0 5

ವಾರ್ತಾ ಮತ್ತು ಪ್ರಸಾರ ಸಚಿವಾಲಯವು, ರಾಷ್ಟ್ರೀಯ ಚಲನಚಿತ್ರ ಅಭಿವೃದ್ಧಿ ನಿಗಮ (ಎನ್‌ ಎಫ್‌ ಡಿ ಸಿ) ಮತ್ತು ಎಂಟರ್‌ಟೈನ್‌ಮೆಂಟ್ ಸೊಸೈಟಿ ಆಫ್ ಗೋವಾ (ಇ ಎಸ್‌ ಜಿ) ಸಹಯೋಗದೊಂದಿಗೆ 2024ರ ನವೆಂಬರ್ 20 ರಿಂದ 28 ರವರೆಗೆ ಗೋವಾದಲ್ಲಿ 55ನೇ ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವವನ್ನು (ಐ ಎಫ್‌ ಎಫ್‌ ಐ) ಆಯೋಜಿಸಲಿದೆ. 55ನೇ ಭಾರತದ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸ ಒಂದು ರೋಮಾಂಚಕ ಮತ್ತು ವೈವಿಧ್ಯಮಯ ಕಾರ್ಯಕ್ರಮಗಳೊಂದಿಗೆ ಪ್ರಾರಂಭವಾಗಲಿದ್ದು, ಇದು ಜಾಗತಿಕ ಸಿನಿಮಾದ ಅವಿಸ್ಮರಣೀಯ ಆಚರಣೆಯಾಗಲಿದೆ ಎಂದು ಕಥೆಗಾರರು ಮತ್ತು ಸಿನಿಮಾ ಪ್ರೇಮಿಗಳು ಸಂತೋಷಪಡಲು ಕಾರಣವಿದೆ.

55ನೇ ಐ ಎಫ್‌ ಎಫ್‌ ಐ ನ ಕರ್ಟನ್ ರೈಸರ್ ಪತ್ರಿಕಾಗೋಷ್ಠಿಯು ಇಂದು ನಡೆಯಿತು. ಕೇಂದ್ರ ವಾರ್ತಾ ಮತ್ತು ಪ್ರಸಾರ ಮತ್ತು ಸಂಸದೀಯ ವ್ಯವಹಾರಗಳ ರಾಜ್ಯ ಸಚಿವ ಡಾ. ಎಲ್. ಮುರುಗನ್, ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಶ್ರೀ ಸಂಜಯ್ ಜಾಜು, ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ವಿಶೇಷ ಕಾರ್ಯದರ್ಶಿ ಶ್ರೀಮತಿ ನೀರಜಾ ಶೇಖರ್, ಐ ಎಫ್‌ ಎಫ್‌ ಐ ಉತ್ಸವ ನಿರ್ದೇಶಕ ಶ್ರೀ ಶೇಖರ್ ಕಪೂರ್, ಸಿ ಬಿ ಎಫ್‌ ಸಿ ಅಧ್ಯಕ್ಷ ಶ್ರೀ ಪ್ರಸೂನ್ ಜೋಶಿ ಮತ್ತು ಸಚಿವಾಲಯದ ಹಿರಿಯ ಅಧಿಕಾರಿಗಳು ಮಾಧ್ದಯಮಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.

ಡಾ. ಎಲ್. ಮುರುಗನ್ ಅವರು ಜಾಗತಿಕ ವೇದಿಕೆಯಲ್ಲಿ ಉತ್ಸವದ ಪ್ರತಿಷ್ಠಿತ ಪಾತ್ರವನ್ನು ಎತ್ತಿ ತೋರಿಸಿದರು. "ಐ ಎಫ್‌ ಎಫ್‌ ಐ ಭಾರತಕ್ಕೆ ಮಾತ್ರವಲ್ಲದೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಾನ್‌ ನಂತಹ ಜಾಗತಿಕ ಉತ್ಸವಗಳಿಗೆ ಹೋಲಿಸಬಹುದಾದ ಒಂದು ಹೆಗ್ಗುರುತಾಗಿದೆ" ಎಂದು ಅವರು ಹೇಳಿದರು. ಉತ್ಸವದ ಅನುಭವವನ್ನು ಉತ್ಕೃಷ್ಟಗೊಳಿಸಲು ಪ್ರತಿ ವರ್ಷ ಪರಿಚಯಿಸಲಾದ ವಿಶಿಷ್ಟ ಉಪಕ್ರಮಗಳ ಬಗ್ಗೆ ಡಾ. ಮುರುಗನ್ ಒತ್ತಿ ಹೇಳಿದರು ಮತ್ತು ಈ ವರ್ಷದ ಆವೃತ್ತಿಯು ಅಂತಾರಾಷ್ಟ್ರೀಯ ಚಲನಚಿತ್ರಗಳಿಂದ ಅಗಾಧ ಪ್ರತಿಕ್ರಿಯೆಯನ್ನು ಪಡೆದಿದೆ, ಇದು ಉತ್ಸವದ ಹೆಚ್ಚುತ್ತಿರುವ ವ್ಯಾಪ್ತಿ ಮತ್ತು ಪ್ರಭಾವಕ್ಕೆ ಸಾಕ್ಷಿಯಾಗಿದೆ ಎಂದು ಅವರು ಹೇಳಿದರು.

ಸಾರ್ವಜನಿಕ ಭಾಗವಹಿಸುವಿಕೆಯನ್ನು ಹೆಚ್ಚಿಸಲು, ಸಚಿವಾಲಯವು ಮುಂಬೈ ಮತ್ತು ಚೆನ್ನೈನಲ್ಲಿನ ಇತ್ತೀಚಿನ ಕಾರ್ಯಕ್ರಮಗಳು ಸೇರಿದಂತೆ ಪ್ರಮುಖ ನಗರಗಳಲ್ಲಿ ಪ್ರಚಾರದ ರೋಡ್ ಶೋಗಳನ್ನು ಆಯೋಜಿಸಿತು, ನಂತರ ಹೈದರಾಬಾದ್‌ ನಲ್ಲಿ ಕಾರ್ಯಕ್ರಮಗಳು ನಡೆಯಲಿವೆ. ಸ್ವಾವಲಂಬಿ ಭಾರತದ ಉತ್ಸಾಹ ಮತ್ತು ಐ ಎಫ್‌ ಎಫ್‌ ಐ ಅನ್ನು ಜಾಗತಿಕವಾಗಿ ಪ್ರತಿಷ್ಠಿತ ಸಿನಿಮೀಯ ಕಾರ್ಯಕ್ರಮವಾಗಿ ಸ್ಥಾಪಿಸುವ ಪ್ರಧಾನಿ ಶ್ರೀ ನರೇಂದ್ರ ಮೋದಿ ಅವರ ದೂರದೃಷ್ಟಿಯನ್ನು ಪ್ರತಿಬಿಂಬಿಸುವ ಈ ಉತ್ಸವವನ್ನು ತಮ್ಮ ಸ್ವಂತ ಉತ್ಸವವೆಂದು ಪರಿಗಣಿಸಬೇಕೆಂದು ಡಾ. ಮುರುಗನ್ ಉದ್ಯಮದ ಪ್ರಮುಖರನ್ನು ಒತ್ತಾಯಿಸಿದರು. ಗೋವಾದಲ್ಲಿ ನಡೆಯಲಿರುವ ಉತ್ಸವದಲ್ಲಿ ಪಾಲ್ಗೊಳ್ಳುವಂತೆ ಅವರು ಜನತೆಗೆ ಮನವಿ ಮಾಡಿದರು.

ಐ ಎಫ್‌ ಎಫ್‌ ಐ 2024ರ ವಿಷಯ: 'ಯಂಗ್ ಫಿಲ್ಮ್ ಮೇಕರ್ಸ್' - "ದ ಫ್ಯೂಚರ್‌ ಈಸ್‌ ನೌ"

ಐ ಎಫ್‌ ಎಫ್‌ ಐ 2024ರ ವಿಷಯವು ಕೇಂದ್ರ ವಾರ್ತಾ ಮತ್ತು ಪ್ರಸಾರ ಸಚಿವರಾದ ಶ್ರೀ ಅಶ್ವಿನಿ ವೈಷ್ಣವ್ ಅವರ ದೃಷ್ಟಿಯಂತೆ "ಯುವ ಚಲನಚಿತ್ರ ನಿರ್ಮಾತೃಗಳು" ಮೇಲೆ ಕೇಂದ್ರೀಕರಿಸುತ್ತದೆ, ಸೃಜನಶೀಲತೆಯ ಭವಿಷ್ಯವನ್ನು ರೂಪಿಸುವಲ್ಲಿ ಅವರ ಸಾಮರ್ಥ್ಯವನ್ನು ಗುರುತಿಸುತ್ತದೆ.

ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿ ಸಂಜಯ್ ಜಾಜು ಅವರು ಇಂದು ತಮ್ಮ ಆರಂಭಿಕ ಹೇಳಿಕೆಯಲ್ಲಿ, “ಭಾರತವು ವಿಶ್ವದ ಅತಿದೊಡ್ಡ ಚಲನಚಿತ್ರ ನಿರ್ಮಾಣ ರಾಷ್ಟ್ರವಾಗಿ ವೇಗವಾಗಿ ಹೊರಹೊಮ್ಮುತ್ತಿದೆ, ನಮ್ಮ ಉದ್ಯಮದಲ್ಲಿ ಹೊಸ, ಉದಯೋನ್ಮುಖ ಧ್ವನಿಗಳು ರಾಷ್ಟ್ರವನ್ನು ರೂಪಿಸುವಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತವೆ ಎಂದು ಹೇಳಿದರು. ಐ ಎಫ್‌ ಎಫ್‌ ಐ 2024 ಅನ್ನು ಚಲನಚಿತ್ರ ನಿರ್ಮಾತೃಗಳು ಮತ್ತು ಚಿತ್ರಪ್ರೇಮಿಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ ಮತ್ತು ವಿಶೇಷವಾಗಿ ರಾಷ್ಟ್ರದ ಸಾಂಸ್ಕೃತಿಕ ನಿರೂಪಣೆಯನ್ನು ಆದ್ಯತೆ ನೀಡುತ್ತದೆ ಎಂದು ಹೇಳಿದರು.

ಕ್ರಿಯೇಟಿವ್ ಮೈಂಡ್ಸ್ ಆಫ್ ಟುಮಾರೊ ಪ್ಲಾಟ್‌ಫಾರ್ಮ್ ಉಪಕ್ರಮವನ್ನು ಹಿಂದಿನ ಆವೃತ್ತಿಗಳಲ್ಲಿದ್ದ 75 ರಿಂದ 100 ಯುವ ಪ್ರತಿಭೆಗಳಿಗೆ ವಿಸ್ತರಿಸಲಾಗಿದೆ. ದೇಶಾದ್ಯಂತ ಚಲನಚಿತ್ರ ಶಾಲೆಗಳ 400 ಯುವ ಚಲನಚಿತ್ರ ವಿದ್ಯಾರ್ಥಿಗಳಿಗೆ ಐ ಎಫ್‌ ಎಫ್‌ ಐ ನಲ್ಲಿ ಭಾಗವಹಿಸಲು ಸಚಿವಾಲಯವು ಅನುಕೂಲ ಮಾಡಿಕೊಡುತ್ತಿದೆ.

ಭಾರತದಾದ್ಯಂತ ಯುವ ಚಲನಚಿತ್ರ ನಿರ್ಮಾಣ ಪ್ರತಿಭೆಯನ್ನು ಗುರುತಿಸಲು ಹೊಸ ವಿಭಾಗ ಮತ್ತು ಅತ್ಯುತ್ತಮ ಚೊಚ್ಚಲ ಭಾರತೀಯ ನಿರ್ದೇಶಕ ಪ್ರಶಸ್ತಿಯನ್ನು ಸ್ಥಾಪಿಸಲಾಗಿದೆ. ಮಾಸ್ಟರ್‌ ಕ್ಲಾಸ್‌ ಗಳು, ಪ್ಯಾನೆಲ್ ಚರ್ಚೆಗಳು, ಚಲನಚಿತ್ರ ಮಾರುಕಟ್ಟೆ ಮತ್ತು ಚಲನಚಿತ್ರ ಪ್ಯಾಕೇಜ್‌ ಗಳುನ್ನು ಯುವ ರಚನೆಕಾರರಿಗಾಗಿ ವಿನ್ಯಾಸಗೊಳಿಲಾಗಿದೆ. ಐ ಎಫ್‌ ಎಫ್‌ ಐ 2024 ಸಿನಿಮಾ ದಿಗ್ಗಜರಿಗೆ ಗೌರವವನ್ನು ಸಲ್ಲಿಸುತ್ತದೆ ಮತ್ತು ವಿಶೇಷ ವಿಭಾಗಗಳು ಮತ್ತು ಪ್ರದರ್ಶನಗಳ ಮೂಲಕ ವೈವಿಧ್ಯಮಯ ದೃಷ್ಟಿಕೋನಗಳನ್ನು ಪ್ರದರ್ಶಿಸುತ್ತದೆ, ಇದು ಗೋವಾದ ಪ್ರೇಕ್ಷಕರಿಗೆ ಅನನ್ಯ ಅನುಭವವನ್ನು ನೀಡುತ್ತದೆ.

ವಾರ್ತಾ ಮತ್ತು ಪ್ರಸಾರ ಸಚಿವಾಲಯದ ಕಾರ್ಯದರ್ಶಿಯವರು 55ನೇ ಐ ಎಫ್‌ ಎಫ್‌ ಐ ನ ಸಹಯೋಗದ ಸಾರವನ್ನು ಎತ್ತಿ ತೋರಿಸಿದರು ಮತ್ತು ಇದು ನಿಜವಾಗಿಯೂ ಉದ್ಯಮಕ್ಕಾಗಿ ಮತ್ತು ಉದ್ಯಮದಿಂದ ನಡೆಸಲ್ಪಡುವ ಉತ್ಸವ ಎಂದು ವಿವರಿಸಿದರು, ಹೆಸರಾಂತ ಚಲನಚಿತ್ರ ನಿರ್ದೇಶಕ ಶೇಖರ್ ಕಪೂರ್ ಉತ್ಸವದ ನಿರ್ದೇಶಕರಾಗಿರುವುದನ್ನು ಐತಿಹಾಸಿಕ ಎಂದು ಕರೆದ ಅವರು, ‘ಚಿತ್ರೋತ್ಸವದ ಇತಿಹಾಸದಲ್ಲಿಯೇ ಮೊದಲ ಬಾರಿಗೆ ಈ ಸಂಪೂರ್ಣ ಉಪಕ್ರಮದ ಚುಕ್ಕಾಣಿ ಹಿಡಿದಿರುವ ಉದ್ಯಮಕ್ಕೆ ಉತ್ಸವವನ್ನು ಹಸ್ತಾಂತರಿಸುವ ಸಂಪ್ರದಾಯವನ್ನು ನಾವು ಪ್ರಾರಂಭಿಸಿದ್ದೇವೆ ಎಂದು ಹೇಳಿದರು.

ಐ ಎಫ್‌ ಎಫ್‌ ಐ: ಕಥೆ ಹೇಳುವ ಕಲೆಯನ್ನು ಆಚರಿಸಲಾಗುತ್ತಿದೆ

ಉತ್ಸವದ ನಿರ್ದೇಶಕ ಶೇಖರ್ ಕಪೂರ್ ಸಿನಿಮಾದಲ್ಲಿ ಕಥೆ ಹೇಳುವಿಕೆಯ ಪ್ರಮುಖ ಪಾತ್ರವನ್ನು ಒತ್ತಿಹೇಳಿದರು ಮತ್ತು ಇದು ಸಿನಿಮಾ ಅನುಭವದ ಹೃದಯ ಎಂದು ಬಣ್ಣಿಸಿದರು.

"ಶೀಘ್ರವಾಗಿ ವಿಕಸನಗೊಳ್ಳುತ್ತಿರುವ ಜಗತ್ತಿನಲ್ಲಿ, ಕಥೆ ಹೇಳುವ ಕಲೆಯನ್ನು ಸಂರಕ್ಷಿಸುವುದು ಹಿಂದೆಂದಿಗಿಂತಲೂ ಹೆಚ್ಚು ಮುಖ್ಯವಾಗಿದೆ" ಎಂದು ಅವರು ಹೇಳಿದರು, ಕಥೆಗಳು ಸಿನಿಮಾವನ್ನು ಶಕ್ತಿಯುತವಾಗಿಸುತ್ತವೆ ಎಂದು ಒತ್ತಿ ಹೇಳಿದರು. ಅವರ ಸಂದೇಶವು ಈ ಕಾಲಾತೀತ ಕಲಾ ಪ್ರಕಾರವನ್ನು ಗೌರವಿಸುವ ಮತ್ತು ಉತ್ತೇಜಿಸುವ ಉತ್ಸವದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ.

ಭಾರತ: ಪ್ರಕ್ಷುಬ್ಧ ಕನಸುಗಳ ನಾಡು

ಸಿ ಬಿ ಎಫ್‌ ಸಿ ಅಧ್ಯಕ್ಷ ಪ್ರಸೂನ್ ಜೋಶಿ ಭಾರತವನ್ನು "ಪ್ರಕ್ಷುಬ್ಧ ಕನಸುಗಳ ನಾಡು" ಎಂದು ಬಣ್ಣಿಸಿದರು ಮತ್ತು ಕಥೆಗಾರರಿಗೆ ತಳಮಟ್ಟದ ಧ್ವನಿಗಳನ್ನು ಹಂಚಿಕೊಳ್ಳಲು ವೇದಿಕೆಯನ್ನು ನೀಡುವ ಮಹತ್ವವನ್ನು ಒತ್ತಿ ಹೇಳಿದರು. ಅಂತಹ ಪ್ರತಿಭೆಗಳನ್ನು ಪೋಷಿಸುವಲ್ಲಿ, ಅವರನ್ನು ಜಾಗತಿಕ ಹಂತಕ್ಕೆ ತರುವಲ್ಲಿ ಐ ಎಫ್‌ ಎಫ್‌ ಐ ನ ಪಾತ್ರವನ್ನು ಅವರು ಎತ್ತಿ ತೋರಿಸಿದರು ಮತ್ತು ಐ ಎಫ್‌ ಎಫ್‌ ಐ 2024ರ ವಿಷಯವನ್ನು ಪುನರುಚ್ಚರಿಸಿದರು. "ಕೇಳದೆ ಉಳಿದಿರುವುದನ್ನು ಪ್ರಪಂಚದೊಂದಿಗೆ ಹಂಚಿಕೊಳ್ಳಬೇಕು" ಎಂದು ಅವರು ಹೇಳಿದರು, ನಾಳಿನ ಸೃಜನಶೀಲ ಮನಸ್ಸುಗಳ ಮೂಲಕ ಈ ಉದಯೋನ್ಮುಖ ಧ್ವನಿಗಳನ್ನು ಪೋಷಿಸುವಲ್ಲಿ ಮತ್ತು ಬೆಂಬಲಿಸುವಲ್ಲಿ ಸಚಿವಾಲಯದ ಪ್ರಯತ್ನಗಳನ್ನು ಶ್ಲಾಘಿಸಿದರು.

ಐ ಎಫ್‌ ಎಫ್‌ ಐ 2024 ರ ಪ್ರಮುಖ ಮುಖ್ಯಾಂಶಗಳು

1. ಜಾಗತಿಕ ಭಾಗವಹಿಸುವಿಕೆ ಮತ್ತು ಚಲನಚಿತ್ರ ಪ್ರದರ್ಶನಗಳು

ಈ ವರ್ಷದ ಐ ಎಫ್‌ ಎಫ್‌ ಐ 101 ದೇಶಗಳಿಂದ 1,676 ಸಲ್ಲಿಕೆಗಳನ್ನು ಸ್ವೀಕರಿಸಿದೆ, ಇದು ಉತ್ಸವದ ಬೆಳೆಯುತ್ತಿರುವ ಅಂತಾರಾಷ್ಟ್ರೀಯ ಸ್ಥಾನಮಾನಕ್ಕೆ ಸಾಕ್ಷಿಯಾಗಿದೆ. ಐ ಎಫ್‌ ಎಫ್‌ ಐ 2024 15 ವಿಶ್ವ ಪ್ರೀಮಿಯರ್‌ ಗಳು, 3 ಅಂತಾರಾಷ್ಟ್ರೀಯ ಪ್ರೀಮಿಯರ್‌ ಗಳು, 40 ಏಷ್ಯನ್ ಪ್ರೀಮಿಯರ್‌ ಗಳು ಮತ್ತು 106 ಭಾರತೀಯ ಪ್ರೀಮಿಯರ್‌ ಗಳು ಸೇರಿದಂತೆ 81 ದೇಶಗಳಿಂದ 180+ ಅಂತಾರಾಷ್ಟ್ರೀಯ ಚಲನಚಿತ್ರಗಳನ್ನು ಪ್ರದರ್ಶಿಸುತ್ತದೆ. ಇವು ಜಾಗತಿಕ ಸರ್ಕ್ಯೂಟ್‌ ನಿಂದ ಹೆಸರಾಂತ ಮತ್ತು ಪ್ರಶಸ್ತಿ ವಿಜೇತ ಚಲನಚಿತ್ರಗಳ ಆಯ್ಕೆಯಾಗಿರುವುದರಿಂದ, ಈ ವರ್ಷದ ಉತ್ಸವವು ಪ್ರೇಕ್ಷಕರ ಮೇಲೆ ಶಾಶ್ವತವಾದ ಪರಿಣಾಮವನ್ನು ಬೀರಲು ಸಿದ್ಧವಾಗಿದೆ.

2. ಆಸ್ಟ್ರೇಲಿಯಾ ಫೋಕಸ್ ದೇಶವಾಗಿರುತ್ತದೆ

ಆಸ್ಟ್ರೇಲಿಯಾ ಚಲನಚಿತ್ರಗಳ ಮೀಸಲಾದ ಪ್ಯಾಕೇಜ್ ಮತ್ತು ಉತ್ಸವದಲ್ಲಿ ಬಲವಾದ ಉಪಸ್ಥಿತಿಯೊಂದಿಗೆ ಐ ಎಫ್‌ ಎಫ್‌ ಐ 2024 ದಲ್ಲಿ ಆಸ್ಟ್ರೇಲಿಯಾವು ಕೇಂದ್ರೀಕೃತ ರಾಷ್ಟ್ರವಾಗಿದೆ. ಪ್ರಮುಖವಾಗಿ ಸ್ಕ್ರೀನ್ ಆಸ್ಟ್ರೇಲಿಯಾ ಮತ್ತು ಎನ್‌ ಎಫ್‌ ಡಿ ಸಿ ನಡುವಿನ ತಿಳುವಳಿಕೆ ಒಪ್ಪಂದ, ಉತ್ಸವದಲ್ಲಿ ಪ್ರಮುಖ ಆಸ್ಟ್ರೇಲಿಯಾದ ಚಲನಚಿತ್ರ ನಿರ್ಮಾಪಕರು ಭಾಗವಹಿಸಲು ಮತ್ತು ಫಿಲ್ಮ್ ಬಜಾರ್ ಮತ್ತು ಆಸ್ಟ್ರೇಲಿಯಾದ ವಿಶಿಷ್ಟ ಚಿತ್ರೀಕರಣದ ಸ್ಥಳಗಳು ಮತ್ತು ಸಹ-ನಿರ್ಮಾಣಗಳನ್ನು ಉತ್ತೇಜಿಸುವ AusFilm ನ ಪ್ರದರ್ಶನವನ್ನು ಒಳಗೊಂಡಿದೆ.

3. ಉದ್ಘಾಟನಾ ಚಲನಚಿತ್ರ: ಮೈಕೆಲ್ ಗ್ರೇಸಿ ಅವರ ಬೆಟರ್ ಮ್ಯಾನ್

ಉತ್ಸವವು ಮೈಕೆಲ್ ಗ್ರೇಸಿ ಅವರ ಬೆಟರ್ ಮ್ಯಾನ್‌ ಏಷ್ಯಾದ ಪ್ರಥಮ ಪ್ರದರ್ಶನದೊಂದಿಗೆ ಪ್ರಾರಂಭವಾಗುತ್ತದೆ, ಇದು ಆಸ್ಟ್ರೇಲಿಯನ್ ಚಲನಚಿತ್ರವಾಗಿದ್ದು, ಇದು ಅಪ್ರತಿಮ ಬ್ರಿಟಿಷ್ ಪಾಪ್ ತಾರೆ ರಾಬಿ ವಿಲಿಯಮ್ಸ್‌ ಜೀವನದ ಆಕರ್ಷಕ ನೋಟವನ್ನು ನೀಡುತ್ತದೆ.

4. ಸತ್ಯಜಿತ್ ರೇ ಜೀವಮಾನ ಸಾಧನೆ ಪ್ರಶಸ್ತಿ: ಐ ಎಫ್‌ ಎಫ್‌ ಐ 2024 ರಲ್ಲಿ ಆಸ್ಟ್ರೇಲಿಯಾದ ಹೆಸರಾಂತ ಮತ್ತು ಪ್ರಶಸ್ತಿ ವಿಜೇತ ನಿರ್ದೇಶಕ ಫಿಲಿಪ್ ನೋಯ್ಸ್ ಅವರಿಗೆ ಸತ್ಯಜಿತ್ ರೇ ಜೀವಮಾನ ಸಾಧನೆ ಪ್ರಶಸ್ತಿಯನ್ನು ಪ್ರದಾನ ಮಾಡಲಾಗುತ್ತದೆ. ಅವರು ಅಸಾಧಾರಣ ಕಥೆ ಹೇಳುವಿಕೆ ಮತ್ತು ಸಸ್ಪೆನ್ಸ್, ಸಾಂಸ್ಕೃತಿಕವಾಗಿ ಪ್ರತಿಧ್ವನಿಸುವ ಚಲನಚಿತ್ರಗಳನ್ನು ಸೃಷ್ಟಿಸುವಲ್ಲಿ ಹೆಸರುವಾಸಿಯಾಗಿದ್ದಾರೆ. ನೋಯ್ಸ್ ಅವರ ಚಿತ್ರಕಥೆಯು ಪೇಟ್ರಿಯಾಟ್ ಗೇಮ್ಸ್, ಕ್ಲಿಯರ್ ಮತ್ತು ಪ್ರೆಸೆಂಟ್ ಡೇಂಜರ್, ಸಾಲ್ಟ್, ದಿ ಸೇಂಟ್, ದಿ ಬೋನ್ ಕಲೆಕ್ಟರ್ ಮತ್ತು ಇನ್ನೂ ಅನೇಕ ಸಾಂಪ್ರದಾಯಿಕ ಚಲನಚಿತ್ರಗಳನ್ನು ಒಳಗೊಂಡಿದೆ. ಹ್ಯಾರಿಸನ್ ಫೋರ್ಡ್, ನಿಕೋಲ್ ಕಿಡ್ಮನ್, ಏಂಜಲೀನಾ ಜೋಲೀ, ಡೆನ್ಜೆಲ್ ವಾಷಿಂಗ್ಟನ್ ಮತ್ತು ಮೈಕೆಲ್ ಕೇನ್ ಅವರಂತಹ ಪ್ರಸಿದ್ಧ ನಟರೊಂದಿಗಿನ ಅವರ ಸಹಯೋಗಗಳು ಸಿನಿಮಾದ ಮೇಲೆ ಅವರ ಶಾಶ್ವತ ಪ್ರಭಾವವನ್ನು ಒತ್ತಿಹೇಳುತ್ತವೆ.

5. ಅಂತಾರಾಷ್ಟ್ರೀಯ ಸ್ಪರ್ಧೆಯ ವಿಭಾಗ: 15 ಚಲನಚಿತ್ರಗಳನ್ನು (12 ಅಂತಾರಾಷ್ಟ್ರೀಯ + 3 ಭಾರತೀಯ) ಅತ್ಯುತ್ತಮ ಚಲನಚಿತ್ರ ಪ್ರಶಸ್ತಿ, ಗೋಲ್ಡನ್ ಪೀಕಾಕ್ ಮತ್ತು 40 ಲಕ್ಷ ರೂಪಾಯಿಗಳಿಗೆ ಸ್ಪರ್ಧಿಸಲು ಆಯ್ಕೆ ಮಾಡಲಾಗಿದೆ. ಅತ್ಯುತ್ತಮ ಚಲನಚಿತ್ರದ ಹೊರತಾಗಿ, ತೀರ್ಪುಗಾರರು ಅತ್ಯುತ್ತಮ ನಿರ್ದೇಶಕ, ಅತ್ಯುತ್ತಮ ನಟ, ಅತ್ಯುತ್ತಮ ನಟಿ, ವಿಶೇಷ ತೀರ್ಪುಗಾರರ ಪ್ರಶಸ್ತಿ ವಿಭಾಗದಲ್ಲಿ ವಿಜೇತರನ್ನು ನಿರ್ಧರಿಸುತ್ತಾರೆ.

6. ಅತ್ಯುತ್ತಮ ಚಲನಚಿತ್ರ ಚೊಚ್ಚಲ ನಿರ್ದೇಶಕ - 5 ಅಂತಾರಾಷ್ಟ್ರೀಯ + 2 ಭಾರತೀಯ ಚಲನಚಿತ್ರಗಳು ಈ ವಿಭಾಗದಲ್ಲಿ ಸಿಲ್ವರ್ ಪೀಕಾಕ್, 10 ಲಕ್ಷ ನಗದು ಬಹುಮಾನ ಮತ್ತು ಪ್ರಮಾಣಪತ್ರಕ್ಕಾಗಿ ಸ್ಪರ್ಧಿಸುತ್ತವೆ.

7. ಅಂತಾರಾಷ್ಟ್ರೀಯ ಜ್ಯೂರಿ - ಖ್ಯಾತ ಭಾರತೀಯ ಚಲನಚಿತ್ರ ನಿರ್ಮಾಪಕ ಮತ್ತು ನಟ ಅಶುತೋಷ್ ಗೋವಾರಿಕರ್ (ಅಧ್ಯಕ್ಷರು), ಸಿಂಗಾಪುರದ ಪ್ರಸಿದ್ಧ ಬರಹಗಾರ, ನಿರ್ದೇಶಕ ಮತ್ತು ನಿರ್ಮಾಪಕ ಆಂಥೋನಿ ಚೆನ್, ಗೌರವಾನ್ವಿತ ಯುಕೆ ನಿರ್ಮಾಪಕ ಎಲಿಜಬೆತ್ ಕಾರ್ಲ್ಸೆನ್,  ಏಷ್ಯಾ ಮೂಲದ ಪ್ರತಿಷ್ಠಿತ ನಿರ್ಮಾಪಕ ಫ್ರಾನ್ ಬೋರ್ಜಿಯಾ ಮತ್ತು ಹೆಸರಾಂತ ಆಸ್ಟ್ರೇಲಿಯಾದ ಚಲನಚಿತ್ರ ಸಂಕಲನಕಾರ ಜಿಲ್ ಬಿಲ್ಕಾಕ್ .

8. ಭಾರತೀಯ ಪನೋರಮಾ: ಭಾರತದ ಸಿನಿಮಾ ವೈವಿಧ್ಯತೆಯನ್ನು ಪ್ರದರ್ಶಿಸುವುದು: ಭಾರತೀಯ ಪನೋರಮಾ ವಿಭಾಗವು ಭಾರತದ ಶ್ರೀಮಂತ ಸಾಂಸ್ಕೃತಿಕ ಮತ್ತು ಭಾಷಾ ವೈವಿಧ್ಯತೆಯನ್ನು ಪ್ರತಿನಿಧಿಸುವ 25 ಫೀಚರ್ ಮತ್ತು 20 ನಾನ್‌-ಫೀಚರ್ ಚಲನಚಿತ್ರಗಳನ್ನು ಪ್ರದರ್ಶಿಸುತ್ತದೆ. ಈ ವಿಭಾಗವು ರಣದೀಪ್ ಹೂಡಾ ನಿರ್ದೇಶನದ ಫೀಚರ್‌ ಚಲನಚಿತ್ರ, ಸ್ವಾತಂತ್ರ್ಯ ವೀರ್ ಸಾವರ್ಕರ್ (ಹಿಂದಿ) ಮತ್ತು ನಾನ್-ಫೀಚರ್ ಚಲನಚಿತ್ರ ಘರ್ ಜೈಸಾ ಕುಚ್ (ಲಡಾಖಿ) ಒಳಗೊಂಡಿದೆ.

9. ಅತ್ಯುತ್ತಮ ಭಾರತೀಯ ಚೊಚ್ಚಲ ನಿರ್ದೇಶಕ - ದೇಶದಾದ್ಯಂತ ಚಲನಚಿತ್ರ ನಿರ್ಮಾಣದ ಯುವ ಪ್ರತಿಭೆಗಳನ್ನು ಗುರುತಿಸಲು ಸ್ಥಾಪಿಸಲಾದ ಹೊಸ ಪ್ರಶಸ್ತಿ, ಇದನ್ನು 'ಯಂಗ್ ಫಿಲ್ಮ್ ಮೇಕರ್ಸ್' ಅನ್ನು ಕೇಂದ್ರೀಕರಿಸಿದ ಐ ಎಫ್‌ ಎಫ್‌ ಐ ವಿಷಯದೊಂದಿಗೆ ಸಂಯೋಜಿಸಲಾಗಿದೆ. ಒಟ್ಟು 102 ಚಲನಚಿತ್ರಗಳ ಸಲ್ಲಿಕೆಯಿಂದ 5 ಚಲನಚಿತ್ರಗಳು ಈ ಪ್ರಶಸ್ತಿಗಾಗಿ ಸ್ಪರ್ಧಿಸುತ್ತವೆ. ಸಮಾರೋಪ ಸಮಾರಂಭದಲ್ಲಿ ನಿರ್ದೇಶಕರಿಗೆ ಪ್ರಮಾಣಪತ್ರ ಮತ್ತು 5 ಲಕ್ಷ ರೂ.ನಗದು ಬಹುಮಾನ ನೀಡಲಾಗುತ್ತದೆ.

10. ಅತ್ಯುತ್ತಮ ವೆಬ್ ಸರಣಿ (ಒಟಿಟಿ) ಪ್ರಶಸ್ತಿ: ಅತ್ಯುತ್ತಮ ವೆಬ್ ಸರಣಿ (ಒಟಿಟಿ) ಪ್ರಶಸ್ತಿ ವಿಭಾಗವು ಕಳೆದ ವರ್ಷದ 32 ಕ್ಕೆ ಹೋಲಿಸಿದರೆ ಈ ವರ್ಷ 46 ನಮೂದುಗಳನ್ನು ಸ್ವೀಕರಿಸಿದೆ. ವಿಜೇತ ಸರಣಿಗೆ ಪ್ರಮಾಣಪತ್ರ ಮತ್ತು 10 ಲಕ್ಷ ನಗದು ಬಹುಮಾನವನ್ನು ನೀಡಲಾಗುವುದು, ಅದನ್ನು ಸಮಾರೋಪ ಸಮಾರಂಭದಲ್ಲಿ ಪ್ರಕಟಿಸಲಾಗುವುದು.

11. ಶತಮಾನೋತ್ಸವ ಆಚರಣೆಗಳು: ಐ ಎಫ್‌ ಎಫ್‌ ಐ 2024 ಭಾರತೀಯ ಚಿತ್ರರಂಗದ ದಂತಕಥೆಗಳಾದ ರಾಜ್ ಕಪೂರ್, ಮೊಹಮ್ಮದ್ ರಫಿ, ತಪನ್ ಸಿನ್ಹಾ ಮತ್ತು ಅಕ್ಕಿನೇನಿ ನಾಗೇಶ್ವರ ರಾವ್ ಅವರಿಗೆ ಉದ್ಘಾಟನಾ ಮತ್ತು ಸಮಾರೋಪ ಸಮಾರಂಭಗಳಲ್ಲಿ ವಿಶೇಷ ಧ್ವನಿ-ದೃಶ್ಯ ಪ್ರದರ್ಶನಗಳು ಮತ್ತು IFFIesta ನಲ್ಲಿ ತಲ್ಲೀನಗೊಳಿಸುವ ಪ್ರದರ್ಶನಗಳೊಂದಿಗೆ ಗೌರವ ಸಲ್ಲಿಸುತ್ತದೆ.

ಗೌರವದ ಭಾಗವಾಗಿ, ಇಂಡಿಯಾ ಪೋಸ್ಟ್ ಭಾರತೀಯ ಚಿತ್ರರಂಗಕ್ಕೆ ಈ ಅಪ್ರತಿಮ ವ್ಯಕ್ತಿಗಳ ಕೊಡುಗೆಯನ್ನು ಸ್ಮರಿಸುವ ಮೈ ಸ್ಟ್ಯಾಂಪ್ ಸರಣಿಯನ್ನು ಸಹ ಬಿಡುಗಡೆ ಮಾಡುತ್ತದೆ.

ಸರ್ಕಾರದ ರಾಷ್ಟ್ರೀಯ ಚಲನಚಿತ್ರ ಪರಂಪರೆ ಮಿಷನ್ (ಎನ್‌ ಎಫ್‌ ಎಚ್‌ ಎಂ) ಅಡಿಯಲ್ಲಿ ಎನ್‌ ಎಫ್‌ ಎಡ್‌ ಸಿ- ಎನ್‌ ಎಫ್‌ ಎ ಐ ಮರುಸ್ಥಾಪಿಸಿದ ಈ ದಿಗ್ಗಜರ ಶ್ರೇಷ್ಠ ಚಲನಚಿತ್ರಗಳನ್ನು ಐ ಎಫ್‌ ಎಫ್‌ ಐ ನಲ್ಲಿ ಪ್ರದರ್ಶಿಸಲಾಗುತ್ತದೆ.

ಐ ಎಫ್‌ ಎಫ್‌ ಐ ನಲ್ಲಿ ಪ್ರದರ್ಶಿಸಲಾಗುವ ಮರುಸ್ಥಾಪಿತ ಕ್ಲಾಸಿಕ್ಸ್ :ಆ

• ಆವಾರಾ (1951) - ರಾಜ್ ಕಪೂರ್
• ದೇವದಾಸು (1953)- ಅಕ್ಕಿನೇನಿ ನಾಗೇಶ್ವರ ರಾವ್
• ಹಮ್‌ ದೋನೋ (1961) - ಮುಹಮ್ಮದ್ ರಫಿ
• ಹಾರ್ಮೋನಿಯಂ (1975) - ತಪನ್ ಸಿನ್ಹಾ‌

12. ಹೊಸ ಕ್ಯುರೇಟೆಡ್ ವಿಭಾಗಗಳು ಮತ್ತು ಅಂತಾರಾಷ್ಟ್ರೀಯ ಪ್ರೋಗ್ರಾಮಿಂಗ್: ಐ ಎಫ್‌ ಎಫ್‌ ಐ 2024 ನಾಲ್ಕು ಹೊಸ ಅಂತಾರಾಷ್ಟ್ರೀಯ ಪ್ರೋಗ್ರಾಮಿಂಗ್ ವಿಭಾಗಗಳನ್ನು ಪರಿಚಯಿಸುತ್ತದೆ: ರೈಸಿಂಗ್ ಸ್ಟಾರ್ಸ್ (ಉದಯೋನ್ಮುಖ ನಿರ್ದೇಶಕರನ್ನು ಆಚರಿಸುವುದು), ಮಿಷನ್ ಲೈಫ್ (ಪರಿಸರ ಪ್ರಜ್ಞೆಯ ಸಿನಿಮಾವನ್ನು ಹೈಲೈಟ್‌ ಮಾಡುವುದು), ಆಸ್ಟ್ರೇಲಿಯಾ: ಕಂಟ್ರಿ ಆಫ್ ಫೋಕಸ್ ಮತ್ತು ಟ್ರೀಟಿ ಕಂಟ್ರಿ ಪ್ಯಾಕೇಜ್, ಬ್ರಿಟಿಷ್ ಫಿಲ್ಮ್ ಇನ್ಸ್ಟಿಟ್ಯೂಟ್ ನ ಕ್ಯುರೇಟೆಡ್ ಆಯ್ಕೆಗಳನ್ನು ಒಳಗೊಂಡಿದೆ. ಈ ವಿಭಾಗಗಳು ಐ ಎಫ್‌ ಎಫ್‌ ಐ ನ ಕೊಡುಗೆಗಳ ವೈವಿಧ್ಯತೆಯನ್ನು ಉತ್ಕೃಷ್ಟಗೊಳಿಸುತ್ತವೆ, ಪ್ರೇಕ್ಷಕರು ಸ್ಥಿತಿಸ್ಥಾಪಕತ್ವ, ನಾವೀನ್ಯತೆ ಮತ್ತು ಕಲಾತ್ಮಕ ವಿಕಾಸದ ಕಥೆಗಳನ್ನು ಅನ್ವೇಷಿಸಲು ಅನುವು ಮಾಡಿಕೊಡುತ್ತದೆ.

13. ಸಿನಿಮಾದಲ್ಲಿ ಮಹಿಳೆಯರು ಮತ್ತು ಯುವ ಉದಯೋನ್ಮುಖ ಧ್ವನಿಗಳು: ಐ ಎಫ್‌ ಎಫ್‌ ಐ 2024 ಮಹಿಳೆಯರಿಂದ ನಿರ್ದೇಶಿಸಲ್ಪಟ್ಟ 47 ಚಲನಚಿತ್ರಗಳು ಮತ್ತು ಯುವ ಮತ್ತು ಚೊಚ್ಚಲ ಚಲನಚಿತ್ರ ನಿರ್ಮಾತೃಗಳ 66 ಸಿನಿಮಾಗಳೊಂದಿಗೆ ವೈವಿಧ್ಯತೆ ಮತ್ತು ಸೇರ್ಪಡೆಯನ್ನು ಮುಂದುವರೆಸಿದೆ, ಇದು ಕಡಿಮೆ ಪ್ರಾತಿನಿಧ್ಯದ ಧ್ವನಿಗಳನ್ನು ಹೆಚ್ಚಿಸುವ ಉತ್ಸವದ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ. ವುಮೆನ್ ಇನ್ ಸಿನಿಮಾ ವಿಭಾಗವು ಉದಯೋನ್ಮುಖ ಪ್ರತಿಭೆಗಳು ಮತ್ತು ಮಹಿಳಾ ಚಲನಚಿತ್ರ ನಿರ್ಮಾತೃಗಳ ಮಹತ್ವದ ಕೊಡುಗೆಗಳನ್ನು ಎತ್ತಿ ತೋರಿಸುತ್ತದೆ.

14. ಪ್ರದರ್ಶನಕ್ಕಾಗಿ 6 ​​ಹೆಚ್ಚುವರಿ ಚಿತ್ರಮಂದಿರಗಳು: ಐನಾಕ್ಸ್ ಮಡಗಾಂವ್‌ನ 4 ಚಿತ್ರಮಂದಿರಗಳು ಮತ್ತು ಐನಾಕ್ಸ್ ಪೊಂಡಾದಲ್ಲಿ 2 ಚಿತ್ರಮಂದಿರಗಳನ್ನು ಉತ್ಸವದ ಪ್ರದರ್ಶನಗಳಿಗಾಗಿ ಈ ವರ್ಷ ಸೇರಿಸಲಾಗಿದೆ. ಉತ್ಸವದಲ್ಲಿ 5 ಸ್ಥಳಗಳಲ್ಲಿ 270 ಕ್ಕೂ ಹೆಚ್ಚು ಚಲನಚಿತ್ರಗಳನ್ನು ಪ್ರದರ್ಶಿಸಲಾಗುತ್ತದೆ - ಐನಾಕ್ಸ್ ಪಣಜಿಮ್ (4), ಮ್ಯಾಕ್ವಿನೆಜ್ ಪ್ಯಾಲೇಸ್ (1), ಐನಾಕ್ಸ್ ಪೊರ್ವೊರಿಮ್ (4), ಐನಾಕ್ಸ್ ಮಡಗಾಂವ್ (4), ಐನಾಕ್ಸ್ ಪೊಂಡಾ (2) ಮತ್ತು Z ಸ್ಕ್ವೇರ್ ಸಾಮ್ರಾಟ್ ಅಶೋಕ್ (2 ). ಹೆಚ್ಚುವರಿಯಾಗಿ, ಚಲನಚಿತ್ರ ಪ್ರದರ್ಶನಕ್ಕಾಗಿ 5 ಪಿಕ್ಚರ್ ಟೈಮ್ ಗಾಳಿ ತುಂಬಿಸಿ ಟೆಂಟ್‌ ರೀತಿಯಲ್ಲಿ ಮಾಡುವ ಚಿತ್ರಮಂದಿರಗಳನ್ನು ಗೋವಾದಾದ್ಯಂತ ಹಾಕಲಾಗುತ್ತಿದೆ.

15. “ಕ್ರಿಯೇಟಿವ್ ಮೈಂಡ್ಸ್ ಆಫ್ ಟುಮಾರೊ”ಇನಿಶಿಯೇಟಿವ್ ವಿಸ್ತರಣೆ: ಕ್ರಿಯೇಟಿವ್ ಮೈಂಡ್ಸ್ ಆಫ್ ಟುಮಾರೊ ಉಪಕ್ರಮವು ಈ ವರ್ಷ 1,032 ನಮೂದುಗಳೊಂದಿಗೆ ದಾಖಲೆಯ ಭಾಗವಹಿಸುವಿಕೆಯನ್ನು ಕಾಣುತ್ತಿದೆ, ಇದು 2023 ಕ್ಕಿಂತ ದುಪ್ಪಟ್ಟಾಗಿದೆ. ಈ ಕಾರ್ಯಕ್ರಮವು 13 ಚಲನಚಿತ್ರ ನಿರ್ಮಾಣ ಕುಶಲತೆಗಳಲ್ಲಿ ಯುವ ಪ್ರತಿಭೆಗಳನ್ನು ಪೋಷಿಸುತ್ತದೆ. ಮೊದಲ ಬಾರಿಗೆ, 100 ಮಂದಿ ಭಾಗವಹಿಸುವವರನ್ನು ಆಯ್ಕೆ ಮಾಡಲಾಗುವುದು, ಇದು ಮಹತ್ವಾಕಾಂಕ್ಷಿ ಚಲನಚಿತ್ರ ನಿರ್ಮಾಪಕರಿಗೆ ವಿಶಿಷ್ಟವಾದ ವೇದಿಕೆಯನ್ನು ಒದಗಿಸುತ್ತದೆ.

16. ಮಾಸ್ಟರ್‌ಕ್ಲಾಸ್‌ ಗಳು, ಪ್ಯಾನೆಲ್‌ ಗಳು ಮತ್ತು ಉದ್ಯಮದ ತೊಡಗಿಸಿಕೊಳ್ಳುವಿಕೆ: ಎಆರ್ ರೆಹಮಾನ್, ಶಬಾನಾ ಅಜ್ಮಿ, ಮಣಿರತ್ನಂ, ವಿಧು ವಿನೋದ್ ಚೋಪ್ರಾ ಮತ್ತು ಫಿಲಿಪ್ ನೋಯ್ಸ್ ಮತ್ತು ಜಾನ್ ಸೀಲ್ ಅವರಂತಹ ಅಂತಾರಾಷ್ಟ್ರೀಯ ಅತಿಥಿಗಳ ನೇತೃತ್ವದಲ್ಲಿ ಕಲಾ ಅಕಾಡೆಮಿಯಲ್ಲಿ 25+ ಮಾಸ್ಟರ್‌ಕ್ಲಾಸ್‌ ಗಳು ಮತ್ತು ಪ್ಯಾನಲ್ ಚರ್ಚೆಗಳನ್ನು ಚಲನಚಿತ್ರ ಅಭಿಮಾನಿಗಳು ಎದುರುನೋಡಬಹುದು. ಭಾಗವಹಿಸುವವರು ಧ್ವನಿ ವಿನ್ಯಾಸ, ಡಿಜಿಟಲ್ ಯುಗದಲ್ಲಿ ನಟನೆ ಮತ್ತು ಚಲನಚಿತ್ರ ನಿರ್ಮಾಣದ ಭವಿಷ್ಯದ ಒಳನೋಟಗಳನ್ನು ಪಡೆಯುತ್ತಾರೆ.

17. ಫಿಲ್ಮ್ ಬಜಾರ್ 2024, ದಕ್ಷಿಣ ಏಷ್ಯಾದ ಅತಿದೊಡ್ಡ ಚಲನಚಿತ್ರ ಮಾರುಕಟ್ಟೆ: ಫಿಲ್ಮ್ ಬಜಾರ್‌ ನ 18 ನೇ ಆವೃತ್ತಿಯು ಇನ್ನೂ ದೊಡ್ಡದಾಗಿದೆ, ಚಲನಚಿತ್ರ ಮಾರುಕಟ್ಟೆಯ ವಿವಿಧ ವಿಭಾಗಗಳಲ್ಲಿ 350+ ಚಲನಚಿತ್ರ ಯೋಜನೆಗಳನ್ನು ಪ್ರದರ್ಶಿಸುತ್ತದೆ. ಜ್ಞಾನ ಸರಣಿಯು ಚಲನಚಿತ್ರ ನಿರ್ಮಾಣ, ವಿತರಣೆ ಮತ್ತು ಅಂತಾರಾಷ್ಟ್ರೀಯ ಸಹಯೋಗದ ಕುರಿತು ಅಧಿವೇಶನಗಳುಳು ಮತ್ತು ಕಾರ್ಯಾಗಾರಗಳನ್ನು ಒಳಗೊಂಡಿರುತ್ತದೆ. ಫಿಲ್ಮ್ ಬಜಾರ್ ಅನ್ನು ಐ ಎಫ್‌ ಎಫ್‌ ಐ ಜೊತೆಗೆ ನಡೆಸಲಾಗುತ್ತದೆ, ಅಲ್ಲಿ ಕಲ್ಪನೆಗಳು ಜೀವಂತವಾಗುತ್ತವೆ, ಕಥೆಗಳು ಧ್ವನಿಯನ್ನು ಕಂಡುಕೊಳ್ಳುತ್ತವೆ ಮತ್ತು ಕನಸುಗಳು ರೂಪುಗೊಳ್ಳುತ್ತವೆ. ಇಲ್ಲಿಯೇ ಸಿನಿಮಾದ ಭವಿಷ್ಯವು ವರ್ತಮಾನವನ್ನು ಸಂಧಿಸುತ್ತದೆ. 2007 ರಲ್ಲಿ ಪ್ರಾರಂಭವಾದಾಗಿನಿಂದ, ಫಿಲ್ಮ್ ಬಜಾರ್ ದಕ್ಷಿಣ ಏಷ್ಯಾದ ಅತಿದೊಡ್ಡ ಮತ್ತು ಅತ್ಯಂತ ಅಗತ್ಯವಾದ ಚಲನಚಿತ್ರ ಮಾರುಕಟ್ಟೆಯಾಗಿದೆ.

ಈ ವರ್ಷ, ಪೆವಿಲಿಯನ್‌ ಗಳು ಮತ್ತು ಪ್ರದರ್ಶನಗಳನ್ನು ಜಲತೀರದ ವಾಯುವಿಹಾರದ ಉದ್ದಕ್ಕೂ ಸ್ಥಾಪಿಸಲಾಗುವುದು ಮತ್ತು ವಿವಿಧ ದೇಶಗಳು ಮತ್ತು ರಾಜ್ಯಗಳು, ಚಲನಚಿತ್ರ ಉದ್ಯಮ, ಟೆಕ್ ಮತ್ತು ವಿ ಎಫ್‌ ಎಕ್ಸ್ ಉದ್ಯಮ, ಇತ್ಯಾದಿಗಳಿಂದ ಅಗಾಧ ಭಾಗವಹಿಸುವಿಕೆಯ ಭರವಸೆ ನೀಡುತ್ತದೆ. ಫಿಕ್ಕಿ ಜೊತೆಗಿನ ಪಾಲುದಾರಿಕೆಯ ಮೂಲಕ ಪೆವಿಲಿಯನ್‌ ಗಳಲ್ಲಿ ಉದ್ಯಮದ ಭಾಗವಹಿಸುವಿಕೆಯನ್ನು ಹೆಚ್ಚಿಸಲು ಹಲವಾರು ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಈ ವರ್ಷದ ಫಿಲ್ಮ್ ಬಜಾರ್‌ ನಲ್ಲಿ ಮುಕ್ತ 'ಖರೀದಿದಾರರು-ಮಾರಾಟಗಾರರ' ಸಭೆಯನ್ನು ಸಹ ಆಯೋಜಿಸಲಾಗುವುದು, ಅಲ್ಲಿ ಚಲನಚಿತ್ರ ನಿರ್ಮಾಪಕರು ಸಹಯೋಗಿಗಳನ್ನು ಭೇಟಿ ಮಾಡಬಹುದು.

18. ಪ್ರವೇಶಿಸುವಿಕೆ ಮತ್ತು ಒಳಗೊಳ್ಳುವಿಕೆ: 55ನೇ ಐ ಎಫ್‌ ಎಫ್‌ ಐ ಸುಗಮ ಪ್ರವೇಶದ ಐ ಎಫ್‌ ಎಫ್‌ ಐ ಆಗಿರುತ್ತದೆ. ಇದು ಇತಿಹಾಸದಲ್ಲಿ ಮೊದಲನೆಯದು. ಐ ಎಫ್‌ ಎಫ್‌ ಐ ಚಲನಚಿತ್ರೋತ್ಸವವು ಎಲ್ಲಾ ಸಿನಿಪ್ರಿಯರಿಗೆ, ವಿಶೇಷವಾಗಿ ದಿವ್ಯಾಂಗರಿಗೆ ಸೇರಿದಂತೆ ಕಡಿಮೆ ಚಲನಶೀಲತೆ ಹೊಂದಿರುವವರಿಗೆ ಪ್ರವೇಶಯೋಗ್ಯವಾಗುವುದನ್ನು ಖಚಿತಪಡಿಸಿಕೊಳ್ಳಲು, ಐ ಎಫ್‌ ಎಫ್‌ ಐ ಪ್ರವರ್ತಕ ಸಂಸ್ಥೆಯಾದ ʼಸ್ವಯಂʼ ಅನ್ನು ಪ್ರವೇಶಿಸುವಿಕೆ ಪಾಲುದಾರ ಎಂದು ಹೆಸರಿಸಿದೆ. ಐ ಎಫ್‌ ಎಫ್‌ ಐ 2024 ಒಳಗೊಳ್ಳುವಿಕೆಗೆ ಬದ್ಧವಾಗಿದೆ, ಎಲ್ಲಾ ಸ್ಥಳಗಳನ್ನು ಭೌತಿಕವಾಗಿ ಪ್ರವೇಶಿಸಬಹುದಾಗಿದೆ, ದಿವ್ಯಾಂಗರ ಅಗತ್ಯತೆಗಳ ಬಗ್ಗೆ ಸ್ವಯಂಸೇವಕರನ್ನು ಸಂವೇದನಾಶೀಲಗೊಳಿಸುತ್ತದೆ. ಐ ಎಫ್‌ ಎಫ್‌ ಐ ನಲ್ಲಿನ ಚಲನಚಿತ್ರಗಳುಮತ್ತು  ಕಾರ್ಯಕ್ರಮಗಳು ಆಡಿಯೊ ವಿವರಣೆಗಳು ಮತ್ತು ಸಂಕೇತ ಭಾಷೆಯ ವ್ಯಾಖ್ಯಾನ, ಅಪ್ಲಿಕೇಶನ್‌ ಗಳ ಬಳಕೆಯ ಮೂಲಕ ಪ್ರವೇಶಿಸುವಿಕೆಯನ್ನು ಖಚಿತಪಡಿಸುತ್ತವೆ. ಪ್ರಧಾನಮಂತ್ರಿಯವರು ನೀಡಿದ “ಸಬ್ಕಾ ಸಾಥ್, ಸಬ್ಕಾ ವಿಕಾಸ್” ಮನೋಭಾವವನ್ನು ಸಾಕಾರಗೊಳಿಸುವಂತಹ ಪ್ರವೇಶ ವೈಶಿಷ್ಟ್ಯಗಳೊಂದಿಗೆ ಇದನ್ನು ಸಜ್ಜುಗೊಳಿಸಲಾಗಿದೆ.

19. ಉತ್ಸವದ ಸ್ಥಳಗಳ ಬ್ರ್ಯಾಂಡಿಂಗ್ ಮತ್ತು ಅಲಂಕಾರ – ಎನ್‌ ಎಫ್‌ ಡಿ ಸಿ ಮತ್ತು ಇ ಎಸ್‌ ಜಿ ಉತ್ಸವದ ಎಲ್ಲಾ ಸ್ಥಳಗಳಲ್ಲಿ 'ಏಕೀಕೃತ' ಅಲಂಕಾರ ಮತ್ತು ಬ್ರ್ಯಾಂಡಿಂಗ್‌ ಗಾಗಿ ಎನ್‌ ಐ ಡಿ, ಅಹಮದಾಬಾದ್‌ನೊಂದಿಗೆ ಪಾಲುದಾರಿಕೆ ಮಾಡಿಕೊಂಡಿವೆ.

20. ಈ ವರ್ಷ, ಐ ಎಫ್‌ ಎಫ್‌ ಐ ಶ್ರೀಮಂತ ಸಿನಿಮೀಯ ಅನುಭವವನ್ನು ನೀಡುತ್ತದೆ, ಸಾಂಸ್ಕೃತಿಕ ಪರಂಪರೆಯೊಂದಿಗೆ ನಾವೀನ್ಯತೆಯನ್ನು ಸಂಯೋಜಿಸುತ್ತದೆ ಮತ್ತು ಚಲನಚಿತ್ರ ನಿರ್ಮಾಣದ ಉತ್ಸಾಹವನ್ನು ಆಚರಿಸಲು ಪ್ರಪಂಚದಾದ್ಯಂತದ ಪ್ರೇಕ್ಷಕರನ್ನು ಸೆಳೆಯುತ್ತದೆ.

ಪ್ರತಿನಿಧಿ ನೋಂದಣಿ, ಕಾರ್ಯಕ್ರಮದ ವೇಳಾಪಟ್ಟಿಗಳು ಮತ್ತು ಅಪ್‌ ಡೇಟ್‌ ಕುರಿತು ಹೆಚ್ಚಿನ ವಿವರಗಳಿಗಾಗಿ, iffigoa.org ಗೆ ಭೇಟಿ ನೀಡಿ.

ಐ ಎಫ್‌ ಎಫ್‌ ಐ ಬಗ್ಗೆ

ಐ ಎಫ್‌ ಎಫ್‌ ಐ ವಿಶ್ವದ 14 ದೊಡ್ಡ ಮತ್ತು ಅತ್ಯಂತ ಪ್ರತಿಷ್ಠಿತ 'ಅಂತಾರಾಷ್ಟ್ರೀಯ ಸ್ಪರ್ಧೆಯ ಫೀಚರ್‌ ಚಲನಚಿತ್ರೋತ್ಸವಗಳಲ್ಲಿ' ಒಂದಾಗಿದೆ, ಇದು ಜಾಗತಿಕವಾಗಿ ಚಲನಚಿತ್ರೋತ್ಸವಗಳನ್ನು ನಿಯಂತ್ರಿಸುವ ಅಂತಾರಾಷ್ಟ್ರೀಯ ಸಂಸ್ಥೆಯಾಗಿರುವ ಅಂತಾರಾಷ್ಟ್ರೀಯ ಚಲನಚಿತ್ರ ನಿರ್ಮಾಪಕರ ಸಂಘ (ಎಫ್‌ ಐ ಎ ಪಿ ಎಫ್‌) ನಿಂದ ಮಾನ್ಯತೆ ಪಡೆದಿದೆ. ಕಾನ್‌, ಬರ್ಲಿನ್ ಮತ್ತು ವೆನಿಸ್‌ ನಂತಹ ಅಂತಾರಾಷ್ಟ್ರೀಯ ಚಲನಚಿತ್ರೋತ್ಸವಗಳು ಈ ವರ್ಗದ ಅಡಿಯಲ್ಲಿ ಎಫ್‌ ಐ ಎ ಪಿ ಎಫ್‌ ನಿಂದ ಮಾನ್ಯತೆ ಪಡೆದ ಇತರ ಪ್ರತಿಷ್ಠಿತ ಉತ್ಸವಗಳಾಗಿವೆ.

******