#IFFIWood, 27 नोव्‍हेंबर 2024

सिनेमाच्या आनंदाची परब मनोवपी आनी फुडाराक पोसवण दिवपी, मोहक प्रवासाचो पडदो देवोवन, 55व्या भारतीय आंतरराष्ट्रीय चित्रपट महोत्सवाचो (इफ्फी) 28 नोव्हेंबर 2024 दिसा डॉ. श्यामा प्रसाद मुखर्जी इनडोर स्टेडियमात एका भव्य अश्या सुवाळ्यान समारोप जातलो.  

कथा सांगपाची कला आनी जागतीक सिनेमाच्या भावनांचो उत्सव मनयल्ल्या, णव दिसांच्या सिनेमाच्या तेजस्वीपणाची ह्या भव्य कार्यावळीन समारोप जातलो. 75 देशांतले 200 वयर चित्रपट, उद्देगीक दिग्गजांचे मास्टरक्लास आनी प्रेरणादायक पॅनल चर्चा हांचो आस्पाव आशिल्ल्या ह्या वर्साच्या इफ्फीन सिनेमाची एकवटीत करपी शक्त दाखयल्या.

कार्यावळीचे मुखेलपण

भारतीय सिनेमाचो एक उत्सव

समारोप सुवाळ्यांत भारताच्या सिनेमाच्या दृश्टीकोनाची जीवंतताय आनी विविधताय हांचो आस्पाव जातलो. राष्ट्रीय आनी आंतरराष्ट्रीय माचयेचेर भारतीय चित्रपटांच्या कलाकुसर, सृजनशीलतेक आनी सांस्कृतीक परिणामाक मान दिवन, महोत्सवाचे उत्तम खीण एकठांय विणटले. मर्यादा हुंपून संस्कृतायेक एकठांय हाडपी माध्यम म्हणून, सिनेमाचें सार ह्या सुवाळ्यांत दिसतलें.

ह्या सुवाळ्यांत साबार चित्रपट व्यक्तीं वाटेकार आसतलो आनी ते ह्या प्रसंगाची सोबीतकाय वाडयतले. ह्या स्टॅलर लायनअपांत फिल्म निर्माते सुकुमार, दिल राजू, आनंद तिवारी, अमृतपाल सिंग बिद्रा ऑस्ट्रेलियन निर्मातो स्टीफन वूली हांचो आस्पाव आसा.

तशेंच नामनेचे कलाकार अल्लू अर्जुन, रश्मिका मंदना, जय प्रदा, श्रीया सरन, प्रतीक गांधी, समीर कोचर, श्रेया चौधरी, ऋत्विक भौमिक, आनी नवीन कोहली, तशेंच नामनेचे संगीतकार अमल मल्लिक आनी मामे खान हाजीर आसतले. सिनेमाच्या दिग्गजांची ही चकचकीत मेळावळ ही भारतीय आनी आंतरराष्ट्रीय चित्रपट प्रतिभेंतल्या उत्कृश्ट लोकांक एकठांय हाडपाची, महोत्सवाची तांक आसा हाची पुष्टी दिता.

तशेंच ह्या सांजवेळार नामनेचे कलाकार कला, संगीत, नाच, आनी सिनेमाच्या आकर्शणाचो मेळ घालतले. ह्या सुवाळ्यांत स्टेबिन बेन, भूमि त्रिवेदी, आनी अमल मलिक आनी अभिनेत्री श्रीया सरन, नामनेच्या गायकांचे संगीत आनी नाचाचे सादरीकरण, निकिता गांधी आनी दिग्विजय सिंग परियार हांणी संगीत कथा, जे उर्बेभरीत सादरीकरणांनी प्रेक्षकांक मोहित करतले.

सिनेमांतल्या उत्कृश्टतायेचो भोवमान

ह्या सांजवेळार प्रतिश्ठीत पुरस्कार भेटोवन चित्रपट निर्मितींतल्या बेसबऱ्या कामगिरीची परब मनयतले.

उत्कृश्ट सिनेमा वावराक मान दिवन, महोत्सवाचो बेस्ट फिचर फिल्म,  इफ्फीचो सगळ्यांत प्रतिश्ठीत पुरस्कार, भांगराळो मोर घरा व्हरतलो आनी दिग्दर्शक-निर्मातो जोडयेच्या जिखपी पंगडाक, भांगराळो मोर ट्रॉफी, प्रमाणपत्र आनी रोख पयशे इनाम मेळटले.

तशेंच ह्या सुवाळ्यांत उत्कृश्ट दिग्दर्शक, उत्कृश्ट अभिनेतो (दादले आनी बायल) आनी दिग्दर्शकाचो उत्कृश्ट पदार्पण फिचर फिल्म हांका रुप्या मोर पुरस्कार दितले आनी विजेत्यांक रुप्या मोर ट्रॉफी, प्रमाणपत्र आनी रोख इनामां मेळटलीं. ह्या भायर चित्रपट निर्मितीच्या खंयच्याय आंगांतल्या उत्कृश्टतायेचो भोवमान करपी खाशेलो जूरी पुरस्कार रुप्या मोर ट्रॉफी, प्रमाणपत्र आनी रोख इनामूय दितले.

भारतीय पदार्पणाच्या चित्रपटांचेर भर दिवपा खातीर अंदूं सुरू केल्लो भारतीय फिचर फिल्माच्या उत्कृश्ट पदार्पण दिग्दर्शकाचो पुरस्कार, ह्या सुवाळ्यांत उदयाक येवपी चित्रपट निर्मात्याची सृजनशीलताय आनी तांक मनयतलो.

आंतरराष्ट्रीय चित्रपट, दूरचित्रवाणी आनी ऑडिओ व्हिज्युअल कम्युनिकेशन मंडळाच्या (आयसीएफटी) सहकार्यान सहिश्णुताय, आंतरसंस्कृतीक संवाद आनी शांतताय हांचे आदर्श प्रतिबिंबीत करपी चित्रपटांक मान दिवपी, आयसीएफटी-युनेस्को गांधी पदक पुरस्कारात गांधी पदक आनी प्रमाणपत्र दिवन सुवाळ्यांत भौमानीत करतले.

ऑस्ट्रेलियांतले नामनेचे चित्रपट निर्माते फिलीप नॉयस हांका सत्यजीत रे जीणेगौरव पुरस्कार भेटयतले, तातूंत ताच्या तेजस्वी आनी विस्तारीत सिनेमा प्रवासाक मान म्हणून रुप्या मोर पदक, प्रमाणपत्र, शाल, मानचिन्ह आनी रोख इनाम भेटयतलें.

भारतीय सिनेमांतल्या योगदाना खातीर खाशेली मान्यताय पुरस्कार अभिनेतो अल्लू अर्जुनाक, भारतीय सिनेमांतल्या योगदाना खातीर दितले. ताच्या ब्लॉकबस्टर फिल्म पुष्पा 2 हांकां खाशेली मान्यताय मेळ्ळ्या. तशेंच ह्या कार्यावळींत बेस्ट वेब सिरिज (ओटीटी) पुरस्कार लेगीत दितले.

तशेंच समारोप सुवाळ्यांत नामनेचे भारतीय दिग्दर्शक रमेश सिप्पी, अभिनेतो-निर्मातो निविन पॉली आनी अभिनेतो प्रतीक गांधी ह्या उद्देगीक दिग्गजांकडेन काळजा थावन विचार आनी संवाद सादतले.

राष्ट्राच्या गिरेस्त नाचाच्या दायजाची परब मनवपी "रिदम्स ऑफ इंडिया" हें मंत्रमुग्ध करपी सादरीकरण ह्या सांजवेळाचें केंद्रबिंदू आसतलें. कथक (उत्तर भारत), मोहिनियाट्टम आनी कथकली (दक्षिण भारत), मणिपुरी आनी पुंग चोलम ड्रमर्स (उदेंत भारत) आनी गरबा (अस्तंत भारत) ह्या सारक्या शास्त्रीय नाचाच्या प्रकारांतल्यान प्रेक्षकांक भारतभर एक उस्वास घेवपा सारको प्रवास करतलो.

डायनॅमिक एलईडी व्हिज्युअल्स, कोलम्स सारके पारंपारीक मोटिफ, आनी प्रतिकात्मक संगीत अणभव आनीक समृध्द करतले. भारताच्या विविधतायेंतल्या एकचाराचेर भर दिवपी "देस मेरा रंगीला" ह्या गीतान भव्य समारोप जातलो.

अंदूंचो इफ्फी सिनेमांतल्या विविधतायेचो आनी नवनिर्माणाचो उत्सव जाला. तातूंत प्रकार, भास आनी संस्कृताय हांचो आस्पाव आशिल्ल्या चित्रपटांची विविधताय आशिल्ली निवड, नामनेच्या चित्रपट निर्मात्यांनी मास्टरक्लास, चित्रपट निर्मितीच्या कला आनी क्राफ्टाचेर खाशेली  नदर आनी फुडारा विशीं आकर्शक पॅनल चर्चा सिनेमा आनी संवसारीक संस्कृतीक आदान-प्रदान वाडोवपाक ताची भुमिका महत्वाची थाऱली.

फुडल्या वर्सा आनीकय अदभूत आवृत्ती घेवन परत येवपाचें उतर दिवन, हो सुवाळो सोंपतलो आनी प्रेक्षकांक सिनेमाच्या जादूची सदाच याद उरतली.

* * *

PIB IFFI CAST AND CREW | Subhash/Manali/Darshana | IFFI 55