Ka Press Council of India ka la pynlong ia ka jingrakhe ia ka National Press Day ha ka National Media Centre, New Delhi, kum ka dak jong ka National Press Day 2024. Ha kane ka prokram la wan iashim bynta da u Myntri Sorkar Pdeng ba dei khmih ia ki tnad Information & Broadcasting, Railways, bad Electronics & Information Technology, Ashwini Vaishnaw, bad u Myntri khynnah ki tnad Information & Broadcasting bad Parliamentary Affairs, Dr. L. Murugan, Chairperson ka Press Council of India, Secretary, ka tnad Information & Broadcasting, Justice Ranjana Prakash Desai bad nongthoh khubor Kundan Ramanlal Vyas.

U Myntri Sorkar Pdeng ba dei khmih ia ka tnad Information and Broadcasting, Ashwini Vaishnaw ha ka jingai jingkren lyngba ki lad digital kum u kongsan, u la kdew sha ki kam media ba iar jong ka India ba kynthup 35,000 tylli ki kotkhubor, ki news channel kiba bun bad ki jingdon jingem digital kiba khlain. U Myntri u la ong ba ka jingbei tyngka ha ki rynsan 4G bad 5G ki la kyntiew ia ka India ha ka jingpyniasoh lyngba ki lad digital ha ryngkat ki dor data kiba duna tam ha ka pyrthei.

Hynrei u la kdew ruh sha ki saw tylli ki jingeh ba kongsan ba ka imlang sahlang jong ngi ka iakynduh namar ka jingkylla jong ka media bad ki lad pathai khubor:

1. Ki khubor thok bad ki jingialam bakla

Ka jingpur ki khana thok ka ktah ia ka jingshaniah ia ki media bad ka buh jingma ia ka synshar paidbah. Ha ka jingai jingkren, u Ashwini Vaishnaw u la buh jingkylli shaphang ka jingkiew sted ka digital media bad ka jingbahkhlieh ia ki prokram ba pynmih ha kine ki rynsan. Ia ka Safe Harbor, la sdang ha ki snem 1990 ha ka por ba ka digital media ka dang duna bad ka dei tang ia katto katne ki nongpyndonkam ha ki skul bah bad ki jaka wad bniah, ha kaba la ai jingiada ia kine ki rynsan na kano kano ka jingbahkhlieh namar ki kam jong ki nongpyndonkam ia ki.

U la ong ba ha ka pyrthei, ki jingiatai nia ki la kham bun shaphang ka jingiahap jong ka Safe Harbour ha kane ka juk mynta, namar kane ka plie lad ia ka jingialam bakla, ki jingkulmar bad ki kam pyntriem. “Hato ki rynsan kiba trei ha ka jaka kaba bun bynta kum ka India kim dei ban pdiang ia kiwei kiwei ki jait jingbahkhlieh? Kine ki jingkylli ki pyni ia ka jingdonkam ia ka rukom treikam ba thymmai kaba pynthikna ia ka jingbahkhlieh kaba iada ia ka imlang sahlang jong ka ri,” u la ong.

2. Ka jingsiew kaba biang ia ki nongpynmih prokram

Ka jingkylla na ki kam ba mynshuwa sha ka digital media ka la ktah bha ia ki lad ai jingtip ba rim, kiba niewkor bha ia ka jingbud ia ki kyndon ha ka thoh khubor. U Vaishnaw u la ong ba dei ban don ka jingsiew kaba iahap ia kiba trei ha kine ki kam, ka ban pynbeit ia ka jingiapher hapdeng ka bor ki rynsan digital bad ki lad ai jingtip ba trei ha ki rukom ba rim. “Ki sienjam jong ki lad ai jingtip ha ki rukom trei ba rim ki dei ban ioh ka jingsiew kaba iahap,” u la ong.

3. Ka jingnoh shiliang ki Algorithm

Ki Algorithm kiba pyniaid ia ki rynsan digital ki kham noh sha ki prokram kiba kham bun ka jingiashim  bynta ki briew bad kiba wanrah ia ki jingsngew kiba khlain bad kine ki ktah ia ka kamai jong ka rynsan. Bun ki por ba kine ki pynsaphriang ia ki khana kiba wanrah ia jingiapait lane ki jingsngew kiba khlain. U Vaishnaw u la kdew sha ka jingktah jong kane ka imlang sahlang, khamtam ha ka ri kaba bun bynta kum ka India bad u la kyntu ia kine ki rynsan ba kin wanrah ia ki jingpynbeit ia ka jingktah jong ki ia ka imlang sahlang jong ngi.

4. Ka jingktah ka Artificial Intelligence ia ki hok Intellectual Property

Ka jingwan jong ka AI ka wanrah ruh ia ki jingeh ia ki nongpynmih prokram haba la pyndonkam ia ki kam jong ki ban ai jinghikai ia ki AI mdoel. U Vaishnaw u la kdew sha ki jingkylla ba khraw ba ka pyrthei ka iakynduh namar ka jingkiew shaphrang ha ka artificial intelligence. U la ong ba ka jingpynbeit ia ki jingeh kiba wan namar ka AI ki long kiba donkam bha ban iada ia ki hok intellectual property (IP) jong kito kiba pynmih nyngkong ia ki prokram. “Ki AI model mynta ki lah ban pynmih prokram katkum ki dataset ba ki la ioh jinghikai. Hynrei ka jia aiu ia ka hok bad ka jingithuh ia kito kiba pynmih nyngkong ia ki kam kiba wanrah ia kane ka data? Hato ki ioh jingsiew ne jingithuh na ka bynta ka kam ba ki la dep trei?” la kylli u Myntri. “Kane kam dei tang ka kam kaba iadei bad ka pisa ka dei ka kam kaba iadei bad ka hok ruh,” u la ong

U Vaishnaw u la kyntu ia kito kiba iadon bynta ha kane ka kam ba kin iamir jingmut lang bad wanrah ia ki lad ban pynbeit ia kine ki jingeh. U la ban jur halor ka jingdonkam ban pynneh ia ka bynta jong ka media kum ka rishot ba khlain jong ka synshar paidbah bad ka jingtei ia ka Viksit Bharat shuwa u 2047.

Ka jingiaid lynti ha ka juk Digital: Ka jingialeh pyrshah ia ki khubor thok bad ka jingbat ia ki nongrim jong ka kam thoh khubor

Da kaba kdew sha ka jingkylla jong ka kam thoh khubor na ki kotkhubor sha ki satellite channel bad mynta sha ka juk digital, u  Dr. Murugan u la kren shaphang ka jingsted jong ka jingpoi ka khubor sha ki briew mynta. Hangne, u la ban jur halor ka jingeh kaba iadei bad ki khubor thok bad u la ong ba “kine ki pur kham sted ban ki virus.” Ki khubor thok, u la ong, ki buh jingma ia ka jingtylli jong ka ri, ki ktah ia ki kynhun shipai bad ki buh jingma ia ka jinglong trai ka India.

Da kaba pdiang ia ka bynta jong ki smartphone ban pynkylla ia ki briew sha ki nongpynmih prokram, u  Dr. Murugan u la ong ba ka dei an don ka jingbahkhlieh bad ka jingpeit ia ka jingialeh pyrshah ia ka jingialam bakla. U la ong ba katba ka hok ban pynsawa ia la ki jingsngew ka dei kaba la ai ha ka Riti Synshar, dei ban don ka jingbahkhlieh haba pyndonkam ia kane ka hok.

U Dr. Murugan u la iaroh ia ki sienjam jong ka Sorkar hapoh ka jingialam jong u Myntri Rangbah Duh Narendra Modi, ba kynthup ia ka jingsdang ia ka Fact Check Unit hapoh ka Press Information Bureau (PIB) ban pynshisha ia ki khubor bad ialeh pyrshah ia ki khubor ba ialam bakla.

U Sanjay Jaju, Secretary, ka tnad Information and Broadcasting u la kren shaphang ki sienjam jong ka Sorkar kiba thmu ban ai jingkyrshan ia ki nongthoh khubor bad kynthup ia ka accreditation, ki skhim na ka bynta ka koit ka khiah bad ka bha ka miat, ki prokram pyntbit lyng ki kynhun kum ka Indian Institute of Mass Communication (IIMC). U la kdew ruh sha ki jingpynkylla kum ka Press and Registration of Periodicals Act, 2023, kaba pynthymmai ia ki kyndon kiba iadei bad ki media. U la kren ruh shaphang ki sienjam ban kyntiew ia ka lad ban ioh jingtip lyngba ki kyrwoh, web screening, conferences bad kiwei kiwei. U la kyntu ruh ban don ka jingiatreilang ban wanrah ia ka jinglong jingman kaba shai, kaba ryntih bad kaba iaineh ha ki kam pathai khubor kaba bat ia ka kam thoh khubor kum ka bor jong ka jingshisha, ka rynsan ia ki sur bapher bapher bad ka jingwanrah ia ka jingkylla kaba bha ha ka imlang sahlang.

Ka bynta jong ka PCI ban bat ia ki nongrim jong ka kam thoh khubor

Ha ka jingai jingkren, ka Justice Ranjana Prrakash Desai ka la kdew sha ka jingbun ki rynsan digital bad kumno ka jingpyndonkam  ia ki media, blog bad podcast ki la pyniaiar ia ki lad ban ioh khubor, ioh jingtip. Kane ka la pynsuk ia ka jingim hynrei ka la wanrah ruh ia ki jingeh bad ka dei namar kane ba ka khubor kaba shisha ka dei ban poi sha ki briew ha ka por kaba biang.

Ka la ong ba ka Press Council of India ka la shim ia ki sienjam ban bat ia ki nongrim jong ka kam thoh khubor, ka jingiada ia ki paidbah bad ka jingpynthikna ba ki media ki long ka rynsan kaba shaniah ban ioh jingtip. Ka la kren ruh shaphang ki khusnam bad ki prokram internship ba pyniaid da ka PCI. “Mynta u snem, 15 ngut ki nongthoh khubor ki la ioh ia ki khusnam National Awards of Excellence ha ki thup bapher bapher bad ki sienjam jong ka PCI ki thmu ban kyntiew ia kito kiba don sap, ka jingpynskhem ia ki nongrim jong ka kam thoh khubor, bad ka jingbahkhlieh bad ka jingtip na ka bynta kito kiba kwah ban long nongthoh khubor," ka la bynrap.

*****