76-ാമത് റിപ്പബ്ലിക് ദിന പരേഡിലേക്ക് വിശിഷ്ടാതിഥികളായി തിരഞ്ഞെടുക്കപ്പെട്ട, പ്രധാനമന്ത്രി ശ്രീ നരേന്ദ്ര മോദിയുടെ മൻ കി ബാത്ത് പരിപാടിയുടെ പ്രത്യേക ക്ഷണിതാക്കളുമായി കേന്ദ്ര വാർത്താ വിതരണ പ്രക്ഷേപണ, റെയിൽവേ, ഇലക്ട്രോണിക്സ് & ഇൻഫർമേഷൻ ടെക്നോളജി മന്ത്രി ശ്രീ അശ്വിനി വൈഷ്ണവ് ഇന്ന് സംവദിച്ചു. ഇന്ത്യയുടെ പൊതുജന പ്രക്ഷേപക സംവിധാനത്തിന്റെ റേഡിയോ വിഭാഗമായ ആകാശവാണി, ഈ വ്യക്തികളെ ന്യൂഡൽഹി ആകാശവാണി ഭവനിലെ ഓഫീസിലേക്കാണ് ക്ഷണിച്ചത് 

ആകാശവാണി: മാറ്റങ്ങൾക്ക് വഴി തെളിച്ച, വാഴ്ത്തപ്പെടാത്ത ധീരരെ ആഘോഷിക്കുന്നു

പ്രധാനമന്ത്രി ശ്രീ നരേന്ദ്ര മോദി പ്രതിമാസ മൻ കി ബാത്ത് പരിപാടിയിൽ എടുത്തുപറയുകയും അഭിനന്ദിക്കുകയും ചെയ്യുന്ന വ്യക്തികളുടെ വിജയഗാഥകൾ, പരിശ്രമങ്ങൾ, കഠിനാധ്വാനം എന്നിവ മുന്നിൽ കൊണ്ടുവരുന്നതിൽ ആകാശവാണി നിർണായക പങ്ക് വഹിക്കുന്നു.  ഈ വ്യക്തികൾ സമൂഹത്തിന് നൽകിയ ശുഭകരമായ സ്വാധീനവും അർത്ഥവത്തായ സംഭാവനകളും  പ്രചോദനാത്മകമായ വിവരണങ്ങളായി ലോകവുമായി പങ്കുവെക്കുന്നതിൽ ആകാശവാണി ഒരു നിർണായക കേന്ദ്രമായി മാറിയിരിക്കുന്നു.

പ്രധാനമന്ത്രിയുടെ പ്രത്യേക ക്ഷണപ്രകാരം, ശ്രദ്ധേയമായ പ്രവർത്തനങ്ങൾ കാഴ്ചവച്ച വ്യക്തികളെയും സംഘടനകളുടെ പ്രതിനിധികളെയും റിപ്പബ്ലിക് ദിന പരേഡ് കാണാൻ ക്ഷണിച്ചിരുന്നു. ഈ വ്യക്തികളെ,കഴിഞ്ഞ 10 വർഷമായി ആകാശവാണിയിൽ സംപ്രേഷണം ചെയ്യുന്ന സവിശേഷമായ മൻ കി ബാത്ത് പരിപാടിയിലൂടെ പ്രധാനമന്ത്രി വ്യക്തിപരമായി പരാമർശിച്ചിട്ടുണ്ട്.

മാറ്റത്തിന്റെ പ്രചോദനാത്മകമായ കഥകൾ

 “മൻ കി ബാത്ത് പരിപാടിയിൽ പ്രധാനമന്ത്രി ശ്രീ. നരേന്ദ്ര മോദി വിവിധ വ്യക്തികളുടെ സംഭാവനകൾ എടുത്തുപറയുകയും ലോകത്തിന് മുന്നിൽ അവരുടെ ശ്രമങ്ങൾ ചൂണ്ടിക്കാണിക്കുകയും  ചെയ്തത് യഥാർത്ഥത്തിൽ വിസ്മയകരമാണ് . ഈ പരിപാടിയിൽ ഈ വ്യക്തികളെ അംഗീകരിക്കുകയും ഈ നിർണായക വേദിയിൽ അവരുടെ പ്രചോദനകരമായ പ്രവർത്തനങ്ങൾ ആഘോഷിക്കുകയും ചെയ്യുന്നത് കാണുന്നത് സന്തോഷകരമാണ്." ശ്രീ അശ്വിനി വൈഷ്ണവ് പറഞ്ഞു.

 വൈവിധ്യമാർന്ന പശ്ചാത്തലങ്ങളിൽ നിന്നുള്ളവരും, പുനരുജീവനശേഷി, നൂതനാശയം, സാമൂഹിക സ്വാധീനം എന്നിവയുടെ പ്രചോദനാത്മകമായ കഥകളെ പ്രതിനിധീകരിക്കുന്നവരുമായ ഈ ക്ഷണിക്കപ്പെട്ട വ്യക്തികൾ തങ്ങളുടെ പ്രവർത്തനങ്ങൾ പങ്കിടാനും ദശലക്ഷക്കണക്കിന് പേരെ പ്രചോദിപ്പിക്കാനും അവസരം നൽകിയതിന് പ്രധാനമന്ത്രി ശ്രീ നരേന്ദ്ര മോദിക്കും മൻ കി ബാത്ത് വേദിക്കും നന്ദി അറിയിച്ചു

 "ഈ സംരംഭത്തിലൂടെ സമൂഹത്തിന്റെ നന്മയ്ക്കായി ലോകമെമ്പാടും നടക്കുന്ന ശുഭകരവും അർത്ഥവത്തായതുമായ പ്രവർത്തനങ്ങളെ പ്രധാനമന്ത്രി എടുത്തു പറയാറുള്ള കാര്യം അദ്ദേഹം ചൂണ്ടിക്കാട്ടി. അത്തരം പ്രചോദനാത്മകമായ ശ്രമങ്ങൾ ലോകവുമായി പങ്കിടുന്നതിനുള്ള ഒരു ശ്രദ്ധേയമായ വേദിയായി മൻ കി ബാത്ത് പരിപാടി പ്രവർത്തിക്കുന്നു. പ്രധാനമന്ത്രിക്കും ഇന്ന് പങ്കെടുത്ത മൻ കി ബാത്ത് പരിപാടിയിലെ ക്ഷണിതാക്കൾക്കും 
മന്ത്രി നന്ദി അറിയിച്ചു."

മൻ കി ബാത്ത്

 സമൂഹത്തിന് അസാധാരണമായ സംഭാവനകൾ നൽകുന്ന സാധാരണ പൗരന്മാരുടെ കഥകൾ ഉയർത്തിക്കാട്ടുന്ന ഒരു പരിവർത്തന സംരംഭമായി മൻ കി ബാത്ത് പരിപാടി മാറിയിരിക്കുന്നു. വിദ്യാഭ്യാസം, പരിസ്ഥിതി, സാമൂഹികക്ഷേമം, നൂതനാശയം തുടങ്ങിയ മേഖലകളിൽ അർത്ഥവത്തായ സംഭാവനകൾ നൽകി ഇന്ത്യയിലും വിദേശത്തുമുള്ള ദശലക്ഷക്കണക്കിന് പേരെ പ്രചോദിപ്പിച്ചവരുടെ പ്രവർത്തനങ്ങൾ ഉയർത്തിക്കാട്ടാൻ മൻ കി ബാത്ത് വേദിയാകുന്നു. ശക്തവും കൂടുതൽ ഉൾക്കൊള്ളുന്നതുമായ ഒരു രാഷ്ട്രം കെട്ടിപ്പടുക്കുന്നതിൽ വ്യക്തിഗത ശ്രമങ്ങളുടെ ശക്തി ഈ സവിശേഷ പരിപാടി പ്രതിഫലിപ്പിക്കുന്നു.

****************