سال 2026 کے پدم ایوارڈزکے لیے نامزدگیوں اور تجویزات کا سلسلہ 15 مارچ 2025 سے شروع ہو چکا ہے۔یہ ایوارڈز یومِ جمہوریہ 2026 کے موقع پر دیے جائیں گے۔پدم اعزازات کے لیے نامزدگیوں کی آخری تاریخ 31 جولائی 2025 مقرر کی گئی ہے۔ نامزدگیاں/تجویزات صرف راشٹریہ پورسکار پورٹل (https://awards.gov.in) پر آن لائن ہی قبول کی جائیں گی۔

پدم اعزازات ، یعنی پدم وبھوشن، پدم بھوشن اور پدم شری، ملک کے اعلیٰ ترین شہری اعزازات میں شمار کیے جاتے ہیں۔ یہ ایوارڈ 1954 میں قائم کیے گئے تھے اور ہر سال یومِ جمہوریہ کے موقع پر اعلان کیے جاتے ہیں۔ یہ ایوارڈ کسی بھی شعبے میں نمایاں اور غیر معمولی خدمات/کارناموں کے اعتراف میں دیے جاتے ہیں، ان شعبوں میں  فن، ادب و تعلیم، کھیل، طب، سماجی خدمات، سائنس و انجینئرنگ، عوامی امور، سول سروس، تجارت و صنعت وغیرہ شامل ہیں۔

یہ ایوارڈ ہر شخص کے لیے، بغیر کسی تفریق کے، دستیاب ہیں، خواہ وہ کسی بھی پیشے، عہدے، یا صنف سے تعلق رکھتا ہو۔ تاہم، ڈاکٹروں اور سائنسدانوں کے سوا سرکاری ملازمین پدم ایوارڈز کے لئے اہل نہیں ہیں خواہ وہ عوامی شعبے کے اداروں میں کام کرنے والے افراد ہی کیوں نہ ہوں۔

حکومت ہند نے پدم ایوارڈز کو ’’عوام کا پدم‘‘ بنانے کے عزم کا اظہار کیا ہے۔ اس لیے تمام شہریوں سے گزارش ہے کہ وہ مستحق افراد کی نامزدگیاں/تجویزات پیش کریں، بشمول اپنی خود کی نامزدگی۔ خاص طور پر ان ہنرمند افراد کی شناخت کے لیے کوششیں کی جانی چاہئیں جو اپنی غیر معمولی صلاحیتوں اور خدمات کے ذریعے نمایاں ہیں، خصوصاً خواتین، معاشرے کے کمزور طبقات، درج فہرست ذاتوں اور درج فہرست قبائل ، معذور افراد اور وہ لوگ جو بے لوث سماجی خدمت انجام دے رہے ہیں۔

نامزدگیوں/تجویزات میں تمام ضروری تفصیلات شامل ہونی چاہئیں، جیسا کہ مذکورہ پورٹل پر دستیاب فارمیٹ میں بیان کیا گیا ہے۔ اس میں ایک بیانیہ (زیادہ سے زیادہ 800 الفاظ) بھی شامل ہونا چاہیے، جو واضح طور پر متعلقہ شعبے/ڈسپلن میں فرد کے نمایاں اور غیر معمولی کارناموں کو اجاگر کرے۔

اس سلسلے میں مزید تفصیلات وزارت داخلہ کی ویب سائٹ (https://mha.gov.in) اور پدم ایوارڈز پورٹل (https://padmaawards.gov.in) پر ’’ایوارڈز اینڈ میڈلز‘‘ کے تحت دستیاب ہیں۔ ایوارڈز سے متعلق قواعد و ضوابط درج ذیل لنک پر دیکھے جا سکتے ہیں: https://padmaawards.gov.in/AboutAwards.aspx۔

******

ش ح۔ ش ا ر۔ ول

Uno- 8319