ঙসি ত্রিপুরাগী অগরতালাদা য়ুনিয়ন হোম মিনিস্তর অমসুং কোওপরেসন মিনিস্তর শ্রী অমিত সাহনা নোর্থ ইস্তর্ন কাউন্সিল (এন ই সি)গী ৭২শুবা মীফমদা ৱা ঙাংখ্রে। থৌরম অদুদা য়ুনিয়ন মিনিস্তর শ্রী জয়তিরাদিত্যা এম সিন্দিয়া, ত্রিপুরাগী রাজ্যপাল শ্রী ইন্দ্রসেন রেদ্দি নাল্লু, ত্রিপুরাগী চীফ মিনিস্তর প্রোফেসার (দোক্তর) মনিক সাহা অমসুং য়ুনিয়ন হোম সেক্রেতরি শ্রী গোবিন্দ মোহন শরুক য়াখি। মীফম অদুদা অরুনাচল প্রদেস, অসাম, মনিপুর, মেঘালয়, মিজোরম, নাগালেন্দ অমসুং সিক্কিমগী রাজ্যপালশিংগা লোয়ননা মেঘালয়গী কম্মুনিতি অমসুং রুরেল দিবলপমেন্ত মিনিস্তর অমসুং অতোপ্পা শক্নাইরব মীওই কয়া শরুক য়াখি।

মহাক্কী ৱারোলদা, য়ুনিয়ন হোম মিনিস্তরনা হায়খি হৌখিবা চহি ১০ গী প্রধান মন্ত্রী শ্রী নরেন্দ্র মোদীগী লুচিংবা অসি অৱাং-নোংপোক লমদমগী য়াম্না মরুওইবা ওইরে। প্রধান মন্ত্রী মোদীনা লমদম অসি মালেমগী মীৎয়েং চঙহনবা অসি অৱাং-নোংপোক শীনবা থুংবগী অওনবনি। মতম শাংনা লমদম অসি দিল্লিগী ৱা ঙাংনবা ইচম চম্বা ৱাফম অমা ওইদুনা লাকখি, অদুবু মহাক্কী পান্দম অমসুং থৱায় য়াওবগা লোয়ননা প্রধান মন্ত্রী শ্রী নরেন্দ্র মোদী জিনা অৱাং-নোংপোক চাউখৎ-থৌরাংগী মীৎয়েং চঙলে। হৌখিবা চহি ১০ অসিদা অৱাং-নোংপোক লমদমদা মমাঙদা অমুক্ত ওইখিদ্রিবা মওংদা ইনফ্রাস্ত্রকচর শেমগৎপদগী লম থাপ্পা হন্থরে, অদুবু প্রধান মন্ত্রীনা লমদম অসিগী মীয়াম অমসুং দিল্লি অনিগী মরক্ত লৈনরিবা থম্মোয়গী অরাপ্পা হন্থহন্নবা থবক পায়খৎলে।

য়ুনিয়ন হোম মিনিস্তরনা হায়খি মদুদি প্রধান মন্ত্রী মোদীনা অৱাং-নোংপোক লমদম অসি মরুওইনা লৌবদগী অপুনবা কেন্দ্র সরকারনা মশা মরোমদোম মরুওইনা লৌরে। হৌখিবা চহি ১০ দা, লমদম অসিগী ত্রাইবেল কাংবু ২০০ হেন্না অমসুং লোল ১৯৫ অসি মওং অমদা ঐখোয়গী খুদোংচাদবা ওইখি, মখল কয়াগী মুক্নবশিং থোকহনখি। ঙসিদি প্রধান মন্ত্রী মোদীনা হায়রিবা অশোনবা খুদোংচাদবশিং অদু থৌনা অমসুং শক্তি ওন্থোক্লে। মখোয়গী নাতকী খেন্নবশিং অদুনা মরম ওইদুনা, ঙসিদি ত্রাইবেল ফুরুপ ২০০ হেনবা মালেম শীনবা থুংনা পাম্নরে অমসুং মখোয়গী লোল ১৯৫ না অৱাং-নোংপোক লমদম অসি মালেমগী বাইওদাইভর্সিতি হোৎস্পোত ৩৬ গী মনুংদা য়াওহল্লে। অৱাং-নোংপোক লমদম খক্ত লৈ মখল ৭,৫০০ হেন্না অমসুং মখল কয়াগী লম্লক্কী শা-উচেকশিং অমসুং ঈশিংগী লনশিং লৈরি। হায়রিবা মহৌশাগী লনশিং অসি ঙাক-শেন্নবা হৌখিবা চহি ১০দা মোদী সরকারনা থবক কয়া পায়খৎলে অমসুং লদম অসি মীয়াম্না পাম্নবা লমকোয়ফম অমা ওন্থোক্লে।

য়ুনিয়ন হোম মিনিস্তরনা হায়খি মোদী সরকারনা অৱাং-নোংপোক লমদমদা শান্তি পুরক্নবা খ্বাইদগী মরুওইবা থবক পাংথোক্লে। হৌখিবা চহি ১০দা শান্তিগী য়ানচে কয়া খুৎয়েক পীনখ্রে অমসুং খুৎলায় পায়বা নহারোল ১০৫৭৪ হেন্না চঙজরক্লে অমসুং জাতিগী ইচেলদা তিল্লে, অৱাং-নোংপোক লমদমদা শান্তি পুরক্লে অমসুং চাউখৎপগী য়ুম্ফম থোল্লে। হৌজিক লৈবাক শীনবা থুংনা অমসুং মালেম্না মোদী জিগী ‘অষ্টলক্ষ্মী’গী ৱাখল্লোন য়ানরে। অৱাং-নোংপোক লমদমগী রাজ্যশিং অমসুং মীওই খুদিংমক নুংঙাই-য়াইফবা ঙসিদি লৈবাক শীনবা থুংনা পাম্লে, মসিনা লৈবাক অসি চাউখৎহনবদা অৱাং-নোংপোক লমদমনা মখা তানা মতেং পাংগনি। হৌজিক লমদম অসিগী চাউখৎ-থৌরাংগী মপাঙ্গল কনবা, মতিক চাবা অমসুং খুদিংমক কোনশিনবা থৌরাং অমা পায়খৎপা মতম য়ৌরে। মোদী সরকারগী পান্দমদি অৱাং-নোংপোক্কী চাউখৎপগী খোঙজেল য়াংখৎহনবা অমসুং লমদম অসি ভারতকী অতৈ মফমশিংগা মান্ননা চাউখৎহনবনি। হান্নগী প্রধান মন্ত্রী অতল বিহারি বাজপায়না দোনর মিনিস্ত্রি লিংখৎখি। অপুনবা মন্ত্রীমন্দল অৱাং-নোংপোক লমদমদা চৎনবা অমসুং মফম অদুদা অহিং লৈনবা মোদী জিনা তকশিনখি, মসিদগী কেন্দ্রগী মিনিস্তরশিং অৱাং-নোংপোক লমদমদা অহিং ৭০০ হেন্না লৈখ্রে। প্রধান মন্ত্রী মোদী মশামক অৱাং-নোংপোক লমদমদা ৬৫ রক চৎখ্রে অমসুং খোঙচৎ খুদিংদা, মহাক্না লমদম অসিগী চাউখৎপগী খুদোলশিং পীরমখি।

য়ুনিয়ন হোম মিনিস্তরনা হায়খি অৱাং-নোংপোক লমদমগী নাত ঙাক-শেন্নবা মোদী সরকারনা পায়খৎপা য়াবা থবকশিং পায়খৎলি। মোদী সরকারনা অৱাং-নোংপোক লমদমগী লোল অয়াম্বা সংবিধানগী ৮শুবা সেদুলদা হাপচিল্লে। তোঙান-তোঙানবা শান্তিগী য়ানচেশিংদা, কেন্দ্র সরকারনা অৱাং-নোংপোক লমদমগী লোলশিং ঙাক-শেনবা খক নত্তনা লমদম অসিগী লোলশিংদা প্রাইমারি ইজুকেসন পীনবা তকশিনখি। হৌজিক অৱাং-নোংপোক লমদম চাউখৎহন্দুনা লৈবাক অসি দোল্লার ত্রিল্লিয়ন ৫ গী ইকোনোমি অমা ওইনবা মতেং পাংনবা মতম ওইরে। মসিগীদমক, দোনর মিনিস্ত্রি অমসুং এন.ই.সিনা ‘এক্ত ইস্ত, এক্ত ফাস্ত অমসুং এক্ত ফার্স্ত’ গী লাইৱা শীজিন্নবা থবক পায়খৎলি। হৌখিবা চহি ১০দা, এন.ই.সি অসি অনিংবশিং, দরকার ওইবশিং অমসুং খুদোংচাদবশিং কোকহন্নবা পাম্বৈশিং খন্ননবা মরুওইবা মফম অমা ওইদুনা লাক্লি অমসুং অৱাং-নোংপোক লমদম চাউখৎনবা ব্লপ্রিন্ত ওইনবা থবক তৌরে। ভারত সরকারগী থৌশিলশিং ফজনা পাংথোক্নবা এন.ই.সিনা মরুওইবা থৌদাং অমা লৌরি অমসুং অৱাং-নোংপোক লমদমগী রাজ্যশিংদা চাউখৎপা খুঙ্গংশিংগী থাক ফাওবা য়ৌবা ঙম্লে। চাউখৎনবা থৌরাংশিং শেম-শাবদা এন.ই.সিনা মরুওইবা থৌদাং লৌরি অমসুং ত্রাইবেল ফুরুপশিং চাউখৎহল্লে অমসুং অপুনবা অৱাং-নোংপোক লমদম অসিদা অখন্নবা মীৎয়েং অমা য়েংদুনা অৱাং-নোংপোক লমদম চাউখৎনবা থৌরাং তৌরে।

শ্রী অমিত সাহনা হায়খি প্রধান মন্ত্রী মোদীনা অফবা ফিবম অমা শেমগৎপদগী, রাজ্যশিং অমসুং দোনর মিনিস্ত্রিনা শেন থাদরক্নবা অফবা ফিবম অমা শেমগৎলে। অৱাং-নোংপোক লমদমদা মখা তানা লম্বী-থোং অৱাবা ওইদ্রে অমসুং মতম খরগী মতুংদা মালেম অসি লম্বী-থোংগী অৱাবা লৈররোই। বাংলাদেস ইনক্লেপশিং পীথোক-পীশিন তৌনরবা মতুংদা অৱাং-নোংপোক লমদমগা মালেমগা শম্ননবা ঐখোয়গী পান্দম অথুবা মতমদা ফংলগনি। মসিনা অৱাং-নোংপোক লমদমগী উদ্যোগকী থবকশিং চাউখৎহনগনি অমসুং লদম অসিদা শেন থাদনবগী মালেমগী কৈথেলশিংশু হাংদোক্লগনি। মসিগীদমক রাজ্য খুদিংমক্না থবকশিং ফগৎহনগদবনি। ইনভেস্তর খুদিংমক অৱাং-নোংপোক লমদমদা শেন থাদনবা ভারত সরকারনা পুক্নিং থৌগৎলে।

য়ুনিয়ন হোম মিনিস্তরনা হায়খি সেমিকন্দক্তর অমসুং দিসপ্লে শাবগী থবক ফগৎনবা অৱাং-নোংপোক লমদমদা সেমিকন্দক্তর য়ুনিত অহুম শানবা কেন্দ্রগী মন্ত্রীমন্দলনা ৱারেপ লৌখ্রে। য়ুনিতশিং অসিগী মনুংদা, লুপা করোর ২৭,০০০ রোম থাদদুনা অসামদা তাতা সেমিকন্দক্তর এশেমব্লি অমসুং তেস্ত প্রাইভেল লিমিতেদ লিংখৎকনি। মসিনা হকথেংননা থয়ক ২০,০০০ অমসুং নাকোইননা থবক ৬০,০০০ পীগনি। অৱাং-নোংপোক লমদমগী নহারোলশিং চুনবা লৌশিং লৈহন্নবা ভারত সরকারগী ইজুকেসন মিনিস্ত্রিনা অৱাং-নোংপোক লমদমগী য়ুনিভর্সিতিশিংগা কোর্সশিং শেম্নবা পুন্না থবক তৌমিন্নরি। মসিনা অৱাং-নোংপোক লমদমগী রাজ্য নিপালগী মশিং য়াম্লবা নহারোলশিংদা থবক ফংহনগনি।

শ্রী অমিত সাহনা হায়খি অৱাং-নোংপোক লমদমদা উদ্যোগকী শেন থাদবা অসি অরুবা অমনি অমসুং মসি য়াংখৎনবা থবকশিং কনখৎহনগদবনি। অৱাং-নোংপোক লমদমগী রাজ্যশিং চাউখৎহনবা খক্তনা লমদম অসি শান্তি পুরকপা ওইথোক্লোই, লনাই মীওইশিং, খুঙ্গংশিং অমসুং রাজ্যশিং চাউখৎপগী থোং মান্নবা দরকার ওইরি। লনাই মীওইশিং চাউখৎনবা, খুঙ্গংশিং চাউখৎহনগদবনি, মসি ফংনবা, উদ্যোগ চাউখৎহনবগা লোয়ননা, লমদম অসিগী মশাগী ওক্নবা শঙ্গোম, মনা-মশিং, য়েরুম, ঙা অমসুং শা পুথোক্কদবনি। ওর্গনিক্কী পোৎথোকশিং, শঙ্গোম, মনা-মশিং, য়েরুম আমসুং অসিগুম্বা পোৎলমশিংনা লমদম অসিগী মীওইশিং চাউখৎহনগনি অমসুং লনাই মীওইশিং নুংঙাইদ্রি ফাওবা, নুংঙাই-য়াইফবা অৱাং-নোংপোক লমদম অমগী মঙলান মঙফাওনবা ঙম্লোই।

য়ুনিয়ন হোম মিনিস্তরনা হায়খি অৱাং-নোংপোক লমদম শীনবা থুংনা মশা মরোমদোম ওর্গনিক ফার্মিং পায়খৎচরি। ভারত সরকারনা লিংখৎপা নেসনেল কোওপরেতিপ ওর্গনিক্স লিমিতেদ শরুক য়াগদবনি। নেসনেল কোওপরেতিপ ওর্গনিক্স লিমিতেদকী পান্দমদি কোওপরেপতি ওর্গনিক ফার্মিং তৌরিবা লৌমশিং শম্নহনবনি অমসুং পেকেজিং, য়োনবা অমসুং মপান্দা থাদোক্নবা ইনফ্রাস্ত্রকচর শেমগৎপনি। রাজ্য খুদিংমক নেসনেল কোওপরেতিপ ওর্গনিক্স লিমিতেদকা য়ানচেশিং খুৎয়েক পীনগদবনি অমসুং মখোয়গী পোৎথোকশিং মালেমগী কৈথেলশিংদা য়ৌবা ঙম্নবা মসিদা মখোয়গী লৌমীশিং শম্নগদবনি। অৱাং-নোংপোক লমদমগী রাজ্য খুদিংমক্ত অমসুং  অসামগুম্বা অচৌবা রাজ্যদা জিলা খুদিংমক্ত ওর্গনিক সর্তিফিকেসন লেব অমমম লিংখৎনবা মোদী সরকারনা ৱারেপ লৌরে। মসিনা লৈবাক-লৈহাও অমসুং লৌউ-শিংউগী পোৎথোকশিং অনিমক ওর্গনিক সর্তিফিকেত ফংবা ঙমগনি। অমুল অমসুং ভারতগুম্বা ব্রান্দশিংগী খুৎথাংদা, ঐখোয়গী পোৎথোকশিং মালেমগী কৈথেলশিংদা য়ৌবা ঙমগনি। অৱাং-নোংপোক লমদমগী মখল খুদিংমক্কী চৎথোক-চৎশিনগী পাম্বৈশিংদা মোদী সরকারনা মরুওইনা লৌরি। মিসন প্লাম ওইল অসি অৱাং-নোংপোক লমদমগী রাজ্যশিং চাউখৎনবা অফবা লম্বী অমা ওইরে। লৈবাক অসিদা থাউ থোকপা মরুশিং পুথোকপা য়াম্না নেম্লি অমসুং হৌজিক অচাথাউ মশাগী ওক্নবা পুথোকপা ঙমদ্রি, অদুবু মিসন প্লাম ওইলনা হিরম অসিদা মশাগী ওক্নবা পুথোকপা ঙমগনি। হৌজিক ফাওবদা অৱাং-নোংপোক লমদমদা অনৌবা থাউগী মিল ১০ লিংখৎনবা থৌরাং লৈরে।

য়ুনিয়ন হোম মিনিস্তরনা হায়খি হৌখিবা চহি ১০ অসিদা, মোদী সরকারনা অৱাং-নোংপোক লমদমগী সেকুরিতিগী মাইথোং য়াম্বা থৌরাং অমা পায়খৎলে অমসুং রাজ্য খুদিংমক্কী অখন্নবা লাল্লোং অমা শেম্লে। মসিগী লাল্লোং অসিগী ফল ওইনা, অৱাং-নোংপোক লমদমদা পুলিস, লান্মী, অসাম রাইফলস অমসুং সি.এ.পি.এফশিংনা অফবা সিস্তেম অমা পায়খৎলে। হৌখিবা চহি ১০ দা, অৱাং-নোংপোক্ত হিংশাগী থৌদোকশিং চাদা ৭১ হন্থরে অমসুং মীচমশিং শিবা চাদা ৮৬ হন্থরে অমসুং লালহৌবা মীওই ১০,৫৭৪ চঙজরকখ্রে। তোঙান তোঙানবা শান্তিগী য়ানবা পুরক্তুনা অৱাং-নোংপোক্ত শান্তি পুরকপদা মোদী সরকারনা মাইপাক্লে।

য়ুনিয়ন হোম মিনিস্তরনা হায়খি অৱাং-নোংপোক লমদমগী রাজ্যশিং ফাওরগা ভারত্ত দ্রগশিং পুশিল্লক্নবগী অচৌবা লম্বী অমা ওইবা মরম্না, প্রধান মন্ত্রী মোদীনা হৌদোকখিবা দ্রগ শীজিন্নদবা ভারতকী খোঙজংদা অৱাং-নোংপোক লমদমগী অখন্নবা থৌদাং অমা লৈরি। মাইকৈ অসিদা হৌখিবা চহি ৬ দা শিংথাবা য়াবা থবকশিং পায়খৎলে অমসুং হৌজিক ঐখোয়না পায়খৎলিবা থবকশিং অসি মতিক চাবা নত্তে। দিস্ত্রিক মোনিতিরি কম্মিতিশিংগী জিলা থাক্কী মীফমশিং পাংথোক্কদবনি অমসুং মখোয়না ফজনা য়েংশিনগদবনি। দ্রগ এদিক্সন্না তুংগী মীরোলশিং মাঙহল্লি অমসুং অৱাং-নোংপোক লমদমনা মরুওইবা থৌদাং অমা লৌদুনা দ্রগ শীজিন্নদবা ভারত অমা ওইহনবা অসি ঐখোয়গী পান্দমনি।

য়ুনিয়ন হোম মিনিস্তরনা হায়খি অৱাং-নোংপোক লমদমগী রাজ্যশিং শীনবা থুংনা অনৌবা ক্রিমিনেল লো অহুম মপুংফানা চৎন্নবা থবক পায়খৎলি। হায়রিবা লোশিং অসি চৎনরবা মতুংদা, সুপ্রিম কোর্ত য়ৌবা খ্বাইদগী লুবা কেসশিং য়াওনা, অরুবা কেস খুদিংমক চহি অহুমগী মনুংদা অচুম্বা ৱায়েল ফংহনগনি। চহি পুলিসনা লালহৌবা অমসুং হিংশা থেংননবা থবকশিং খক্তদা মীৎয়েং চঙদুনা লাক্লি। অনৌবা ক্রিমিনেল লো অহুমদা য়াওরিবা লন-থুম, ইকায়খুম্নবা অমসুং মখোয়গী ইমুং-মনুং ঙাক-শেন্নবা সংবিধানগী হকশিং অৱাং-নোংপোক্কী মীওই খুদিংমক্ত ফংহনগদবা মতম অদু য়ৌরক্লে।

য়ুনিয়ন হোম মিনিস্তরনা হায়খি অৱাং-নোংপোক লমদমগী পুলিসকী চৎনবী অমসুং মাইকৈ হোংনবা মতম অদু লাক্লে। লমদম অসিদা শান্তি লৈরকপদগী, হৌজিক মীয়ামগী ফংফম থোকপা হকশিং ফংহন্নবা মীৎয়েং চঙগদবনি। মসিগীদমক অৱাং-নোংপোক্কী রাজ্য খুদিংমক্কী পুলিসকী থবক, ত্রেনিং অমসুং মীৎয়েং অহোংবা পুরক্নবা অমসুং পুলিস ফোর্সকী চৎনবীশিং অমসুং মাইকৈদা অওনবা পুরক্নবা থবকশিং পায়খৎকদবনি। অৱাং-নোংপোক লমদমগী রাজ্য শীনবা থুংনা অনৌবা লো অহুম মপুংফানা চৎনবা অসিনা অহোংবা অসি পুরকপদা তঙাইফদবা চঙবা মচাক ওইগনি। এফ.আই.আর অমা ফাইল তৌরগা অৱাং-নোংপোক লমদমগী মীয়াম্না অচুম্বা ৱায়েল ফংনবা থবক অসি হকথেংননা য়েংশিন্নবা শ্রী অমিত সাহনা মীফম অদুদা শরুক য়াখিবা রাজ্যপালশিংদা তকশিনখি।

শ্রী অমিত সাহনা হায়খি পি.এম-দেভাইন স্কিমগী কায়থোকপা শেনফম লুপা করোর ৬৬০০ রোমনি, মসি অথুবা মতমদা লুপা করোর ৯০০০ দা হেনগৎহল্লগনি। লম্বীশিং, পৱার, লাইরিক-লাইশু, অনা-লায়েংগী থবকশিং, শান্নবগী ইনফ্রাস্ত্রকচর অমসুং তুরিজমগী প্রোজেকশিং য়াওনা প্রোজেক ১১১ অৱাং-নোংপোক লমদম চাউখৎনবা পায়খৎলি। ২০১৪-১৫ দগী অৱাং-নোংপোক লমদমগী বজেত চাদা ১৫৩ হেনগৎলে অমসুং বেম্বু মিসনগী খুৎথাংদা, অৱাং-নোংপোক লমদম শীনবা থুংনা নুংঙাই-য়াইফনবা সরকারনা অচৌবা পান্দম অমা থম্লে। অৱাং-নোংপোক লমদমগী মখল খুদিংমক্কী লম্বী-থোং শেমগৎনবা মোদী সরকারনা পাংবা য়াবা মতেং পাংগনি আমসুং মসিগী ফন্দগী অৱাৎপা অমতা লৈতে।

য়ুনিয়ন হোম মিনিস্তরনা হায়খি রেল লম্বী শেম্নবা লুপা করোর ৮১,০০০ অমসুং লম্বীশিং শেমগৎনবা লুপা করোর ৪১,০০০গী থৌরাংশিং লৈরে। অনৌবা এয়র রুত ৬৪ হৌদোক্লে অমসুং লেমহৌরিবা থবকশিং মথং চহি অহুমদা লোইশিল্লগনি। অৱাং-নোংপোক লমদমগী রাজ্যশিংনা নোর্থ ইস্তর্ন স্পেস এপ্লিকেসন সেন্তর মপুংফানা শীজিন্নগদবনি। অৱাং-নোংপোক লমদমগী রাজ্য নিপাল চাউখৎনবা তেক্নোলোজি শীজিন্নদ্রিবা ফাওবা, চাউখৎনবা মীৎয়েং চঙবা মপুংফানা মশক তাকপা ওইথোক্লোই।

অৱাং-নোংপোক লমদমগী রাজ্যশিংদা য়াম্না তোইনা ঈশিং ইচাউ থোকপগী মতাংদা, য়ুনিয়ন হোম মিনিস্তরনা হায়খি তেক্নোলোজি শীজিন্নদুনা মহৌশাদগী লৈরক্লবা ঈশিং ইরমশিং শেমগৎনবা, লম্বীশিং শেম্নবা বজেতকী চাদা ৩০ রোম  হন্থহল্লগনি। ইচাউগী ঈশিং থৈদোক্তুনা অমসুং অচৌবা ইকোনশিং তৌদুনা, ঈশিং ইচাউ মাঙজৌননা ঙাকথোকপা, লৌউ-শিংউ অমসুং তুরিজমগী পান্দম অহুম ফংগনি। চাংয়েং ওইনা অসামদা অচৌবা ইকোন ১৫ তৌরে অমসুং ইচাউ থেংন্নবা অমসুং ঈশিংগী অৱাৎপা লৈতনবা মসিগী পাম্বৈ অসি রাজ্য খুদিংমক্না শীজিন্নগদবনি। তেক্নোলোজি শীজিন্নবা অসিনা শেঞ্জা-থুমজা হন্থহল্লে অমসুং দি.বি.তি খুমাঙচাউশিনহনবদা মতেং পাংলে।

য়ুনিয়ন হোম মিনিস্তরনা হায়খি শান্তি লৈবা অমসুং নুংঙাই-য়াইফবা অৱাং-নোংপোক লমদম অমা খক্তনা মতিক চাবা নত্তে। অৱাং-নোংপোক লমদমগী মখল কয়াগী নাত, কলাশিং, সাহিত্য অমসুং লোলশিং ঙাক-শেনবা অমসুং মখোয় হিংদুনা লৈহনবা অসি অৱাং-নোংপোক লমদম খক্তগী মরুওইবা নত্তনা লৈবাক শীনবা থুংবগী মরুওই। প্রধান মন্ত্রী শ্রী নরেন্দ্র মোদীগী লমজিং মখাদা, অৱাং-নোংপোক লমদমগী রাজ্য খুদিংমক্না মায়োক্নরিবা খুদোংচাদবা খুদিংমক কোকহন্নবা ভারত সরকারনা লেপ্লি। ২০৪৭দা ভারতনা মপুংফানা চাউখৎপদা, অৱাং-নোংপোক লমদম লৈবাক অসিগী খ্বাইদগী নুংঙাই-য়াইফবা লমদম অমা ওইগনি।

***