ಮುಂಬೈನ ಜಿಯೋ ವರ್ಲ್ಡ್ ಸೆಂಟರ್ ನಲ್ಲಿ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು ವೇವ್ಸ್ 2025ರ ಉದ್ಘಾಟನಾ ಅಧಿವೇಶನವನ್ನು ಉದ್ಘಾಟಿಸಿದರು. ತಮ್ಮ ಮುಖ್ಯ ಭಾಷಣದಲ್ಲಿ, ಪ್ರಧಾನಮಂತ್ರಿ ಮೋದಿ ಭಾರತದ ಶ್ರೀಮಂತ ಕಥೆ ಹೇಳುವ ಪರಂಪರೆ ಮತ್ತು ಕಂಟೆಂಟ್‌ ಕ್ರಿಯೇಷನ್‌ ಗೆ ಜಾಗತಿಕ ಕೇಂದ್ರವಾಗುವ ಸಾಮರ್ಥ್ಯವನ್ನು ಒತ್ತಿ ಹೇಳಿದರು. 'ಆರೆಂಜ್ ಎಕಾನಮಿ' ಯ ಸ್ತಂಭಗಳಾಗಿ ವಿಷಯ, ಸೃಜನಶೀಲತೆ ಮತ್ತು ಸಂಸ್ಕೃತಿಯ ಸಂಗಮವನ್ನು ಅವರು ಎತ್ತಿ ತೋರಿಸಿದರು, ಜಾಗತಿಕ ಸೃಷ್ಟಿಕರ್ತರಿಗೆ "ಭಾರತದಲ್ಲಿ ರಚಿಸಿ, ಜಗತ್ತಿಗಾಗಿ ರಚಿಸಿ" (Create in India, Create for the World) ಎಂದು ಕರೆ ನೀಡಿದರು. ಭಾರತೀಯ ಸಿನೆಮಾ ದಿಗ್ಗಜರಿಗೆ ಗೌರವ ಸಲ್ಲಿಸುವ ಸಲುವಾಗಿ ಸ್ಮರಣಾರ್ಥ ಅಂಚೆ ಚೀಟಿಗಳನ್ನು ಸಹ ಬಿಡುಗಡೆ ಮಾಡಿದರು. ಭಾರತದ ವೈವಿಧ್ಯಮಯ ನಿರೂಪಣೆಗಳನ್ನು ಅನ್ವೇಷಿಸಲು ಜಾಗತಿಕ ಕ್ರಿಯೇಟರ್‌ ಗಳಿಗೆ ಕರೆ ನೀಡಿದ ಅವರು, ಭಾರತದ ಪ್ರತಿಯೊಂದು ಬೀದಿ, ಪರ್ವತ ಮತ್ತು ನದಿಯು ಹೇಳಲು ಕಾಯುತ್ತಿರುವ ಕಥೆಯನ್ನು ಹೊಂದಿದೆ ಎಂದು ಹೇಳಿದರು. 100 ಕ್ಕೂ ಹೆಚ್ಚು ದೇಶಗಳ ಗಣ್ಯರು, ಉದ್ಯಮದ ನಾಯಕರು ಮತ್ತು ಪ್ರಸಿದ್ಧ ಕಲಾವಿದರು ಈ ಅಧಿವೇಶನದಲ್ಲಿ ಭಾಗವಹಿಸಿದ್ದರು, ಇದು ಸೃಜನಶೀಲ ಮಹಾಶಕ್ತಿಯಾಗುವ ಭಾರತದ ಪಯಣದಲ್ಲಿ ಮಹತ್ವದ ಹೆಜ್ಜೆಯಾಗಿದೆ.

https://pib.gov.in/PressReleasePage.aspx?PRID=2125725

AI ಮತ್ತು ಸೃಜನಶೀಲತೆ: ಅಡೋಬ್ ಮತ್ತು NVIDIA ಭವಿಷ್ಯವನ್ನು ರೂಪಿಸುತ್ತಿವೆ

ಅಡೋಬ್ CEO ಶಂತನು ನಾರಾಯಣ್ ಅವರು ಡಿಜಿಟಲ್ ಪರಿಕರಗಳು ಮತ್ತು ಜನರೇಟಿವ್ AI ನಿಂದ ಬೆಂಬಲಿತವಾದ ಜಾಗತಿಕ ಸೃಜನಶೀಲತೆಯ ಕೇಂದ್ರವಾಗಿ ಭಾರತ ಹೊರಹೊಮ್ಮುತ್ತಿರುವುದನ್ನು ಎತ್ತಿ ತೋರಿಸಿದರು. 100 ದಶಲಕ್ಷಕ್ಕೂ ಹೆಚ್ಚು ಕಂಟೆಂಟ್‌ ಕ್ರಿಯೇಟರ್‌ಗಳು ಮತ್ತು 500 ದಶಲಕ್ಷ OTT ಗ್ರಾಹಕರನ್ನು ಹೊಂದಿರುವ ಭಾರತವನ್ನು ನಾರಾಯಣ್ ಅವರು "ಜಗತ್ತಿನ ಮುಂದಿನ ಸೃಜನಶೀಲ ಮಹಾಶಕ್ತಿ" ಎಂದು ಬಣ್ಣಿಸಿದರು. ಅವರು ಅಡೋಬಿಯ ಫೈರ್ಫ್ಲೈ AI ಮಾದರಿಗಳನ್ನು ಪ್ರದರ್ಶಿಸಿದರು ಮತ್ತು ಸುಸ್ಥಿರ ಬೆಳವಣಿಗೆಗೆ ನೈತಿಕ AI, ವಿಷಯದ ಸತ್ಯಾಸತ್ಯತೆ ಮತ್ತು ಸೃಷ್ಟಿಕರ್ತರ ಗುಣಲಕ್ಷಣಗಳು ನಿರ್ಣಾಯಕವೆಂದು ಒತ್ತಿ ಹೇಳಿದರು.   

https://pib.gov.in/PressReleasePage.aspx?PRID=2125947

ಕ್ರಿಯೇಟರ್ ಗಳ ಆರ್ಥಿಕತೆಗೆ ಉತ್ತೇಜನ ನೀಡಲು ಯೂಟ್ಯೂಬ್ನಿಂದ ಹೆಚ್ಚಿನ ಬೆಂಬಲ 

1 ಮಿಲಿಯನ್ಗಿಂತಲೂ ಹೆಚ್ಚು ಚಂದಾದಾರರನ್ನು ಹೊಂದಿರುವ 15,000 ಕ್ಕೂ ಹೆಚ್ಚು ಭಾರತೀಯ ವಾಹಿನಿಗಳನ್ನು ಉಲ್ಲೇಖಿಸಿದ ಯೂಟ್ಯೂಬ್ ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ನೀಲ್ ಮೋಹನ್ ಅವರು, ಭಾರತದ ಸೃಷ್ಟಿಕರ್ತರ ಆರ್ಥಿಕತೆಯನ್ನು ತ್ವರಿತಗೊಳಿಸಲು ₹850 ಕೋಟಿಗಳ ಹೂಡಿಕೆಯನ್ನು ಘೋಷಿಸಿದರು. ಜಾಗತಿಕ ಕ್ರಿಯೇಟರ್‌ ಗಳಾದ ಮಾರ್ಕ್ ರೋಬರ್ ಮತ್ತು ಗೌತಮಿ ಕವಾಲೆ (ಸ್ಲೇ ಪಾಯಿಂಟ್) ಅವರೊಂದಿಗೆ ಮಾತನಾಡಿದ ಮೋಹನ್ ಅವರು, ಭಾರತೀಯ ಕಥೆಗಳನ್ನು ಜಗತ್ತಿಗೆ ತಲುಪಿಸುವಲ್ಲಿ ಯೂಟ್ಯೂಬ್ ನ ಪಾತ್ರವನ್ನು ಒತ್ತಿ ಹೇಳಿದರು. "ಭಾರತ ಕೇವಲ ಸಂಗೀತ ಮತ್ತು ಚಲನಚಿತ್ರದಲ್ಲಿ ಮಾತ್ರವಲ್ಲ, ಈಗ ಕ್ರಿಯೇಟರ್ ಗಳ ರಾಷ್ಟ್ರವಾಗಿಯೂ ಮುಂಚೂಣಿಯಲ್ಲಿದೆ" ಎಂದು ಅವರು ನುಡಿದರು. ಪ್ರಾದೇಶಿಕ ಭಾರತೀಯ ವಿಷಯವು ಸಂಸ್ಕೃತಿಗೆ ಆಳವಾಗಿ ಬೇರೂರಿದಾಗ, ಅದು ಹೇಗೆ ಸಾರ್ವತ್ರಿಕವಾಗಿ ಆಕರ್ಷಿಸುತ್ತದೆ ಎಂಬುದನ್ನು ಕವಾಲೆ ಹಂಚಿಕೊಂಡರೆ, ರೋಬರ್ ಅವರು AI-ಸಕ್ರಿಯಗೊಳಿಸಿದ ಡಬ್ಬಿಂಗ್ ಮತ್ತು ಸ್ಥಳೀಕರಣದ ಮೂಲಕ STEM ವಿಷಯವು ಗಡಿಗಳನ್ನು ಹೇಗೆ ದಾಟುತ್ತದೆ ಎಂಬುದರ ಕುರಿತು ಮಾತನಾಡಿದರು.

WPP ಮತ್ತು ಜಾಹೀರಾತುಗಳ ಪುನರುಜ್ಜೀವನ 

WPP ಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಮಾರ್ಕ್ ರೀಡ್ ಅವರು ಜಾಹೀರಾತು ಉದ್ಯಮದ $1 ಟ್ರಿಲಿಯನ್ ಜಾಗತಿಕ ಮೌಲ್ಯ ಮತ್ತು AI ನೇತೃತ್ವದ ಕಥೆ ಹೇಳುವಿಕೆಯ ಕಡೆಗೆ ಅದರ ಬದಲಾವಣೆಯನ್ನು ವಿವರಿಸಿದರು. ಅವರು WPP ಯ ಮುಕ್ತ ವೀಡಿಯೊ ಪ್ರೊಡಕ್ಷನ್ ವೇದಿಕೆಯನ್ನು ಅನಾವರಣಗೊಳಿಸಿದರು ಮತ್ತು ಮೋಷನ್ AI ಅನ್ನು ಬಳಸಿಕೊಂಡು ಅತಿ-ವೈಯಕ್ತೀಕರಿಸಿದ ವಿಷಯ ರಚನೆಯನ್ನು ಪ್ರದರ್ಶಿಸಲು ಶಾರುಖ್ ಖಾನ್ ಅಭಿನಯದ ಒಂದು ಜಾಹೀರಾತು ಅಭಿಯಾನವನ್ನು ಹಂಚಿಕೊಂಡರು. "AI ಸೃಜನಶೀಲತೆಯನ್ನು ಬದಲಾಯಿಸುತ್ತಿಲ್ಲ - ಅದು ಅದನ್ನು ವಿಸ್ತರಿಸುತ್ತಿದೆ" ಎಂದು ರೀಡ್ ಹೇಳುತ್ತಾ, ಗುಣಮಟ್ಟದ ಜಾಹೀರಾತಿಗೆ ಪ್ರವೇಶವನ್ನು ಎಲ್ಲರಿಗೂ ಲಭ್ಯವಾಗಿಸುವಲ್ಲಿ MSME ಗಳು ಮತ್ತು ಡಿಜಿಟಲ್ ಸಾಧನಗಳ ಪಾತ್ರವನ್ನು ವಿವರಿಸಿದರು.

ಜಾಗತಿಕ ಸಹಭಾಗಿತ್ವ: ಯುಕೆ-ಭಾರತ ಸಾಂಸ್ಕೃತಿಕ ಒಡಂಬಡಿಕೆ

ರಾಜತಾಂತ್ರಿಕತೆ ಮತ್ತು ತಮ್ಮ ವೈಯಕ್ತಿಕ ಹಿನ್ನೆಲೆಯನ್ನು ಒಗ್ಗೂಡಿಸಿ ಮಾತನಾಡಿದ ಯುಕೆ ಡಿಜಿಟಲ್, ಸಂಸ್ಕೃತಿ, ಮಾಧ್ಯಮ ಮತ್ತು ಕ್ರೀಡಾ ಇಲಾಖೆಯ ಕಾರ್ಯದರ್ಶಿ ಲಿಸಾ ನ್ಯಾಂಡಿ ಅವರು ಭಾರತ ಮತ್ತು ಯುಕೆ ನಡುವಿನ ಸಾಂಸ್ಕೃತಿಕ ಬಾಂಧವ್ಯವನ್ನು ಬಲವಾಗಿ ಪ್ರತಿಪಾದಿಸಿದರು. ಚಲನಚಿತ್ರ, ವಸ್ತುಸಂಗ್ರಹಾಲಯಗಳು ಮತ್ತು ಪ್ರದರ್ಶಕ ಕಲೆಗಳಾದ್ಯಂತ ಸಂಬಂಧಗಳನ್ನು ಇನ್ನಷ್ಟು ಗಟ್ಟಿಗೊಳಿಸಲು ದ್ವಿಪಕ್ಷೀಯ ಸಾಂಸ್ಕೃತಿಕ ಸಹಯೋಗ ಒಪ್ಪಂದವನ್ನು ಅವರು ಪ್ರಕಟಿಸಿದರು. "ಮ್ಯಾಂಚೆಸ್ಟರ್ನಿಂದ ಮುಂಬೈವರೆಗೆ, ನಾವು ಕಥೆ ಹೇಳುವ ಮುಂದಿನ ಪೀಳಿಗೆಗೆ ಶಕ್ತಿ ತುಂಬಬೇಕು," ಎಂದು ಅವರು ಸೋಫಿಯಾ ದುಲೀಪ್ ಸಿಂಗ್ ಅವರಂತಹ ಮಹಾನ್ ವ್ಯಕ್ತಿಗಳು ಮತ್ತು ಇಂದಿನ ಯುಕೆ-ಭಾರತೀಯ ಸೃಜನಶೀಲ ಪ್ರತಿಭೆಗಳ ಕೊಡುಗೆಯನ್ನು ಸ್ಮರಿಸಿದರು.

ಗೋಷ್ಠಿಯ ಪ್ರಮುಖ ಅಂಶಗಳು: ಕೃತಕ ಬುದ್ಧಿಮತ್ತೆ, ಸಂಸ್ಕೃತಿ ಮತ್ತು ಪ್ರಭಾವ; ಎರಡು ಗೋಷ್ಠಿ ಚರ್ಚೆಗಳು ಈ ವಿಷಯದ ಕುರಿತಾದ ಆಳವಾದ ವಿಶ್ಲೇಷಣೆಯನ್ನು ನೀಡಿದವು:

"ಭಾರತೀಯ ಮಾಧ್ಯಮ ಮತ್ತು ಮನರಂಜನೆ @100: ಮಾಧ್ಯಮ ಮತ್ತು ಮನರಂಜನೆಯ ಭವಿಷ್ಯ" ಎಂಬ ಗೋಷ್ಠಿಯಲ್ಲಿ ಎರೋಸ್ ನೌ, ಜೆಟ್ಸಿಂಥೆಸಿಸ್ ಮತ್ತು ಗ್ರೂಪ್ಎಂನ ಪ್ರಮುಖರು ಭಾಗವಹಿಸಿದ್ದರು. ಭಾರತವು ಪ್ರಸ್ತುತ ಕ್ರಾಂತಿಕಾರಿ ಬದಲಾವಣೆಗಳ ನಾಲ್ಕನೇ ಅಲೆಯಲ್ಲಿ ಸಾಗುತ್ತಿದೆ ಎಂದು ಅವರು ಒತ್ತಿ ಹೇಳಿದರು. ಈ ಹಂತದಲ್ಲಿ, ಕೃತಕ ಬುದ್ಧಿಮತ್ತೆ (AI) ನೇತೃತ್ವದ IP ಸೃಷ್ಟಿ ಮತ್ತು Gen Z  ಪೀಳಿಗೆಯ ಬಳಕೆಯ ಶೈಲಿಗಳು ಉದ್ಯಮವನ್ನು ಹೊಸ ದಿಕ್ಕಿನಲ್ಲಿ ರೂಪಿಸುತ್ತಿವೆ ಎಂದು ಅವರು ಅಭಿಪ್ರಾಯಪಟ್ಟರು.

https://pib.gov.in/PressReleasePage.aspx?PRID=2125886

ಯೂಟ್ಯೂಬ್ನ ಗೌತಮ್ ಆನಂದ್ ಅವರು ನಡೆಸಿಕೊಟ್ಟ "ಪ್ರಭಾವದ ವ್ಯವಹಾರ" (The Business of Influence) ಗೋಷ್ಠಿಯಲ್ಲಿ ಶೆಫ್ ರಣವೀರ್ ಬ್ರಾರ್, ಚೆಸ್ಟಾಕ್ನ ಜಿತೇಂದ್ರ ಅಡ್ವಾಣಿ, ಮತ್ತು ಜಪಾನಿನ ಯೂಟ್ಯೂಬರ್ ಮಾಯೋ ಮುರಾಸಾಕಿ ಅವರಂತಹ ಕ್ರಿಯೇಟರ್‌ ಗಳು ಭಾಗವಹಿಸಿದ್ದರು. ಚೆಸ್ ನಿಂದ ಹಿಡಿದು ಕೃಷಿಯವರೆಗಿನ ಕ್ಷೇತ್ರಗಳಲ್ಲಿ, ಸಾಂಸ್ಕೃತಿಕ ಸ್ವಂತಿಕೆಯನ್ನು ಕಾಪಾಡಿಕೊಳ್ಳುತ್ತಲೇ, ಡಿಜಿಟಲ್ ವೇದಿಕೆಗಳು ಭಾರತೀಯ ಜ್ಞಾನವನ್ನು ಹೇಗೆ ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯುತ್ತಿವೆ ಎಂಬುದನ್ನು ಇವರು ತೋರಿಸಿದರು.

https://pib.gov.in/PressReleasePage.aspx?PRID=2125889
 

*****