ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

মহারাস্ত্রগী রাজ্যপাল সি.পি. রাধাকৃষ্ণনজী, ঐখোয়গী মীয়াম্না পাম্নবা মুখ্য মন্ত্রী শ্রী একনাথ শিন্দে জী, কেন্দ্রগী কেবিনেৎকী ঐগী মরুপ শ্রী রাজীব রঞ্জন সিংহ জী, সর্বানন্দ সোনোৱলজী, মহারাস্ত্রগী উপ-মুখ্য মন্ত্রী দেবেন্দ্র ফদনাবীসজী, অজীত দাদা পৱারজী, কেন্দ্রগী মন্ত্রী-মন্দলগী ঐগী অতৈ মরুপশিং, মহারাস্ত্র সকরারগী মন্ত্রূ অমসুং মশক নাইবা মীওইশিং অমসুং ঐগী নুংশিরবা ইচিল-ইনাওশিং!

ঙসি অসি সেন্ত সেনাজী মহারাজকী মপোক কুমওননি। ঐনা মখোয়দা ইকায়খুম্নবা উৎচরি। ঐহাক্কী নুংশিরবা ইচিল-ইনাওশিংদা অদোমগী মনাই ওইরিবা ঐহাক্না য়াইফ-পাউজেল পীজরি।

মরুপশিং,

ঙসি, থৌরম অসিগী মতাংদা খন্ন-নৈনদ্রিঙৈ মমাংদা, ঐহাক্না ঐহাক্কী থম্মোয়গী পুক্নিংগী ওইবা ৱাখল্লোনশিং অদু ফোংদোকপা পাম্মি। 2013দা ভারত জনতা পার্তীনা ঐহাকপু প্রধান মন্ত্রীগী কেন্দিদেৎ ওইনা কনফর্ম তৌরকপা মতমদা ঐহাক্না অহানবা ওইনা রাইগাদ ফোর্ৎতা চৎখি অমসুং ছত্রপতি শিবাজী মহারাজকী সমাদীগী মমাংদা ফমদুনা লাই খুরুমখি। ভক্ত অমনা মহাক্কী দেবতাদা ইকায় খুম্নবা উৎপগা লোয়ননা, ঐহাক্না মহাক্কী য়াইফ-মঙ্গোল লৌখি অমসুং লৈবাক্কী সেবাগী অনৌবা খোঙচৎ অমা হৌখি। সিন্ধুদুর্গতা হন্দক থোকখিবা থৌদোক্না ঐহাক অমসুং ঐহাক্কী মরুপশিং পুম্নমক্কীদমক, ছত্রপতি শিবাজী মহারাজ অসি মমিং অমখক্তমক নত্তে। ঐখোয়গীদমক্তদি, ছত্রপতি শিবাজী মহারাজ অসি নিংথৌ খক্তমক নত্তে, মহারাজ, স্তেতস্ মেন অমনি, ঐখোয়গীদমক্তদি ছত্রপতি শিবাজী মহারাজ অসি ঐখোয়গী লাইনি। অমসুং ঙসি ঐহাক্না ঐহাক্কী ঈশ্বর, ছত্রপতি শিবাজী মহারাজকী মফমদা ইকায় খুম্নবা উৎচরি। ঐখোয়গী ভেল্যুশিং অসি তোঙান-তোঙানবা ওইরি। ঐখোয়না ভারতকী মপা, ভারতকী মচা ওইরিবা বীর সাভারকরবু ইকায় খুম্নদবা উৎলিবা মীওইশিং নত্তে। ঐখোয়না অথৌবশিংগী পুক্নিংগী অৱাবা অদু কোকহল্লি। অদুম ওইনমক, বীর সাভরকরবু ইকায় খুম্নদবা উৎলিবা লাল্লে হায়জবা পামদবা মীওইশিংনা কোর্ত্তা লান্থেংনবা শেম-শারি। মহারাস্ত্রগী মীয়াম্না অসিগুম্বা অফাওবা মচানুপা অমবু ইকায় খুম্নদবা মীওইশিংগী মগুনশিং অদু হৌজিক খঙগদবনি। অমসুং মসি ঐখোয়গী ভেল্যুশিংনি, ঐহাক্না লমদম অসিদা লাকপা মতমদা, ঐহাক্না খ্বাইদগী অহানবা তৌরিবসি ঐহাক্কী নুংশিরবা লাই, ছত্রপতি শিবাজী মহারাজগী খুয়া খাদা খুরুমজখি অমসুং মসি খক্তমক নত্তে, অসিগুম্বা নুংশিজরবা লাইবু ইকায় খুম্নবা উৎলিবা মীওইশিংদা মখোয়গী থম্মোয়দা পোকপা অৱাবা অদুগীদমক ঐহাক্না ইকায় খুম্নবা উৎলি অমসুং মখোয়দা নুংঙাইতবা ফোংদোকচরি। ঐগী ভেল্যুশিংদি তোঙাল্লি। ঐখোয়গীদমক্তদি, ঐখোয়গী আইদোলদগী হেন্না চাউবা করিসু লৈতে।

মরুপশিং,

ঙসি অসি মহারাস্ত্রগী চাউখৎ-থৌরাংগী খোঙচৎতা পুৱারী ওইরবা নুমিৎ অমনি। ঙসি অসি ভারতকী চাউখৎ-থৌরাংগী খোঙচৎকী য়াম্না চাউরবা নুমিৎ অমনি। দিবেলপ তৌরবা মহারাস্ত্রা অসি দিবেলপ তৌরবা ভারতকী ৱারেপকী খ্বাইদগী মরু ওইবা শরুক্নি। মসিনা মরম ওইদুনা, হৌখিবা চহি 10 নত্ত্রগা ঐহাক্কী সরকারগী অহুমশুবা তর্ম ওইরবসু, মহারাস্ত্রগীদমক অচৌবা ৱারেপশিং লেপ্পা লৈতনা লৌখৎলি। মহারাস্ত্রদা চাউখৎ-থৌরাংগীদমক মথৌ তাবা কেপাসিতীশিং অমসুং রিসোর্সশিং লৈ। মসিদা সমুদ্রগী কোস্তশিংসু লৈ, মসিগী কোস্তশিং অসিদগী চহি চা কয়াগী পুৱারীগী ওইবা ইন্তর্নেস্নেল ত্রেদসু লৈ। অমসুং তুংলমচৎকীদমক অচৌবা ওইথোকপা য়াবশিংসু লৈরি। মহারাস্ত্র অমসুং লৈবাক অসিনা খুদোংচাবশিং অসিগী মপুং ফানা কান্নবা ফংহন্নবা, ঙসি ভাধভন পোর্তকী উরেপ-উয়ুং তমখ্রে। পোর্ত অসিদা লুপা করোর লিশিং 76 হেন্না চাদিং তৌগনি। মসি লৈবাক অসিগী খ্বাইদগী চাউবা কন্তেনর পোর্ত ওইরগনি। মসি লৈবাক অসিগী খক্তা নত্তনা মালেমগী খ্বাইদগী অরুবা পোর্তশিংগী মনুংদা অমা ওইরগনি। ঙসি, ঐহাক্না লৈবাক অসিগী কন্তেনর পোর্ত পুম্নমক্তগী লাকপা অমসুং চৎপা অপুনবা কন্তেনরশিংগী মশিং অদুগী মতাংদা ঙাংলি। ভাধভন পোর্ত অমখক্তনা ঙসি লাকপা অমসুং চৎপা কন্তেনরশিংগী অপুনবা মশিংদগী হেন্না কন্তেনরশিং হেন্দল তৌগনি। পোর্ত অসি মহারাস্ত্র অমসুং লৈবাক অসিদা ললোন-ইতিক অমসুং ইন্দস্ত্রীগী চাউখৎ-থৌরাংগী অচৌবা মফম অমা ওইরক্লগনি হায়বসি অদোম্না খনবা য়াই। হৌজিক ফাওবদা হায়রিবা মফম অসি অরিবা মতমগী লানবনশিংগীদমক খঙনরম্মি, হৌজিক্তি হায়রিবা মফম অসি অনৌবা মতমগী পোর্তকীদমকসু খঙনরগনি। পালঘরগী মীয়াম, মহারাস্ত্রগী মীয়াম অমসুং লৈবাক অসিগী মীয়াম্বু ঐনা থাগৎচরি।

মরুপশিং,

ঐখোয়গী সরকারনা দিঘী পোর্ত ইন্দস্ত্রীএল এরিয়া শেমগৎনবা নুমিৎ 2-3গী মমাংদা অয়াবা পীখ্রে। মসিনা তাক্লিবদি মসি মহারাস্ত্রগী মীয়ামগীদমক শরুক অনি ওইরিবা নুংঙাইবা পাউনি। ইন্দস্ত্রীএল এরিয়া অসি ছত্রপতি শিবাজী মহারাজগী কোনুং রাইগাদতা শেমগৎকনি। মরম অদুনা, মসি মহারাস্ত্রগী মশক মওং অমসুং ছত্রপতি শিবাজী মহারাজকী মঙলানগী খুদম অমসু ওইগনি। দিঘী পোর্ত ইন্দস্ত্রীএল এরিয়া অসিনা তুরিজম অমসুং ইকো-রিজোর্ৎশিংসু প্রমোৎ তৌগনি।

মরুপশিং,

ঙসি, ঙামীগী ইচিল-ইনাওশিংগীদমক লুপা করোর 700 হেনবগী দিবেলপমেন্ত প্রোজেক্তশিংগী উরেপ উয়ুংসু তমখ্রে। লৈবাক অসিগী তোঙান তোঙানবা মফমশিংদা লুপা করোর 400 হেনবগী প্রোজেক্তশিংসু মফম অসিদগী হৌদোকখ্রে। মসিগী প্রোজেক্তশিং অসিগীদমক ঐহাক্না ঐহাক্কী ঙামীগী ইচিল-ইনাওশিং অমসুং পুম্নমকপু থাগৎপা ফোংদোকচরি। ভাধভন পোর্ত ওইগেরা, দিঘী পোর্ত ইন্দস্ত্রীএল এরিয়াগী চাউখৎপা ওইগেরা, নৎত্রগা ফিসরিজ স্কিম ওইগেরা, অসিগুম্বা অচৌবা থবকশিং অসি মাতা মহালক্ষ্মী দেবী, মাতা জিবদানী অমসুং ভগৱান তুঙ্গারেশ্বরগী য়াইফ-মঙ্গোলগা লোয়ননা পাংথোক্লি। ঐহাক্না মাতা মহালক্ষ্মী দেবী, মাতা জীবদানী অমসুং লোর্দ তুঙ্গরেশ্বরবু ইকায় খুম্নবা উৎচরি!

মরুপশিং,

মতম অমদা ভারত অসি মালেমগী খ্বাইদগী চাউখৎপা অমসুং খ্বাইদগী শক্তি লৈরবা লৈবাক অমা ওইনা লৌনরম্মি। ভারতকী চাউখৎপগী মরুওইবা য়ুম্ফমদি মাগী সমুদ্রগী শক্তিনি। ঐখোয়গী শক্তি অসি মহারাস্ত্রাদগী হেন্না কনানা হেন্না খঙগনি? ছত্রপতি শিবাজী মহারাজনা সমুদ্রগী ললোন-ইতিক অমসুং সমুদ্রগী শক্তিদা অনৌবা থাক অমা পীখি। মহাক্না অনৌবা পোলিসীশিং শেমখি অমসুং লৈবাক অসিগী চাউখৎপগীদমক ৱারেপ লৌখি। মতম অমদদি ঐখোয়গী পাঙ্গল অসি অদুক্কী মতিক চাউখি মদুদি দারিয়া সরং কানহোজী এংগ্রেনা ইস্ত ইন্দিয়া কম্পনী পুম্ববু মায়থিবা পীখি। অদুবু, নীংতম্বগী মতুংদা, লিগেসি অদুদা মীৎয়েং চংখিদে। ইন্দস্ত্রীএল দিবেলপমেন্ততগীনা ত্রেদ ফাওবদা, ভারত অসি শোত্থনা লৈহনখি।

অদুবু মরুপশিং,

হৌজিক ভারত অসি অনৌবা ভারত অমনি। অনৌবা ভারতনা পুৱারীদগী মহৈ তম্লি, অনৌবা ভারতনা মাগী ওইথোকপা য়াবশিং খঙলে, অনৌবা ভারতনা মাগী ইকাই খুম্নবা খঙলে, মীখা পোনবগী য়োৎলিং থদৎতুনা অনৌবা ভারতনা মেরিতাইম ইনফ্রাস্ত্রকচরদা অনৌবা মাইলস্তোনশিং শেমগৎলি।

মরুপশিং,

হৌখিবা চহি তরা অসিদা, ভারতকী সমুদ্রগী লম্বীদা চাউখৎ-থৌরাং অসি মমাংদা অমুক্তা ওইখিদ্রিবা মওংদা খোঙজেল য়াংখৎলে। ঐখোয়না পোর্তশিং অসি মোদর্নাইজ তৌরে। ঐখোয়না ঈশিংগী লম্বীশিং শেমগৎলে। ভারত্তা জহাজ শাগদবনি অমসুং ভারতমচাশিংদা থবক ফংহনগদবনি হায়না সরকারনা অকনবা ৱাফম থম্লি। মসিগী মাইকৈ অসিদা লুপা করোর লাখ কয়া থাদখ্রে। ঙসিদি ঐখোয়না মসিগী মহৈ অদুসু উবা ফংলি। হান্নগা চাংদম্নবদা পোর্ত অয়াম্বগী কেপাসিতী শরুক অনি হেনগৎখ্রে, প্রাইবেৎ ইনভেস্তমেন্তসু হেনগৎখ্রে, পোর্ত্তা চৎপা অমসুং পোর্ত্তগী হল্লকপদা জহাজশিংনা চংগদবা মতমসু হন্থখ্রে। মসিগী কান্নবা অসি কনানা ফংবগে? ঐখোয়গী ইন্দস্ত্রীশিং, ঐখোয়গী ত্রেদরশিং, মখোয়গী মমল হন্থরে। ঐখোয়গী নহারোলশিংনা মসিগী কান্নবা ফংলি, মখোয়না অনৌবা খুদোংচাবশিং ফংলি। মসিগী কান্নবা অসি সেলরশিংনা ফংলি, মখোয়গী খুদোংচাবশিং হেনগৎলক্লি।

মরুপশিং,

ঙসিদি মালেম পুম্বনা ভাধভন পোর্ত্তা মীৎয়েং থম্লি। মীতর 20 লুবা ভাধবভন পোর্তকা মান্নবা মালেমদা পোর্ত কয়া লৈতে। পোর্ত অসিদা জহাজ অমসুং কন্তেনর লিশিং কয়া লাক্কনি, লমদম অসিগী শেনমিৎলোনগী ফিভম হোংলগনি। সরকারনা ভাধভন পোর্তপু রেল অমসুং হায়ৱে কন্নেক্তিবিতীগা শম্নহল্লগনি। পোর্ত অসিনা মরম ওইদুনা মফম অসিদা অনৌবা ললোন-ইতিক কয়া অমা হৌরগনি। মফম অসিদা ৱেয়রহাউজিংগী থবকশিং খোঙজেল য়াংখৎহল্লগনি অমসুং মসিগী মফম অসি সনাগী মথক্তা তম্ফা থিনবনি, ৱেস্তর্ন দেদিকেতেদ ফ্রাইৎ কোরিদোর, দিল্লী মুম্বাই এক্সপ্রেসৱে, পুম্নমক য়াম্না নক্না লৈরি। কার্গো অসি চহি চুপ্পা মফমসিদগী লাক্কনি অমসুং চৎকনি, অমসুং মসিদগী অদোম্না খ্বাইদগী কান্নবা ফংগনি, মহারাস্ত্রগী ঐহাক্কী ইচিল-ইনাওশিংনা মসি ফংগনি, ঐহাক্কী অনৌবা মীরোলনা মসি ফংগনি।

মরুপশিং,

মহারাস্ত্রগী চাউখৎ-থৌরাং অসি ঐহাক্কী খ্বাইদগী চাউবা প্রাইওরিতিনি। ঙসিদি মহারাস্ত্রনা 'মেক ইন ইন্দিয়া'গী কান্নবা ফংলি। ঙসিদি মহারাস্ত্রনা আত্মানির্ভর ভারত অভিয়ানগী কান্নবা ফংলি। ঙসি ঐখোয়গী মহারাস্ত্রনা ভারতকী চাউখৎ থৌরাংদা অচৌবা থৌদাং অমা লৌরি। অদুবু মসি য়াম্না নুংঙাইতবা অমনি মদুদি ওপোজিসন পার্তীশিংনা মতম পুম্নমক্তা নখোয়গী চাউখৎ থৌরাংদা অমসুং অদোমগী য়াইফ-থৌরাংদা ব্রেক থম্নবা হোৎনরি। ঙসি ঐহাক্না অদোমদা মসিগী অতোপ্পা খুদম অমা পীজরি।

ইচিল-ইনাওশিং,

ঐখোয়গী লৈবাক অসিনা মালেমগা ললোন-ইতিক তৌনবা চহি কয়াগী মমাংদগী অচৌবা অমসুং মোদর্ন পোর্ত অমা মথৌ তাদুনা লাক্লি। মসিগীদমক্তা মহারাস্ত্রগী পালঘর অসি খ্বাইদগী চুনবা মফম অমনি। পোর্ত অসিনা পন্থা খুদিংগী থবক তৌবা ঙম্মি। অদুবু, প্রোজেক্ত অসি চহি 60 চুপ্না লেপহন্দুনা থমখি। মীওই খরনা মহারাস্ত্রা অমসুং লৈবাক অসিগীদমক অসিগুম্বা মরুওইবা থবক অসি হৌনবা অয়াবা পীখিদে। 2014দা, নখোয় পুম্নমক্না ঐখোয়দা দিল্লীদা থবক তৌবগী খুদোংচাবা পীখি। 2016দা ঐখোয়গী মরুপ দেবেন্দ্রজীগী সরকার লাকপা মতমদা, মহাক্না মসিদা কুপ্না থবক তৌবা হৌখি। 2020দা মফম অসিদা পোর্ত অমা শাবগী ৱারেপসু লৌখি, অদুবু মদুগী মতুংদা সরকার হোংলকখি অমসুং মফম অসিদা চহি অনি অমসুং তংখায় ফাওবা থবক অমত্তা পায়খৎখিদে। অদোম্না ঐঙোন্দা হায়বিগনু, প্রোজেক্ত অসিদগী লুপা করোর লাখ কয়াগী ইনভেস্তমেন্ত লাক্কনি হায়না পানরি। মফম অসিদা চাউরাক্না থবক্কী খুদোংচাবা লাখ 12 শেম্লগনি। মহারাস্ত্রগী চাউখৎ-থৌরাং অসিদা কনানা অয়েৎপা পীরিবগে? মহারাস্ত্রাগী চাউখৎ-থৌরাংবু থিংলিবা মীওইশিং অদু কনানো? মহারাস্ত্রগী নহারোলশিংনা থবক ফংহনবদা অয়েৎপা পীরম্বা মীওইশিং অসি কনানো? মমাংগী সরকারশিং অদুনা থবক অসিবু মাংলোমদা চংশিনবদা করিগীদমক অয়াবা পীখিদবগে? মসি মহারাস্ত্রগী মীয়াম্না কৈদৌঙৈদা কাউরোইদবনি। অচুম্বা ৱাফমদি মীওই খরনা মহারাস্ত্রবু মাংলোমদা চংশিনহনবা পামখিদে অদুগা ঐখোয়গী NDA সরকারনা, ঐখোয়গী মহায়ুতি সরকারনা, মহারাস্ত্রবু লৈবাক অসিদা মাংলোমদা পুখৎপা পাম্মি।

মরুপশিং,

সমুদ্রগা মরী লৈনবা খুদোংচাবশিংগী মতাং লাকপদা, মসিদা খ্বাইদগী মরুওইবা স্তেকহোল্দরশিং অসি ঐখোয়গী ঙামীশিংনি। ঙা ফাবা ইচিল-ইনাওশিং! অদোমগী খুঙ্গং 575, কোলিৱাদাগী ঙা ফাবা খুঙ্গং, অমসুং মহারাস্ত্রদা ঙা ফাবা মীওই লাখ 15গী মীশিংগা লোয়ননা, ঙা ফাবা সেক্তর অসি য়াম্না চাউই। ঐহাক্না পি.এম. মেতস্য সম্পাদাগী কান্নবা ফংলবশিংগসু ৱারী শানখি। ঙসি ঐখোয়না উবা ফংলি মদুদি মখোয়না কন্না হোৎনবনা মরম ওইদুনা চহি 10গী মনুংদা সেক্তর অসিগী মওং মতৌদা অহোংবা লাক্লি। লৈবাক অসিগী স্কিমশিং, সরকারগী সেবাগী ৱাখল্লোন অসিনা মরম ওইদুনা ঙামী করোর কয়াগী পুন্সিদা অহোংবা লাক্লি। নখোয়না  কন্না হোৎনবনা করি কান্নবা ফংলবগে হায়বদু খঙবদা নখোয়সু নুংঙাইগনি! ঙসিদি ভারত অসি মালেমগী অনিশুবা খ্বাইদগী চাউবা ঙা পুথোকপা লৈবাক ওইরে। 2014দা লৈবাক অসিদা ঙা তোন লাখ 80 খক্তমক পুথোকখি। ঙসিদি ভারতনা ঙা তোন লাখ 170 পুথোক্লি। মসিনা তাকপদি অদোম্না চহি 10গী মনুংদা ঙাগী পোত্থোকপু শরুক অনি হেনগৎহনখ্রে। ঙসিদি ভারতকী  শ্রিম্প এক্সপোর্তসু য়াম্না থুনা হেনগৎলক্লি। চহি 10গী মমাংদা, লৈবাক অসিদগী লুপা করোর লিশিং 20দগী হন্থনা শ্রিম্প এক্সপোর্ত তৌখি। ঙসিদি লুপা করোর লিশিং 40গী শেনফম ওইগদবা শ্রিম্প এক্সপোর্ত তৌরি। মসিনা তাক্লিবদি ঙসিদি শ্রিম্প এক্সপোর্ত অসি শরুক অনি হেনগৎলে। ঐখোয়না হৌদোকখিবা ব্লু রিভোলুসন স্কিমগী মাই পাকপা অসি মফম পুম্নমক্তা উবা ফংলি। স্কিম অসিনা অনৌবা থবক ফংবগী খুদোংচাবা লাখ কয়া ফংহল্লে। ঐখোয়গী সরকারনা লেপ্পা লৈতনা হোৎনবনা মরম ওইদুনা, ঙামী করোর কয়াগী পোত্থোক হেনগৎলক্লি, মখোয়গী পুন্সি মহিংসু ফগৎলক্লি।

মরুপশিং,

ঐখোয়গী সরকারনা ঙা পুথোকপদা নুপীশিংগী শরুক য়াবা হেনগৎহন্নবা হোৎনরি। প্রধান মন্ত্রী মতস্য সম্পাদা য়োজনাগী মখাদা নুপী লিশিং কয়াদা তেংবাং পীখ্রে। ঙা ফাবা চৎপা মীওইশিংনা মখোয়গী পুন্সিগী রিস্ক লৌনরম্মি হায়বসিসু অদোম্না খঙই। য়ুম অদুগী নুপীশিং, ইমুং মনুং পুম্নমক ৱাখল ৱানা লৈখি। অনৌবা তেক্নোলোজী অমসুং সেতলাইৎকী মতেংদগী ঐখোয়না হায়রিবা খুদোংথীবশিং অসিসু হন্থহল্লি। ঙসি হৌদোকখিবা ভেসেল কম্ম্যুনিকেসন সিস্তেম অসি ঐখোয়গী ঙামীগী ইচিল-ইনাওশিং অমসুং ইচিল-ইনাওশিংগীদমক অচৌবা খুদোংচাবা অমা ওইরগনি। সরকারনা ঙা ফাবগী জহাজশিংদা ত্রান্সপোন্দর লাখ অমা ইনস্তোল তৌগদৌরি। মসিগী মতেংগা লোয়ননা ঐখোয়গী ঙামীশিংনা মখোয়গী ইমুং-মনুংশিং, হী মপুশিং, ঙা য়োকপগী দিপার্তমেন্ত, সমুদ্রবু ঙাক-শেনবশিংগা মতম পুম্নমক্তা শম্নদুনা লৈগনি। সাইক্লোন অমা থোকপা মতমদা, সমুদ্রদা খুদোংথীবা থৌদোক অমা থোকপা মতমদা, ঐখোয়গী ঙামীশিংনা মখোয়গী পাউশিং অদু সেতেলাইতকী মতেংগা লোয়ননা কংফালদা লৈবা মরী লৈনবশিংদা মখোয়না পাউ পীবা ঙম্ম। খুদোংচাদবা মতমদা মখোয়গী পুন্সি কনবা, মখোয়দা থুনা ইহান হানবা য়ৌশিনবা অসি সরকারগী য়াম্না মরুওইবা থৌদাং অমনি।

মরুপশিং,

ঙা ফাবা ইচিল-ইনাওশিংগী হীশিং অসি শাফনা হল্লকপা ঙম্নবগীদমক ফিশিং পোর্ত 110 হেনবা অমসুং লন্দিং সেন্তরশিং শাগৎলি। কোল্দ চেন, প্রোসেসিং সিস্তেম, বোত লোন স্কিম, নৎত্রগা পি.এম. মতস্য সম্পদা য়োজনা ওইগেরা, হায়রিবা স্কিমশিং অসি ঙামী ইচিল-ইনাওশিংগী কান্ননবগীদমক্তা শেমখ্রে। ঐখোয়না সমুদ্র মপালগী খুঙ্গংশিং চাউখৎহনবদা অহেনবা মীৎয়েং চংলি। ঙামীশিং, সরকারগী ওর্গনাইজেসনশিং অমসুং কোওপরেতিব ইন্সতিত্যুসনশিংসু নখোয়গী শক্তি হেনগৎহন্নবা মপাঙ্গল কনখৎহল্লি।

মরুপশিং,

শোত্থরবশিংগীদমক থবক তৌরবসু নত্রগা লায়রবশিংদা খুদোংচাবা পীরবসু, BJP অমসুং NDA সরকারশিংনা মপুং ফানা কত্থোক্তুনা অমসুং পুকচেল শেংবা মওংদা থবক তৌরি। অদোম্না উবা ফংই, লৈবাক অসিদা চহি তরাগী খুজিং কয়াগী মমাংদগী ঙা ফারিবা অমসুং ত্রাইবেলশিংগী ফিভম করম্বা ওইরম্মি? হায়রিবা খুন্নাই অসি মমাংগী সরকারশিংগী পোলিসীশিংদা মতম পুম্নমক্তা মার্জিনদা থম্লি। লৈবাক অসিদা ত্রাইবেলশিংনা দোমিনেৎ তৌবা অসিগুম্বা অচৌবা মফম অমা লৈরি। অদুম ওইনমক, ত্রাইবেলশিংগী য়াইফনবা দিপার্তমেন্ত অমত্তা শেমখিদে। তোঙানবা ত্রাইবেল মন্ত্রালয় অমা BJP NDA সরকারনা লিংখৎখি। ঐখোয়গী সরকারনা ঙামীশিংগী য়াইফনবা তোঙানবা মন্ত্রালয় অমসু শেমখি। মতম পুম্নমক্তা য়েংহৌদবা ত্রাইবেল এরিয়াশিং অসি হৌজিক পি.এম. জনমান য়োজনাগী কান্নবা ফংলি। ঐখোয়গী ত্রাইবেল খুন্নাই, ঐখোয়গী ঙামী খুন্নাই অসিনা ঙসি ভারতকী চাউখৎ-থৌরাংদা অচৌবা থৌদাং লৌরি।

মরুপশিং,

ঙসি ঐহাক্না মহায়ুতী সরকারবু অতোপ্পা ৱাফম অমগীদমক অখন্ননা থাগৎপা ফোংদোকচরি। নুপীশিংনা লুচিংবা চাউখৎ থৌরাংগী লমদা, মহারাস্ত্রনা নুপীশিংদা শক্তি পীনবগী লমদা লৈবাক অসিদা মায়কৈ অমা উৎলি। ঙসি মহারাস্ত্রদা নুপীশিংনা অৱাংবা থাক্কী থবক কয়া পাংথোক্লি। রাজ্য অসিগী পুৱারীদা ইহান হানবা ওইনা, সুজতা সৌনিক জীনা রাজ্য অসিগী চীফ সেক্রেতরী ওইনা রাজ্যগী লৈঙাক্কী লমজিং-লমতাক্লি। অহানবা ওইনা, DGP রশ্মি শুক্লাজীনা রাজ্যগী পুলিস ফোর্সপু লুচিংলি। অহানবা ওইনা শোমিতা বিস্বাসজীনা রাজ্য অসিগী ফোরেস্ত ফোর্সকী হেদ ওইনা লুচিংলি। অহানবা ওইনা, শ্রীমতী. সুবর্ন কেৱলেজীনা রাজ্য অসিগী লো দিপার্তমেন্তকী হেদ ওইনা অচৌবা থৌদাং অমা লৌরি। মসিগা মান্ননা, জয়া ভগৎজীনা রাজ্য অসিগী প্রিন্সিপাল একাউন্তেন্ত জেনরেল ওইনা থৌদাং লৌখ্রে। অমসুং মুম্বাইদা লৈবা কস্তম দিপার্তমেন্তকী লুচিংবা অসি প্রচি স্বারোপজীগী খুৎতা লৈ। মুম্বাইগী অচৌবা অমসুং অন্দরগ্রাউন্দ মেত্রো-3 অসি মুম্বাই মেত্রোগী MD অশ্বিনী ভীদেজীনা লুচিংলি। মহারাস্ত্রদা নুপীশিংনা হায়র এজুকেসনগী লমদসু মাংজিল থানা চংশিল্লি। মহারাস্ত্র হেল্থ য়ুনিভর্সিতীগী ভাইস চাঞ্চেলর ওইনা লেফতেনেন্ত জেনরেল দোক্তর মাধুরী কানিৎকরনা লুচিংলি। দোক্তর অপোরবা পালকরনা মহারাস্ত্র স্কিল্স য়ুনিভর্সিতীগী অহানবা ভাইস চাঞ্চেলর ওইনা অনৌবা থৌরাংশিং লৌখৎলি। মহারাস্ত্রদা নুপীশিংনা মখোয়গী খ্বাইদগী ফবা তৌবা ঙম্বগী মতুং ইন্না পাংথোক্লিবা অসিগুম্বা অচৌবা অমসুং থৌদাং লৈবা ফম কয়া অমা লৈরি। মখোয়গী মাইপাকপা অসিনা 21শুবা চহিচাগী নুপীগী শক্তিনা খুন্নাই অসিদা অনৌবা মায়কৈ অমা পীনবা শেম-শারি। নুপীগী শক্তি অসি চাউখৎলবা ভারতকী অচৌবা য়ুম্ফম অমনি।

মরুপশিং,

‘সবকা সাথ, সবকা বিকাস, সবকা বিশ্বাস অমসুং সবকা প্রয়াস' অসি NDA সরকারগী মন্ত্রনি। অদোমগী মতেংগা লোয়ননা ঐখোয়না মহারাস্ত্রবু চাউখৎপগী অনৌবা অৱাংবা থাক্তা পুখৎকনি হায়না ঐনা থাজবা থম্লি। মহায়ুতী সরকারদা অদোমগী য়াইফ-মঙ্গোল মখা তানা পীবিয়ু। ঐহাক্না অমুক্কা হন্না অদোমদা য়াইফ-মঙ্গোল পীজরি অমসুং লৈবাক অসিগী খ্বাইদগী চাউবা পোর্ত অমসুং মশিং য়াম্লবা ঙামীশিংগীদমক স্কিমশিং অসিগীদমক অদোমবু থাগৎপা ফোংদোকচরি।

ঐহাক্কা  লোয়ননা হায়বীয়ু–

ভারত ইমানা য়াইফরে,

খুৎ অনিমক থাংগৎতুনা হৌনা হায়বীয়ু-

ভারত ইমানা য়াইফরে,

ঙসি সমুদ্রগী ঈচেল খুদিংমকসু অদোমগা লোয়ননা ঈশৈ শক্লি -

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

হন্না-হন্না থাগৎচরি!

***