ಭಾರತದ ಎಲೆಕ್ಟ್ರಾನಿಕ್ಸ್ ಉತ್ಪಾದನಾ ಪೂರಕ ವ್ಯವಸ್ಥೆಯನ್ನು ಬಲಪಡಿಸುವತ್ತ ಒಂದು ಪ್ರಮುಖ ಹೆಜ್ಜೆಯಾದ ಎಲೆಕ್ಟ್ರಾನಿಕ್ಸ್ ಬಿಡಿಭಾಗಗಳ ಉತ್ಪಾದನಾ ಯೋಜನೆ (ಇಸಿಎಂಎಸ್)ಗಾಗಿ ಮಾರ್ಗಸೂಚಿಗಳು ಮತ್ತು ಪೋರ್ಟಲ್ ಅನ್ನು ಕೇಂದ್ರ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರು ಇಂದು ಬಿಡುಗಡೆ ಮಾಡಿದರು.

ಬಿಡುಗಡೆಯ ಸಂದರ್ಭದಲ್ಲಿ ಮಾತನಾಡಿದ ಕೇಂದ್ರ ಸಚಿವರು, ಎಲೆಕ್ಟ್ರಾನಿಕ್ಸ್ ಉತ್ಪಾದನೆಗೆ ಸರ್ಕಾರದ ಸ್ಪಷ್ಟ ಕಾರ್ಯತಂತ್ರವನ್ನು ವಿವರಿಸಿದರು. ಭಾರತವು ಪ್ರಮಾಣ ಮತ್ತು ಮೂಲಭೂತ ವಿಶ್ವಾಸವನ್ನು ಹೆಚ್ಚಿಸಲು ಪೂರ್ಣಗೊಂಡ ಉತ್ಪನ್ನಗಳನ್ನು ತಯಾರಿಸುವ ಮೂಲಕ ತನ್ನ ಪ್ರಯಾಣವನ್ನು ಪ್ರಾರಂಭಿಸಿತು, ಇದರಿಂದಾಗಿ ಕೆಳಮುಖವಾದ ಏಕೀಕರಣವನ್ನು ಸಕ್ರಿಯಗೊಳಿಸಿತು ಎಂದು ಅವರು ಹೇಳಿದರು. ಇದರ ನಂತರ ಮಾಡ್ಯೂಲ್-ಮಟ್ಟದ ಉತ್ಪಾದನೆ, ನಂತರ ಬಿಡಿಭಾಗ ತಯಾರಿಕೆ ಮತ್ತು ಈಗ ಬಿಡಿಭಾಗಗಳನ್ನು ತಯಾರಿಸುವ  ವಸ್ತುಗಳ ತಯಾರಿಕೆ ಪ್ರಾರಂಭವಾಗಿದೆ. ಪೂರ್ಣಗೊಂಡ ಸರಕುಗಳು ಮೌಲ್ಯ ಸರಪಳಿಯಲ್ಲಿ ಶೇಕಡಾ 80 ರಿಂದ 85 ರಷ್ಟು ಪಾಲನ್ನು ಹೊಂದಿವೆ ಎಂದು ಒತ್ತಿ ಹೇಳಿದ ಅವರು, ಎಲೆಕ್ಟ್ರಾನಿಕ್ಸ್ ತಯಾರಿಕೆಯಲ್ಲಿ ಸಾಧಿಸಲಾದ ಪ್ರಮಾಣವು ಅಸಾಧಾರಣವಾಗಿದೆ ಎಂದು ಹೇಳಿದರು.

ಎಲೆಕ್ಟ್ರಾನಿಕ್ಸ್ ಉತ್ಪಾದನೆಯು ಐದು ಪಟ್ಟು ಮತ್ತು ರಫ್ತು ಆರು ಪಟ್ಟು ಹೆಚ್ಚು ಬೆಳೆದಿದೆ ಎಂದು ಸಚಿವರು ಹೇಳಿದರು, ರಫ್ತು ಸಿಎಜಿಆರ್‌ ಶೇಕಡಾ 20 ಮೀರಿದೆ ಮತ್ತು ಉತ್ಪಾದನೆ ಆರ್‌ ಶೇಕಡಾ 17 ಕ್ಕಿಂತ ಹೆಚ್ಚಾಗಿದೆ. ಮೊಬೈಲ್ ಫೋನ್‌ ಗಳು, ಸರ್ವರ್‌ ಗಳು, ಲ್ಯಾಪ್‌ಟಾಪ್‌ ಗಳು ಮತ್ತು ಐಟಿ ಹಾರ್ಡ್‌ವೇರ್ ಗಳಲ್ಲಿ ಬಲವಾದ ಪ್ರಗತಿ ಕಂಡುಬಂದಿದೆ ಮತ್ತು ಉದ್ಯಮವು ಗಮನಾರ್ಹವಾಗಿ ಉತ್ತುಂಗಕ್ಕೇರಲು ಸಜ್ಜಾಗಿದೆ ಎಂದು ಅವರು ಹೇಳಿದರು.

ಶ್ರೀ ವೈಷ್ಣವ್ ಅವರು ಇಸಿಎಂಎಸ್ ಅನ್ನು ಒಂದು ಸಮತಲ ಯೋಜನೆ ಎಂದು ಬಣ್ಣಿಸಿದರು, ಇದು ಎಲೆಕ್ಟ್ರಾನಿಕ್ಸ್‌ ಗೆ ಮಾತ್ರವಲ್ಲದೆ ಕೈಗಾರಿಕೆ, ವಿದ್ಯುತ್, ಆಟೋಮೊಬೈಲ್ ಸೇರಿದಂತೆ ಇತರ ವಲಯಗಳಿಗೂ ಬೆಂಬಲವನ್ನು ನೀಡುತ್ತದೆ. ದೇಶಾದ್ಯಂತ ಎಲೆಕ್ಟ್ರಾನಿಕ್ಸ್ ಉತ್ಪಾದನೆಗೆ ಸಂಪೂರ್ಣ ಪೂರಕ ವ್ಯವಸ್ಥೆಯನ್ನು ಸ್ಥಾಪಿಸಲಾಗುತ್ತಿದೆ ಎಂದು ಅವರು ಒತ್ತಿ ಹೇಳಿದರು.

ನಾವೀನ್ಯತೆ ಮತ್ತು ಗುಣಮಟ್ಟದ ಮಹತ್ವವನ್ನು ಒತ್ತಿ ಹೇಳಿದ ಶ್ರೀ ವೈಷ್ಣವ್, ಈಗ ಅನೇಕ ಕಂಪನಿಗಳು ವಿನ್ಯಾಸ ತಂಡಗಳನ್ನು ಸ್ಥಾಪಿಸಿವೆ ಮತ್ತು ಪ್ರತಿಯೊಬ್ಬ ಪಾಲುದಾರರು ಅಂತಹ ತಂಡಗಳನ್ನು ಅಭಿವೃದ್ಧಿಪಡಿಸುವುದು ಅತ್ಯಗತ್ಯ ಎಂದು ಹೇಳಿದರು. ಗುಣಮಟ್ಟದ ಬಗ್ಗೆ ಒತ್ತು ನೀಡುತ್ತಾ, ವಲಯದಾದ್ಯಂತ ಸಿಕ್ಸ್ ಸಿಗ್ಮಾ ಮಾನದಂಡಗಳನ್ನು ಸಾಧಿಸಲು ಅವರು ಕರೆ ನೀಡಿದರು ಮತ್ತು ಗುಣಮಟ್ಟದ ಮಾನದಂಡಗಳನ್ನು ಪಾಲಿಸದವರ ಸೇವೆಗಳನ್ನು ಸ್ಥಗಿತಗೊಳಿಸಲಾಗುವುದು ಎಂದು ಎಚ್ಚರಿಸಿದರು. ವಿನ್ಯಾಸ ಸಾಮರ್ಥ್ಯ ಮತ್ತು ಗುಣಮಟ್ಟದ ಶ್ರೇಷ್ಠತೆಯ ಮೇಲಿನ ಅವಳಿ ಗಮನವು ಎಲೆಕ್ಟ್ರಾನಿಕ್ಸ್‌ ವಲಯದಲ್ಲಿ ಭಾರತದ ನಾಯಕತ್ವವನ್ನು ಮುನ್ನಡೆಸುತ್ತದೆ ಎಂದು ಅವರು ಹೇಳಿದರು.

ಶ್ರೀ ವೈಷ್ಣವ್ ಅವರು ಎಐ ನಲ್ಲಿ ಭಾರತದ ಪ್ರಗತಿ ಮತ್ತು ಡೇಟಾ-ಚಾಲಿತ ಪರಿಹಾರಗಳ ಬಗ್ಗೆಯೂ ಮಾತನಾಡಿದರು. ಎಐ ಕೋಶ್‌ ನಲಲಿ ಈಗಾಗಲೇ 350 ಡೇಟಾಸೆಟ್‌ ಗಳನ್ನು ಅಪ್‌ಲೋಡ್ ಮಾಡಲಾಗಿದೆ ಮತ್ತು ಐಐಟಿ ಅಭಿವೃದ್ಧಿಪಡಿಸಿದ ನಾಲ್ಕು ಎಐ ಪರಿಕರಗಳನ್ನು ಶೀಘ್ರದಲ್ಲೇ ಬಿಡುಗಡೆ ಮಾಡಲಾಗುವುದು ಎಂದು ಅವರು ಮಾಹಿತಿ ನೀಡಿದರು. ಎಲೆಕ್ಟ್ರಾನಿಕ್ಸ್ ಪೂರಕ ವ್ಯವಸ್ಥೆಯನ್ನು ಬಲಪಡಿಸಲು ತಾಂತ್ರಿಕ-ಕಾನೂನು ಪರಿಹಾರಗಳನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಇಸಿಎಂಎಸ್ ಅನುಮೋದನೆಗೆ ಸಿದ್ಧವಾಗಿರುವ ಯೋಜನೆಗಳ ಬಲವಾದ ಪೈಪ್‌ಲೈನ್ ಅನ್ನು ಹೊಂದಿದೆ ಎಂದು ಸಚಿವರು ಹೇಳಿದರು ಮತ್ತು ಇದು ಜಾಗತಿಕ ಎಲೆಕ್ಟ್ರಾನಿಕ್ಸ್ ಕೇಂದ್ರವಾಗಿ ಭಾರತದ ತ್ವರಿತ ಬೆಳವಣಿಗೆಯ ಆರಂಭವಾಗಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಅಧಿವೇಶನವನ್ನುದ್ದೇಶಿಸಿ ಮಾತನಾಡಿದ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಕಾರ್ಯದರ್ಶಿ ಶ್ರೀ ಎಸ್ ಕೃಷ್ಣನ್, ಇಸಿಎಂಎಸ್‌ ಭಾರತವನ್ನು ವಿಶ್ವದಲ್ಲಿ ಎಲೆಕ್ಟ್ರಾನಿಕ್ ಉತ್ಪಾದನಾ ಸೂಪರ್ ಪವರ್ ಆಗಿ ದೃಢವಾಗಿ ಸ್ಥಾಪಿಸುವ ಗುರಿಯನ್ನು ಹೊಂದಿದೆ ಎಂದು ಹೇಳಿದರು. ಈ ಯೋಜನೆಯನ್ನು ಯಶಸ್ವಿಗೊಳಿಸಲು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಎಲ್ಲಾ ಪಾಲುದಾರರೊಂದಿಗೆ ಕೆಲಸ ಮಾಡುತ್ತದೆ ಎಂದು ಅವರು ಹೇಳಿದರು.

ಈ ಕಾರ್ಯಕ್ರಮದ ಸಮಯದಲ್ಲಿ, ಭಾರತದ ಮೊದಲ ದೇಶೀಯ ಎಐ ಮೂಲ ಮಾದರಿಯನ್ನು ನಿರ್ಮಿಸಲು ಸರ್ವಂ ಎಐ ಅನ್ನು ಆಯ್ಕೆ ಮಾಡಲಾಯಿತು. ದೇಶದ ಎಐ ನಾವೀನ್ಯತೆ ಪರಿಸರ ವ್ಯವಸ್ಥೆಯಲ್ಲಿ ಇದು ಒಂದು ಪ್ರಮುಖ ಮೈಲಿಗಲ್ಲಾಗಿದೆ.

ಬಲವಾದ ಉದ್ಯಮ, ಸರ್ಕಾರ ಮತ್ತು ಜಾಗತಿಕ ಭಾಗವಹಿಸುವಿಕೆ

ಈ ಉದ್ಘಾಟನಾ ಸಮಾರಂಭದಲ್ಲಿ ಭಾರತದ ಹಿರಿಯ ಅಧಿಕಾರಿಗಳು, ರಾಜ್ಯ ಸರ್ಕಾರದ ಹಿರಿಯ ಅಧಿಕಾರಿಗಳು, ರಾಯಭಾರ ಕಚೇರಿಯ ಪ್ರತಿನಿಧಿಗಳು, ಹಿರಿಯ ದೇಶೀಯ ಮತ್ತು ಜಾಗತಿಕ ಉದ್ಯಮ ಮುಖಂಡರು, ದೇಶೀಯ ಮತ್ತು ಜಾಗತಿಕ ಕೈಗಾರಿಕಾ ಸಂಘಗಳು, ಹಣಕಾಸು ಸಂಸ್ಥೆಗಳು, ಸಲಹಾ ಸಂಸ್ಥೆಗಳು, ಮಾಧ್ಯಮಗಳು ಸೇರಿದಂತೆ 200 ಕ್ಕೂ ಹೆಚ್ಚು ಮಂದಿ ಭಾಗವಹಿಸಿದ್ದರು.

ಇಸಿಎಂಸ್ ಗಾಗಿ ಮಾರ್ಗಸೂಚಿಗಳು ಮತ್ತು ಪೋರ್ಟಲ್‌‌ ನ ಅನಾವರಣವು ಒಂದು ಮಹತ್ವದ ಮೈಲಿಗಲ್ಲಾಗಿದ್ದು, ಪ್ರಮುಖ ಉದ್ಯಮ ನಾಯಕರು, ಪ್ರತಿಷ್ಠಿತ ಉದ್ಯಮ ಸಂಘಗಳು, ಪ್ರಮುಖ ಹಣಕಾಸು ಸಂಸ್ಥೆಗಳು ಮತ್ತು ವಿವಿಧ ರಾಯಭಾರ ಕಚೇರಿಗಳ ಪ್ರತಿನಿಧಿಗಳ ಗಮನವನ್ನು ಸೆಳೆಯಿತು. ಈ ಐತಿಹಾಸಿಕ ಕಾರ್ಯಕ್ರಮವು ಪ್ರಮುಖ ಪಾಲುದಾರರ ನಡುವಿನ ಸಹಯೋಗದ ಮಹತ್ವವನ್ನು ಒತ್ತಿಹೇಳಿತು. ಗಣ್ಯ ವ್ಯಕ್ತಿಗಳ ಉಪಸ್ಥಿತಿಯು ದೇಶದಲ್ಲಿ ಬಿಡಿಭಾಗಗಳ ಉತ್ಪಾದನೆಯನ್ನು ಮುಂದುವರಿಸುವಲ್ಲಿ ವ್ಯಾಪಕ ಆಸಕ್ತಿ ಮತ್ತು ಬದ್ಧತೆಯನ್ನು ಎತ್ತಿ ತೋರಿಸಿತು.

ಈ ಕಾರ್ಯಕ್ರಮದಲ್ಲಿ ಯೋಜನೆ ಮತ್ತು ಅದರ ಮಾರ್ಗಸೂಚಿಗಳ ಕುರಿತು ಪ್ರಸ್ತುತಿಯನ್ನು ನೀಡಲಾಯಿತು, ಇದು ಅದರ ರಚನೆಯ ಪ್ರಯಾಣ ಮತ್ತು ಯೋಜನೆಯ ವಿಶಿಷ್ಟ ಲಕ್ಷಣಗಳನ್ನು ಎತ್ತಿ ತೋರಿಸಿತು. ಪ್ರಸ್ತುತಿಯು ಯೋಜನೆಯನ್ನು ರೂಪಿಸಿದ ಚಿಂತನಾ ಪ್ರಕ್ರಿಯೆ ಮತ್ತು ಕಾರ್ಯತಂತ್ರದ ವಿಚಾರಗಳ ಸಮಗ್ರ ಅವಲೋಕನವನ್ನು ಒದಗಿಸಿತು ಮತ್ತು ವಿಭಿನ್ನ ಪ್ರೋತ್ಸಾಹಕಗಳಿಗೆ ಅದರ ನವೀನ ವಿಧಾನವನ್ನು ಎತ್ತಿ ತೋರಿಸಿತು. ಗಮನಾರ್ಹವಾಗಿ, ಇದು ಹೈಬ್ರಿಡ್ ಪ್ರೋತ್ಸಾಹಕಗಳ ಮೊದಲ ಕೊಡುಗೆಯಾಗಿದ್ದು, ಇದು ಪ್ರೋತ್ಸಾಹಕಗಳು ಮತ್ತು ಉದ್ಯೋಗ ಸೃಷ್ಟಿಯ ನಡುವೆ ನೇರ ಸಂಪರ್ಕವನ್ನು ಸ್ಥಾಪಿಸುತ್ತದೆ ಮತ್ತು ಆರ್ಥಿಕ ಬೆಳವಣಿಗೆ ಮತ್ತು ಉದ್ಯೋಗ ಸೃಷ್ಟಿಗೆ ಅದರ ಬದ್ಧತೆಯನ್ನು ಬಲಪಡಿಸುತ್ತದೆ.

ಈ ಯೋಜನೆಯು ಉಪ ಜೋಡಣೆಗಳು ಮತ್ತು ಬಿಡಿಭಾಗಗಳನ್ನು ಪ್ರೋತ್ಸಾಹಿಸುವುದನ್ನು ಮೀರಿದೆ - ಇದು ಈ ಅಂಶಗಳಿಗೆ ಸಂಬಂಧಿಸಿದ ಸಂಪೂರ್ಣ ಪೂರೈಕೆ ಸರಪಳಿಯನ್ನು ಒಳಗೊಳ್ಳುವ ಮೂಲಕ ಸಮಗ್ರ ವಿಧಾನವನ್ನು ಅಳವಡಿಸಿಕೊಳ್ಳುತ್ತದೆ. ಬಿಡಿಭಾಗಗಳು ಮತ್ತು ಉಪ ಜೋಡಣೆಗಳ ಅಭಿವೃದ್ಧಿಯನ್ನು ಉತ್ತೇಜಿಸುವುದರ ಜೊತೆಗೆ, ಇದು ಬಂಡವಾಳ ಉಪಕರಣಗಳಿಗೆ ಬೆಂಬಲವನ್ನು ಒದಗಿಸುತ್ತದೆ, ಉತ್ಪಾದನಾ ಪ್ರಕ್ರಿಯೆಗಳನ್ನು ಚಾಲನೆ ಮಾಡಲು ಅಗತ್ಯವಾದ ಯಂತ್ರೋಪಕರಣಗಳ ಸೇರ್ಪಡೆಯನ್ನು ಖಚಿತಪಡಿಸುತ್ತದೆ. ಇದಲ್ಲದೆ, ಇದು ಉತ್ಪಾದನೆಯಲ್ಲಿ ಬಳಸುವ ಉಪಕರಣಗಳ ಉಪ ಜೋಡಣೆಯನ್ನು ಪ್ರೋತ್ಸಾಹಿಸುತ್ತದೆ, ದಕ್ಷತೆ ಮತ್ತು ಉತ್ಪಾದನಾ ಸಾಮರ್ಥ್ಯಗಳನ್ನು ಹೆಚ್ಚಿಸುವ ಸಮಗ್ರ ವ್ಯವಸ್ಥೆಯನ್ನು ಬಲಪಡಿಸುತ್ತದೆ. ಈ ನಿರ್ಣಾಯಕ ಅಂಶಗಳನ್ನು ಸೇರಿಸುವ ಮೂಲಕ, ಯೋಜನೆಯು ದೃಢವಾದ, ಪರಸ್ಪರ ಸಂಬಂಧ ಹೊಂದಿರುವ ಪೂರಕ ವ್ಯವಸ್ಥೆಯನ್ನು ಉತ್ತೇಜಿಸುತ್ತದೆ, ದೇಶೀಯ ಉತ್ಪಾದನೆಯನ್ನು ಬಲಪಡಿಸುತ್ತದೆ.

ಈ ಯೋಜನೆಯು ಅರ್ಜಿದಾರರ ಕಾರ್ಯಕ್ಷಮತೆಗೆ ಬಲವಾದ ಒತ್ತು ನೀಡುತ್ತದೆ, ಮೊದಲು ಬಂದವರಿಗೆ ಆದ್ಯತೆ ಎಂಬ ವಿಧಾನದ ಆಧಾರದ ಮೇಲೆ ಪ್ರೋತ್ಸಾಹಕಗಳನ್ನು ಹಂಚಲಾಗುತ್ತದೆ. ಈ ರಚನೆಯು ದಕ್ಷತೆ, ಸಕ್ರಿಯ ಭಾಗವಹಿಸುವಿಕೆ ಮತ್ತು ಸಕಾಲಿಕ ಅರ್ಜಿ ಸಲ್ಲಿಕೆಗಳನ್ನು ಪ್ರೋತ್ಸಾಹಿಸುತ್ತದೆ, ಇದರಿಂದಾಗಿ ಸ್ಪರ್ಧಾತ್ಮಕ ಮತ್ತು ನ್ಯಾಯಯುತ ವಾತಾವರಣವನ್ನು ಉತ್ತೇಜಿಸುತ್ತದೆ.

ಇದಲ್ಲದೆ, ಅನುಷ್ಠಾನ ಪ್ರಕ್ರಿಯೆಯನ್ನು ನಿಯಂತ್ರಿಸುವ ಯೋಜನೆಯ ಮಾರ್ಗಸೂಚಿಗಳನ್ನು ಸ್ಪಷ್ಟತೆ ಮತ್ತು ನಿಖರತೆಯೊಂದಿಗೆ ವಿನ್ಯಾಸಗೊಳಿಸಲಾಗಿದೆ, ಅವುಗಳು ಸರಳ ಮತ್ತು ನಿಸ್ಸಂದಿಗ್ಧವಾಗಿರುವುದನ್ನು ಖಚಿತಪಡಿಸುತ್ತವೆ. ಮಾರ್ಗಸೂಚಿಗಳು ವ್ಯವಹಾರ ಮಾಡುವ ಸುಲಭತೆಯನ್ನು ಎತ್ತಿಹಿಡಿಯುತ್ತವೆ, ಅನುಸರಣೆಯನ್ನು ಎಲ್ಲಾ ಪಾಲುದಾರರಿಗೆ ಪ್ರವೇಶಿಸುವಂತೆ ಮಾಡುತ್ತದೆ. ಮಾರ್ಗಸೂಚಿಗಳು ಅನಗತ್ಯ ಸಂಕೀರ್ಣತೆಗಳನ್ನು ನಿವಾರಿಸುವ ಮೂಲಕ ಮತ್ತು ಕಾರ್ಯವಿಧಾನದ ಅವಶ್ಯಕತೆಗಳನ್ನು ಸುಗಮಗೊಳಿಸುವ ಮೂಲಕ ಪರಿಣಾಮಕಾರಿ ಅನುಷ್ಠಾನವನ್ನು ಸುಗಮಗೊಳಿಸುತ್ತವೆ ಮತ್ತು ಅನುಕೂಲಕರ ವಾತಾವರಣವನ್ನು ಉತ್ತೇಜಿಸುತ್ತವೆ.

ಈ ಸಂದರ್ಭದಲ್ಲಿ, ಉದ್ಯಮದ ಮುಖಂಡರು ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಜಾರಿಗೆ ತಂದಿರುವ ಉತ್ಪಾದನೆ-ಆಧಾರಿತ ಪ್ರೋತ್ಸಾಹಕ (ಪಿ ಎಲ್‌ ಐ) ಯೋಜನೆಗಳ ಸರಾಗ ಅನುಷ್ಠಾನವನ್ನು ಶ್ಲಾಘಿಸಿದರು. ಈ ಉಪಕ್ರಮಗಳ ಪರಿಣಾಮಕಾರಿ ಅನುಷ್ಠಾನಕ್ಕಾಗಿ ಅವರು ಮೆಚ್ಚುಗೆ ವ್ಯಕ್ತಪಡಿಸಿದರು, ಉತ್ತಮವಾಗಿ ವ್ಯಾಖ್ಯಾನಿಸಲಾದ ಪ್ರಕ್ರಿಯೆಗಳು ಪ್ರೋತ್ಸಾಹಕಗಳ ಸುಗಮ ಮತ್ತು ತ್ವರಿತ ವಿತರಣೆಯನ್ನು ಹೇಗೆ ಸುಗಮಗೊಳಿಸಿವೆ ಎಂಬುದನ್ನು ಒತ್ತಿ ಹೇಳಿದರು.

ಪಹಲ್ಗಾಮ್‌ ನಲ್ಲಿ ಇತ್ತೀಚೆಗೆ ನಡೆದ ಭಯೋತ್ಪಾದಕ ದಾಳಿಯಲ್ಲಿ ಮಡಿದವರ ಸ್ಮರಣಾರ್ಥ ಕಾರ್ಯಕ್ರಮದ ಆರಂಭದಲ್ಲಿ ಕೇಂದ್ರ ಸಚಿವ ಶ್ರೀ ಅಶ್ವಿನಿ ವೈಷ್ಣವ್ ಅವರು ಎಲ್ಲಾ ಭಾಗವಹಿಸುವವರೊಂದಿಗೆ ಒಂದು ನಿಮಿಷ ಮೌನ ಆಚರಿಸಿದರು.

ಹಿನ್ನೆಲೆ

ಪ್ರಧಾನಮಂತ್ರಿಯವರ ಅಧ್ಯಕ್ಷತೆಯಲ್ಲಿ ನಡೆದ ಕೇಂದ್ರ ಸಚಿವ ಸಂಪುಟ ಸಭೆಯು ಎಲೆಕ್ಟ್ರಾನಿಕ್ಸ್ ಬಿಡಿಭಾಗಗಳ ಉತ್ಪಾದನಾ ಯೋಜನೆ (ಇಸಿಎಂಎಸ್) ಗೆ ಅನುಮೋದನೆ ನೀಡಿದೆ, ಇದನ್ನು 08.04.2025 ರಂದು CG-DL-E-08042025-262341 ಎಂಬ ಗೆಜೆಟ್ ಅಧಿಸೂಚನೆಯ ಮೂಲಕ ಅಧಿಸೂಚಿಸಲಾಗಿದೆ.

ಎಲೆಕ್ಟ್ರಾನಿಕ್ಸ್ ಬಿಡಿಭಾಗಗಳ ಉತ್ಪಾದನಾ ಪೂರಕ ವ್ಯವಸ್ಥೆಯಲ್ಲಿ ದೊಡ್ಡ ಹೂಡಿಕೆಗಳನ್ನು (ಜಾಗತಿಕ/ದೇಶೀಯ) ಆಕರ್ಷಿಸುವ ಮೂಲಕ, ದಕ್ಷತೆ ಮತ್ತು ಸಾಮರ್ಥ್ಯಗಳನ್ನು ಅಭಿವೃದ್ಧಿಪಡಿಸುವ ಮೂಲಕ ದೇಶೀಯ ಮೌಲ್ಯವರ್ಧನೆ ಹೆಚ್ಚಿಸುವ ಮೂಲಕ ಮತ್ತು ಭಾರತೀಯ ಕಂಪನಿಗಳನ್ನು ಜಾಗತಿಕ ಮೌಲ್ಯ ಸರಪಳಿಗಳೊಂದಿಗೆ (ಜಿವಿಸಿ) ಸಂಯೋಜಿಸುವ ಮೂಲಕ ದೃಢವಾದ ಬಿಡಿಭಾಗ ಪೂರಕ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸುವ ಗುರಿಯನ್ನು ಈ ಯೋಜನೆ ಹೊಂದಿದೆ.

ಭಾರತದ ಸರ್ಕಾರದ ವಿವಿಧ ಉಪಕ್ರಮಗಳಿಂದಾಗಿ, ಎಲೆಕ್ಟ್ರಾನಿಕ್ಸ್ ಉತ್ಪಾದನಾ ವಲಯವು ಕಳೆದ ದಶಕದಲ್ಲಿ ಗಮನಾರ್ಹ ಬೆಳವಣಿಗೆಯನ್ನು ಕಂಡಿದೆ. ಎಲೆಕ್ಟ್ರಾನಿಕ್ ಸರಕುಗಳ ದೇಶೀಯ ಉತ್ಪಾದನೆಯು 2014-15ನೇ ಹಣಕಾಸು ವರ್ಷದಲ್ಲಿ ರೂ.1.90 ಲಕ್ಷ ಕೋಟಿಗಳಿಂದ 2023-24ನೇ ಹಣಕಾಸು ವರ್ಷದಲ್ಲಿ ರೂ.9.52 ಲಕ್ಷ ಕೋಟಿಗಳಿಗೆ ಶೇಕಡಾ 17 ಕ್ಕಿಂತ ಹೆಚ್ಚು ಸಿಎಜಿಆರ್‌ ನಲ್ಲಿ ಹೆಚ್ಚಾಗಿದೆ. ಎಲೆಕ್ಟ್ರಾನಿಕ್ ಸರಕುಗಳ ರಫ್ತು ಕೂಡ 2014-15ನೇ ಹಣಕಾಸು ವರ್ಷದಲ್ಲಿ ರೂ.0.38 ಲಕ್ಷ ಕೋಟಿಗಳಿಂದ 2023-24ನೇ ಹಣಕಾಸು ವರ್ಷದಲ್ಲಿ ರೂ.2.41 ಲಕ್ಷ ಕೋಟಿಗಳಿಗೆ ಶೇಕಡಾ 20 ಕ್ಕಿಂತ ಹೆಚ್ಚು ಸಿಎಜಿಆರ್‌ ನಲ್ಲಿ ಹೆಚ್ಚಾಗಿದೆ. 2024-25ನೇ ಹಣಕಾಸು ವರ್ಷದಲ್ಲಿ, ಎಲೆಕ್ಟ್ರಾನಿಕ್ಸ್ ಭಾರತದಿಂದ ರಫ್ತು ಮಾಡಲಾದ 3ನೇ ಅತಿದೊಡ್ಡ ಸರಕು ಎನಿಸಿಕೊಂಡಿದೆ.

ಭಾರತವು ಎಲೆಕ್ಟ್ರಾನಿಕ್ಸ್ ಉತ್ಪಾದನೆಯಲ್ಲಿ, ವಿಶೇಷವಾಗಿ ಮೊಬೈಲ್ ಉತ್ಪಾದನೆಯಲ್ಲಿ ಗಮನಾರ್ಹ ಪ್ರಗತಿಯನ್ನು ಸಾಧಿಸಿದೆ ಮತ್ತು ವಿಶ್ವದ 2 ನೇ ಅತಿದೊಡ್ಡ ಮೊಬೈಲ್ ಉತ್ಪಾದನಾ ರಾಷ್ಟ್ರವಾಗಿದೆ.

ಯೋಜನೆಯ ಬಜೆಟ್ ವೆಚ್ಚ: ₹ 22,919 ಕೋಟಿ

ಯೋಜನೆಯ ಅವಧಿ: 6 ವರ್ಷಗಳು (1 ವರ್ಷ ಪರಿಪಕ್ವತೆಯ ಅವಧಿ) ಅಂದರೆ 2025-26 ರಿಂದ 2031-32 ಹಣಕಾಸು ವರ್ಷದವರೆಗೆ.

ಪ್ರೋತ್ಸಾಹಕ ರಚನೆ

ಈ ಯೋಜನೆಯು ವಿಭಿನ್ನ ಆರ್ಥಿಕ ಪ್ರೋತ್ಸಾಹಕಗಳನ್ನು ಒದಗಿಸುತ್ತದೆ ಅಂದರೆ. ಎ) ವಹಿವಾಟು-ಆಧಾರಿತ ಪ್ರೋತ್ಸಾಹಕ ಬಿ) ಬಂಡವಾಳ- ಆಧಾರಿತ ಪ್ರೋತ್ಸಾಹಕ ಸಿ) ಹೈಬ್ರಿಡ್ ಪ್ರೋತ್ಸಾಹಕ [ಅಂದರೆ (ಎ) ಮತ್ತು (ಬಿ) ಎರಡರ ಸಂಯೋಜನೆ]

ಉದ್ಯೋಗ ಆಧಾರಿತ ಪ್ರೋತ್ಸಾಹ: ವಹಿವಾಟು ಆಧಾರಿತ ಪ್ರೋತ್ಸಾಹ ಮತ್ತು ಬಂಡವಾಳ ಪ್ರೋತ್ಸಾಹದ ಒಂದು ಭಾಗವು ಉದ್ಯೋಗ ಆಧಾರಿತವಾಗಿದೆ.

ಗುರಿ ವಿಭಾಗವಾರು ಪ್ರೋತ್ಸಾಹಕಗಳು

ಅರ್ಜಿ ಸಲ್ಲಿಕೆ: ಈ ಯೋಜನೆಯು ಮೇ 1, 2025 ರಿಂದ ಆನ್‌ಲೈನ್ ಪೋರ್ಟಲ್ (www.ecms.meity.gov.in) ಮೂಲಕ ಅರ್ಜಿಗಳನ್ನು ಸ್ವೀಕರಿಸಲು ಮುಕ್ತವಾಗಿರುತ್ತದೆ.

1. ಗುರಿ ವಿಭಾಗ (ಎ), (ಬಿ) ಮತ್ತು (ಸಿ) ಗಳಿಗೆ: 3 ತಿಂಗಳುಗಳು
2. ಗುರಿ ವಿಭಾಗ (ಡಿ) ಕ್ಕೆ: 2 ವರ್ಷಗಳು

ನಿರೀಕ್ಷಿತ ಫಲಿತಾಂಶಗಳು

ಈ ಯೋಜನೆಯು ₹59,350 ಕೋಟಿ ಹೂಡಿಕೆಯನ್ನು ಆಕರ್ಷಿಸುವ ಗುರಿಯನ್ನು ಹೊಂದಿದ್ದು, ₹4,56,500 ಕೋಟಿ ಉತ್ಪಾದನೆಗೆ ಕಾರಣವಾಗುತ್ತದೆ ಮತ್ತು 91,600 ಜನರಿಗೆ ಹೆಚ್ಚುವರಿ ನೇರ ಉದ್ಯೋಗ ಮತ್ತು ಅನೇಕ ಪರೋಕ್ಷ ಉದ್ಯೋಗಗಳನ್ನು ಸೃಷ್ಟಿಸುತ್ತದೆ.

ಹೆಚ್ಚಿನ ಮಾಹಿತಿಗಾಗಿ:

ಜಾಲತಾಣ: www.ecms.meity.gov.in; www.meity.gov.in

ಇಮೇಲ್: ecms-meity@meity.gov.in

ಸಂಪರ್ಕ ಸಂಖ್ಯೆ: +91-11-24360886

*****