ব্রাজিলগী রিও দে জেনিরোদা পাংথোক্লিবা জি-২০ মীফমগী নাকলদা ঙসি প্রধান মন্ত্রী শ্রী নরেন্দ্র মোদীনা নোরৱেগী প্রধান মন্ত্রী জোনাস গাহর স্তোর উনখ্রে।

প্রধান মন্ত্রী অনিমক্না লৈবাক অনিগী মরীশিং চাউখৎলক্লিবা অসি য়েংশিনখ্রে অমসুং তোঙান-তোঙানবা হিরমশিংদা মতেং পাংনবা মখা তানা চাউখৎনবা লম্বীশিং খন্নখ্রে। ইন্দিয়া-য়ুরোপিয়ান ফ্রি ত্রেদ এসোসিএসন-ত্রেদ এন্দ ইকোনোমিক পার্তনরশিপ এগ্রিমেন্ত (ইন্দিয়া-ইফতা-তেপা) অসি লৈবাক অনিগী মরীশিংগী মরুওইবা খুমাঙচাউশিনবা অমনি হায়না ফোঙদোক্লদুনা, নোরৱে য়াওনা ইফতা লৈবাকশিংদগী ভারত্তা শেন হেন্না থাদরকপগী মরুওইবা অদু লুচিংবা অনিনা অমুক হন্না খন্নখ্রে।

ব্লু ইকোনোমি, রিন্যুএবল ইনর্জি, গ্রিন হায়দ্রোজেন, সোলার অমসুং ৱিন্দ প্রোজেকশিং, জিও-থর্মেল ইনর্জি, গ্রিন সিপ্পিং, কার্বোন কেপচর য়ুতিলাইজেসন অমসুং স্তোরেজ (সি সি য়ু এস), ঙা য়োকপা, স্পেস অমসুং আর্তিকগুম্বা হিরমশিংদা মতেং পাংনবা হেনগৎহন্নবা মখোয়না লৈবাক অনিগী ওইবা ৱাফমশিং খন্নখ্রে।

লৈবাক অনিনা দরকার ওইবা মালেমগী অমসুং লমদম লমদমগী ওইবা ৱাফমশিং লুচিংবা অনিনা খন্নখ্রে।

***