್ತು ಹೊಸ ಎತ್ತರಕ್ಕೆ ಕೊಂಡೊಯ್ಯಲು, ಈ ವರ್ಷದ ಬಜೆಟ್‌ನಲ್ಲಿ ನಾವು “ಮಿಷನ್ ಮ್ಯಾನುಫ್ಯಾಕ್ಚರಿಂಗ್” ಘೋಷಿಸಿದ್ದೇವೆ. ಈ ಉತ್ಪಾದನಾ ಶಕ್ತಿಯ ಭಾರತೀಯರ ಗುರುತನ್ನು ಜಗತ್ತಿನಲ್ಲಿ ಸೃಷ್ಟಿಕರ್ತರು, ನಾವೀನ್ಯಕಾರರು ಮತ್ತು ಪರಿವರ್ತನಾಕಾರರು ಎಂದು ರೂಪಿಸುತ್ತಿದೆ.

ಸ್ನೇಹಿತರೆ,

ಭಾರತವು ಮುಂಬರುವ ಶತಮಾನಗಳಲ್ಲಿ ತೆಗೆದುಕೊಳ್ಳುವ ದಿಕ್ಕನ್ನು ಈ ದಶಕವೇ ವ್ಯಾಖ್ಯಾನಿಸಲಿದೆ. ಇದು ದೇಶದ ಅಭಿವೃದ್ಧಿಯಲ್ಲಿ ಹೊಸ ಹಣೆಬರಹ ಬರೆಯುತ್ತಿರುವ ಅವಧಿಯಾಗಿದೆ. ದೇಶದ ಪ್ರತಿಯೊಬ್ಬ ನಾಗರಿಕರಲ್ಲಿ, ಪ್ರತಿಯೊಂದು ಸಂಸ್ಥೆಯಲ್ಲಿ ಮತ್ತು ಪ್ರತಿಯೊಂದು ವಲಯದಲ್ಲಿ ನಾನು ಈ ಚೈತನ್ಯವನ್ನು ನೋಡುತ್ತೇನೆ. ಈ ಶೃಂಗಸಭೆಯ ಸಮಯದಲ್ಲೂ ಸಹ, ನಾವು ನಡೆಸಿದ ಚರ್ಚೆಗಳು ಅದೇ ಶಕ್ತಿ ಮತ್ತು ಆಶಾವಾದವನ್ನು ಪ್ರತಿಬಿಂಬಿಸುತ್ತಿವೆ. ಮತ್ತೊಮ್ಮೆ, ಈ ಶೃಂಗಸಭೆಯನ್ನು ಆಯೋಜಿಸಿದ್ದಕ್ಕಾಗಿ ನಾನು ಎಬಿಪಿ ನೆಟ್‌ವರ್ಕ್‌ಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳನ್ನು ಸಲ್ಲಿಸುತ್ತೇನೆ. ನಾನು ನಿಮ್ಮೆಲ್ಲರಿಗೂ ಧನ್ಯವಾದ ಹೇಳಲು ಬಯಸುತ್ತೇನೆ. ರಾತ್ರಿ ಸಾಕಷ್ಟು ತಡವಾಗುತ್ತಿದ್ದರೂ, ನೀವು ಇನ್ನೂ ಇಲ್ಲಿ ಇಷ್ಟೊಂದು ದೊಡ್ಡ ಸಂಖ್ಯೆಯಲ್ಲಿ ಹಾಜರಿದ್ದೀರಿ. ಅದು ಸ್ವತಃ ಉಜ್ವಲ ಭವಿಷ್ಯದ ಸಂಕೇತವಾಗಿದೆ. ನೀವು ಅಳವಡಿಸಿಕೊಂಡ ವಿಶಿಷ್ಟ ಸ್ವರೂಪವನ್ನು ನಾನು ವಿಶೇಷವಾಗಿ ಪ್ರಶಂಸಿಸಲು ಬಯಸುತ್ತೇನೆ, ನಾನು ನಿಮ್ಮೆಲ್ಲರ ಅತಿಥಿ ಪಟ್ಟಿಯನ್ನು ನೋಡುತ್ತಿದ್ದೆ. ಇದು ಯುವ, ಪ್ರಾಯೋಗಿಕ ಮನಸ್ಸುಗಳನ್ನು ಒಳಗೊಂಡಿದೆ. ಅವರಲ್ಲಿ ಹೊಸ ಆಲೋಚನೆಗಳು, ತಾಜಾ ಧೈರ್ಯವಿದೆ. ಅವುಗಳನ್ನು ಕೇಳಿದ ದೇಶದಲ್ಲಿ ಯಾರಾದರೂ ಆತ್ಮವಿಶ್ವಾಸದ ಭಾವನೆ ಅನುಭವಿಸಿರಬೇಕು - ಹೌದು, ನಮ್ಮ ದೇಶವು ಅಂತಹ ಶಕ್ತಿಯನ್ನು ಹೊಂದಿದೆ ಎಂಬ ಅರಿವಿದೆ. ಆದ್ದರಿಂದ, ನೀವು ಗಮನಾರ್ಹ ಕೆಲಸ ಮಾಡಿದ್ದೀರಿ, ಅದು ಶ್ಲಾಘನೀಯವಾದದ್ದು, ಅದಕ್ಕಾಗಿ, ನೀವು ಅಭಿನಂದನೆಗಳಿಗೆ ಅರ್ಹರು. ತುಂಬು ಧನ್ಯವಾದಗಳು.

ಎಲ್ಲರಿಗೂ ನಮಸ್ಕಾರ!

*****