म्हायती आनी वितरावणी मंत्रालय
गोंयांत इफ्फीत राज कपूर हांच्या शताब्दी निमतान रणबीर कपूर हांचेवांगडा खाशेले सत्र
“राज कपूर हांचे सिनेमा फकत मनरिजवणेखातीर नाशिल्ले; तांचे सिनेमे म्हत्वाची काणी सांगताले; काणयो ज्यो प्रेक्षकांवांगडा संवाद साधताल्यो: रणबीर कपूर
‘मेरा नाम जोकर’ सारकिले आडमेळे सिनेमे आसून लेगीत म्हजो आजो प्रेक्षकां कडेन जोडून रावलो आनी तांणी धाडसी जोखीम आपणायली”: रणबीर
कलाकार म्हूण आमी आमच्या माचयेचो वापर, हवामान बदल सारकेल्या जागतीक प्रस्नांक तोंड दिवपाक करपाक जाय आनी आमच्या वावरांतल्यान जागृताय पातळावंक जाय: रणबीर
राज कपूर हांचेकडेन दूरदृष्टी आशिल्ली; पिळग्यो आनी संस्कृतायेवरवीं प्रेक्षकांकडेन जोडपाची ताची तांक अतुलनीय आसा: राहुल रवैल, नामनेचे फिल्म निर्माते
#IFFIWood, 24 नोव्हेंबर 2024
नामनेचे अभिनेते आनी दिग्दर्शक राज कपूर हांच्या शताब्दी उत्सवाचो एक भाग म्हूण 55व्या भारतीय आंतरराष्ट्रीय चित्रपट महोत्सवांत, राज कपूर हांचो नातू रणबीर कपूर आनी म्हालगडे चित्रपट निर्माते राहुल रवैल हांणी खाशेल्या सत्रांत उलोवप करून तांका श्रद्धांजली ओपली. भारतीय सिनेमांत राज कपूर हांचें अतुलनीय योगदान, ताचो टिकपी परिणाम आनी कृतींचे दायज, हांचे मनभुलोवपी विचार ह्या सत्रांत मांडले.
आपल्या आजोबाच्या असामान्य प्रभावाचेर चिंतन करतना, रणबीर कपूरान राज कपूर हांचे चित्रपट काळ आनी शिमो हुंपतात, अशें रेखांकित केलें. आवारा, मेरा नाम जोकर, श्री 420 ह्या आपल्या आजोबाच्या फिल्माक कशें सार्वत्रिक आकर्शण मेळ्ळें आनी रशिये सावन भारत मेरेन संवसारभरांतल्या प्रेक्षकांमदीं खोलायेन प्रतिध्वनीत जाल्लें, हाचेर ताणें भर दिलो.
राज कपूर हांच्या चित्रपटांची प्रासंगिकताय उजवाडाक हाडून रणबीरान 'आवारा'च्या विशयांनी जातीवादाक कशें संबोधित केलां, जाल्यार श्री 420 हांणी लोभ आनी महत्वाकांक्षेंत खोलायेन भर दिलो, ते सांगले. उपरांतच्या 'प्रेम रोग' आनी 'राम तेरी गंगा मैली' ह्या चित्रपटांत बायलांच्या प्रस्नांचेर आनी समाजीक आव्हानांचेर कथन केल्ल्यान ताची तोखणाय जाली आनी ताका लागून राज कपूर हांची फिल्म निर्मातो म्हणून काळापरस फुडें आशिल्ली नदर संवसाराक दिसली.
रणबीर हाणें नॅशनल फिल्म डेव्हलपमेंट कॉर्पोरेशन (एनएफडीसी), नॅशनल फिल्म आर्काइव्ह्स ऑफ इंडिया (एनएफएआय) आनी फिल्म हेरिटेज फावंडेशन हांच्या सहकार्यान, राज कपूर हांच्या चित्रपटांची पुनर्स्थापना करपाच्या चालू यत्नांचेर भासाभास केली. राज कपूर हांचे धा चित्रपट पयलींच रिस्टोर जाल्यात, डिसेंबर 2024 वर्सा भारतभर प्रदर्शीत करपाची येवजण आसा, अशें तांणी सांगलें. भारतीय सिनेमांत तांचे योगदान म्हत्वाचे आशिल्ल्याचें मान्य करून, राज कपूर हांच्या सिनेमाच्या प्रतिभाशालीपणाक सांबाळपाचें आनी मनयपाचें म्हत्व हांचेर तांणी भर दिलो.
तशेंच ह्या सत्रांत चित्रपट निर्मिती, अभिनय, समाजीक प्रस्न सोडोवपाक सिनेमाची विकसीत जावपी भुमिका हांचेर चर्चा जाली. बापूय जाल्या उपरांत पर्यावरण आनी समाजीक बदला विशीं आपली जागृताय कशी खोलायेन वाडल्या तें सांगून, रणबीरान कलाकारांनी आपली माची वापरून गिन्यान पातळावप आनी जागतीक कामा खातीर काम करचे, अशे सांगलें. तशेंच संवसारभरांतल्या व्हड कलाकारांकडल्यान प्रेरणा घेतना, आकांक्षी कलाकारांक आपली खाशेली शैली सोदपाक प्रोत्साहन दिवन, अभिनयांतल्या तांणी व्यक्तीमत्वाचें म्हत्व उक्तायलें.
कार्यावळ सोंपयतना रणबीर कपूर हांणी हे सत्र घडोवन हाडिल्ले खातीर इफ्फीचे उपकार मानले आनी राज कपूर हांच्या कालबाह्य कृतींचेर परतून एक नदर मारची, असो प्रेक्षकांक उलो मारलो. राहुल रवैल हाणी रणबीराच्या अंतर्दृष्टींत आनीक भर घाली, राज कपूर हांचो चित्रपट उद्देगाचेर तशेंच समाजाचेर टिकपी प्रभावाचेर विचार उक्तायले.
ह्या सत्रात म्हायती आनी प्रसारण मंत्रालयाचे सचीव संजय जाजू; भारतीय चित्रपट निर्माते आनी फेस्टिवल दिग्दर्शक, इफ्फी, शेखर कपूर; म्हायती आनी प्रसारण मंत्रालयाचे संयुक्त सचीव आनी एनएफडीसीचे वेवस्थापकीय संचालक पृथुल कुमार आनी संयुक्त सचीव (फिल्म), म्हायती आनी प्रसारण मंत्रालय वृंदा देसाय हाजीर आशिल्ल्यो.
* * *
PIB IFFI CAST AND CREW | Subhash/Manali/Darshana | IFFI 55
(Release ID: 2076702)
Visitor Counter : 6