ಮುಂಬೈನ ಜಿಯೋ ವರ್ಲ್ಡ್ ಕನ್ವೆನ್ಷನ್ ಸೆಂಟರ್‌ ನಲ್ಲಿ ನಡೆಯುತ್ತಿರುವ ಚೊಚ್ಚಲ ವೇವ್ಸ್ 2025 ಶೃಂಗಸಭೆಯ ಉದ್ಘಾಟನಾ ದಿನದಂದು ಭಾರತದ ರೋಮಾಂಚಕ ಎವಿಜಿಸಿ ವಲಯದ ಆಳವನ್ನು ಪರಿಶೀಲಿಸುವ ಒಳನೋಟವುಳ್ಳ ಗೋಷ್ಠಿಗಳು ನಡೆದವು.

"ಅನಿಮೆ ವಿಕಸನ: ಕಥೆ ಹೇಳುವಿಕೆ, ಅಭಿಮಾನಿ ಬಳಗ ಮತ್ತು ಉದ್ಯಮದ ಬೆಳವಣಿಗೆಯಲ್ಲಿ ಜಾಗತಿಕ ಸಾಮರ್ಥ್ಯವನ್ಜು ಅನ್‌ಲಾಕ್‌ಮಾಡುವುದು” ಎಂಬ ಶೀರ್ಷಿಕೆಯ ಗೋಷ್ಠಿಯಲ್ಲಿ, ಜಪಾನ್ ಮತ್ತು ಭಾರತೀಯ ಅನಿಮೇಷನ್ ಉದ್ಯಮಗಳ ಪ್ರಮುಖ ವ್ಯಕ್ತಿಗಳು ಭಾರತದ ಬೆಳೆಯುತ್ತಿರುವ ಸಾಮರ್ಥ್ಯದ ಮೇಲೆ ಪ್ರಮುಖ ಗಮನ ಹರಿಸಿ ಅನಿಮೆಯ ವಿಕಸನ, ಭಾವನಾತ್ಮಕ ಬೇರುಗಳು ಮತ್ತು ಜಾಗತಿಕ ಪಥದ ಕುರಿತು ಉನ್ನತ ಮಟ್ಟದ ಸಂವಾದಗಳನ್ನು ನಡೆಸಿದರು.

ಎಫ್‌ ಐ ಸಿ ಸಿ ಐ ಎವಿಜಿಸಿ-ಎಕ್ಸ್‌ ಆರ್‌ ಫೋರಂನ ಅಧ್ಯಕ್ಷರಾದ ಶ್ರೀ ಮುಂಜಾಲ್ ಶ್ರಾಫ್ ಅವರು ಈ ಗೋಷ್ಠಿಯನ್ನು ನಡೆಸಿಕೊಟ್ಟರು. ಈ ಗೋಷ್ಠಿಯು ವಿಶೇಷ ಪ್ಯಾನೆಲ್ ಸದಸ್ಯರನ್ನು ಒಳಗೊಂಡಿತ್ತು. ಅವರೆಂದರೆ: ನಾನ್‌ಟೆಟ್ರಾದ ನಿರ್ದೇಶಕ ಮತ್ತು ಸಿಇಒ ಶ್ರೀ ಮಕೊಟೊ ತೇಜ್ಕಾ; ಜಪಾನಿನ ದಿ ಅನಿಮೆ ಟೈಮ್ಸ್ ಕಂಪನಿಯ ಅಧ್ಯಕ್ಷ ಶ್ರೀ ಹಿದಿಯೊ ಕಟ್ಸುಮಾಟಾ; ಜಪಾನಿನ ಬ್ಲೂ ರೈಟ್ಸ್‌ ನ ಸಿಇಒ ಶ್ರೀ ಮಕೊಟೊ ಕಿಮುರಾ; ರೀ ಎಂಟರ್‌ಟೈನ್‌ಮೆಂಟ್ ಕಂಪನಿ ಲಿಮಿಟೆಡ್‌ ನ ಸಿಇಒ ಮತ್ತು ಅಧ್ಯಕ್ಷರ ಶ್ರೀ ಅಟ್ಸುವೊ ನಕಯಾಮಾ; ಮತ್ತು ಜಿಯೋಸ್ಟಾರ್‌ ನ ಕಿಡ್ಸ್ ಎಂಟರ್‌ಟೈನ್‌ಮೆಂಟ್ ಮತ್ತು ಇನ್ಫೋಟೈನ್‌ಮೆಂಟ್‌ ನ ವ್ಯವಹಾರ ಮುಖ್ಯಸ್ಥೆ ಶ್ರೀಮತಿ ಅನು ಸಿಕ್ಕಾ.

ಭಾರತೀಯ ಪ್ರೇಕ್ಷಕರು ಮತ್ತು ಭಾಷೆಗಳ ಮೇಲೆ ಹೆಚ್ಚುತ್ತಿರುವ ಗಮನದ ಕುರಿತು ಶ್ರೀ ಹಿದಿಯೊ ಕಟ್ಸುಮಾಟಾ ಮಾತನಾಡಿದರು. ಸಾಮಾಜಿಕ ತೊಡಗಿಸಿಕೊಳ್ಳುವಿಕೆ ಮತ್ತು ಸಾಂಸ್ಕೃತಿಕ ಏಕೀಕರಣದ ಮಹತ್ವವನ್ನು ಅವರು ಒತ್ತಿ ಹೇಳಿದರು, "ಸ್ಥಳೀಯ ಪ್ರೇಕ್ಷಕರೊಂದಿಗೆ ಸಂಪರ್ಕ ಸಾಧಿಸಲು ನಾವು ಜಪಾನೀಸ್ ಅನಿಮೇಷನ್ ಅನ್ನು ಭಾರತೀಯ ಸಂಪ್ರದಾಯಗಳೊಂದಿಗೆ ಮಿಳಿತಗೊಳಿಸುವ ಮಾರ್ಗಗಳನ್ನು ಅನ್ವೇಷಿಸುತ್ತಿದ್ದೇವೆ" ಎಂದು ಹೇಳಿದರು.

ಜಪಾನಿನಲ್ಲಿ ಅನಿಮೆಯ ಆರ್ಥಿಕ ಪ್ರಭಾವದ ಬಗ್ಗೆ ಶ್ರೀ ಅಟ್ಸುವೊ ನಕಯಾಮ ಅವರು ಅಮೂಲ್ಯವಾದ ಒಳನೋಟಗಳನ್ನು ನೀಡಿದರು ಮತ್ತು ಗ್ರಾಹಕರ ಪ್ರಮುಖ ಪಾತ್ರವನ್ನು ಗಮನಿಸಿದರು. ಜಪಾನಿನ ಅನಿಮೇಷನ್‌ ಗೆ ಭಾರತವು ಭರವಸೆಯ ಮಾರುಕಟ್ಟೆಯಾಗಲಿದೆ ಎಂಬ ಆಶಾವಾದವನ್ನು ಅವರು ವ್ಯಕ್ತಪಡಿಸಿದರು ಮತ್ತು ಎರಡೂ ರಾಷ್ಟ್ರಗಳ ನಡುವಿನ ಸಾಂಸ್ಕೃತಿಕ ಮತ್ತು ವಾಣಿಜ್ಯ ಸಂಬಂಧಗಳನ್ನು ಬೆಸೆಯುವಲ್ಲಿ ಮನರಂಜನಾ ವ್ಯವಹಾರದ ಸಾಮರ್ಥ್ಯವನ್ನು  ಒತ್ತಿ ಹೇಳಿದರು.

ವಿವರವಾದ ಪ್ರಸ್ತುತಿಯಲ್ಲಿ, ಶ್ರೀ ಮಕೋಟೊ ತೇಜ್ಕಾ ಅವರು ಅನಿಮೆಯ ಮೂಲದ ಬಗ್ಗೆ ಮಾತನಾಡಿದರು, ಜಪಾನೀಸ್ ಅನಿಮೇಷನ್‌ ನ ಬೇರುಗಳು ಮಂಗಾ ಸಂಸ್ಕೃತಿಯಲ್ಲಿ ಆಳವಾಗಿ ಹುದುಗಿವೆ ಎಂದು ಒತ್ತಿ ಹೇಳಿದರು.

ಯುವ ಪ್ರೇಕ್ಷಕರು ಏನು ಇಷ್ಟಪಡುತ್ತಾರೆ ಎಂಬುದನ್ನು ಚೆನ್ನಾಗಿ ಅರ್ಥಮಾಡಿಕೊಳ್ಳಲು ಭಾರತದಲ್ಲಿ ಕೈಗೊಂಡ ವ್ಯಾಪಕ ಸಂಶೋಧನೆಯನ್ನು ಶ್ರೀಮತಿ ಅನು ಸಿಕ್ಕಾ ಎತ್ತಿ ತೋರಿಸಿದರು. "ಜಪಾನೀಸ್ ವಿಷಯದೊಂದಿಗೆ ಸಾಂಸ್ಕೃತಿಕ ಆಕರ್ಷಣೆ ಮತ್ತು ಭಾವನಾತ್ಮಕ ಸಂಪರ್ಕವು ಭಾರತೀಯ ಮಕ್ಕಳಲ್ಲಿ ಅನಿಮೆ ಜನಪ್ರಿಯತೆಯನ್ನು ಹೆಚ್ಚಿಸಲು ಕಾರಣವಾಗಿದೆ" ಎಂದು ಅವರು ಹೇಳಿದರು, ವೀಕ್ಷಕರ ಪ್ರವೃತ್ತಿಗಳ ವರ್ತನೆಯ ವಿಶ್ಲೇಷಣೆಯು ಪ್ರೋಗ್ರಾಮಿಂಗ್ ನಿರ್ಧಾರಗಳನ್ನು ಗಮನಾರ್ಹವಾಗಿ ಸಹಾಯ ಮಾಡಿದೆ ಎಂದು ಅವರು ಹೇಳಿದರು.

ಶ್ರೀ ಮಕೋಟೊ ಕಿಮುರಾ ಅವರು ಅನಿಮೆಯ ಬೆಳೆಯುತ್ತಿರುವ ಜಾಗತಿಕ ಹೆಜ್ಜೆಗುರುತು ಮತ್ತು ದೇಶಾದ್ಯಂತ ಗೋಚರಿಸುತ್ತಿರುವ ಪ್ರಭಾವದ ಬಗ್ಗೆ ಒತ್ತಿ ಹೇಳಿದರು.

ಯೊಲೊಗ್ರಾಮ್ ಸ್ಟೈಲ್‌ ನ ಸಿಇಒ ಆದಿತ್ಯ ಮಣಿ ಅವರು ನಡೆಸಿಕೊಟ್ಟ ʼದಿ ನ್ಯೂ ಆರ್ಕೇಡ್: ವೆಂಚರ್ ಕ್ಯಾಪಿಟಲಿಸ್ಟ್ ಪರ್ಸ್ಪೆಕ್ಟಿವ್ ಆನ್ ಗೇಮಿಂಗ್ಸ್ ನ್ಯೂ ಫ್ರಾಂಟಿಯರ್ʼ ಎಂಬ ಶೀರ್ಷಿಕೆಯ ಒಳನೋಟವುಳ್ಳ ಗೋಷ್ಠಿಯು ಭಾರತದ ಗೇಮಿಂಗ್ ವಲಯದಲ್ಲಿನ ಅತ್ಯಾಕರ್ಷಕ ಅವಕಾಶಗಳು ಮತ್ತು ನಾವೀನ್ಯತೆಗಳ ಬಗ್ಗೆ ಆಳವಾದ ನೋಟವನ್ನು ನೀಡಿತು. ಈ ಗೋಷ್ಠಿಯಲ್ಲಿ ಗೇಮಿಂಗ್ ಉದ್ಯಮದಲ್ಲಿನ ಪ್ರಮುಖ ಪ್ರವೃತ್ತಿಗಳು, ಸವಾಲುಗಳು ಮತ್ತು ಅವಕಾಶಗಳನ್ನು ಚರ್ಚಿಸಿದ ವೆಂಚರ್ ಕ್ಯಾಪಿಟಲಿಸ್ಟ್‌ ಗಳ (ವಿಸಿ) ವಿಶೇಷ ಪ್ಯಾನೆಲ್ ಇತ್ತು. ಬಿಟ್‌ಕ್ರಾಫ್ಟ್ ವೆಂಚರ್‌‌ ನ ಪಾಲುದಾರ ಅನುಜ್ ಟಂಡನ್, ಜೆಟಾಪಲ್ಟ್ ಸಂಸ್ಥಾಪಕ ಶರಣ್ ತುಳಸಿಯಾನಿ, ಇನ್ಫ್ಲೆಕ್ಷನ್ ಪಾಯಿಂಟ್ ವೆಂಚರ್ಸ್‌ ನ ಸ್ಥಾಪಕ ಮತ್ತು ಸಿಇಒ ವಿನಯ್ ಬನ್ಸಾಲ್, ಕ್ರಾಫ್ಟನ್ ಇಂಡಿಯಾದ ಕಾರ್ಪೊರೇಟ್ ಡೆವಲಪ್‌ಮೆಂಟ್ ಲೀಡ್ ನಿಹಾನ್ಶ್ ಭಟ್ ಮತ್ತು ಜಿ ಎಫ್‌ ಆರ್ ಫಂಡ್‌ ನ ಪ್ರಾಂಶುಪಾಲ ಜೆರೆಮಿ ಲಿಮ್ ಈ ಪ್ಯಾನೆಲ್‌ ನಲ್ಲಿ ಇದ್ದರು.‌

ಕಥೆಗಾರರ ​​ದೇಶವಾಗಿ ಭಾರತದ ವಿಶಿಷ್ಟ ಸ್ಥಾನವನ್ನು ಪ್ಯಾನೆಲ್‌ ಒತ್ತಿಹೇಳಿತು. ಭಾರತದ ಶ್ರೀಮಂತ ಸಾಂಸ್ಕೃತಿಕ ನಿರೂಪಣಾ ಸಂಪ್ರದಾಯವು ಸಂವಾದಾತ್ಮಕ ಮಾಧ್ಯಮದಲ್ಲಿ ಹೆಚ್ಚಾಗಿ ಹೆಣೆಯಲ್ಪಡುತ್ತಿದೆ. ಗೇಮಿಂಗ್, ಚಲನಚಿತ್ರಗಳು ಮತ್ತು ಡಿಜಿಟಲ್ ಫ್ಯಾಷನ್‌ ನೊಂದಿಗೆ ಮಾತ್ರವಲ್ಲದೆ ಭಾರತೀಯ ಗೇಮಿಂಗ್ ಸ್ಟುಡಿಯೋಗಳು ಗಮನಾರ್ಹ ಕೊಡುಗೆದಾರರಾಗಿ ಹೊರಹೊಮ್ಮುತ್ತಿರುವ ಮುಖ್ಯವಾಹಿನಿಯ ಮಾಧ್ಯಮದೊಂದಿಗೆ ಮಿಳಿತವಾಗುತ್ತಿವೆ ಎಂದು ಅವರು ಹೇಳಿದರು.

ಬೇರೆಡೆ ಕೆಲಸ ಮಾಡದ ದಿಟ್ಟ ಮಾದರಿಗಳನ್ನು ಮುನ್ನಡೆಸುವ ವಿಶಿಷ್ಟ ಸಾಮರ್ಥ್ಯವನ್ನು ಭಾರತ ಹೊಂದಿದೆ ಎಂದು ಜೆರೆಮಿ ಲಿಮ್ ಹೇಳಿದರು.

ಉದಯೋನ್ಮುಖ ಮಾರುಕಟ್ಟೆಗಳಲ್ಲಿ ಯಶಸ್ಸನ್ನು ಸಾಧಿಸುವಲ್ಲಿ ಸ್ಥಳೀಕರಣದ ಪಾತ್ರವು ಈ ಗೋಷ್ಠಿಯ ಪ್ರಮುಖ ವಿಷಯವಾಗಿತ್ತು. ಜಾಗತಿಕ ಮಾದರಿಗಳು ಸ್ಫೂರ್ತಿಯಾಗಿ ಕಾರ್ಯನಿರ್ವಹಿಸುತ್ತವೆಯಾದರೂ, ಗೇಮಿಂಗ್ ಅನುಭವಗಳನ್ನು ಸ್ಥಳೀಯ ಒಳನೋಟಗಳು ಮತ್ತು ಗ್ರಾಹಕರ ನಡವಳಿಕೆಗಳಿಗೆ ಹೊಂದಿಕೊಳ್ಳುವ ಅಗತ್ಯವನ್ನು ಗೋಷ್ಠಿಯು ಒತ್ತಿಹೇಳಿತು.

2025 ರ ಕಡೆಗೆ ನೋಡುತ್ತಾ, ಕೃತಕ ಬುದ್ಧಿಮತ್ತೆಯ (ಎಐ) ಹೆಚ್ಚುತ್ತಿರುವ ಪ್ರಭಾವವನ್ನು ಎತ್ತಿ ತೋರಿಸಲಾಯಿತು. ಆಟದ ವೈಯಕ್ತೀಕರಣ, ಬಳಕೆದಾರರ ಸಂವಹನಗಳನ್ನು ಹೆಚ್ಚಿಸುವುದು ಮತ್ತು ತಲ್ಲೀನಗೊಳಿಸುವ ಕಥೆ ಹೇಳುವಿಕೆಯನ್ನು ಮುಂದುವರೆಸುವಲ್ಲಿ ಎಐ ಮಹತ್ವದ ಪಾತ್ರ ವಹಿಸಲು ಸಿದ್ಧವಾಗಿದೆ.

ಆಧುನಿಕ ಸಿನಿಮಾದಲ್ಲಿ ದೃಶ್ಯ ಪರಿಣಾಮಗಳ ಪ್ರಮುಖ ಪಾತ್ರ ಮತ್ತು ಕಥೆ ಹೇಳುವ ವಿಧಾನವನ್ನು ರೂಪಿಸುವಲ್ಲಿ ಅದರ ಭವಿಷ್ಯವನ್ನು ಅನ್ವೇಷಿಸಲು ವಿ ಎಫ್‌ ಎಕ್ಸ್ ಕುರಿತಾದ ಬ್ರೇಕ್‌‌ ಔಟ್ ಸೆಷನ್ ಒಂದು ಅನನ್ಯ ಅವಕಾಶವನ್ನು ಒದಗಿಸಿತು. ಫ್ರೇಮ್‌ಸ್ಟೋರ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕ ಶ್ರೀ ಅಖೌರಿ ಪಿ. ಸಿನ್ಹಾ ಗೋಷ್ಠಿಯನ್ನು ನಡೆಸಿಕೊಟ್ಟರು. ಈ ಗೋಷ್ಟಿಯಲ್ಲಿ ವಿಶೇಷ ಪ್ಯಾನಲಿಸ್ಟ್‌ ಗಳಾದ ಡಿ ಎನ್‌ ಇ ಜಿ ಯ ವಿ ಎಫ್‌ ಎಕ್ಸ್ ಸೂಪರ್‌ ವೈಸರ್ ಶ್ರೀ ಜಯಕರ್ ಆರುದ್ರ; ಸ್ವತಂತ್ರ ವಿ ಎಫ್‌ ಎಕ್ಸ್ ಸೂಪರ್‌ ವೈಸರ್ ಶ್ರೀ ಸಂದೀಪ್ ಕಮಲ್; ಮತ್ತು ಬಾಹುಬಲಿ ಮತ್ತು ಬಾಹುಬಲಿ 2.0 ನಲ್ಲಿ ತಮ್ಮ ಕೆಲಸಕ್ಕೆ ಮೆಚ್ಚುಗೆ ಪಡೆದ ಶ್ರೀ ಶ್ರೀನಿವಾಸ್ ಮೋಹನ್ ಭಾಗವಹಿಸಿದ್ದರು. ವಿ ಎಫ್‌ ಎಕ್ಸ್ ಸಿನಿಮೀಯ ನಿರೂಪಣೆಯಲ್ಲಿ ಹೇಗೆ ಕ್ರಾಂತಿಕಾರಕ ಬದಲಾವಣೆ ತರುತ್ತಿದೆ ಎಂಬುದರ ಕುರಿತು ಪ್ಯಾನಲಿಸ್ಟ್‌ ಗಳು ಒಳನೋಟಗಳನ್ನು ಒದಗಿಸಿದರು.

ವಿ ಎಫ್‌ ಎಕ್ಸ್‌ ನಿರ್ಮಾಣಗಳ ಸೃಜನಶೀಲ ಬೇಡಿಕೆಗಳನ್ನು ಪೂರೈಸುವಲ್ಲಿ ಸಂಶೋಧನೆ ಮತ್ತು ವಿನ್ಯಾಸದ ಮಹತ್ವವನ್ನು ಶ್ರೀ ಜಯಕರ್ ಆರುದ್ರ ಒತ್ತಿ ಹೇಳಿದರು. "ಇದು ಕೇವಲ ಪ್ರದರ್ಶನದ ಬಗ್ಗೆ ಅಲ್ಲ - ಇದು ಕಥೆಯ ಪ್ರಾಮಾಣಿಕತೆಯ ಬಗ್ಗೆ" ಎಂದು ಅವರು ಹೇಳಿದರು. "ಭಾರತವು ವಿ ಎಫ್‌ ಎಕ್ಸ್‌ ಉದ್ಯಮದಲ್ಲಿ ಸೂಪರ್ ಪವರ್ ಆಗಲು ಸಜ್ಜಾಗಿದೆ ಮತ್ತು ಈ ದೃಷ್ಟಿಕೋನವನ್ನು ಮುಂದಕ್ಕೆ ಕೊಂಡೊಯ್ಯಲು ವೇವ್ಸ್‌ ಒಂದು ಉತ್ತಮ ಉಪಕ್ರಮವಾಗಿದೆ" ಎಂದು ಅವರು ಹೇಳಿದರು.

"ತಂತ್ರಜ್ಞಾನವು ಬದಲಾವಣೆ ತರುವ ಸಾಧನವಾಗಿದೆ" ಎಂದು ಶ್ರೀ ಶ್ರೀನಿವಾಸ್ ಮೋಹನ್ ಹೇಳಿದರು. "ಬುದ್ಧಿವಂತಿಕೆಯಿಂದ ಅನ್ವಯಿಸಿದಾಗ, ಅದು ಮಿತಿಗಳನ್ನು ಮೀರಲು ಮತ್ತು ವಿಶ್ವ ದರ್ಜೆಯ ದೃಶ್ಯಗಳನ್ನು ಸೃಷ್ಟಿಸಲು ನಮಗೆ ಅನುವು ಮಾಡಿಕೊಡುತ್ತದೆ" ಎಂದು ಅವರು ಹೇಳಿದರು.

ಶ್ರೀ ಸಂದೀಪ್ ಕಮಲ್ ಅವರು ಉತ್ತಮ ಗುಣಮಟ್ಟದ ವಿ ಎಫ್‌ ಎಕ್ಸ್‌ ಪರಿಕರಗಳ ಹೆಚ್ಚುತ್ತಿರುವ ಲಭ್ಯತೆ ಮತ್ತು ಕೈಗೆಟುಕುವಿಕೆಯು ಇನ್ನು ಮುಂದೆ ಶ್ರೇಷ್ಠತೆಗೆ ಹೇಗೆ ಅಡ್ಡಿಯಾಗಿಲ್ಲ ಎಂಬುದರ ಕುರಿತು ಚರ್ಚಿಸಿದರು. "ಸ್ಪಷ್ಟ ದೃಷ್ಟಿಕೋನವು ಗುಣಮಟ್ಟ ಮತ್ತು ಗಡುವು ಎರಡನ್ನೂ ಸಾಧಿಸುವಲ್ಲಿ ನಮಗೆ ಸಹಾಯ ಮಾಡುತ್ತದೆ" ಎಂದು ಅವರು ಹೇಳಿದರು.

ಅನಿಮೆ, ವಿ ಎಫ್‌ ಎಕ್ಸ್‌ ಮತ್ತು ಗೇಮಿಂಗ್ ವಿಶ್ವಾದ್ಯಂತ ಪ್ರಬಲ ಸಾಂಸ್ಕೃತಿಕ ಮತ್ತು ವಾಣಿಜ್ಯ ಶಕ್ತಿಗಳಾಗಿ ವಿಕಸನಗೊಳ್ಳುತ್ತಿರುವುದರಿಂದ, ಗೋಷ್ಠಿಗಳು ಆಶಾವಾದ ಮತ್ತು ಸಹಯೋಗದ ಆಳವಾದ ಭಾವನೆಗಳನ್ನು ಒಳಗೊಂಡಿವೆ. ಈ ವಲಯಗಳು ಭಾರತದಲ್ಲಿ ಅಭೂತಪೂರ್ವ ಸಾಮರ್ಥ್ಯವನ್ನು ಹೊಂದಿವೆ. ವೇವ್ಸ್ ನ ಉತ್ಸಾಹಕ್ಕೆ ಅನುಗುಣವಾಗಿ, ಗೋಷ್ಠಿಗಳು ನಾವೀನ್ಯತೆ ಮತ್ತು ಕಥೆ ಹೇಳುವಿಕೆಯ ಆಚರಣೆಯಾಗಿದ್ದವು.

*****