ایک ایسی دنیا میں جہاں مواد کی بھرمار ہے، جہاں آوازیں الگورتھم سے بلند ہوتی ہیں اور جذبہ کارکردگی پر غالب آتا ہے، ویوز 2025 میں بریک آؤٹ سیشن "دی بزنس آف انفلوئنس: کریئٹرز شیپنگ گلوبل کلچر" ایک متحرک تصویر کی طرح سامنے آیا جو صداقت، تجسس اور کمیونٹی کے دھاگوں سے جڑا ہوا تھا۔ یوٹیوب ایشیا پیسیفک کے نائب صدر گوتم آنند کی میزبانی میں، اس اجلاس نے چار غیر معمولی کریئٹرز کو اکٹھا کیا جن کے سفر، جو جذبے اور مقصد میں جڑے ہیں، نے ڈیجیٹل دنیا کے کونوں کو خاموشی سے تبدیل کر دیا ہے۔

گوتم آنند نے سیشن کا آغاز وزیر اعظم نریندر مودی کے افتتاحی تقریب کے وژن سے کیا، جس میں ہندوستان سے ایک ارب آوازوں کے ابھرنے کی بات کی گئی تھی۔ انہوں نے تخلیق کاروں کو یوٹیوب کا دل قرار دیا، جو تنوع اور گہرائی سے دھڑکتا ہے اور ایسی داستانوں کو شکل دینے کی صلاحیت رکھتا ہے جو سرحدوں کے پار لہریں پیدا کرتی ہیں۔

سیشن کا آغاز ایک چونکا دینے والے لمحے سے ہوا جب جاپانی تخلیق کار مایو موراساکی نے، جو مقبول چینل مایو جاپان کی مالک ہیں، روانی سے ہندی میں بولنا شروع کیا۔ ان کی ہندی کی تعلیم اور ہندوستان میں گزارے گئے ایک سال نے ان کے کارپوریٹ زندگی سے یوٹیوب کی طرف منتقلی کو تقویت دی۔ انہوں نے بتایا کہ جاپانی ناظرین کے لیے ہندوستان کے بارے میں مواد بنانا ان کے لیے خوشی اور ذمہ داری دونوں ہے۔ "میں کبھی دوسرے ممالک کے بارے میں منفی بات نہیں کرتی،" انہوں نے کہا۔ "میں اچھا ریسرچ کرتی ہوں اور ہندوستان کو اس کی پوری گہرائی کے ساتھ دکھانے کی کوشش کرتی ہوں، نہ کہ صرف وہ پوسٹ کارڈ ورژن جو اکثر بیرون ملک دیکھا جاتا ہے۔"

کھانا پکانے کے فن کے ماہر اور یوٹیوب سنسنی خیز شخصیت شیف رنویر برار نے کھانا پکانے میں 'سچائی کے لمحے' کی بات کی، جو ان کے ناظرین کے ساتھ جذباتی طور پر جڑتا ہے۔ "میں چاہتا ہوں کہ لوگ کھانا پکانے میں اپنا اتوار ڈھونڈیں،" انہوں نے کہا، اور یہ بھی بتایا کہ ان کے لیے صداقت کسی بھی برانڈ تعاون سے پہلے آتی ہے۔ "رشتہ پہلے، لین دین بعد میں۔ یہ میرا مقولہ ہے۔"

'انڈین فارمر' کی پس پردہ شخصیت، آکاش جادھو نے زراعت کو قابل رسائی اور پائیدار بنانے کے بارے میں پختہ یقین کے ساتھ بات کی۔ ان کا چینل آبپاشی اور کاشتکاری کے عملی مشورے پیش کرتا ہے۔ "زراعت وہ چیز ہے جو ہمیں پسند ہے، جو مٹی میں جڑی ہے۔ ہم اسے اپنے لوگوں کے لیے کرتے ہیں،" انہوں نے کہا۔ ان کا مقصد سادہ ہے: میز پر صاف خوراک اور کسانوں کے لیے خوشحالی۔

'چیس ٹاک' کے جیتندر اڈوانی نے بتایا کہ شطرنج ہندوستانی گھروں میں خاموشی سے واپسی کر رہا ہے۔ "بچے، والدین، دادا دادی، سب دوبارہ شطرنج کھیل رہے ہیں،" انہوں نے مسکراتے ہوئے کہا۔ ان کا تدریسی انداز سادگی اور تفریح کا امتزاج ہے، جو کرکٹ اور ثقافت سے مستعار لے کر کھیل کو زیادہ قابل فہم بناتا ہے۔ "میں اسے ہلکا پھلکا اور محبت سے بھرپور رکھتا ہوں،" انہوں نے کہا۔

گفتگو میں عالمی ناظرین کے ساتھ رابطے کے موضوعات شامل تھے، جہاں تخلیق کاروں نے بتایا کہ ان کا کام زبان و مکان  سے ماورا ہے۔ آکاش جادھو نے انکشاف کیا کہ ان کے ناظرین کا ایک بڑا حصہ ہندوستان سے باہر ہے، حالانکہ مواد ہندی میں ہے—اس کا ثبوت، انہوں نے کہا، کہ "خوراک ہمیں جوڑتی ہے۔" جیتندر نے مزید کہا، "شطرنج کی محبت عالمی ہے۔"

گفتگو اس وقت گہری ہوئی جب گوتم آنند نے پوچھا کہ تخلیق کار برانڈز کے ساتھ تعاون کرتے ہوئے صداقت کو کیسے برقرار رکھتے ہیں۔ "میں ہمیشہ نہ کہہ کر شروع کرتا ہوں،" برار نے جواب دیا۔ "صرف اسی صورت میں آگے بڑھتا ہوں جب برانڈ واقعی میری اقدار سے ہم آہنگ ہو۔"

بات چیت میں اے آئی بھی شامل ہوا۔ مایو موراساکی نے کہا کہ اگرچہ اے آئی خیالات کے لیے مددگار ہو سکتا ہے، لیکن بعض اوقات اے آئی خوفناک بھی ہو سکتا ہے۔ رنویر برار، جیتندر اور آکاش جادھو نے اے آئی سب ٹائٹلنگ اور تخلیقی طریقوں کے ساتھ تجربات کی بات کی، لیکن پھر بھی انسانی رابطے کو اپنے کام کے مرکز میں رکھا۔

جب کمرے میں موجود خواہشمند تخلیق کاروں کے لیے مشورہ مانگا گیا تو جوابات دل کو چھو لینے والے تھے۔ "الگورتھم کا پیچھا نہ کرو، اپنے خوابوں کا پیچھا کرو،" رنویر برار نے کہا "مستقل مزاجی، صداقت اور مواد سے آگے سوچو،" آکاش جادھو نے زور دیا، "اپنی پسند سے شروع کرو،" جیتندر نے دہرایا۔ مایو موراساکی نے گرمجوشی سے کہا، "اگر آپ خود کے ساتھ سچے ہیں تو باقی سب کچھ خود بخود ہوجائے گا۔"

سیشن کے اختتام پر، گوتم آنند نے مقررین اور سامعین کا شکریہ ادا کیا، ان کی اجتماعی توانائی اس بات کی یاد دہانی تھی کہ اثر و رسوخ، اصلی اثر و رسوخ وائرل ہونے کے بارے میں نہیں ہے۔ یہ آواز کے بارے میں ہے۔ دل کے بارے میں ہے۔ اور ایک ایماندار کہانی کے ذریعے دنیا کو شکل دینے کے بارے میں ہے۔

************

ش ح ۔   م  د ۔  م  ص

(U : 457)