ଗତକାଲି ମୁମ୍ବାଇର ୱେଭ୍ସରେ ଅନୁଷ୍ଠିତ ଏକ ଉତ୍ସାହୀ ଏବଂ ଅନ୍ତର୍ଦୃଷ୍ଟିପୂର୍ଣ୍ଣ ପ୍ୟାନେଲ୍ ଆଲୋଚନାରେ, ସ୍ୱଦେଶୀ କ୍ରୀଡାର ସମୃଦ୍ଧ ଐତିହ୍ୟ ଏବଂ ଭାରତୀୟ କ୍ଷେତ୍ରରୁ ବିଶ୍ୱସ୍ତରୀୟ କ୍ଷେତ୍ରକୁ ସେମାନଙ୍କର ବୃଦ୍ଧି ପାଉଥିବା ଯାତ୍ରା ଉପରେ ଆଲୋକପାତ କରାଯାଇଥିଲା। "ସ୍ୱଦେଶୀ କ୍ରୀଡ଼ା: ଭାରତରୁ ବିଶ୍ୱ ମଞ୍ଚ ପର୍ଯ୍ୟନ୍ତ" ଶୀର୍ଷକ ଏହି ଅଧିବେଶନରେ ପ୍ରଭାବଶାଳୀ ନୀତି ନିର୍ଦ୍ଧାରକ, ପ୍ରସିଦ୍ଧ କ୍ରୀଡ଼ାବିତ, କ୍ରୀଡ଼ା ଉଦ୍ୟୋଗୀ ଏବଂ ଚିନ୍ତାନାୟକମାନେ ଏକ ସମାନ ଦୃଷ୍ଟିକୋଣ : ଭାରତର ସ୍ୱଦେଶୀ କ୍ରୀଡ଼ାକୁ ଅନ୍ତର୍ଜାତୀୟ ସ୍ୱୀକୃତି ଏବଂ ସଫଳତା ପାଇଁ ପ୍ରେରିତ କରିବା’ ପ୍ରସଙ୍ଗ ନେଇ ଏକତ୍ରିତ ହୋଇଥିଲେ।

ମୁଖ୍ୟ ବକ୍ତବ୍ୟ ପ୍ରଦାନ କରି, ଓଡ଼ିଶାର ମୁଖ୍ୟମନ୍ତ୍ରୀ ଶ୍ରୀ ମୋହନ ଚରଣ ମାଝୀ ଭାରତରେ ସ୍ଵଦେଶୀ କ୍ରୀଡାର ଗଭୀର ସାଂସ୍କୃତିକ ଆଧାର  ଉପରେ ଆଗ୍ରହର ସହିତ ଆଲୋକପାତ କରିଥିଲେ। ଭାରତକୁ ଏକ ବିଶ୍ୱସ୍ତରୀୟ କ୍ରୀଡ଼ା ଶକ୍ତି କରିବା ଦିଗରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟିପୂର୍ଣ୍ଣ ନେତୃତ୍ୱ ପାଇଁ କୃତଜ୍ଞତା ପ୍ରକାଶ କରି ସେ କହିଥିଲେ ଯେ "ଏହି ଖେଳଗୁଡ଼ିକ କେବଳ ଶାରୀରିକ ପ୍ରତିଯୋଗିତା ନୁହେଁ; ଏଗୁଡ଼ିକ ଆମ ସମ୍ପ୍ରଦାୟ, ଆମର ପରମ୍ପରା ଏବଂ ଆମର ପରିଚୟର ଏକ ଅବିଚ୍ଛେଦ୍ୟ ଅଙ୍ଗ । ଶ୍ରୀ ମାଝୀ ଆହୁରି ଆଲୋକପାତ କରିଥିଲେ ଯେ, ସକ୍ରିୟ ଆଦିବାସୀ ସମ୍ପ୍ରଦାୟର ବାସସ୍ଥାନ ଓଡ଼ିଶା ଏହି ପ୍ରାଚୀନ ଖେଳଗୁଡ଼ିକୁ ସଂରକ୍ଷଣ କରି ରଖିଛି ଏବଂ ଏକ କ୍ରୀଡା କେନ୍ଦ୍ର ଭାବରେ ଉଭା ହେଉଛି। "ଆମେ ଗ୍ରାମୀଣ ପ୍ରତିଭାଙ୍କୁ ପ୍ରୋତ୍ସାହିତ କରିବା ଏବଂ ପ୍ରତ୍ୟେକ ପ୍ରତିଭାଶାଳୀ ଖେଳାଳି ଯେପରି ତାଙ୍କର ଚମକ ଦେଖାଇବା ପାଇଁ ଏକ ପ୍ଲାଟଫର୍ମ ପାଇବେ ତାହା ନିଶ୍ଚିତ କରିବାକୁ ପ୍ରତିବଦ୍ଧ" ବୋଲି ସେ କହିଥିଲେ।

କେନ୍ଦ୍ର ଯୁବ ବ୍ୟାପାର ଏବଂ କ୍ରୀଡା ରାଷ୍ଟ୍ରମନ୍ତ୍ରୀ ଶ୍ରୀମତୀ ରକ୍ଷା ନିଖିଲ ଖଡସେ ଏହି ଗୁରୁତ୍ୱପୂର୍ଣ୍ଣ ଆନ୍ଦୋଳନ ବିଷୟରେ ଏକ ଅର୍ଥପୂର୍ଣ୍ଣ ଆଲୋଚନାକୁ ପ୍ରୋତ୍ସାହିତ କରିବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ୱେଭ୍ସ ମଞ୍ଚକୁ ହାର୍ଦ୍ଦିକ କୃତଜ୍ଞତା ଜଣାଇଥିଲେ। “ଖେଲୋ ଇଣ୍ଡିଆ ପଦକ୍ଷେପ ତୃଣମୂଳ ସ୍ତରର ପ୍ରତିଭାମାନଙ୍କୁ ପ୍ରୋତ୍ସାହିତ କରିବା ଏବଂ ଭାରତୀୟ କ୍ରୀଡାର ଭବିଷ୍ୟତ ଗଠନ କରିବାରେ ଏକ ପରିବର୍ତ୍ତନକାରୀ ଶକ୍ତି ପ୍ରମାଣିତ ହେଉଛି,” ବୋଲି ସେ ମନ୍ତବ୍ୟ ଦେଇଥିଲେ। ସେ ଆହୁରି ଗୁରୁତ୍ୱାରୋପ କରିଥିଲେ ଯେ, ‘କ୍ରୀଡା କେବଳ ଶାରୀରିକ ସୁସ୍ଥତାକୁ ପ୍ରୋତ୍ସାହିତ କରେ ନାହିଁ , ବରଂ ସମ୍ପର୍କକୁ ମଜବୁତ କରେ ଏବଂ ଏକତାକୁ ପ୍ରୋତ୍ସାହିତ କରେ - ଯାହା ଭାରତର ସମୃଦ୍ଧ ସାଂସ୍କୃତିକ ଐତିହ୍ୟର ସାରକୁ ପ୍ରତିଫଳିତ କରେ।

ପ୍ରୋ କବାଡି ଲିଗର ଲିଗ୍ କମିଶନର ଅନୁପମ ଗୋସ୍ୱାମୀ ଏକ କ୍ରୀଡା ବଜାର ଭାବରେ ଭାରତର ବିଶାଳ ସମ୍ଭାବନା ଉପରେ ଗୁରୁତ୍ୱାରୋପ କରିଥିଲେ। "ଆମକୁ ସ୍ୱଦେଶୀ କ୍ରୀଡାକୁ ପ୍ରୋତ୍ସାହିତ କରି ଏହି ସୁଯୋଗକୁ ସଦୁପଯୋଗ କରିବାକୁ ପଡିବ, ଯାହାର ଭାବନାତ୍ମକ ଏବଂ ସାଂସ୍କୃତିକ ମୂଲ୍ୟ ଅତ୍ୟନ୍ତ ମହତ୍ତ୍ୱପୂର୍ଣ୍ଣ ବୋଲି ସେ ଆହୁରି ମଧ୍ୟ କହିଥିଲେ‘।

ଇରାନର ଜଣେ ପ୍ରତିଷ୍ଠିତ ପିକେଏଲ୍ କ୍ରୀଡାବିତ୍ ଫାଜେଲ ଅତ୍ରାଚଲି, କବାଡି ଜୀବନକୁ କିପରି ପରିବର୍ତ୍ତନ କରିଛି ତାହା କହିଥିଲେ। "ପିକେଏଲକୁ ଧନ୍ୟବାଦ, କବାଡି ଏକ ବୃତ୍ତିଗତ ଖେଳ ପାଲଟିଛି, ଯାହା ଖେଳାଳିମାନଙ୍କୁ ପ୍ରସିଦ୍ଧି ଏବଂ ଆର୍ଥିକ ସୁରକ୍ଷା ପ୍ରଦାନ କରୁଛି" ବୋଲି କହିବା ସହିତ  ଫା​‌ଜେଲ ଆନନ୍ଦ ପ୍ରକାଶ କରିଥିଲେ।

ଇଂଲିସ୍ କ୍ରିକେଟ୍ ବୋର୍ଡର ନିୟାମକ ଅଧ୍ୟକ୍ଷ ନିକ୍ କାଉର୍ଡ ଜଗତୀକରଣ ଏବଂ ଆଧୁନିକ ବିତରଣ ଚ୍ୟାନେଲର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। "ବିଶ୍ୱବ୍ୟାପୀ ପାରମ୍ପରିକ କ୍ରୀଡାକୁ ଲୋକପ୍ରିୟ କରିବା ପାଇଁ, ଆମକୁ ଇ-କ୍ରୀଡା ସମେତ ଡିଜିଟାଲ୍ ପ୍ଲାଟଫର୍ମଗୁଡ଼ିକୁ ଗ୍ରହଣ କରିବାକୁ ପଡିବ" ବୋଲି ସେ ସ୍ପଷ୍ଟ କରିଥିଲେ।

ଖୋ - ଖୋ ମହାସଂଘର ସଭାପତି ସୁଧାଂଶୁ ମିତ୍ତଲ ପ୍ରକାଶ କରିଛନ୍ତି ଯେ, ଖୋ - ଖୋ ବର୍ତ୍ତମାନ ୫୫ ଟି ଦେଶରେ ଖେଳାଯାଉଛି, ବର୍ଷ ଶେଷ ସୁଦ୍ଧା ୯୦ ରୁ ଅଧିକ ଦେଶରେ ପହଞ୍ଚିବାର ଲକ୍ଷ୍ୟ ରଖାଯାଇଛି। "ଆମର ସ୍ୱଦେଶୀ ଖେଳଗୁଡ଼ିକ ଅନନ୍ୟ - ଏଥିପାଇଁ ଅଧିକ ରଣନୀତି, ସହନଶକ୍ତି ଏବଂ ମନୋବଳର ଆବଶ୍ୟକତା ରହିଛି। ଏଗୁଡ଼ିକର ବିଶ୍ୱବ୍ୟାପୀ ଆକର୍ଷଣ ରହିଛି। କିନ୍ତୁ ଏଗୁଡ଼ିକୁ ସରକାରୀ ସମର୍ଥନ, ବ୍ରାଣ୍ଡିଂ ଏବଂ କୂଟନୈତିକ ସମର୍ଥନ ଆବଶ୍ୟକ" ବୋଲି ସେ ଦୃଢ଼ତାର ସହିତ କହିଥିଲେ।

ଫ୍ୟାନକୋଡର ପ୍ରତିଷ୍ଠାତା ୟାନିକ୍ କୋଲାକୋ, ପ୍ରଯୁକ୍ତିବିଦ୍ୟାକୁ ଏକ ଖେଳ ପରିବର୍ତ୍ତନକାରୀ ଭାବରେ ଇଙ୍ଗିତ କରିଥିଲେ। ସେ କହିଥିଲେ ଯେ, "ପ୍ରବେଶ ଏବଂ ସମ୍ପୃକ୍ତି ଗୁରୁତ୍ୱପୂର୍ଣ୍ଣ। ସଠିକ୍ ପ୍ରଯୁକ୍ତିବିଦ୍ୟା ସହିତ, ଆମେ ପ୍ରଶଂସକଙ୍କ ସହିତ ଅଧିକ ଗଭୀର ସମ୍ପର୍କ ସୃଷ୍ଟି କରିପାରିବା ଏବଂ ଭାରତୀୟ କ୍ରୀଡ଼ାକୁ ବିଶ୍ୱସ୍ତରୀୟ କରିପାରିବା" ବୋଲି ସେ ଆହୁରି ମଧ୍ୟ କହିଛନ୍ତି।

ଅଧିବେଶନଟି ମନ୍ତ୍ର ମୁଗ୍ଧଙ୍କ ଦ୍ୱାରା ପରିଚାଳନା କରାଯାଇଥିଲା, ଯିଏ ବିବିଧ ଅନ୍ତର୍ଦୃଷ୍ଟି ଏବଂ ଭବିଷ୍ୟତ ରଣନୀତିକୁ ଏକତ୍ର କରି ଆଲୋଚନାକୁ ଦକ୍ଷତାର ସହିତ ପରିଚାଳନା କରିଥିଲେ।

*******

SSP