કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે મધ્ય પ્રદેશના ભોપાલમાં ગ્લોબલ ઇન્વેસ્ટર્સ સમિટ – 2025ના સમાપન સમારંભને સંબોધન કર્યું હતું. આ પ્રસંગે મધ્યપ્રદેશના મુખ્યમંત્રી ડો.મોહન યાદવ સહિત અનેક મહાનુભાવો ઉપસ્થિત રહ્યા હતા.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે પોતાના સંબોધનમાં જણાવ્યું હતું કે, આ બે દિવસીય ગ્લોબલ ઇન્વેસ્ટર્સ સમિટ દરમિયાન કુલ 30 લાખ 77 હજાર કરોડ રૂપિયાના એમઓયુ થયા હતા. તેમણે જણાવ્યું હતું કે, અનેક એમઓયુ જમીન પર લાગુ કરવામાં આવશે અને રાજ્ય સરકારને મધ્યપ્રદેશમાં માત્ર મોટા ઉદ્યોગો જ નહીં, પરંતુ આનુષંગિક ઉદ્યોગો સ્થાપિત કરવામાં પણ મદદ કરશે. શ્રી શાહે જણાવ્યું હતું કે, બે દિવસીય શિખર સંમેલન દરમિયાન 200થી વધારે ભારતીય કંપનીઓ, 200થી વધારે વૈશ્વિક સીઇઓ, 20થી વધારે યુનિકોર્નનાં સ્થાપકો અને 50થી વધારે દેશોનાં પ્રતિનિધિઓ મધ્યપ્રદેશમાં રોકાણ કરવા અને પર્યાવરણ જોવા આવ્યાં છે. તેમણે જણાવ્યું હતું કે, આ વખતે મધ્યપ્રદેશે સમગ્ર રાજ્યના સર્વાંગી વિકાસ માટે દરેક ક્ષેત્ર માટે અલગ-અલગ રોકાણ સમિટનું આયોજન કરીને નવો પ્રયોગ કર્યો છે, જે આગામી દિવસોમાં અનેક રાજ્યોને માર્ગદર્શન આપશે.

શ્રી અમિત શાહે જણાવ્યું હતું કે, આ સમિટમાં મધ્યપ્રદેશે ઔદ્યોગિક, ક્ષેત્રીય અને વિકાસની વૈશ્વિક સંભવિતતાને ખોલવા માટેનાં તમામ માર્ગો શોધવા પ્રયાસો કર્યા છે. તેમણે ઉલ્લેખ કર્યો હતો કે, આ સમિટે મધ્ય પ્રદેશના વિકાસને નવું પરિમાણ આપ્યું છે. શ્રી શાહે જણાવ્યું હતું કે, મધ્યપ્રદેશ આપણાં દેશની સમૃદ્ધ સાંસ્કૃતિક વિરાસતથી ભરેલું છે અને રાજ્ય સરકાર પ્રધાનમંત્રી શ્રી નરેન્દ્ર મોદીએ આપેલા 'વિકાસ ભી વિરાસત ભી'નાં મંત્રને સાકાર કરવા વિવિધ પ્રયાસો કરી રહ્યું છે.

કેન્દ્રીય ગૃહ મંત્રીએ કહ્યું કે પ્રધાનમંત્રી મોદીએ 2047 સુધી ભારતને સંપૂર્ણ વિકસિત રાષ્ટ્ર બનાવવા અને 2027 સુધી દુનિયાની ત્રીજી સૌથી મોટી અર્થવ્યવસ્થા બનાવવાનો લક્ષ્ય યુવાઓ અને દેશના 130 કરોડ લોકો સામે રાખ્યો છે. તેમણે કહ્યું હતું કે, મધ્યપ્રદેશનું આ ઇન્વેસ્ટમેન્ટ સમિટ આ બંને લક્ષ્યાંકોને હાંસલ કરવામાં મદદરૂપ થવાની સાથે-સાથે આ લક્ષ્યાંકો હાંસલ કરવામાં મોટું પ્રદાન પણ કરશે. શ્રી શાહે જણાવ્યું હતું કે, પ્રધાનમંત્રી મોદીનાં 'ટીમ ઇન્ડિયા'નાં વિઝનમાં ભારત સરકાર અને તમામ રાજ્ય સરકારો સાથે મળીને સંપૂર્ણ દેશનાં વિકાસ માટે કામ કરવાનો લક્ષ્યાંક ધરાવે છે અને આ ઘટનાએ એ વિઝનને આગળ વધાર્યું છે.

શ્રી અમિત શાહે જણાવ્યું હતું કે, આ સમિટમાં સ્થાનિક અને વૈશ્વિક એમ બંને પ્રકારનાં રોકાણને વધારવાનાં ઘણાં પાસાંઓ હાંસલ થયાં છે. તેમણે કહ્યું હતું કે, આ સમિટ ભારતની 'અમૃત પેઢી' માટે કૌશલ્ય વિકાસનાં ઘણાં દ્વાર પણ ખોલશે. શ્રી શાહે જણાવ્યું હતું કે, ઓટોમેશન અને રોજગારીનાં સર્જન વચ્ચે સમન્વય સ્થાપિત થવાથી મધ્યપ્રદેશ સરકારે વિવિધ ક્ષેત્રો માટે જે નીતિઓ બનાવી છે, તે આગળ વધશે અને આ સમિટ ભારતને ઉત્પાદન કેન્દ્ર બનાવવામાં પણ મદદરૂપ થશે.

કેન્દ્રીય ગૃહ મંત્રી અને સહકારિતા મંત્રીએ ભારપૂર્વક જણાવ્યું હતું કે, પ્રધાનમંત્રી શ્રી નરેન્દ્ર મોદીનાં નેતૃત્વમાં મધ્યપ્રદેશમાં સ્થાયી અને મજબૂત વહીવટ કાર્યરત છે. જે વિકાસનાં નવા માર્ગોનું નિર્માણ કરી રહ્યું છે. તેમણે ભારપૂર્વક જણાવ્યું હતું કે, ભારતનાં હાર્દ તરીકે મધ્ય પ્રદેશ વ્યૂહાત્મક સ્થાન ધરાવે છે. જે મજબૂત માળખાગત સુવિધા સાથે પૂરક છે. રાજ્ય કુશળ કામદારોના વિશાળ પૂલ અને એક કાર્યક્ષમ વહીવટી ઇકોસિસ્ટમ ધરાવે છે જે વિકાસને વેગ આપે છે. તેમણે ભારપૂર્વક જણાવ્યું હતું કે, મધ્યપ્રદેશ બજારમાં અપ્રતિમ સુલભતા ધરાવે છે. કારણ કે તેનું માગ-સંચાલિત અર્થતંત્ર ઝડપથી વધી રહ્યું છે. રાજ્યના પારદર્શક શાસનથી રોકાણકારોના આત્મવિશ્વાસમાં નોંધપાત્ર વધારો થયો છે. પર્યાપ્ત જમીન સંસાધનો, સમર્પિત કાર્યબળ, સમૃદ્ધ ખનિજ સંસાધનો અને અસંખ્ય ઔદ્યોગિક તકો સાથે, મધ્ય પ્રદેશ રોકાણ માટે એક મુખ્ય સ્થળ તરીકે ઉભું છે. ગૃહ મંત્રીએ પુષ્ટિ કરી હતી કે, ભારતમાં દરેક પાસામાં રોકાણ માટે મધ્યપ્રદેશ મુખ્ય કેન્દ્ર છે.

શ્રી અમિત શાહે યાદ કર્યું હતું કે, એક સમય હતો, જ્યારે મધ્યપ્રદેશની ગણતરી બિમારુ રાજ્યોમાં થતી હતી, પણ અમારી પાર્ટીનાં 20 વર્ષનાં સતત શાસન પછી રાજ્યમાં નોંધપાત્ર પરિવર્તન આવ્યું છે. તેમણે 5 લાખ કિલોમીટરનાં રોડ નેટવર્કનાં વિકાસ, છ ઓપરેશનલ એરપોર્ટની હાજરી અને 30 ટકા સ્વચ્છ ઊર્જા સહિત 31 ગીગાવોટની પ્રભાવશાળી ઊર્જા ક્ષમતા વિશે વાત કરી હતી. તેમણે ભારપૂર્વક જણાવ્યું હતું કે, આઇઆઇએમ, આઇઆઇટી, એઇમ્સ, આઇઆઇટી, એનઆઇએફટી અને એનઆઇએફડી જેવી પ્રતિષ્ઠિત સંસ્થાઓ મધ્યપ્રદેશનાં યુવાનોને ઉભરતી તકો ઝડપવા માટે જરૂરી કૌશલ્યોથી સજ્જ કરી રહી છે. દેશમાં ખનિજોના સૌથી સમૃદ્ધ ભંડારોમાંના એક, સાથે મધ્ય પ્રદેશ પણ ભારતની કપાસની રાજધાની તરીકે ઉભરી આવ્યું છે. જેણે દેશના જૈવિક કપાસના પુરવઠામાં 25 ટકા ફાળો આપ્યો છે. તદુપરાંત, ફૂડ પ્રોસેસિંગ ક્ષેત્રે રાજ્ય નોંધપાત્ર સ્થાન ધરાવે છે. ગૃહ મંત્રીએ નોંધ્યું હતું કે, મધ્યપ્રદેશ સરકારે ઔદ્યોગિક વિકાસને વેગ આપવા માટે વર્ષ 2025ને "ઉદ્યોગોનું વર્ષ" તરીકે જાહેર કર્યું છે. તેમણે વેપાર કરવાની સરળતા વધારવાના હેતુથી જન વિશ્વાસ બિલ પસાર કરનાર દેશનું પ્રથમ રાજ્ય બનવા બદલ રાજ્યની પ્રશંસા પણ કરી.

કેન્દ્રીય ગૃહ મંત્રી અને સહકારિતા મંત્રીએ જણાવ્યું હતું કે, પ્રધાનમંત્રી શ્રી નરેન્દ્ર મોદીના નેતૃત્વમાં છેલ્લાં 10 વર્ષમાં ભારતનો વિદેશી હૂંડિયામણનો ભંડાર, કુલ સ્થાનિક ઉત્પાદન (જીડીપી) અને માથાદીઠ આવક બમણી થઈ છે. તેમણે ભારપૂર્વક જણાવ્યું હતું કે, મોદી સરકારે વિકસિત ભારત માટે મજબૂત પાયો નાંખ્યો છે. જે આગામી દાયકામાં વિકાસ અને પ્રગતિનાં નવાં પરિમાણો માટે માર્ગ મોકળો કરશે.

શ્રી અમિત શાહે જણાવ્યું હતું કે, છેલ્લાં 10 વર્ષમાં પ્રધાનમંત્રી શ્રી નરેન્દ્ર મોદીએ 54 કરોડ લોકોને બેંકિંગ સિસ્ટમમાં લાવ્યા છે. તેમણે કહ્યું કે આ લોકો આઝાદી પછી 75 વર્ષ સુધી બેંક ખાતા વગરના હતા. તેમણે ભારપૂર્વક જણાવ્યું હતું કે, પ્રધાનમંત્રી મોદીએ આ નાગરિકો માટે નાણાકીય સર્વસમાવેશકતા સુનિશ્ચિત કરી છે. જે દેશનાં બેંકિંગ ક્ષેત્રમાં મોટું પરિવર્તન સૂચવે છે. તેમણે વધુમાં નોંધ્યું હતું કે, આ સમયગાળા દરમિયાન નોંધપાત્ર આર્થિક સુધારા હાથ ધરવામાં આવ્યા છે. જેમાં નાદારી અને નાદારીના કેસોમાં ઘટાડો, નોન-પર્ફોર્મિંગ એસેટ્સ (એનપીએ)ને 2.5 ટકાથી નીચે લાવવી, વસ્તુ અને સેવા કર (જીએસટી)નો સફળતાપૂર્વક અમલ કરવો અને વ્યવસાયો માટે સિંગલ-વિન્ડો ક્લિયરન્સને સરળ બનાવવું સામેલ છે. શ્રી શાહે પ્રધાનમંત્રી મોદીનાં નેતૃત્વમાં મોટા પાયે માળખાગત વિકાસનું ધ્યાન દોર્યું હતું. જેમાં 60,000 કિલોમીટરનાં રાજમાર્ગોનો ઉમેરો થયો છે. 8 લાખ કિલોમીટરનાં ગ્રામીણ માર્ગોનું નિર્માણ થયું છે અને એરપોર્ટની સંખ્યા 74થી વધીને 157 થઈ છે. તેમણે રેલવે વિસ્તરણ અને કાર્ગો હેન્ડલિંગ ક્ષમતાને બમણી કરવા પર પણ પ્રકાશ પાડ્યો હતો. તેમણે ભારપૂર્વક જણાવ્યું હતું કે, કેટલીક નવી પહેલો મારફતે ભારત કેટલાંક ક્ષેત્રોનો સ્થાપક બન્યો છે, જે આગામી 25 વર્ષ માટે વૈશ્વિક આર્થિક દિશા નક્કી કરશે.

કેન્દ્રીય ગૃહ મંત્રીએ જણાવ્યું હતું કે, મધ્યપ્રદેશમાં રોકાણ સંમેલન રાજ્યની વૃદ્ધિ માટે માત્ર ઉત્પ્રેરક જ નથી, પણ ભારતનાં સંપૂર્ણ વિકાસ માટે મહત્ત્વપૂર્ણ પ્રોત્સાહક પણ છે. તેમણે વિશ્વાસ વ્યક્ત કર્યો હતો કે, આગામી વર્ષોમાં મધ્યપ્રદેશ દેશનાં મુખ્ય ઉદ્યોગો માટે અગ્રણી કેન્દ્ર તરીકે ઉભરી આવશે. તેમણે ભારપૂર્વક જણાવ્યું હતું કે, રાજ્ય પારદર્શક શાસન જાળવવાનું, સ્થાયી નીતિઓનું અમલીકરણ કરવાનું ચાલુ રાખશે અને સક્રિય વહીવટને પ્રોત્સાહન આપશે, જે રોકાણકારો અને હિતધારકો સાથે ખભેખભો મિલાવીને કામ કરે છે.

AP/IJ/GP/JD