ഭാരത് മാതാ കീ - ജയ്!

ഭാരത് മാതാ കീ - ജയ്!

ഭാരത് മാതാ കീ - ജയ്!

മഹാരാഷ്ട്ര ഗവർണർ സി.പി. രാധാകൃഷ്ണൻ ജി, നമ്മുടെ ജനപ്രിയ മുഖ്യമന്ത്രി ശ്രീ ഏകനാഥ് ഷിൻഡേ ജി, കേന്ദ്രമന്ത്രിസഭയിലെ എൻ്റെ സഹപ്രവർത്തകരായ ശ്രീ രാജീവ് രഞ്ജൻ സിംഗ് ജി, സർബാനന്ദ സോനോവാൾ ജി, മഹാരാഷ്ട്ര ഉപമുഖ്യമന്ത്രിമാരായ ദേവേന്ദ്ര ഫഡ്‌നാവിസ് ജി, അജിത് ദാദാ പവാർ ജി, കേന്ദ്രമന്ത്രിസഭയിലെ എൻ്റെ മറ്റ് സഹപ്രവർത്തകർ, മഹാരാഷ്ട്ര സർക്കാരിലെ മന്ത്രിമാരേ, മറ്റ് വിശിഷ്ടാതിഥികളേ
എൻ്റെ പ്രിയ സഹോദരീസഹോദരന്മാരേ!

ഇന്ന് സന്ത് സേനാജി മഹാരാജിൻ്റെ ചരമവാർഷികമാണ്. ഞാൻ അദ്ദേഹത്തിനു മുമ്പിൽ വണങ്ങുന്നു. എൻ്റെ എല്ലാ പ്രിയപ്പെട്ട സഹോദരി സഹോദരന്മാർക്കും ഞാൻ എൻ്റെ ആശംസകൾ നേരുന്നു.

സുഹൃത്തുക്കളേ,

ഇന്നത്തെ പരിപാടിയിൽ സംസാരിക്കുന്നതിന് മുമ്പ്, എൻ്റെ ഹൃദയവികാരങ്ങൾ പ്രകടിപ്പിക്കാൻ ഞാൻ ആഗ്രഹിക്കുന്നു. 2013 ൽ ഭാരതീയ ജനതാ പാർട്ടി എന്നെ പ്രധാനമന്ത്രി സ്ഥാനാർത്ഥിയായി തിരഞ്ഞെടുത്തപ്പോൾ ഞാൻ ആദ്യം ചെയ്തത് റായ്ഗഡ് കോട്ട സന്ദർശിച്ച് ഛത്രപതി ശിവാജി മഹാരാജിൻ്റെ സമാധിക്ക് മുമ്പിൽ പ്രാർത്ഥിക്കുകയായിരുന്നു. ഒരു ഭക്തൻ തൻ്റെ ദൈവത്തോട് ഭക്തിയോടെ പ്രാർത്ഥിക്കുന്നതുപോലെ, രാഷ്ട്രസേവനത്തിൻ്റെ ഒരു പുതിയ യാത്ര ആരംഭിക്കാൻ ഞാൻ  ഭക്തിയോടെ അനുഗ്രഹം വാങ്ങി. അടുത്തിടെ, സിന്ധുദുർഗിൽ സംഭവിച്ചത് ... ഛത്രപതി ശിവാജി മഹാരാജ് എന്നത് എനിക്കും എൻ്റെ സഹപ്രവർത്തകർക്കും വെറുമൊരു പേരല്ല. ഞങ്ങളെ സംബന്ധിച്ചിടത്തോളം ഛത്രപതി ശിവാജി മഹാരാജ് ഒരു രാജാവോ ചക്രവർത്തിയോ ഭരണാധികാരിയോ മാത്രമല്ല; അദ്ദേഹം നമ്മുടെ ആദരണീയ ദൈവമാണ്. ഇന്ന് ഞാൻ ശിരസ്സു നമിച്ച് എൻ്റെ ആരാധ്യനായ ഛത്രപതി ശിവാജി മഹാരാജിൻ്റെ പാദങ്ങളിൽ ക്ഷമ ചോദിക്കുന്നു. നമ്മുടെ മൂല്യങ്ങൾ വ്യത്യസ്തമാണ്; ഈ മണ്ണിൽ ജനിച്ച ധീരനായ വീർ സവർക്കറെ, ഭാരതമാതാവിൻ്റെ മഹാനായ പുത്രനെ, അടിസ്ഥാനരഹിതമായ അധിക്ഷേപങ്ങൾ കൊണ്ട് അടിക്കടി അപമാനിക്കുന്ന തരത്തിലുള്ള ആളുകളല്ല ഞങ്ങൾ. അവർ അദ്ദേഹത്തെ നിരന്തരം അനാദരിക്കുകയും ദേശസ്നേഹികളുടെ വികാരങ്ങൾ തകർക്കുകയും ചെയ്യുന്നു. വീർ സവർക്കറെ അധിക്ഷേപിച്ചിട്ടും മാപ്പ് പറയാൻ അവർ തയ്യാറല്ല, കോടതികളിൽ നിയമപോരാട്ടത്തിന് തയ്യാറാണ്. ഇത്രയും മഹാനായ പുത്രനെ അപമാനിച്ചിട്ട് പശ്ചാത്തപിക്കാത്തവരുടെ മൂല്യങ്ങൾ മഹാരാഷ്ട്രയിലെ ജനങ്ങൾ ഇനി തിരിച്ചറിയണം. ഞങ്ങളുടെ മൂല്യങ്ങൾ അനുസരിച്ച് ഈ നാട്ടിൽ എത്തിയ ഞാൻ ഇന്ന് ആദ്യം ചെയ്തത് എൻ്റെ ആദരണീയ ദൈവമായ ഛത്രപതി ശിവാജി മഹാരാജിൻ്റെ പാദങ്ങളിൽ ശിരസ്സ് കുനിച്ച് മാപ്പ് ചോദിക്കുക എന്നതായിരുന്നു  മാത്രവുമല്ല, ഛത്രപതി ശിവാജി മഹാരാജിനെ ദൈവമായി കരുതുന്ന, ഹൃദയം വല്ലാതെ വേദനിച്ചവരോടും ഞാൻ തല കുനിച്ച് ക്ഷമ ചോദിക്കുന്നു. എൻ്റെ മൂല്യങ്ങൾ വ്യത്യസ്തമാണ്. ഞങ്ങളെ സംബന്ധിച്ചിടത്തോളം, നമ്മുടെ ആരാധനാമൂർത്തിയെക്കാൾ വലുതായി ഒന്നുമില്ല.

സുഹൃത്തുക്കളേ,

മഹാരാഷ്ട്രയുടെ വികസന യാത്രയിൽ ഇന്ന് ചരിത്ര ദിനമാണ്. ഭാരതത്തിൻ്റെ വികസന യാത്രയിൽ ഇത് വളരെ പ്രധാനപ്പെട്ട ദിവസമാണ്. ഒരു 'വികസിത് മഹാരാഷ്‌ട്ര' (വികസിത മഹാരാഷ്ട്ര) ഒരു 'വികസിത് ഭാരത്' (വികസിത ഇന്ത്യ) എന്ന കാഴ്ചപ്പാടിൻ്റെ അനിവാര്യ ഭാഗമാണ്. അതുകൊണ്ടാണ്, കഴിഞ്ഞ പത്ത് വർഷത്തിലായാലും എൻ്റെ ​ഗവൺമെന്റിൻ്റെ ഇപ്പോഴത്തെ മൂന്നാം ഊഴത്തിലാണെങ്കിലും, മഹാരാഷ്ട്രയ്ക്ക് വേണ്ടി തുടർച്ചയായി സുപ്രധാന തീരുമാനങ്ങൾ കൈക്കൊണ്ടത്. വികസനത്തിന് ആവശ്യമായ ശക്തിയും വിഭവങ്ങളും മഹാരാഷ്ട്രയിലുണ്ട്. ഇതിന് ഒരു നീണ്ട കടൽത്തീരമുണ്ട്, ഈ തീരങ്ങൾക്ക് അന്താരാഷ്ട്ര വ്യാപാരത്തിൻ്റെ നൂറ്റാണ്ടുകൾ പഴക്കമുള്ള ചരിത്രമുണ്ട്. മാത്രമല്ല, ഭാവിയിലേക്കുള്ള വലിയ സാധ്യതകളും ഇവിടെയുണ്ട്. ഈ അവസരങ്ങൾ മഹാരാഷ്ട്രയ്ക്കും രാജ്യത്തിനും പൂർണ്ണമായി പ്രയോജനപ്പെടുത്തുന്നുവെന്ന് ഉറപ്പാക്കുന്നതിന്, വാധ്വാൻ  തുറമുഖത്തിൻ്റെ തറക്കല്ലിടൽ ഇന്ന് നടന്നു.  ഈ തുറമുഖത്തിന് 76,000 കോടിയിലധികം രൂപ ചെലവഴിക്കും. രാജ്യത്തെ ഏറ്റവും വലിയ കണ്ടെയ്‌നർ തുറമുഖമായിരിക്കും ഇത്. രാജ്യത്ത് മാത്രമല്ല, ആഴത്തിൻ്റെ കാര്യത്തിൽ ലോകത്തിലെ ഏറ്റവും പ്രധാനപ്പെട്ട തുറമുഖങ്ങളിൽ ഒന്നായിരിക്കും ഇത്. ഇന്ന്, രാജ്യത്തെ എല്ലാ കണ്ടെയ്‌നർ തുറമുഖങ്ങളിലൂടെയും കടന്നുപോകുന്ന മൊത്തം കണ്ടെയ്‌നറുകളുടെ എണ്ണം, ഞാൻ സംസാരിക്കുന്നത് രാജ്യത്തിൻ്റെ മൊത്തം എണ്ണത്തെക്കുറിച്ചാണ്, വാധ്വാൻ തുറമുഖത്ത് മാത്രം കൈകാര്യം ചെയ്യുന്നതിനേക്കാൾ കൂടുതലായിരിക്കും. മഹാരാഷ്ട്രയിലും രാജ്യത്തും വ്യാപാര-വ്യാവസായിക പുരോഗതിക്ക് ഈ തുറമുഖം എത്ര വലിയ കേന്ദ്രമായി മാറുമെന്ന് നിങ്ങൾക്ക് ഊഹിക്കാം. ഇതുവരെ, പുരാതന കോട്ടകൾക്ക് പേരുകേട്ട ഈ പ്രദേശം ഇപ്പോൾ അതിൻ്റെ ആധുനിക തുറമുഖത്തിനും പേരുകേട്ടതാണ്. മഹാരാഷ്ട്രയിലെ പാൽഘറിലെ ജനങ്ങൾക്കും രാജ്യത്തെ മുഴുവൻ ആളുകൾക്കും ഞാൻ ഹൃദയംഗമമായ അഭിനന്ദനങ്ങൾ അറിയിക്കുന്നു. 

സുഹൃത്തുക്കളേ,

2-3 ദിവസം മുമ്പ്, ഞങ്ങളുടെ സർക്കാരും ദിഗി പോർട്ട് ഇൻഡസ്ട്രിയൽ ഏരിയയുടെ വികസനത്തിന് അംഗീകാരം നൽകി. മഹാരാഷ്ട്രയിലെ ജനങ്ങൾക്ക് ഇത് ഇരട്ടി സന്തോഷ വാർത്തയാണ്. ഛത്രപതി ശിവജി മഹാരാജിൻ്റെ തലസ്ഥാനമായ റായ്ഗഡിലാണ് ഈ വ്യവസായ മേഖല വികസിപ്പിക്കുന്നത്. അതിനാൽ, ഇത് മഹാരാഷ്ട്രയുടെ സ്വത്വത്തെയും ഛത്രപതി ശിവാജി മഹാരാജിൻ്റെ സ്വപ്നങ്ങളെയും പ്രതീകപ്പെടുത്തും. ദിഗി പോർട്ട് ഇൻഡസ്ട്രിയൽ ഏരിയ ടൂറിസവും ഇക്കോ റിസോർട്ടുകളും പ്രോത്സാഹിപ്പിക്കും.

സുഹൃത്തുക്കളേ,

ഇന്ന് നമ്മുടെ മത്സ്യത്തൊഴിലാളി സഹോദരങ്ങൾക്കായി 700 കോടിയിലധികം രൂപയുടെ വികസന പദ്ധതികൾ ഉദ്ഘാടനം ചെയ്തു. കൂടാതെ, രാജ്യത്തിൻ്റെ വിവിധ ഭാഗങ്ങളിലായി 400 കോടിയിലധികം മൂല്യമുള്ള പദ്ധതികൾ ഇവിടെ വെച്ച് ഉദ്ഘാടനം ചെയ്തു. ഈ പദ്ധതികൾക്ക് എൻ്റെ മത്സ്യത്തൊഴിലാളി സഹോദരീ സഹോദരന്മാർക്കും നിങ്ങൾക്കും എൻ്റെ അഭിനന്ദനങ്ങൾ അറിയിക്കുന്നു. അത് വാധ്വാൻ  തുറമുഖമോ, ദിഗി തുറമുഖ വ്യവസായ മേഖലയുടെ വികസനമോ, മത്സ്യബന്ധന പദ്ധതികളോ ആകട്ടെ, മാതാ മഹാലക്ഷ്മി ദേവിയുടെയും മാതാ ജീവദാനിയുടെയും, ഭഗവാൻ തുംഗരേശ്വറിൻ്റെയും അനുഗ്രഹത്താൽ മാത്രമാണ് ഇത്തരം സുപ്രധാന പ്രവർത്തനങ്ങൾ നടക്കുന്നത്. മാതാ മഹാലക്ഷ്മി ദേവിയുടെയും മാതാ ജീവദാനിയുടെയും ഭഗവാൻ തുംഗരേശ്വറിൻ്റെയും മുമ്പിൽ ഞാൻ നൂറ് പ്രാവശ്യം വണങ്ങുന്നു!

സുഹൃത്തുക്കളേ,

ലോകത്തിലെ ഏറ്റവും സമ്പന്നവും ശക്തവുമായ രാഷ്ട്രങ്ങളുടെ പട്ടികയിൽ ഭാരതം കണക്കാക്കപ്പെട്ടിരുന്ന ഒരു കാലമുണ്ടായിരുന്നു. ഭാരതത്തിൻ്റെ അഭിവൃദ്ധിയുടെ ഒരു പ്രധാന അടിത്തറ അതിൻ്റെ സമുദ്രശക്തിയായിരുന്നു. മഹാരാഷ്ട്രയേക്കാൾ നന്നായി ഇത് ആർക്കറിയാം? ഛത്രപതി ശിവാജി മഹാരാജ് സമുദ്ര വ്യാപാരവും നാവിക ശക്തിയും പുതിയ ഉയരങ്ങളിലെത്തിച്ചു. രാജ്യത്തിൻ്റെ പുരോഗതിക്കായി പുതിയ നയങ്ങൾ രൂപീകരിക്കുകയും തീരുമാനങ്ങൾ എടുക്കുകയും ചെയ്തു. ഈസ്റ്റ് ഇന്ത്യാ കമ്പനിക്ക് പോലും പൊരുത്തപ്പെടാനാകാത്തതായിരുന്നു സമുദ്ര കമാൻഡർ കൻഹോജി ആംഗ്രെയുടെ ശക്തി. പക്ഷേ, സ്വാതന്ത്ര്യാനന്തരം ആ പാരമ്പര്യത്തിന് അർഹമായ പരിഗണന ലഭിച്ചില്ല. വ്യാവസായിക വികസനത്തിലും വ്യാപാരത്തിലും ഭാരതം പിന്നിലായി.

എന്നാൽ സുഹൃത്തുക്കളേ,

ഇത് ഇപ്പോൾ ഒരു പുതിയ ഭാരതമാണ്. പുതിയ ഭാരതം ചരിത്രത്തിൽ നിന്ന് പഠിക്കുന്നു, പുതിയ ഭാരതം അതിൻ്റെ ശക്തി തിരിച്ചറിയുന്നു, പുതിയ ഭാരതം അതിൻ്റെ അഭിമാനത്തെ അംഗീകരിക്കുന്നു, പുതിയ ഭാരതം കൊളോണിയലിസത്തിൻ്റെ എല്ലാ അടയാളങ്ങളേയും മാറ്റിക്കൊണ്ട് സമുദ്ര അടിസ്ഥാന സൗകര്യങ്ങളിൽ പുതിയ നാഴികക്കല്ലുകൾ സ്ഥാപിക്കുന്നു.

സുഹൃത്തുക്കളേ,

കഴിഞ്ഞ ദശകത്തിൽ, ഭാരതത്തിൻ്റെ തീരപ്രദേശങ്ങളിലെ വികസനം അഭൂതപൂർവമായ വേഗത കൈവരിച്ചു. തുറമുഖങ്ങൾ നവീകരിക്കുകയും ജലപാതകൾ വികസിപ്പിക്കുകയും ചെയ്തിട്ടുണ്ട്. നമ്മുടെ ജനങ്ങൾക്ക് തൊഴിലവസരങ്ങൾ പ്രദാനം ചെയ്യുന്ന കപ്പൽനിർമ്മാണം ഭാരതത്തിൽ നടക്കണമെന്ന് ​ഗവൺമെന്റ് ഊന്നിപ്പറയുന്നു. ഈ ദിശയിൽ കോടിക്കണക്കിന് രൂപ നിക്ഷേപിച്ചു, അതിൻ്റെ ഫലം ഇന്ന് നാം കാണുന്നു. മിക്ക തുറമുഖങ്ങളുടെയും ശേഷി മുമ്പത്തെ അപേക്ഷിച്ച് ഇരട്ടിയായി, സ്വകാര്യ നിക്ഷേപം വർദ്ധിച്ചു, കപ്പലുകളുടെ ടേൺറൗണ്ട് സമയം കുറഞ്ഞു. ഇതുകൊണ്ട് ആർക്കാണ് പ്രയോജനം? നമ്മുടെ വ്യവസായങ്ങൾ, നമ്മുടെ വ്യാപാരികൾ, അവരുടെ ചെലവ് കുറഞ്ഞു. പുതിയ അവസരങ്ങൾ ലഭിക്കുന്ന നമ്മുടെ യുവാക്കൾക്കും ഇത് പ്രയോജനകരമാണ്. മെച്ചപ്പെട്ട സൗകര്യങ്ങൾ അനുഭവിക്കുന്ന നമ്മുടെ നാവികർക്കും ഇത് പ്രയോജനകരമാണ്.

സുഹൃത്തുക്കളേ,

ലോകം മുഴുവൻ ഇന്ന് വാധ്വാൻ തുറമുഖത്തെ വീക്ഷിക്കുകയാണ്. 20 മീറ്റർ ആഴമുള്ള വാധ്വാൻ  തുറമുഖത്തിൻ്റെ ആഴവുമായി പൊരുത്തപ്പെടുന്ന തുറമുഖങ്ങൾ ലോകത്ത് വളരെ കുറവാണ്. ആയിരക്കണക്കിന് കപ്പലുകൾ ഇവിടെ ഡോക്ക് ചെയ്യും, കൂടാതെ കണ്ടെയ്നറുകൾ കൈകാര്യം ചെയ്യും, ഇത് മുഴുവൻ പ്രദേശത്തിൻ്റെയും സാമ്പത്തിക ഭൂപ്രകൃതിയെ പരിവർത്തനം ചെയ്യും. വാധ്വാൻ  തുറമുഖത്തെ റെയിൽ-ഹൈവേ കണക്റ്റിവിറ്റിയുമായി ​ഗവൺമെന്റ് ബന്ധിപ്പിക്കും. ഈ തുറമുഖം മൂലം നിരവധി പുതിയ ബിസിനസുകൾ ഇവിടെ ആരംഭിക്കും. പടിഞ്ഞാറൻ സമർപ്പിത ചരക്ക് ഇടനാഴിയും ഡൽഹി-മുംബൈ എക്‌സ്‌പ്രസ് വേയും വളരെ അടുത്തായതിനാൽ വെയർഹൗസിംഗ് പ്രവർത്തനങ്ങൾ ത്വരിതപ്പെടുത്തും, അതിൻ്റെ സ്ഥാനം ഒരു സുവർണ്ണാവസരമാണ്. ഇവിടെ നിന്ന് വർഷം മുഴുവനും ചരക്ക് കടന്നുപോകും, ​​പരമാവധി പ്രയോജനം നിങ്ങൾക്കും മഹാരാഷ്ട്രയിലെ ജനങ്ങൾക്കും എൻ്റെ ഭാവി തലമുറയ്ക്കും ലഭിക്കും.

സുഹൃത്തുക്കളേ,

മഹാരാഷ്ട്രയുടെ വികസനമാണ് എനിക്ക് മുൻഗണന. 'മേക്ക് ഇൻ ഇന്ത്യ' പദ്ധതിയുടെ ഗുണഫലങ്ങൾ മഹാരാഷ്ട്ര ഇന്ന് കൊയ്യുകയാണ്. ആത്മനിർഭർ ഭാരത് (സ്വാശ്രയ ഇന്ത്യ) കാമ്പെയ്‌നിൻ്റെ പ്രയോജനം ഇന്ന് മഹാരാഷ്ട്രയ്ക്കുണ്ട്. ഇന്ന്, ഭാരതത്തിൻ്റെ പുരോഗതിയിൽ മഹാരാഷ്ട്ര ഒരു പ്രധാന പങ്ക് വഹിക്കുന്നു, എന്നാൽ മഹാരാഷ്ട്രയിലെ പ്രതിപക്ഷ പാർട്ടികൾ എല്ലായ്‌പ്പോഴും നിങ്ങളുടെ വികസനത്തിനും ക്ഷേമത്തിനും ബ്രേക്ക് ഇടാൻ ശ്രമിക്കുന്നത് നിർഭാഗ്യകരമാണ്. ഇതിൻ്റെ മറ്റൊരു ഉദാഹരണം ഞാൻ ഇന്ന് നിങ്ങൾക്ക് തരാം.

സഹോദരീ സഹോദരന്മാരേ,

നിരവധി വർഷങ്ങളായി, ലോകവുമായുള്ള വ്യാപാരം സുഗമമാക്കുന്നതിന് നമ്മുടെ രാജ്യത്തിന് വലുതും ആധുനികവുമായ ഒരു തുറമുഖം ആവശ്യമാണ്. മഹാരാഷ്ട്രയിലെ പാൽഘർ ആണ് ഇതിന് ഏറ്റവും അനുയോജ്യമായ സ്ഥലം. ഈ തുറമുഖത്തിന് എല്ലാ സീസണുകളിലും പ്രവർത്തിക്കാനാകും. എന്നാൽ, ഈ പദ്ധതി 60 വർഷത്തോളം നീണ്ടുപോയി. മഹാരാഷ്ട്രയ്ക്കും രാജ്യത്തിനും വേണ്ടിയുള്ള നിർണായകമായ ഈ ജോലി തുടങ്ങാൻ പോലും ചിലർ അനുവദിച്ചില്ല. 2014ൽ, ഡൽഹിയിൽ സേവനമനുഷ്ഠിക്കാൻ നിങ്ങൾ ഞങ്ങൾക്ക് അവസരം നൽകിയപ്പോഴും, 2016ൽ ഞങ്ങളുടെ സഹപ്രവർത്തകനായ ദേവേന്ദ്രജിയുടെ ​ഗവൺമെന്റ് അധികാരത്തിൽ വന്നപ്പോഴും, ഈ പദ്ധതിയുടെ ഗൗരവമായ പ്രവർത്തനങ്ങൾ ആരംഭിച്ചു. 2020ൽ തുറമുഖം നിർമിക്കാൻ തീരുമാനമെടുത്തെങ്കിലും പിന്നീട് ​ഗവൺമെന്റ് മാറി രണ്ടര വർഷമായിട്ടും ഇവിടെ ഒരു പണിയും നടന്നില്ല.  ഈ പ്രോജക്റ്റ് കൊണ്ടു മാത്രം നിരവധി ലക്ഷം കോടി രൂപയുടെ നിക്ഷേപം കൊണ്ടുവരുമെന്നും ഏകദേശം 12 ലക്ഷം തൊഴിലവസരങ്ങൾ സൃഷ്ടിക്കുമെന്നുമാണ് കണക്കാക്കുന്നത്. എന്നോട് പറയൂ, മഹാരാഷ്ട്രയുടെ ഈ വികസനത്തിൽ ആർക്കാണ് പ്രശ്നം? മഹാരാഷ്ട്രയുടെ പുരോഗതിക്ക് ബ്രേക്കിട്ടത് ആരായിരുന്നു? മഹാരാഷ്ട്രയിലെ യുവാക്കൾക്ക് തൊഴിൽ നൽകുന്നതിനെ എതിർത്തവർ ആരായിരുന്നു? എന്തുകൊണ്ടാണ് മുൻ ​ഗവൺമെന്റുകൾ ഈ പ്രവൃത്തി പുരോഗമിക്കാൻ അനുവദിക്കാതിരുന്നത്? മഹാരാഷ്ട്രയിലെ ജനങ്ങൾ ഇത് ഒരിക്കലും മറക്കരുത്. സത്യം, ചിലർ മഹാരാഷ്ട്രയെ പിന്നിൽ നിർത്താൻ ആഗ്രഹിക്കുന്നു, അതേസമയം നമ്മുടെ എൻഡിഎ സർക്കാരും ഇവിടെയുള്ള മഹായുതി (മഹാസഖ്യം) ​ഗവൺമെന്റും മഹാരാഷ്ട്രയെ രാജ്യത്തെ നേതാവാക്കാൻ ആഗ്രഹിക്കുന്നു.

സുഹൃത്തുക്കളേ,

കടലുമായി ബന്ധപ്പെട്ട അവസരങ്ങളുടെ കാര്യത്തിൽ, നമ്മുടെ മത്സ്യത്തൊഴിലാളി സഹോദരീസഹോദരന്മാരാണ് ഏറ്റവും പ്രധാനപ്പെട്ട പങ്കാളികൾ. മത്സ്യത്തൊഴിലാളി സഹോദരങ്ങളേ! നമ്മുടെ 526 മത്സ്യബന്ധന ഗ്രാമങ്ങളും 15 ലക്ഷം മത്സ്യത്തൊഴിലാളികളുമുള്ള മഹാരാഷ്ട്രയ്ക്ക് മത്സ്യമേഖലയിൽ ഗണ്യമായ സാന്നിധ്യമുണ്ട്. പ്രധാനമന്ത്രി മത്സ്യസമ്പത്ത് പദ്ധതിയുടെ ഗുണഭോക്താക്കളുമായി സംസാരിക്കുകയായിരുന്നു ഞാൻ. കഴിഞ്ഞ പത്ത് വർഷമായി ഈ മേഖല കണ്ട പരിവർത്തനം അവരുടെ കഠിനാധ്വാനത്തിലൂടെയും സർക്കാർ പദ്ധതികൾ കോടിക്കണക്കിന് മത്സ്യത്തൊഴിലാളികളുടെ ജീവിതത്തെ എങ്ങനെ മാറ്റിമറിച്ചതിലൂടെയും ഇന്ന് ദൃശ്യമാണ്. നിങ്ങളുടെ കഠിനാധ്വാനത്തിൻ്റെ ആഘാതം അറിയുന്നതിൽ നിങ്ങൾ സന്തുഷ്ടരായിരിക്കണം! ഇന്ന് ഭാരതം ലോകത്തിലെ ഏറ്റവും വലിയ രണ്ടാമത്തെ മത്സ്യ ഉൽപ്പാദന രാജ്യമായി മാറിയിരിക്കുന്നു. 2014ൽ 80 ലക്ഷം ടൺ മത്സ്യം മാത്രമാണ് രാജ്യത്ത് ഉൽപ്പാദിപ്പിച്ചത്. ഇന്ന് 170 ലക്ഷം ടൺ മത്സ്യമാണ് ഭാരതം ഉത്പാദിപ്പിക്കുന്നത്. അതായത് വെറും 10 വർഷം കൊണ്ട് മത്സ്യോത്പാദനം ഇരട്ടിയായി. ഇന്ന് ഭാരതത്തിൻ്റെ സമുദ്രോത്പന്ന കയറ്റുമതിയും അതിവേഗം വളരുകയാണ്. പത്ത് വർഷം മുമ്പ് രാജ്യം കയറ്റുമതി ചെയ്തത്. 20,000 കോടി രൂപയുടെ ചെമ്മീനാണ്. ഇന്ന് 40,000 കോടിയിലധികം രൂപയുടെ ചെമ്മീൻ കയറ്റുമതി ചെയ്യുന്നു. അതായത് ചെമ്മീൻ കയറ്റുമതിയും ഇരട്ടിയിലധികമായി. ഞങ്ങൾ ആരംഭിച്ച നീല വിപ്ലവ പദ്ധതിയുടെ വിജയം എല്ലായിടത്തും ദൃശ്യമാണ്. ഈ പദ്ധതി ലക്ഷക്കണക്കിന് പുതിയ തൊഴിലവസരങ്ങൾ സൃഷ്ടിച്ചു. നമ്മുടെ ​ഗവൺമെന്റിൻ്റെ നിരന്തര പരിശ്രമം മൂലം കോടിക്കണക്കിന് മത്സ്യത്തൊഴിലാളികളുടെ വരുമാനം വർധിക്കുകയും അവരുടെ ജീവിതനിലവാരം മെച്ചപ്പെടുകയും ചെയ്തു.

സുഹൃത്തുക്കളേ,

മത്സ്യ ഉൽപ്പാദനത്തിൽ സ്ത്രീകളുടെ പങ്കാളിത്തം വർധിപ്പിക്കാനും നമ്മുടെ ​ഗവൺമെന്റ് പ്രവർത്തിക്കുന്നുണ്ട്. പ്രധാനമന്ത്രി മത്സ്യ സമ്പത്ത് യോജനയ്ക്ക് കീഴിൽ ആയിരക്കണക്കിന് സ്ത്രീകൾക്ക് പിന്തുണ ലഭിച്ചു. മീൻ പിടിക്കാൻ പോകുന്നവർ പലപ്പോഴും ജീവൻ അപകടപ്പെടുത്തുന്ന അപകടസാധ്യതകൾ നേരിടേണ്ടിവരുമെന്നും നിങ്ങൾക്കറിയാം. അവരുടെ കുടുംബങ്ങൾ, പ്രത്യേകിച്ച് വീട്ടിലുള്ള സ്ത്രീകൾ, നിരന്തരമായ ആശങ്കയിലാണ് കഴിയുന്നത്. ആധുനിക സാങ്കേതികവിദ്യയും ഉപഗ്രഹ സഹായവും ഉപയോഗിച്ച് ഞങ്ങൾ ഈ അപകടസാധ്യതകൾ കുറയ്ക്കുകയാണ്. ഇന്ന് ആരംഭിച്ച കപ്പൽ ആശയവിനിമയ സംവിധാനം നമ്മുടെ മത്സ്യത്തൊഴിലാളി സഹോദരങ്ങൾക്ക് വലിയ അനുഗ്രഹമാകും. മത്സ്യബന്ധന യാനങ്ങളിൽ സർക്കാർ 100,000 ട്രാൻസ്‌പോണ്ടറുകൾ സ്ഥാപിക്കാൻ പോകുന്നു. ഇതോടെ നമ്മുടെ മത്സ്യത്തൊഴിലാളികൾ അവരുടെ കുടുംബങ്ങളുമായും ബോട്ടുടമകളുമായും ഫിഷറീസ് വകുപ്പുമായും കടലിൽ സുരക്ഷിതത്വം ഉറപ്പാക്കുന്നവരുമായും എപ്പോഴും ബന്ധപ്പെടും. ചുഴലിക്കാറ്റ് അല്ലെങ്കിൽ കടലിൽ എന്തെങ്കിലും അനിഷ്ട സംഭവങ്ങൾ ഉണ്ടാകുമ്പോൾ, നമ്മുടെ മത്സ്യത്തൊഴിലാളികൾക്ക് കരയിലുള്ള ബന്ധപ്പെട്ട ആളുകൾക്ക് ഉപഗ്രഹം വഴി സന്ദേശങ്ങൾ അയയ്ക്കാൻ കഴിയും. നിങ്ങളുടെ ജീവൻ രക്ഷിക്കുകയും പ്രതിസന്ധി ഘട്ടത്തിൽ ആദ്യം നിങ്ങളിലേക്ക് എത്തിച്ചേരുകയും ചെയ്യുക എന്നത് ​ഗവൺമെന്റിൻ്റെ മുൻഗണനയാണ്.

സുഹൃത്തുക്കളേ,

നമ്മുടെ മത്സ്യത്തൊഴിലാളികളുടെ ബോട്ടുകൾ സുരക്ഷിതമായി തിരിച്ചെത്തുന്നുവെന്ന് ഉറപ്പാക്കാൻ, 110 ലധികം മത്സ്യബന്ധന തുറമുഖങ്ങളും ലാൻഡിംഗ് സെൻ്ററുകളും നിർമ്മിക്കുന്നു. കോൾഡ് ചെയിൻ, സംസ്‌കരണ സൗകര്യങ്ങൾ, ബോട്ടുകൾക്കുള്ള വായ്പ, പ്രധാനമന്ത്രി മത്സ്യ സമ്പത്ത് യോജന എന്നിങ്ങനെയുള്ള പദ്ധതികളെല്ലാം നമ്മുടെ മത്സ്യത്തൊഴിലാളി സഹോദരങ്ങൾക്ക് വേണ്ടി രൂപകൽപ്പന ചെയ്തിട്ടുള്ളതാണ്. തീരദേശ ഗ്രാമങ്ങളുടെ വികസനത്തിന് ഞങ്ങൾ കൂടുതൽ ശ്രദ്ധ ചെലുത്തുന്നുണ്ട്. മത്സ്യത്തൊഴിലാളികൾക്കായി നിങ്ങളുടെ കഴിവുകൾ വർധിപ്പിക്കുന്നതിനായി ഞങ്ങൾ സർക്കാർ സ്ഥാപനങ്ങളും സഹകരണ സംഘങ്ങളും ശക്തിപ്പെടുത്തുകയാണ്.

സുഹൃത്തുക്കളേ,

പിന്നാക്ക വിഭാഗങ്ങൾക്ക് വേണ്ടി പ്രവർത്തിക്കുന്നതായാലും പിന്നാക്കക്കാർക്ക് അവസരം നൽകുന്നതായാലും ബിജെപി, എൻഡിഎ ​ഗവൺമെന്റുകൾ തികഞ്ഞ അർപ്പണബോധത്തോടെയും സത്യസന്ധതയോടെയും പ്രവർത്തിച്ചിട്ടുണ്ട്. പതിറ്റാണ്ടുകളായി നമ്മുടെ രാജ്യത്തെ മത്സ്യത്തൊഴിലാളി സഹോദരീസഹോദരന്മാരുടെയും  നമ്മുടെആദിവാസി സമൂഹങ്ങളുടെയും അവസ്ഥ നോക്കൂ. മുൻ ​ഗവൺമെന്റുകളുടെ നയങ്ങൾ എല്ലായ്പ്പോഴും ഈ സമുദായങ്ങളെ അരികുവത്ക്കരിച്ചു. രാജ്യത്ത് ഗോത്രവർഗ ആധിപത്യമുള്ള വലിയ പ്രദേശങ്ങളുണ്ട്, എന്നിട്ടും ഗോത്രവർഗ ക്ഷേമത്തിനായി ഒരു മന്ത്രാലയവും ഉണ്ടായിരുന്നില്ല. ബിജെപിയുടെ നേതൃത്വത്തിലുള്ള എൻഡിഎ ​ഗവൺമെ‍ന്റാണ് പ്രത്യേക ആദിവാസി മന്ത്രാലയം സ്ഥാപിച്ചത്. മത്സ്യത്തൊഴിലാളികളുടെ ക്ഷേമത്തിനായി നമ്മുടെ ​ഗവൺമെന്റ് പ്രത്യേക മന്ത്രാലയം രൂപീകരിച്ചു. ദീർഘകാലമായി അവഗണിക്കപ്പെട്ട ആദിവാസി മേഖലകൾ ഇപ്പോൾ പ്രധാനമന്ത്രി ജൻമാൻ പദ്ധതിയുടെ പ്രയോജനം നേടുന്നു. നമ്മുടെ ആദിവാസി സമൂഹങ്ങളും നമ്മുടെ മത്സ്യത്തൊഴിലാളി സമൂഹങ്ങളും ഇന്ന് ഭാരതത്തിൻ്റെ പുരോഗതിയിൽ കാര്യമായ സംഭാവനകൾ നൽകുന്നുണ്ട്.

സുഹൃത്തുക്കളേ,

ഇന്ന്, മറ്റൊരു നേട്ടത്തിന് മഹായുതി (മഹാസഖ്യം) ​ഗവൺമെന്റിനെ പ്രത്യേകം അഭിനന്ദിക്കാൻ ഞാൻ ആഗ്രഹിക്കുന്നു. സ്ത്രീകൾ നയിക്കുന്ന വികസനത്തിലും സ്ത്രീ ശാക്തീകരണത്തിലും മഹാരാഷ്ട്രയാണ് രാഷ്ട്രത്തിന് മുന്നിൽ. ഇന്ന്, മഹാരാഷ്ട്രയിലെ നിരവധി സ്ത്രീകൾ വിവിധ ഉന്നത സ്ഥാനങ്ങളിൽ മികച്ച ജോലി ചെയ്യുന്നു. സംസ്ഥാന ചരിത്രത്തിലാദ്യമായാണ് ചീഫ് സെക്രട്ടറിയായി സുജാത സൗനിക് ജി സംസ്ഥാന ഭരണത്തിന് നേതൃത്വം നൽകുന്നത്. ആദ്യമായാണ് രശ്മി ശുക്ല ഡിജിപിയായി സംസ്ഥാനത്തെ പോലീസ് സേനയെ നയിക്കുന്നത്. ആദ്യമായാണ് ഷോമിത ബിശ്വാസ് ജി സംസ്ഥാന ഫോറസ്റ്റ് ഫോഴ്സിനെ അതിൻ്റെ മേധാവിയായി നയിക്കുന്നത്. ആദ്യമായി സംസ്ഥാന നിയമവകുപ്പ് മേധാവി എന്ന നിലയിൽ ശ്രീമതി. സുവർണ കേവാലെ ജി ഒരു സുപ്രധാന ചുമതലയാണ് കൈകാര്യം ചെയ്യുന്നത്. അതുപോലെ, സംസ്ഥാനത്തിൻ്റെ പ്രിൻസിപ്പൽ അക്കൗണ്ടൻ്റ് ജനറലായി ജയഭഗത് ജിയാണ് നേതൃത്വം നൽകുന്നത്. മുംബൈയിലെ കസ്റ്റംസ് വകുപ്പിനെ നയിക്കുന്നത് പ്രാചി സ്വരൂപ് ജിയാണ്. മുംബൈ മെട്രോയുടെ എംഡിയായി അശ്വിനി ഭിഡെ ജിയാണ് മുംബൈയുടെ വിശാലവും വെല്ലുവിളി നിറഞ്ഞതുമായ ഭൂഗർഭ മെട്രോ-3 നയിക്കുന്നത്. മഹാരാഷ്ട്രയിൽ ഉന്നതവിദ്യാഭ്യാസരംഗത്തും സ്ത്രീകൾ മുന്നിലാണ്. ലെഫ്റ്റനൻ്റ് ജനറൽ ഡോ. മാധുരി കനിത്കർ ജി മഹാരാഷ്ട്ര ആരോഗ്യ സർവകലാശാലയുടെ വൈസ് ചാൻസലറാണ്. മഹാരാഷ്ട്ര നൈപുണ്യ സർവകലാശാലയുടെ ആദ്യ വൈസ് ചാൻസലർ എന്ന നിലയിൽ ഡോ. അപൂർവ പാൽക്കർ ജി പുതിയ സംരംഭങ്ങൾക്ക് തുടക്കമിടുന്നു. മഹാരാഷ്ട്രയിലെ സ്ത്രീകൾ തങ്ങളുടെ മികവ് പ്രകടിപ്പിക്കുന്ന അത്തരം സുപ്രധാനവും ഉയർന്ന ഉത്തരവാദിത്തമുള്ളതുമായ നിരവധി സ്ഥാനങ്ങളുണ്ട്. ഇരുപത്തിയൊന്നാം നൂറ്റാണ്ടിലെ നാരീശക്തി (സ്ത്രീശക്തി) സമൂഹത്തെ ഒരു പുതിയ ദിശയിലേക്ക് നയിക്കാൻ തയ്യാറാണെന്നതിൻ്റെ തെളിവാണ് അവരുടെ വിജയം. ഈ നാരീശക്തി ഒരു 'വികസിത് ഭാരത'ത്തിൻ്റെ സുപ്രധാന അടിത്തറയാണ്. 

സുഹൃത്തുക്കളേ,

'സബ്കാ സാത്ത്, സബ്കാ വികാസ്, സബ്കാ വിശ്വാസ്, സബ്കാ പ്രയാസ്' എന്നതാണ് എൻഡിഎ സർക്കാരിൻ്റെ മന്ത്രം. നിങ്ങളുടെ പിന്തുണയോടെ ഞങ്ങൾ മഹാരാഷ്ട്രയെ വികസനത്തിൻ്റെ പുതിയ ഉയരങ്ങളിലേക്ക് കൊണ്ടുപോകുമെന്ന് എനിക്ക് ഉറപ്പുണ്ട്. മഹായുതി ​ഗവൺമെന്റിനെ അനുഗ്രഹിക്കുന്നത് തുടരുക. ഒരിക്കൽ കൂടി, രാജ്യത്തെ ഏറ്റവും വലിയ തുറമുഖത്തിനും നമ്മുടെ മത്സ്യത്തൊഴിലാളി സഹോദരങ്ങൾക്കുവേണ്ടിയുള്ള നിരവധി പദ്ധതികൾക്കും ഞാൻ നിങ്ങൾക്കെല്ലാവർക്കും എൻ്റെ ആശംസകളും അഭിനന്ദനങ്ങളും അറിയിക്കുന്നു.

എന്നോടൊപ്പം പറയൂ-

ഭാരത് മാതാ കീ - ജയ്!

ഇരുകൈകളും ഉയർത്തി പൂർണ്ണ ശക്തിയോടെ ഉച്ചത്തിൽ പറയുക:

ഭാരത് മാതാ കീ - ജയ്!

ഇന്ന്, സമുദ്രത്തിലെ ഓരോ തിരമാലയും നിങ്ങളുടെ ശബ്ദത്തോടൊപ്പം അതിൻ്റെ ശബ്ദം കൂട്ടിച്ചേർക്കുന്നു.

ഭാരത് മാതാ കീ - ജയ്!

ഭാരത് മാതാ കീ - ജയ്!

ഭാരത് മാതാ കീ - ജയ്!

വളരെ നന്ദി.

***

SK