#IFFIWood, 24 नोव्‍हेंबर 2024

कला अकादेमींतल्या भरिल्ल्या सभाघरान दिग्गज अभिनेत्री मनीषा कोइराला आनी दूरदर्शी फिल्म निर्मातो विक्रमादित्य मोटवाने हांकां श्रोत्यांनी नेटान ताळयो मारून  उमेदीन येवकार दिलो. ‘हीरामंडी’ मालिकेच्यो प्रतिष्ठित मल्लिकाजान आनी ‘उडान’, ‘लूटेरा’, आनी हेर जायत्या सिनेमां सयत ‘सेक्रेड गेम्स’ ह्या प्रशंसीत मालिकेचो  दिग्दर्शकान ‘फ्रॉम बिग स्क्रीन टू स्ट्रीमिंग प्लॅटफॉर्म्स’ ह्या विशयाचेर आयज 55व्या भारतीय आंतरराष्ट्रीय चित्रपट महोत्सवांत संवाद सादलो. तातूंत फिल्म मोगी, विद्यार्थी, मिडिया कर्मचारी, आनी भारतभरांतले फॅन्स हाजीर आशिल्ले. 

ओटीटी प्लॅटफॉर्माचेर नाटक आनी मालिका वा चित्रपट ह्या दोनूय प्रकारांनी कलाकारां कडल्यान समान पातळेचेर यत्न, तयारी, प्रामाणीकपण आनी मानसिकताय जाय अशें मत  मनीषा कोइरालान ह्या चर्चेंत उक्तायले. "म्हज्या तीस वर्सांच्या कारकिर्दींत हीरामंडी हो हांवें काम केल्लो सगळ्यांत व्हडलो सेट आशिल्लो" अशें तिणें सांगले. तशेंच आपल्या अणभवांचेर तिणें  मोग उक्तायत सांगले की, "म्हाका नाट्यघरांनी वचपाक खूब आवडटा, पूण घरांत बसून बरो कंटेंट पळोवपाकय म्हाका खूब आवडटा." तिच्या मतान दोगांयचेंय आपलें वेगळे अशे म्हत्व आसा, आनी ओटीटीचेर उत्कृश्ट सामुग्रीची गिरेस्तकाय उपलब्ध आसा. "हांव ओटीटी कंटेंट बिंज -वॉच करतां" अशें म्हणत तिणें प्लॅटफॉर्माचें तिका आशिल्ल्या आकर्शणावीशी मान्य केले.

ओटीटी शोचेर काम करपाक कलाकार अजूनय फाटीं सरतात काय अशें विचारतकच,  मनीषान स्पश्टपणान जाप दिली की हे विशीं उद्देगांत चर्चा चालू आसात. "खंयचेंय किदेय नवें आनी अपरिचित आसल्यार चडशे फांवटी  सुरवेक दुबाव येता" अशें तिणें स्पश्ट केलें. पूण बऱ्या परिणामांक लागून लोकांक तें आपणावपाक प्रोत्साहन मेळटा अशें तांणी सांगलें. स्ट्रीमिंग प्लॅटफॉर्माचेर प्रकल्पां विशीं चित्रपट उद्देगांत अजूनय कांय प्रमाणांत आशंका आसा हें तिणें मान्य केलें. पूण "येवपी काळांत ह्यो आशंका उण्यो  जातल्यो" अशी आस्त तिणें उक्तायली. शाहिद कपूर, आलिया भट्ट, वरुण धवन ह्या सारक्या जायत्या कलाकारांनी पयलींच ओटीटी प्लॅटफॉर्माचेर प्रदर्शीत जाल्ल्या चित्रपटांनी काम केलां अशें मनीषा आनी विक्रमादित्य मोटवाने ह्या दोगांयनी नदरेक हाडलें, जाका लागून ह्या माध्यमाच्या वाढत्या स्वीकृतीचो इशारो दिता. 

ओटीटी प्लॅटफॉर्मांचेर काम करप व्हडल्या पडद्यांवेल्यान  'कम डाउन' जाल्ल्याबाशीन  दिसता काय अशें विक्रमादित्य मोटवानेन विचारलें तेन्ना मनीषान जाप दिली की, "नटांनी सांचो मोडचो. म्हाका फकत एकाच प्रकारांत मर्यादीत रावपाची इत्सा नाशिल्ली. एक नट म्हणून " अभिनयाच्या  वेगवेगळ्या आंगांचो सोद घेवपाक जाय." तिणें फुडें सांगलें की, "स्ट्रीमिंग एक गेम चेंजर जावपाचें आसा. ते नव्यो  संदी उगडटा आनी उदयाक येवपी फिल्म निर्मात्यांक, लेखकांक आनी कलाकारांक मुखेल प्रवाहांत येवपाक  प्रोत्साहन दिता."

आदल्या काळांत ज्येष्ठ अभिनेत्रींक जें भुमिका दिताले ताचे तुळेंत वृद्ध बायलां खातीरच्यो भुमिका विकसीत जायत आसात अशेंय मनीषा हांणी सांगले . प्रेक्षकांक दिनवास कारण तांका लागून ओटीटी ल्हव ल्हव सांचो मोडटा अशें तिणें म्हळें. "सिनेमांतय आतां जाण्ट्या कलाकारांक चड मार्मिक भुमिका दितात. 90 आनी 2000 च्या दशका उपरांत खूब कितें बदललां. शिकपा  सारकें खूप आसा" अशें दिग्गज अभिनेत्रीन म्हळें.

संवादांत एका दिग्दर्शकाचो दृष्टीकोन हाडून दोनूय स्वरूपांतल्या यशस्वी प्रकल्पांचें श्रेय मेळपी विक्रमादित्य मोटवाने हांणी मत मांडलें की, “बऱ्या मालिकेंत वेगळ्याच प्रकारची जादू आसता. सृजनशील नदरेन जायतो काळ तिगोवन उरप  कठीण आसा, प्रवाह सुरु दवरप कठीण आनी ह्या काळांत कलाकार  आनी वांगड्यांची उर्जा तिगोवन दवरप म्हत्वाचें” अशेंय तांणी मुखार म्हळें. 

दोनूय फॉर्मेटांतल्या आपल्या अणभवाचेर उलयतना व्हिजनरी दिग्दर्शकान सांगलें की, सांचो मोडपाक म्हाका खूब आवडटा. म्हजे पयले चार चित्रपट सगळे सिनेमा खातीर आशिल्ले. स्ट्रीमिंग प्लॅटफॉर्मांचेर भाशेची गजाल येता तेन्ना मात्शें चड स्वातंत्र्य मेळटा. ओटीटी प्लॅटफॉर्म चड स्वातंत्र्य दितात. मालिका प्रदर्शीत करपा खातीर बजेट आनी लांबाय मर्यादीत आसता, कथा चड भौसा खातीर आसच्यो पडटात.” पूण निर्मिती आनी उपरांतची निर्मिती चड करून सारकीच आसा अशी म्हायती तांणी दिली. “शूटिंगाची प्रक्रिया गतीन जायत आसा. ज्युबिलीचे 10 एपिसोड 90 दिसांनी, ‘सेक्रेड गेम्स’चे  80 दिसांनी शुटींग जाले”’, अशें तांणी सांगलें. शूटिंगाच्या वेळार चड सहज निवड करची पडटा अशें दिग्दर्शकान सांगले.

ओटीटी प्लॅटफॉर्माचेर बरोवपा विशीं उलयतना विक्रमादित्यान म्हायती दिली की, ही एक वेगळी प्रक्रिया आसा. बरयतना एपिसोड आनी वेळ मतींत दवरचो पडटा अशें तांणी सांगले. व्हडल्या पडद्याचेर आनी ओटीटी रिलीजांत समतोल आसचो पडटलो अशें मनीषा आनी विक्रम दोगांयनी मान्य केलें.

मालिकेक दिग्दर्शन दिवप मात्शें कठीण अशें विक्रमान प्रामाणीकपणान मान्य केलें. “शोरनर्सांखातीर खातीर तें आनीक कठीण. जायत्या आंतरराश्ट्रीय मालिकांनी वेगवेगळ्या सीझनाखातीर वेगवेगळे शो रनर आशिल्ले. ओटीटी ही भारतांत  सामकी  नवी गजाल आसा. तांतूत आमी ल्हव ल्हव वयर सरपाक जाय  अशें तांणी मत मांडले. 

विक्रमादित्यान आपल्या निमाण्या उलोवपांत सिनेमाघरांनी सिनेमा पळोवपाचो अणभव सुदारपाची गरज आसा अशेंय मत उक्तायलें. गरजे भायर मध्यंतर आनी लांब जायराती  प्रेक्षकांक आवडनात हाचेर ताणें  भर दिलो. पूण व्हडल्या पडद्याचेर सिनेमाची जादू सदांच उरतली  अशें तांणी म्हळें . ओटीटी प्लॅटफॉर्मांचेर दर्जेदार कुटुंबीक मनरिजवण आनी खाजगी पळोवपाचें स्वातंत्र्य मेळटा अशें तांणी नदरेक हाडलें. दोनूय फॉर्मेटांचें परिपूर्ण मिश्रण सिनेमा विश्वांत एक अपरूप  निर्माण करतलें असो विक्रमादित्य मोटवाने हांणी विश्वास उक्तायलो.

‘शिमो हुपल्या उपरांत जायत्यो नव्यो अद्भुत गजाली घडटात’अशे  बिग स्क्रीन आड ओटीटी ह्या वादविवादांत दोनूय नामनेचे उद्देग जाणकारांचे एकमत जाले. 

* * *

PIB IFFI CAST AND CREW | Subhash/Utkarsha/Darshana | IFFI 55