ہندوستانی سنیما نے ویوز 2025 میں مرکزی حیثیت حاصل کی جہاں ایک بصیرت افروز پینل تبادلہء خیال بعنوان ’’پرانی یادوں سے آگے: بحال شدہ کلاسیکس کا کاروبار‘‘ منعقد ہوا۔ مشہور فلم ٹریڈ تجزیہ کار ترن آدرش کی ماہرانہ میزبانی میں منعقدہ اس سیشن میں صنعت کے سرکردہ افراد نے شرکت کی تاکہ عصری سامعین کے لیے سنیمائی جواہرات کی بحالی کی اہمیت، چیلنجز اور مستقبل پر غور کیا جا سکے۔

گفتگو کا آغاز فلم نمائش اور تقسیم کے شعبے کی اہم آواز کمال گیان چندانی نے کیا، جنہوں نے کلاسیکس کو ڈیجیٹل پلیٹ فارمز پر قابل رسائی بنانے کی فوری ضرورت پر زور دیا۔ انہوں نے کہا، ’’ہماری بہت سی فلمیں عوامی یادداشت سے غائب ہو جاتی ہیں کیونکہ وہ آسانی سے دستیاب نہیں ہوتیں۔ سامعین ہمیں مسلسل بتاتے ہیں کہ وہ کلاسیکس کو دوبارہ دیکھنا چاہتے ہیں‘‘۔ انہوں نے مزید کہا کہ نئے مواد کی بھرمار کے باوجود، صنعت کو اپنے بنیادی کاموں کو محفوظ رکھنے کے لیے کام کرنا چاہیے۔

نمایاں سنیما کی میراث کی نمائندگی کرنے والے شہزاد سپی نے فلم سازی کے ارتقا اور پچھلی دہائیوں کے منفرد کہانی سنانے کے طریقوں پر اظہارِ خیال کیا۔ انہوں نے کہا، ’’اس وقت فلم سازی ایک مختلف فن تھی، اور آج کے سامعین اس دور کا تجربہ کرنے کے لیے متجسس ہیں۔ لیکن بحالی کے لیے پیسے، وقت اور ہنر مند وسائل کی نمایاں سرمایہ کاری کی ضرورت ہوتی ہے‘‘۔

فلم پروڈیوسر اور اداکار جیکی بھگنانی نے سامعین کے ترجیحات کی غیر متوقع نوعیت کو اجاگر کیا۔ انہوں نے کہا، ’’لوگوں کا وقت قیمتی ہے—وہ معیاری مواد چاہتے ہیں۔ جو چیز متاثر کرتی ہے وہ اکثر ذاتی، موسمی یا مزاج پر مبنی ہوتی ہے۔ لیکن دور سے قطع نظر، ہم ہمیشہ اپنا بہترین دینے کی کوشش کرتے ہیں۔‘‘

پالیسی اور ورثہ کے تناظر میں بات کرتے ہوئے، ایڈیشنل ڈائریکٹر جنرل، پی آئی بی اینڈ سی بی سی، احمدآباد، پرکاش مگدوم نے ہندوستان کی سنیمائی ورثہ کو محفوظ رکھنے کے لیے حکومتی کوششوں پر روشنی ڈالی۔ انہوں نے وضاحت کی، ’’ہندوستانی پرانی یادوں کے چاہنے والے ہیں۔ جہاں پرانی نسل اپنی جوانی کے جادو کو دوبارہ جینا چاہتی ہے، وہیں نئی نسل ان کلاسیکس کا تجربہ کرنے کے لیے بے تاب ہے جن کے بارے میں انہوں نے بہت کچھ سنا ہے۔ فلم کی بحالی ایک پیچیدہ عمل ہے جس میں متعدد فریقین شامل ہوتے ہیں، لیکن جدید ٹیکنالوجی کے ساتھ ہم اصل وژن کے ساتھ سچے رہنے کے قابل ہیں۔‘‘

انہوں نے مزید بتایا کہ نیشنل فلم ہیریٹج مشن، جو حکومت ہند کی قیادت میں ایک اقدام ہے، سنیمائی خزانوں کو محفوظ کرنے، ڈیجیٹل بنانے اور بحال کرنے کے لیے شروع کیا گیا ہے۔ انہوں نے کہا، ’’کلاسیک فلمیں محض تفریح نہیں ہیں—وہ ہماری اجتماعی ثقافتی شناخت اور ورثہ کی عکاسی کرتی ہیں۔ چیلنج بہت بڑا ہے، خاص طور پر درجہ حرارت اور نمی جیسے عوامل جو فلم ریلز کو متاثر کرتے ہیں، اور ڈیجیٹل ڈیٹا کے تحفظ کی بڑھتی ہوئی پیچیدگیوں کے ساتھ۔ پھر بھی، اس ذمہ داری کو فوری اور لگن کے ساتھ پورا کرنا ضروری ہے۔‘‘

اس پینل نے اس بات کی ایک طاقتور یاد دہانی کرائی کہ بحال شدہ کلاسیکس محض ماضی کے آثار نہیں ہیں، بلکہ ثقافت، جذبات اور ورثہ کے متحرک حامل ہیں۔ جیسے جیسے بحالی کا کاروبار زور پکڑتا جا رہا ہے، یہ واضح ہے کہ ٹیکنالوجی، جذبہ اور پالیسی کا امتزاج ہندوستان کے سنیمائی ورثہ کو آنے والی نسلوں کے لیے متاثر کن رکھنے کی کلید ہوگا۔

************

ش ح ۔   م  د ۔  م  ص

(U :540 )