2026 గణతంత్ర దినోత్సవం సందర్భంగా ప్రకటించే పద్మ అవార్డులు-2026 కోసం నామినేషన్లు/ సిఫార్సుల స్వీకరణ 2025 మార్చి 15న ప్రారంభించారు. పద్మ అవార్డుల నామినేషన్ల సమర్పణకు చివరి తేదీ 2025 జూలై 31. పద్మ అవార్డులకు సంబంధించిన నామినేషన్లు/సిఫార్సులను రాష్ట్రీయ పురస్కార్ పోర్టల్ (https://awards.gov.in) పై ఆన్ లైన్ లో మాత్రమే స్వీకరిస్తారు.

పద్మ విభూషణ్, పద్మ భూషణ్ పద్మశ్రీ పేర్లతో ఇచ్చే పద్మ అవార్డులు దేశంలోని అత్యున్నత పౌర పురస్కారాలలో ఒకటి. 1954లో ఏర్పాటైన ఈ అవార్డులను ప్రతి ఏటా గణతంత్ర దినోత్సవం సందర్భంగా ప్రకటిస్తారు. కళలు, సాహిత్యం, విద్య, క్రీడలు, వైద్యం, సోషల్ వర్క్, సైన్స్ అండ్ ఇంజనీరింగ్, పబ్లిక్ అఫైర్స్, సివిల్ సర్వీస్, ట్రేడ్ అండ్ ఇండస్ట్రీ వంటి అన్ని రంగాలు / విభాగాలలో విశిష్ట, అసాధారణ విజయాలు / సేవలకు గాను ఈ అవార్డును ఇస్తారు. జాతి, వృత్తి, హోదా లేదా లింగ భేదం లేకుండా వ్యక్తులందరూ ఈ అవార్డులకు అర్హులు. డాక్టర్లు, సైంటిస్టులు మినహా పీఎస్ యూల్లో పనిచేసే వారితో సహా ప్రభుత్వ ఉద్యోగులు మాత్రం పద్మ అవార్డులకు అనర్హులు.

ప్రభుత్వం పద్మ అవార్డులను “ప్రజల పద్మ”గా మార్చడానికి కట్టుబడి ఉంది. అందువల్ల, పౌరులందరూ స్వీయ నామినేషన్ సహా నామినేషన్లు/సిఫారసులు చేయాలని కోరుతోంది. మహిళలు, సమాజంలోని బలహీన వర్గాలు, ఎస్సీలు, ఎస్టీలు, దివ్యాంగులు ఇంకా సమాజానికి నిస్వార్థ సేవ చేస్తున్న వారిలో గుర్తింపు పొందేందుకు అర్హత కలిగిన ప్రతిభావంతులైన వ్యక్తులను గుర్తించడానికి సమష్టి ప్రయత్నాలు జరగాలని ప్రభుత్వం భావిస్తోంది.

నామినేషన్లు/సిఫారసులు పైన పేర్కొన్న పోర్టల్‌లోని ఫార్మాట్‌లో సూచించిన సంబంధిత వివరాలను కలిగి ఉండాలి. సిఫారసు చేసే వ్యక్తి సంబంధిత రంగం/శాఖలో చేసిన విశిష్టమైన, అసాధారణమైన కృషి/సేవ‌ను స్పష్టంగా తెలియచేస్తూ గరిష్టంగా 800 పదాల్లో వివరణాత్మక సమాచారం ఉండాలి.

సంబంధిత వివరాలు హోం వ్యవహారాల మంత్రిత్వ శాఖ వెబ్‌సైట్ (https://mha.gov.in) లోని ‘Awards and Medals’ విభాగంలోనూ, పద్మ అవార్డుల పోర్టల్ (https://padmaawards.gov.in) లోనూ అందుబాటులో ఉన్నాయి. ఈ అవార్డులకు సంబంధించిన నియమ నిబంధనలను ఈ లింక్‌లో చూడవచ్చు: https://padmaawards.gov.in/AboutAwards.aspx.

***