بھارت اپنی محفوظ اور مستحکم مقامی مصنوعی ذہانت (اے آئی) ماڈل کو کم قیمت پر لانچ کرنے کے لیے تیار ہے۔ الیکٹرانکس اور انفارمیشن ٹیکنالوجی، ریلوے، اطلاعات و نشریات کے مرکزی  وزیرجناب اشونی ویشنو نے آج نئی دہلی میں الیکٹرانکس نکیتن میں اس کا اعلان کیا۔ میڈیا سے بات کرتے ہوئے، مرکزی  وزیر نے کہا کہ بھارتی مصنوعی ذہانت ماڈل ایک بروقت قدم ہے کیونکہ بھارت عالمی سطح پر ایک معتبر ملک ہے اور اس سے بھارت کو آئندہ دنوں میں ایک زیادہ قابل اعتماد تکنیکی طاقت کے طور پر ابھارنے میں مدد ملے گی، جو اخلاقی اے آئی حل فراہم کرے گا۔ یہ منصوبہ ایک اعلیٰ سطح کی مشترکہ کمپیوٹنگ سہولت سے کارفرما  ہے اور بھارت کی اے آئی مہم اب ہندوستانی زبانوں کا استعمال کرتے ہوئے بھارتی سیاق و سباق کے لیے مقامی اے آئی  حل تیار کرنے کے قریب ہے۔ انہوں نے کہا کہ سائنسدان، محققین، ڈویلپرز اور کوڈرز اس سلسلے میں متعدد بنیادی ماڈلز پر کام کر رہے ہیں اور دی گئی رفتار کے ساتھ، مرکزی  وزیر نے امید ظاہر کی کہ بھارتی اے آئی  ماڈل چھ ماہ کے اندر تیار ہو جائے گا۔

اے آئی  ماڈل شروع میں تقریباً 10,000 جی پی یوز کی کمپیوٹنگ سہولت کے ساتھ شروع ہو رہا ہے۔ جلد ہی باقی 8,693 جی پی یوز کو شامل کیا جائے گا۔ ابتدا میں اس کا فائدہ محققین، طلباء اور ڈویلپرز کو ہوگا۔ اس منصوبے میں شامل تکنیکی شراکت داروں نے اس مہم کے مقاصد کو پورا کرنے کی صلاحیت پر بھرپور اعتماد ظاہر کیا ہے، جو کمپیوٹنگ تک رسائی کو جمہوری  کرنے کے بارے میں ہے، اور وہ بھی انتہائی مسابقتی نرخوں پر۔ حکومت نے اس کی قیمت 100 روپے فی جی پی یو سے کم رکھنے کا فیصلہ کیا ہے، جس کے لیے 40 فیصد لاگت پر سبسڈی دی جائے گی۔ عالمی ماڈلز کی قیمت 2.5 سے 3 ڈالر فی گھنٹہ ہے، لیکن بھارت کا اے آئی  ماڈل 40 فیصد سبسڈی کے بعد 100 روپے فی گھنٹہ سے بھی کم قیمت پر دستیاب ہوگا۔ مزید یہ کہ ششماہی  اور سالانہ منصوبے اسے مزید سستا بنائیں گے۔

بھارت اے آئی  مشن کے آغاز کے 10 ماہ کے اندر، الیکٹرانکس اور انفارمیشن ٹیکنالوجی کی وزارت نے بے مثال ردعمل حاصل کیا اور تقریباً 18,693 گرافک پروسیسنگ یونٹس (جی پی یوز) کی ایک اعلیٰ سطح اور مضبوط مشترکہ کمپیوٹنگ سہولت تیار کی ہے جو استعمال کے لیے تیار ہے۔ یہ اوپن سورس ماڈل ڈیپ سیک کی تعداد کا تقریباً نو گنا ہے اور چیٹ جی پی ٹی کے جی پی یوز کی تعداد کا دو تہائی ہے۔ میڈیا کے سوالات کے جواب میں، مرکزی  وزیر نے کہا کہ ڈیپ سیک کو بھارتی سرورز پر سیکورٹی چیک کے بعد ہوسٹ کیا جا سکتا ہے تاکہ کوڈرز، ڈویلپرز اور ڈیزائنرز اس کے اوپن سورس کوڈ سے فائدہ اٹھا سکیں۔

مصنوعی ذہانت کے ماڈل کی حفاظت اور اخلاقی طور پر اس کا استعمال حکومت کی اولین ترجیح ہے۔ اس عزم کا اظہار کرتے ہوئے، ،مرکزی  وزیر نے اعلان کیا کہ بھارت ایک اے آئی  سیفٹی انسٹی ٹیوٹ قائم کر رہا ہے، جو ٹیکنیکل و قانونی نقطہ نظر کو اپنائے گا۔

اس حوالے سے کلیدی حفاظتی منصوبوں میں شامل ہیں مندرجہ ذیل 8 متوازی اقدامات ,جو ڈیٹا کی پرائیویسی کو یقینی بنانے کے ساتھ ساتھ الگورڈم کی کارکردگی کی اخلاقی آڈٹنگ بھی فراہم کریں گے:

1. مشین ان لرننگ (آئی آئی ٹی جودھپور)

2. مصنوعی ڈیٹا کی تخلیق (آئی آئی ٹی روڑکی)

3. اے آئی  تعصبات سے متعلق   حکمت عملی (این آئی ٹی  رائے پور)

4. وضاحتی اے آئی  فریم ورک (دفاعی ادارہ برائے اعلیٰ ٹیکنالوجی، پونے اور مائن کرافٹ ٹیکنالوجیز)

5. پرائیویسی کو بڑھانے کی حکمت عملی (آئی آئی ٹی دہلی، آئی آئی آئی ٹی  دہلی، آئی آئی ٹی دھارواڑ اور ٹیلی کام انجینئرنگ سینٹر، ٹی ای سی )

6. اے آئی  اخلاقی سرٹیفیکیشن فریم ورک (ٹول نِشپکاش جو آئی آئی آئی ٹی دہلی اور ٹی ای سی میں تیار کیا جا رہا ہے)

7. اے آئی  الگوردم آڈٹنگ فریم ورک (ٹول پارکھ جو سِوک ڈیٹا لیبز کے ذریعے تیار کیا جا رہا ہے)

8. اے آئی  حکمرانی کے ٹیسٹنگ فریم ورک (امریتا وِدی پیتھم اور ٹیلی کام انجینئرنگ سینٹر)

اس کے علاوہ، واٹر مارکنگ اور لیبلنگ، ڈیپ فیک کی شناخت کے ٹولز، حقیقی وقت میں شناخت اور اس کی کمی، اے آئی  رسک مینجمنٹ، پانچ اور منصوبے ہیں جنہیں اے آئی  مشن بھارت کے اے آئی  ماڈل کو پرائیویسی کے نقطہ نظر سے محفوظ اور مستحکم  بنانے کے لیے چل رہا ہے۔ یہ اقدام محققین، طلباء اور عوام کو کم لاگت، تیز کمپیوٹنگ صلاحیتوں اور فوری نتائج کے ذریعے فائدہ پہنچانے کے لیے ہے۔ بھارتی اے آئی  ماڈل جدت کو فروغ دینے میں مدد فراہم کرے گا اور شہری مرکزیت والی بہتر حکمرانی کے ٹولز تیار کرے گا، جن میں متعدد صنعتی استعمالات شامل ہیں جو عوام کے لیے تکنیکی فوائد حاصل کرنے کی بے پناہ صلاحیت رکھتے ہیں۔

مجموعی کمپیوٹنگ سہولت: جمہوری  اے آئی  کی ترقی کے لیے مضبوط بنیاد

بھارت اے آئی  مشن کے تحت ایک بڑی کمپیوٹنگ انفراسٹرکچر تیار کی گئی ہے، جو کم وقت میں عالمی معیار سے بڑھ کر ہے۔ اس سہولت میں اب 18,693 جی پی یوز موجود ہیں، جن میں 12,896 H100، 1,480 H200، اور 7,200 ایم آئی  200 300 یونٹس شامل ہیں، جو ابتدائی ہدف 10,000 جی پی یوز سے نمایاں طور پر تجاوز کر چکا ہے۔ اس صلاحیت کو سمجھنے کے لیے، ڈیپ سیک کو 2,000 جی پی یوز پر تربیت دی گئی تھی، جبکہ چیٹ جی پی ٹی کو 25,000 جی پی یوز کی ضرورت تھی۔ یہ وسیع کمپیوٹنگ طاقت نہ صرف تحقیق، ماڈل کی تربیت، اخلاقی اے آئی  الگوردمز کی ترقی میں مدد فراہم کرے گی بلکہ بھارت کے اے آئی  ایکو سسٹم میں جدت کو فروغ دے گی۔

ایک مشترکہ کمپیوٹنگ پلیٹ فارم بنایا گیا ہے، جو تمام اسٹیک ہولڈرز کے لیے رسائی کو یقینی بناتا ہے۔ تقریباً 10,000 جی پی یوز پہلے ہی دستیاب ہیں، اور تکنیکی شراکت داروں نے اس مہم کی صلاحیت پر بھرپور اعتماد ظاہر کیا ہے کہ یہ عالمی معیار کے اے آئی  حل فراہم کرنے میں کامیاب ہو گی۔ منظوری کے بعد، یہ سہولت جلد ہی وسیع پیمانے پر استعمال کے لیے عملی طور پر دستیاب ہو جائے گی۔

بھارت کا اپنا اے آئی  ماڈل: مقامی سیاق و سباق کے لیے تیار

گزشتہ ڈیڑھ سال کے دوران، بھارت نے اپنے بنیادی اے آئی  ماڈل کی حمایت کے لیے ایک مضبوط اے آئی  ایکو سسٹم فریم ورک تیار کیا ہے۔ یہ ماڈل بھارتی لسانی اور سیاق و سباق کی ضروریات کو پورا کرے گا، تعصبات کو ختم کرے گا، شمولیت کو یقینی بنائے گا اور انصاف کو فروغ دے گا۔ معروف ڈویلپرز اور محققین 8 سے 10 ماہ کے اندر متعدد بنیادی ماڈلز مکمل کرنے کے لیے کام کر رہے ہیں، جو الگوردم کی کارکردگی کا فائدہ اٹھاتے ہوئے لاگت میں کمی اور بروقت ترقی کو ممکن بنائیں گے۔

ماہرین کا خیال ہے کہ بھارت کا اے آئی  ماڈل ملک کی مختلف ضروریات کو پورا کرے گا اور بھارتی صارفین کے لیے مخصوص جدت کی ایک نئی سطح کو سامنے لائے گا۔

شہریوں کے فوائد کے لیے اے آئی ایپلیکشنس  

بھارت اے آئی  مشن زرعی، صحت کی دیکھ بھال، موسمی پیش گوئی اور قدرتی آفات سے نمٹنے  جیسے اہم شعبوں میں اے آئی  ایپلی کیشنز کی ترقی پر مرکوز ہے۔ ان شعبوں میں اٹھارہ ایپلی کیشنز کی نشاندہی کی گئی ہے تاکہ اے آئی  کو سماجی فوائد کے لیے استعمال کیا جا سکے۔ اس اقدام کا مقصد موسمیاتی تبدیلی، سیکھنے میں مشکلات اور زرعی ٹیکنالوجی کے حل جیسے چیلنجز کا حل فراہم کرنا ہے، اس بات کو یقینی بناتے ہوئے کہ اے آئی  لاکھوں افراد کی فلاح و بہبود میں تعاون کرے ۔

اے آئی  کی ترقی کے لیے کفایتی  کمپیوٹنگ سہولت

بھارت کی کمپیوٹنگ سہولت انتہائی مسابقتی نرخوں پر پیش کی جا رہی ہے۔ فی جی پی یو گھنٹہ کی قیمت تقریباً 115.85 روپئے ہے، جو عالمی معیار 2.5ڈالر سے 3  ڈالر فی گھنٹہ سے کہیں کم ہے۔ اعلیٰ سطح کی کمپیوٹنگ 150 روپئے  فی گھنٹہ پر دستیاب ہوگی، جس پر 40 فیصد حکومت کی سبسڈی ہوگی، جس سے قیمت 100 روپئے  فی گھنٹہ سے بھی کم ہو جائے گی۔ اس سستی قیمت کے ساتھ، اے آئی  تک رسائی جمہوری  ہو جائے گی، جو اسٹارٹ اپس اور محققین دونوں کو فائدہ پہنچائے گی۔

اس اقدام میں چھ ماہ اور سالانہ کمپیوٹنگ کی قیمتوں کے پیکجز کی پیشکش کی گئی ہے۔ اس سہولت کو عالمی سطح پر پذیرائی حاصل ہوئی ہے، داؤوس میں اس کی تعریف کی گئی ، جو بھارت کی پوزیشن کو ایک معتبر عالمی اے آئی  مرکز کے طور پر مستحکم کرتا ہے۔

مستقبل کا روڈ میپ اور پائیداری

بھارت کا اے آئی  مشن چار سال کی مدت کے تحت کام کرتا ہے اور طویل مدتی پائیداری کو یقینی بناتا ہے۔ جیسے ہی بھارت اپنے سیمی کنڈکٹر سفر میں آگے بڑھ رہا ہے، حکومت اپنے ایکو سسٹم کو واضح اور منظم منصوبہ بندی کے ساتھ ترقی دے رہاہے۔ سیمی کنڈکٹر مشن میں 30 ارب ڈالر سے زائد کی سرمایہ کاری کی جا چکی ہے، اور بھارت کی اے آئی  کی توقعات  اپنے وسیع تر تکنیکی وژن کے ساتھ ہم آہنگ ہیں۔

مرکزی وزیر نے کہا کہ ڈیپ سیک اور دیگر بنیادی ماڈلز کو بھارتی سرورز پر ہوسٹ کیا جا سکتا ہے، جیسے پچھلے اقدامات میں ایل ایل اے ایم اے کو کیا گیا تھا۔ انہوں نے مزید کہا کہ اے آئی  کا حقیقی اثر چیٹ بوٹس اور امیج جنریشن سے آگے صنعتی ایپلی کیشنز میں ہوگا، اور یہ حقیقی دنیا کے چیلنجز کو حل کرے گا جیسے:

• تیل ڈریلینگ رگ کی صحت
• ریلوے ٹکٹنگ کی بہتری
• زراعت کے لیے مٹی کی صحت کی نگرانی
• موسم اور طوفان کی پیش گوئی

مشن اے آئی  کی حفاظت پر بھی زور دیتا ہے، جس میں حقیقی وقت میں ڈیپ فیک کی شناخت کے ٹولز، اور مضبوط اے آئی  رسک مینجمنٹ حکمت عملی شامل ہیں۔ اسٹینفورڈ نے بھارت کو اے آئی  تعلیم میں دنیا کے سرفہرست  ممالک میں شامل کیا ہے، جہاں 240 یونیورسٹیز اے آئی  کورسز آفر کر رہی ہیں اور 100 یونیورسٹیز میں جی 5  لیبز موجود ہیں۔

جمہوریت ، شمولیت، سستی اور جدت پر توجہ دینے کے ساتھ  بھارت،  عالمی اے آئی  پاور ہاؤس  کے طور پر ابھرنے کے لیے تیار ہے، جو مصنوعی ذہانت کے مستقبل کو سماجی اور صنعتی ترقی کے لیے تشکیل دے گا۔

اس تقریب میں الیکٹرانکس اور اطلاعاتی تکنالوجی کے وزیر مملکت جناب جتن پرساد ، الیکٹرانکس اور اطلاعاتی تکنالوجی کے ایڈشنل سکریٹری اور انڈیا اے آئی کے سی ای او، جناب ابھیشک سنگھ، انڈیا اے آئی کی سی او او، محترمہ کویتا بھاٹیا، پی اینڈ سی ای او، این ای جی ڈی اینڈ سی ای او، ڈی آئی سی جناب نند کمارم اور الیکٹرانکس اور اطلاعاتی تکنالوجی کے سینئر افسران بھی موجود تھے۔

*******         

ش ح۔  ع ح-ت ا

UNo.5815