ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವರಾದ ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು, ಕಾರ್ಪೊರೇಟ್ ವ್ಯವಹಾರಗಳು ಹಾಗೂ ರಸ್ತೆ ಮತ್ತು ಸಾರಿಗೆ ರಾಜ್ಯ ಸಚಿವರಾದ ಶ್ರೀ ಹರ್ಷ ಮಲ್ಹೋತ್ರಾ ಅವರ ಸಮ್ಮುಖದಲ್ಲಿ ಮಾರ್ಚ್ 17 ರಂದು ನವದೆಹಲಿಯ ಸಂಸತ್ತಿನ ಸಮನ್ವಯ ಸಭಾಂಗಣ ಸಂಖ್ಯೆ 5 ರಲ್ಲಿ ಪ್ರಧಾನಮಂತ್ರಿ ಇಂಟರ್ನ್‌ಶಿಪ್ ಯೋಜನೆಗೆ ಮೀಸಲಾದ ಮೊಬೈಲ್ ಅಪ್ಲಿಕೇಶನ್ ಅನ್ನು ಬಿಡುಗಡೆ ಮಾಡಿದರು.

ಅಪ್ಲಿಕೇಶನ್ ಈ ಕೆಳಗಿನ ವೈಶಿಷ್ಟ್ಯಗಳನ್ನು ಹೊಂದಿದೆ:

• ಸ್ವಚ್ಛ ವಿನ್ಯಾಸ ಮತ್ತು ಸುಲಭ ನ್ಯಾವಿಗೇಷನ್‌ ಹೊಂದಿರುವ ಅರ್ಥಗರ್ಭಿತ ಇಂಟರ್ಫೇಸ್
• ಆಧಾರ್ ಮುಖದ ದೃಢೀಕರಣದ ಮೂಲಕ ಸುಲಭ ನೋಂದಣಿ
• ಸರಳ ನ್ಯಾವಿಗೇಷನ್‌ - ಅರ್ಹ ಅಭ್ಯರ್ಥಿಗಳು ಸ್ಥಳ ಇತ್ಯಾದಿಗಳ ಮೂಲಕ ಅವಕಾಶಗಳನ್ನು ಹುಡುಕಬಹುದು.
• ವೈಯಕ್ತಿಕ ಡ್ಯಾಶ್‌ಬೋರ್ಡ್
• ಮೀಸಲಾದ ಬೆಂಬಲ ತಂಡಕ್ಕೆ ಪ್ರವೇಶ
• ಅಭ್ಯರ್ಥಿಗಳಿಗೆ ಹೊಸ ನವೀಕರಣಗಳ ಬಗ್ಗೆ ಅರಿವು ಮೂಡಿಸಲು ನೈಜ ಸಮಯದ ಎಚ್ಚರಿಕೆಗಳು

ಶ್ರೀಮತಿ ನಿರ್ಮಲಾ ಸೀತಾರಾಮನ್ ಅವರು ಉದ್ಯೋಗ, ಕೌಶಲ್ಯ ಮತ್ತು ಅವಕಾಶಗಳನ್ನು ಹೆಚ್ಚಿಸಲು ಐದು ಯೋಜನೆಗಳ ಪ್ಯಾಕೇಜ್ ಅನ್ನು ಪ್ರಸ್ತುತಪಡಿಸುವಲ್ಲಿ ಪ್ರಧಾನ ಮಂತ್ರಿಯವರ ದೂರದೃಷ್ಟಿಯನ್ನು ಶ್ಲಾಘಿಸಿದರು. ಪ್ರಧಾನಮಂತ್ರಿ ಇಂಟರ್ನ್‌ಶಿಪ್ ಯೋಜನೆಯು ತರಗತಿಯ ಕಲಿಕೆ ಮತ್ತು ಉದ್ಯಮದ ನಿರೀಕ್ಷೆಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ಸಾಮರ್ಥ್ಯವನ್ನು ಹೊಂದಿದೆ ಎಂದು ಅವರು ಒತ್ತಿ ಹೇಳಿದರು, ಇದರಿಂದಾಗಿ ಯುವಜನರ ಉದ್ಯೋಗಾವಕಾಶ ಹೆಚ್ಚಾಗುತ್ತದೆ. ಅವರ ಭಾಗವಹಿಸುವಿಕೆಯು ರಾಷ್ಟ್ರ ನಿರ್ಮಾಣಕ್ಕೆ ಕೊಡುಗೆ ನೀಡುತ್ತದೆ ಮತ್ತು ದೇಶದಲ್ಲಿ ಕೌಶಲ್ಯಪೂರ್ಣ ಉದ್ಯೋಗಿಗಳನ್ನು ಉತ್ತೇಜಿಸುತ್ತದೆ ಎಂದು ಅವರು ಹೇಳಿದರು. ಉದ್ಯಮವು ಈ ಯೋಜನೆಯಲ್ಲಿ ಸಕ್ರಿಯವಾಗಿ ಭಾಗವಹಿಸಬೇಕು ಎಂದು ಅವರು ಒತ್ತಾಯಿಸಿದರು.

ಪಿಎಂಐಎಸ್ ಅಪ್ಲಿಕೇಶನ್‌ ನ ಬಿಡುಗಡೆಯು ಯುವಕರಿಗೆ ಇಂಟರ್ನ್‌ಶಿಪ್ ಅವಕಾಶಗಳಿಗೆ ಪ್ರವೇಶವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ ಎಂದು ರಾಜ್ಯ ಸಚಿವ ಶ್ರೀ ಹರ್ಷ್ ಮಲ್ಹೋತ್ರಾ ಹೇಳಿದರು.

ಪಿಎಂಐಎಸ್ ಅಪ್ಲಿಕೇಶನ್ ಜೊತೆಗೆ, ಬಳಕೆದಾರರು ಇತ್ತೀಚೆಗೆ ಕಾರ್ಪೊರೇಟ್ ವ್ಯವಹಾರಗಳ ಸಚಿವಾಲಯ (ಎಂಸಿಎ) ಘೋಷಿಸಿದ ರೆಫರಲ್ ಪ್ರೋಗ್ರಾಂ ಅನ್ನು ಸಹ ಅನ್ವೇಷಿಸಬಹುದು. ರೆಫರಲ್ ಪ್ರೋಗ್ರಾಂ ನೋಂದಾಯಿತ ಯುವಕರಿಗೆ ಇತರ ಅರ್ಹ ಅಭ್ಯರ್ಥಿಗಳನ್ನು ಯೋಜನೆಗೆ ಉಲ್ಲೇಖಿಸಲು ಮತ್ತು ಬಹುಮಾನಗಳನ್ನು ಗೆಲ್ಲಲು ಅನುವು ಮಾಡಿಕೊಡುತ್ತದೆ. ಪಿಎಂ ಇಂಟರ್ನ್‌ಶಿಪ್ ಪೋರ್ಟಲ್‌ ನಲ್ಲಿ (ವೆಬ್ ಬ್ರೌಸರ್) ನೋಂದಾಯಿಸಿದ ಯುವಕರು ಸಹ ಈ ರೆಫರಲ್ ಕಾರ್ಯಕ್ರಮದಲ್ಲಿ ಭಾಗವಹಿಸಬಹುದು.

2024-25ರ ಬಜೆಟ್‌ ನಲ್ಲಿ ಘೋಷಿಸಲಾದ ಪ್ರಧಾನ ಮಂತ್ರಿಯವರ ಇಂಟರ್ನ್‌ಶಿಪ್ ಯೋಜನೆ (ಪಿಎಂಐಎಸ್ ಸ್ಕೀಮ್), ಐದು ವರ್ಷಗಳಲ್ಲಿ ಅಗ್ರ 500 ಕಂಪನಿಗಳಲ್ಲಿ ಒಂದು ಕೋಟಿ ಯುವಜನರಿಗೆ ಇಂಟರ್ನ್‌ಶಿಪ್ ಅವಕಾಶಗಳನ್ನು ಒದಗಿಸುವ ಗುರಿಯನ್ನು ಹೊಂದಿದೆ. ಈ ಯೋಜನೆಯ ಪ್ರಾರಂಭವಾಗಿ, 2024-25ನೇ ಹಣಕಾಸು ವರ್ಷಕ್ಕೆ ಯುವಜನರಿಗೆ 1.25 ಲಕ್ಷ ಇಂಟರ್ನ್‌ಶಿಪ್ ಅವಕಾಶಗಳನ್ನು ಒದಗಿಸುವ ಗುರಿಯೊಂದಿಗೆ 03.10.2024 ರಂದು ಪ್ರಾಯೋಗಿಕ ಯೋಜನೆಯನ್ನು ಪ್ರಾರಂಭಿಸಲಾಯಿತು. ಯೋಜನೆಯ ಮುಖ್ಯ ಲಕ್ಷಣಗಳು ಈ ಕೆಳಗಿನಂತಿವೆ:

• ಭಾರತದ ಉನ್ನತ ಕಂಪನಿಗಳಲ್ಲಿ 12 ತಿಂಗಳ ಪಾವತಿಸಿದ ಇಂಟರ್ನ್‌ಶಿಪ್.
• ಈ ಯೋಜನೆಯು ಯುವಜನರಿಗೆ ತರಬೇತಿ ಪಡೆಯಲು, ವ್ಯವಹಾರಗಳು ಅಥವಾ ಸಂಸ್ಥೆಗಳ ನೈಜ-ಜೀವನದ ವಾತಾವರಣದಲ್ಲಿ ಅನುಭವ ಮತ್ತು ಕೌಶಲ್ಯಗಳನ್ನು ಪಡೆಯಲು (ಕನಿಷ್ಠ ಆರು ತಿಂಗಳುಗಳು) ಅವಕಾಶವನ್ನು ಒದಗಿಸುತ್ತದೆ. ಇದು ಶೈಕ್ಷಣಿಕ ಕಲಿಕೆ ಮತ್ತು ಉದ್ಯಮದ ಅವಶ್ಯಕತೆಗಳ ನಡುವಿನ ಅಂತರವನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ, ಪ್ರತಿಯಾಗಿ, ಅವರ ಉದ್ಯೋಗವನ್ನು ಹೆಚ್ಚಿಸಲು ಸಹಾಯ ಮಾಡುತ್ತದೆ.
• ಈ ಯೋಜನೆಯು 21 ರಿಂದ 24 ವರ್ಷ ವಯಸ್ಸಿನ ಪ್ರಸ್ತುತ ಯಾವುದೇ ಪೂರ್ಣ ಸಮಯದ ಶೈಕ್ಷಣಿಕ ಕಾರ್ಯಕ್ರಮಕ್ಕೆ ದಾಖಲಾಗಿಲ್ಲದ ಅಥವಾ ಪೂರ್ಣ ಸಮಯದ ಉದ್ಯೋಗದಲ್ಲಿಲ್ಲದ ವ್ಯಕ್ತಿಗಳನ್ನು ಗುರಿಯಾಗಿಸುತ್ತದೆ, ಅವರ ವೃತ್ತಿಜೀವನವನ್ನು ಪ್ರಾರಂಭಿಸಲು ಅವರಿಗೆ ಅನನ್ಯ ಅವಕಾಶವನ್ನು ಒದಗಿಸುತ್ತದೆ.
• ಪ್ರತಿ ಇಂಟರ್ನ್‌ ಗೆ ಮಾಸಿಕ ₹5,000 ಆರ್ಥಿಕ ನೆರವು ನೀಡಲಾಗುವುದು, ಇದರ ಜೊತೆಗೆ ₹6,000 ಒಂದು ಬಾರಿ ಆರ್ಥಿಕ ನೆರವು ನೀಡಲಾಗುವುದು.

ಪ್ರಾಯೋಗಿಕ ಯೋಜನೆಯ ಮೊದಲ ಹಂತದಲ್ಲಿ (ಅಕ್ಟೋಬರ್-ಡಿಸೆಂಬರ್ 2024), 25 ವಲಯಗಳ 280 ಕಂಪನಿಗಳು ಸುಮಾರು 745 ಜಿಲ್ಲೆಗಳಲ್ಲಿ 1.27 ಲಕ್ಷಕ್ಕೂ ಹೆಚ್ಚು ಅವಕಾಶಗಳನ್ನು ಪ್ರಕಟಿಸಿದವು. ಅಭ್ಯರ್ಥಿಗಳಿಗೆ 82,000 ಕ್ಕೂ ಹೆಚ್ಚು ಆಫರ್‌ ಗಳನ್ನು ನೀಡಲಾಯಿತು.

ಎರಡನೇ ಸುತ್ತಿನ ಪ್ರಾಯೋಗಿಕ ಯೋಜನೆಯು ಜನವರಿ 2025 ರಲ್ಲಿ ಪ್ರಾರಂಭವಾಯಿತು ಮತ್ತು ಸುಮಾರು 327 ಕಂಪನಿಗಳು ದೇಶಾದ್ಯಂತ 1.18 ಲಕ್ಷಕ್ಕೂ ಹೆಚ್ಚು ಅವಕಾಶಗಳನ್ನು (ಹೊಸ ಮತ್ತು ಹಿಂದಿನ ಸುತ್ತಿನ ಭರ್ತಿ ಮಾಡದ ಅವಕಾಶಗಳು) ಪ್ರಕಟಿಸಿದವು. ಇದರಲ್ಲಿ ಪದವೀಧರರಿಗೆ ಸುಮಾರು 37,000, ಐಟಿಐ ಹೊಂದಿರುವವರಿಗೆ 23,000, ಡಿಪ್ಲೊಮಾ ಹೊಂದಿರುವವರಿಗೆ 18,000, 12ನೇ ತರಗತಿಯವರಿಗೆ 15,000 ಮತ್ತು 10ನೇ ತರಗತಿಯವರಿಗೆಗೆ 25,000 ಅವಕಾಶಗಳಿವೆ. ಆಟೋಮೊಬೈಲ್, ಪ್ರಯಾಣ ಮತ್ತು ಆತಿಥ್ಯ, ಬ್ಯಾಂಕಿಂಗ್ ಮತ್ತು ಹಣಕಾಸು ಮುಂತಾದ ವಿವಿಧ ವಲಯಗಳಲ್ಲಿ ಅವಕಾಶಗಳು ಮತ್ತು ಮಾರಾಟ ಮತ್ತು ಮಾರ್ಕೆಟಿಂಗ್, ಐಟಿಐ ಪಾಸಾದವರಿಗೆ ತಾಂತ್ರಿಕ ಪಾತ್ರಗಳು, ಮಾನವ ಸಂಪನ್ಮೂಲ ಇಂಟರ್ನ್‌ಶಿಪ್‌ ಗಳು ಮತ್ತು ಇನ್ನೂ ಹೆಚ್ಚಿನ ವೈವಿಧ್ಯಮಯ ಉದ್ಯೋಗ ಪಾತ್ರಗಳನ್ನು ಒದಗಿಸಲಾಗಿದೆ. ಈ ಅವಕಾಶಗಳು ದೇಶದ ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ 735 ಜಿಲ್ಲೆಗಳಲ್ಲಿ ಹರಡಿಕೊಂಡಿವೆ.

ಪ್ರಾಯೋಗಿಕ ಯೋಜನೆಯ ಎರಡನೇ ಹಂತದಲ್ಲಿ, ಪಿಎಂ ಇಂಟರ್ನ್‌ಶಿಪ್ ಯೋಜನೆಯ ವ್ಯಾಪ್ತಿಯನ್ನು ಹೆಚ್ಚಿಸಲು ಮತ್ತು ಜಾಗೃತಿ ಮೂಡಿಸಲು ಉಪಕ್ರಮವನ್ನು ತೆಗೆದುಕೊಳ್ಳಲಾಗಿದೆ. ಪಿಎಂಐಎಸ್ ಪೋರ್ಟಲ್‌‌ ನ ಡ್ಯಾಶ್‌ಬೋರ್ಡ್ ಅನ್ನು ಸರಳಗೊಳಿಸಲಾಗಿದೆ, ಹೆಚ್ಚು ಬಳಕೆದಾರ ಸ್ನೇಹಿಯಾಗಿ ಮಾಡಲಾಗಿದೆ ಮತ್ತು ಅವಕಾಶಗಳು ಮತ್ತು ಪಾತ್ರಗಳ ಕುರಿತು ಹೆಚ್ಚಿನ ಮಾಹಿತಿಯನ್ನು ಒದಗಿಸಲಾಗಿದೆ. ಎಂಸಿಎ, ರಾಜ್ಯ ಸರ್ಕಾರಗಳ ಅಧಿಕಾರಿಗಳು ಮತ್ತು ಉದ್ಯಮ ಪಾಲುದಾರರು ಕಾಲೇಜುಗಳು ಮತ್ತು ಉದ್ಯೋಗ ಮೇಳಗಳಂತಹ ವಿವಿಧ ಶಿಕ್ಷಣ ಸಂಸ್ಥೆಗಳಲ್ಲಿ ಆಯೋಜಿಸಲಾದ 80 ಕ್ಕೂ ಹೆಚ್ಚು ಜನಸಂಪರ್ಕ ಕಾರ್ಯಕ್ರಮಗಳಲ್ಲಿ ಯುವಜನರೊಂದಿಗೆ ಸಂವಾದ ನಡೆಸಿದರು.

ಪ್ರಾಯೋಗಿಕ ಯೋಜನೆಯ ಅನುಷ್ಠಾನವನ್ನು ಮೌಲ್ಯಮಾಪನ ಮಾಡಲು ಮತ್ತು ಪಿಎಂಐಎಸ್ ನ ಅನುಷ್ಠಾನದಲ್ಲಿ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಪ್ರಯತ್ನಗಳನ್ನು ಗುರುತಿಸಲು ಮತ್ತು ಪುರಸ್ಕರಿಸಲು ಒಂದು ಚೌಕಟ್ಟನ್ನು ಪಿಎಂಐಎಸ್ ನ ಎರಡನೇ ಸುತ್ತಿನಲ್ಲಿ ಪರಿಚಯಿಸಲಾಗಿದೆ.

ಎರಡನೇ ಸುತ್ತಿನ ಇಂಟರ್ನ್‌ಶಿಪ್ ಅಪ್ಲಿಕೇಶನ್ ವಿಂಡೋ ಮಾರ್ಚ್ 31, 2025 ರವರೆಗೆ ತೆರೆದಿರುತ್ತದೆ.

ಅರ್ಹ ಯುವಜನರು ಹೊಸ ಮೊಬೈಲ್ ಅಪ್ಲಿಕೇಶನ್ ಅಥವಾ https://pminternship.mca.gov.in/ ಪೋರ್ಟಲ್ ಮೂಲಕ ಅರ್ಜಿ ಸಲ್ಲಿಸಬಹುದು.

*****