য়ুমলৈ-কৈরৈ মন্ত্রালয়
কেন্দ্রগী গৃহ মন্ত্রী অমদি কোওপরেসন মন্ত্রী শ্রী অমিত সাহনা লোক সভাদা ৱাকফ (এমেন্দমেন্ত) বিল, ২০২৫ অমসুং মুসলমান ৱাকফ (রিপীল) বিল, ২০২৪গী খন্ন-নৈনবদা শরুক য়াখ্রে
Posted On:
02 APR 2025 9:38PM by PIB Imphal
বিল অসি মুস্লিমশিংগী লাইনিংগী থবক থৌরমশিং অমদি মখোয়না কত্থোরকপা লন-থুমশিংদা খুৎ থিংজিনবনি হায়না ওপোজিসন্না অরানবা ৱাফম শন্দোক্লি
ওপোজিসন্না মাইনোরিতী ফুরুপ্পু কিহল্লগা মখোয়গী ভোত বেঙ্ক শেমগৎনবা হোৎনরি
লৈঙাক অসিনা মুস্লিম ইচিল ইনাওশিংগী লাইনিংগী থবক থৌরমশিংদা অমদি মখোয়না কত্থোকচরকপশিংগা মরী লৈনবা ত্রস্তশিংদা, হায়বদি ৱাকফতা খুৎ থিংজিন্নিংবগী অপাম্বা লৈতে
মুতাৱলি, ৱাকিফ, ৱাকফ পুম্নমক অসি মুস্লিমশিং ওইগনি, অদুবু ৱাকফকী লন-থুমশিং অসি নীংথিনা মেনতেন তৌরিবরা হায়বদুদি য়েংশিনবা তঙায় ফদে
লাইনিংগী কৎলকপশিংগা মরী লৈনবা ৱাকফ বোর্দকী থবক থৌরমশিংদা নন-ইস্লামিক মেম্বরশিংগী মফম অমা লৈগনি
ৱাকফ বোর্দ নৎত্রগা মসিগী মফমশিংদা হাপ্লিবা নন-ইস্লামিক মেম্বরশিং লাইনিংগী থবক থৌরমগা মরী লৈনরোই
লাইনিং অমা হেক্তগী মীশক অমনা চেরিতী কম্মিস্নর ওইবা য়াই, মহাক্না বোর্দ অসিবু চেরিতী লোগী মতুং ইন্না থবক তৌহনগদবনি, মসি এদমিনিস্ত্রেতিবকী থক্নি, লাইনিংগী নত্তে
ৱাকফ বোর্দকী থবক্তি ৱাকফকী লন-থুমশিং য়োন্থোক্লিবা মীওইশিং ফাগত্তুনা লংথোকখিবনি
ওপোজিসন্না মখোয়গী লৈঙাক মতমদা লৈরম্বা শরৌশিং অদু মখা তানা লৈহনবা পাম্লি, অদুবু মদু হৌজিক্তি ওইররোই
করিগুম্বা ৱাকফ লো অসি ২০১৩ দা শেমদোক্লমদ্রবদি, বিল অসি পুরকপগী মথৌ তারম্লোই
২০১৩ দা, ৱাকফ লো কাঙলুপ খরা পেলহন্নবগীদমক অহিং অমদা কা হেন্বা মওংদা শেমদোকখি, মদুনা মরম ওইরগা দিল্লীগী লুতয়েন জোনগী ভি.ভি.আই.পি.গী লন-থুম ১২৩ ৱাকফতা পীথোকখি
নরেন্দ্র মোদী লৈঙাক্না তরু তরুবা পরম অমদা চৎলি, মদুদি ঐখোয়না ভোত বেঙ্ককী লো অমত্তা পুরক্লোই মরমদি লো হায়বসি মীয়ামগী অচুম্বা ৱায়েলনি, য়াইফনবনি
মীপুম খুদিংমক মখোয়গী লাইনিং চৎচনবগী মঙম লৈ, অদুবু কল্লক মীহৌবা অমদি অকিবনা মরম ওইরগা লাইনিং ওন্থোকপদি য়ারোই
২০১৩ দা পুরকখিবা এমেন্দমেন্ত বিল অদু হাউস অনিমক্তা পুন্না পুং ৫ মখায় খন্নখিবনি, অদুগা হৌজিক্কী বিল অসিনা হাউস অনিমক্তা পুং ১৬ খন্নরি
ঐখোয়না জোইন্ত কম্মিতী অমা শেমখি, মীফম ৩৮ পাঙথোকখি, পুং ১১৩ চুপ্না খন্ন-নৈনখ্রে অমদি স্তেকহোল্দর ২৮৪ য়াওহনখি অমদি লৈবাক পুম্বদগী ওনলাইন সজেসন করোর অমরোম লাকখি, পুম্নমক অসিদগী অমদি পুম্নমক অসি নৈনরবা মতুংদা লো অসি শেমখিবনি অমদি মসিবু মতৌ অসুম্না হেক্তা কন্থৎপা য়ারোই
মসি ভারত লৈঙাক্কী মীপুম খুদিংমক্তা চৎনগদবা লোনি অমদি মীপুম খুদিংমক্না মসিবু ইনগদবনি
১৯১৩ দগী ২০১৩ ফাওবা, ৱাকফ বোর্দকী অপুনবা লম অসি একর লাখ ১৮ ওইরম্মি, অদুগা ২০১৩ দগী ২০২৫ ফাওবদা লম একর লাখ ২১ নৌনা হাপচিল্লকখি
প্রোপর্তী লিশিং ২০ লীজতা পীথোক্লি, অদুবু রেকোর্দকী মতুং ইন্না, প্রোপর্তীশিং অসি ২০২৫ দা জিরো ওইরকখি, হায়রিবা লন-থুমশি অসি য়োন্থোকখ্রে
বিল অসিনা লম কন্নবা ঙাক্লৌ পীগনি, কনাগুম্বা অমগী লমবু ইচম চম্না হেক্তা লাউথোক্লগা ৱাকফকী হেক্তা ওইবা য়ারোই
দোনেসন তৌরকপসু মশাগী লন-থুমখক্তমক্না তৌবা য়াগনি, অসুম্না ৱাকফনা লনাই লমবু মপুগী অয়াবা য়াওদনা লৌশিনবা য়াররোই
ৱাকফ প্রোপর্তী লাউথোকপগী মঙম অদু মুত্থৎলে অমদি মসি হৌজিক্তি দিস্ত্রিক্ত কল্লেক্তরনা সর্তিফাইদ তৌগদবনি
মাইনোরিতী ফুরুপকী মীওইশিংগী মফমদা অকিপা পোকহন্বা অসি চৎনবী অমা ওইরে হায়না শ্রী অমিত সাহনা ফোঙদোকখি
রাম জন্মভুমি, ত্রিপল তলাক অমদি সি.এ.এ.গী মতমদসু, মুস্লিম ফুরুপকী মীওইশিংদা অকিবা পোকহন্নবা হোৎনখি, অদুবু মুস্লিম ফুরুপকী মীওইশিংনা মসিদা কিনিংঙাই করিসু লৈতে হায়বা খঙই
চহি অনি হৌখ্রে, কনামত্তনা সি.এ.এ.না মরম ওইরগা সিতিজনসিপ মাঙবা লৈতে, করিগুম্বা কনাগুম্বনা সি.এ.এ.না মরম ওইরগা সিতিজনসিপ মাঙলবদি, ওপোজিসন্না হাউসকী তেবলদা পুথোক্তুনা থম্বিয়ু
লৈবাক অসিগী সিতিজন অমত্তবু, মখোয়গী লাইনিংগী খেন্নবা লৈতনা, অমাঙবা তাহন্দবা হায়বসি মোদী লৈঙাক্কী ফিরেপ্নি
কেন্দ্রগী গৃহ মন্ত্রী অমদি কোওপরেসন মন্ত্রী শ্রী অমিত সাহনা ঙসি লোক সভাদা ৱাকফ (এমেন্দমেন্ত) বিল, ২০২৫ অমসুং মুসলমান ৱাকফ (রিপীল) বিল, ২০২৪গী খন্ন-নৈনবদা শরুক য়াখ্রে।
খন্ন-নৈনবা অদুদা শরুক য়ারদুনা, শ্রী অমিত সাহনা ৱাকফ হায়বসি অরাবিক ৱাহৈ অমনি, অমদি মসিগী হৌরকফম অসি হাদিথকা মরী লৈনৈ হায়খি। মসিবু ঙসি শীজিন্নরিবা অসি অল্লাহগী মিংদা কৎলকপা লম নৎত্রগা শেংলবা লাইনিংগী মরমশিংগীদমক কৎলকপা লমগা মরী লৈনরি। হৌজিক লৈরিবা ৱাকফকী ৱাহন্থোক অসি ইস্লামগী অনিশুবা কালিফ, হজরত উমরগী মতমদা ওইরকখিবনি। ঙসিগী লোন্দাদা হায়রগদি, ৱাকফ হায়বসি মীওই অমনা লাইনিংগী নৎত্রগা খুন্নাইগী য়াইফনবগীদমক লম কৎলক্লিবা চেরিতেবল এন্দোমেনন্ত মখল অমনি। অসিগুম্বা কৎলক্লিবশিং অসি লনাই লমখক্তমক ওইগদবনি, অমদি লৈঙাক্কী লম নৎত্রগা কনাগুম্বা অতোপ্পা মীওই অমগী লমদি কৎপা য়ারোই।
কেন্দ্রগী গৃহ মন্ত্রীনা হায়খিবদা ৱাকফ বোর্দকী লাইনিংগী চেরিতীগা মরী লৈনবা থবক থৌরমশিংদা নন-ইস্লামিক মেম্বর য়াওহল্লগনি। লাইনিংগী ইন্সতিত্যুসনশিংগী এদিমিনিস্ত্রেসন্দা মুস্লিম নত্তবা য়াওহন্নবা ৱাফম লৈতে, অদুগুম্বা ৱাফম অমা শেম্বসু পামদে। বিল অসি মুস্লিমশিংগী লাইনিংগী থবক থৌরমশিংদা অমদি মখোয়না কৎচবা লমশিংদা খুৎ থিংজিন্নবা পুথোরকপনি হায়না ওপোজিন্না অরানবা ৱাফম শন্দোক্লি হায়না শ্রী সাহনা মখা তানা ফোঙদোকখি। ওপোজিসন্না মখোয়গী ভোত বেঙ্ক শেমগৎনবা অপীকপা ফুরুপশিংগী মরক্তা অকিবা পোকহন্নবা হোৎনরি হায়না মহাক্না হায়খি।
ৱাকফ বোর্দ অমদি মসিগী মফমশিংদা হাপ্লিবা মুস্লিম নত্তবা মেম্বরশিং লাইনিংগা মরী লৈনবা থমক থৌরমশিংদা য়াওরোই হায়না কেন্দ্রগী গৃহ মন্ত্রীনা হায়খি। মখোয়গী থৌদাংদি চেরিতীগা মরী লৈনবা ৱাফমশিং চৎন-কাঙলোনগী মতুং ইন্না তৌহন্নবা হোৎনবখক্তনি। ভারত্তা ৱাকফ অসি ত্রস্তী অমদি মেনেজিং ত্রস্তী লৈবা ত্রস্ত অমগুমক্না থবক তৌবনি। ৱাকফতা, ৱাকিফ (দোনর) অমদু মুতাৱল্লি (এদমিনিস্ত্রেতর) লৈ, মখোয় অসি ইস্লাম নীংজবশিংনি। ৱাকফ হায়রিবা ৱাফম অসিমক ইস্লামদগী লাকপনি, মরম অসিনা ইস্লাম চৎপা মীওইশিংখক্তনা ৱাকফ পান্নবা য়াগনি। ৱাকফ অসি লাইনিংগা মরী লৈনবা ওইরবসু, ৱাকফ বোর্দ নৎত্রগা ৱাকফকী লন-থুমশিং অসিদি লাইনিংগী ইন্সতিত্যুসনশিং নত্তে। লোগী মতুং ইন্না চেরিতী কম্মিস্নর অমা হায়বসি লাইনিং অমা হেক্তদগী ওইবা য়াই, মখোয়সি ত্রস্ত অমা মেনেজ তৌবা নত্তবনিনা মখোয়গী থৌদাংদি বোর্দ অসিনা চেরিতী লো ঙাক্না মথৌ তৌহন্বনি। মসি এদমিনিস্ত্রেতিবকী ৱাফম্নি, লাইনিংগী নত্তে হায়না শ্রী সাহনা ফোঙদোকখি।
ৱাকফ বোর্দকী মপুং ওইবা থৌদাংদি ৱাকফকী লনথুমশিং লান্না শীজিন্নরিবা মীওইশিং মশক খঙদোক্তুনা লৌথোকখিবনি। মসিনা ৱাকফকী মিংদা কা হেন্না হন্থবা মমলদা চহি চা কয়া লম লীজ তৌথোক্লিবা মীওইশিংদা মীৎয়েঙ থমগদবনি। ৱাকফকী শেন্থোক হন্থরক্লি, অদুগা শেনফম অসি অপীকপা ফুরুপশিংগী চাওখৎ থৌরাং অমদি ইস্লামগী ইন্সতিত্যুসনশিং মপাঙ্গল কনখৎহন্নবা শীজিন্নগদবনি। ৱাকফ বোর্দ অমদি মসিগী মফমশিংগী থবক্তি হায়রিবা ফন্দশিং অসি হুরান্বা থিংবনা ওইগদবনি। ওপোজিসন্না মখোয়গী লৈঙাক মতমদা লৈরম্বা শরৌশিং মখা তানা লৈহন্বা পাম্লি, অদুবু হৌজিক্তি মদু ওইরোরই হায়না শ্রী সাহনা হায়খি।
কেন্দ্রগী গৃহ মন্ত্রী অমদি কোওপরেসন মন্ত্রীনা করিগুম্বা ৱাকফ লো ২০১৩ দা শেমদোক্লমদ্রবদি, ঙসিগী বিল অসি মথৌ তারম্লোই হায়খি। অদুম ওইনমক, ২০১৪ গী মীখল মমাঙ, ২০১৩ দা, ৱাকফ লো অসি কাঙলুপ খরনা পেলহন্নবগীদমক অহিং অমদা শাথিনা হোংহনখি, মদুনা দিল্লীগী লুতয়েনশিংগী জোন্দা লৈবা হায়-প্রোফাইল লম ১২৩ ৱাকফতা পীথোকহনখি। দিল্লী ৱাকফ বোর্দনা নোর্দর্ন রেলৱেজকী লমবু ৱাকফ্তা ত্রান্সফর তৌখি। হিমাচল প্রদেশতা, লম কয়া অরান্বা মওংদা ৱাকফকী লম ওন্থোকখি অমদি অয়াবা য়াওদনা মোস্ক শানবা শীজিন্নখি। তামিল নাদুদা, চহি ১৫০০ শুরবা তিরুচেন্দুর লাইশঙগী লম একর ৪০০ ৱাকফকী লম্নি হায়না লাউথোকখি। কর্নাতকাগী কম্মিতী অমগী রিপোর্ত অমগী মতুং ইন্না, ৱাকফকী লম একর ২৯,০০০ কম্মর্সিএল ওইনা শীজিন্ননবা লীজ তৌরম্মি। ২০০১ অমদি ২০১২ গী মরক্তা লুপা করোর লাখ ২ রোমগী ওইগদবা ৱাকফকী লমশিং লনাই ইন্সতিত্যুসনশিংদা চহি ১০০ গী ওইনা লীজ তৌখি। বেঙ্গলুরু হায় কোর্তনা লম একর ৬০২ লৌশিন্নবা থৌরাং লেপহন্নবা খুৎ থিংজিনবা তাখি। হোনৱদ খুঙ্গং, বিজয়পুর, কর্নাতকাদা, লম একর ১৫০০ চয়েৎনবা থোকহনখি, অমদি হায়রিবা লুপা করোর ৫০০ রোমগী ওইগদবা লম অসি ফাইব স্তার হোতেল অমদা থাদা শুপ্নতগী লুপা ১২,০০০ দা লীজ তৌথোকখি।
শ্রী অমিত সাহনা শেনফম পুম্বা অসি লায়রবা মুস্লিমশিংগী য়াইফনবনি, ইনাকখুন্বশিংদা থোনগৎনবা নত্তে হায়খি। কর্নাতকাদা, দত্তাপীথ লাইশঙদা ক্লেম অমা তৌরকখি। তালিপরম্বদা, চহি ৭৫ শুরবা ক্লেম অমদা য়ুম্ফম ওইরগা একর ৬০০ কী লম লৌশিন্নবা হোৎনখি। খৃস্ত্যান ফুরুপকী লমশিং ফাওবা লৌশিনখি। লৈবাকসিদা লৈবা চর্চ কয়া অমনা ৱাকফ বিলগী মায়োক্তা ৱাফম কয়া ফোঙদোক্লি, মরমদি মখোয়না মসিবু মুস্লিম ফুরুপকী মীনুংশি ফংনবা লম্বী অমা ওইনা লৌরি। অদুবু, চহি মরিগী মনুংদা, মুস্লিম ইচিল ইনাওশিংনা ফাওবা বিল অসি মখোয়গী কান্ননবনি হায়বা খঙলক্কনি হায়না মহাক্না মখা তাখি।
কেন্দ্রগী গৃহ মন্ত্রীনা, তেলঙ্গনাদা লুপা করোর ৬৬,০০০ গী ওইগদবা একর ১৭০০ গী লমলদা ক্লেম অমা তৌরকখি হায়খি। মতৌ অসুম্না, অসামগী মোরিগাও দিস্ত্রিক্তা একর ১৩৪গী লমদা ক্লেম অমা তৌরকখি। হরিয়ানাদা গুরুদ্বারাগা মরী লৈনবা মর্লা তরামরিগী লম ৱাকফতা পীথোকখি, অমদি প্রয়াগরাজতা লৈরিবা চন্দ্রসেখর অজাদ পার্কপু ৱাকফকী লমল্নি হায়না লাউথোকখি। মহারাস্ত্রদা, বদঙ্গে খুঙ্গংদা লৈবা মহাদেব লাইশঙদা ক্লেম অমা তৌরকখি, অমদি বিদতা ৱাকফ বোর্দনা নম্ফুদা কঙ্কলেস্বরদগী একর ১২ গী লম লৌশিনখি।
শ্রী অমিত সাহনা, লৈঙাক অসিনা মুস্লিম ইচিল ইনাওশিংগী লাইনিং নৎত্রগা ৱাকফ য়াওনা মখোয়না লিংখৎচবা ত্রস্তশিংদা খুৎ থিংজিন্নিংবগী অপাম্বা অমত্তা লৈতে হায়খি। ৱাতাৱল্লি, ৱাকিফ, অমদি ৱাকফ মখোয়গী মখাদা অদুমক লৈগনি, অদুবু ৱাকফ লন-থুমশিং লনাইগী কান্ননবা নত্তবদা, নীংথিনা য়েংশিন্দুনা থম্বা অমদি কাঙলোন চুম্না শীজিন্নহন্বা মথৌ তাই হায়না মহাক্না হায়খি। চহি চা কয়া শুরবা কৎলকপা লম অমবু ফাইব-স্তার হোতেল অমদা থাদা শুপ্নতগী লুপা ১২,০০০ দা লীজ তৌথোকপগী মরম মহাক্না হংখি। মদুগী মহুত্তা, শেলশিং অসি লায়রবা মুস্লিম, মপুরোইবা খাইনরবী নুপীশিং, মমা মপা কায়নরবা অঙাংশিং, অমদি থবক ফংদ্রিবা নহাশিংগীদমক শীজিন্নগদবনি, মখোয়বু মরোমদোম লেপচবা ঙমহন্নবা অমদি স্কিল লৈহন্নবা শীজিন্নগদবনি। ৱাকফনা লুপা করোর লাখ কয়াগী ওইগদবা লমগী মপু ওইরবসু, মখোয়গী চহিগী শেন্থোক্তি শুপ্নতগী লুপা করোর ১২৬ খক্তমক ওইদুনা লান্না শীজিন্নবগী চিংননিংঙাই ওইবা ৱাফম ফাউহল্লি হায়না মহাক্না ফোঙদোকখি।
কেন্দ্রগী গৃহ মন্ত্রীনা, ২০১৩ গী এমেন্দমেন্ত বিল পুথোরকপা মতমদা, মতমদুগী লৈঙাক্কী মকোক থোংবা লুচিংবশিংনা ৱাকফকী লনথুমশিং লান্না শীজিন্নবা থিংনবা অমদি মরাল লৈবা মীওইশিং ফাগৎনবা অকনবা লো লৈহন্নবা ৱাফম থম্লমখি হায়খি। হৌজিক্কী বিল অসিনা ৱাকফকী লন-থুমশিংগী অরোন অথুপ লৈতবা ওদিত সিস্তেম অমা লিংখৎনবা পান্দম থম্লি হায়না মহাক্না ফোঙদোকখি। ৱাকফ বোর্দকী য়াথংশিং ৱায়েলশঙদা শিংনবা য়াদে হায়রদুনা এমেন্দমেন্ত অমা পুরক্নবা ওপোজিসন্না হৌদোরকখি, অদুগা অশেংবা ৱাফমদি বিল অসিনা আইনগী থেঙদা শিংনবা য়াহল্লি হায়না মহাক্না হায়খি। বিল অসিনা মমাঙদা লৈখিবা ৱাফমশিংদা চৎনরোই, অদুবু ওপোজিসন্না মসিনা ওইহল্লকপা য়াবশিংগী মতাঙদা মুস্লিমশিংগী মরক্তা অকিবা পোকহন্নবা লান্না শন্দোক্লি হায়না মহাক্না মখা তাখি।
ৱাকফ বিলদা দিস্ত্রিক্ত কল্লেক্তরশিংগী থৌদাংগী মতাঙদা, শ্রী অমিত সাহনা, লৈবাকসিদা লাইশঙ অমগীদমক লম অমা লৈবা মতমদা লম অদুগী অশেঙবা মপু লেপথোক্লিবা অসি কল্লেক্তরননি হায়খি। কল্লেক্তরখক্তনা ৱাকফকী লম অমবু লৈঙাক্কী লমলা নত্তবা খঙদোক্নবা ওথোরিতী লৈ হায়রদুনা কল্লেক্তরনা ৱাকফকী লমগী মতাঙদা থিজিনবদা করিগী য়ানিংদ্রিবনো হায়বা ৱাহং মহাক্না হংখি।
কেন্দ্রগী গৃহ মন্ত্রী অমদি কোওপরেসন মন্ত্রীনা, মোদী লৈঙাক্না তরু তরুবা পরম অমা ইনদুনা চৎলি – লো অমত্তা ভোত বেঙ্ককী রাজনিতীগীদমক শেম্লোই, লো হায়বসিদি অচুম্বা ৱায়েল অমদি মীয়ামগী য়াইফনবগী পান্দম ফংহনবনি হায়খি। হাউস অসিমক্তদা মোদী লৈঙাক্না নুপীশিংগী ৩৩% রিজর্বেসনগী লো পাস তৌখি অমদি শোত্থরবা কাঙলুপশিংগী সংবিধানগী মঙম পীখি হায়না মহাক্না পুখৎখি। মীপুম খুদিংমক্না অপাম্বা লাইনিং চৎচনবা মঙম লৈ, অদুবু কল্লক, মীহৌবা, নৎত্রগা অকিবনা মরম ওইরগা নমদুনা লাইনিং ওলহন্বদি তৌহল্লোইদবনি হায়না মহাক্না মখা তানা ফোঙদোকখি।
শ্রী অমিত সাহন, ২০১৩ গী এমেন্দমেন্ত বিল অদু হাউস অনিমক্তা পুং ৫.৫ খন্নখি, অদুগা হৌজিক্কী বিল অসিনা পুং ১৬ খন্নরি হায়খি। লৈঙাক্না জোইন্ত কম্মিতী অমা শেমখি, মীফম ৩৮ পাঙথোকখি, পুং ১১৩ চুপ্না খন্ন-নৈনখ্রে অমদি স্তেকহোল্দর ২৮৪ য়াওহনখি। মসিগী মথক্তা লৈবাক পুম্বদগী ওনলাইন সজেসন করোর অমরোম লাকখি, পুম্নমক অসি লো অসি শেমদ্রিঙৈগী মমাঙদা মমুৎ তানা নৈনখি। মরম অদুনা মসিবু ইরায় লায়না কন্থৎপা য়ারোই। হাউস অসিগী মেম্বর খুদিংমক হাউস অসিদা মনিং তম্না ৱা ঙাংনবা মঙম লৈ। ইমুং অমত্তনা মফমসিগী চুপ্লি পায়দে। এম.পি. শিং অসি মীখলদা মীয়াম্না থাগৎলকপা মীহুৎশিংনি, হাউসতা কনাগুম্বা অমনা পুশিল্লকপা নত্তে, অমদি মখোয়না মীয়ামগী খোল্লাউ পুখৎলক্কদবনি।
লো অসি ভারতকী পার্লিয়ামেন্তনা শেমদুনা মসিবু মীপুম খুদিংমক্তা চৎনহল্লিবনি, অমদি মরম অদুনা মসিবু মীপুম খুদিংমক্না ইনগদবনি হায়না কেন্দ্রগী গৃহ মন্ত্রীনা হায়খি। ১৯১৩ দগী ২০১৩ ফাওবা, ৱাকফ বোর্দকী অপুনবা লম অসি একর লাখ ১৮ ওইরম্মি। অদুগা ২০১৩ দগী ২০২৫ ফাওবদা লম একর লাখ ২১ নৌনা হাপচিল্লক্তুনা পুন্না লম একর লাখ ৩৯ ওইখি। হান্না প্রোপর্তী লিশিং ২০ লীজতা পীথোক্লি হায়না রেকোর্দ তৌরক্লবসু, ২০২৫ গী রেকোর্দকী মতুং ইন্না, প্রোপর্তীশিং অসি জিরো ওইরক্তুনা, হায়রিবা লন-থুমশি অসি য়োন্থোকখ্রে হায়বা তাক্লি। কেথোলিক অমদি চর্চ ওর্গনাইজেসনশিংনা লো অসিদা মখোয়গী ঙাক্লৌ পীরক্লি অমদি ২০১৩ গী এমেন্দমেন্ত অদুবু অচুম্বা নত্তে হায়রক্লি হায়না মহাক্না ফোঙদোকখি।
বিল অসিনা লম কন্নবা ঙাক্লৌ পীগনি, কনাগুম্বা অমগী লমবু ইচম চম্না হেক্তা লাউথোক্লগা ৱাকফকী হেক্তা ওইবা য়ারোই – মসিনা আইনগী ঙাক্লৌ পীগনি হায়না শ্রী অমিত সাহনা ফোঙদোকখি। আর্কিওলোজিকেল দিপার্তমেন্ত অমদি আর্কিওলোজিকেল সর্ভে ওফ ইন্দিয়া (এ.এস.আই.) গী লমশিং ঙাক শেনগনি, অমদি সেদ্যুল ৫ অমসুং ৬ কী মতুং ইন্না ত্রাইবেলগী লমশিং ঙাক-শেনগনি হায়না মহাক্না ফোঙদোকখি। মসিগী মথক্তা মীচম মীয়ামগী লনাই লমশিং, বিল অসিগী মখাদা ঙাক শেনগনি। দোনেসন তৌরকপসু মশাগী লন-থুমখক্তমক্না তৌবা য়াগনি, হায়বদি ৱাকফনা লনাই লমবু মপুগী অয়াবা য়াওদনা লৌশিনবা য়াররোই হায়না শ্রী সাহনা ময়েক শেংনা খঙহনখি। অরোন অথুপ লৈহন্দনবা বিল অসিনা ৱাকফ এক্তদা শোয়বা য়াদবা ইনফোর্মেসন দিসক্লোজর প্রোসেস অমা য়াওরি।
লম অমবু ৱাকফনি হায়না লাউথোকপগী ওথোরিতী অদু মুত্থৎলে, অমদি হৌজিক্তি অসুম্না লাউথোকপা অসি দিস্ত্রিক্ত কল্লেক্তরনা ভেরিফাইদ তৌবা তাই হায়না গৃহ মন্ত্রীনা ফোঙদোকখি। মসিগী মথক্তা, অনৌবা ৱাকফ লন খুদিংমক অরোন অথুপ লৈতবা থৌওং অমগী খুত্থাঙদা রেজিস্তর তৌগদবনি। মুস্লিমশিংনা মখোয়গী ত্রস্তপু ৱাকফ ত্রস্ত এক্তকী মখাদা রেজিস্তর তৌনবগী ওপসন লৈগনি, মসিনা তোঙানআ ৱাকফ লো অমা থম্বগী মথৌ তাহল্লরোই হায়না মহাক্না মখা তাখি।
কেন্দ্রগী গৃহ মন্ত্রীনা অপীকপা ফুরুপশিংদা অকিপা পোকহনবা অসি চৎনবী অমা ওইরে হায়খি। রাম জন্মভুমি, ত্রিপল তলাক অমদি সি.এ.এ.গী মতমদসু, মুস্লিম ফুরুপকী মীওইশিংদা অকিবা পোকহন্নবা হোৎনখি। অদুবু মুস্লিম ফুরুপকী মীওইশিংনা মসিদা কিনিংঙাই করিসু লৈতে হায়বা খঙই। মহাক্না ওপোজিসনবু সি.এ.এ.না মরম ওইরগা মুস্লিমশিংনা মখোয়গী সিতিজনসিপ মাঙলগনি হায়না লান্না ক্লেম তৌখি হায়না মরাল শিরদুনা, চহি অনি হৌখ্রে, কনামত্তনা সি.এ.এ.না মরম ওইরগা সিতিজনসিপ মাঙবা লৈতে হায়না মহাক্না হায়খি। করিগুম্বা কনাগুম্বনা সি.এ.এ.না মরম ওইরগা সিতিজনসিপ মাঙলবদি, ওপোজিসন্না হাউসকী তেবলদা পুথোক্তুনা থম্বিয়ু হায়না মহাক্না ওপোজিসন্দা শিংনখি। আর্তিকল ৩৭০ মুত্থৎখ্রবা মতুংদসসু মসিগা মান্ননা অকিবা পোকহন্নবা হোৎনখি, অদুবু ঙসিদি, জম্মু অমসুং কাস্মিরদা মীয়ামগী লৈঙাক অমা লৈরে, তেরোরিজম হন্থরক্লে, চাওখৎ থৌরাং মাঙদা চঙশিল্লি, অমদি তুরিজমসু চাওখৎলক্লি হায়না মহাক্না মখা তাখি।
শ্রী অমিত সাহনা, ওপোজিসন অমদি মখোয়গী মীচঙশিংনা মুস্লিম ফুরুপ্পু কিহল্লগা মখোয়গী ভেত বেঙ্ক শেমগৎনবা হোৎনরি হায়খি। লৈবাক অসিগী সিতিজন অমত্তবু, মখোয়গী লাইনিংগী খেন্নবা লৈতনা, অমাঙবা তাহন্দনবা মোদী লৈঙাক্না চেৎনা লেপ্লি হায়না গৃহ মন্ত্রীনা ফোঙদোকখি।
****
(Release ID: 2118124)
Visitor Counter : 20