امور داخلہ اور امدادِ باہمی کے مرکزی وزیر جناب امت شاہ نے ویڈیو کانفرنس کے ذریعہ تری پورہ حکومت میں 2800 سے زیادہ تقرری ناموں کی تقسیم سے متعلق پروگرام سے خطاب کیا۔

اپنے خطاب میں مرکزی وزیر داخلہ جناب امت شاہ نے کہا کہ پہلے تری پورہ میں صرف ایک پارٹی کے کیڈر کو ہی نوکری ملتی تھی، آج تری پورہ حکومت بغیر کسی امتیاز، سفارش یا بدعنوانی کے مکمل شفافیت کے ساتھ ملازمتیں فراہم کر رہی ہے۔ انہوں نے کہا کہ تری پورہ کے موجودہ وزیر اعلیٰ پروفیسر (ڈاکٹر) مانک ساہا نے آج ریاست کے 2807 نوجوانوں کو بغیر کسی امتیاز، جانبداری، بدعنوانی اور مکمل شفافیت کے ساتھ سرکاری ملازمتوں کی پیشکش کرکے ان کی زندگیوں میں ایک نئی شروعات کا موقع فراہم کیا ہے۔ اس موقع نے انہیں تری پورہ کی ترقی سے مربوط کر دیا ہے۔ جناب شاہ نے ذکر کیا کہ آج محکمہ صحت میں 2437 ملٹی ٹاسکنگ اسٹاف کے عہدوں اور 370 عہدوں پر تقرریوں کے ساتھ ان افراد نے اپنی زندگی میں ایک نئے باب کا آغاز کیا ہے۔ انہوں نے مزید بتایا کہ اپنے تقرری ناموں کی وصولی کے ساتھ، یہ 2807 افراد اب وزیر اعظم جناب نریندر مودی کی ترقی یافتہ تری پورہ اور ترقی یافتہ ہندوستان کی مہم کا حصہ بن گئے ہیں۔

جناب امت شاہ نے کہا کہ وزیر اعظم جناب نریندر مودی کی قیادت میں مکمل شمال مشرق اب ترقی کی راہ پر گامزن ہے۔ انہوں نے کہا کہ گزشتہ 10 برسوں میں مرکزی وزراء نے شمال مشرق کا 700 سے زیادہ مرتبہ دورہ کیا ہے اور خطے کی ترقی کے لیے بہت سے مثبت اقدامات کیے گئے ہیں۔ جناب شاہ نے کہا کہ شمال مشرق جو کبھی شورش، دراندازی، ناکہ بندیوں، منشیات، ہتھیاروں کی اسمگلنگ، بدعنوانی اور نسلی کشیدگی کے لیے جانا جاتا تھا، اب وزیر اعظم جناب نریندر مودی کی قیادت میں ترقی، رابطے، بنیادی ڈھانچے، تعلیم، سرمایہ کاری اور زرعی سرگرمیوں کی ترقی کے لیے جانا جاتا ہے۔

امور داخلہ اور امدادِ باہمی کے مرکزی وزیر نے کہا کہ مودی حکومت نے تری پورہ میں مستقل امن قائم کرنے کے لیے گزشتہ 10 برسوں میں تین معاہدے کیے ہیں۔ انہوں نے روشنی ڈالی کہ مودی حکومت نے برو -ریانگ بھائیوں اور بہنوں کو مستقل رہائش، تعلیم، حفظانِ صحت اور ملازمت کے مواقع فراہم کرکے ان کی زندگیوں میں ایک مثبت تبدیلی پیدا کی ہے۔ انہوں نے مزید کہا کہ تری پورہ میں تمام باغی گروپوں کو ختم کر دیا گیا ہے، ہتھیار ڈال دیئے گئے ہیں اور وہ مرکزی دھارے میں شامل ہو گئے ہیں۔ جناب شاہ نے کہا کہ وزیر اعلیٰ پروفیسر (ڈاکٹر) مانک ساہا کی قیادت میں آج تری پورہ خلفشار کی بجائے شرکت، رکاوٹ کے بجائے رفتار اور تاخیر کے بجائے فلاح و بہبود کے راستے پر آگے بڑھ چکا ہے۔

جناب امت شاہ نے کہا کہ وزیر اعظم مودی کی قیادت میں سابق وزیر اعلیٰ بپلب دیب اور اب پروفیسر (ڈاکٹر) مانک ساہا نے تری پورہ کی ہمہ گیر ترقی کے لیے بڑے پیمانے پر کام کیا ہے۔ انہوں نے کہا کہ ان کی پارٹی کی حکومت کے ان سات برسوں میں گزشتہ حکومتوں کے سات برسوں سے زیادہ ترقی ہوئی ہے۔ انہوں نے نشاندہی کی کہ مودی حکومت کی پالیسیوں نے تری پورہ کو زمین سے گھری ریاست سے زمین سے منسلک ریاست میں تبدیل کر دیا ہے۔ انہوں نے کہا کہ ریاست کی ہمہ جہت ترقی کے لئے حکومت ہند اور تری پورہ کی جانب سے ہوائی اڈہ، سڑکیں، پانی کی کٹائی اور آبپاشی جیسے بہت سے کام کئے گئے ہیں۔ مرکزی وزیر داخلہ نے مزید کہا کہ ان کی حکومت کی سب سے بڑی کامیابی تری پورہ کو بدعنوانی اور بدامنی سے مبرا کرنا ہے۔ انہوں نے زور دے کر کہا کہ وزیر اعظم جناب نریندر مودی اور حکومت ہند تری پورہ کی ترقی کے لیے پوری طرح وقف ہیں۔

**********

 (ش ح –ا ب ن)

U.No:6138