0 6

نامور اداکار اور ہدایت کار راج کپور کی صد سالہ تقریبات کے ضمن میں ، 55 ویں انٹرنیشنل فلم فیسٹیول آف انڈیا (آئی ایف ایف آئی) نے ایک خصوصی نشست کااہتمام کرکے لیجنڈ اداکار کو خراج تحسین پیش کیا ۔ سیشن میں لیجنڈری اداکار راج کپور کے پوتے رنبیر کپور اور تجربہ کار فلمساز راہل راویل نے بھی شرکت کی ۔ یہ سیشن ہندوستانی سنیما میں راج کپور کی عظیم شراکت ، ان کے دیرپا اثر اور ان کے کاموں کی پائیدار میراث کے لیے وقف تھا ۔

رنبیر کپور نے اپنے دادا کے غیرمعمولی اثر و رسوخ پر بات کرتے ہوئے کہا کہ راج کپور کی فلمیں وقت اور حدود سے بالاتر ہیں ۔ انہوں نے اس پہلو پر بات کرتے ہوئے کہا کہ کس طرح ان کے دادا کی فلمیں جیسے آوارہ ، میرا نام جوکر اور شری 420  کو عالمگیر کشش حاصل ہوئی تھی ، جو روس سے لے کر ہندوستان تک دنیا بھر کے سامعین کے ذریعے پسند کی گئی تھیں۔

راج کپور کی فلموں کی معنویت  پر بحث کرتے ہوئے ، رنبیر کپور نے اس بات کی نشاندہی کی کہ کس طرح آوارہ کا تھیم ذات پرستی کے مسئلے کا حل تلاش کرتا ہے  جبکہ شری 420 فلم لالچ اور آرزو پر مبنی ہے ۔ بعد کی فلموں جیسے پریم روگ اور رام تیری گنگا میلی کو خواتین کے مسائل اور سماجی چیلنجوں کے ساتھ اخلاقی فلم بندی کے لیے سراہا گیا ، جن سے راج کپور کے اپنے دور سے آگے کے فلم ساز کے نقطہ نظر کی نشاندہی ہوتی ہے ۔

رنبیر کپور نے نیشنل فلم ڈیولپمنٹ کارپوریشن (این ایف ڈی سی) نیشنل فلم آرکائیوز آف انڈیا (این ایف اے آئی) اور فلم ہیریٹیج فاؤنڈیشن کے تعاون سے راج کپور کی فلموں کے تحفظ کے لیے جاری کوششوں پر بھی تبادلہ خیال کیا ۔ انہوں نے بتایا کہ راج کپور کی دس فلمیں پہلے ہی بحال کی جاچکی ہیں ، ان کو دسمبر 2024 میں پورے ہندوستان میں ریلیز کرنے کا منصوبہ ہے ۔ انہوں نے ہندوستانی سنیما کی بنیاد کی حیثیت سے راج کپور کی  شراکتوں کے اعتراف میں ان کی سنیمائی ذہن کو محفوظ رکھنے اور اس کا جشن منانے کی اہمیت پر زور دیا ۔

اجلاس میں فلم سازی ، اداکاری اور سماجی مسائل کو حل کرنے میں سنیما کے ابھرتے ہوئے کردار پر بھی تبادلہ خیال کیا گیا ۔ انہوں نے یہ بتایا کہ باپ بننے کے بعد ماحولیاتی اور سماجی تبدیلی کے بارے میں ان کی آگاہی میں کیسے  اضافہ ہوا ہے ، رنبیر نے فنکاروں پر زور دیا کہ وہ اپنے پلیٹ فارم کو آگہی پھیلانے اور عالمی مسائل کی حمایت کے لیے استعمال کریں ۔ اداکاری میں انفرادیت کی اہمیت کا ذکر کرتے ہوئے انہوں نے آرزو مند اداکاروں کی اس بات پر حوصلہ افزائی کی کہ وہ دنیا بھر کے عظیم فنکاروں سے ترغیب  لے کر اپنا منفرد انداز تلاش کریں ۔

سیشن  کا اختتام کرتے ہوئے رنبیر کپور نے اپنے دادا کو خراج تحسین پیش کرنے پر آئی ایف ایف آئی کا شکریہ ادا کیا اور سامعین سے راج کپور کے لازوال کاموں کو دوبارہ دیکھنے اور ان کی قدر کرنے کی اپیل کی ۔ رنبیر کپور کے وژن کی تائید کرتے ہوئے راہل راویل نے فلم انڈسٹری کے ساتھ ساتھ وسیع  معاشرے پر راج کپور کے دیرپا اثرات کے بارے میں بھی بات چیت کی ۔

اس سیشن میں وزارت اطلاعات و نشریات کے سکریٹری سنجے جاجو ، ہندوستانی فلم پروڈیوسر اور آئی ایف ایف آئی فیسٹیول کے ڈائریکٹر شیکھر کپور ، وزارت اطلاعات و نشریات کے جوائنٹ سکریٹری اور این ایف ڈی سی کے منیجنگ ڈائریکٹر پریتھول کمار اور وزارت اطلاعات و نشریات کی جوائنٹ سکریٹری (فلم) ورندا دیسائی نے بھی شرکت کی ۔

****

ش ح ۔ م ش ع۔  ع ن

U. No. 2884