ആഭ്യന്തരകാര്യ മന്ത്രാലയം
പത്മപുരസ്കാരങ്ങൾ–2026-നുള്ള നാമനിർദ്ദേശങ്ങൾ 2025 ജൂലൈ 31 വരെ സമർപ്പിക്കാം
Posted On:
11 APR 2025 12:53PM by PIB Thiruvananthpuram
2026-ലെ റിപ്പബ്ലിക് ദിനത്തോടനുബന്ധിച്ച് പ്രഖ്യാപിക്കുന്ന പത്മപുരസ്കാരങ്ങൾ-2026-നുള്ള നാമനിർദ്ദേശങ്ങൾ/ശുപാർശകളുടെ സമർപ്പണം 2025 മാർച്ച് 15-ന് ആരംഭിച്ചു. പത്മപുരസ്കാരങ്ങൾക്കുള്ള നാമനിർദ്ദേശങ്ങൾ സമർപ്പിക്കാനുള്ള അവസാന തീയതി 2025 ജൂലൈ 31 ആണ്. പത്മ പത്മപുരസ്കാരങ്ങൾക്കുള്ള നാമനിർദ്ദേശങ്ങൾ/ശുപാർശകൾ രാഷ്ട്രീയ പുരസ്‌കാർ പോർട്ടലിൽ (https://awards.gov.in) ഓൺലൈനായി മാത്രമേ സ്വീകരിക്കുകയുള്ളൂ.
രാജ്യത്തെ ഏറ്റവും ഉയർന്ന സിവിലിയൻ പുരസ്കാരങ്ങളിൽ ഒന്നാണ് പത്മ വിഭൂഷൺ, പത്മ ഭൂഷൺ, പത്മശ്രീ എന്നിവ. 1954-ൽ സ്ഥാപിതമായ ഈ പുരസ്‌കാരങ്ങൾ എല്ലാ വർഷവും റിപ്പബ്ലിക് ദിനത്തോടനുബന്ധിച്ച് പ്രഖ്യാപിക്കപ്പെടുന്നു. 'വിശിഷ്ട പ്രവർത്തനം' അംഗീകരിക്കുന്നതിനാണ് ഈ പുരസ്‌കാരം ലക്ഷ്യമിടുന്നത്. കല, സാഹിത്യം, വിദ്യാഭ്യാസം, കായികം, വൈദ്യശാസ്ത്രം, സാമൂഹിക പ്രവർത്തനം, ശാസ്ത്രം, എഞ്ചിനീയറിംഗ്, പൊതുകാര്യം, സിവിൽ സർവീസ്, വ്യാപാരം, വ്യവസായം തുടങ്ങിയ എല്ലാ മേഖലകളിലും/ശാഖകളിലുമുള്ള മികച്ചതും അസാധാരണവുമായ നേട്ടങ്ങൾ/സേവനങ്ങൾ പരിഗണിച്ചാണ് പുരസ്‌കാരം നൽകുന്നത്. വംശം, തൊഴിൽ, പദവി, ലിംഗഭേദം എന്നീ വ്യത്യാസങ്ങൾ ഇല്ലാതെ എല്ലാ വ്യക്തികൾക്കും ഈ പുരസ്‌കാരങ്ങൾക്ക് അർഹതയുണ്ട്. പൊതുമേഖലാ സ്ഥാപനങ്ങളിൽ പ്രവർത്തിക്കുന്നവർ ഉൾപ്പെടെയുള്ള സർക്കാർ ജീവനക്കാർക്ക് (ഡോക്ടർമാരും ശാസ്ത്രജ്ഞരും ഒഴികെ) പത്മ പുരസ്‌കാരങ്ങൾക്ക് അർഹതയില്ല.
പത്മ പുരസ്‌കാരങ്ങൾ "ജനങ്ങളുടെ പത്മ" ആക്കി മാറ്റാൻ സർക്കാർ പ്രതിജ്ഞാബദ്ധമാണ്. അതിനാൽ എല്ലാ പൗരന്മാരോടും സ്വയം നാമനിർദ്ദേശം ഉൾപ്പെടെ നാമനിർദ്ദേശങ്ങൾ/ശുപാർശകൾ സമർപ്പിക്കാൻ അഭ്യർത്ഥിക്കുന്നു. സ്ത്രീകൾ, സമൂഹത്തിലെ ദുർബല വിഭാഗങ്ങൾ, പട്ടികജാതി-പട്ടികവർഗക്കാർ, ദിവ്യാംഗർ, സമൂഹത്തിന് നിസ്വാർത്ഥ സേവനം ചെയ്യുന്നവർ എന്നിവരിൽ നിന്ന് പ്രതിഭാധനരായ വ്യക്തികളെ തിരിച്ചറിഞ്ഞുകൊണ്ട് അവരുടെ മികവും നേട്ടങ്ങളും ഈ പുരസ്‌കാരങ്ങളിലൂടെ യഥാർത്ഥത്തിൽ അംഗീകരിക്കപ്പെടുന്നതിന് യോജിച്ച ശ്രമങ്ങൾ നടത്താവുന്നതാണ്.
മുകളിൽ സൂചിപ്പിച്ച പോർട്ടലിൽ ലഭ്യമായ ഫോർമാറ്റിൽ വ്യക്തമാക്കിയിട്ടുള്ള എല്ലാ വിശദാംശങ്ങളും നാമനിർദ്ദേശങ്ങളിൽ/ശുപാർശകളിൽ രേഖപ്പെടുത്തണം. ശുപാർശ ചെയ്യപ്പെടുന്ന വ്യക്തിയുടെ അതത് മേഖലയിലെ/വിഷയത്തിലെ വിശിഷ്ടവും അസാധാരണവുമായ നേട്ടങ്ങൾ/സേവനം വ്യക്തമായി പ്രതിപാദിക്കുന്ന ഒരു വിവരണവും (പരമാവധി 800 വാക്കുകൾ) ഉണ്ടായിരിക്കണം.
വിശദാംശങ്ങൾ ആഭ്യന്തര മന്ത്രാലയത്തിന്റെ വെബ്‌സൈറ്റിലും (https://mha.gov.in) പത്മ അവാർഡ് പോർട്ടലിലും (https://padmaawards.gov.in) 'അവാർഡുകളും മെഡലുകളും' എന്ന ശീർഷകത്തിൽ ലഭ്യമാണ്. ഈ പുരസ്‌കാരങ്ങളുമായി ബന്ധപ്പെട്ട ചട്ടങ്ങളും നിയമങ്ങളും വെബ്‌സൈറ്റിലെ https://padmaawards.gov.in/AboutAwards.aspx എന്ന ലിങ്കിൽ ലഭ്യമാണ്.
(Release ID: 2120925)
Visitor Counter : 23
Read this release in:
Tamil
,
Kannada
,
Bengali
,
English
,
Urdu
,
Hindi
,
Nepali
,
Assamese
,
Manipuri
,
Punjabi
,
Gujarati
,
Telugu