উত্তৰ-পূব ভাৰতীয় চিনেমাৰ বাবে এক গুৰুত্বপূৰ্ণ মুহূৰ্তত, মুম্বাইৰ জিঅ’ ৱৰ্ল্ড চেণ্টাৰত অনুষ্ঠিত হোৱা বিশ্ব দৃশ্য শ্ৰব্য আৰু মনোৰঞ্জন সন্মিলন (WAVES) ২০২৫ত “উত্তৰ-পূব ভাৰতত চিনেমাৰ প্ৰত্যাহ্বান আৰু সম্ভাৱনা” শীৰ্ষক এক পেনেল আলোচনা অনুষ্ঠিত হয়। এই অধিবেশনে অঞ্চলটোৰ ছবি উদ্যোগৰ কিছুসংখ্যক বিশিষ্ট কণ্ঠক ইয়াৰ সজীৱ চলচ্চিত্ৰ পৰিৱেশ অন্বেষণ কৰিবলৈ একত্ৰিত কৰে।

এই পেনেলত জাহ্নু বৰুৱা, যতীন বৰা, ৰবি শৰ্মা, আইমী বৰুৱা, হাওবামপবন কুমাৰ, আৰু ডমিনিক চাংমাকে ধৰি প্ৰশংসিত চলচ্চিত্ৰ নিৰ্মাতা আৰু অভিনেতাসকল উপস্থিত থাকে, যিসকলে উত্তৰ-পূৰ্বাঞ্চলৰ চলচ্চিত্ৰ সংস্কৃতি গঢ় দিয়াত গুৰুত্বপূৰ্ণ ভূমিকা পালন কৰিছে।

আলোচনাত অঞ্চলটোৰ চলচ্চিত্ৰ নিৰ্মাতাসকলে সন্মুখীন হোৱা কেইবাটাও প্ৰত্যাহ্বানৰ বিষয়ে আলোচনা কৰা হয়, য’ত আছে অপৰ্যাপ্ত উৎপাদন আন্তঃগাঁথনি, ভাষাৰ বাধা, বজাৰত সীমিত প্ৰৱেশ আৰু প্ৰতিষ্ঠানিক সমৰ্থনৰ অভাৱ। এই বাধাসমূহ থকা সত্ত্বেও, পেনেলিষ্টসকলে এই কথাত সন্মতি প্ৰকাশ কৰে যে উত্তৰ-পূব চিনেমাৰ উদ্ভাৱন আৰু সাংস্কৃতিক কাহিনী কথনৰ বাবে এক উৰ্বৰ ভূমি হৈয়েই আছে।

প্ৰবীণ চলচ্চিত্ৰ নিৰ্মাতা জাহ্নু বৰুৱাই মন্তব্য কৰে যে উত্তৰ-পূব প্ৰতিভাৰ আৰ্দ্ৰভূমি। এই অঞ্চলৰ চলচ্চিত্ৰ নিৰ্মাতাসকলে উল্লেখযোগ্য কাম নিৰ্মাণ কৰি আছে। তেওঁ অঞ্চলটোৰ চহকী আৰ্থ-সাংস্কৃতিক পৰিসৰ আৰু ইয়াৰ অকথিত কাহিনীৰ প্ৰাচুৰ্য্যৰ ওপৰত আলোকপাত কৰে। তেওঁ লগতে কয় যে বহু যুৱ প্ৰতিভাৰ উত্থানেৰে, উত্তৰ-পূব চিনেমাৰ ভৱিষ্যৎ অতি উজ্জ্বল।

অসমৰ এগৰাকী বিখ্যাত অভিনেতা যতীন বৰাই আঞ্চলিক সীমাৰ বাহিৰত উত্তৰ-পূবৰ ছবিৰ সীমিত প্ৰসাৰক আলোকপাত কৰে। ডিজিটেল বিতৰণৰ প্ৰয়োজনীয়তাৰ কথা উল্লেখ কৰি তেওঁ কয় যে, অসমক নিজৰ ছবিৰ উন্নত বজাৰ কৰিবলৈ অ’টিটি প্লেটফৰ্মৰ প্ৰয়োজন। আঞ্চলিক ছবিয়ে অধিক দৰ্শকৰ মাজলৈ যোৱাত সহায়ক হোৱাকৈ এনে মঞ্চ সৃষ্টিত সহায় কৰিবলৈ তেওঁ চৰকাৰক আহ্বান জনায়। তেওঁ কেন্দ্ৰীয় আৰু ৰাজ্য চৰকাৰ উভয়কে আঞ্চলিক চলচ্চিত্ৰ পৰিৱেশ তন্ত্ৰক সমৰ্থন কৰিবলৈ দীৰ্ঘম্যাদী নীতি প্ৰস্তুত কৰিবলৈ আহ্বান জনাই কয় যে শক্তিশালী বিতৰণ নেটৱৰ্ক অবিহনে শ্ৰেষ্ঠ ছবিয়েও ৰাজ্যৰ সীমা অতিক্ৰম কৰিবলৈ সংগ্ৰাম কৰে।

ৰবি শৰ্মাই অঞ্চলটোৰ সৃষ্টিশীল আন্তঃগাঁথনিত ব্যৱস্থাগত বিনিয়োগৰ জৰুৰী প্ৰয়োজনীয়তাৰ বিষয়ে কয়। আঞ্চলিক উদ্যোগটোৰ বৃদ্ধিৰ বাবে আৰ্থিক সমৰ্থন আৰু বিপণন আন্তঃগাঁথনি অতি গুৰুত্বপূৰ্ণ। উত্তৰ-পূবত লাখ লাখ সুন্দৰ আৰু অনন্য কাহিনী আছে বুলিও তেওঁ কয়।

অভিনেতা-পৰিচালক আইমী বৰুৱাই ভাষিক বৈচিত্ৰ্য ৰক্ষাৰ ক্ষেত্ৰত চিনেমাৰ ভূমিকাক গুৰুত্ব আৰোপ কৰে। "আমাৰ ভাষাসমূহে শতিকাজোৰা মৌখিক ইতিহাস কঢ়িয়াই লৈ ফুৰে। ইবিলাকক সুৰক্ষিত কৰিবলৈ আৰু প্ৰসাৰৰ বাবে চলচ্চিত্ৰ এক শক্তিশালী মাধ্যম," তেওঁ কয়।

চলচ্চিত্ৰ নিৰ্মাতা হাওবামপবন কুমাৰ আৰু ডমিনিক চাংমাই অঞ্চলটোৰ তৃণমূল পৰ্যায়ৰ চলচ্চিত্ৰ নিৰ্মাণৰ বিষয়ে অন্তৰ্দৃষ্টি ভাগ-বতৰা কৰি আনুষ্ঠানিক সমৰ্থন ব্যৱস্থা অবিহনেই কিমান গল্পকাৰে কাম কৰি আছে সেই কথা আঙুলিয়াই দিয়ে।

অধিবেশনৰ সামৰণি পৰে এক আশাবাদী টোকাত, পেনেলিষ্টসকলে নীতি সংস্কাৰ, আঞ্চলিক সহযোগিতা, আৰু পৰম্পৰাগত বাধাসমূহ অতিক্ৰম কৰিবলৈ অ’টিটি প্লেটফৰ্মৰ কৌশলগত ব্যৱহাৰৰ আহ্বান জনায়। তেওঁলোকে উত্তৰ-পূৰ্বাঞ্চলৰ চিনেমাৰ কণ্ঠক স্বীকৃতি প্ৰদান আৰু উন্নীত কৰাৰ ক্ষেত্ৰত সকলো অংশীদাৰ, চৰকাৰী সংস্থা, ব্যক্তিগত বিনিয়োগকাৰী আৰু ৰাষ্ট্ৰীয় ষ্টুডিঅ’ক একত্ৰিত হ’বলৈ আহ্বান জনায়।

**********

PIB TEAM WAVES 2025 |Rajith/LekshmiPriya/Barnali/CShekhar |134