ಭಾರತದ ಎವಿಜಿಸಿ-ಎಕ್ಸ್ ಆರ್ ಪರಿಸರ ವ್ಯವಸ್ಥೆಯನ್ನು ಸಬಲೀಕರಣಗೊಳಿಸುವತ್ತ ಪ್ರಮುಖ ಹೆಜ್ಜೆ ಇಟ್ಟಿರುವ ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು ಎಫ್ ಐ ಸಿ ಸಿ ಐ ಮತ್ತು ಸಿಐಐ ಸಹಯೋಗದೊಂದಿಗೆ, ಎವಿಜಿಸಿ-ಎಕ್ಸ್ ಆರ್ ವಲಯಕ್ಕೆ ಪ್ರತ್ಯೇಕವಾಗಿ ಮೀಸಲಾಗಿರುವ ರಾಷ್ಟ್ರೀಯ ಶ್ರೇಷ್ಠತಾ ಕೇಂದ್ರವಾದ ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಕ್ರಿಯೇಟಿವ್ ಟೆಕ್ನಾಲಜಿ (ಐಐಸಿಟಿ) ಅನ್ನು ಅನಾವರಣಗೊಳಿಸಿದೆ. 

ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದ ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಅಶ್ವಿನಿ ವೈಷ್ಣವ್ ಅವರು ಈ ಕಾರ್ಯತಂತ್ರದ ಸಹಯೋಗಕ್ಕೆ ಔಪಚಾರಿಕವಾಗಿ ಹಸಿರು ನಿಶಾನೆ ತೋರಿಸಿದರು. ಮಾಧ್ಯಮ ಮತ್ತು ಮನರಂಜನಾ ವಲಯದಲ್ಲಿ ಭಾರತ ಜಾಗತಿಕ ನಾಯಕನಾಗುವ ಸಾಮರ್ಥ್ಯವನ್ನು ಅವರು ಒತ್ತಿ ಹೇಳಿದರು ಮತ್ತು ತಂತ್ರಜ್ಞಾನ ಮತ್ತು ನಿರ್ವಹಣಾ ಶಿಕ್ಷಣದಲ್ಲಿ ಐಐಟಿಗಳು ಮತ್ತು ಐಐಎಂಗಳು ಮಾನದಂಡಗಳಾಗಿ ಮಾರ್ಪಟ್ಟಿರುವಂತೆಯೇ ಐಐಸಿಟಿ ಈ ಕ್ಷೇತ್ರದಲ್ಲಿ ಪ್ರಮುಖ ಸಂಸ್ಥೆಯಾಗುವ ಹಾದಿಯಲ್ಲಿದೆ ಎಂದು ಹೇಳಿದರು.

ವೇವ್ಸ್ 2025ರ ಉದ್ಘಾಟನಾ ಸಮಾರಂಭದಲ್ಲಿ ಮಾಡಿದ ಘೋಷಣೆಯನ್ನು ಇಂದು ಮುಂಬೈನಲ್ಲಿ ನಡೆಯುತ್ತಿರುವ ವೇವ್ಸ್ ಶೃಂಗಸಭೆಯಲ್ಲಿ ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಅಶ್ವಿನಿ ವೈಷ್ಣವ್ ಅವರು ಔಪಚಾರಿಕಗೊಳಿಸಿದರು. ಎವಿಜಿಸಿ-ಎಕ್ಸ್ ಆರ್ ವಲಯದಲ್ಲಿ ವೃತ್ತಿಪರರಾಗಲು ಬಯಸುವ ವಿದ್ಯಾರ್ಥಿಗಳಿಗೆ ಪ್ರಮುಖ ವಿಶ್ವ ದರ್ಜೆಯ ಶಿಕ್ಷಣ ಮತ್ತು ತರಬೇತಿ ಕೇಂದ್ರವಾಗಿ ತನ್ನನ್ನು ತಾನು ಸ್ಥಾಪಿಸಿಕೊಳ್ಳಲು, ಐಐಟಿಗಳು ಮತ್ತು ಐಐಎಂಗಳ ಮಾದರಿಯನ್ನು ಐಐಸಿಟಿ ಅನುಸರಿಸುತ್ತದೆ ಎಂದು ಕೇಂದ್ರ ಸಚಿವರು ಹೇಳಿದರು. 

"ನಾವು ಚಲನಚಿತ್ರ ಮತ್ತು ಮನರಂಜನಾ ಜಗತ್ತಿನಲ್ಲಿ ಸಂಪೂರ್ಣವಾಗಿ ಹೊಸ ಉಪಕ್ರಮವನ್ನು ಪ್ರಾರಂಭಿಸಿದ್ದೇವೆ. ಈ ಉಪಕ್ರಮವು ಭಾರತವು ಮಾಧ್ಯಮ ಮತ್ತು ಮನರಂಜನಾ ವಲಯದಲ್ಲಿ ಜಾಗತಿಕ ನಾಯಕನಾಗುವ ಪ್ರಧಾನ ಮಂತ್ರಿಯವರ ದೃಷ್ಟಿಕೋನವನ್ನು ಅನುಸರಿಸುತ್ತದೆ" ಎಂದು ವೈಷ್ಣವ್ ಹೇಳಿದರು. ಪಠ್ಯಕ್ರಮ ಅಭಿವೃದ್ಧಿ, ಇಂಟರ್ನ್ಶಿಪ್, ವಿದ್ಯಾರ್ಥಿವೇತನಗಳು, ನವೋದ್ಯಮಗಳಿಗೆ ಹಣಕಾಸು ಮತ್ತು ಉದ್ಯೋಗ ನಿಯೋಜನೆಗೆ ಸಹಾಯ ಮಾಡಲು ಪ್ರಮುಖ ಜಾಗತಿಕ ಕಂಪನಿಗಳು ಐಐಸಿಟಿಯೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳಲು ಒಪ್ಪಿಕೊಂಡಿವೆ ಎಂದು ಅವರು ಘೋಷಿಸಿದರು. ಸಹಕರಿಸಲು ಇಚ್ಛಿಸಿದ ಉದ್ಯಮ ಪಾಲುದಾರರಿಗೆ ಅವರು ತಮ್ಮ ಪ್ರಾಮಾಣಿಕ ಕೃತಜ್ಞತೆಯನ್ನು ವ್ಯಕ್ತಪಡಿಸಿದರು.

"ಈ ಉಪಕ್ರಮಕ್ಕಾಗಿ ನಮ್ಮೊಂದಿಗೆ ಪಾಲುದಾರಿಕೆ ಮಾಡಿಕೊಳ್ಳಲು ಇಚ್ಛೆ ವ್ಯಕ್ತಪಡಿಸಿದ್ದಕ್ಕಾಗಿ ಎಲ್ಲಾ ಉದ್ಯಮ ಪಾಲುದಾರರು ಮತ್ತು ಅವರ ಉನ್ನತ ಆಡಳಿತಕ್ಕೆ ನಾನು ಧನ್ಯವಾದ ಹೇಳುತ್ತೇನೆ. ಅವರು ಈ ಸಂಸ್ಥೆಯನ್ನು ನಿರ್ಮಿಸಲು ಮತ್ತು ಅದರ ದೀರ್ಘಕಾಲೀನ ಬೆಳವಣಿಗೆಯನ್ನು ಉಳಿಸಿಕೊಳ್ಳಲು ನಮಗೆ ಸಹಾಯ ಮಾಡುತ್ತಾರೆ. ಐಐಸಿಟಿ, ಎವಿಜಿಸಿ-ಎಕ್ಸ್ಆರ್ ವಲಯಕ್ಕೆ ಪ್ರಮುಖ ಶೈಕ್ಷಣಿಕ ಮೂಲಸೌಕರ್ಯವಾಗಲಿದೆ ಎಂದು ನಾನು ಭಾವಿಸುತ್ತೇನೆ. ನಮ್ಮ ದೇಶದಲ್ಲಿ ಐಐಟಿಗಳು ಮತ್ತು ಐಐಎಂಗಳಿಗೆ ನಿಗದಿಪಡಿಸಿದ ಮಾನದಂಡಗಳ ಮಾದರಿಯನ್ನೇ ನಾವು ಅನುಸರಿಸುತ್ತೇವೆ, ಅದನ್ನು ವಿಶ್ವ ದರ್ಜೆಯ ಸಂಸ್ಥೆಯಾಗಿಸುತ್ತೇವೆ" ಎಂದು ವೈಷ್ಣವ್ ಹೇಳಿದರು.

ದೀರ್ಘಾವಧಿಯ ಸಹಯೋಗಕ್ಕಾಗಿ ಸಹಾಯ ಹಸ್ತ ಚಾಚಿದ ಕೆಲವು ಕಂಪನಿಗಳಲ್ಲಿ ಜಿಯೋ ಸ್ಟಾರ್, ಅಡೋಬ್, ಗೂಗಲ್ ಮತ್ತು ಯೂಟ್ಯೂಬ್, ಮೆಟಾ, ವಾಕಾಮ್, ಮೈಕ್ರೋಸಾಫ್ಟ್ ಮತ್ತು ಎನ್ವಿಡಿಯಾ ಸೇರಿವೆ.

ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಉದ್ಯಮಿಗಳಲ್ಲಿ ರಿಚರ್ಡ್ ಕೆರಿಸ್ (ಉಪಾಧ್ಯಕ್ಷ ಮತ್ತು ಜನರಲ್ ಮ್ಯಾನೇಜರ್ ಮಾಧ್ಯಮ ಮತ್ತು ಮನರಂಜನೆ, ಎನ್ವಿಡಿಯಾ), ಸಂಜೋಗ್ ಗುಪ್ತಾ (ಸಿಇಒ, ಸ್ಪೋರ್ಟ್ಸ್ &  ಲೈವ್ ಎಕ್ಸ್ಪೀರಿಯೆನ್ಸ್, ಜಿಯೋ ಸ್ಟಾರ್), ಮಾಲಾ ಶರ್ಮಾ (ಉಪಾಧ್ಯಕ್ಷರು ಮತ್ತು ಜನರಲ್ ಮ್ಯಾನೇಜರ್ - ಶಿಕ್ಷಣ, ಅಡೋಬ್), ಪ್ರೀತಿ ಲೋಬಾನಾ (ದೇಶದ ಮುಖ್ಯಸ್ಥೆ ಮತ್ತು ಉಪಾಧ್ಯಕ್ಷೆ, ಗೂಗಲ್ ಇಂಡಿಯಾ), ರಾಜೀವ್ ಮಲಿಕ್ (ಹಿರಿಯ ನಿರ್ದೇಶಕಿ, ವಾಕೊಮ್), ಸಂದೀಪ್ ಬಂಡಿಬೇಕರ್ (ಮಾರಾಟ ಮುಖ್ಯಸ್ಥರು, ರಾಜ್ಯ ಸರ್ಕಾರ ಮತ್ತು ಆರೋಗ್ಯ ರಕ್ಷಣೆ), ಸಂದೀಪ್ ಬಂಡಿವಾಡೇಕರ್ (ನಿರ್ದೇಶಕರು, ಮುಖ್ಯವಾಹಿನಿಯ ಸೇವೆಗಳ ಪಾಲುದಾರರು, ಮೈಕ್ರೋಸಾಫ್ಟ್) ಮತ್ತು ಸುನಿಲ್ ಅಬ್ರಹಾಂ (ನಿರ್ದೇಶಕರು, ಸಾರ್ವಜನಿಕ ನೀತಿ, ಮೆಟಾ) ಸೇರಿದ್ದಾರೆ.

ಐಐಸಿಟಿ ನಿರ್ದೇಶಕರ ಮಂಡಳಿ ಮತ್ತು ಆಡಳಿತ ಮಂಡಳಿ ಸದಸ್ಯರಾದ ಆಶಿಶ್ ಕುಲಕರ್ಣಿ, ಬಿರೇನ್ ಘೋಷ್, ಮನ್ವೇಂದ್ರ ಶುಕುಲ್, ಮುಂಜಾಲ್ ಶ್ರಾಫ್, ಚೈತನ್ಯ ಚಿಂಚ್ಲಿಕರ್ ಮತ್ತು ಸುಭಾಷ್ ಸಪ್ರು ಇಂದು ಉಪಸ್ಥಿತರಿದ್ದರು. ಐಐಸಿಟಿಯ ಕಾರ್ಯಕಾರಿ ಸಮಿತಿಯಲ್ಲಿ ಐಐಸಿಟಿ ಸಿಇಒ ಡಾ. ವಿಶ್ವಾಸ್ ದೇವಸ್ಕರ್, ಐಐಸಿಟಿ ಸಿಇಒ ನಿನಾದ್ ರಾಯ್ಕರ್ ಮತ್ತು ಐಐಸಿಟಿ ಮಾರುಕಟ್ಟೆ ಮುಖ್ಯಸ್ಥೆ ಶ್ವೇತಾ ವರ್ಮಾ ಇದ್ದಾರೆ.

ಈ ಅಧಿವೇಶನದಲ್ಲಿ, ಐಐಸಿಟಿ ಮತ್ತು ಪ್ರಮುಖ ಉದ್ಯಮ ಪಾಲುದಾರರ ಪ್ರತಿನಿಧಿಗಳು ಒಟ್ಟಿಗೆ ಸೇರಿ ಉದ್ದೇಶ ಪತ್ರಗಳನ್ನು ವಿನಿಮಯ ಮಾಡಿಕೊಂಡರು, ಇದು ಭಾರತದಲ್ಲಿ ಎವಿಜಿಸಿ-ಎಕ್ಸ್ಆರ್ ಪರಿಸರ ವ್ಯವಸ್ಥೆಯನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿರುವ ದೀರ್ಘಕಾಲೀನ ಸಹಯೋಗದ ಪ್ರಯತ್ನಗಳ ಆರಂಭವಾಗಿದೆ. ಸಹಿ ಮಾಡಿದವರಲ್ಲಿ ಜಿಯೋಸ್ಟಾರ್, ಅಡೋಬ್, ಗೂಗಲ್, ಯೂಟ್ಯೂಬ್ ಮತ್ತು ಮೆಟಾದಂತಹ ಪ್ರಮುಖ ಜಾಗತಿಕ ಉದ್ಯಮ ಕಂಪನಿಗಳು ಸೇರಿವೆ.

ಅನಿಮೇಷನ್, ದೃಶ್ಯ ಪರಿಣಾಮಗಳು, ಗೇಮಿಂಗ್, ಕಾಮಿಕ್ಸ್, ಚಲನಚಿತ್ರ ಮತ್ತು ವರ್ಧಿತ ರಿಯಾಲಿಟಿಯಲ್ಲಿ ಶಿಕ್ಷಣ, ಸಂಶೋಧನೆ ಮತ್ತು ಅಭಿವೃದ್ಧಿ ಮತ್ತು ನಾವೀನ್ಯತೆಯನ್ನು ಉತ್ತೇಜಿಸಲು ಈ ಸಹಯೋಗವನ್ನು ವಿನ್ಯಾಸಗೊಳಿಸಲಾಗಿದೆ. ಭವಿಷ್ಯದ ಬೆಳವಣಿಗೆಗಾಗಿ ಸುಸ್ಥಿರ ಪರಿಸರ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಮೂಲಕ ಸೃಜನಶೀಲ ಮತ್ತು ಡಿಜಿಟಲ್ ಮಾಧ್ಯಮ ವಲಯದಲ್ಲಿ ಭಾರತದ ಯಶಸ್ವಿ ಐಟಿ ಮಾದರಿಯನ್ನು ಪುನರಾವರ್ತಿಸುವ ಗುರಿಯನ್ನು ಇದು ಹೊಂದಿದೆ.

ಕೇಂದ್ರ ವಾರ್ತಾ ಮತ್ತು ಪ್ರಸಾರ ಖಾತೆ ರಾಜ್ಯ ಸಚಿವರಾದ ಡಾ. ಎಲ್. ಮುರುಗನ್; ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಸಂಜಯ್ ಜಾಜು; ವಾರ್ತಾ ಮತ್ತು ಪ್ರಸಾರ ಸಚಿವಾಲಯ ಕಾರ್ಯದರ್ಶಿ ಮತ್ತು ಭಾರತ ಸರ್ಕಾರದ ವಾರ್ತಾಶಾಖೆಯ ಪ್ರಧಾನ ಮಹಾನಿರ್ದೇಶಕ ಧೀರೇಂದ್ರ ಓಝಾ ಅವರು ಒಪ್ಪಂದಗಳ ವಿನಿಮಯದ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.

For official updates on realtime, please follow us: 

On X : 

https://x.com/WAVESummitIndia

https://x.com/MIB_India

https://x.com/PIB_India

https://x.com/PIBmumbai

On Instagram: 

https://www.instagram.com/wavesummitindia

https://www.instagram.com/mib_india

https://www.instagram.com/pibindia

*****