#IFFIWood, 24 नोव्‍हेंबर 2024

 

गिरेस्त लश्करी दायजाखातीर नामना मेळिल्लें पुणे शार, पयलेच खेपे 15 जानेवारी 2025 दिसा प्रतिश्ठीत लश्कर दिसाची परेड घडोवन हाडपाचे आसा आनी हो इतिहासीक खिण थारतलो. गोंयांत जावपी भारतीय आंतरराष्ट्रीय फिल्म महोत्सवांत भारतीय सैन्यान, ह्या परेडीचो प्रचार व्हिडियो प्रकाशित केलो आनी ताका सिनेमा मोगी, आंतरराष्ट्रीय प्रतिनिधी आनी उद्देग फुडाऱ्यांचो उमेदीचो प्रतिसाद मेळ्ळो.

लश्कर दीस परेडीत फिल्ड मार्शल के. एम. कारियाप्पा हांची 1949 वर्सा भारतीय सैन्याचे पयले कमांडर इन चीफ म्हूण नेमणूक जाल्ली तेन्नाची याद जाता. भारताच्या स्वातंत्र्या उपरांतच्या लश्करी फुडारपणाचे हे प्रतीक आसा. परंपरेन दिल्लींत जावपी ही परेड 2023 वर्सा वेगवेगळ्या शारांनी जावपाक लागली. पयली बेंगळुरू सावन सुरू जाली, उपरांत 2024 वर्सा लखनौत जाली. 2025 वर्साच्या परेड खातीर पुणेची निवड ही सशस्त्र दळांकडेन शाराचे इतिहासीक संबंद आनी भारतीय लश्कराच्या दक्षिण कमांडाचे मुखेल कार्यालय म्हणून ताची भुमिका उजवाडाक हाडटा.  

अंदूंची परेड बॉम्बे इंजिनियरिंग ग्रुप अँड सेंटरात जातली, तातूंत मार्चिंग कॉंन्टिनजन्ट्स, यंत्रीक कॉलम आनी तंत्रीक प्रदर्शनां आसतलीं. ड्रोन आनी रोबोटिक्स अशा अत्याधुनीक संरक्षण तंत्रगिन्यानाचे प्रदर्शन, तशेंच झुजारी प्रदर्शन आनी मार्शल आर्ट प्रदर्शन सारकिले मनभुलोवपी सादरीकरण, हांचो आस्पाव मुखेल विशयांत आसतलो.

परेडीच्या आदीं पुण्यांत जानेवारीचे सुरवेक जावपा आशिल्लें “नो युअर आर्मी” प्रदर्शना सारकिल्या कार्यावळींनी रहिवाशांक, प्रगत शस्त्रांचो सोद घेवंक मेळटलो आनी राष्ट्राची राखण करपी सैनिकांकडेन संवाद सादपाक मेळटलो. अशे उपक्रम समावेशकताय आनी एकचाराचेर भर दितात, जाका लागून लश्कर दिसाची परेड फकत विधीपुर्वक प्रसंग न्हय तर धैर्य, समर्पण आनी तंत्रीक प्रगतीचो राष्ट्रीय उत्सव जाता.

भारतीय लश्कर वेगवेगळ्या शारांनी लश्कर दिसाची परेड दवरून, देशभरांतल्या नागरिकांकडेन संबंद घटमुट करता. हो उपक्रम उत्सव विकेंद्रीत करता आनी थळाव्या समाजांक सशस्त्र दळांकडेन थेट संबंदीत जावपाची संद दिता.

 

* * *

PIB IFFI CAST AND CREW | Subhash/Manali/Darshana | IFFI 55

(Release ID: 2076670) Visitor Counter : 8