مرکزی وزیر داخلہ اور امداد باہمی  محکمہ کے وزیر جناب امت شاہ نے جموں و کشمیر میں سلامتی کی صورتحال پر  آج نئی دہلی میں ایک اعلیٰ سطحی جائزہ میٹنگ کی صدارت کی ۔ میٹنگ میں جموں و کشمیر کے لیفٹیننٹ گورنر جناب منوج سنہا ، مرکزی داخلہ سکریٹری ، انٹیلی جنس بیورو کے ڈائریکٹر ، چیف سکریٹری اور جموں و کشمیر کے ڈائریکٹر جنرل آف پولیس کے علاوہ وزارت داخلہ اور جموں و کشمیر انتظامیہ کے سینئر عہدیداروں نے شرکت کی ۔ مرکزی وزیر داخلہ جناب امت شاہ نے  کل بھی  جموں و کشمیر میں سلامتی کی صورتحال پر ایک اہم جائزہ میٹنگ کی  تھی، جس میں چیف آف دی آرمی اسٹاف ، جنرل اوپیندر دویدی ، داخلہ سکریٹری اور وزارت داخلہ اور فوج کے دیگر سینئر افسران نے شرکت کی  تھی۔

میٹنگ سے خطاب کرتے ہوئے مرکزی وزیر داخلہ اور امداد باہمی  محکمہ کے وزیر نے کہا کہ وزیر اعظم جناب نریندر مودی کی قیادت میں حکومت جموں و کشمیر سے دہشت گردی کو مکمل طور پر ختم کرنے کے لیے پرعزم ہے ۔ انہوں نے کہا کہ مودی حکومت کی مسلسل اور مربوط کوششوں کی وجہ سے جموں و کشمیر میں دہشت گردی کا ایکو نظام نمایاں طور پر کمزور ہو گیا ہے ۔ وزیر داخلہ نے تمام سیکورٹی ایجنسیوں کو ہدایت دی کہ وہ در اندازی کو بالکل ختم کرنے کے ہدف کو حاصل کرنے کے لیے دہشت گردی کے خلاف کارروائی تیز کریں ۔ انہوں نے تمام سیکورٹی ایجنسیوں سے کہا کہ وہ دراندازی اور دہشت گردی کی  سرگرمیوں سے مزید سختی کے ساتھ نمٹیں ۔ انہوں نے کہا کہ دہشت گردوں کے وجود کو جڑ سے اکھاڑ پھینکنا ہمارا مقصد ہونا چاہیے ۔

جناب امت شاہ نے کہا کہ منشیات کا نیٹ ورک ،  دراندازی کرنے والوں اور دہشت گردوں کو اپنی سرگرمیوں کو انجام دینے کے لیے مدد فراہم کر رہا ہے ۔ انہوں نے کہا کہ منشیات کی تجارت سے حاصل ہونے والی رقم سے دہشت گردی کی مالی اعانت کے خلاف تیزی اور سختی کے ساتھ فوری کارروائی کرنے کی ضرورت ہے ۔

جناب امت شاہ نے ایجنسیوں کو نئے فوجداری قوانین کے بروقت نفاذ کے پیش نظر فارنسک سائنس لیبارٹری (ایف ایس ایل) کے عہدوں پر نئی تقرری کرنے کی ہدایت دی ۔

جناب امت شاہ نے جموںو کشمیر کو دہشت گردی سےمکمل طور پر نجات دلانے کے لیے دہشت گردی  بالکل بھی برداشت نہ کرنے کی مودی حکومت کی پالیسی پر زور دیا ۔ انہوں نے تمام سیکورٹی ایجنسیوں کو چوکس رہنے اور جموں و کشمیر میں دہشت گردی کے خاتمے کے لیے  تال میل سے کام جاری رکھنے کی ہدایت دی ۔

مرکزی وزیر داخلہ نے جموں و کشمیر میں سلامتی کے منظر نامے کے تمام پہلوؤں میں نمایاں بہتری کے لیے سیکورٹی ایجنسیوں کی کوششوں کو سراہا ۔

……………………

UN. NO: 6121

‌ش ح۔ا   ع خ۔ص ج