ഭാരത് മാതാ കീ – ജയ്!

ഭാരത് മാതാ കീ – ജയ്!

കേന്ദ്ര മന്ത്രിസഭയിലെ എന്റെ സഹപ്രവർത്തകരായ അന്നപൂർണ്ണ ദേവി ജി, സാവിത്രി താക്കൂർ ജി, സുകാന്ത മജുംദാർ ജി, മറ്റ് വിശിഷ്ട വ്യക്തികളെ, രാജ്യത്തിന്റെ എല്ലാ കോണുകളിൽ നിന്നും ഇവിടെ എത്തിയ എല്ലാ അതിഥികളെ, എല്ലാ പ്രിയപ്പെട്ട കുട്ടികളെ,

ഇന്ന്, മൂന്നാമത് 'വീർ ബാൽ ദിവസ്' ആഘോഷത്തിന്റെ ഭാഗമായാണ് നാം ഇവിടെ പങ്കെടുക്കുന്നത്. മൂന്ന് വർഷം മുമ്പ്, ധീരരായ സാഹിബ്‌സാദേമാരുടെ ത്യാഗത്തിന്റെ നിത്യ സ്മരണയ്ക്കായി നമ്മുടെ ഗവണ്മെൻ്റ് വീർ ബാൽ ദിവസ് ആചരിക്കാൻ തുടങ്ങി. ഇന്ന്, ഈ ദിവസം കോടിക്കണക്കിന് പൗരന്മാർക്കും മുഴുവൻ രാഷ്ട്രത്തിനും ദേശീയ പ്രചോദനത്തിന്റെ ഉത്സവമായി മാറിയിരിക്കുന്നു. ഈ ദിവസം ഭാരതത്തിലെ എണ്ണമറ്റ കുട്ടികളെയും യുവജനങ്ങളെയും അജയ്യമായ ധൈര്യത്താൽ പ്രചോദിപ്പിച്ചിരിക്കുന്നു! ഇന്ന്, രാജ്യത്തുടനീളമുള്ള 17 കുട്ടികളെ ധീരത, നൂതനാശയം, ശാസ്ത്ര സാങ്കേതിക വിദ്യ, കായികം, കല എന്നിവയിലെ നേട്ടങ്ങൾക്ക് ആദരിച്ചു. അവരെല്ലാം ഭാരതത്തിലെ കുട്ടികളുടെയും യുവജനങ്ങളുടെയും അവിശ്വസനീയമായ കഴിവ് പ്രകടിപ്പിച്ചിട്ടുണ്ട്. ഈ അവസരത്തിൽ, നമ്മുടെ ഗുരുക്കന്മാരുടെയും ധീരരായ സാഹിബ്‌സാദേമാരുടെയും കാൽക്കൽ ഞാൻ ആദരവോടെ വണങ്ങുന്നു. പുരസ്കാരങ്ങൾ നേടിയ എല്ലാ കുട്ടികൾക്കും അവരുടെ കുടുംബങ്ങൾക്കും എന്റെ അഭിനന്ദനങ്ങൾ അറിയിക്കുന്നതിനൊപ്പം, രാഷ്ട്രത്തിന്റെ പേരിൽ അവർക്ക് എന്റെ ആശംസകൾ നേരുന്നു.

സുഹൃത്തുക്കളേ,

ഇന്ന് നിങ്ങളോട് സംസാരിക്കുമ്പോൾ, ധീരരായ സാഹിബ്‌സാദേമാർ പരമമായ ത്യാഗം ചെയ്ത സാഹചര്യങ്ങളെക്കുറിച്ചും ഞാൻ പ്രതിപാദിക്കും. ഇന്നത്തെ യുവതലമുറ ഈ സംഭവങ്ങളെക്കുറിച്ച് അറിയേണ്ടത് ഒരുപോലെ പ്രധാനമാണ്. അതുകൊണ്ടാണ് ഈ സംഭവങ്ങൾ ആവർത്തിച്ച് ഓർമ്മിക്കേണ്ടത് അത്യാവശ്യമായിരിക്കുന്നത്. ഏകദേശം 325 വർഷങ്ങൾക്ക് മുമ്പ്, ഡിസംബർ 26 ന്, ധീരരായ സാഹിബ്‌സാദേമാർ ചെറുപ്പത്തിൽ തന്നെ ജീവൻ ബലിയർപ്പിച്ചു. സാഹിബ്‌സാദ സോറാവർ സിങ്ങും സാഹിബ്‌സാദ ഫത്തേ സിങ്ങും പ്രായം കൊണ്ട് നന്നേ ചെറുപ്പമായിരുന്നു, പക്ഷേ അവരുടെ ധൈര്യം ആകാശത്തേക്കാൾ ഉയർന്നതായിരുന്നു. മുഗൾ സാമ്രാജ്യത്തിന്റെ എല്ലാ പ്രലോഭനങ്ങളെയും അവർ നിരാകരിച്ചു, എല്ലാ ക്രൂരതകളും സഹിച്ചു, വസീർ ഖാൻ അവരെ ജീവനോടെ ചുവരിൽ മൂടാൻ ഉത്തരവിട്ടപ്പോൾ, അവർ അത് അത്യധികം ധൈര്യത്തോടെ സ്വീകരിച്ചു. ഗുരു അർജുൻ ദേവ്, ഗുരു തേജ് ബഹാദൂർ, ഗുരു ഗോബിന്ദ് സിംഗ് എന്നിവരുടെ ധീരതയെ അടിച്ചമർത്തിയവരെ സാഹിബ്‌സാദേമാർ ഓർമ്മിപ്പിച്ചു. അവരുടെ ധൈര്യമായിരുന്നു നമ്മുടെ വിശ്വാസത്തിന്റെ ആത്മീയ ശക്തി. സാഹിബ്‌സാദേമാർ മരണം സ്വീകരിച്ചു, പക്ഷേ ഒരിക്കലും അവരുടെ വിശ്വാസങ്ങളുടെ പാതയിൽ നിന്ന് വ്യതിചലിച്ചില്ല. എത്ര ദുഷ്‌കരമായ സാഹചര്യങ്ങളായാലും, എത്ര പ്രതികൂല കാലങ്ങളായാലും, രാഷ്ട്രത്തേക്കാളും രാഷ്ട്രത്തിന്റെ ക്ഷേമത്തേക്കാളും വലുതായി ഒന്നുമില്ലെന്ന് ഈ വീർ ബാൽ ദിവസ് ദിനം നമ്മെ പഠിപ്പിക്കുന്നു. രാജ്യത്തിനുവേണ്ടി ചെയ്യുന്ന ഓരോ പ്രവൃത്തിയും ധീരതയുടെ അടയാളമാണ്, രാഷ്ട്രത്തിനുവേണ്ടി ജീവിക്കുന്ന ഓരോ കുട്ടിയും യുവാവും ഒരു 'വീർ ബാലക്' (ധീരനായ കുട്ടി) ആണ്.

സുഹൃത്തുക്കളേ,

ഈ വർഷത്തെ വീർ ബാൽ ദിവസ് കൂടുതൽ സവിശേഷമാണ്. ഇന്ത്യൻ റിപ്പബ്ലിക്കും നമ്മുടെ ഭരണഘടനയും സ്ഥാപിതമായതിന്റെ 75-ാം വാർഷികമാണ് ഈ വർഷം. ഈ 75-ാം വർഷത്തിൽ, രാജ്യത്തെ ഓരോ പൗരനും രാജ്യത്തിന്റെ ഐക്യത്തിനും അഖണ്ഡതയ്ക്കും വേണ്ടി പ്രവർത്തിക്കാൻ ധീരരായ സാഹിബ്‌സാദേമാരിൽ നിന്ന് പ്രചോദനം ഉൾക്കൊള്ളുന്നു. ഇന്ന്, ഭാരതം അഭിമാനിക്കുന്ന ശക്തമായ ജനാധിപത്യം സാഹിബ്‌സാദേമാരുടെ ധീരതയുടെയും ത്യാഗത്തിന്റെയും അടിത്തറയിലാണ് നിർമ്മിച്ചിരിക്കുന്നത്. 'അന്ത്യോദയ' (സമൂഹത്തിലെ അവസാനത്തെ വ്യക്തിയുടെ ഉന്നമനം) എന്ന ലക്ഷ്യത്തിനായി പ്രവർത്തിക്കാൻ നമ്മുടെ ജനാധിപത്യം നമ്മെ പ്രചോദിപ്പിക്കുന്നു. രാജ്യത്ത് ആരും ഉന്നതരോ താഴ്ന്നവരോ അല്ലെന്ന് ഭരണഘടന നമ്മെ പഠിപ്പിക്കുന്നു. ഈ നയവും പ്രചോദനവും 'സർബത് ദാ ഭല' - എല്ലാവരുടെയും ക്ഷേമം- എന്ന ഗുരു മന്ത്രത്തെ പ്രതിധ്വനിപ്പിക്കുന്നു. എല്ലാവരെയും തുല്യതയോടെ കാണാൻ ഗുരു പാരമ്പര്യം നമ്മെ പഠിപ്പിച്ചു, ഭരണഘടനയും അതേ തത്വം ഉൾക്കൊള്ളുന്നു. ധീരരായ സാഹിബ്‌സാദേമാരുടെ ജീവിതം രാജ്യത്തിന്റെ അഖണ്ഡതയിലും മൂല്യങ്ങളിലും വിട്ടുവീഴ്ച ചെയ്യരുതെന്ന് നമ്മെ പഠിപ്പിക്കുന്നു. അതുപോലെ, ഭാരതത്തിന്റെ പരമാധികാരവും ഐക്യവും പരമപ്രധാനമായി നിലനിർത്തുക എന്ന തത്വം ഭരണഘടന സ്ഥാപിക്കുന്നു. ഒരു തരത്തിൽ പറഞ്ഞാൽ, നമ്മുടെ ഗുരുക്കന്മാരുടെ ഉപദേശങ്ങളെയും, സാഹിബ്‌സാദേമാരുടെ ത്യാഗത്തെയും, രാഷ്ട്രത്തിന്റെ ഐക്യത്തിന്റെ അടിസ്ഥാന മന്ത്രത്തെയും ജനാധിപത്യത്തിന്റെ വിശാലത ഉൾക്കൊള്ളുന്നു.

സുഹൃത്തുക്കളേ,

ചരിത്രം മുതൽ ഇന്നുവരെ, ഭാരതത്തിന്റെ പുരോഗതിയിൽ യുവശക്തി എല്ലായ്പ്പോഴും ഒരു പ്രധാന പങ്ക് വഹിച്ചിട്ടുണ്ട്. സ്വാതന്ത്ര്യസമരം മുതൽ 21-ാം നൂറ്റാണ്ടിലെ പ്രസ്ഥാനങ്ങൾ വരെ, ഭാരതത്തിന്റെ യുവജനങ്ങൾ എല്ലാ വിപ്ലവങ്ങളിലും സംഭാവന നൽകിയിട്ടുണ്ട്. നിങ്ങളെപ്പോലുള്ള യുവജനങ്ങളുടെ ശക്തി കൊണ്ടാണ് ലോകം മുഴുവൻ ഭാരതത്തെ പ്രതീക്ഷയോടെയും പ്രത്യാശയോടെയും നോക്കുന്നത്. ഇന്ന്, സ്റ്റാർട്ടപ്പുകൾ മുതൽ ശാസ്ത്രം വരെയും, കായികം മുതൽ സംരംഭകത്വം വരെയും, യുവജനങ്ങൾ ഭാരതത്തിൽ പുതിയ വിപ്ലവങ്ങൾ നയിക്കുന്നു. അതുകൊണ്ടാണ് ഗവൺമെന്റിന്റെ മുൻ‌ഗണനയായി യുവജനങ്ങളെ ശാക്തീകരിക്കുന്നതിൽ ഞങ്ങളുടെ നയങ്ങൾ ശ്രദ്ധ കേന്ദ്രീകരിക്കുന്നത്. സ്റ്റാർട്ടപ്പ് ആവാസവ്യവസ്ഥയായാലും, ബഹിരാകാശ സമ്പദ്‌വ്യവസ്ഥയുടെ ഭാവിയായാലും, കായിക, ഫിറ്റ്‌നസ് മേഖലയായാലും, ഫിൻ‌ടെക്, നിർമ്മാണ വ്യവസായങ്ങളായാലും, നൈപുണ്യ വികസനവും ഇന്റേൺഷിപ്പ് പദ്ധികളായാലും, എല്ലാ നയങ്ങളും യുവജന കേന്ദ്രീകൃതവും, യുവാക്കളെ ചുറ്റിപറ്റിയുള്ളതും, അവരുടെ താൽപ്പര്യങ്ങളുമായി പൊരുത്തപ്പെടുന്നതുമാണ്. ഇന്ന്, രാജ്യത്തിന്റെ വികസനവുമായി ബന്ധപ്പെട്ട എല്ലാ മേഖലകളിലും യുവജനങ്ങൾക്ക് പുതിയ അവസരങ്ങൾ ലഭിക്കുന്നു. അവരുടെ കഴിവും ആത്മവിശ്വാസവും ഗവണ്മെൻ്റ് പിന്തുണയ്ക്കുന്നു.

എന്റെ യുവ സുഹൃത്തുക്കളെ,

ഇന്നത്തെ അതിവേഗം മാറിക്കൊണ്ടിരിക്കുന്ന ലോകത്ത്, ആവശ്യകതകൾ പുതിയതാണ്, പ്രതീക്ഷകൾ പുതിയതാണ്, ഭാവിയിലേക്കുള്ള ദിശകളും പുതിയതാണ്. ഈ യുഗം യന്ത്രങ്ങൾക്ക് അപ്പുറം മെഷീൻ ലേണിംഗ് മേഖലയിലേക്ക് പുരോഗമിച്ചിരിക്കുന്നു. പരമ്പരാഗത സോഫ്റ്റ്‌വെയറിനെ മാറ്റിസ്ഥാപിക്കുന്ന AI യുടെ ഉപയോഗം വർദ്ധിച്ചുകൊണ്ടിരിക്കുകയാണ്. എല്ലാ മേഖലകളിലും, നമുക്ക് പുതിയ മാറ്റങ്ങളും വെല്ലുവിളികളും അനുഭവിക്കാൻ കഴിയും. അതിനാൽ, നമ്മുടെ യുവജനങ്ങളെ ഭാവിയിലേക്ക് സജ്ജരാക്കാൻ നാം തയ്യാറാക്കണം. നിങ്ങൾക്ക് കാണാനാകുന്നതുപോലെ, രാജ്യം വളരെ മുമ്പുതന്നെ ഇതിനായി തയ്യാറെടുക്കാൻ തുടങ്ങി. പുതിയ ദേശീയ വിദ്യാഭ്യാസ നയം (NEP) ഞങ്ങൾ അവതരിപ്പിച്ചു. വിദ്യാഭ്യാസം ഞങ്ങൾ ആധുനികവൽക്കരിച്ചു, അതിന് വിശാലമായ വ്യാപ്തി നൽകുകയും അതിനെ അനന്തമാക്കുകയും ചെയ്തു. നമ്മുടെ യുവജനങ്ങൾ പുസ്തകാധിഷ്ഠിത അറിവിൽ മാത്രം ഒതുങ്ങുന്നില്ലെന്ന് ഉറപ്പാക്കാൻ നിരവധി ശ്രമങ്ങൾ നടക്കുന്നുണ്ട്. കൊച്ചുകുട്ടികളെ നൂതനാശയ സൃഷ്ടാക്കളാക്കുന്നതിന്, രാജ്യത്തുടനീളം 10,000-ത്തിലധികം അടൽ ടിങ്കറിംഗ് ലാബുകൾ സ്ഥാപിച്ചിട്ടുണ്ട്. വിദ്യാഭ്യാസത്തോടൊപ്പം പ്രായോഗിക അവസരങ്ങൾ നൽകുന്നതിനും നമ്മുടെ യുവജനങ്ങൾക്ക് സമൂഹത്തോടുള്ള ഉത്തരവാദിത്തബോധം വളർത്തുന്നതിനുമായി, 'മേരാ യുവ ഭാരത്' സംരംഭം ആരംഭിച്ചു.

സഹോദരീ സഹോദരന്മാരേ,

ഇന്ന്, രാജ്യത്തിന്റെ മറ്റൊരു പ്രധാന മുൻഗണന ഫിറ്റ്നസ് ആണ്! രാജ്യത്തെ യുവജനങ്ങൾ ആരോഗ്യവാന്മാരാണെങ്കിൽ മാത്രമേ രാജ്യം കഴിവുള്ളതും ശക്തവുമാകൂ. അതുകൊണ്ടാണ് നമ്മൾ 'ഫിറ്റ് ഇന്ത്യ', 'ഖേലോ ഇന്ത്യ' തുടങ്ങിയ പ്രസ്ഥാനങ്ങൾ നടത്തുന്നത്. ഈ സംരംഭങ്ങൾ രാജ്യത്തെ യുവജനങ്ങൾക്കിടയിൽ ഫിറ്റ്നസിനെക്കുറിച്ചുള്ള അവബോധം വർദ്ധിപ്പിക്കുന്നു. ആരോഗ്യമുള്ള ഒരു യുവതലമുറ ആരോഗ്യകരമായ ഒരു ഭാരതത്തിന് അടിത്തറയിടും. ഈ ദർശനത്തോടെ, 'സുപോഷിത് ഗ്രാമപഞ്ചായത്ത് അഭിയാൻ' (പോഷിതമായ ഗ്രാമ കാമ്പെയ്ൻ) ഇന്ന് ആരംഭിക്കുന്നു. ഈ കാമ്പെയ്ൻ പൂർണ്ണമായും പൊതുജനപങ്കാളിത്തത്തോടെ മുന്നോട്ട് പോകും. പോഷകാഹാരക്കുറവില്ലാത്ത ഒരു ഭാരതം കൈവരിക്കുന്നതിന്, ഗ്രാമ പഞ്ചായത്തുകൾക്കിടയിൽ ആരോഗ്യകരമായ മത്സരം സൃഷ്ടിക്കുക, പോഷകാഹാരം ലഭിക്കുന്ന ഗ്രാമ പഞ്ചായത്തുകളെ 'വികസിത ഭാരത'ത്തിന്റെ (വികസിത ഇന്ത്യ) അടിത്തറയാക്കുക എന്നിവയാണ് ഞങ്ങളുടെ ലക്ഷ്യം.

സുഹൃത്തുക്കളേ,

വീർ ബാൽ ദിവസ് നമ്മെ പ്രചോദനത്താൽ നിറയ്ക്കുകയും പുതിയ തീരുമാനങ്ങൾ എടുക്കാൻ പ്രേരിപ്പിക്കുകയും ചെയ്യുന്നു. ഞാൻ ചുവപ്പ് കോട്ടയിൽ നിന്ന് പറഞ്ഞതുപോലെ: ഇപ്പോൾ, ഏറ്റവും മികച്ചത് മാത്രമേ നമ്മുടെ മാനദണ്ഡമാകാവൂ. എന്റെ യുവശക്തി അവരവരുടെ മേഖലകളെ മികച്ചതാക്കാൻ പരിശ്രമിക്കാൻ ഞാൻ അഭ്യർത്ഥിക്കുന്നു. അടിസ്ഥാന സൗകര്യങ്ങളിൽ നമ്മൾ പ്രവർത്തിക്കുകയാണെങ്കിൽ, നമ്മുടെ റോഡുകൾ, റെയിൽ ശൃംഖലകൾ, വിമാനത്താവള അടിസ്ഥാന സൗകര്യങ്ങൾ എന്നിവ ലോകത്തിലെ ഏറ്റവും മികച്ചതാണെന്ന് നാം ഉറപ്പാക്കണം. നമ്മൾ നിർമ്മാണത്തിൽ പ്രവർത്തിക്കുകയാണെങ്കിൽ, നമ്മുടെ സെമികണ്ടക്ടറുകൾ, ഇലക്ട്രോണിക്സ്, ഓട്ടോമൊബൈലുകൾ എന്നിവ ആഗോളതലത്തിൽ മികച്ചതാണെന്ന് നാം ഉറപ്പാക്കണം. വിനോദസഞ്ചാരത്തിൽ നമ്മൾ ശ്രദ്ധ കേന്ദ്രീകരിക്കുകയാണെങ്കിൽ, നമ്മുടെ വിനോദസഞ്ചാര കേന്ദ്രങ്ങൾ, യാത്രാ സൗകര്യങ്ങൾ, ആതിഥ്യം എന്നിവ ലോകമെമ്പാടും സമാനതകളില്ലാത്തതാണെന്ന് നാം ഉറപ്പാക്കണം. നമ്മൾ ബഹിരാകാശ മേഖലയിൽ പ്രവർത്തിക്കുകയാണെങ്കിൽ, നമ്മുടെ ഉപഗ്രഹങ്ങൾ, നാവിഗേഷൻ സാങ്കേതികവിദ്യ, ജ്യോതിശാസ്ത്ര ഗവേഷണം എന്നിവ ലോകോത്തരമാണെന്ന് നാം ഉറപ്പാക്കണം. അത്തരം അഭിലാഷ ലക്ഷ്യങ്ങൾ സ്ഥാപിക്കാൻ ആവശ്യമായ പ്രചോദനവും മനോവീര്യവും സാഹിബ്‌സാദേമാരുടെ ധൈര്യത്തിൽ നിന്നാണ്. വലിയ ലക്ഷ്യങ്ങളാണ് ഇപ്പോൾ നമ്മുടെ ദൃഢനിശ്ചയം. നിങ്ങളുടെ കഴിവുകളിൽ രാഷ്ട്രത്തിന് പൂർണ്ണ വിശ്വാസമുണ്ട്. ലോകത്തിലെ ഏറ്റവും വലിയ ചില കമ്പനികളെ നയിക്കാൻ കഴിയുന്ന, ആധുനിക ലോകത്തെ അവരുടെ നൂതനാശയങ്ങളിലൂടെ വഴികാട്ടാൻ കഴിയുന്ന, ആഗോളതലത്തിൽ എല്ലാ പ്രധാന രാജ്യങ്ങളിലും മേഖലകളിലും അവരുടെ വൈദഗ്ദ്ധ്യം സ്ഥാപിക്കാൻ കഴിയുന്ന ഭാരതത്തിലെ യുവജനങ്ങൾക്ക് പുതിയ അവസരങ്ങൾ ലഭിക്കുമ്പോൾ അവരുടെ രാജ്യത്തിനായി അവിശ്വസനീയമായ കാര്യങ്ങൾ ചെയ്യാൻ കഴിയുമെന്ന് എനിക്കറിയാം. അതുകൊണ്ടാണ് 'വികസിത ഭാരതം' എന്ന ലക്ഷ്യം ഉറപ്പായിരിക്കുന്നത്. 'ആത്മനിർഭർ ഭാരതിൻ്റെ' (സ്വയം പര്യാപ്തമായ ഇന്ത്യ)  വിജയം ഉറപ്പാണ്.

സുഹൃത്തുക്കളേ,

കാലം ഓരോ രാജ്യത്തെയും യുവജനങ്ങൾക്കും അവരുടെ രാജ്യത്തിന്റെ വിധി മാറ്റാനുള്ള അവസരം നൽകുന്നു. യുവജനങ്ങൾക്ക് അവരുടെ ധൈര്യവും കഴിവും ഉപയോഗിച്ച് അവരുടെ രാജ്യത്തെ രൂപാന്തരപ്പെടുത്താൻ കഴിയുന്ന ഒരു കാലഘട്ടമാണിത്. സ്വാതന്ത്ര്യസമരകാലത്ത് രാജ്യത്തെ യുവജനങ്ങൾ വിദേശ ഭരണത്തിന്റെ ധിക്കാരത്തെ തകർത്തപ്പോൾ രാജ്യം ഇതിന് സാക്ഷ്യം വഹിച്ചു. ആ കാലഘട്ടത്തിലെ യുവജനങ്ങൾ നിശ്ചയിച്ച ലക്ഷ്യങ്ങൾ ദൃഢനിശ്ചയത്തോടെ നേടിയെടുത്തു. ഇന്നത്തെ യുവജനങ്ങൾ ഇപ്പോൾ ഒരു 'വികസിത ഭാരതം' സൃഷ്ടിക്കുക എന്ന ലക്ഷ്യത്തെ അഭിമുഖീകരിക്കുന്നു. ഈ ദശകത്തിൽ, അടുത്ത 25 വർഷത്തിനുള്ളിൽ ദ്രുതഗതിയിലുള്ള പുരോഗതിക്ക് നാം അടിത്തറയിടണം. അതിനാൽ, ഭാരതത്തിലെ യുവജനങ്ങൾ ഈ സമയം പരമാവധി പ്രയോജനപ്പെടുത്തണം - എല്ലാ മേഖലകളിലും സ്വയം മുന്നേറുകയും രാജ്യത്തെ മുന്നോട്ട് നയിക്കുകയും വേണം. ഈ വർഷം ആദ്യം, ചുവപ്പ് കോട്ടയുടെ കൊത്തളത്തിൽ നിന്ന് ഞാൻ പറഞ്ഞു, മുമ്പ് സജീവമായ രാഷ്ട്രീയ പശ്ചാത്തലമില്ലാത്ത കുടുംബങ്ങളിൽ നിന്നുള്ളവരല്ലാത്ത 100,000 യുവജനങ്ങളെ രാഷ്ട്രീയത്തിലേക്ക് കൊണ്ടുവരാൻ ഞാൻ ആഗ്രഹിക്കുന്നുവെന്ന്. അടുത്ത 25 വർഷത്തേക്കുള്ള നിർണായക തുടക്കമാണിത്. രാജ്യത്തിന്റെ രാഷ്ട്രീയത്തിൽ ഒരു പുതിയ തലമുറ ഉയർന്നുവരുന്നതിനായി ഈ പ്രസ്ഥാനത്തിന്റെ ഭാഗമാകാൻ ഞാൻ നമ്മുടെ യുവജനങ്ങളെ പ്രോത്സാഹിപ്പിക്കുന്നു. ഈ ദർശനത്തോടെ, അടുത്ത വർഷത്തിന്റെ തുടക്കത്തിൽ, 2025 ൽ, സ്വാമി വിവേകാനന്ദന്റെ ജന്മവാർഷികത്തോടനുബന്ധിച്ച് 'വികസിത ഇന്ത്യ യുവ നേതൃ സംവാദം' സംഘടിപ്പിക്കും. രാജ്യത്തുടനീളമുള്ള ഗ്രാമങ്ങൾ, നഗരങ്ങൾ, പട്ടണങ്ങൾ എന്നിവയിൽ നിന്നുള്ള ദശലക്ഷക്കണക്കിന് യുവജനങ്ങൾ പങ്കെടുക്കുന്നു. 'വികസിത ഭാരതം' എന്ന ദർശനത്തെയും അതിന്റെ രൂപരേഖയെയും കുറിച്ചുള്ള ചർച്ചകളിലാണ് ഈ പരിപാടി ശ്രദ്ധ കേന്ദ്രീകരിക്കുന്നത്.

സുഹൃത്തുക്കളേ,

ഈ ദശകത്തിലെ അടുത്ത അഞ്ച് വർഷങ്ങൾ 'അമൃത്** കാല'ത്തിന്റെ പ്രതിജ്ഞകൾ നിറവേറ്റുന്നതിന് വളരെ നിർണായകമായിരിക്കും. ഈ കാലയളവിൽ, രാജ്യത്തെ യുവജനങ്ങളുടെ മുഴുവൻ ശക്തിയും നാം ഉപയോഗപ്പെടുത്തേണ്ടതുണ്ട്. നിങ്ങളുടെ പിന്തുണ, സഹകരണം, ഊർജ്ജം എന്നിവയാൽ ഭാരതം സമാനതകളില്ലാത്ത ഉയരങ്ങളിലെത്തുമെന്ന് എനിക്ക് ഉറപ്പുണ്ട്. ഈ ദൃഢനിശ്ചയം മനസ്സിൽ വെച്ചുകൊണ്ട്, നമ്മുടെ ഗുരുക്കന്മാർക്കും, ധീരരായ സാഹിബ്‌സാദേമാർക്കും, മാതാ ഗുജരീ ജിക്കും മുന്നിൽ ആദരവോടെ ഞാൻ വീണ്ടും ശിരസ്സ് നമിക്കുന്നു.

എല്ലാവർക്കും വളരെ നന്ദി!

***

NK