Ka High-Level Committee (HLC), hapoh ka jingialam jong u Myntri ki tnad Kam Pohiing bad Cooperation, Amit Shah ka ai jingmynjur T. 3027.86 klur na ka bynta ka jingpynduna ia ki jingjia lynshop ha ki jylla bapher bapher. Kane ka komiti kaba kynthup ia ki Myntri ka tnad Pla Tyngka, ka tnad Kam Rep bad Vice Chairman NITI Aayog kum ki dkhot ka la peit ia ki jingtyrwa ia ki projek pynduna ia ki jingma na ka leilieh ha 50 tylli ki distrik kiba shah ktah bha ha ka leilieh ha 10 tylli ki jylla bad ka jingai jingiarap ia 49 tylli ki distrik jong 12 tylli ki jylla kiba shah ktah bha ha ka jingduna um ban ioh jingbei tyngka na ka National Disaster Mitigation Fund (NDMF).

Ka High-Level Committee ka la ai jingmynjur ia ka jingai jingiarap ia 12 tylli ki jylla ba shah ktah bha ha ka jingduna um ha kaba la pynbiang T. 2022.16 klur bad na kane, ka bynta jong ka Sorkar Pdeng kan long T. 1200 klur. Kine 12 tylli ki jylla ki long ka Andhra Pradesh, Bihar, Gujarat, Jharkhand, Karnataka, Madhya Pradesh, Maharashtra, Odisha, Rajasthan, Tamil Nadu, Telangana bad Uttar Pradesh.

Ka komiti ka la ai jingmynjur ruh ia ka projek pynduna ia ki jingma na ka leilieh ha 10 tylli ki jylla ha kaba la pynbiang T. 186.78 klur na ka bynta ka Andhra Pradesh, Bihar, Chhattisgarh, Jharkhand, Madhya Pradesh, Maharashtra, Meghalaya, Odisha, Uttar Pradesh bad West Bengal.

U Myntri Sorkar Pdeng u la ai jingmynjur ruh ia ka skhim na ka bynta ka jingpeit ia ka jingma na ka jingpluh khlaw ban pyntreikam ha 114 tylli ki distrik ha 19 tylli ki jylla ha ka jingmang kaba T. 818.92 klur, bad na kane ka bynta jong ka Sorkar Pdeng na ka NDMF & NDRF kan long T. 690.63 klur. Ka thong kaba kongsan jong kane ka skhim ka dei ban pyntreikam ia ka projek ban pynkylla ia ka rukom treikam ban iada na ka jingpluh khlaw ha ka ri khnang ban pynkhlain ia ka jingai jingkyrshan ia ki kam kiba iada bad pynduna ia ki jingpluh khlaw. Ki jylla Andhra Pradesh, Arunachal Pradesh, Assam, Chhattisgarh, Gujarat, Himachal Pradesh, Jharkhand, Karnataka, Kerala, Manipur, Maharashtra, Mizoram, Madhya Pradesh, Meghalaya, Nagaland, Odisha, Tamil Nadu, Telangana bad Uttarakhand kin ai ia ki jingtyrwa jong ki ban shim ia ki sienjam ban pynduna ia ki jingpluh khlaw, ka jingpynkhreh ia ki lad ban ialeh pyrshah ia ki jingpluh khlaw bad ruh ka jingkhyllie im biang hadien ba la don ki jingpluh.

Ban pynurlong ia ka jingthmu jong u Myntri Rangbah Duh Narendra Modi ban don ka India kaba khlain ha ki jingiada na ki jingjia lynshop ki bor ka mariang, ka tnad Kam Pohiing, hapoh ka jingialam jong u Myntri ka tnad Kam Pohiing Amit Shah, ka la shim ia ki sienjam ban don ka jingpeit kaba seisoh ia ki kam kiba iadei bad ki jinglynshop ha ka ri. Ka Sorkar hapoh ka jingialam u Myntri Rangbah Duh Narendra Modi ka la shim ia ki sienjam ban iada na ka jingduh ki mynsiem briew bad ki jingdon jingem ha ki por jong ki jinglynshop da kaba pynkhlain ia ki lad iada na ki jingma ha India.

Hashuwa kine ki jingtyrwa, ka HLC ka la ai jingmynjur ia ka jingai jingiarap pisa na ka NDMF na ka bynta kiwei kiwei ki projek kum ki projek ban pynduna ia ka jingma jong ka jingshlei um ha ki jaka sor ha kaba la pynbiang T 3075.65 klur, ka jingpeit ia ka jingma GLOF ha saw tylli ki jylla ha kaba la pynbiang T. 150 klur bad ka jingpynduna ia ka jingma na ki jingtwa khyndew ha 15 tylli ki jylla ha kaba la pynbiang T. 1000 klur.

Shuh shuh, la pyllait palat T. 24,981 klur sha ki jylla ha une u snem mang tyngka. Kane ka kynthup T.17479.60 klur na ka State Disaster Response Fund (SDRF) sha 27 tylli ki jylla, T.4808.30 klur na ka National Disaster Response Fund (NDRF) sha 18 tylli ki jylla, T.1973.55 klur na ka State Disaster Mitigation Fund (SDMF) sha 13 tylli ki jylla bad T. 719.72 klur na ka National Disaster Mitigation Fund (NDMF) sha 08 tylli ki jylla.

*****