Ka phlim CROSSING jong u nongshna phlim na Sweden, Levan Akin ka la jop ia ka ICFT - UNESCO Gandhi Medal ha ka bynta kaba 55 jong ka International Film Festival of India (IFFI), Goa. Kane ka khusnam ka ai jingithuh ia ka phlim kaba pyni ia ki jingngeit ha ka jingshongsuk shongsain, ka jinglait na ka jingiaumsnam bad ka jingkyntiew ia ki hok jong ki briew bad la jied ia ka CROSSING namar ka jingpyni ia kine. Kiba jop ia kane ka khusnam ki ioh ia ka takma UNESCO Gandhi Medal bad ka syrnot.

Ka kynhun ki nongbishar ka la iaroh ia ka Crossing namar ki bynta kiba itynnad ha ka jingshna phlim bad ka jingktik ia ki jingmut jingpyrkhat shaphang ka jingrynih kyrdan hapdeng ki shynrang bad kynthei bad ka jingsngewthuh ha ka imlang sahlang. “Ka phlim kaba itynnad bha shaphang ka jingieid bad ka jingsngewthuh,” la ong ka kynhun nongbishar ha ka jingthoh.

Ia kane ka khusnam la wanrah lyngba ka jingiatreilang bad ka International Council for Film, Television, and Audiovisual Communication (ICFT) bad UNESCO, bad ka ai jingithuh ia ki phlim kiba pyni ia ka jingiaishah ia kiwei, ka jingiakren hapdeng ki deiriti bapher bapher bad ka jingngeit ha ka shongsuk shongsain.

Ka Crossing ka dei ka khana jong ka longkmie ba la noh ka rta kaba leit jingleit bad u khynnah samla na Georgia sha Istanbul ban wad ia ka pyrsa jong ka, kaba la jah la bun snem. Ha ka jingbat ia ka jingkular, kane ka longkmie, ia kaba la ak da ka Mzia Arabuli, ka lap ia ki jingiadei bad ka jingryntih kyrdan hapdeng ki shynrang bad kynthei. Kane ka phlim ka pyni ia ka khana jong ka jingieid, ka jingsngewthuh bad ki jingiadei kiba ym khein ia ki pateng, ha kaba ka don ka jingbatai kaba sngewsih shaphang ka imlang sahlang bad ka deiriti.

Mynta u snem, la jied shiphew tylli ki phlim ban iakhun ban ioh ia kane ka khusnam, bad kine ki dei kiba mihkhmat na ki thain, ki deiriti bad ki jait phlim bapher bapher hynrei kiba iasyriem namar ka jingbat ia ki jinghikai jong u Gandhi. Peit ia ki phlim ba shah jied hangne:

Ka kynhun nongbishar ia ka Gandhi Medal ha ka IFFI ka kynthup ia kine ki dkhot:

• Isabelle Danel, Honorary President ka FIPRESCI- International Federation of Film Critics,
• Serge Michel, Vice President ka CICT-ICFT,
• Maria Cristina Iglesias, longkhlieh ba rim jong ka Cultural Sector Programme jong ka UNESCO,
• Dr. Ahmed Bedjaoui, Artistic Director jong ka Algiers International Film Festival,
• Xueyuan Hun, Director jong ka Platform for Creativity and Innovation, CICT-ICFT youth branch.

Phi lah ban sngap ia ki jingiakren jong ki dkhot kane ka kynhun nongbishar bad ki lad pathai khubor ha ka PIB Press Conference hangne.

Shaphang ka ICFT UNESCO Gandhi Medal

La sdang ia kane ka khusnam ha ka bynta kaba 46 jong ka IFFI, bad ka ICFT-UNESCO Gandhi Medal ka ai jingithuh ia ki phlim kiba la shna ha ka rukom kaba itynnad bad kiba kyntiew ia ka jingpeit ia ki jingeh kiba heh tam ha ka imlang sahlang. La sdang ia kane ka khusnam ban wanrah ia ka jingsngewthuh kaba kham jylliew ia ki jingngeit tynrai jong ki briew lyngba ka bor jong ka kam shna phlim ban wanrah jingkylla.

Ka ICFT UNESCO Gandhi Medal kam dei tang ka khusnam, ka dei ka jingrakhe ia ka bor ban ai mynsiem, ai jinghikai bad wanrah ia ka jingiatylli.

Kumba ju ong, ka IFFI ka lah ban sangeh tangba kam ju kut! Katba kane ka tamasa ka la sangeh hadien ki khyndai sngi jong ka jingpyni ia ka jingtbit ha ki kam shna phlim, hato peit ia ki khana shaphang ka IFFI, ki jingiakren bad ki nongshna phlim bad ki bynta bapher bapher jong ka IFFI, Goa da kaba leit ha kane ka link (https://pib.gov.in/iffi/55/

* * *