0 7

ಶ್ರೀಮಂತ ಮಿಲಿಟರಿ ಪರಂಪರೆಗೆ ಹೆಸರುವಾಸಿಯಾದ ಪುಣೆ, 2025ರ ಜನವರಿ 15 ರಂದು ಮೊದಲ ಬಾರಿಗೆ ಪ್ರತಿಷ್ಠಿತ ಸೇನಾ ದಿನದ ಪೆರೇಡ್ ಅನ್ನು ಆಯೋಜಿಸಲು ಸಜ್ಜಾಗಿದೆ, ಇದು ಐತಿಹಾಸಿಕ ಮೈಲಿಗಲ್ಲನ್ನು ಸೂಚಿಸುತ್ತದೆ. ಗೋವಾದಲ್ಲಿ ನಡೆದ ಅಂತರರಾಷ್ಟ್ರೀಯ ಚಲನಚಿತ್ರೋತ್ಸವದ (ಐಎಫ್ಎಫ್ಐ) ಸಂದರ್ಭದಲ್ಲಿ ಭಾರತೀಯ ಸೇನೆಯು ಮುಂಬರುವ ಪರೇಡ್ (ಕವಾಯತು) ಪ್ರಚಾರ ವೀಡಿಯೊವನ್ನು ಅನಾವರಣಗೊಳಿಸಿತು, ಇದು ಸಿನಿಪ್ರಿಯರು, ಅಂತರರಾಷ್ಟ್ರೀಯ ಪ್ರತಿನಿಧಿಗಳು ಮತ್ತು ಉದ್ಯಮದ ಮುಖಂಡರಿಂದ ಉತ್ಸಾಹಭರಿತ ಪ್ರತಿಕ್ರಿಯೆಯನ್ನು ಪಡೆಯಿತು.

ಫೀಲ್ಡ್ ಮಾರ್ಷಲ್ ಕೆ.ಎಂ.ಕಾರ್ಯಪ್ಪ ಅವರು 1949ರಲ್ಲಿ ಭಾರತೀಯ ಸೇನೆಯ ಮೊದಲ ಭಾರತೀಯ ಕಮಾಂಡರ್-ಇನ್-ಚೀಫ್ ಆಗಿ ನೇಮಕಗೊಂಡ ನೆನಪಿಗಾಗಿ ಸೇನಾ ದಿನದ ಪರೇಡ್ ನಡೆಸಲಾಗುತ್ತದೆ. ಸಾಂಪ್ರದಾಯಿಕವಾಗಿ ದಿಲ್ಲಿಯಲ್ಲಿ  ನಡೆಯುವ ಈ ಪರೇಡ್  2023 ರಲ್ಲಿ ಬೆಂಗಳೂರಿನಿಂದ ಪ್ರಾರಂಭವಾಗಿ ವಿವಿಧ ನಗರಗಳಲ್ಲಿ ಆವರ್ತನದಂತೆ ಆಯೋಜಿಸಲಾಗುತ್ತಿದೆ. 2024ರಲ್ಲಿ ಲಕ್ನೋದಲ್ಲಿ ಪರೇಡ್ ನಡೆಯಿತು. 2025ರ ಪೆರೇಡ್ ಗೆ  ಪುಣೆಯನ್ನು  ಆಯ್ಕೆ ಮಾಡಿರುವುದು  ಸಶಸ್ತ್ರ ಪಡೆಗಳೊಂದಿಗೆ ನಗರದ  ಐತಿಹಾಸಿಕ ಸಂಬಂಧಗಳನ್ನು ಮತ್ತು ಭಾರತೀಯ ಸೇನೆಯ ದಕ್ಷಿಣ ಕಮಾಂಡಿನ ಪ್ರಧಾನ ಕಚೇರಿಯಾಗಿ ಅದರ ಪಾತ್ರವನ್ನು ಎತ್ತಿ ತೋರಿಸುತ್ತದೆ.

ಈ ವರ್ಷದ ಪರೇಡ್ ಬಾಂಬೆ ಎಂಜಿನಿಯರಿಂಗ್ ಗ್ರೂಪ್ ಮತ್ತು ಸೆಂಟರ್ನಲ್ಲಿ ನಡೆಯಲಿದ್ದು, ಪರೇಡ್ ತುಕಡಿಗಳು, ಯಾಂತ್ರೀಕೃತ ಮತ್ತು ತಾಂತ್ರಿಕ ಪ್ರದರ್ಶನಗಳನ್ನು ಒಳಗೊಂಡಿದೆ. ಡ್ರೋನ್ಗಳು ಮತ್ತು ರೊಬೊಟಿಕ್ಸ್ನಂತಹ ಅತ್ಯಾಧುನಿಕ ರಕ್ಷಣಾ ತಂತ್ರಜ್ಞಾನಗಳ ಪ್ರದರ್ಶನಗಳು, ಜೊತೆಗೆ ಯುದ್ಧ ಪ್ರದರ್ಶನಗಳು ಮತ್ತು ಸಮರ ಕಲೆಗಳ ಪ್ರದರ್ಶನಗಳಂತಹ ಆಕರ್ಷಕ ಪ್ರದರ್ಶನಗಳು  ಇದರಲ್ಲಿರುತ್ತವೆ.

ಪರೇಡ್  ಮುಂಚಿತವಾಗಿ, ಜನವರಿ ಆರಂಭದಲ್ಲಿ ಪುಣೆಯಲ್ಲಿ ನಿಗದಿಯಾಗಿರುವ "ನೋ ಯುವರ್ ಆರ್ಮಿ" (ನಿಮ್ಮ ಸೇನೆಯ ಬಗ್ಗೆ ತಿಳಿಯಿರಿ) ಪ್ರದರ್ಶನದಂತಹ ಕಾರ್ಯಕ್ರಮಗಳು ನಿವಾಸಿಗಳಿಗೆ ಸುಧಾರಿತ ಶಸ್ತ್ರಾಸ್ತ್ರಗಳನ್ನು ಅನ್ವೇಷಿಸಲು ಮತ್ತು ರಾಷ್ಟ್ರವನ್ನು ರಕ್ಷಿಸುವ ಸೈನಿಕರೊಂದಿಗೆ ಸಂವಹನ ನಡೆಸಲು ಅನುವು ಮಾಡಿಕೊಡುತ್ತದೆ. ಇಂತಹ ಉಪಕ್ರಮಗಳು ಒಳಗೊಳ್ಳುವಿಕೆ ಮತ್ತು ಏಕತೆಗೆ ಒತ್ತು ನೀಡುತ್ತವೆ, ಸೇನಾ ದಿನದ ಪರೇಡನ್ನು ಕೇವಲ ಔಪಚಾರಿಕ ಸಂದರ್ಭವನ್ನಾಗಿಸದೆ, ಧೈರ್ಯ, ಸಮರ್ಪಣೆ ಮತ್ತು ತಾಂತ್ರಿಕ ಪ್ರಗತಿಯ ರಾಷ್ಟ್ರೀಯ ಆಚರಣೆಯನ್ನಾಗಿ ಮಾಡುತ್ತವೆ.

ಭಾರತೀಯ ಸೇನೆಯು ವಿವಿಧ ನಗರಗಳಲ್ಲಿ ಸೇನಾ ದಿನದ ಪರೇಡನ್ನು ಆವರ್ತನ ರೀತಿಯಲ್ಲಿ ನಡೆಸುವ ಮೂಲಕ ರಾಷ್ಟ್ರವ್ಯಾಪಿ ನಾಗರಿಕರೊಂದಿಗೆ ಬಲವಾದ ಸಂಪರ್ಕವನ್ನು ಸ್ಥಾಪಿಸುತ್ತದೆ. ಈ ಉಪಕ್ರಮವು ಆಚರಣೆಯನ್ನು ವಿಕೇಂದ್ರೀಕರಿಸುತ್ತದೆ, ಸ್ಥಳೀಯ ಸಮುದಾಯಗಳಿಗೆ ಸಶಸ್ತ್ರ ಪಡೆಗಳೊಂದಿಗೆ ನೇರವಾಗಿ ತೊಡಗಿಸಿಕೊಳ್ಳಲು ಅವಕಾಶಗಳನ್ನು ಒದಗಿಸುತ್ತದೆ.

*****