প্রধান মন্ত্রী শ্রী নরেন্দ্র মোদীনা গ্লোবেল ইনভেস্তরস সম্মিত (GIS) ২০২৫ ভোপাল, মধ্য প্রদেশতা ঙসি হৌদোকখ্রে। মীয়ামদা ৱা ঙাংলদুনা মহাক্না ১০ অমসুং ১২ মহৈরোইশিংগী বোর্দ একজাম লৈবনা মরম ওইদুনা মহাক্কী সেক্যুরিতীগী থৌরাংনা লম্বীদা মহৈরোইশিংদা খুদোংচাদবা থেংনহনগদ্রা হায়বগী নুংনাংবা লৈবনা থৌরম অসিদা য়ৌরকপদা থেংখিবগীদমক ঙাকপীনবা হায়জখি।  শ্রী মোদীনা হায়খি মদুদি রাজ ভোজগী লমদম অসিদা ইনভেস্তরশিং অমসুং লল্লোন ইতীক তৌবশিংনা লেংবীরকপদা তরাম্না ওকচরি। মহাক্না মখা তাখি মদুদি ঙসিগী থৌরম অসি ভিক্সিত মধ্য প্রদেশ নৎত্রগা চাউখৎলবা মধ্য প্রদেশ অমগীদমক্তদি য়াম্না মরুওই। মহাক্না মধ্য প্রদেশকী সরকারবু সম্মিত অসিবু নীংথিনা পাঙথোকপীবগীদমক থাগৎখি।

"মালেম পুম্বনা ভারতকী অফবশিং উরি" হায়না শ্রী মোদীনা হায়খি অমসুং মখা তানা ফোংদোকখি মদুদি ইহান হানবা ওইনা ভারতকী পুৱারীদা অসিগুম্বা খুদোংচাবসি য়ৌরক্লে। মহাক্না ফোঙদোকখি, ইচম চম্বা মীয়াম ওইরো, নৎত্রগা পোলিসী এক্সপর্ত নৎত্রগা ইন্সতিত্যুসন অমবু ওইরো, নৎত্রগা মালেমগী লৈবাকশিংবু ওইরো, মীয়াম্না ভারত্তগী আসা কয়া অমা তৌরি। মহাক্না ফোঙদোকখি মদুদি হৌখিবা চয়োল খরসিদা ভারতকী মতাংদা ফংলিবা মোৎশিং অসিনা ইনভেস্তরশিংদা নুংঙাইবা পোকহল্লি। ৱার্ল্দ বেঙ্কনা ভারতপু খ্বাইদগী য়াঙবা শেন্মিৎলোন ওইদুনা লৈখিগনি হায়না ফোংদোকখিবা ৱাফম্বু নিংশিংলদুনা প্রধান মন্ত্রীনা OECD দগী মীহুৎ অমনা অসুম্না হায়খি হায়না নিংশিংখি, "মালেমগী তুংলমচৎ অসি ভারত্তা লৈ"। মহাক্না ফোঙদোকখি মদুদি হন্দক্তা, UN ওর্গানাইজেসন ওন ক্লাইমেত চেঞ্জনা ভারতপু সোলার পাৱর সুপরপাৱর অমা ওইনা লাউথোকখি। হায়রিবা সংস্থান অসিনা পনখি মদুদি অতোপ্পা লৈবাক কয়ানা ঙাংদুনা লৈরিঙৈদা ভারতনা ফল পুরক্লি। শ্রী মোদীনা হায়খি মদুদি অনৌবা রিপোর্ত অমনা ভারতনা মতৌ করম্না মালেমগী এরোস্পেসকী ফার্মশিংগী শক্তি লৈরবা সপ্লাই চেন ওইনা হৌরকপগে হায়বদু উৎখ্রে। হায়রিবা ফার্ম অসিনা ভারতপু মালেমগী সপ্লাই চেনগী পাম্বৈ অমা ওইনা উরি। প্রধান মন্ত্রীনা তোঙান তোঙানবা খুদম কয়া উৎলদুনা ভারতকী রাজ্য খুদিংদা শক্তি পীরিবা মওংদা ভারত্তা মালেম্না থম্লিবা থাজবদু পনখি। মসিগী থাজবা অসি মধ্য প্রদেশকী গ্লোবেল সম্মিত অসিদা উখি হায়না মহাক্না হায়খি।

মধ্য প্রদেশনা ভারতকী ওইনা মীকোক মশীংদা খ্বাইদগী চাউবা মঙাশুবা রাজ্য অমনি হায়রদুনা শ্রী মোদীনা হায়খি, "মধ্য প্রদেশ অসি লৌউশিংউ অমসুং মিনরেলগী মতাংদা ভারতকী মকোক থংবা রাজ্যশিংগী মনুংদা অমা ওইরি।" মহাক্না ফোঙদোকখি মদুদি মধ্য প্রদেশ অসি পুন্সি পীনবীরিবা নর্মদা তুরেলনা থৌজানবীরি অমসুং মধ্য প্রদেশ অসি GDP দা য়েংবদা ভারতকী মকোক থোংবা রাজ্য মঙাগী মনুংদা চনবা ঙমগনি।

হৌখিবা চহি কুনলোম অসিদা মধ্য প্রদেশকী অহোংবা পুরকপা ঙম্বা খোঙচৎ অসিবু তাক্লদুনা প্রধান মন্ত্রীনা হায়খি মদুদি রাজ্য অসিনা মৈ অমসুং ঈশিংগী খুদোঙচাদবা কয়া থেংনখি অমসুং আইন অমসুং শান্তি রক্সাগী ফিভমসু য়াম্না ফৎলমদে। হায়রিবা ফিভমশিং অসিনা ইন্দস্ত্রী চাউখৎপদা অৱাবা কয়া থেংনরম্মি। মীয়ামগী মতেংগা লোইননা, মধ্য প্রদেশতা লৈরিবা মখোয়গী লৈঙাক্না হৌখিবা চহি কুনলোম অসিদা মীৎয়েং চঙলক্লি হায়না শ্রী মোদীনা হায়খি। চহি কুনগী মমাংদা, মীয়াম্না MP দা শেল থাদবা কিনরম্মি, অদুবু ঙসিদি MP না লৈবাক অসিদা ইনভেস্তমেন্ততা খ্বাইদগী মকোক থোংবা রাজ্যশিংগী মরক্তা লৈরে। মহাক্না ফোঙদোকখি মদুদি মতম অমদা লম্বী থোং ফৎলমদবা রাজ্য অসিনা ঙসিদি ভারতকী EV গী অহোংবদা মকোক থোংলি। মহাক্না ফোঙদোকখি, জনুৱারী ২০২৫ ফাওবদা MP দা ইলেক্ত্রিক্কী গারী লাখ ২ রোম হেন্না রেজিস্তর তৌখি, মসিনা চাদা ৯০ গী চাউখৎপা রেকোর্দ তৌখি, মসিনা MP বু মেন্যুফেকচরিং সেক্তরগী অনৌবা মফম অমা ওইরক্লি।

"ভারতনা হৌখিবা চহি তরারোম অসিদা ইনফ্রাস্ত্রকচরদা খঙচাউ চাউখৎলক্লি", হায়রদুনা প্রধান মন্ত্রীনা হায়খি মদুদি মধ্য প্রদেশনা হায়রিবা চাউখৎপা অসিদগী কান্নবা কয়া অমা ফংখ্রে। মহাক্না হায়খি মদুদি মরুওইবা শহর অনি ফাউদুনা চৎলিবা দিল্লি-মুম্বাই এক্সপ্রেসৱেনা MP ফাউদুনা মুম্বাইগী হিথাংফম অমসুং অৱাং ভারতকী কৈথেলশিংদা য়ৌহল্লি। মহাক্না পনখি মদুদি মধ্য প্রদেশতা হৌজিক্তি কিলোমিতর মঙা হেনবগী লম্বীগী নেতৱার্ক লৈরে। মহাক্না হায়খি, MP গী ইন্দস্ত্রীএল কোরিদোরনা মোদর্ন এক্সপ্রেসৱেদা শম্নদুনা লোজিস্তিক্সকী সেক্তরদা খুমাং চাউশিলহল্লি।

নোংথক্কী লম্বীগী মতাংদা পল্লদুনা শ্রী মোদীনা হায়খি মদুদি গ্বালিয়র অমসুং জবলপুর এয়রপোর্তকী তর্মিনেলশিংসু পাকথোক চাউথোক্লে। মহাক্না ফোঙদোকখি মদুদি ভারতনা গ্রীন এনর্জীদা খুমাং চাউসিনবা ঙমখ্রে, মসি মতম অমদদি ভাপ্না লাম্নরমদে। হৌখিবা চহি ১০ রোম অসিদা, $৭০ বিলিয়ন (লুপা ত্রিলিয়ন ৫) হেন্না রিন্যুএবল এনর্জী সেক্তরদা থাদখ্রে, হায়রিবসিনা ক্লিন এনর্জীদা থবক লাখ ১০ হেন্না পীখ্রে। প্রধান মন্ত্রীনা হায়খি মদুদি মধ্য প্রদেশনা এনর্জী সেক্তর চাউখৎপদগী কান্নবা কয়া ফংখ্রে। ঙসিদি MP দা 31,000 MW গী মৈ শুংবগা লোইননা অহেনবা মৈ লৈরদুনা চাদা ৩০ দি ক্লিন এনর্জী ওইরি। মহাক্না পনখি, রেৱা সোলার পার্ক অসিসু লৈবাক অসিদা খ্বাইদগী চাউবা ওইরি, অমসুং হন্দক্তা ফ্লোতিং সোলার প্লান্ত অমসু ওমকারেস্বরদা লিংখৎখ্রে। শ্রী মোদীনা পনখি মদুদি লৈঙাক অসিনা বিনা রিফাইনরী পেত্রোকেমিকেল কমপ্লেক্সতা লুপা করোর 50,000 ইনভেস্ত তৌখ্রে, মসিনা মধ্য প্রদেশতা পেত্রোকেমিকেলগী হব অমা শেমগৎপা ঙম্লগনি। মহাক্না হায়খি মদুদি MP লৈঙাক্না অনৌবা পোলিসীশিংগা লোইননা ইনফ্রাস্ত্রকচ্র কয়া শৌগৎলি। MP দা ইন্দস্ত্রিএল জোন ৩০০, অমসুং ইনভেস্তমেন্ত জোন কয়া পিতম্পুর, রতল্ম, অমসুং দিৱাস্তা শেমগৎলে।

ইন্দস্ত্রী চাউখৎনবা হোৎনবদা ঈশিংগী সেক্যুরিতীগী মরুওইবা লৈবগী মতাংদা পল্লদুনা প্রধান মন্ত্রীনা হায়খি মদুদি ঈশিং কন্নবা হোৎনবগা লোইননা, মেগা মিসন অমসু পায়খৎলি। মহাক্না পনখি মদুদি লৌউশিংউ অমসুং ইন্দস্ত্রী সেক্তরনা মধ্য প্রদেশতা চাউনা কান্নবা ফংলি। শ্রী মোদীনা হায়খি লুপা করোর ৪৫০০০ গী ওইগদবা কেন-বেত্বা রিভর ইন্তরলিঙ্কিং প্রোজেক্তসু হন্দক্তা চলাইখ্রে, মসিনা লৌ হেক্ত্র লাখ ১০ রোমদা কান্নবা পীগনি। মসিনা এগ্রো ইদস্ত্রী অমসুং তেক্সতাইল সেক্তরদা কান্নবা পীগনি হায়খি।

মধ্য প্রদেশতা মখোয়গী লৈঙাক শেমখ্রবা মতুংদা, চাউখৎপগী খোংজেল য়াংখৎলক্লি হায়রদুনা শ্রী মোদীনা হায়খি মদুদি কেন্দ্র সরকারনা MP সরকারগা লোইননা রাজ্য অমসুং লৈবাক অসি চাউখৎনবগীদমক লেং মান্ননা চৎমিন্নরি। মহাক্না মহাক্কী অহুমশুবা তার্মদা শরুক অহুম হেনগৎনা থবক শুগনি হায়বগী ৱাশক নিংশিংলদুনা "খোঙজেল অসি ২০২৫ কী অহানবা নুমিৎ ৫০নিদা উবা ফংলে।" শ্রী মোদীনা হন্দক্কী বজেতকী মতাংদসু পনখি, মসিনা ভারতকী চাউখৎপগী মচাক অমা ওইরগনি হায়খি। মিদল ক্লাসনা খ্বাইদগী য়াম্বা তেক্সপেয়র ওইবনা, সর্ভিস অমসুং মেন্যুফেকচরিংগী দিমান্দ য়াম্না তৌই। হায়রিবা বজেত অসিদা মিদল ক্লাসশিংবু হেন্না শক্তি পীনবা হোৎনরি হায়রদুনা মখোয়দা লাখ ১২ ফাওবা তেক্স ফ্রী ওইরে অমসুং তেক্স স্লেব নৌনা শেমদোক্লে হায়খি। মহাক্না মসিমসু পনখি মদুদি RBI না বজেতকী মতুংদা শেন্দোইগী চাংসু হন্থখ্রে হায়খি।

বজেত অসিনা লোক্লে সপ্লাই চেন শেমগৎতুনা পোৎচৈ পুথোকপদা ইরোমদোম লেপচনবা হোৎনরি হায়রদুনা শ্রী মোদীনা হায়খি মদুদি MSME গী শক্তি অসি মমাংগী লৈঙাক্না চপশিন্দুনা থম্বীরম্মি, মসিনা লোকেল সপ্লাই চেন অসি অপাম্বা থাক্তু য়ৌবা ঙমহন্দে। MSME গী ৱাহন্থোকসু হেন্না ফগৎহল্লে, অমসুং ক্রেদিত লিঙ্ক ইন্সেন্তিবশিংসু পীরে। অদুগা ক্রেদিতসু হেন্না লায়হল্লে, অমসুং ভেল্যু হাপকৎনব অমসুং এক্সপোর্ত তৌবসু হেনগৎলে।

"হৌখিবা চহি তরারোম অসিদা, জাতিগী থাক্তা রিফোর্ম কয়ানা অহোংবা পুরকখ্রে, রিফোর্ম কয়া রাজ্য অমসুং লোকেলগী থাক্তা পুরক্লি" হায়রদুনা প্রধান মন্ত্রীনা বজেত অসিদা পল্লিবা স্তেত দিরিগুলেসন কম্মিসনবু খন্নখি। মহাক্না পনখি মদুদি রাজ্যশিং অমসুং ৪০০০০ কমপ্লাইএন্সশিংগা লোইননা ৱারী শানরি। মসিগী মথক্তা, শীজিন্নদ্রবা আইন ১৫০০সু মুৎথৎখ্রে হায়খি। প্রধান মন্ত্রীনা পনখি মদুদি মসিগী পান্দম অসি ললোন ইতীক তৌবদা অৱাবা পীরিবা রিগুলেসনশিং খঙদোকপনি অমসুং দি-রিগুলেসন কম্মিসন্না ইনভেস্তমেন্ত নুংঙাইবা রিগুলেতরী ইকোসিস্তেম অমা রাজ্যশিংদা পুরক্কনি।

বজেত অসিনা কস্তম দ্যুতীগী মওং কয়া লায়থোকহল্লে হায়রদুনা, শ্রী মোদীনা হায়খি মদুদি কস্তম কেসশিং নৈননবা অকক্নবা মতম অমা লৌখ্রে হায়খি। মহাক্না ফোংদোকখি মদুদি হৌজিক প্রাইবেত ওন্ত্রপ্রিন্যুরশিপ অমসুং ইনভেস্তমেন্তকী অনৌবা সেক্তরশিং হাংদোক্নবা হোৎনরি। চহি অসিদা, ন্যুক্লিয়র এনর্জী, বাইও-মেন্যুফেকচরিং, ক্রিতিকেল মিনরেল প্রোসেসিং, অমসুং লিথিয়ম বেত্তরি পুথোকপগী সেক্তরশিংনা ইনভেস্তমেন্ত হাংদোক্লে হায়রদুনা মহাক্না হায়খি, "হায়রিবা খোঙথাংশিং অসিনা লৈঙাক্কী ৱারেপশিং মশক তাক্লে।"

তেক্সতাইল, তুরিজম, অমসুং তেক্নোলোজী সেক্তরশিংনা ভারতকী চাউখৎলবা তুংলমচৎতা থৌদাং চাউনা পুগনি অমসুং অনৌবা থবক করোর কয়া শেমগনি" হায়না প্রধান মন্ত্রী ফোংদোকখি। মহাক্না ফোঙদোকখি মদুদি ভারতনা লশিং, শামতু, পোলিস্তর, অমসুং ভিস্কোস পুথোকপা খ্বাইদগী চাউবা অনিশুবা লৈবাক ওইরি। তেক্সতাইল সেক্তরনা করোর কয়াগী থবক পীরি অমসুং ভারত্তা ইনাক খুল্লাবা নাৎ, হৈশিংবা, অমসুং ওন্ত্রপ্রিন্যুরশিপ লৈ। মধ্য প্রদেশনা ভারতকী লশিংগী ময়োল ওইবগা লোইননা, লৈবাক অসিগী ওর্গানিক কত্তন সপ্লাইগী চাদা ২৫ পীরি। অদুগা চান্দেরি অমসুং মহেশ্বরি সারীবু ৱাংনা থাংগৎনবগা লোইননা GI তেগ পীখ্রে হায়না মহাক্না মখা তাখি। মহাক্না ফোঙদোকখি মদুদি হায়রিবা সেক্তরশিং অসিদা ইনভেস্তমেন্ত তৌবনা মধ্য প্রদেশকী তেক্সতাইলবু মালেমগী থাক্তা থাংগৎপা ঙমগনি।

ভারতনা অনৌবা সেক্তর কয়াদা য়েংলিবা অসিগী মতাংদা ফোঙদোক্লদুনা প্রধান মন্ত্রীনা হায়খি মদুদি তেক্নিকেল তেক্সতাইলশিং হায়বদি এগ্রো তেক্সতাইল, অমসুং জিওতেক্সতাইলসু শেমগৎলি, অমসুং জাতিগী মিসন অমসু হীরম অসিদা হৌদোক্লে, মসি বজেত্তা পল্লি। শ্রী মোদীনা হায়খি মদুদি লৈঙাক্কী PM মিত্র স্কিম অসি মীয়াম্না খঙনরে অমসুং অচৌবা তেক্সতাইল পার্ক তরেৎ লৈবাক অসিদা পাক শন্না শেমগৎলি, মসিদা মধ্য প্রদেশসু য়াওরি। প্রধান মন্ত্রীনা তেক্সতাইলগী PLI স্কিমদগী খুদোংচাবা লৌনবা তকশিনখি।

ভারতনা তেক্সতাইল সেক্তরদা অনৌবা মাইকৈ অমা পুরক্নবা হোৎনবগা লোইননা, তুরিজম সেক্তরদসু ফগৎনবা হোৎনরি হায়রদুনা শ্রী মোদীনা MP তুরিজম কেম্পেন, "MP অজব হৈ, সবসে গজব হৈ," নিংশিংলদুনা নর্মদা তুরেল অমসুং মধ্য প্রদেশকী ত্রাইবেলগী মফমশিংদা শেমগৎলিবা তুরিজম ইনফ্রাস্ত্রকচরশিংগী মতাংদা ফোংদোকখি। প্রধান মন্ত্রীনা রাজ্য অসিদা লৈরিবা তোঙান তোঙানবা নেসনেল পার্ক কয়াগী মতাংদা প্নখি। মহাক্না "হিল ইন হিন্দা" মন্ত্রনা মালেমগী মীয়ামগী পুক্নিং চিংশিল্লি, মসিনা হকশেলগী সেক্তরদা লেপ্পা লৈতনা ইনভেস্তমেন্ত কয়া চিংশিল্লি হায়খি। লৈঙাক অসিনা পব্লিক-প্রাইবেত পার্তনরশিপ পুরক্লি। শ্রী মোদীনা হায়খি মদুদি আয়ুশপু চাউনা শন্দোক্নবা হোৎনরি, অমসুং আয়ুশ ভিজাসু পীরি। মহাক্না হায়খি মদুদি হায়রিবা থৌরাংশিং অসিনা মধ্য প্রদেশতা চাউনা কান্নবা পীরি। মহাক্না মীয়ামদা মহাকলগী থৌজাল ফংনরিবা উজৈনগী মহাকল মহালোকতা চৎনবা পুক্নিং চিংশিনখি।

মহাক্কী লাল কিলাদগী পীখিবা ৱারোলবু নীংশিংলদুনা প্রধান মন্ত্রীনা হৌজিক্তি ইনভেস্তমেন্ত অমসুং মধ্য প্রদেশতা ইনভেস্তমেন্ত হেনগৎনবা হোৎনবগী মতম্নি হায়খি।

মধ্য প্রদেশকী গবরনর,শ্রী মঙ্গুভাই ছগনভাই পতেল, মধ্য প্রদেশকী মুখ্য মন্ত্রী, শ্রী মোহন য়াদব অমসুং অতৈ শক্নাইরবা মীওই কয়ানা থৌরম অদু্দা শরুক য়াখি।

হৌরকপগী ৱারী

ভোপালগী নুমিৎ নিনিগী গ্লোবেল ইনভেস্তরস সম্মিত (GIS) ২০২৫ না মধ্য প্রদেশপু মালেমগী ইনভেস্তমেন্ত হব অমা ওইনবা হোৎনবদা মরুওইবা ফম্বাক অমা ওইরি। GIS অসিদা দিপার্ত্মেন্তেল সম্মিত; ফার্মা অমসুং মেদিকেল দিভাইস, ত্রান্সপোর্ত, অমসুং লোজিস্তিক্স, ইন্দস্ত্রী, স্কিল দিবেলপমেন্ত, তুরিজম অমসুং MSMEগী ওইবা অখন্নবা সেসনশিং য়াওরি। মসিদা ইন্তর্নেসনেল সেসন ওইনা গ্লোবেল সাউথ লৈবাকশিংগী কনফরেন্স, লেতিন অমেরিকা, কেরিবিয়ন সেসন অমসুং মরুওইবা মপাং ওইরিবা লৈবাকশিংগী অখন্নবা সেসনশিং য়াওরি।

মরুওইবা ইন্দস্ত্রিএল একজিবিসন অহুমসু অসি সম্মিত অসিগী মনুংদা পাঙথোক্লি। ওতো শোনা মধ্য প্রদেশকী ওতোমোতিবকী শক্তিশিং অমসুং তুংগী মোবিলিতী সোলুসনশিং উৎলি। তেক্সতাইল অমসুং ফেসন এক্সপোনা রাজ্য অসিগী ত্রেদিসনেল অমসুং মোদর্ন তেক্সতাইল মেন্যুফেকচরিংগী মতাংদা উৎলি। "ৱান দিস্ত্রিক্ত-ৱান প্রদক্ত" (ODOP) ভিলেজনা রাজ্য অসিগী অখন্নবা খুৎ হৈবগী মমি অমসুং নাৎকী লনশিং উৎলি।

লৈবাক ৬০ দগী মীহুৎশিং, তোঙান তোঙানবা অন্তর্জাতিগী সংস্থানশিংদগী মীহুৎশিং, ভারত্তগী ইন্দস্ত্রী লুচিংবা ৩০০ হেনবা অমসুং পোলিসীমেকর কয়ানা সম্মিত অসিদা শরুক য়াখি।

Addressing the Global Investors Summit 2025 in Bhopal. With a strong talent pool and thriving industries, Madhya Pradesh is becoming a preferred business destination. https://t.co/EOUVj9ePW7

— Narendra Modi (@narendramodi) February 24, 2025

The world is optimistic about India. pic.twitter.com/5cBcUw74p3

— PMO India (@PMOIndia) February 24, 2025

In the past decade, India has witnessed a boom in infrastructure development. pic.twitter.com/bndn4hv8Bn

— PMO India (@PMOIndia) February 24, 2025

The past decade has been a period of unprecedented growth for India's energy sector. pic.twitter.com/ZIfB0MKjEz

— PMO India (@PMOIndia) February 24, 2025

Water security is crucial for industrial development.

On one hand, we are emphasising water conservation and on the other, we are advancing with the mega mission of river interlinking. pic.twitter.com/hv2QOzmaLw

— PMO India (@PMOIndia) February 24, 2025

In this year's budget, we have energised every catalyst of India's growth. pic.twitter.com/5taehyiNQa

— PMO India (@PMOIndia) February 24, 2025

After national level, reforms are now being encouraged at the state and local levels. pic.twitter.com/7zisj7ek88

— PMO India (@PMOIndia) February 24, 2025

Textile, Tourism and Technology will be key drivers of India's developed future. pic.twitter.com/yi0jFA1wTp

— PMO India (@PMOIndia) February 24, 2025

The future of the world is in India!

Come, explore the growth opportunities in our nation…. pic.twitter.com/IRcLhy4CJK

— Narendra Modi (@narendramodi) February 24, 2025

Madhya Pradesh will benefit significantly from the infrastructure efforts of the NDA Government. pic.twitter.com/WVdXczW3cV

— Narendra Modi (@narendramodi) February 24, 2025

Our Governments, at the Centre and in MP, are focusing on water security, which is essential for growth. pic.twitter.com/9xzR8tGbNJ

— Narendra Modi (@narendramodi) February 24, 2025

The first 50 days of 2025 have witnessed fast-paced growth! pic.twitter.com/CfbaU7US2m

— Narendra Modi (@narendramodi) February 24, 2025

*****