ಏಷ್ಯಾದ ಅತಿದೊಡ್ಡ ವೈಮಾನಿಕ ಮತ್ತು ರಕ್ಷಣಾ ಪ್ರದರ್ಶನ ಏರೋ ಇಂಡಿಯಾದ 15ನೇ ಆವೃತ್ತಿಯನ್ನು ರಕ್ಷಣಾ ಸಚಿವರಾದ ಶ್ರೀ ರಾಜನಾಥ್ ಸಿಂಗ್ ಅವರು ಫೆಬ್ರವರಿ 10, 2025 ರಂದು ಕರ್ನಾಟಕದ ಬೆಂಗಳೂರಿನ ಯಲಹಂಕ ವಾಯುನೆಲೆಯಲ್ಲಿ ಉದ್ಘಾಟಿಸಲಿದ್ದಾರೆ. 'ದಿ ರನ್‌ವೇ ಟು ಎ ಬಿಲಿಯನ್ ಆಪರ್ಚುನಿಟೀಸ್' ಎಂಬ ವಿಷಯದೊಂದಿಗೆ, ಐದು ದಿನಗಳ ಮಹಾ ಕಾರ್ಯಕ್ರಮವು ಭಾರತದ ವೈಮಾನಿಕ ಸಾಮರ್ಥ್ಯ ಮತ್ತು ದೇಶೀಯ ಅತ್ಯಾಧುನಿಕ ಆವಿಷ್ಕಾರಗಳು ಮತ್ತು ಜಾಗತಿಕ ವೈಮಾನಿಕ ಕಂಪನಿಗಳ ಅತ್ಯಾಧುನಿಕ ಉತ್ಪನ್ನಗಳನ್ನು ಪ್ರದರ್ಶಿಸುತ್ತದೆ. ‘ಆತ್ಮನಿರ್ಭರ ಭಾರತ್’ ಮತ್ತು ‘ಮೇಕ್ ಇನ್ ಇಂಡಿಯಾ, ಮೇಕ್ ಫಾರ್ ದ ವರ್ಲ್ಡ್’ದೃಷ್ಟಿಗೆ ಅನುಗುಣವಾಗಿ, ಈ ಕಾರ್ಯಕ್ರಮವು ದೇಶೀಕರಣ ಪ್ರಕ್ರಿಯೆಯನ್ನು ವೇಗಗೊಳಿಸಲು ಅಂತರರಾಷ್ಟ್ರೀಯ ಸಹಯೋಗವನ್ನು ನಿರ್ಮಿಸಲು ವೇದಿಕೆಯನ್ನು ಒದಗಿಸುತ್ತದೆ, ಆ ಮೂಲಕ 2047 ರ ವೇಳೆಗೆ ದೇಶವನ್ನು ವಿಕಸಿತ ಭಾರತವನ್ನಾಗಿ ಮಾಡುವ ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ನೇತೃತ್ವದ ಸರ್ಕಾರದ ಸಂಕಲ್ಪವನ್ನು ಬಲಪಡಿಸುತ್ತದೆ.

ಕಾರ್ಯಕ್ರಮದ ಮುನ್ನಾದಿನದಂದು ಬೆಂಗಳೂರಿನಲ್ಲಿ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ರಕ್ಷಣಾ ಸಚಿವರು, ಏರೋ ಇಂಡಿಯಾವು ಒಂದು ಪ್ರಮುಖ ವೇದಿಕೆಯಾಗಿದ್ದು, ಇದು ಸದೃಢ, ಸಮರ್ಥ, ಸುರಕ್ಷಿತ ಮತ್ತು ಸ್ವಾವಲಂಬಿ ಭಾರತದ ಸರ್ಕಾರದ ದೃಷ್ಟಿಯನ್ನು ಮುಂದಕ್ಕೆ ಕೊಂಡೊಯ್ಯುತ್ತದೆ ಎಂದು ಹೇಳಿದರು. ಏರೋ ಇಂಡಿಯಾವು ನವಭಾರತದ ಶಕ್ತಿ, ಸ್ಥಿತಿಸ್ಥಾಪಕತ್ವ ಮತ್ತು ಸ್ವಾವಲಂಬನೆಯನ್ನು ಪ್ರದರ್ಶಿಸುವ ವೇದಿಕೆಯಾಗಿದೆ. ಇದು ಭಾರತದ ರಕ್ಷಣಾ ಸನ್ನದ್ಧತೆಗೆ ಮಾತ್ರವಲ್ಲ, ನಮ್ಮ ರಾಷ್ಟ್ರದ ಭವಿಷ್ಯವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ಇದು ನಮ್ಮ ರಕ್ಷಣಾ ಸಾಮರ್ಥ್ಯಗಳನ್ನು ಪ್ರದರ್ಶಿಸುತ್ತದೆ ಮತ್ತು ಜಾಗತಿಕ ಪಾಲುದಾರಿಕೆಯನ್ನು ಮುನ್ನಡೆಸುತ್ತದೆ. ಸಾಮಾನ್ಯ ಆಸಕ್ತಿಯ ಕ್ಷೇತ್ರಗಳಲ್ಲಿ ನಮ್ಮ ಮಿತ್ರ ದೇಶಗಳೊಂದಿಗೆ ಸಹಯೋಗವನ್ನು ಹೆಚ್ಚಿಸುವುದು, ಸಹಕಾರವನ್ನು ಗಾಢಗೊಳಿಸುವುದು ಮತ್ತು ಹಂಚಿಕೆಯ ಪ್ರಗತಿಯನ್ನು ಉತ್ತೇಜಿಸುವುದು ನಮ್ಮ ಗುರಿಯಾಗಿದೆ. ಈ ಕಾರ್ಯಕ್ರಮವು ತಂತ್ರಜ್ಞಾನ ಮತ್ತು ನಾವೀನ್ಯತೆಗಳ ಪ್ರದರ್ಶನ ಮಾತ್ರವಲ್ಲ, ನಮ್ಮ ಯುವಕರಿಗೆ ಸ್ಫೂರ್ತಿಯ ಮೂಲವಾಗಿದೆ, ವೈಜ್ಞಾನಿಕ ಮನೋಭಾವ ಮತ್ತು ನಾವೀನ್ಯತೆಯ ಮನೋಭಾವವನ್ನು ಉತ್ತೇಜಿಸುತ್ತದೆ ಎಂದು ಅವರು ಹೇಳಿದರು.

42,000 ಚದರ ಮೀಟರ್‌ ಗಿಂತಲೂ ಹೆಚ್ಚು ಪ್ರದೇಶದಲ್ಲಿ ಆಯೋಜಿಸಲಾಗಿರುವ ಈ ಕಾರ್ಯಕ್ರಮವು 150 ವಿದೇಶಿ ಕಂಪನಿಗಳು ಸೇರಿದಂತೆ 900 ಕ್ಕೂ ಹೆಚ್ಚು ಪ್ರದರ್ಶಕರಿಂದ ಭಾಗವಹಿಸುವಿಕೆಯೊಂದಿಗೆ. ಇದು ಅತಿ ದೊಡ್ಡ ಏರೋ ಇಂಡಿಯಾವಾಗಲಿದೆ. ಭಾರತದ ವೈಮಾನಿಕ ಮತ್ತು ರಕ್ಷಣಾ ಸಾಮರ್ಥ್ಯಗಳಲ್ಲಿ ಜಾಗತಿಕವಾಗಿ ಹೆಚ್ಚುತ್ತಿರುವ ವಿಶ್ವಾಸಕ್ಕೆ 90ಕ್ಕೂ ಹೆಚ್ಚು ದೇಶಗಳ ಭಾಗವಹಿಸುವಿಕೆ ಸಾಕ್ಷಿಯಾಗಿದೆ ಎಂದು ಶ್ರೀ ರಾಜನಾಥ್ ಸಿಂಗ್ ಬಣ್ಣಿಸಿದರು. ಸುಮಾರು 30 ದೇಶಗಳ ರಕ್ಷಣಾ ಸಚಿವರು ಅಥವಾ ಪ್ರತಿನಿಧಿಗಳು ಈ ಕಾರ್ಯಕ್ರಮದಲ್ಲಿ ಭಾಗವಹಿಸಲು ಬಂದಿದ್ದಾರೆ. 43 ದೇಶಗಳ ವಾಯುಪಡೆ ಮುಖ್ಯಸ್ಥರು ಮತ್ತು ಕಾರ್ಯದರ್ಶಿಗಳ ಉಪಸ್ಥಿತಿಯು ಈ ಕಾರ್ಯಕ್ರಮದ ಮಹತ್ವವನ್ನು ಭಾರತಕ್ಕೆ ಮಾತ್ರವಲ್ಲ, ಇಡೀ ಅಂತರರಾಷ್ಟ್ರೀಯ ರಕ್ಷಣಾ ಸಮುದಾಯಕ್ಕೆ ಮತ್ತಷ್ಟು ಎತ್ತಿ ತೋರಿಸುತ್ತದೆ ಎಂದು ಅವರು ಹೇಳಿದರು.

ಇತ್ತೀಚಿನ ವರ್ಷಗಳಲ್ಲಿ ರಕ್ಷಣಾ ಮತ್ತು ವೈಮಾನಿಕ ಕ್ಷೇತ್ರದಲ್ಲಿ ಆಗಿರುವ ಪರಿವರ್ತನೆಯನ್ನು ಎತ್ತಿ ಹಿಡಿದ ರಕ್ಷಣಾ ಸಚಿವರು, ಇಂದು ಭಾರತವು ಪ್ರಮುಖ ವೇದಿಕೆಗಳು ಮತ್ತು ಉಪಕರಣಗಳನ್ನು ದೇಶೀಯವಾಗಿ ವಿನ್ಯಾಸಗೊಳಿಸಲು ಮತ್ತು ಅಭಿವೃದ್ಧಿಪಡಿಸಲು ಸಮರ್ಥವಾಗಿದೆ, ಇದು ದೇಶದೊಳಗೆ ವ್ಯಾಪಕವಾದ ಪೂರೈಕೆ ಸರಪಳಿಯನ್ನು ಯಶಸ್ವಿಯಾಗಿ ಸ್ಥಾಪಿಸಿದೆ ಎಂದು ಹೇಳಿದರು. ಲಘು ಯುದ್ಧ ವಿಮಾನ ತೇಜಸ್, ಲಘು ಯುದ್ಧ ಹೆಲಿಕಾಪ್ಟರ್ ಪ್ರಚಂಡ ಮತ್ತು ಸಿ-295 ಸಾರಿಗೆ ವಿಮಾನಗಳಂತಹ ಸುಧಾರಿತ ವಿಮಾನಗಳನ್ನು ಈಗ ಭಾರತದಲ್ಲಿ ತಯಾರಿಸಲಾಗುತ್ತಿದೆ ಎಂದು ಅವರು ಹೇಳಿದರು. ಐದನೇ ತಲೆಮಾರಿನ ಯುದ್ಧ ವಿಮಾನಗಳನ್ನು ದೇಶದೊಳಗೆ ತಯಾರಿಸಲು ನಾವು ನಿರ್ಧರಿಸಿದ್ದೇವೆ. ಅಗ್ನಿ ಕ್ಷಿಪಣಿ, ಅಸ್ತ್ರ ಕ್ಷಿಪಣಿ ವ್ಯವಸ್ಥೆ ಮತ್ತು ಪಿನಾಕಾ ಕ್ಷಿಪಣಿ ವ್ಯವಸ್ಥೆಗಳ ಸುಧಾರಿತ ರೂಪಾಂತರಗಳಿಂದ ಅತ್ಯಾಧುನಿಕ ಹೈಪರ್ಸಾನಿಕ್ ಕ್ಷಿಪಣಿ ವ್ಯವಸ್ಥೆ ಮತ್ತು ಆಕಾಶ್ ವಾಯು ರಕ್ಷಣಾ ವ್ಯವಸ್ಥೆಯವರೆಗೆ ನಾವು ಅನೇಕ ಯಶೋಗಾಥೆಗಳನ್ನು ರಚಿಸಿದ್ದೇವೆ. ಈ ಸಾಧನೆಗಳು ನಮ್ಮ ರಕ್ಷಣಾ ವಲಯವನ್ನು ಬಲಪಡಿಸುವಲ್ಲಿ ಮತ್ತು ಭಾರತವನ್ನು ಹೆಚ್ಚು ಸ್ವಾವಲಂಬಿ ಮತ್ತು ಸುರಕ್ಷಿತವಾಗಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸಿವೆ ಎಂದು ಅವರು ಹೇಳಿದರು.

ಆರ್ಡನೆನ್ಸ್ ಫ್ಯಾಕ್ಟರಿ ಬೋರ್ಡ್‌ ನ ಕಾರ್ಪೊರೇಟೀಕರಣದ ನಂತರ, ಹೊಸದಾಗಿ ರೂಪುಗೊಂಡ ಕಂಪನಿಗಳು ರಕ್ಷಣಾ ಉತ್ಪಾದನೆಯಲ್ಲಿ ಅಸಾಧಾರಣವಾಗಿ ಕಾರ್ಯನಿರ್ವಹಿಸಲು ಪ್ರಾರಂಭಿಸಿವೆ ಎಂದು ಶ್ರೀ ರಾಜನಾಥ್ ಸಿಂಗ್ ಹೇಳಿದರು. "ಸುಸಜ್ಜಿತ ಮತ್ತು ಉತ್ತಮವಾಗಿ ಅಭಿವೃದ್ಧಿ ಹೊಂದಿದ ಯೋಜನೆಯಡಿಯಲ್ಲಿ, ರಕ್ಷಣಾ ಮತ್ತು ವೈಮಾನಿಕ ಉದ್ಯಮಗಳಲ್ಲಿ ಖಾಸಗಿ ವಲಯವನ್ನು ಸಬಲೀಕರಣಗೊಳಿಸಲು ನಾವು ಸಕ್ರಿಯವಾಗಿ ಕೆಲಸ ಮಾಡಿದ್ದೇವೆ. ಇಂದು ಭಾರತವು ಅಭಿವೃದ್ಧಿ ಹೊಂದುತ್ತಿರುವ ಖಾಸಗಿ ರಕ್ಷಣಾ ಉದ್ಯಮವನ್ನು ಹೊಂದಿದೆ ಮತ್ತು ಅದು ತನ್ನನ್ನು ದೃಢವಾಗಿ ಸ್ಥಾಪಿಸಿಕೊಂಡಿದೆ ಮತ್ತು ನಮ್ಮ ರಾಷ್ಟ್ರೀಯ ಭದ್ರತೆಗೆ ಗಣನೀಯ ಕೊಡುಗೆ ನೀಡುತ್ತಿದೆ" ಎಂದು ಅವರು ಹೇಳಿದರು.

ಉತ್ಪಾದನೆಯು ದಾಖಲೆಯ 1.27 ಲಕ್ಷ ಕೋಟಿ ರೂಪಾಯಿಗಳನ್ನು ದಾಟಿದ್ದು, 2025-26 ರ ಅಂತ್ಯದ ವೇಳೆಗೆ 1.60 ಲಕ್ಷ ಕೋಟಿ ರೂಪಾಯಿಗಳನ್ನು ಮೀರಲಿದೆ ಎಂದು ರಕ್ಷಣಾ ಸಚಿವರು ವಿಶ್ವಾಸ ವ್ಯಕ್ತಪಡಿಸಿದರು. ರಕ್ಷಣಾ ರಫ್ತು ದಾಖಲೆಯ 21,000 ಕೋಟಿ ರೂಪಾಯಿಗಳನ್ನು ಮುಟ್ಟಿದ್ದು, 30,000 ಕೋಟಿ ರೂ.ಗಳನ್ನು ಮೀರಲಿದೆ ಎಂದು ಅವರು ಹೇಳಿದರು.

ಭಾರತವನ್ನು ಆರ್ಥಿಕ ಸೂಪರ್ ಪವರ್ ಮಾಡುವಲ್ಲಿ ರಕ್ಷಣಾ ಕೈಗಾರಿಕಾ ವಲಯವು ನಿರ್ವಹಿಸುತ್ತಿರುವ ನಿರ್ಣಾಯಕ ಪಾತ್ರವನ್ನು ಶ್ರೀ ರಾಜನಾಥ್ ಸಿಂಗ್ ಅವರು ಒತ್ತಿಹೇಳಿದರು. ರಕ್ಷಣಾ ಕ್ಷೇತ್ರದಲ್ಲಿನ ಯಾವುದೇ ಪ್ರಗತಿಯು ರಾಷ್ಟ್ರೀಯ ಭದ್ರತೆಯನ್ನು ಬಲಪಡಿಸುವುದಲ್ಲದೆ, ಆರ್ಥಿಕತೆಯ ಮೇಲೂ ಪರಿಣಾಮ ಬೀರುತ್ತದೆ ಎಂದು ಅವರು ಹೇಳಿದರು. ರಕ್ಷಣಾ ಅನ್ವಯಿಕೆಗಳಿಗಾಗಿ ಅಭಿವೃದ್ಧಿಪಡಿಸಲಾದ ತಂತ್ರಜ್ಞಾನಗಳು ನಾಗರಿಕ ವಲಯದಲ್ಲಿ ಆವಿಷ್ಕಾರವನ್ನು ಉತ್ತೇಜಿಸುತ್ತವೆ, ಇದು ಉದ್ಯೋಗ ಸೃಷ್ಟಿ ಮತ್ತು ಆರ್ಥಿಕ ಅಭಿವೃದ್ಧಿಗೆ ಕಾರಣವಾಗುತ್ತದೆ ಎಂದು ಅವರು ಹೇಳಿದರು. ಏರೋ ಇಂಡಿಯಾವನ್ನು ಆರ್ಥಿಕ ಶಕ್ತಿಯ ಮಹತ್ವದ ಚಾಲಕ ಎಂದು ಕರೆದ ಅವರು ಆರ್ಥಿಕತೆಯ ಒಟ್ಟಾರೆ ಬೆಳವಣಿಗೆ ಮತ್ತು ಅಭಿವೃದ್ಧಿಗೆ ಕೊಡುಗೆ ನೀಡುತ್ತಿದೆ ಎಂದು ಹೇಳಿದರು. ಏರೋಸ್ಪೇಸ್ ಮತ್ತು ರಕ್ಷಣಾ ವಲಯದಲ್ಲಿ ಜಾಗತಿಕ ನಾಯಕನಾಗುವ ಭಾರತದ ಪಯಣದಲ್ಲಿ ಏರೋ ಇಂಡಿಯಾವನ್ನು ಐತಿಹಾಸಿಕ ಮೈಲಿಗಲ್ಲಾಗಿ ಎಂದು ನೆನಪಿಸಿಕೊಳ್ಳಲಾಗುವುದು ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.

15 ನೇ ಏರೋ ಇಂಡಿಯಾ 2025 ರ ಫೆಬ್ರವರಿ 10 ರಿಂದ 14 ರವರೆಗೆ ನಡೆಯಲಿದೆ. ಫೆಬ್ರವರಿ 10 ರಿಂದ 12 ರವರೆಗೆ ವ್ಯವಹಾರದ ದಿನಗಳನ್ನು ಕಾಯ್ದಿರಿಸಲಾಗಿದೆ, 13 ಮತ್ತು 14 ಅನ್ನು ಸಾರ್ವಜನಿಕ ದಿನಗಳಾಗಿ ಜನರು ಪ್ರದರ್ಶನವನ್ನು ವೀಕ್ಷಿಸಲು ಮೀಸಲಿಡಲಾಗಿದೆ. ಇದು ರಕ್ಷಣಾ ಮಂತ್ರಿಗಳ ಸಮ್ಮೇಳನವನ್ನು ಒಳಗೊಂಡಿರುತ್ತದೆ; ಸಿಇಒ ರೌಂಡ್ ಟೇಬಲ್; ಭಾರತ ಮತ್ತು ಐಡೆಕ್ಸ್ ಪೆವಿಲಿಯನ್‌ ಗಳ ಉದ್ಘಾಟನೆ; ಮಂಥನ್ ಐಡೆಕ್ಸ್ ಕಾರ್ಯಕ್ರಮ; ಸ್ವದೇಶೀ ʼಸಾಮರ್ಥ್ಯʼ ಕಾರ್ಯಕ್ರಮ; ಸಮಾರೋಪ ಸಮಾರಂಭ; ಸೆಮಿನಾರ್; ವೈಮಾನಿಕ ಕಂಪನಿಗಳಿಂದ ಅತ್ಯಾಕರ್ಷಕ ಏರ್ ಶೋಗಳು ಮತ್ತು ಪ್ರದರ್ಶನಗಳನ್ನು ಏರೋ ಇಂಡಿಯಾ ಒಳಗೊಂಡಿದೆ.

ರಕ್ಷಣಾ ಮಂತ್ರಿಗಳ ಸಮಾವೇಶ

ವೇಗವಾಗಿ ವಿಕಸನಗೊಳ್ಳುತ್ತಿರುವ ಜಾಗತಿಕ ಭದ್ರತಾ ಸನ್ನಿವೇಶದ ನಡುವೆ ಸ್ನೇಹಪರ ರಾಷ್ಟ್ರಗಳೊಂದಿಗೆ ರಕ್ಷಣಾ ಸಹಕಾರವನ್ನು ಬಲಪಡಿಸುವ ಗುರಿಯೊಂದಿಗೆ, ರಕ್ಷಣಾ ಸಚಿವರು ಫೆಬ್ರವರಿ 11 ರಂದು ಹೈಬ್ರಿಡ್ ಮೋಡ್‌ ನಲ್ಲಿ ರಕ್ಷಣಾ ಮಂತ್ರಿಗಳ ಸಮಾವೇಶವನ್ನು ಆಯೋಜಿಸಿದ್ದಾರೆ. ಈ ವರ್ಷದ ಥೀಮ್ 'ಅಂತರರಾಷ್ಟ್ರೀಯ ರಕ್ಷಣಾ ಮತ್ತು ಜಾಗತಿಕ ತೊಡಗಿಸಿಕೊಳ್ಳುವಿಕೆ (ಬ್ರಿಡ್ಜ್) ಮೂಲಕ ಸ್ಥಿತಿಸ್ಥಾಪಕತ್ವವನ್ನು ನಿರ್ಮಿಸುವುದು' ಪೂರೈಕೆ ಸರಪಳಿಯ ಸ್ಥಿತಿಸ್ಥಾಪಕತ್ವ ಮತ್ತು ರಕ್ಷಣೆಯಲ್ಲಿ ಕಾರ್ಯತಂತ್ರದ ಸಹಯೋಗದ ಪ್ರಾಮುಖ್ಯತೆಯನ್ನು ಒತ್ತಿಹೇಳುತ್ತದೆ.

ಕಳೆದ ಆವೃತ್ತಿಯು 15 ರಕ್ಷಣಾ ಮತ್ತು ಸೇನಾ ಮುಖ್ಯಸ್ಥರು ಮತ್ತು 12 ಖಾಯಂ ಕಾರ್ಯದರ್ಶಿಗಳೊಂದಿಗೆ 27 ರಕ್ಷಣಾ ಮಂತ್ರಿಗಳು ಮತ್ತು ಉಪ ರಕ್ಷಣಾ ಮಂತ್ರಿಗಳ ಭಾಗವಹಿಸುವಿಕೆಗೆ ಸಾಕ್ಷಿಯಾಗಿತ್ತು. ಈ ವರ್ಷ, 80 ಕ್ಕೂ ಹೆಚ್ಚು ದೇಶಗಳ ಪ್ರತಿನಿಧಿಗಳು ಸಮಾವೇಶದಲ್ಲಿ ಭಾಗವಹಿಸುವ ಸಾಧ್ಯತೆಯಿರುವುದರಿಂದ ಭಾಗವಹಿಸುವಿಕೆ ವಿಸ್ತರಿಸಿದೆ. ಅಂದಾಜು ರಕ್ಷಣಾ/ಸೇನಾ ಮುಖ್ಯಸ್ಥರ ಜೊತೆಗೆ 30 ರಕ್ಷಣಾ ಮಂತ್ರಿಗಳು ಮತ್ತು ಮಿತ್ರರಾಷ್ಟ್ರಗಳ ಖಾಯಂ ಕಾರ್ಯದರ್ಶಿಗಳು ಭಾಗವಹಿಸಲಿದ್ದಾರೆ.

ಹೂಡಿಕೆ, ಜಂಟಿ ಉದ್ಯಮಗಳು ಮತ್ತು ಸಹ-ಉತ್ಪಾದನೆ, ಆರ್ & ಡಿ ಯಲ್ಲಿ ಸಹಯೋಗ, ಎಐ ಮತ್ತು ಬಾಹ್ಯಾಕಾಶದಲ್ಲಿ ತರಬೇತಿ ಮತ್ತು ತಾಂತ್ರಿಕ ಪ್ರಗತಿಗಳು, ಕಡಲ ಭದ್ರತಾ ಸಹಕಾರ ಮತ್ತು ಕಾರ್ಯತಂತ್ರದ ಪಾಲುದಾರಿಕೆಗಳ ಮೂಲಕ ರಕ್ಷಣಾ ಸಾಮರ್ಥ್ಯ ನಿರ್ಮಾಣದಂತಹ ಪ್ರಮುಖ ಅಂಶಗಳನ್ನು ಪರಿಹರಿಸಲು ಸಮಾವೇಶವು ನಿರ್ಣಾಯಕ ವೇದಿಕೆಯನ್ನು ಒದಗಿಸುತ್ತದೆ.

ಸಿಇಒ ದುಂಡುಮೇಜಿನ

'ಜಾಗತಿಕ ತೊಡಗಿಸಿಕೊಳ್ಳುವಿಕೆ ಮೂಲಕ ರಕ್ಷಣಾ ಸಹಕಾರವನ್ನು ಸಕ್ರಿಯಗೊಳಿಸುವುದು (ಎಡ್ಜ್)' ಎಂಬ ವಿಷಯದೊಂದಿಗೆ ಸಿಇಒ ರೌಂಡ್‌ಟೇಬಲ್ 2025 ರ ಅಧ್ಯಕ್ಷತೆಯನ್ನು ಫೆಬ್ರವರಿ 10 ರಂದು ರಕ್ಷಣಾ ಸಚಿವರು ವಹಿಸಲಿದ್ದಾರೆ.  100 ಕ್ಕೂ ಹೆಚ್ಚು ಮೂಲ ಉಪಕರಣ ತಯಾರಕರು (ಒಇಎಂಗಳು) ಕಾರ್ಯಕ್ರಮದಲ್ಲಿ ತಮ್ಮ ಭಾಗವಹಿಸುವಿಕೆಯನ್ನು ದೃಢಪಡಿಸಿದ್ದಾರೆ. ಇವುಗಳಲ್ಲಿ 19 ದೇಶಗಳ 55 (ಅಮೆರಿಕ, ಫ್ರಾನ್ಸ್, ರಷ್ಯಾ, ದಕ್ಷಿಣ ಕೊರಿಯಾ, ಯುಕೆ, ಜಪಾನ್, ಇಸ್ರೇಲ್ ಮತ್ತು ಬ್ರೆಜಿಲ್ ಇತ್ಯಾದಿ.), 35 ಭಾರತೀಯ (ಲಾರ್ಸೆನ್ ಮತ್ತು ಟೂಬ್ರೊ, ಭಾರತ್ ಫೋರ್ಜ್ ಲಿಮಿಟೆಡ್, ಅದಾನಿ ಡಿಫೆನ್ಸ್ ಮತ್ತು ಏರೋಸ್ಪೇಸ್, ​​ಮಹೀಂದ್ರ ಡಿಫೆನ್ಸ್ ಸಿಸ್ಟಮ್ಸ್ ಲಿಮಿಟೆಡ್, ಬ್ರಹ್ಮೋಸ್ ಏರೋಸ್ಪೇಸ್ ಮತ್ತು ಅಶೋಕ್ ಲೇಲ್ಯಾಂಡ್ ಪಬ್ಲಿಕ್ ಡಿಫೆನ್ಸ್) ಮತ್ತು 16 ರಕ್ಷಣಾ ಸಾರ್ವಜನಿಕ ವಲಯದ ಉದ್ಯಗಳು (ಡಿ ಪಿ ಎಸ್ ಯು) ಸೇರಿವೆ. 2023ರ ಆವೃತ್ತಿಯಲ್ಲಿ ಶ್ರೀ ರಾಜನಾಥ್ ಸಿಂಗ್ ಅವರು 28 ವಿದೇಶಿ ಒಇಎಂಗಳು ಮತ್ತು 45 ಭಾರತೀಯ ಒಇಎಂಗಳ 73 ಸಿಇಒಗಳನ್ನು ಉದ್ದೇಶಿಸಿ ಮಾತನಾಡಿದ್ದರು.

ಏರ್‌ ಬಸ್ (ಫ್ರಾನ್ಸ್), ಅಲ್ಟ್ರಾ ಮ್ಯಾರಿಟೈಮ್ (ಯು ಎಸ್‌ ಎ), ಜಿ ಎನ್‌ ಟಿ (ದಕ್ಷಿಣ ಕೊರಿಯಾ), ಜಾನ್ ಕಾಕೆರಿಲ್ ಡಿಫೆನ್ಸ್ (ಯುಕೆ), ಮಿತ್ಸುಬಿಷಿ (ಜಪಾನ್), ರಾಫೆಲ್ ಅಡ್ವಾನ್ಸ್ ಡಿಫೆನ್ಸ್ ಸಿಸ್ಟಮ್ (ಇಸ್ರೇಲ್), ಸಫ್ರಾನ್ (ಫ್ರಾನ್ಸ್) ಮತ್ತು ಲೈಬರ್ ಏರೋಸ್ಪೇಸ್ (ಫ್ರಾನ್ಸ್) ಸೇರಿದಂತೆ ಪ್ರಮುಖ ವಿದೇಶಿ ಒಇಎಂಗಳು ಭಾರತೀಯ ಕಂಪನಿಗಳೊಂದಿಗೆ ಬಿಡಿಭಾಗಗಳ ಉತ್ಪಾದನೆ, ಏರೋ-ಎಂಜಿನ್‌ ಗಳ ಅಭಿವೃದ್ಧಿ, ನಿರ್ವಹಣೆ, ದುರಸ್ತಿ ಮತ್ತು ಕಾರ್ಯಾಚರಣೆ (ಎಂ ಆರ್‌ ಒ) ಸೌಲಭ್ಯಗಳ ಸ್ಥಾಪನೆ ಮತ್ತು ಆರ್‌ & ಡಿ ಸೌಲಭ್ಯಗಳ ಸ್ಥಾಪನೆ ಇತ್ಯಾದಿಗಳಿಗಾಗಿ ತಮ್ಮ ಭವಿಷ್ಯದ ಯೋಜನೆಗಳು, ಪಾಲುದಾರಿಕೆಯನ್ನು ನಿರೀಕ್ಷಿಸಲಾಗಿದೆ.

ಇಂಡಿಯಾ ಪೆವಿಲಿಯನ್

ಇಂಡಿಯಾ ಪೆವಿಲಿಯನ್ ಭಾರತೀಯ ರಕ್ಷಣಾ ಉದ್ಯಮಗಳಿಗೆ ತಮ್ಮ ವಿನ್ಯಾಸ, ಅಭಿವೃದ್ಧಿ, ನಾವೀನ್ಯತೆ ಮತ್ತು ಉತ್ಪಾದನಾ ಸಾಮರ್ಥ್ಯಗಳನ್ನು ಪ್ರದರ್ಶಿಸಲು ಅವಕಾಶವನ್ನು ಒದಗಿಸುತ್ತದೆ. ಇದನ್ನು ಫೆಬ್ರವರಿ 10 ರಂದು ರಕ್ಷಣಾ ಸಚಿವರು ಉದ್ಘಾಟಿಸಲಿದ್ದಾರೆ. ಇಂಡಿಯಾ ಪೆವಿಲಿಯನ್‌ನಲ್ಲಿನ ಭವ್ಯ ಪ್ರದರ್ಶನವು 'ಸ್ವಾವಲಂಬನೆಯ ಹಾರಾಟ'ವನ್ನು ಸಂಕೇತಿಸುತ್ತದೆ, ಇದು ಜಾಗತಿಕ ಏರೋಸ್ಪೇಸ್ ಮತ್ತು ರಕ್ಷಣಾ ಮಹಾಶಕ್ತಿಯಾಗುವತ್ತ ಭಾರತದ ಪ್ರಯಾಣವನ್ನು ತೋರಿಸುತ್ತದೆ.

ಏರೋ ಏವಿಯೇಷನ್, ಲ್ಯಾಂಡ್ ಏವಿಯೇಷನ್ ​​ಮತ್ತು ನೇವಲ್ ಏವಿಯೇಷನ್, ಡಿಫೆನ್ಸ್-ಸ್ಪೇಸ್ ಮತ್ತು ಸ್ಥಾಪಿತ ತಂತ್ರಜ್ಞಾನ ಕ್ಷೇತ್ರಗಳಲ್ಲಿ ದೇಶೀಯ ಸಾಮರ್ಥ್ಯಗಳನ್ನು ಪ್ರದರ್ಶಿಸುವ ಇಂಡಿಯಾ ಪೆವಿಲಿಯನ್ ಅನ್ನು ಐದು ವಿಭಿನ್ನ ವಲಯಗಳಾಗಿ ವಿಂಗಡಿಸಲಾಗಿದೆ. ಡಿ ಪಿ ಎಸ್‌ ಯು ಗಳು, ವಿನ್ಯಾಸ ಸಂಸ್ಥೆಗಳು, ಖಾಸಗಿ ಕಾರ್ಪೊರೇಟ್‌ ಗಳು ಮತ್ತು ಸ್ಟಾರ್ಟ್‌ಅಪ್‌ ಗಳು, ಎಂ ಎಸ್‌ ಎಂ ಇ ಗಳು ಸೇರಿದಂತೆ ದೇಶದ ಸಂಪೂರ್ಣ ರಕ್ಷಣಾ ಪರಿಸರ ವ್ಯವಸ್ಥೆಯನ್ನು ಪ್ರತಿನಿಧಿಸುವ ವಿವಿಧ ಮಾಧ್ಯಮಗಳ ಮೂಲಕ 275 ಕ್ಕೂ ಹೆಚ್ಚು ಪ್ರದರ್ಶನಗಳನ್ನು ನಡೆಸಲಾಗುವುದು. ಸೆಂಟ್ರಲ್ ಏರಿಯಾ ಪ್ರದರ್ಶನವು ಸುಧಾರಿತ ಮಧ್ಯಮ ಯುದ್ಧ ವಿಮಾನ, ಕಾಂಬ್ಯಾಟ್ ಏರ್ ಟೀಮಿಂಗ್ ಸಿಸ್ಟಮ್, ಟ್ವಿನ್-ಎಂಜಿನ್ ಡೆಕ್-ಬೇಸ್ಡ್ ಫೈಟರ್ ಸೇರಿದಂತೆ ಮಾರ್ಕ್ಯೂ ಪ್ಲಾಟ್‌ಫಾರ್ಮ್‌ ಗಳ ಅದ್ಭುತ ಪ್ರದರ್ಶನವನ್ನು ಒಳಗೊಂಡಿರುತ್ತದೆ.

ಐಡೆಕ್ಸ್ ಪೆವಿಲಿಯನ್

ಐಡೆಕ್ಸ್‌ ಪೆವಿಲಿಯನ್ ಅನ್ನು ಫೆಬ್ರವರಿ 10 ರಂದು ರಕ್ಷಣಾ ಸಚಿವರು ಉದ್ಘಾಟಿಸಲಿದ್ದಾರೆ. ಇದು ದೇಶೀಯವಾಗಿ ಅಭಿವೃದ್ಧಿಪಡಿಸಿದ ಅತ್ಯಾಧುನಿಕ ಉತ್ಪನ್ನಗಳು ಮತ್ತು ತಂತ್ರಜ್ಞಾನಗಳನ್ನು ಪ್ರದರ್ಶಿಸುತ್ತದೆ, ಇದು ಭಾರತದ ರಕ್ಷಣಾ ನಾವೀನ್ಯತೆ ಪ್ರಯಾಣದಲ್ಲಿ ಪ್ರಮುಖ ಮೈಲಿಗಲ್ಲು ಎಂದು ಸಾಬೀತುಪಡಿಸುತ್ತದೆ. ಪ್ರಮುಖ ಆವಿಷ್ಕಾರಕರು ಏರೋಸ್ಪೇಸ್, ​​ಡಿಫ್‌ ಸ್ಪೇಸ್, ​​ಏರೋ ಸ್ಟ್ರಕ್ಚರ್ಸ್, ಆಂಟಿ-ಡ್ರೋನ್ ಸಿಸ್ಟಮ್ಸ್, ಅಟಾನಮಸ್‌ ಸಿಸ್ಟಮ್ಸ್‌, ರೊಬೊಟಿಕ್ಸ್, ಸಂವಹನ, ಸೈಬರ್ ಭದ್ರತೆ, ಕಣ್ಗಾವಲು ಮತ್ತು ಟ್ರ್ಯಾಕಿಂಗ್, ಮಾನವರಹಿತ ಭೂ ವಾಹನಗಳು ಇತ್ಯಾದಿ ಸೇರಿದಂತೆ ವ್ಯಾಪಕ ಶ್ರೇಣಿಯ ಸುಧಾರಿತ ವಲಯಗಳಾದ್ಯಂತದ ವ್ಯಾಪಿಸಿರುವ ತಮ್ಮ ದೇಶೀಯವಾಗಿ ಅಭಿವೃದ್ಧಿಪಡಿಸಿದ ಉತ್ಪನ್ನಗಳನ್ನು ಪ್ರದರ್ಶಿಸುತ್ತಾರೆ. ಐಡೆಕ್ಸ್ ಯೋಜನೆಯೊಂದಿಗೆ ನವೀನ ತಂತ್ರಜ್ಞಾನಗಳ ಅಭಿವೃದ್ಧಿಯಲ್ಲಿ (ADITI) ವಿಜೇತರನ್ನು ಹೈಲೈಟ್ ಮಾಡುವ ಮೀಸಲಾದ ವಿಭಾಗವನ್ನು ಪೆವಿಲಿಯನ್ ಹೊಂದಿದೆ, ಇದು ನಿರ್ಣಾಯಕ ಮತ್ತು ಸ್ಥಾಪಿತ ತಂತ್ರಜ್ಞಾನಗಳಲ್ಲಿ ಅವರ ಅದ್ಭುತ ಕೆಲಸವನ್ನು ಪ್ರದರ್ಶಿಸುತ್ತದೆ.

ಐಡೆಕ್ಸ್ 600 ಸ್ಟಾರ್ಟ್-ಅಪ್‌‌ ಗಳು ಮತ್ತು ಎಂ ಎಸ್‌ ಎಂ ಇ ಗಳನ್ನು ಯಶಸ್ವಿಯಾಗಿ ಸೇರ್ಪಡೆ ಮಾಡಿದೆ. ಇದು ನಾವೀನ್ಯತೆಯನ್ನು ಬೆಳೆಸುವಲ್ಲಿ ಮಹತ್ವದ ಮೈಲಿಗಲ್ಲನ್ನು ಗುರುತಿಸಿದೆ. ಇದಲ್ಲದೆ, ಐಡೆಕ್ಸ್‌ ಅಡಿಯಲ್ಲಿ ಅಭಿವೃದ್ಧಿಪಡಿಸಲಾದ 40 ಮೂಲಮಾದರಿಗಳು ಸಂಗ್ರಹಣೆಗೆ ಅಧಿಕೃತ ಅನುಮತಿಯನ್ನು ಪಡೆದಿವೆ, 1,560 ಕೋಟಿ ಮೌಲ್ಯದ 31 ಖರೀದಿ ಒಪ್ಪಂದಗಳಿಗೆ ಈಗಾಗಲೇ ಸಹಿ ಹಾಕಲಾಗಿದೆ.

ಮಂಥನ್

ರಕ್ಷಣಾ ಆವಿಷ್ಕಾರದ ಪ್ರಮುಖ ವಾರ್ಷಿಕ ಕಾರ್ಯಕ್ರಮವಾದ ಮಂಥನ್ 2025 ಅನ್ನು ಫೆಬ್ರವರಿ 12 ರಂದು ರಕ್ಷಣಾ ಸಚಿವರ ಸಮ್ಮುಖದಲ್ಲಿ ಆಯೋಜಿಸಲಾಗುವುದು. ರಕ್ಷಣಾ ಉತ್ಕೃಷ್ಟತೆಗಾಗಿ ನಾವೀನ್ಯತೆ – ರಕ್ಷಣಾ ನಾವೀನ್ಯತೆ ಸಂಸ್ಥೆ (iDEX-DIO) ಆಯೋಜಿಸುವ ಈ ಕಾರ್ಯಕ್ರಮವು ನಾವೀನ್ಯಕಾರರು, ಉದ್ಯಮದ ನಾಯಕರು, ಶಿಕ್ಷಣ ತಜ್ಞರು, ಇನ್ಕ್ಯುಬೇಟರ್‌‌ ಗಳು, ಹೂಡಿಕೆದಾರರು, ಚಿಂತಕರು, ಹಿರಿಯ ಸರ್ಕಾರಿ ಅಧಿಕಾರಿಗಳನ್ನು ಒಳಗೊಂಡಂತೆ ರಕ್ಷಣಾ ನಾವೀನ್ಯತೆ ಪರಿಸರ ವ್ಯವಸ್ಥೆಯ ಭಾಗೀದಾರರನ್ನು ಒಟ್ಟುಗೂಡಿಸುತ್ತದೆ.

ರಕ್ಷಣಾ ಸ್ಟಾರ್ಟ್-ಅಪ್‌ ಗಳು ಮತ್ತು ಎಂ ಎಸ್‌ ಎಂ ಇ ಗಳನ್ನು ಬೆಂಬಲಿಸುವುದು, ನಾವೀನ್ಯತೆ ಸಾಮರ್ಥ್ಯಗಳನ್ನು ಹೆಚ್ಚಿಸುವುದು ಮತ್ತು ರಕ್ಷಣಾ ಪೂರಕ ವ್ಯವಸ್ಥೆಯಲ್ಲಿ ಕಾರ್ಯತಂತ್ರದ ಸಹಯೋಗಗಳನ್ನು ಉತ್ತೇಜಿಸುವ ಮೂಲಕ ವಲಯದಲ್ಲಿನ ಉದಯೋನ್ಮುಖ ಸವಾಲುಗಳು ಮತ್ತು ಅವಕಾಶಗಳ ಕುರಿತು ಮಂಥನ್ ಚರ್ಚಿಸುತ್ತದೆ. ಇದು ಐಡೆಕ್ಸ್‌ ನ ಪ್ರಮಾಣ ಮತ್ತು ವೇಗಕ್ಕೆ ಸಾಕ್ಷಿಯಾಗಿ ನಿಂತಿದೆ, ರಕ್ಷಣಾ ನಾವೀನ್ಯತೆಯಲ್ಲಿ ಮಾಡಿದ ಕ್ಷಿಪ್ರ ಸಾಧನೆಗಳನ್ನು ಮತ್ತು ಭಾರತದ ರಕ್ಷಣಾ ಸಾಮರ್ಥ್ಯಗಳನ್ನು ಪರಿವರ್ತಿಸುವಲ್ಲಿ ಸ್ಟಾರ್ಟ್-ಅಪ್‌ ಗಳ ಪ್ರಮುಖ ಪಾತ್ರವನ್ನು ಪ್ರದರ್ಶಿಸುತ್ತದೆ.

ಸಾಮರ್ಥ್ಯ

ಫೆಬ್ರವರಿ 12 ರಂದು ರಕ್ಷಣಾ ಸಚಿವರ ಉಪಸ್ಥಿತಿಯಲ್ಲಿ ಸಮಾರೋಪ ಕಾರ್ಯಕ್ರಮದ ಜೊತೆಗೆ ರಕ್ಷಣಾ ಕ್ಷೇತ್ರದಲ್ಲಿ ಸ್ವದೇಶೀಕರಣ ಮತ್ತು ನಾವೀನ್ಯತೆಯ ಯಶೋಗಾಥೆಯ ಕುರಿತು, ‘ಸಾಮರ್ಥ್ಯ’ವಿಷಯದ ಮೇಲೆ ಸ್ವದೇಶೀಕರಣ ಕಾರ್ಯಕ್ರಮ ನಡೆಯಲಿದೆ. ಏರೋ ಇಂಡಿಯಾದ ಸಮಯದಲ್ಲಿ ಈ ಘಟನೆಯು ಮೊದಲನೆಯದಾಗಿದೆ, ಏಕೆಂದರೆ ಇದು ಖಾಸಗಿ ವಲಯದ ಒಳಗೊಳ್ಳುವಿಕೆಯೊಂದಿಗೆ ಡಿ ಪಿ ಎಸ್‌ ಯು ಗಳು, ಡಿ ಆರ್‌ ಡಿ ಒ ಮತ್ತು ಸೇವೆಗಳ ದೇಶೀಯವಾಗಿರುವ ಕೆಲವು ಪ್ರಮುಖ ವಸ್ತುಗಳನ್ನು ಪ್ರದರ್ಶಿಸುವ ಮೂಲಕ ರಕ್ಷಣಾ ಉತ್ಪಾದನೆಯಲ್ಲಿ ಭಾರತದ ದೇಶೀಯ ಜಾಣ್ಮೆಯನ್ನು ಪ್ರದರ್ಶಿಸುತ್ತದೆ.

ದ್ವಿಪಕ್ಷೀಯ ಸಭೆಗಳು

ಏರೋ ಇಂಡಿಯಾ 2025 ರ ಸಂದರ್ಭದಲ್ಲಿ ರಕ್ಷಣಾ ಸಚಿವರು/ ರಕ್ಷಣಾ ರಾಜ್ಯ ಸಚಿವರು/ ರಕ್ಷಣಾ ಸಿಬ್ಬಂದಿ / ಸೇನಾ ಮುಖ್ಯಸ್ಥರು / ರಕ್ಷಣಾ ಕಾರ್ಯದರ್ಶಿ / ಕಾರ್ಯದರ್ಶಿ (ರಕ್ಷಣಾ ಉತ್ಪಾದನೆ) ಮಟ್ಟದಲ್ಲಿ ದ್ವಿಪಕ್ಷೀಯ ಸಭೆಗಳು ನಡೆಯುತ್ತವೆ.

ವಿಚಾರ ಸಂಕಿರಣಗಳು

ಏರೋ ಇಂಡಿಯಾ 2025ರ ಅಡಿಯಲ್ಲಿ ವಿವಿಧ ವಿಷಯಗಳ ಕುರಿತು ಹಲವು ವಿಚಾರ ಸಂಕಿರಣಗಳನ್ನು ಆಯೋಜಿಸಲಾಗುವುದು. ಫೆಬ್ರವರಿ 11 ರಂದು, ರಕ್ಷಣಾ ಸಚಿವರು ಭಾರತೀಯ ವಾಯುಪಡೆಯು 'ಮಾನವಸಹಿತ ಮಾನವರಹಿತ ತಂಡಗಳು ವಾಯು ಯುದ್ಧಕ್ಕಾಗಿ - ಪರಿಕಲ್ಪನೆಯಿಂದ ಗುರಿಯತ್ತ' ಎಂಬ ವಿಷಯದ ಕುರಿತು ಆಯೋಜಿಸಲಾದ ವಿಚಾರ ಸಂಕಿರಣವನ್ನು ಮತ್ತು 'ವಿಕಸಿತ ಭಾರತಕ್ಕಾಗಿ ʼಡಿ ಆರ್‌ ಡಿ ಒ ಇಂಡಸ್ಟ್ರಿ ಸಿನರ್ಜಿ' ವಿಷಯದ ಕುರಿತು ಡಿ ಆರ್‌ ಡಿ ಒ ಆಯೋಜಿಸಿರುವ ವಿಚಾರ ಸಂಕಿರಣವನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ.

ಇತರ ವಿಚಾರಗೋಷ್ಠಿಗಳು - ಮಿಷನ್ ಡಿಫ್‌ ಸ್ಪೇಸ್: ದೃಷ್ಟಿಯಿಂದ ವಾಸ್ತವಕ್ಕೆ - ಪ್ರಗತಿಯ ವರದಿ; ಏರೋಸ್ಪೇಸ್ ಸಾಮಗ್ರಿಗಳ ದೇಶೀಯ ಅಭಿವೃದ್ಧಿ: ಭಾರತದ ಸ್ವಾವಲಂಬನೆಯನ್ನು ಬಲಪಡಿಸುವುದು; ಆತ್ಮನಿರ್ಭರ್ ಇಂಡಿಯನ್ ನೇವಲ್ ಏವಿಯೇಷನ್ ​​2047 ಮತ್ತು ಅದರ ಸಂಬಂಧಿತ ಪೂರಕ ವ್ಯವಸ್ಥೆಗೆ ಪರಿವರ್ತನೆ; ತಾಂತ್ರಿಕ ಪ್ರವೃತ್ತಿಗಳು ಮತ್ತು ಸ್ವದೇಶೀಕರಣವನ್ನು ಅಳವಡಿಸಿಕೊಳ್ಳುವ ಮೂಲಕ ಕಡಲ ವಾಯುಯಾನದ ರೂಪಾಂತರ; ಭವಿಷ್ಯದ ಸಂಘರ್ಷಗಳಿಗೆ ತಂತ್ರಜ್ಞಾನಗಳನ್ನು ಜೋಡಿಸುವುದು; ಮತ್ತು ಕರ್ನಾಟಕದಲ್ಲಿ ಏರೋಸ್ಪೇಸ್ ಮತ್ತು ರಕ್ಷಣಾ ತಯಾರಕರಿಗೆ ಹೂಡಿಕೆ ಅವಕಾಶಗಳು - ಕಾರ್ಯಕ್ರಮದ ಭಾಗವಾಗಿ ನಡೆಯಲಿವೆ.

ಐತಿಹಾಸಿಕ ಮೊದಲನೆಯದು - ಏರೋ ಇಂಡಿಯಾದಲ್ಲಿ Su-57 ಮತ್ತು F-35

ಇತಿಹಾಸದಲ್ಲಿ ಮೊದಲ ಬಾರಿಗೆ, ಏರೋ ಇಂಡಿಯಾ 2025 ವಿಶ್ವದ ಎರಡು ಅತ್ಯಾಧುನಿಕ ಐದನೇ ತಲೆಮಾರಿನ ಯುದ್ಧ ವಿಮಾನಗಳಾದ ರಷ್ಯಾದ Su-57 ಮತ್ತು ಅಮೇರಿಕನ್ F-35 ಲೈಟ್ನಿಂಗ್ II ಭಾಗವಹಿಸುವಿಕೆಗೆ ಸಾಕ್ಷಿಯಾಗಲಿದೆ. ಇದು ಜಾಗತಿಕ ರಕ್ಷಣಾ ಸಹಯೋಗ ಮತ್ತು ತಾಂತ್ರಿಕ ಪ್ರಗತಿಯಲ್ಲಿ ಒಂದು ಮೈಲಿಗಲ್ಲನ್ನು ಗುರುತಿಸುತ್ತದೆ, ವೈಮಾನಿಕ ಉತ್ಸಾಹಿಗಳಿಗೆ ಮತ್ತು ರಕ್ಷಣಾ ತಜ್ಞರಿಗೆ ಈ ಅತ್ಯಾಧುನಿಕ ಯುದ್ಧವಿಮಾನಗಳನ್ನು ವೀಕ್ಷಿಸಲು ಅನನ್ಯ ಅವಕಾಶವನ್ನು ನೀಡುತ್ತದೆ.

• Su-57: ರಷ್ಯಾದ ಪ್ರಧಾನ ಸ್ಟೆಲ್ತ್ ಮಲ್ಟಿರೋಲ್ ಫೈಟರ್ ಅನ್ನು ಉನ್ನತ ವಾಯು ಶ್ರೇಷ್ಠತೆ ಮತ್ತು ಸ್ಟ್ರೈಕ್ ಸಾಮರ್ಥ್ಯಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ. ಸುಧಾರಿತ ಏವಿಯಾನಿಕ್ಸ್, ಸೂಪರ್ ಕ್ರೂಸ್ ಸಾಮರ್ಥ್ಯ ಮತ್ತು ಸ್ಟೆಲ್ತ್ ತಂತ್ರಜ್ಞಾನವನ್ನು ಹೊಂದಿರುವ ಇದು ಏರೋ ಇಂಡಿಯಾ 2025 ರಲ್ಲಿ ಪಾದಾರ್ಪಣೆ ಮಾಡಲು ಸಿದ್ಧವಾಗಿದೆ. ಸಂದರ್ಶಕರು ಹೆಚ್ಚಿನ ವೇಗದ ವೈಮಾನಿಕ ಕುಶಲತೆಗಳು ಮತ್ತು ಯುದ್ಧತಂತ್ರದ ಪ್ರದರ್ಶನಗಳನ್ನು ನಿರೀಕ್ಷಿಸಬಹುದು, ಅದು ಹೋರಾಟಗಾರನ ಚುರುಕುತನ, ಸ್ಟೆಲ್ತ್ ಮತ್ತು ಫೈರ್‌ಪವರ್ ಅನ್ನು ಎತ್ತಿ ತೋರಿಸುತ್ತದೆ.
• F-35 ಲೈಟ್ನಿಂಗ್ II: ಲಾಕ್ಹೀಡ್ ಮಾರ್ಟಿನ್ F-35 ಲೈಟ್ನಿಂಗ್ II, ಹೆಚ್ಚು ವ್ಯಾಪಕವಾಗಿ ನಿಯೋಜಿಸಲಾದ ಐದನೇ ತಲೆಮಾರಿನ ಯುದ್ಧವಿಮಾನ, ಸುಧಾರಿತ ಸ್ಟೆಲ್ತ್, ಸಾಟಿಯಿಲ್ಲದ ಸಾಂದರ್ಭಿಕ ಅರಿವು ಮತ್ತು ನೆಟ್‌ವರ್ಕ್ ಯುದ್ಧ ಸಾಮರ್ಥ್ಯಗಳನ್ನು ಸಂಯೋಜಿಸುತ್ತದೆ. ಏರೋ ಇಂಡಿಯಾ 2025 ರಲ್ಲಿ ಇದರ ಉಪಸ್ಥಿತಿಯು ಸಂದರ್ಶಕರು ಅಮೆರಿಕಾ ವಾಯುಪಡೆಯ ಪ್ರಮುಖ ವಿಮಾನವನ್ನು ವೀಕ್ಷಿಸಲು ಅನುವು ಮಾಡಿಕೊಡುತ್ತದೆ.

Su-57 ಮತ್ತು F-35 ಎರಡರ ಸೇರ್ಪಡೆಯು ಅಂತರರಾಷ್ಟ್ರೀಯ ರಕ್ಷಣಾ ಮತ್ತು ವೈಮಾನಿಕ ಸಹಯೋಗದ ಪ್ರಮುಖ ಕೇಂದ್ರವಾಗಿ ಭಾರತದ ಸ್ಥಾನವನ್ನು ಎತ್ತಿ ತೋರಿಸುತ್ತದೆ. ಏರೋ ಇಂಡಿಯಾ 2025 ಪೂರ್ವ ಮತ್ತು ಪಾಶ್ಚಿಮಾತ್ಯ ಐದನೇ ತಲೆಮಾರಿನ ಯುದ್ಧ ವಿಮಾನ ತಂತ್ರಜ್ಞಾನದ ಅಪರೂಪದ ಹೋಲಿಕೆಯನ್ನು ಒದಗಿಸುತ್ತದೆ, ರಕ್ಷಣಾ ವಿಶ್ಲೇಷಕರು, ಮಿಲಿಟರಿ ಸಿಬ್ಬಂದಿ ಮತ್ತು ವಾಯುಯಾನ ಉತ್ಸಾಹಿಗಳಿಗೆ ತಮ್ಮ ಸಾಮರ್ಥ್ಯಗಳ ಬಗ್ಗೆ ಮೌಲ್ಯಯುತ ಒಳನೋಟಗಳನ್ನು ನೀಡುತ್ತವೆ.

ಸಂದರ್ಶಕ-ಸ್ನೇಹಿ ಅನುಭವ

ಪ್ರಮುಖ ಮೂಲಸೌಕರ್ಯ ನವೀಕರಣಗಳು ಮತ್ತು ಸುಧಾರಿತ ಸೌಕರ್ಯಗಳೊಂದಿಗೆ, ಏರೋ ಇಂಡಿಯಾ 2025 ಹಿಂದೆಂದಿಗಿಂತಲೂ ದೊಡ್ಡ, ಸುಗಮ ಮತ್ತು ಹೆಚ್ಚು ಸಂದರ್ಶಕ-ಸ್ನೇಹಿಯಾಗಿರಲಿದೆ.

• ಸುಧಾರಿತ ಮೂಲಸೌಕರ್ಯ ಮತ್ತು ಸಂಚಾರ ನಿರ್ವಹಣೆ: ಹಿಂದಿನ ಸವಾಲುಗಳನ್ನು ಗುರುತಿಸಿ, ತಡೆರಹಿತ ಪ್ರವೇಶ, ಚಲನೆ ಮತ್ತು ಸಂಪರ್ಕವನ್ನು ಸುಲಭಗೊಳಿಸಲು ವ್ಯಾಪಕವಾದ ಸುಧಾರಣೆಗಳನ್ನು ಮಾಡಲಾಗಿದೆ ಮತ್ತು ರಕ್ಷಣಾ ಸಚಿವಾಲಯ, ಭಾರತೀಯ ವಾಯುಪಡೆ (ಐಎಎಫ್), ಕರ್ನಾಟಕ ರಾಜ್ಯ ಸರ್ಕಾರದ ವಿವಿಧ ವಿಭಾಗಗಳಾದ ಬೆಂಗಳೂರು ಸಂಚಾರ ಪೊಲೀಸ್, ಬಿಬಿಎಂಪಿ, ಎನ್‌ ಎಚ್‌ ಎ ಐ ಮತ್ತು ನಮ್ಮ ಮೆಟ್ರೋ ನಡುವೆ ನಿಕಟ ಸಮನ್ವಯವಿದೆ. ದಟ್ಟಣೆಯನ್ನು ಕಡಿಮೆ ಮಾಡಲು ಮತ್ತು ಸ್ಥಳದ ಸುತ್ತ ಸಂಚಾರವನ್ನು ಸುಧಾರಿಸಲು ಯಲಹಂಕದ ವಾಯುನೆಲೆ ಸುತ್ತಲೂ ಸಂಚಾರ ಹರಿವನ್ನು ಅತ್ಯುತ್ತಮವಾಗಿಸಲು ಸಂಪರ್ಕ ರಸ್ತೆಗಳನ್ನು ವಿಸ್ತರಿಸಲಾಗಿದೆ.
• ಭದ್ರತೆ ಮತ್ತು ತುರ್ತು ಸಿದ್ಧತೆ: ಅನಧಿಕೃತ ಡ್ರೋನ್ ಚಟುವಟಿಕೆಯನ್ನು ನಿಭಾಯಿಸಲು ರೆಡ್ ಡ್ರೋನ್ ವಲಯಗಳನ್ನು ಗೊತ್ತುಪಡಿಸಲಾಗಿದೆ ಮತ್ತು ಪ್ರತಿಕ್ರಮಗಳನ್ನು ಪ್ರಕಟಿಸಲಾಗಿದೆ. ತ್ವರಿತ ನೆರವು ಮತ್ತು ತುರ್ತು ಬೆಂಬಲವನ್ನು ಒದಗಿಸಲು ಕ್ಷಿಪ್ರ ಸಂಚಾರಿ ಘಟಕಗಳನ್ನು ಕಾರ್ಯತಂತ್ರವಾಗಿ ನಿಯೋಜಿಸಲಾಗುವುದು. ಆಕಸ್ಮಿಕ ಘಟನೆಗಳನ್ನು ನಿಭಾಯಿಸಲು ಪ್ರಾಯೋಗಿಕ ಮತ್ತು ಕಾರ್ಯಗತಗೊಳಿಸಬಹುದಾದ ಯೋಜನೆಗಳನ್ನು ಖಚಿತಪಡಿಸಿಕೊಳ್ಳಲು ಬಹು ಏಜೆನ್ಸಿಗಳೊಂದಿಗೆ ನಿರಂತರ ಅಣಕು ಕಾರ್ಯಾಚರನೆಗಳನ್ನು ನಡೆಸಲಾಗುತ್ತಿದೆ.
• ಪ್ರದರ್ಶಕರು ಮತ್ತು ಸಂದರ್ಶಕರ ಅನುಭವ ವರ್ಧನೆಗಳು: ಪ್ರದರ್ಶಕರು ಮತ್ತು ವ್ಯಾಪಾರ ಪ್ರತಿನಿಧಿಗಳಿಗೆ ಅನುಭವವನ್ನು ಹೆಚ್ಚಿಸಲು, ಪ್ರದರ್ಶನ ಪ್ರದೇಶವನ್ನು ಹಲವಾರು ಪ್ರಮುಖ ನವೀಕರಣಗಳೊಂದಿಗೆ ಪರಿಷ್ಕರಿಸಲಾಗಿದೆ:

• ಹೆಚ್ಚು ಪ್ರದರ್ಶಕರು ಮತ್ತು ಸಂದರ್ಶಕರಿಗೆ ಆರಾಮವಾಗಿ ಅವಕಾಶ ಕಲ್ಪಿಸಲು ವಿಸ್ತರಿಸಿದ ಮತ್ತು ಉತ್ತಮ ಗಾಳಿಯಿರುವ ಪ್ರದರ್ಶನ ಸಭಾಂಗಣಗಳು.
• ಪ್ರದರ್ಶನ ಸ್ಥಳದ ಉದ್ದಕ್ಕೂ ಸುಧಾರಿತ ಆಸನ ಮತ್ತು ವಿಶ್ರಾಂತಿ ವಲಯಗಳು.
• ಇಂದಿರಾ ಕ್ಯಾಂಟೀನ್‌ ಗಳು (ಪಾರ್ಕಿಂಗ್ ಪ್ರದೇಶಗಳಲ್ಲಿ) ಸೇರಿದಂತೆ ಹೆಚ್ಚುವರಿ ಆಹಾರ ಮಳಿಗೆಗಳು ಮತ್ತು ರಿಫ್ರೆಶ್‌ಮೆಂಟ್ ಕಿಯೋಸ್ಕ್‌ ಗಳು.
• ಸಂದರ್ಶಕರ ಅನುಕೂಲಕ್ಕಾಗಿ ಕಳೆದುಹೋದ ಮತ್ತು ಪತ್ತೆಯಾದ ವವಸ್ತುಗಳ ಕೌಂಟರ್‌ ಗಳು ಮತ್ತು ಎಟಿಎಂ ಕಿಯೋಸ್ಕ್‌ ಗಳು.
• ಹಲವಾರು ನೀರಿನ ಕೇಂದ್ರಗಳು, ವೈದ್ಯಕೀಯ ನೆರವು ಕೇಂದ್ರಗಳು ಮತ್ತು ವೈದ್ಯಕೀಯ ಸ್ಥಳಾಂತರಿಸುವಿಕೆ ಸೇರಿದಂತೆ ತುರ್ತು ಪರಿಸ್ಥಿತಿಗಳಿಗಾಗಿ ಮೀಸಲಾದ ಹೃದಯ ಸಂಬಂಧಿ ಸಹಾಯ ಕೇಂದ್ರಗಳು.

• ಬಹು-ಪದರದ ಭದ್ರತಾ ಕ್ರಮಗಳು: ಎಲ್ಲಾ ಪಾಲ್ಗೊಳ್ಳುವವರ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಗೃಹ ಸಚಿವಾಲಯ, ಬೆಂಗಳೂರು ಪೊಲೀಸ್, ಸಿ ಐ ಎಸ್‌ ಎಫ್ ಮತ್ತು ಗುಪ್ತಚರ ಸಂಸ್ಥೆಗಳ ಸಹಯೋಗದೊಂದಿಗೆ ಬಹು-ಪದರದ ಭದ್ರತಾ ವ್ಯವಸ್ಥೆಯನ್ನು ನಿಯೋಜಿಸಲಾಗುತ್ತಿದೆ. ಅವುಗಳಲ್ಲಿ ಈ ಕ್ರಮಗಳು ಸೇರಿವೆ:

• ಸುಧಾರಿತ ಭದ್ರತಾ ಶಿಷ್ಟಾಚಾರಗಳು ಮತ್ತು ವೇಗದ ಪ್ರವೇಶ ನಿಯಂತ್ರಣ.
• ಭದ್ರತಾ ಕಾಳಜಿಗಳಿಗೆ ನೈಜ-ಸಮಯದ ಪ್ರತಿಕ್ರಿಯೆಗಳಿಗಾಗಿ ಕಾರ್ಯಾಚರಣೆಯ ಕಮಾಂಡ್ ಮತ್ತು ನಿಯಂತ್ರಣ ಕೇಂದ್ರ.
• ಸಾಂದರ್ಭಿಕ ಜಾಗೃತಿಗಾಗಿ 24/7 ಸಿಸಿಟಿವಿ ಮೇಲ್ವಿಚಾರಣೆ.
• ಸಂದರ್ಶಕರು, ಪ್ರದರ್ಶಕರು ಮತ್ತು ವಿಐಪಿಗಳಿಗಾಗಿ ಮೀಸಲಾದ ತಪಾಸಣಾ ವಲಯಗಳು.
• ತುರ್ತು ಪರಿಸ್ಥಿತಿಗಳನ್ನು ನಿಭಾಯಿಸಲು ವಿಪತ್ತು ನಿರ್ವಹಣೆ ಮತ್ತು ಅಗ್ನಿ ಸುರಕ್ಷತಾ ಸಮಿತಿಗಳು.

• ಸಂಪರ್ಕ ಮತ್ತು ಡಿಜಿಟಲ್ ಮೂಲಸೌಕರ್ಯ: ಸಂಪರ್ಕ ಸವಾಲುಗಳನ್ನು ಎದುರಿಸಲು, ಎಲ್ಲಾ ಟೆಲಿಕಾಂ ಸೇವಾ ಪೂರೈಕೆದಾರರು ತಡೆರಹಿತ ಸಂವಹನಕ್ಕಾಗಿ ತಾತ್ಕಾಲಿಕ ಮೊಬೈಲ್ ಟವರ್‌ ಗಳು ಮತ್ತು ನೆಟ್‌ವರ್ಕ್ ಬೂಸ್ಟರ್‌ ಗಳನ್ನು ನಿಯೋಜಿಸಿದ್ದಾರೆ. ಮೀಸಲಾದ ಏರೋ ಇಂಡಿಯಾ 2025 ಮೊಬೈಲ್ ಅಪ್ಲಿಕೇಶನ್ ಅನ್ನು ಸಹ ಬಿಡುಗಡೆ ಮಾಡಲಾಗಿದೆ, ಇದು ಲೈವ್ ಅಪ್‌ಡೇಟ್‌ ಗಳು, ನ್ಯಾವಿಗೇಷನ್ ನೆರವು ಮತ್ತು ಕಾರ್ಯಕ್ರಮ ವೇಳಾಪಟ್ಟಿಯನ್ನು ಒದಗಿಸುತ್ತದೆ. ಏಜೆನ್ಸಿಗಳ ನಡುವೆ ಸಮನ್ವಯಕ್ಕಾಗಿ ಸುರಕ್ಷಿತ ಡಿಜಿಟಲ್ ಸಂವಹನ ಮಾರ್ಗಗಳನ್ನು ಸಹ ಸ್ಥಾಪಿಸಲಾಗಿದೆ. ಹೆಚ್ಚುವರಿಯಾಗಿ, ಸುರಕ್ಷತೆಯನ್ನು ಖಾತ್ರಿಪಡಿಸುವ ಸಂದರ್ಭದಲ್ಲಿ ಕಾರ್ಯಕ್ರಮದಲ್ಲಿ ಹೆಚ್ಚಿನ ವಿದ್ಯುತ್ ಬೇಡಿಕೆಗಳನ್ನು ಬೆಂಬಲಿಸಲು ನಿಬಂಧನೆಗಳನ್ನು ಮಾಡಲಾಗಿದೆ.
• ವಾಯುಪ್ರದೇಶ ನಿರ್ವಹಣೆ ಮತ್ತು ಪ್ರದರ್ಶನಗಳು: ಏರೋ ಇಂಡಿಯಾ ಪ್ರದರ್ಶನಗಳು ಮತ್ತು ವಿಮಾನ ಚಲನೆಗಳು ಏರೋ ಇಂಡಿಯಾ 2025 ರ ಪ್ರಮುಖ ಪ್ರಮುಖ ಅಂಶಗಳಾಗಿವೆ. ಎಎಐ ಮತ್ತು ಎಚ್‌ ಎ ಎಲ್ ಜೊತೆಗಿನ ಸಮನ್ವಯದಲ್ಲಿ, ಭಾರತೀಯ ವಾಯುಪಡೆಯು ಇವುಗಳನ್ನು ಒಳಗೊಂಡಂತೆ ಮೀಸಲಾದ ವಾಯುಪ್ರದೇಶ ನಿರ್ವಹಣೆ ಯೋಜನೆಯನ್ನು ರೂಪಿಸಿದೆ:‌

• ನಿಗದಿತ ಪ್ರದರ್ಶನಗಳ ಸಮಯದಲ್ಲಿ ಸುರಕ್ಷತೆಯನ್ನು ಕಾಪಾಡಿಕೊಳ್ಳಲು ಯಲಹಂಕದ ಏರೋ ಇಂಡಿಯಾ ವಾಯುನೆಲೆಯ ಸುತ್ತಲೂ ತಾತ್ಕಾಲಿಕ ವಿಮಾನ ನಿರ್ಬಂಧಗಳು.
• ದೇಶೀಯ ಮತ್ತು ಅಂತರರಾಷ್ಟ್ರೀಯ ಭಾಗವಹಿಸುವವರಿಗೆ ಸ್ಟ್ರಾಟೆಜಿಕ್ ಏರ್‌ಕ್ರಾಫ್ಟ್ ಪಾರ್ಕಿಂಗ್ ಮತ್ತು ಇಂಧನ ತುಂಬುವ ಯೋಜನೆಗಳು.

• ವ್ಯಾಪಾರ ಮತ್ತು ನಾವೀನ್ಯತೆ ಬೆಂಬಲ: ಏರೋ ಇಂಡಿಯಾ ಸಹಯೋಗಗಳಿಗೆ ವೇದಿಕೆಯನ್ನು ಒದಗಿಸುತ್ತದೆ ಮತ್ತು B2B, G2B ಸಂವಹನಗಳನ್ನು ಸುಗಮಗೊಳಿಸಲು ಮತ್ತು ತಾಂತ್ರಿಕ ಪ್ರಗತಿಯನ್ನು ಪ್ರದರ್ಶಿಸಲು ದುಂಡುಮೇಜಿನ ಚರ್ಚೆಗಳನ್ನು ಆಯೋಜಿಸುತ್ತದೆ. ಸ್ಥಳೀಯ ಆವಿಷ್ಕಾರಗಳನ್ನು ಪ್ರಸ್ತುತಪಡಿಸಲು ಜಾಗತಿಕ ವೇದಿಕೆಯನ್ನು ಒದಗಿಸುವ ಮೂಲಕ ಸ್ಟಾರ್ಟ್-ಅಪ್‌ ಗಳು ಮತ್ತು ಎಂ ಎಸ್‌ ಎಂ ಇ ಗಳನ್ನು ಬೆಂಬಲಿಸಲು ವಿಶೇಷ ಗಮನವನ್ನು ನೀಡಲಾಗುವುದು.
• ಸುಸ್ಥಿರತೆಯ ಉಪಕ್ರಮಗಳು: ಏರೋ ಇಂಡಿಯಾ 2025 ಸುಸ್ಥಿರತೆಗೆ ಬದ್ಧವಾಗಿದೆ ಮತ್ತು ಅದರ ಆಯೋಜನೆಯಲ್ಲಿ ಹಲವಾರು ಪರಿಸರ ಸ್ನೇಹಿ ಕ್ರಮಗಳನ್ನು ಸಂಯೋಜಿಸಿದೆ, ಅವುಗಳೆಂದರೆ:

• ಮಾಲಿನ್ಯವನ್ನು ಕಡಿಮೆ ಮಾಡಲು ಮತ್ತು ಪಾದಚಾರಿ ಸೌಕರ್ಯವನ್ನು ಹೆಚ್ಚಿಸಲು ವಾಹನದ ಚಲನೆಯನ್ನು ಕಡಿಮೆ ಮಾಡಲಾಗಿದೆ.
• ಪ್ರದರ್ಶನ ಸ್ಥಳದಲ್ಲಿ ಸಂದರ್ಶಕರ ಚಲನೆಗಾಗಿ 100 ಕ್ಕೂ ಹೆಚ್ಚು ಇ ಕಾರ್ಟ್‌ ಗಳ ವಿಶೇಷ ಬಳಕೆ.
• ಹೆಚ್ಚಿದ ಮರುಬಳಕೆ ಕಸದ ಡಬ್ಬಿಗಳು, ತ್ಯಾಜ್ಯ ವಿಂಗಡಣೆ ವಲಯಗಳು ಮತ್ತು ತ್ಯಾಜ್ಯವನ್ನು ಸಕಾಲಿಕವಾಗಿ ವಿಲೇವಾರಿ ಮಾಡುವುದು ಸೇರಿದಂತೆ ಸಮಗ್ರ ತ್ಯಾಜ್ಯ ನಿರ್ವಹಣೆ.

ಈ ಬಹು-ಏಜೆನ್ಸಿ ಸಹಯೋಗದೊಂದಿಗೆ, ಏರೋ ಇಂಡಿಯಾ 2025 ಇಲ್ಲಿಯವರೆಗಿನ ಅತ್ಯಂತ ಸುವ್ಯವಸ್ಥಿತ ಮತ್ತು ಸುಸಂಘಟಿತ ಆವೃತ್ತಿಗಳಲ್ಲಿ ಒಂದಾಗಲಿದೆ.

ರಕ್ಷಣಾ ರಾಜ್ಯ ಸಚಿವರಾದ ಶ್ರೀ ಸಂಜಯ್ ಸೇಠ್, ರಕ್ಷಣಾ ಸಿಬ್ಬಂದಿ ಮುಖ್ಯಸ್ಥ ಮತ್ತು ಕಾರ್ಯದರ್ಶಿ, ಸೇನಾ ವ್ಯವಹಾರಗಳ ಇಲಾಖೆಯ ಕಾರ್ಯದರ್ಶಿ ಜನರಲ್ ಅನಿಲ್ ಚೌಹಾಣ್, ಕರ್ನಾಟಕ ಸರ್ಕಾರದ ಮುಖ್ಯ ಕಾರ್ಯದರ್ಶಿ ಡಾ.ಶಾಲಿನಿ ರಜನೀಶ್, ಕಾರ್ಯದರ್ಶಿ (ರಕ್ಷಣಾ ಉತ್ಪಾದನೆ) ಶ್ರೀ ಸಂಜೀವ್ ಕುಮಾರ್, ರಕ್ಷಣಾ ಇಲಾಖೆ ಆರ್ & ಡಿ ಕಾರ್ಯದರ್ಶಿ ಮತ್ತು ಡಿ ಆರ್‌ ಡಿ ಒ ಅಧ್ಯಕ್ಷ ಡಾ. ಸಮೀರ್ ವಿ ಕಾಮತ್, ರಕ್ಷಣಾ ಸಚಿವಾಲಯದ ಇತರ ಹಿರಿಯ ಅಧಿಕಾರಿಗಳು ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

*****