नवी दिल्‍ली, 29 जानेवारी 2025

हुतात्मा दिनानिमित्त, भारतीय राष्ट्रीय अभिलेखागार (एनएआय) आणि राष्ट्रीय गांधी संग्रहालय (एनजीएम) राष्ट्रीय चित्रपट अभिलेखागार आणि प्रसार भारती अभिलेखागार यांच्या सहकार्याने “महात्माजींचा  प्रवास: त्यांच्या दस्तावेजांच्या माध्यमातून…” या विशेष प्रदर्शनाचे आयोजन करण्या्त येणार आहे. या प्रदर्शनाचे उद्घाटन महात्मा गांधींच्या नात आणि राष्ट्रीय गांधी संग्रहालयाच्या अध्यक्ष तारा गांधी- भट्टाचार्य यांच्या हस्ते दि. 30  जानेवारी 2025 रोजी दुपारी 3:00 वाजता नवी दिल्लीतील राजघाट येथील राष्ट्रीय गांधी संग्रहालयाच्या प्रदर्शन सभागृहात होईल.

महात्मा गांधीजींचा परिवर्तनकारी प्रवास उलगडून दाखवू शकणारे  हे प्रदर्शन अगदी  काळजीपूर्वक तयार केले आहे.  त्यामुळे प्रदर्शन पाहण्यास येणा-या अतिथी मंडळींना राष्ट्रपित्याचे जीवन आणि वारसा याविषयी माहिती जाणून घेण्याची एक अनोखी संधी देणार आहे. दुर्मिळ छायाचित्रे, अधिकृत कागदपत्रे, ध्वनिफिती, दृष्यफिती आणि वैयक्तिक पत्रव्यवहारांचे  संयोजन करण्या्त आले आहे. हे प्रदर्शन गांधीजींच्या पोरबंदरमधील त्यांच्या प्रारंभीच्या काळातील  जीवनापासून ते भारताच्या स्वातंत्र्य चळवळीतील त्यांच्या महत्त्वाच्या भूमिकेपर्यंतच्या प्रवासाचे स्पष्ट चित्रण करणारे आहे.

या प्रदर्शनात महात्मा गांधीजींच्या जीवन प्रवासाचे आणि इंग्लंडमधील त्यांचे शिक्षण, दक्षिण आफ्रिकेतील त्यांची सुरुवातीची वर्षे आणि चंपारण्य सत्याग्रह, दांडी मार्च आणि भारत छोडो चळवळ यासारख्या भारताच्या स्वातंत्र्यलढ्यातील महत्त्वाच्या टप्प्यांदरम्यान त्यांचे नेतृत्व, यासारख्या काही महत्त्वाच्या घटनांचे चित्रण करणारी  30  पॅनेल  तयार करण्यात आली आहेत. या  प्रदर्शनामध्ये  सामाजिक न्याय, जातीय सलोखा आणि अस्पृश्यता निर्मूलनासाठी त्यांचे कार्य, तसेच फाळणीदरम्यान शांतता राखण्यासाठी त्यांनी केलेले अंतिम प्रयत्न आणि स्वातंत्र्यानंतरचा त्यांचा वारसा यावर प्रकाश टाकण्यात आला आहे.

या प्रदर्शनामध्ये गांधीजींच्या अहिंसा, न्याय आणि शांततेच्या तत्वज्ञानाचे संकलन करणाऱ्या संग्रहित साहित्याचा समृद्ध संग्रह एकत्रित सादर केला आहे. प्रस्तुत प्रदर्शन मर्यादित काळासाठी सार्वजनिक करून,  खुले करण्यात येणार आहे.  सर्व नागरिक, विद्यार्थी, इतिहासकार आणि गांधींविषयी आस्था असणाऱ्याना  महात्मा गांधींना एक प्रकारे श्रद्धांजली वाहण्यासाठी  आणि त्यांच्या जीवनाविषयी तसेच  त्यांच्या वारशाची सखोल  माहिती घेता येणार आहे. प्रदर्शन पाहण्यासाठी सर्वांना आमंत्रित करण्यात आले आहे.

* * *

S.Patil/S.Bedekar/D.Rane

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai