کل ممبئی میں منعقدہ ویوز کے ایک پرجوش اور بصیرت افروز پینل تبادلہء خیال میں، مقامی کھیلوں کی بھرپور وراثت پر روشنی ڈالی گئی اور ان کے ہندوستان کے دل سے عالمگیر میدانوں تک کے سفر کو اجاگر کیا گیا۔ ’’دیسی کھیل: ہندوستان سے عالمی اسٹیج تک‘‘ کے عنوان سے منعقدہ اس سیشن میں بااثر پالیسی سازوں، مشہور کھلاڑیوں، کھیلوں کے کاروباری افراد، اور نظریاتی رہنماؤں نے ایک مشترکہ وژن کے تحت شرکت کی: ہندوستان کے مقامی کھیلوں کو بین الاقوامی شناخت اور کامیابی تک پہنچانا۔

کلیدی خطاب کرتے ہوئے، اڈیشہ کے وزیر اعلیٰ جناب موہن چرن ماجھی نے ہندوستان میں مقامی کھیلوں کی گہری ثقافتی جڑوں پر پرجوش انداز میں روشنی ڈالی۔ انہوں نے کہا، ’’یہ کھیل صرف جسمانی مقابلے نہیں ہیں؛ یہ ہماری برادریوں، ہماری روایات، اور ہماری شناخت کا لازمی حصہ ہیں۔‘‘ انہوں نے ہندوستان کو عالمی کھیلوں کی طاقت بنانے کے لیے وزیر اعظم جناب نریندر مودی کی بصیرت افروز قیادت پر شکریہ ادا کیا۔ جناب ماجھی نے مزید کہا کہ اڈیشہ، جو متحرک قبائلی برادریوں کا گھر ہے، نے ان قدیم کھیلوں کو محفوظ رکھا ہے اور ایک کھیلوں کے مرکز کے طور پر ابھر رہا ہے۔ انہوں نے کہا، ’’ہم دیہی صلاحیتوں کی پرورش اور ہر باصلاحیت کھلاڑی کے لیے ایک پلیٹ فارم فراہم کرنے کے لیے پرعزم ہیں۔‘‘

 نوجوانوں کے امور اور کھیلوں کی وزیر مملکت ، محترمہ رکشا نِکھل کھڈسے نے وزیر اعظم جناب نریندر مودی اور ویوز پلیٹ فارم کا اس اہم تحریک کے گرد بامعنی مکالمے کو فروغ دینے پر دل سے شکریہ ادا کیا۔ انہوں نے کہا، ’’ہندوستان پہلے ہی یوگا کے عالمی سفیر کے طور پر ابھر چکا ہے۔ اب ہم اپنے روایتی کھیلوں جیسے کھو-کھو اور کبڈی کو بین الاقوامی اسٹیج پر فخر کے ساتھ پیش کر رہے ہیں۔ کھیلو انڈیا اقدام بنیادی سطح پر صلاحیتوں کی پرورش اور ہندوستانی کھیلوں کے مستقبل کو تشکیل دینے میں ایک تبدیلی لانے والی قوت ثابت ہو رہا ہے۔‘‘ انہوں نے مزید زور دیا کہ کھیل نہ صرف جسمانی صحت کو فروغ دیتے ہیں بلکہ رشتوں کو مضبوط کرتے ہیں اور اتحاد کو فروغ دیتے ہیں—جو ہندوستان کی بھرپور ثقافتی وراثت کی عکاسی کرتا ہے۔

پرو کبڈی لیگ کے لیگ کمشنر انوپم گوسوامی نے ہندوستان کی کھیلوں کے بازار کے طور پر وسیع صلاحیت پر زور دیا۔ انہوں نے کہا، ’’ہمیں اس موقع کو مقامی کھیلوں کو فروغ دے کر استعمال کرنا چاہیے، جو بے پناہ جذباتی اور ثقافتی قدر رکھتے ہیں۔‘‘

ایران سے تعلق رکھنے والے مشہور پی کے ایل کھلاڑی فاضل اتراچالی نے بتایا کہ کبڈی نے کس طرح زندگیوں کو بدل دیا ہے۔ انہوں نے کہا، ’’پرو کبڈی لیگ کی بدولت، کبڈی ایک پیشہ ورانہ کھیل بن چکا ہے، جس نے کھلاڑیوں کو شہرت اور مالی تحفظ فراہم کیا ہے۔‘‘

انگلش کرکٹ بورڈ کے ریگولیٹری چیئرپرسن نِک کاؤرڈ نے عالمگیریت اور جدید تقسیم کے چینلز کی اہمیت پر زور دیا۔ انہوں نے کہا، ’’روایتی کھیلوں کو دنیا بھر میں مقبول کرنے کے لیے ہمیں ڈیجیٹل پلیٹ فارمز، بشمول ای-اسپورٹس، کو اپنانا ہوگا۔‘‘

کھو-کھو فیڈریشن کے صدر سدھانشو مِتّل نے انکشاف کیا کہ کھو-کھو اب 55 ممالک میں کھیلا جا رہا ہے، اور سال کے آخر تک 90 سے زائد ممالک تک پہنچنے کا ہدف ہے۔ انہوں نے کہا، ’’ہمارے مقامی کھیل منفرد ہیں—جن میں زیادہ حکمت عملی، صبر، اور جذبے کی ضرورت ہوتی ہے۔ ان کی عالمی اپیل بے پناہ ہے۔ لیکن انہیں حکومتی حمایت، برانڈنگ، اور سفارتی تعاون کی ضرورت ہے۔‘‘

فین کوڈ کے بانی یانیک کولاکو نے ٹیکنالوجی کو گیم چینجر قرار دیا۔ انہوں نے کہا، ’’رسائی اور مصروفیت کلیدی ہیں۔ صحیح ٹیکنالوجی کے ساتھ، ہم مداحوں کے ساتھ گہرا تعلق بنا سکتے ہیں اور ہندوستانی کھیلوں کو عالمی سطح پر لے جا سکتے ہیں۔‘‘

سیشن کی میزبانی منترا مگدھ نے کی، جنہوں نے تبادلہء خیال کو مہارت سے چلایا، متنوع بصیرتوں اور مستقبل کے لیے حکمت عملیوں کو خوبصورتی سے یکجا کیا۔

***

ش ح ۔   م  د ۔  م  ص

(U : 557)