ಮುಂಬೈನಲ್ಲಿ ನಡೆಯುತ್ತಿರುವ ವೇವ್ಸ್ ಶೃಂಗಸಭೆಯಲ್ಲಿ ನಿನ್ನೆ ನಡೆದ ಉತ್ಸಾಹಭರಿತ ಮತ್ತು ಒಳನೋಟವುಳ್ಳ ಚರ್ಚಾಗೋಷ್ಠಿಯು ದೇಶೀಯ ಕ್ರೀಡೆಗಳ ಶ್ರೀಮಂತ ಪರಂಪರೆ ಮತ್ತು ಈ ಕ್ರೀಡೆಗಳು ಭಾರತದ ಮಣ್ಣಿನಿಂದ ಜಾಗತಿಕ ವೇದಿಕೆಗೆ ಕೊಂಡೊಯ್ದ ಅಭಿವೃದ್ಧಿಯ ಪ್ರಯಾಣವನ್ನು ಎತ್ತಿ ತೋರಿಸಿತು. "ದೇಶೀಯ ಕ್ರೀಡೆಗಳು: ಭಾರತದಿಂದ ಜಾಗತಿಕ ವೇದಿಕೆಗೆ" ಎಂಬ ಶೀರ್ಷಿಕೆಯ ಗೋಷ್ಠಿಯಲ್ಲಿ, ಪ್ರಭಾವಿ ನೀತಿ ನಿರೂಪಕರು, ಹೆಸರಾಂತ ಕ್ರೀಡಾಪಟುಗಳು, ಕ್ರೀಡಾ ಉದ್ಯಮಿಗಳು ಮತ್ತು ಪ್ರಮುಖ ಚಿಂತಕರು ಒಟ್ಟಾಗಿ ಸೇರಿ 'ಭಾರತದ ದೇಶೀಯ ಕ್ರೀಡೆಗಳನ್ನು ಅಂತರರಾಷ್ಟ್ರೀಯ ಮನ್ನಣೆ ಮತ್ತು ಯಶಸ್ಸಿಗೆ ತರುವ ಪ್ರಯತ್ನಗಳು' ಎಂಬ ಹಂಚಿಕೆಯ ಪರಿಕಲ್ಪನೆಯ ಬಗ್ಗೆ ಚರ್ಚಿಸಿದರು.

ಪ್ರಧಾನ ಭಾಷಣ ಮಾಡಿದ ಒಡಿಶಾ ಮುಖ್ಯಮಂತ್ರಿ ಶ್ರೀ ಮೋಹನ್ ಚರಣ್ ಮಾಝಿ, ಭಾರತದಲ್ಲಿನ ದೇಶೀಯ ಕ್ರೀಡೆಗಳ ಆಳವಾದ ಸಾಂಸ್ಕೃತಿಕ ಬೇರುಗಳನ್ನು ಎತ್ತಿ ತೋರಿಸಿದರು. "ಈ ಆಟಗಳು ಕೇವಲ ದೈಹಿಕ ಸ್ಪರ್ಧೆಗಳಲ್ಲ; ಅವು ನಮ್ಮ ಸಮುದಾಯಗಳು, ನಮ್ಮ ಸಂಪ್ರದಾಯಗಳು ಮತ್ತು ನಮ್ಮ ಅಸ್ಮಿತೆಯ ಅವಿಭಾಜ್ಯ ಅಂಗವಾಗಿವೆ" ಎಂದು ಅವರು ಹೇಳಿದರು, ಭಾರತವನ್ನು ಜಾಗತಿಕ ಕ್ರೀಡಾ ಶಕ್ತಿ ಕೇಂದ್ರವನ್ನಾಗಿ ಮಾಡುವತ್ತ ಪ್ರಧಾನಿ ಶ್ರೀ ನರೇಂದ್ರ ಮೋದಿಯವರ ದೂರದೃಷ್ಟಿಯ ನಾಯಕತ್ವಕ್ಕಾಗಿ ಅವರಿಗೆ ಕೃತಜ್ಞತೆ ಸಲ್ಲಿಸಿದರು. ಒಡಿಶಾ ರಾಜ್ಯದಲ್ಲಿ ವಾಸಿಸುವ ಉತ್ಸಾಹಿ ಬುಡಕಟ್ಟು ಜನಾಂಗದವರು ಈ ಪ್ರಾಚೀನ ಆಟಗಳನ್ನು ಸಂರಕ್ಷಿಸಿದ್ದಾರೆ ಮತ್ತು ರಾಜ್ಯವು ಈಗ ಕ್ರೀಡಾ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ ಎಂದು ಅವರು ಹೇಳಿದರು. "ಗ್ರಾಮೀಣ ಪ್ರತಿಭೆಗಳನ್ನು ಪೋಷಿಸಲು ಮತ್ತು ಪ್ರತಿಯೊಬ್ಬ ಪ್ರತಿಭಾನ್ವಿತ ಕ್ರೀಡಾಪಟುವಿಗೆ ತಮ್ಮ ಸಾಧನೆಗಳನ್ನು ಪ್ರದರ್ಶಿಸಲು ವೇದಿಕೆಯನ್ನು ಒದಗಿಸಲು ನಾವು ಬದ್ಧರಾಗಿದ್ದೇವೆ" ಎಂದು ಅವರು ಹೇಳಿದರು.

ಈ ಸಂದರ್ಭದಲ್ಲಿ ಸಭೆಯನ್ನುದ್ದೇಶಿಸಿ ಮಾತನಾಡಿದ ಕೇಂದ್ರ ಯುವ ವ್ಯವಹಾರ ಮತ್ತು ಕ್ರೀಡಾ ರಾಜ್ಯ ಸಚಿವರಾದ ಶ್ರೀಮತಿ ರಕ್ಷಾ ನಿಖಿಲ್ ಖಡ್ಸೆ, ಈ ಮಹತ್ವದ ಆಂದೋಲನದ ಕುರಿತು ಅರ್ಥಪೂರ್ಣ ಸಂವಾದವನ್ನು ಉತ್ತೇಜಿಸಿದ್ದಕ್ಕಾಗಿ ಪ್ರಧಾನಿ ನರೇಂದ್ರ ಮೋದಿ ಮತ್ತು ವೇವ್ಸ್ ವೇದಿಕೆಗೆ ಹೃತ್ಪೂರ್ವಕ ಕೃತಜ್ಞತೆಗಳನ್ನು ವ್ಯಕ್ತಪಡಿಸಿದರು. "ಭಾರತ ಈಗಾಗಲೇ ಯೋಗದ ಜಾಗತಿಕ ರಾಯಭಾರಿಯಾಗಿ ಹೊರಹೊಮ್ಮಿದೆ. ಈಗ ನಾವು ನಮ್ಮ ಸಾಂಪ್ರದಾಯಿಕ ಕ್ರೀಡೆಗಳಾದ ಖೋ-ಖೋ ಮತ್ತು ಕಬಡ್ಡಿಯನ್ನು ಅಂತರರಾಷ್ಟ್ರೀಯ ವೇದಿಕೆಯಲ್ಲಿ ಹೆಮ್ಮೆಯಿಂದ ಪ್ರಸ್ತುತಪಡಿಸುತ್ತಿದ್ದೇವೆ." ಎಂದು ಹೇಳಿದರು. "ಖೇಲೋ ಇಂಡಿಯಾ ಉಪಕ್ರಮವು ತಳಮಟ್ಟದ ಪ್ರತಿಭೆಗಳನ್ನು ಪೋಷಿಸುವಲ್ಲಿ ಮತ್ತು ಭಾರತೀಯ ಕ್ರೀಡೆಗಳ ಭವಿಷ್ಯವನ್ನು ರೂಪಿಸುವಲ್ಲಿ ಪರಿವರ್ತನಾ ಶಕ್ತಿಯಾಗಿ ಸಾಬೀತಾಗುತ್ತಿದೆ" ಎಂದು ಅವರು ಹೇಳಿದರು. ಕ್ರೀಡೆಗಳು ದೈಹಿಕ ಸದೃಢತೆಯನ್ನು ಉತ್ತೇಜಿಸುವುದಲ್ಲದೆ, ಸಂಬಂಧಗಳನ್ನು ಬಲಪಡಿಸುತ್ತವೆ ಮತ್ತು ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆಯ ಸಾರವನ್ನು ಪ್ರತಿಬಿಂಬಿಸುವ ಏಕತೆಯನ್ನು ಬೆಳೆಸುತ್ತವೆ ಎಂದು ಅವರು ಹೇಳಿದರು.

ಪ್ರೊ ಕಬಡ್ಡಿ ಲೀಗ್ ಲೀಗ್ ಆಯುಕ್ತ ಅನುಪಮ್ ಗೋಸ್ವಾಮಿ, ಕ್ರೀಡಾ ಮಾರುಕಟ್ಟೆಯಾಗಿ ಭಾರತದ ವಿಶಾಲ ಸಾಮರ್ಥ್ಯವನ್ನು ಒತ್ತಿ ಹೇಳಿದರು. "ಅಗಾಧ ಭಾವನಾತ್ಮಕ ಮತ್ತು ಸಾಂಸ್ಕೃತಿಕ ಮೌಲ್ಯವನ್ನು ಹೊಂದಿರುವ ದೇಶೀಯ ಕ್ರೀಡೆಗಳನ್ನು ಉತ್ತೇಜಿಸುವ ಮೂಲಕ ನಾವು ಈ ಅವಕಾಶವನ್ನು ಬಳಸಿಕೊಳ್ಳಬೇಕು" ಎಂದು ಅವರು ಹೇಳಿದರು.

ಇರಾನ್ ನ ಪ್ರತಿಷ್ಠಿತ ಪಿಕೆಎಲ್ ಆಟಗಾರ ಫಜಲ್ ಅತ್ರಾಚಲಿ, ಕಬಡ್ಡಿ ತನ್ನ ಜೀವನವನ್ನು ಹೇಗೆ ಬದಲಾಯಿಸಿತು ಎಂಬುದರ ಕುರಿತು ಮಾತನಾಡಿದರು. "ಪಿಕೆಎಲ್ ನೊಂದಿಗೆ, ಕಬಡ್ಡಿ ವೃತ್ತಿಪರ ಕ್ರೀಡೆಯಾಗಿ ಮಾರ್ಪಟ್ಟಿದೆ, ಆಟಗಾರರಿಗೆ ಖ್ಯಾತಿ ಮತ್ತು ಆರ್ಥಿಕ ಭದ್ರತೆಯನ್ನು ಒದಗಿಸಿದೆ" ಎಂದು ಫಜಲ್ ಹೇಳಿದರು.

ಇಂಗ್ಲಿಷ್ ಕ್ರಿಕೆಟ್ ಮಂಡಳಿಯ ನಿಯಂತ್ರಣ ವಿಭಾಗದ ಅಧ್ಯಕ್ಷರಾದ ನಿಕ್ ಕವರ್ಡ್, ಜಾಗತೀಕರಣ ಮತ್ತು ಆಧುನಿಕ ವಿತರಣಾ ಮಾರ್ಗಗಳ ಮಹತ್ವವನ್ನು ಎತ್ತಿ ತೋರಿಸಿದರು. "ವಿಶ್ವಾದ್ಯಂತ ಸಾಂಪ್ರದಾಯಿಕ ಕ್ರೀಡೆಗಳನ್ನು ಜನಪ್ರಿಯಗೊಳಿಸಲು, ನಾವು ಇ-ಸ್ಪೋರ್ಟ್ಸ್ ಸೇರಿದಂತೆ ಡಿಜಿಟಲ್ ವೇದಿಕೆಗಳನ್ನು ಅಳವಡಿಸಿಕೊಳ್ಳಬೇಕು" ಎಂದು ಅವರು ಹೇಳಿದರು.

ಖೋ-ಖೋ ಫೆಡರೇಶನ್ ನ ಅಧ್ಯಕ್ಷ ಸುಧಾಂಶು ಮಿತ್ತಲ್, ಖೋ-ಖೋ ಆಟವನ್ನು ಈಗ 55 ದೇಶಗಳಲ್ಲಿ ಆಡಲಾಗುತ್ತಿದ್ದು, ವರ್ಷದ ಅಂತ್ಯದ ವೇಳೆಗೆ 90 ಕ್ಕೂ ಹೆಚ್ಚು ದೇಶಗಳನ್ನು ತಲುಪುವ ಗುರಿ ಇದೆ ಎಂದು ಹೇಳಿದರು. "ನಮ್ಮ ದೇಶೀಯ ಕ್ರೀಡೆಗಳು ವಿಶಿಷ್ಟವಾಗಿವೆ - ಅವುಗಳಿಗೆ ಹೆಚ್ಚಿನ ತಂತ್ರ, ಶಕ್ತಿ ಮತ್ತು ಉತ್ಸಾಹ ಬೇಕು. ಈ ಕ್ರೀಡೆಗಳು ಜಗತ್ತನ್ನು ಆಕರ್ಷಿಸುವ ಅಪಾರ ಸಾಮರ್ಥ್ಯವನ್ನು ಹೊಂದಿವೆ. ಆದರೆ ಅವುಗಳಿಗೆ ಸರ್ಕಾರದ ಬೆಂಬಲ, ಬ್ರ್ಯಾಂಡಿಂಗ್ ಮತ್ತು ರಾಜತಾಂತ್ರಿಕ ಬೆಂಬಲ ಬೇಕು" ಎಂದು ಅವರು ಪ್ರತಿಪಾದಿಸಿದರು.
ಫ್ಯಾನ್ ಕೋಡ್ ಸಂಸ್ಥಾಪಕ ಯಾನಿಕ್ ಕೊಲಾಕೊ ತಂತ್ರಜ್ಞಾನವನ್ನು ಗೇಮ್-ಚೇಂಜರ್ ಎಂದು ಕರೆದರು. "ಪ್ರವೇಶ ಮತ್ತು ಭಾಗವಹಿಸುವಿಕೆ ಪ್ರಮುಖವಾಗಿದೆ. ಸರಿಯಾದ ತಂತ್ರಜ್ಞಾನದೊಂದಿಗೆ, ನಾವು ಅಭಿಮಾನಿಗಳೊಂದಿಗೆ ಸಂಪರ್ಕ ಸಾಧಿಸಬಹುದು ಮತ್ತು ಭಾರತೀಯ ಕ್ರೀಡೆಗಳನ್ನು ಜಾಗತಿಕ ವೇದಿಕೆಗೆ ಕೊಂಡೊಯ್ಯಬಹುದು" ಎಂದು ಅವರು ಹೇಳಿದರು.

ಈ ಗೋಷ್ಠಿಯನ್ನು ಮಂತ್ರ ಮುಗ್ಧ್ ನಿರ್ವಹಿಸಿದರು, ಅವರು ವೈವಿಧ್ಯಮಯ ಮಾಹಿತಿ ಮತ್ತು ಒಳನೋಟವುಳ್ಳ ತಂತ್ರಗಳನ್ನು ಸಂಯೋಜಿಸುವ ಮೂಲಕ ಚರ್ಚೆಯನ್ನು ಕೌಶಲ್ಯದಿಂದ ಮುನ್ನಡೆಸಿದರು.

*****